TITUS
Svan Prose Texts I (Upper Bal)
Part No. 93
Previous part

Text: 100 
Page of edition: 196 
Line of edition: 8 
100. სემი ლახუ̂ბა, და̈შუ̂დ, თხე̄რე ი მა̄ლ


Line of edition: 9       ლიხ სემი ლახუ̂ბა. ალჲა̈რს მა̄მგუ̂ეშ ხაწუ̂ახ ი ხა̈ბდაუ̂ახ. აშხუ̂
Line of edition: 10    ლადეღ რა̈̄ქუ̂ ხოშა მუხუ̂ბემ: "ლუჩმინად მა, ადო გარჯ გუ̂იჴდენი.
Line of edition: 11    ეშხუ ლაზელა̄ლთე ალჩედდ". ლახუ̂ბად ჩოთმოწმეხ.

Line of edition: 12       ანჷ̄გა̈ნ მაშე̄ნე მუხუ̂ბე, ესღრი, ესღრი შუკუ̂ს, ათხუ̂ი̄დ სამ ლაჭარ
Line of edition: 13    შუკუ̂ს. ამეჩუ ჩუ̂ა̈თბურა̈̄ნ. ანკუ̂ა̈რ ჯჷლა̈ჲ, ოხშყა̈დ ნე̄სგა შუკუ̂ს
Line of edition: 14    ლი̄ზი. ა̈თჴა̈დჷ̄ნ ლექუ̂ე̄რთე̄სგა. ამჩუ ა̈დწუ̂ე̄ნა̄ლე, ა̈ხგუ̂ა̈ბ სემი დია̈რ.
Line of edition: 15    ალჲა̈რ ჩუ ლალე̄მ. ჯა ჩუ̂ადყურდა ლენკი̄რისგა. ათხე მუბირუნღო
Line of edition: 16    ანჴა̈დხ და̈შდუ̂, თხე̄რე ი მა̄ლ. და̈შდუ̂დ ხა̈̄ქუ̂ მა̄ლს: "ხოლა̄მდ ლა̈რიდ
Line of edition: 17    ნა̈ჲ, იმთე დო ლჷღრიდ, ჩუ მა̄მგუ̂ეშ გუ̂იმჴერა უშხუ̂ა̄რეშ". ლა̄წი̄ლდია̄ლისგა
Line of edition: 18    მა̄მა̄დ ა̈თსიკთა̈̄ნხ. სერ და̈შდუ̂დ ხა̈̄ქუ̂ მა̄ლს: "სგა̄დე ი უ̂ახშა̈მ
Line of edition: 19    ახა̈ჲ, მა̄ლ! -- მა̄ლ ჟ'ანჷ̄გა̈ნ ი სგა̄დსკინე ლენკი̄რთე, ა̈ხთხა̄ლ დია̈რს
Line of edition: 20    ი დე̄სა ახხუ̂ი̄დ. ლახტუ̂ი̄ლ და̈შდუ̂ს: "მუგუ̂ა̈ლუ ანტუ̂არე, ამე̄სგა მა̄რე
Line of edition: 21    ლოქ ა̈რი!" სგა̈̄ხჭუ̂ა̄დხ და̈შდუ̂ ი თხე̄რე ი მა̄ლ, ჩუ̂ადფინქო̄რეხ ი
Line of edition: 22    ამჟინ ჩუ̂ადყურდახ ბა̄ზი.

Line of edition: 23       ხოღლიხ ალ ჲორუ ხოხუ̂რა ლახუ̂ბა: "მა̈ჲ ხოჩა, დემხა̈ნ ანჴა̈დ
Line of edition: 24    მუხუ̂ბე!" ხა̈̄ქუ̂ მანე̄სგრა მუხუ̂ბემ: "მი ღური მჷხა̈რ ლათხე̄ლთე".
Line of edition: 25    ანჷ̄გა̈ნ ჰამს, ესღრი ი ესღრი. ალასი ამხაუ̂თე̄სგა ა̈თჴა̈დჷ̄ნ. ამეჩუ
Line of edition: 26    ა̈დწუ̂ე̄ნა̄ლე ლენკი̄რ, ჟ'ა̈ხგუ̂ა̈ბ სემი დია̈რ ი ჩუ ლალე̄მ. ანჴა̈დხ ნა̈ბოზს
Line of edition: 27    და̈შდუ̂, თხე̄რე, მა̄ლ. და̄შდუ̂დ ხაშგუ̂მინ აჯაღ უ̂ოხშა̈მ. სგადსკინე
Line of edition: 28    მა̄ლდ ი რა̈̄ქუ̂: "სგა აგუ̂მითქუ̂ე̄ნა მა̄რე, ბა̄ზიი მა̄რე ა̈რი!" და̈შდუ̂დ
Line of edition: 29    იშგუ̂მინ მა̄რე: "ქა-უნყუ̂ს ა̈ნიჴდ!" ქა̄დ ანჴიდხ ი ჩუ̂ადფინქო̄რეხ
Line of edition: 30    ამჟი. ალჲა̈რ აჩა̈დხ.

