TITUS
Svan Prose Texts I (Upper Bal)
Part No. 144
Previous part

Text: 149 
Page of edition: 337 
Line of edition: 10 
149. წიქერა̈ჲ ი ბუღუ̂ერა̈ჲ


Line of edition: 11       ჯა̈მზჷრახ ღერთემ ი ამჩუ̂ ა̈რიხ დი-გეზალ. ალჲა̈რს ეშხუ რჷდინგურო̄ლ
Line of edition: 12    ხო̄გხ, ეჩჷნქა მა̄მგუ̂ეშ ხაწუ̂ახ ი ხა̈ბდაუ̂ახ ხოჩე̄რობა. მარე
Line of edition: 13    ალ რჷდინ-გურნას ხაზნახ ეჯკა̈ლიბ ზჷნე, ერე, ლახ მირ ესწჷხახ ლეზობლეთრა,
Line of edition: 14    ეშ აჰრეხ. ეჯა მა̄მგუ̂ეშ ლი ნჷნქა ლე̄ქუ̂ი̄სგ-ე̄, ალჲა̈რ
Line of edition: 15    დო̄მ ა̈წჰახ.

Line of edition: 16       აშხუ̂ ლადა̈ღ მეჩი დედბერილდ ხა̈̄ქუ̂ მიჩა გეზალს: "ჰი̄ ეჯა როქუ̂
Line of edition: 17    მა̄დე, ნა̈̄უ̂ ლჷჭა̈თ ლიშდ, ეშხუ ქა მო̄დ ესა ლა̈წჰად კე̄სა̈რ!" ალა ეჯჟი̄ნ
Line of edition: 18    ჩუ̂ა̈დუ̂ა̈შგდე ამი̄ გეზალდ, ერე გიმს უ̂ეთ ესხა̈პ: "ჲაღო, ეჯა მა̄რ
Line of edition: 19    ლეჩუ̂მე, ნა̈ჲ აშხუ̂ რჷდინ-გურო̄ლჷნქა გუ̂აწუ̂ა-ჲ გუ̂ა̈ბდაუ̂ა დე̄სამა ი
Line of edition: 20    მჷდა ხუ̂ა̈წჰი, კე̄სა̈რს!" მა̄მ' ე̄სჰუნრე ნაღჟურდ, მარე მე̄რმაჟი̄ნ აჯაღ
Line of edition: 21    ამჟი̄დ ხა̈̄ქუ̂ დედბერილდ. ჭყინტდ მა̄მა̄დ ესჰუნრე ი მე̄სმა̄ჟი̄ნ აჯაღჷდ
Line of edition: 22    ლახ ა̈თღუ̂ი̄რა̈̄ნ ი მო̄მ' ახკიდ ჰაჯ, სერ ღალ ქა ლეწჰი ხა̄დ კე̄სა̈რ
Line of edition: 23    ი მიჩა უ̂ა̈ზრა̈ლ.

