TITUS
Svan Prose Texts I (Upper Bal)
Part No. 99
Previous part

Text: 106 
Page of edition: 209 
Line of edition: 19 
106. ზურაბი დი̄ნაგეზალ


Line of edition: 20       ალჲა̈რ ლიხ ღარიბ ხეხუ̂-ჭა̈შ. ჭა̈შს ხაჟხა ზურაბ. ალა კე̄სა̈რშე̄რ
Line of edition: 21    ა̈რი ლჷდია̄ნად. ალა ჩუ̂ა̈დმეჩა̈̄ნ სერ ი აგით' ა̄ნჴა̈დ. ამის ხორი სემი
Line of edition: 22    დი̄ნაგეზლ, ალჲა̈რს ხა̈̄ქუ̂ინ: "ჲა̈რ ესერ იმჲედიხ კე̄სა̈რთე ლი̄ზის?
Line of edition: 23    მაშე̄ნამ უდილდ ა̈დფაშუ̂დე. [მუდ] ჟ'ანმა̄რე ალა: მიჩა ლერქუ̂ა̈ლ ამის
Line of edition: 24    ათქუ̂ე, ლალსგურა[დ] ჟ'ოხჰჷნგრე მიჩა რა̈შ ი ადზჷზე.

Line of edition: 25       ესღრი მიჩა გეზალ ი მიჯნემ გა̈ნ ლოხქუ̂იც, თხე̄რად ესსიპდა.
Line of edition: 26    ჯუ̂ე̄დია მინდო̈რისგა ჩუ̂ესხუ̂იდ და̈̄უ̂ა̈ ფორმაჟი:
Line of edition: 27       -- ჲაღო, ჲერუ̂ა̈̄ჲ ესერ ღენა ლიზ, ლექუ̂ა̄უ ესერ ლახა̄სდდა!

Line of edition: 28       ალას ათყალუ̈̄ნდა ი ჟ'ეშჭუ̂ე̄ნ, ა̈გითე ანჴა̈დ. მიჩამუ სგუ̂ებინ ესხუ̂ი̄დ
Line of edition: 29    ბალკონჟი: -- იმღა ესერ მო̄მა ა̈მჩედე̄ლი?
Line of edition: 30       -- იმღა ესერ-ი ეჯღა, ერე და̈̄უ̂ ესერ ესხუ̂იე̄ნა მინდო̈რისგა.

Line of edition: 31       ათხე მანე̄სგრა უდილდ ლა̈ჲფა̈შუ̂დ. ალა ჟ'ა̈ნმა̄რა̈̄ნ, ლალსგურას
Line of edition: 32    ჟი ლახსგურდა მიჩა მუეშ ი ესღრი. ჯუ̂ე̄დია მინდო̈რისგა ჩუ̂ესხუ̂ი̄დდა
Line of edition: 33    მიჩა მუ აჯაღ. ჩუ̂ადყა̄ლუ̂ე მიჩა მუდ ი დეშ ლახა̄სდ, ა̈გითე ოხჭუ̂ე̄ნ.
Line of edition: 34    მიჩა მუდ გა̈ნ ლოხქუ̂იც ი სგუ̂ებინ ესხუ̂ი̄დ ა̈გის.

Page of edition: 210 
Line of edition: 1       -- იმღა ესერ მო̄მა ა̈მჩედე̄ლი?
Line of edition: 2       -- ეჯკა̈ლიბ მირ ემხუ̂ი̄დ, დეშ ლო̄ხუ̂ასდ.

Line of edition: 3       ათხე მაჰუ̂რე̄ნე უდილ ა̈ნმა̄რა̈̄ნ ი ესღრი. ათხე გეზალს მიჩა მუდ
Line of edition: 4    გა̈ნ ლოხქუ̂იც ი სგუ̂ებინ ესხუ̂ი̄დ მინდო̈რისგა:
Line of edition: 5       -- ჲაღო ესერ, ლექუ̂აუ̂ ლახა̄სდ, ერუ̂ა̈̄ჲ ესერ ღენ ლი!