Line of edition: 31       ოხღელი ათხე ხოხუ̂რა მუხუ̂ბე: "იმთე აჩა̈დხ ლახუ̂ბა?". ანჷ̄გა̈ნ
Line of edition: 32    ი ესღრი. ალასი ამხაუ̂თე̄სგა ა̈თჴა̈დჷ̄ნ. ამნემ დი̄რა̈ლ შჷყჟი ესდე
Line of edition: 33    ი ჩუ̂ადყურდა. ალ ნა̈ბოზს ანჴა̈დხ ამხაუ̂თე̄სგა აჯაღ ალჲა̈რ ი
Line of edition: 34    იშგუ̂მინხ უ̂ახშა̈მ. სგა̄დსკინე მა̄ლდ ი ქა̄ნჴიდ დი̄რა̈ლ: "ბა̄ზი როქ
Line of edition: 35    დე̄მგუ̂აშუ̂ ლოხმამა დია̈რ!" ალა ჩუ ლალე̄მხ.

Page of edition: 197 
Line of edition: 1       ნაუ̂ახშობენ და̈შდუ̂დ ხა̈̄ქუ̂ თხე̄რა: "ა̈ლმეჴრად მა უშხუ̂ა̄რეშ:
Line of edition: 2    იმთე ჲა̈რ დო ლჷღრიდ, მა̄მგუ̂ეშ გუ̂იმჴერა". თხე̄რემ ხა̈̄ქუ̂ მა̄ლს:
Line of edition: 3    "ახა̄მბა̈უ̂ მა სი!" მა̄ლდ ხა̈̄ქუ̂ და̈შდუ̂ს: "მა̄დეჲ სი ახა̄მბა̈უ̂! -- ჟი ლადე̄სგუნა̄ლისგა
Line of edition: 4    ათჭადუ̂ეხ (\\ ათჭარჟეხ) თხე̄რა. ა̈ნბინე თხე̄რემ:
Line of edition: 5       -- ხოჩა̄უ̂ ნა̈ბოზ გუ̂ა̄რ ჩიგარ ი, ჲაღო, მი ხუ̂ა̈მთქუ̂ა ლჷცურ
Line of edition: 6    სოფელს ი ა̈რი ჩე̄რხა (\\ ჩი̄რხა). ეჩას ერუ̂ა̈̄ჲ ჟ'ანკუ̂ა̄ნე, ა̈ნბჷრჯი, ლიც
Line of edition: 7    ხეზუ̂ბენი ნე̄სგა სოფელ ლექუ̂ა ი თუ̂ით ნალჯუ̂ემს სოფელ მა̈გ ქა იჴდეხ,
Line of edition: 8    ლახ ლიცს ჲა̈რ ოხწესნეხ. -- ამჟი ქა̄დსურლე (\\ ქა̄დსრულე) თხე̄რემ.

Line of edition: 9       ათხე და̈შდუ̂ს: -- სი იმე ხა̈რი, და̈შდუ̂?
Line of edition: 10       -- მი ხუ̂ა̈მთქუ̂ა თა̈ურ (\\ თეურ) მეჯო̈გს ი ხუ̂ითში მაჩე̄ნა̄მ ღოლჲა̄ქს
Line of edition: 11    ჯუ̂ეგხა̈ნქა. ლახ ალ მეჯო̈გს ჲარუ̂ თე̄რა̈ლს ოხფხჷრჷ̄ლი, მიჩა
Line of edition: 12    ჯო̈გი ხჷნსგა̄მ ქა იჴდე, ი ლაფხრჷ̄ლა ხა̄რ: ეშხუ ხაყა გირგუ̂და̈ჲ
Line of edition: 13    გიცა̈რ, შდჷმთე̄სგა ხა̄რ ლუქუ̂ჭე მუჭუ̂ა̈რ. ეჯას ერუ̂ა̈̄ჲ ჩუ̂ოთძიჰნე ი
Line of edition: 14    ტუფს ათჭუ̂ე̄ნნე, მახა ნატფუ̄რს ჩუ̂ადყუ̂ინნე დრო̈უ̂ნ-ი-დრო̈უ̂ნ, ეჩჷნღო
Line of edition: 15    ჟ'ა̈ნგენი, ქა ხოფხრჷ̄ლე, მახა თე̄რა̈ლს ხა̈ზბუნე. -- ამჟი ქა̄დგა̄თუ̂ე
Line of edition: 16    ამნემ ათხე მა̄ლდ:

Line of edition: 17       მი დემთე მა̄რ ლე̄ზი. ამჩუ ყო̄რ ქა̄მენჩუ ხუ̂ა̈მთქუ̂ა შდუგულდს.
Line of edition: 18    შდუგუ̂ს ხა̄რ თეთრიშ ლაშდუგ. მჷჟა̈̄რჟი ქა ჴიდე ქა̄მენჩუ,
Line of edition: 19    ხომჟუნე. ეჩას, ლახ მეცხე̄ნი, ფაულდს ხუ̂ა̈ჴდე თხუმჟი, თეთრს
Line of edition: 20    [ჟ']ა̈ხუ̂კედ.
Line of edition: 21       -- ამჟინ მაჩე̄ნა̄მ ა̈გის ხა̈რი! -- ხა̈̄ქუ̂ხ და̈შდუ̂დ ი თხე̄რემ.