Line of edition: 24       ათხე ლახ ამჟი ლჷწჰა̄რობ ხა̄რხ, დედბერილს ხაჟა̈ხ, ა უ̂ითომ
Line of edition: 25    ამთა̄ნ რჷდინ-გურნა ხო̄გ ი ესუ̂ქიქნე: "ჰა̄, ხოლა მიშგუ რჷდინ-გურნა,
Line of edition: 26    ჲაღო, მაჩე̄ნა̄მდ ესა ჯა̈მთქუ̂ა, ეჯჟი̄ნ მოშ ესსი̄პანა̈̄ლ!" ესტი̄ფანე ალჲა̈რ-ა́,
Line of edition: 27    რჷდინ-გურნა-ჲ ეჯკა̈ლიბ ხა̈რჯ ჟ'ა̈ნმა̄რა̈̄ნ, ერე მა̈̄ჲ ესამა და̈სიფასელ
Line of edition: 28    ნჷნქა ლე̄ქუ̂ი̄სგ ჩუ ლი, მა̈გ ეშ ესჰარა̈̄ნ. ო̄, ისგ ტაბგობთექა
Line of edition: 29    ქა მეჴდელიხ-ა́, კე̄სა̈რ ი მიჩა ლა̈ჲმოხლა, მარ' ა̄ლა̄, კე̄სა̈რ,
Line of edition: 30    დე იზბი ი დე ითრე.
Line of edition: 31       -- ეჲ, ალა მა̈ჲ ი̄რა̄, კე̄სა̈რ მირ დე ითრე დე იზბი? -- ლა̈ხჭუ̂ედდა
Line of edition: 32    დედბერილ მიჩა გეზალს. ათხე ალა კე̄სრი უ̂ა̈ზრა̈ლსი̄ ხასკუ̂რელხ,
Line of edition: 33    მარე დეშ ხობდა̈უ̂იხ ქა ლიჭუ̂დიე̄ლს. ათხე ქა̈̄დჰერ ნაღჟურულდ
Line of edition: 34    ალჲა̈რ-ა́, უ̂ა̈ზრა̈ლ, ი ესბა̈ც: "ოხუ̂მეჴრახ მა: იმღა დო̄მ იკედ
Line of edition: 35    ხეუ̂სს კე̄სა̈რ?" მა̄მა-ჲ ალჲა̈რდ სერ ქა̄დპი̄რეხ ი ქა ლა̈ხჭუ̂ედდახ: -- მა̈ჲ
Page of edition: 338  Line of edition: 1    მიზეზ ლი, ფუსდ კე̄სა̈რ, ერე ღო ხეუ̂სს დო̄მ ხიკედ? -- მა̄მა, მა̈ჲ
Line of edition: 2    ი̄რა? -- მარე მა̄მ' ა̄ხკიდხ ჰაჯა̈̄ბოლ მიჩა ლა̈ჲმოხლად ი უ̂ეშგინპილს
Line of edition: 3    ქა̄ხა̈̄ქუ̂ინეხ მა̈გ, მა̈̄ჲ ხეკუ̂ა̈დ. "ჲაღო, რჷდინ-გურო̄ლა̈ ლიდია̈̄ნის ესერ
Line of edition: 4    იშგუ̂ემ კე̄სა̈რ". მე̄უ̂არ ათლო̄ნ ჭყინტს ი მე̄უ̂არ ა̈ნხირნა̈̄ნ მიჩა დითე
Line of edition: 5    -- დედბერილთეჲ, მარე მა̈ჲ ჩუ̂ემინას, ნა̈ბ ი უმბილ მა̈გ ლჷნჩჷდე ხა̄რ
Line of edition: 6    მე̄უ̂არ ხემჯა̈̄ლ დედბერილს:
Line of edition: 7       -- ჰი̄, ეჩქად ეში მა̄დ ა̈თირკ-ე́, უ̂ოდ ალა დო გუ̂ა̄დ ი ათხე გუ̂ე̄რი
Line of edition: 8    სერ მა̈გ ხოლა̄მდ.
Line of edition: 9       -- ო̄, მა̄მა როქუ̂ გუ̂იჭირ ამღა, კე̄სა̈რს როქუ̂ ლა̈დია̄ნდუ̂ გარ ხაკუ
Line of edition: 10    რჷდინ-გურნა-ჲ ღო როქუ̂ ა̈გითე ა̈ლტიხედ! -- მა̄მა სერ ი ადზჷგრეხ
Line of edition: 11    ტაბგობ ი ლახ კე̄სა̈რდ ჰაჯა̈̄ბოლ მო̄მ' ა̄ხკიდ, ქა ლეჴდე ხა̄დხ
Line of edition: 12    რჷდინ-გურნა ი ქა ლეჰუ̂დი. აჩა̈დხ ალჲა̈რ სერ ა̈გითე, რჷდინ-გურო̄ლი̄
Line of edition: 13    ადჲეხ.