Line of edition: 6       ამნემ მა̄მა ადზა̄რე, ქა ლახა̄სდ:
Line of edition: 7       -- მიჩა ბაბა̈̄შ ნიჩუ̂ს ესერ ხაჯეშ, ადო ჟ' ესერ ხოკუ̂ა̄ნე კინჩხს!
Line of edition: 8       -- ო, ბაბა̈̄შ ლადეღუ ეჯქემა, სი გარ ჯაყა ეჩხაუ̂ მე̄ზიდ! ჲაღო,
Line of edition: 9    მ'აჯშგურა̈̄ნი ათხე: სამ შუკუ̂ ლაჭარისგა სემი და̈̄უ̂ სგურ. თუ̂ით
Line of edition: 10    ღუმირ ჩე̄რიდ ხუღუ̂ეხ, დოლებში̄რა ჩერშდა̈̄ლდ ხოსუ̂ახ. [ეჯჲა̈რდ
Line of edition: 11    სი ნო̄სა აჯყალუ̈̄ნდე̄დს. მი ლა̈ირს ლაჯჰო̈დნე ი ეჯა ქა ლახწუ̂ე̄ნ

Line of edition: 12       დი̄ნა აჩა̈დ, ათა̄სდ სამ შუკუ̂ ლაჭარისგა სამ და̈̄უ̂ს, ალჲა̈რს] ლა̈ირ ქა
Line of edition: 13    ლახწუ̂ე̄ნე, მიჩა მუე ნაჰოდ. ეჯჲა̈რ ლა̈ხჭუ̂ედდახ:
Line of edition: 14       -- იშა გეზალ როქ ხი?
Line of edition: 15       -- მი როქ ხუ̂ი ამჟი-ამჟი, ზურაბი გეზალ.

Line of edition: 16       ეჯჲა̈რს მეუ̂არ ათჩო̄ნდახ: "ამითა̄ნ გეზალ ჩუ ხორი!" ი ეჯჲა̈რდ
Line of edition: 17    ხა̈̄ქუ̂ინხ: "ლერსგუ̂ან ფოყთეუ̂ ესერ ოთთილ. ეჯჲა̈რ ესერ ოხგენიხ
Line of edition: 18    მა̈̄ნკუ̂ი ჩა̄ჟრე ჯჷლჷყს. ეჩეისგა ესერ ნოსამაუ̂ ა̈ნჷლკუჰე. ათხე ოხგენიხ
Line of edition: 19    ჰუ̈ლი ჯჷლჷყს. ეჩეისგა ესერ[ი̄] ნოსამაუ̂ ა̈ნთიშ"... ათხე რა̈ში
Line of edition: 20    ჯჷლჷყ ოხგენეხ. ეჩეისგა მა̄მგუ̂ეშ ა̈ნთიშ.
Line of edition: 21       -- მი მაკუჩ ეჯა, ერე ბაგისგა ტყჷრა̈̄ლ ფაშტილ ჯი̄ბხ.

Line of edition: 22       ეჯა მეუ̂არ ხამჭირხ, ეჩი̄ ლიჰუ̂დი, [მარე] ეჯა [ეში̄] ქა ლახუ̂ე̄მხ
Line of edition: 23    ეჯკა̈ლიბ ა̈ხფას, ერე ეშ შუ̂იმ მა̄მა ხა̄რ: მადრა̈ჴს ლახე ხა̈ჴდე, ეჩქა
Line of edition: 24    მე̄რე̄მიშ ი მე̄ფხე̄მი ნე̄სგაქა ღჷრი.

Line of edition: 25       ალა [ზურაბი გეზალ] კე̄სრი დი̄ნას მეუ̂არ ლახლატჷნდა ი ალა
Line of edition: 26    ჭა̈შდ იშგუ̂მინ. ალას ჯა დე̄მა იჩო: ალა ჩუ დი̄ნა ლი, მარე ჭყინტ
Line of edition: 27    ხოხახ.
Line of edition: 28       -- ჲაღო, ესერ მა̈ჲ[უ] ოხგონუ̂ეხ ალას?

