TITUS
Svan Prose Texts I (Upper Bal)
Part No. 145
Previous part

Text: 150 
Page of edition: 341 
Line of edition: 7 
150. ხა̈ჯი̄ და̈უ̂ით


Line of edition: 8       ჯა̈მზჷრახ ღერთემ ი ა̈რიხ ხა̈ჯი̄ და̈უ̂ით ი მიჩა ხეხუ̂. ალჲა̈რს ხორდახ
Line of edition: 9    ჲორი გეზალ: ეშხუ ჭყინტ ი მე̄რმე დი̄ნა. ალ ხეხუ̂-ჭა̈შ ესღრიხ
Line of edition: 10    ქუ̂ინ ლა̈ტხა̈̄ლთე. ზურა̄ლს ხეკუ̂ა̈დ დი̄ნა̈̄ ლინჴრინე ი ჭა̈შს-ჭყინტიშ.
Line of edition: 11    ღუ̂ა̈ჟმა̄რე̄მი ნა̄ქუ̂დ ჟ'ახსერ ი ჭყინტ ა̈დჴერნეხ, დი̄ნა სგა ლახბა̈რჲეხ
Line of edition: 12    ეფენდის-ჭყინტი ძიძა̈ი ბაბას. ეჯა სურუ ეზერ დი̄ნა ლა̈სუ̂ ი ლახლატჷნ
Line of edition: 13    ეფენდის. ოხუ̂ბინე ლიმციქულ, ერე "ჟი̄უ̂ ესერ ა̈ნსყე ჯა".
Line of edition: 14    ალა ამნე̄მ ა̈დუ̂ა̈შგდა̄, დი̄ნად, ი ჩოთჩა̈დ ამხა̈ნქა ი ქალქი ჰოკერ
Line of edition: 15    ლარდო̄ლ ა̈ნქირჲე ი ჩუ̂არდახ ჯა-ჲ მიჩა მომსახუ̂რილ. ათხე ეფენდის
Line of edition: 16    მე̄უ̂არ გუ ხა̄რ, ერე ალას-ა́, დი̄ნას, ჩუ მოშ ჲა̈რდ ოთღორუ̂ას ი ღო
Line of edition: 17    სგა̄ხრა̈კუ̂ნას ცხას მიჩ. აშხუ̂ ლადა̈ღ ხა̈̄ქუ̂ დედბერილდ: "ეჯ დი̄ნას სგა
Line of edition: 18    ხუ̂იღუ̂რეუ̂ი მი, ჰე ლაჰჷნწა̈̄ლს ქა მა̈ყჩე". ეფენდიდ ხა̈̄ქუ̂, ერე "ლიჰჷნწა̈̄ლის
Line of edition: 19    ესერი̄ ქა̄თყიჩე ი საჩქუ̂ა̈რსი̄ ლახჰო̈დნე, ლახ ეჩას სგო̄ხჴიდე".

Line of edition: 20       აშხუ̂ ლადა̈ღ ანჷ̄გა̈ნ დედბერილ ი სგა ლა̈ხმუშგუ̂რა̈̄ნ ზურა̄ლს.
Line of edition: 21    ეჯნე̄მ ა̈დჷლხინე-ჲ ლეზო̈ბ ოხჴიდ შიშდ. დედბერდ ჩიქე ეშხუ ნუკუ̂ი
Line of edition: 22    ლეზო̈ბ ადწინუ̂ე, ღო მე̄რმე ი ღო მე̄სმე: "ქუ̂ინ ესერ ხოჴანხ". ეჩქა
Line of edition: 23    ხა̈̄ქუ̂ დი̄ნად:
Line of edition: 24       -- იმღ' ე̄სერ დო̄მ იზბი? -- დედბერდ ლახტიხ:
Line of edition: 25       -- იმღ' ე̄სერ ი ქუ̂ინ ესერ ხოჴანხ მიჩა ნა̈ფდა̄ლუ̂ ლეზუ̂ბა̈რს ი
Line of edition: 26    ეჯღა: ჩუ̂ ესერ დე̄სა მჷრე̄ს ისტღუნა̈̄ლ.
Line of edition: 27       -- ჩუ̂ ესერ ხამა მო̄დ ისტღუნა̄ლუ̂ნი, ჩი საფტინს ესერ ჩუ ისტღუნა̈̄ლ
Line of edition: 28    ჯა.
Line of edition: 29       -- აბანოთე ესერ დე̄სა მჷრე̄ს ხო̄ზნა ი ეჩურ ლისტღუნა̈̄ლ ესერ
Line of edition: 30    მა̄მა ხაშიდ.