Line of edition: 14       ათხე აჩა̈დ ხა̈ნ ი ნაგზალადა̈ღ ოთჭირეხ, ერე "მინე რჷდინ-გურო̄ლ
Line of edition: 15    ესერ ქა̄უ̂ ლახტიხხ". მარე ალა კე̄სა̈რდ ეშ ა̈დსაკუ̂რელე ი ოთჭირე,
Line of edition: 16    ერე "ჲაღო, მიჩ ესერ ეშდჲარუ̂ ლა̈დღი ნამხუ̂ერ (და̈ბ) ხუღუ̂ე
Line of edition: 17    ი ალას აშხუ̂ ლადა̈ღ ჩუ̄ჲ მოშ ხოჴნი, ჟი̄ჲ მოშ ხოჭა̈̄დი, მაჴა̈დსი
Line of edition: 18    სგა მოშ ჴიდე ი მიჩა ბეღლა̈რთე ეჯჟი სგა მოშ ხოდი, ერე ეშხუ
Line of edition: 19    კაკლი̄დი̄ დო̄სა ა̈თბერს, ეჩქ' ე̄სერ ქა ლახტიხე-ჲ აშ დეშ". ლახ ალა
Line of edition: 20    ხასჷმდა ნაღჟურულს, ჩუ უ̂ეთ ა̈დკა̄ფ, ეჯჟი̄ნ ჟ'ა̈ნწახუ̂ა̈̄ნ ი ლაგუ̂ნუშ
Line of edition: 21    ატა̈ხ ა̈გითე. მიჩა დის ახმაჯე, ერე
Line of edition: 22       -- ალ' ე̄სერ მა̈გ მიჩა ტა̈რ ხა̄რ, ადო მა̈ჲ ესერ ხაწხე̄ნა კე̄სრი
Line of edition: 23    ლიწჰი? ჩუ ესერ ლჷმჷრდე̄ლიხ ქრისდე̄ ლჷმზჷრად ი ათხ' ე̄სერ მა̈ჲ
Line of edition: 24    ჩუ̂ემინას?
Line of edition: 25       -- ჲაღო მა̈ჲ ი მიშგუ̂ა ლამუ̂არლე ხოშა̈̄ლს ეჩაბუა̄სდ წიქერა̈ჲ
Line of edition: 26    ი ბუღუ̂ერა̈ჲ ხორიხ. ეჯჲა̈რს როქუ̂ ლოგუ̂დია̈̄ნიხ, ღო როქუ̂ ა̈ლჴჷ̄რიდ
Line of edition: 27    გუშგუ̂ეჲ ხოშა̄ლე ქუნა̄რუს, ონჟუუ̂ა̈იშ ი ბონჟუუ̂ა̈იშ, ი ეჯჲა̈რ
Line of edition: 28    როქუ̂ აჯხუ̂ინეხ ხუ̂ილი-მახალს ი ალას როქუ̂ ჩუ ხიჩო, ღედ ნომ
Line of edition: 29    ჯა̄რ!

Line of edition: 30       ათხე ლა̈ჲბინე დედბერილდ მინე ლჷდგარუ̈̄ ქუნრე ლიფა̄ნე ი
Line of edition: 31    ხემწა̈̄დიე̄ლ: "ე̄, ხოლა ნიშგუ̂ეჲ ხოშა̄ლე ქუნა̄რუ, მა̈̄ჲუ დო ჯიჩუ̂მინახ,
Line of edition: 32    ლა̈დი ლი, საბლუ, ნიშგუ̂ეჲ მაწხა̈ ლადა̈ღ ი ლა̈ნშა̈დდ მა!" ალჲა̈რ
Line of edition: 33    ტკისდ მურსგუ̂ენ ფოყხა̈ნ ლოხჴერდახ წიქერა̈ჲს ი ბუღუ̂ერა̈ჲს. ალჲა̈რდ
Line of edition: 34    აშხუ̂ ლადა̈ღ ალ ეშდჲორი ლა̈დღი და̈ბ ქაჲ აჴა̈ნხ, ჟი̄ჲ ა̈ნჭა̈̄დხ,
Line of edition: 35    მაჴა̈დი სგა̄ნჴიდხ ი სგ'ე̄სუ̂დეხ მა̈გ ბეღლა̈რთე̄სგა. უ̂ეშგინპილს ეშხუ
Line of edition: 36    კაკლი̄დ ესღუ̂ა̈̄ნ მჷრშკჷლდს, ეჩასი̄ სგა̈̄ხჰი̄დ წიქერა̈ჲ ი ეჯაჲ სგო̄ხჴიდ
Line of edition: 37    ი სგ'ე̄სუ̂დე ბეღელთე̄სგა. ათჩო̄ნ ღალ ალა ნაღჟურულს ი
Line of edition: 38    მე̄რმა ლადა̈ღ ოთზჷზე მეცქუ̂ილ ი ოთჭირე, ერე