Line of edition: 29       კე̄სრი უ̂ა̈ზრა̈ლდ ლა̈̄ქუ̂ხ: -- ამიცახა̈ნ მინე ლირდე მა̄მა ლი. ჲაღო
Line of edition: 30    ესერ, მა̈ჲ[უ] ოხგონუ̂ეხ ალას? იმუ̂ა̄ლე ესერ უ̂ა̈რილ ნეზუ̂ი გუ̂ეჭ [ა̈რი,
Line of edition: 31    ეჩი̄] ამაუ̂ ლიჴდე.
Line of edition: 32       -- კე̄სა̈რ ლეგდ ა̈რი, ეჩი̄ [მუხუ̂ჩეუ̂ი უ̂ა̈რილ ნეზუ̂ი გუ̂ეჭ ლი, ი
Line of edition: 33    მიჩ როქ ოთფაშუ̂და ეჩი̄ ლიჴდე].

Line of edition: 34       ჲაღო ესერ, მიჩა ცოდუ ხა̄რხ, ალა-ჲ-ალა ესერ დე̄სა ხოფშუ̂და,

Line of edition: 35       მარე ეში̄ ესერ ადრი.

Line of edition: 36       ამის ხუღუ̂ე და̈̄უ̂რე ნაჰოდ კუკუ̂ა̈̄ლ ი ალ' ე̄სჟოღდა სგუ̂ებინ.
Line of edition: 37    როგუ̂ა̈ კაკლა̈რ ოთშიდ ნეზუ̂ს ი გუ̂ეჭ ქო̄თქუ̂ით, სგო̄ხჴიდ კე̄სა̈რს ი
Line of edition: 38    ალა ჩუ̂ა̈დჷმბაჟა̈̄ნ.

Page of edition: 211 
Line of edition: 1       ჲაღო ესერ მა̈ჲ[უ] ოხგონუ̂ეხ ალას?

Line of edition: 2       კე̄სრი უ̂ა̈ზრა̈ლდ ხა̈̄ქუ̂ხ: მა̈ჲ ესერ-ი́ მიჩა დიდ ეჩაბუა̄სდთე უ̂ოქუ̂რა̈
Line of edition: 3    მჷსკად ესერ ოთდახ, ეჩი̄ ამაუ̂ ლიჴდე ესერ ოთფაშუ̂და [მიჩ].
Line of edition: 4       -- ალა-ჲ-ალა ესერ დე̄სა ხოფშუ̂და, მარე ეში̄ ესერ ადრი. მიჩა
Line of edition: 5    ცოდუ ესერ ხა̈̄ცუ̂ხ!

Line of edition: 6       ესჟოღდა კუკუ̂ა̈̄ლ სგუ̂ებინ ი ჩუ̂აჩა̈დ გიმი ჴურუჩუ. ეჩელექუ̂ა
Line of edition: 7    ალაჲ ჩუ̂ა̈თჭა̈მ ი სგა̄ჩა̈დხ კე̄სრი დიე სტოლთეჲსგა. ხაშგუ̂მინ ოქუ̂რე
Line of edition: 8    მჷსკა̈დ. ამნემ ხა̈̄ქუ̂ინ:
Line of edition: 9       -- მიჩა ნარდა̄ლ ესერ ნომაუ̂ ოხწუხუ̂ა მიჩა გეზალს! ალა ესერ
Line of edition: 10    ჟი ხარგა̈ბო̄ლნა მიჩა გეზალხა̈ნქა!

Line of edition: 11       მჷსკდი̄ლ ქა ლახუ̂ე̄მ ეჯნემ. სგო̄ხჴიდ კე̄სა̈რს, ჩუ̂ესდე სტოლჟი ი
Line of edition: 12    ჩუ̂ა̈დჷმბაჟა̈̄ნ.
Line of edition: 13       -- იმჟი ესერ ოხჴი̄და ალა? ჲაღო ესერ, მა̈ჲ[უ] ოხგონუ̂ეხ ათხე?
Line of edition: 14    იმუ̂ა̄ლე ესერ ლა̈ჩუ̂ ა̈რი, ეჩი̄ ლჷჯე̄მი ამაუ̂ ლიჴდე.