Line of edition: 31       მე̄რმა ლადა̈ღ ა̈ნმა̄რა̈̄ნ დი̄ნა-ჲ დედბერი სგა ლა̈ჲჴერნე ი ესღრი
Line of edition: 32    ეჯჟი̄ნ აბანოთე. ათხე კოტო̄ლ გარ ხოკლიხ ეფენდი̄ ყო̄რმჷყ, ეჩქა
Line of edition: 33    დედბერილ ლა̈ხჭუ̂ედდა:
Line of edition: 34       -- უ̂ოშა რიგ ესერ ხუღუ̂ე ნაცა̄და̈რ?
Line of edition: 35       -- ეშხუ რიგ ესერ გარ.


Page of edition: 342 
Line of edition: 1       -- ო̄, ალა გარ ესერ დეშ ხა̄რ, -- ი მომსახუ̂ირ აჯაღ უ̂ეშგდჷდ
Line of edition: 2    ათტიხნა̈̄უ̂ნე ლაცა̄დრე ლა̈ჴდათე. ჯა იღუ̂რეუ̂ი დი̄ნას, იღუ̂რეუ̂ი ი
Line of edition: 3    სგაჲ ა̈დღორუ̂ე ეფენდი̄ ყო̄რთე̄სგა. ეფენდიდ ყო̄რა̈ლ ჩუ̂ადკარა̄ლე
Line of edition: 4    ი დედბერილდ სგო̄თჯილკე ეშ დი̄ნას ლარდათე̄სგა. ათხე ეფენდიდ
Line of edition: 5    შიშდ იშგუ̂მინ ლიყუ̂ნა̈̄ლ. ამნე̄მ ხა̈̄ქუ̂-ა́, დი̄ნად, ერე "მიჩა შჷნშუ̂ ესერ
Line of edition: 6    ჩუ̄უ̂ ათბარა̄ლუ̂ნე ხოჩა̄მდ საპონშუ̂ ი ეჩქ' ე̄სერ სგა ლა̈ხყუ̂ინი". ამნე̄მ-ა́
Line of edition: 7    დი̄ნად, თუ̂ინგ ლა̄ე ი საპო̈ნ თე̄რა̈ლქა ჟ'ოთხჷჯნე ბჷგიდ ი ეჩუნღო
Line of edition: 8    ხაჴიდ უ̂იშდ ლაჴუ̂რას, ალა ჩუ̂ადყუჩუ̄რე-ჲ ქა̄დსკინე ამექა ი ჩოთჩა̈დ.
Line of edition: 9    ჩოთჩა̈დ ი ქა̄დსკინე ი სგა̄დ ატა̈ხ მიჩა ლარდათე̄სგა. ათხე ეფენდიდ
Line of edition: 10    ოთირ ლა̈ირ მიჩა (დი̄ნა̈̄) დის ი მუს, ერე "მინე დი̄ნას ესერ კინჩხ
Line of edition: 11    ქო̄თქუ̂ი̄ცა მინეშდ: მახეღუ̂ა̈ჟ ესერ ჲერუ̂ა̈̄ჲ ქა ითნი, ჩი̄ჲ ესერ ეჯა
Line of edition: 12    ხეყუ̂ნა̈̄ლ, ჯ' ე̄სერ ალას ხადურუ̂ა̈ნნა-ჲ ეჩქ' ე̄სერ ეჩას ქალქი ჰოკერ
Line of edition: 13    ოხუ̂ქირჲა ლარდო̄ლ, ჩუ̂ ესერ ა̈რი ეჩე̄სგა".