Page of edition: 339 
Line of edition: 1       ჲაღო, იმუ̂ა̈̄ჲჟი̄ნ კე̄სა̈რდ ქა მა̈̄ქუ̂, ეჯჟი̄ნ მა̄დეჲ ხოსტჷრფილდი̄
Line of edition: 2    ოთმჷშა̈ჲ მა̈გ ჩუ. უ̂ეშგინპილს აშხუ̂ მჷრშკჷლდს ესღუ̂ა̈̄ნ ეშხუ კაკლი̄დ,
Line of edition: 3    ეჯაჲ მა̄დ ოთნებ, ეჩასი̄ სგა̈̄ხჰი̄დ წიქერა̈ჲ. ბუღუ̂ერა̈ჲდ ხა̈̄ქუ̂: ე̄, ხოლა,
Line of edition: 4    ჭიშხ ნო̄ს' ა̄თგა მჷრშკჷლდს, ჩუ დო̄სა აჟღჷპა, დე̄მნა̈რ გუ̂აკუ
Line of edition: 5    ნა̈ჲ ეჩი̄ ცოდულდ!" ეჯაჲ სგე̄სუდ ისგუ̂ა კიბდო̈ნთე.

Line of edition: 6       სერ წიქერა̈ჲ ი ბუღუ̂ერა̈ჲ ატა̈ხხ მინე ნა̄ზუ̂ს ონჟუუ̂ა̈იშ ი ბონჟუუ̂ა̈იშთე
Line of edition: 7    ეჩაბუა̄სდთე. ათხე ნაღჟურულ ა̈ნღლი სერ, ერე "მიჩა
Line of edition: 8    რჷდინ-გურნას როქუ̂ ქა ლახტიხე კე̄სა̈რ", მარე ტა̄უბაჰა,
Line of edition: 9    ეში̄რაღალ.

Line of edition: 10       ლახ ხეტხუნა̈̄ლხ კე̄სა̈რს, ეჩქას ოხუ̂ჭირე, ერე "ჲაღო, ეჩაბუა̄სდ
Line of edition: 11    მიშგუ დი-ჲ მუ ა̈რიხ. ეჯჲა̈რს ეჩხა̄უ̂ ოთყა̈უ̂ა̈ნ უ̂ოქუ̂რე სკა̈მი̄ლ ი უ̂ოქუ̂რე
Line of edition: 12    კუ̂იკუ̂ა̈̄ლ. ეჯჲა̈რს უ̂ოდ ამაუ̂ დო ა̈მჴიდედ, ეჩქად ამი̄ მჷტხე მა̄მა
Line of edition: 13    ხუ̂ი". ჟი̄დ ღალ ა̈ნწახუ̂ა̈̄ნ ალა̄, ჭყინტჷლდ, მა̄მ ხოხალ ეჩი̄შ-ე́, იმჟი̄ნ
Line of edition: 14    დო ლი სერ ეჩხა̄უ̂ ლე̄ზი. ა̈გისი̄ დე̄სამა ხაწუ̂ახ ი ხა̈ბდაუ̂ახ ი ხა̄რხ
Line of edition: 15    მა̈გ ხოლა̄მდ.