Line of edition: 15       ამნემ ლა̄ჲე უყროუ̂ა ხაბნა̈̄ გუ̂ა̈რე, ეშხუ ფუთ ჯიმ ლაჲე, მერმე ფუთ
Line of edition: 16    ლუსუ̂ემ ლა̄ე ი აჩად ეჩხაუ̂. სგიმჟი ჟათსოლმე გუ̂ა̈რე, ეშხუ ფუთ ჯიმ
Line of edition: 17    ჟი ლახშიდ ეჩეჟი, ჯა ჩუ̂ა̈თპა̈ჟ. ანღრი მინდო̈რ ლექუ̂ა ლა̈ჩუ̂, ჟ'ა̈თლაკ
Line of edition: 18    ჯიმს-ი́ იფთუ̂ი.

Line of edition: 19       [ამნე̄მ ლიც ახფჷნუ̂ნე. ლიც ლჷწჰე ესხუ̂ი̄დ. ეჩქა ლა̈̄ქუ̂ინ]:
Line of edition: 20       -- მა̈ჲ ესერ ღე̄რბეთ ლიზ, ლიც ესერ ჟიუ̂ ოხუ̂ფიშუ̂დ, მა̈̄ჲ ესერ
Line of edition: 21    ჰაჯ ხეკუ̂დი, ეჯას ესერ ლახჰუ̂ედი.
Line of edition: 22       -- ჲაღო ესერ, იშგენ მა̄მაგუ̂ეშ ხაკუ ი მიჩა ლჷჯეუ̂ ესერ ლახუ̂ე̄მ.
Line of edition: 23       -- ოღუნდ ესერ დღჷ̄ლ ნოსაუ̂ ხა̈სმინე! -- ი ჩუ̂ა̈ნი̄შგე ალა ი ა̈გითე
Line of edition: 24    ანჴიდ, ჩუ̂ეს[უ̂]გე კე̄სა̈რს სგუ̂ებინჩუ.
Line of edition: 25       -- ჲაღო ესერ, მა̈ჲ[უ] ოხუ̂გონუ̂ეხ ალას?
Line of edition: 26       -- იმუ̂ა̄ლე ესერ კოჯა̈რ იყჷრიე̄ლხ. ეჩი̄ ეჩხა̈ნჩუ ესერ ქაჯალე̄თი
Line of edition: 27    მურყუ̂ამისგა ქა̈ჯ ესერ ა̈რი, ეჩი̄ უ̂ოქუ̂რე ლუსდგუ̂არე ამაუ̂ ლიჴდე,
Line of edition: 28    ეჯი ესერ ოთფაშუ̂და ალას.

Line of edition: 29       კე̄სა̈რდ ა̈დჰერ ალა: -- ხოფშუ̂და ესერ ესა ალა?
Line of edition: 30       -- მიჩა ცოდუ ესერ ხა̈̄ცუ̂ხ. ალა-ჲ-ალა ესერ დე̄სა ხოფშუ̂და,
Line of edition: 31    მარე ეში̄ ესერ ადრი.

Line of edition: 32       ლახსგურდა მიჩა რა̈შს ი ესღრი. ამჩუ კოჯა̈რ იყჷრიელხ. მა̈ჲ
Line of edition: 33    ჩუ̂ემინეს? ჩუ̂ა̈დყულუ̈რა̈̄ნხ კოჯა̈რ, ხაჴიდ ეჩქა მადრა̈ჴ. ხჷნსგა ქო̄თქა̈ფ
Line of edition: 34    ეჩხა̈ნჩუ ი ჯა ლჷჲა̈რ აჩა̈დ ი ჩა̈̄ჟ სგა ლა̈ჲლჷწნეხ. ლაჲსინჯუ̂ე ეჩხა̈ნჩუ
Line of edition: 35    ი ეჩე̄ ქუ̂ეყანა მა̈გ ღო̄ნად ლჷსპე ლი. ესღრი ი სგა̄ჩა̈დ მეჩი
Line of edition: 36    მა̄რილთეჲსგა.