Line of edition: 14       ალა ლახ ამჟი, ეჩქა მიჩა დიდ ი მუდ ჟ'ანმა̄რეხ ჭყინტ (დი̄ნა̈̄
Line of edition: 15    ჯჷმილ) ამი̄ მჷძჰენიდ. მინე დიდ პლატუკ ქა ლახუ̂ე̄მ ჭყინტს ი ხა̈̄ქუ̂,
Line of edition: 16    ერე "ზისხ ესერ მიჩა დი̄ნა̈̄შ სგა̄უ̂ ლოხუ̂ჭუ̂ე̄ნ ი ქა̄უ̂ ოთჴიდ მიჩ". ალა
Line of edition: 17    ქა̈̄ნჷნგზა̄რუ̂ა̈̄ნ ი შუკუ̂ჟი̄ნ აჭკუ̂ა̈რი: "მი̄უ̂ ლჷჭა̈თ ხუ̂ი, ალა̄, მიშგუ დაჩუ̂ირ,
Line of edition: 18    მი ბა̄ზი ჩუ მო̄დ ოთკუჰუ̄რა: ტკიცუშ ამჟი̄უ̂ ლესუ̂ მო-ა́, გა̈რგლიხ,
Line of edition: 19    ჰა მო̄დე". ამნე̄მ-ა, მიჩა ჯჷმილდ, ფინია̈̄ლი სგა ლა̈ჲჭემ უ̂ეშგინ.
Line of edition: 20    სგა ლახა̄გა̈ნ ისგლე̄თი უ̂ონაქა მიჩა დაჩუ̂ირს, სგა ლოხუ̂ფხჷკნე, დი̄ნად
Line of edition: 21    ჰერ ესდე:
Line of edition: 22       -- ჲა̈რ ესერ ლი ყო̄რჟი მერდე? -- ამნე̄მ ლახტიხ-ა́ ჭყინტდ:
Line of edition: 23       -- ეჯე̄ ჲერუ̂ა̈̄ჲ ჩიგარ ჴუ̂ედნი. -- სუმინ ამჟი ლახტუ̂ი̄ლ ჭყინტდ.
Line of edition: 24    მარე ეჯნე̄მ ეში̄ მა̄მ ოთკარე ყო̄რ-ე́, დაჩუ̂ირდ:
Line of edition: 25       -- მიჩეშთ' ე̄სერ და̈̄რ ესა ჴედნი. -- ჭყინტდ ათხე ლაჲჭკუ̄რე,
Line of edition: 26    ერე
Line of edition: 27       -- ე̄, საბრალ მი, მიშგუ დაჩუ̂ირ ამჟი ლჷქა̈დ მა̄მ ლი, იმუ̂ა̄ლა̄.
Line of edition: 28    მიშგუ ბაბა ეფენდი ერ ა̈ირი. -- ათხე ლახტუ̂ი̄ლ, ერე
Line of edition: 29          -- ჲაღო, ჯ' ე̄სერ ღო მიჩა ჯჷმილ ლი ი ეჩქა დი̄ნად ჩოთკარე
Line of edition: 30    სერ ყო̄რ. ბა̄ზი მა̄მა ლოხკუ̂ა̈შ ალა̄, მიჩა ჯჷმილ, ეჩის-ე́, ჰა̄უ̂ე ჯა
Line of edition: 31    ამი̄ ლა̈ძჰენთე ა̈მჴედლა̈სუ̂ ი მე̄რმა ლადა̈ღ ანჷ̄გა̈ნ ჟი-ჲ ა̈დჴერნე მიჩა
Line of edition: 32    დაჩუ̂ირ ხოშა̄მ ლეტე̄უ̂რ ცხეკთე̄სგა. ეშხუ გუ̂ი ლიძჰენის ხაყლე, მე̄რმა
Line of edition: 33    გუჟი ხაცუ̂დილ. მა̄მ ა̈ძიჰ დი̄ნა-ჲ ჩუ̂ა̈ნდე ფინია̈ჲ ი ჩუ̂ა̈ძიჰ ეჯა. ქა̈̄ნხინ
Line of edition: 34    ზისხ ი სგა̄თჭუ̂ე̄ნ მიჩა დიე̄ პლატოკს, დი̄ნა ჩუ̂აცუ̂ირ ლეტე̄უ̂რისგა
Line of edition: 35    ი მიჯნე̄მ ა̈ნკიდ პლატუკ ი ადჲე მიჩა დითე-ჲ მუთე.