Line of edition: 22       ამჟინ ჩუ̂ადყურდახ. აჩა̈დხ მე̄რმა ლადეღ. ათხე მესმა მუხუ̂ბილდ
Line of edition: 23    ჟ'ა̈ნჰურნე მა̈გ ალჲარე გა̈რგლა ი ლა̄პა̈რ ი აჩა̈დ. აჩა̈დ ი ათხუ̂ი̄დ
Line of edition: 24    მეჯო̈გს. ათხუ̂ი̄დ მეჯო̈გს ი ხა̈̄ქუ̂ მეჯო̈გს: -- იმ ლამედი, ლახ თე̄რა̈ლს
Line of edition: 25    ქა̈̄ჯფხჷრჷ̄ლი?
Line of edition: 26       -- იმ-ი მიშგუ̂ა ჯო̈გიშ ხჷნსგა̄მ!

Line of edition: 27       ამჟინ ქა ლოხყუ̂ილ ხჷნსგა ჯო̈გიშ. ჩუ̂ა̈ძიჰ ბა̄ზი გიცა̈რ, ტუფ
Line of edition: 28    ქა̄თჭუ̂ე̄ნ ი მე̄რმა ლადეღ ანჲა̈ცხუ̂ნე ჟი ი თე̄რა̈ლ, იმუ̂ა̈̄ჲჟი მახა მა̄რა,
Line of edition: 29    ეჯჟი̄ნ მახად ლა̈ხტა̈ხ. ათხე ჯო̈გ ჩუ̂ოთმა̈ზრე ი ესღრი. აჩა̈დ ლჷცურ
Line of edition: 30    სოფელთე̄სგა. ამჩუ ხა̈̄ქუ̂ სოფელს: -- ამჩუ̄ნ ლიცს ლახ [ჲა̈რ] ა̈ჯზუ̂ებნეხ,
Line of edition: 31    იმ ა̈თჴიდედ?

Line of edition: 32       იმ-ი თუ̂ით ნალჯუ̂მი ლუგუ̂ენს.

Line of edition: 33       ჩუ̂ა̈დსკიბხ ამჟი. ბერგ ი კა̄და ახჴიდუ̂ნე ჩი̄ს, ლახა̄დხ ამი̄შ
Line of edition: 34    ლაბჷრჯას. ჟ'ა̈ნკუ̂ა̈რ ალა, ლიც ლა̈ხზუ̂ა̈ბ სოფელს. სოფელდ ქა ლახუ̂ე̄მ
Line of edition: 35    თუ̂ით ნალჯუ̂მი ლუგუ̂ენ ი აჩა̈დ ამჟი.

Line of edition: 36       ამჟი ათა̄სდ შდუგუ̂ს ი ქა ხომჟუნა თეთრ. ხაჴიდ ალას ფაულდ
Line of edition: 37    თხუმჟი ი ჩუ̂ადგა̈რ. ალა სგე̄სდე გუდრათე, თეთრ, ი ბა̄ზი ჩუ̂ადჷ̄გა̈ნ
Line of edition: 38    ამჩუ. ანჴა̈დხ ალჲა̈რ: და̈შდუ̂ ი თხე̄რე ი მა̄ლ. ალჲა̈რ სგა ლა̈ჲჷნკე̄ლე
Page of edition: 198  Line of edition: 1    ლექუ̂ე̄რთე̄სგა, ათხე ხა̈ზჷრზე დაგრას: "ჲედ ლახუ̂ბა ლამტიხდ, მა̄დეჲ
Line of edition: 2    ჯადგა̈რი!" და̈შდუ̂დ ხა̈̄ქუ̂: "ჩუ ნომა ანდაგრა ი ლახუ̂ბას ჟი ჯიგნედ.
Line of edition: 3    ლენკი̄რისგა სა̈ტრო̄ლ ა̈რი, სა̈ტრო̄ლისგა -- სა̈ტრო̄ლ. ეჩეისგა ჯიჯულდ
Line of edition: 4    ა̈რი ი ქათლა̈ ღალიდ. ეჯას ლახ ჯიჯულდს ქა ლახთხეპნე (ღალიდს),
Line of edition: 5    ლახუ̂ბას ჟი ჯიგნეხ".

Line of edition: 6       ალა ქა̄ხღორუ̂ე ი ალჲა̈რი ჟ'ანხუ̂იტ. ამჟი ანჷ̄გა̈ნხ ი აჩა̈დხ.
Line of edition: 7    აჩა̈დხ ი კუმშიშ ჯუ̂ეგ ი გუდრა გუ̂ეში თეთრ ესღუ̂ახ.

Line of edition: 8       ალჲა̈რდ ხოჩა ლირდე-ლიზგე ა̈დჴიდხ ი ლჷმზჷრე̄უ̂ ხიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.