Page of edition: 212 
Line of edition: 1       -- იმხა̈ნ ესერ ახჴა̈დჷ̄ნე̄ნა მიჩ? ჯა ესერ დეშ ხაბჟე̄ნა ამე მერდად,
Line of edition: 2    ჯ' ე̄სერ იმნა̈რ ნაუ̂ბა̈დუ̂რად ა̈მჴედე̄ლი?
Line of edition: 3       -- იმნა̈რ ესერ ალსიპე̄ლი ამე̄ ქუ̂ეყანა ღო̄ნად?

Line of edition: 4       ათხე ქო̄ხო̄მბუ̂ე მეჩი მა̄რად: -- ამე ესერ ეზერ ქუ̂ეყანა ლჷმა̈̄რლი,

Line of edition: 5       მარე ქა̈ჯ ესერ ხა̈მთქუ̂ა, ეჯას ესერ ესსიპა მა̈გ ღო̄ნად. ეჯას ხალა̈ტ
Line of edition: 6    ქაჯაუ̂ე̄თი ხელწიფი გეზალ ი ეჩხაუ̂ ესერ ღჷრი. ჰამს ი ნა̈ბოზს
Line of edition: 7    ესერ მიჩ ხედა ლეჟა ი ლექუ̂ა ი ეჩქ' ე̄სერ მიჩ კუ̂ა̈̄ში̄ ნა̈ყუ̂იჩს ესერ
Line of edition: 8    ხოყუ̄ბე ყიაჩუ, ეჩქ' ე̄სერ ხანსრა̈ ნა̈კუ̂იშს ესერ ხოჯუ̄ბე აჯაღ ყიაჩუ
Line of edition: 9    ი უ̂იშდს ხა̈ძგრი უ̂ეშგმაუ̂, ეჩქ' ე̄სერ ლახ ა̈რ სგა̄ხფხიჭი ლუსდგუ̂ა̈რს,
Line of edition: 10    ეჩქა მა̄მგუ̂ეშ ესერ ხა̈მჲედა.

Line of edition: 11       ათხე ამნემ ხა̈̄ქუ̂ინ, დი̄ნად, კე̄სრი ლჷდია̄ნად: -- ხა̈მჲედა ესერ მოშ
Line of edition: 12    აღო, მიჩა ჩუ ლიპჟუნე?
Line of edition: 13       -- ადუ ესერ, აღო! -- ი ალა ჩუ̂ათპა̈ჟუ̂ნე.

Line of edition: 14       ახა̄სდდა ათხე ნა̈ბოზს ქაჯალე̄თი ქა̈ჯ, სგა̈̄ნსიპე მეჩი მა̄რათე ი
Line of edition: 15    ამნემ კუ̂ა̈̄ში̄ ნა̈კუ̂იშ ჩოთყუ̄ბე ყიაჩუ ი მუსი ნა̈კუ̂იშ აჯაღ. ეჩქა ჟ'ესსიპდა
Line of edition: 16    ი უ̂იშდ ხაძგერ. ეჩქა კე̄სრი ლჷდია̄ნე უ̂ეშგინისგა სგა ლა̈ხკუ̂ა̈ფხ,
Line of edition: 17    ლუსდგუ̂ა̈რს ოქუ̂რეშ სგა ხაფხეჭ. ქუ̂ინ დეშ ა̈ნკიდ ქა̈ჯდ.
Line of edition: 18       -- მა̈̄ღენა ესერ ლი, მა̈̄ჲ ესერ ჰაჯ ხეკუ̂ეს, ეჯას ესერ ხა̈ჩო ი
Line of edition: 19    ჯ' ე̄სერ ჩუ̄[უ̂] აფიშუ̂დ!
Line of edition: 20       -- ჲაღო ესერ, იშგენ მა̄მაგუ̂ეშ, ი ეჩქადა̈ გუა̈რდ ესერუ ესსიპე
Line of edition: 21    მა̈გ ი ალ ქუ̂ეყანა ლჷჲარდ[უ] ესსიპე. ჭყინტ ესერ დინადუ ესსიპე.
Line of edition: 22    დი̄ნა ესერ ჭყინტდუ ესსიპე, ლჷდგა̈რ ესერ ლჷჲარდუ ესსიპე.