Line of edition: 36       ათხე ანღრი დი̄ნა, ანღრი-ჲ ქა̄ნჰე მინდუ̂ერთექა. ამჩუ მჷლდეღს
Line of edition: 37    ა̈თლაკ ი ხა̈̄ქუ̂, ერე "ლერქუ̂ა̈ლს ესერ ქა დო ხოცა̈̄დი? -- "შიშდ ესერ,
Line of edition: 38    სური̄, ჰემმა ესერ ხეყე̄ნიხ". -- ლახტიხ მჷლდეღდ. დი̄ნად ჭყინტი ლერქუ̂ა̈ლ

Page of edition: 343  Line of edition: 1    ლა̈ჲქუ̂ე ი მჷლდეღს მიჩა ლერქუ̂ა̈ლ ლახქუ̂ე ი ათხე ესღრი,
Line of edition: 2    ესღრი ი იმუ̂ა̄ლე სოფელისგა ჰა̈ლუ̂ა̈ მეგა̈მს ა̈თლაკ ი ათხე ჰა̈ლუ̂ა̈
Line of edition: 3    მეგა̈მთეჟი ლი̄ზა̄ლუ̂ ჟ'ა̈ნკა̈უ̂ გა̈რგლა ეშდჲარუ̂ ზაუ̂ჲა̈ უ̂ა̄დოშ. ჟ'აჩა̈დ
Line of edition: 4    ჰა̈ლუ̂ა̈ მეგა̈მთეჟი ი ჩუ̂ა̈რი ამეჟი. ამი̄ ჩუქუ̂ა̄ნ სარაგ ანღრი ი ამეჩუ
Line of edition: 5    ხელწიფი ლა̈წდაუ̂ა̈რს ლათუ̂ნა̈̄ლ ხა̄რხ. ლახ უ̂აზრა̈ლ ქა ჴიდეხ ლა̈წდაუ̂ა̈რს
Line of edition: 6    ლათუ̂ნათე, ალჲა̈რ ხეწდენიხ ალ დი̄ნა̈̄ ფი̄ფას ჰა̈ლუ̂ა̈ მეგა̈მხა̈ნჩუ
Line of edition: 7    ი ჩუ დე̄შ ითუ̂ნა̈̄ლიხ ამი̄ მაყალშუ̂. ალჲა̈რ-ა, ლა̈წდაუ̂ა̈რ, ნაგზალადაღუ̂
Line of edition: 8    იშუ̂-ჯიჯუ̂ს ა̈თგჷრგილაუ̂ა̈̄ნხ. ხელწიფ ხეცუ̂ა̈̄ლ მიჩა უ̂ა̈ზრა̈ლს.
Line of edition: 9    უ̂ა̈ზრა̈ლ ხა̈ტხეხ, ერე "ფუსდ, ისგუ̄უ̂ ნაცუ̂ა̄ლუ̂ ნა̄რ, ალა ნიშგუ̂ეჲ
Line of edition: 10    ტა̈რ ჰემმა ლესუ̂, მარე ჰა̈ლუ̂ა̈ მეგა̈მჟი ა̈რი მირ ი ეჩი̄ ფი̄ფას
Line of edition: 11    ხეწდენიხ ი ჩა̄ჟა̈რ ჩუ დე̄მ ითუ̂ნა̈̄ლიხ".