Line of edition: 16       აშხუ̂ ლადა̈ღ დედბერილდ ახჭემ ყუ̂ელფ ი ალა ჩუ̂აშიდ ყო̄რჟი.
Line of edition: 17    ალას ა̈ხჩჷ̄დ ესნა̈რ ეშხუ ფა̈ტუ̂ა̈ კაკლი̄დ. ამეჟი̄ნ ეჯჟი ჰა̈ლუ̂ა̈ მეგა̈მ
Line of edition: 18    ჟ'ანჴა̈დ, ერე დეცს ხეუ̂ე̄ფიე̄ლ. აშხუ̂ ლადა̈ღ რა̈̄ქუ̂ ამნე̄მ-ა́, ჭყინტჷლდდ:
Line of edition: 19    "მი̄უ̂ ლჷჭა̈თ ხუ̂ი, ჟი მო̄დ ა̈თუ̂ჭემ ალას კა̈ცხო̄ლთეჟი, მა̈ჲუ
Line of edition: 20    ლესუ̂". ესღრ' ესღრი ალა̄, ჭყინტ ი ჟი̄ჲ ადჰე კა̈ცხო̄ლთეჟი. ამი̄
Line of edition: 21    კა̈ცხ დეცს ხაუ̂იფ ი ჟ'აშყა̈დ ჟიბებუა̄სდთე. ათხე ესღრი, ესღრი ი
Line of edition: 22    ალა̄, ჭყინტ, ი ა̈თლაკ აშხუ̂ მეჯო̈გს: ეჯჟი ლაჩა̈ხუ̂ისგა ჩუ ხაყა ჯო̈გ,
Line of edition: 23    ერე თხუმ ჟიქა̄ნქა ხაცა̄დახ, მარე კუმა̈შ იშუ̂-ჯიჯუ̂ს ხა̈გჷრგილაუ̂ახ.
Line of edition: 24       -- ა̄ ხოჩა̄უ̂ ლადა̈ღ ჯა̄რ ნაღჟუ! იმაუ̂ მე̄ზი ხი?
Line of edition: 25       -- ეჩაბუა̄სდთე. -- სერ ქო̄ხო̄მბუ̂ე, იმუ̂ა̈̄ჲჟი კე̄სა̈რდ ადზჷზე მიჩა
Line of edition: 26    დიე̄შ ი მუუ̂ე̄ ქუნა̄რუთე ი ამნე̄მი ხა̈̄ქუ̂-ა́, მეჯო̈გდ:
Line of edition: 27       -- ა̄, ჲაღო, მა̈დილ ჯე̄რა-ჲ მი̄ჲ ა̈მმეჴერ, იმშა̄უ̂ ტა̈რ მა̈̄ც ალა̄,
Line of edition: 28    კუმა̈შ ჟი მი̄გ ხოჩა̄მ ლაჩა̈ხუ̂დ ი ეში̄ იშუ̂-ჯიჯუ̂ს ხა̈გჷრგილაუ̂ახ?
Line of edition: 29       -- ეზერ ჲაღო.

Line of edition: 30       ათხ' ე̄სღრ' ესღრი̄დ ალა̄ ჭყინტჷლდ, ი ა̈თლაკ მე̄რმა მეჯო̈გს.
Line of edition: 31    ალას კუმა̈შ რიყისგა ხაყა, მარე ეჯჟი ჩქიმ ჩუ ხა̄გხ, ერე ლისგდი
Line of edition: 32    მა̈დილ ლი.
Line of edition: 33       -- ა̄, ხოჩა̄უ̂ ლადა̈ღ ჯა̄რ, ნაღჟურ! იმაუ̂ მე̄ზი ხი?
Line of edition: 34       -- აშ-ი-აშ. -- ქო̄ხო̄მბუ̂ე, იმუ̂ა̈̄ჲჟი ლა̈სუ̂ გუ̂ეშ.
Line of edition: 35       -- ო̄, ჲაღო, მი̄ჲ დო მიმჴერიჲ, იმშა̄უ̂ ტა̈რ ლესუ̂ ალა̄, რიყისგა
Line of edition: 36    მირიხ კუმა̈შ, მარე ეში̄ ამგუ̂ა̈ჲ ჩქიმ ხა̄გხ-ა́.

Page of edition: 340 
Line of edition: 1       -- ეზერ, ხიად, მა̈ჲ ი̄რა მიზეზ?!