Line of edition: 23       ლჷდგა̈რ ლჷჲარდ ესსიპდა. ათხე ლუსდგუ̂ა̈რ ქა̄ხჭკუ̂ერ ი "კოჯა̈რ
Line of edition: 24    ესერ ჩუ̄[უ̂] ადყულუ̄რე". კოჯა̈რ ჩუ̂ადყულუ̄რე. ანღრი ათხე
Line of edition: 25    ა̈გითე. ქა̄ნჴა̈დ ალ კოჯა̈რმჷყ ი მიჩა ლალსგურა რა̈შ ამეჩუნ ლჷჲა̈რ
Line of edition: 26    ესხუ̂ი̄დ ჟი ლახსგურდა ი ა̈გითე ანჴა̈დ ჩუ̂ესდუ̂ეხ კე̄სა̈რს სგუ̂ებინჩუნ
Line of edition: 27    ლუსდგუ̂არ. კესარ ჩუ̂ა̈დჷმბაჟა̈̄ნ: "მა̈ჲ ესერ ნაღუ̂ჟურ ახფასა ამჟი მიჩ,
Line of edition: 28    ერე ალამა̈გს ქა დო ახსედა ი ჩუ ხოჩუ̂მინა?!" ათხე მიჩა გეზლა̈ ლიყუ̂ნა̈̄ლ
Line of edition: 29    იშგუ̂მინ ი ალჲა̈რ ქუნუშ ა̈რიხ: "ტკისდ როქ სგა ლა̈ხყუ̂ინი მო
Line of edition: 30    გუშგუ̂ეჲ გეზალს?" კე̄სა̈რდ ჩუ̂ადნა̈ზუ̂რე მა̈გ ი ლა̈ხიადა̄ლ აჩუ̂მინ.
Line of edition: 31    ათხე ა̈გითე ლიჴედ იშგუ̂მინ ზურაბი გეზალდ მიჩა მუთე. ჟ'ანმა̄რე
Line of edition: 32    კე̄სა̈რდ, მიჩა ლემღუ̂ე̄ნე̄მი ხჷნსგა ქა ლახუ̂ე̄მ ი ა̈გით' ა̄ნფიშუ̂დ ლჷხია̈დ.
Line of edition: 33    ამჩუ და̈̄უ̂ა̈რს ახა̄სდდა ი ალჲა̈რდ მეუ̂არ ა̈დხი̄დეხ (\\ ა̈დიხიდეხ) ი
Line of edition: 34    ლჷმზჷრე აფიშუ̂დხ ა̈გითე. სგა̄დჰე მიჩა ქორთეჲსგა, სგა ლახა̄გა̈̄ნ
Line of edition: 35    ყორს ი ქა̄ნჴა̈დ მიჩა მუ, ალა ჩუ დეშ ათირ: -- ჲა̈რ ესერ ლიზ?
Line of edition: 36       -- მა̄მ ესერ ხოთრა მო ჯა, მიჩა გეზალ?
Line of edition: 37       -- ხამჯო̄ნე ესერ ლალსგურაისგა გარ. ი ალა სგა ლახ ლა̈ხჯჷრუ̂ა̈̄ნ
Line of edition: 38    მიჩა გეზალდ, ეჩქა მა̈̄ჲ მა ჩუ ხობა̈ცდა, მა̈გ ჩუ̂ადხარჯუ̂ე.

Line of edition: 39       ლჷმზჷრეუ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.