Line of edition: 2       ესღრი̄დ ი ამეჩუ აშხუ̂ ზურა̄ლს ა̈თლაკ. ალას ზისხი სარაგ ახა̄ზი.
Line of edition: 3    ი აშყუ̂დიე̄ლი ამნოშ. ამნე̄მ ახჭუ̂ედიე̄ლე: "იმთე მე̄ზ' ესერ ლი ჯა?"
Line of edition: 4    ჭყინტ ქო̄ხო̄მბუ̂ე, მა̈̄ჲ ლა̈სუ̂ ალა. ალას ქო̄თქა̈̄ბ ი ა̈თჴა̈დჷ̄ნ მე̄რმა
Line of edition: 5    ზურა̄ლმჷყ. ალას ლჷჯე̄მი სარაგ ახა̄ზი ი აშყუ̂დიე̄ლი ეჩნოშ. ლერქუ̂ა̈ლ
Line of edition: 6    ეშ ხოთჷნთაე.
Line of edition: 7       -- იმაუ̂ მე̄ზი ხი? -- ლა̄ხჭუ̂ედდა̄დ ზურა̈ლ.
Line of edition: 8       -- იმაუ̂-ი ეჩაბუა̄სდთე, აშ-ი-აშ.
Line of edition: 9       -- ჲაღო, მიშგ' ამბა̈უ̂ი̄ ა̈ხმეჴერ, მა̈ჲუ ლესუ̂. -- ეზერ ხიად!
Line of edition: 10    ესღრი, ესღრი-ჲ სგა̄ჲ ა̄თჴა̈დჷ̄ნ სერ კე̄სრი დითე̄სგა-ჲ მუ̈თე̄სგა.
Line of edition: 11       -- ეჲ, ნაღჟურ, იმნე̄მ აჯჴიდ, სი მა̄რე, ამაუ̂. იუ̂ალადა̈ღ ლჷჲარ
Line of edition: 12    და̈̄რ მეჴდე̄ლი ამაუ̂. -- ალა̄, კე̄სრი დი, ჩუ სგურ უ̂ოქუ̂რე სკა̈მი̄ლჟი.
Line of edition: 13       -- ო̄, ჲაღო, მი ისგუ̂ეჲ გეზალდ ამზჷზე. სგა̈ჲ ესერ უ̂ოქუ̂რე სკა̈მი̄ლ
Line of edition: 14    ი უ̂ოქუ̂რე კუ̂იკუ̂ა̈̄ლ ჯუღუ̂ეხ, ეჯჲა̈რ ესერ უ̂ეშგდუ ამბა̈რჲედ.
Line of edition: 15    -- ეჩუნღო̄ნ ქო̄ხო̄მბუ̂ე სერ ეჯაი-ე, იმუ̂ა̈̄ჲჟი̄ნ ჲა̈რ ხეხო̄ლხ შუკუ̂ს ამხა̄უ̂
Line of edition: 16    ლაჴა̈დჟი ი მა̈̄ჲ ჲა̈ს ხეჭკჷ̄რა̈̄ნხ მინეშთე ლა̈ჭირ.
Line of edition: 17       -- ეზერ, ხიად! კუმში მჷლდეღს ლეჭმაისგა ხე̄ქა, ერე "სი̄ჯ ესერ
Line of edition: 18    ჩი̄მი კუმა̈შთე ხოლა თე-ჲ გუ̂ი ჯუღუ̂ე ი ღო̄ჯ ეჯღა ხა̈გჷრგილაუ̂ახ
Line of edition: 19    ისგუ კუმა̈შ იშუ̂-ჯიჯუ̂ს". ხოჩა თე-ჲ გუ̂ი ლახ ხეღუ̂ე̄ნი ეჩქა მიჩა კუმა̈შსი̄
Line of edition: 20    ხოჩა̄მდ ხე̄რიხ. რიყისგა კუმში მჷლდეღს ხე̄ქა, ერე "სი̄ჯ ჩითე
Line of edition: 21    ჰალა̈ლ თე-ჲ გუ̂ი ჯუღუ̂ე, ღო̄ჯ ეჯღა ჯაჰუ̂დი ღე̄რბეთ კუმში ბედს
Line of edition: 22    ი ბარაქს". ზისხუ̂შ მუშყუ̂დიე̄ლი ზურა̄ლს ხე̄ქა, ერე "სი̄ჯ გუ̂ი წყჷლჲა̈ნ
Line of edition: 23    დე̄მთე ჯუღუ̂ე ი ღო̄ჯ ეჯღა ჯა̄რ ამგუ̂ა̈ჲდ". ლჷჯოშ მუშყუ̂დიე̄ლი
Line of edition: 24    ზურა̄ლს ხე̄ქა, ერე "სი̄ჯ გუ̂ი რჷჰი ჯუღუ̂ე ჩი̄თე ი მა̈გ ხოჩა
Line of edition: 25    ჯაკუ ჩი̄მიშდ ი ღოჯ ესერ ეჯღა ჯითჷნთაე ლერქუ̂ა̈ლ ი ლჷჯე̄მი სარაგ
Line of edition: 26    ლაშყუ̂დიე̄ლდ აჯა̄ზი". ხოჩა̄მ მშიშგუ̂ა გეზალხა̈ნქა, ჰე ალ სკა̈მი̄ლს
Line of edition: 27    დოშ ლამღუ̂ე̄ნს სა̈ხ ი ღო ხოჩა̄მდუ ოხჴჷმრა მიშგუ ნალჷრდი ი ჰე
Line of edition: 28    ა̄დუ̂, ღო ჩუ ჰა̄ლ ესსგურდე̄დს, ეჩქა ქა̈მილდა̈რუ გარ ამსედ ი
Line of edition: 29    მიშგუ ნალჷრდი ი ნა̈ნჭირუ̂ ხოლა̄მდუ ოხუ̂ჴი̄ჩა!

Line of edition: 30       ჩუ̂ადჭათუ̂ნეხ ამჟი კე̄სა̈რ ი სკა̈მი̄ლჟი̄ნი ჟ'ანჷ̄გა̈ნ ზურა̄ლ ი ქა
Line of edition: 31    ლახუ̂ე̄მ ნაღჟურულს. უ̂ოქუ̂რე კუ̂იკუ̂ა̈̄ლ სგუ̂ებინ ესჟოღა̄ნე-ჲ ანღრი
Line of edition: 32    უ̂ეშგდ ლჷხია̈დ ალა̄, ნაღუ̂ჟურულ. ერუ̂ა̈̄ჲს შუკუ̂ჟი̄ნ ქა̄თა̄სდ უ̂ეშგდ ლატა̈ხჟი̄ნ,
Line of edition: 33    ალჲა̈რს ჩი̄ ქო̄ხო̄მბუ̂ე ალა̄, მა̈̄ჲ პასუხ ოხუ̂ჭირეხ მინეშთე.
Line of edition: 34    ეჩუნღო ესჟოღ ჩუ ჴურუჩუ̄ნ ალა̄, კუ̂იკუ̂ა̈̄ლ, ი ჩუ̂ა̈თჴადჷნხ ჰალუ̂ა̈
Line of edition: 35    მეგმი კა̈ცხთეჩუ̄ნ. ჩუ̂ანჴა̈დ ჩუქუ̂ა̄ნთე-ჲ დედბერილ ტჷტ-ლჷჩხრიკაჟი̄ნ
Line of edition: 36    სგურ. ალას ჩუ მა̄მ ხაჯრაუ̂ა, ლახე გეზალ ლჷჲა̈რ ლა̈ხტა̈ხ ი ოთზჷზეხ
Line of edition: 37    მეცქუ̂ილ კე̄სა̈რს, ერე "ჲაღო, მიჩა უ̂ოქუ̂რე სკა̈მი̄ლ ი კუ̂იკუ̂ა̈̄ლ
Page of edition: 341  Line of edition: 1    ესერ უ̂ეშგდ ოხუ̂ტი̄ხა ი რჷდინ-გურო̄ლ ქა̄უ̂ მოშ ლახტიხ!" კე̄სა̈რდ,
Line of edition: 2    იმუ̂ა̈̄ჲჟი დო ლა̈სუ̂, რჷდინ-გურნა უ̂ეშგდ ლახტიხ. მიჩ სგო̄თჴიდხ სკა̈მი̄ლ
Line of edition: 3    ი კუ̂იკუ̂ა̈̄ლ. ჩუ ჰა̄ლ ესსგურდა სკა̈მი̄ლჟი, ქა̈მილდა̈რ გარ ასა̈დ.
Line of edition: 4    იმუ̂ა̈̄ჲჟი ჩუ̂ადჭათუ̂ნე მიჩა დიდ, ჩუჲ ეჯჟი ხეყა̈რ.

Line of edition: 5       დედბერილდ ი მიჩა გეზალდ ხოჩა ლირდე ა̈დჴიდხ ი ჯა̈მზჷრახ
Line of edition: 6    ღერთემ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.