Line of edition: 12       ათხე ქა̈̄ხჭა̈მ აშხუ̂ ლადა̈ღ ჩა̄ჟა̈რს ლათუ̂ნა̈̄ლთე ჯა, თუ̂ითან ხელწიფ,
Line of edition: 13    ი ქა ხეწა̈დ, ერე ტკისდ ჰა̈ლუ̂ა̈ მეგა̈მჟი ჩუ მირ ა̈რი. ლა̈ჲკაჩე
Line of edition: 14    თუ̂ეფ ი ხა̈̄ქუ̂: "ე̄, ღე̄რბეთ ხი-ა ამსუ̂ა̄ლდა̈ ქუ̂ინ ხი-ა მა̄ლე იშგენ,
Line of edition: 15    ჩუ̂აღე ჩუქუ̂ა̄ნთე, ადო ჯადგა̈რი!" ზურა̄ლა̈ გუ̂ი ღალ კოტო̄ლ ლი ი
Line of edition: 16    ათყალუ̈̄ნდა ი ჩუ ლეჴედ ხა̄დ. ჩუ ლაჴა̈დჟი ლისუ̂ ოხშყა̈დ ჴუ̂ინაჟუ̂ხა̈ნქა.
Line of edition: 17    ალას ლახ ხელწიფ ხეწა̈დ, რა̈̄ქუ̂: "ლჷკჩე̄უ̂ ესერ ლი მიჩა ბედ,
Line of edition: 18    აშხუ̂ ხეხუ̂მი ლაშდღუ̂ა̄ლ ესერ ლა̄თ ხა̄რა, მარე მე̄რმ' ე̄სერ ქა ლახცადა
Line of edition: 19    ლადი!" სგა̄დჲე ალა ქორთე ი ჩუ̂ა̈დხეხუ̂ჭაშა̈̄ნხ, მარე გა̈რგლი
Line of edition: 20    დე̄მის ალა̄, ზურა̄ლ. ამჟი სემი ჭყინტგეზალ ქა̈̄ხთენა̈̄ნხ სერ თჷმი
Line of edition: 21    ოხჴა̈დ ალას-ა, ხელწიფს, ი მელთერთე აჩა̈დ. მელთერს ჩუ̂ესუ̂დე აშირ
Line of edition: 22    მანა̈თ ი ხა̈̄ქუ̂: "ჲედ ესერ ლოხუ̂თირუ მა ჟი-ჲ მო̄დეჲ კინჩხს ხა̈ქუ̂ცე
Line of edition: 23    ჟი!" მელთერდ ხა̈̄ქუ̂. ერე
Line of edition: 24       -- ხოშა ესერ ჟი ლჷთმი̄ნე ხა̄რ ი ხოხუ̂რა ლეთმი̄ნად ხორი. ჟი̄უ̂
Line of edition: 25    ესერ ლა̈ჲღე̄ლუ̂ე, ადო ხოლა̄მდ ესერ ხოჴდენი.
Line of edition: 26       -- ამგუ̂ა̈ჲ მა̈̄ჲ ლესუ̂, ეში̄ ლა̈̄მითრ ი ეში̄!
Line of edition: 27       -- ჲაღუ̂ ე̄სერ ჯა ოხუ̂შკა̈̄დნე ბერჟა̈ ლჷგრა. ეჯ' ე̄სერ ხოშა̄მ ჭყინტგეზალს
Line of edition: 28    ქა̄უ̂ ლახუ̂ე̄მ ი ჩუ̄უ̂ ადშგურა̄ნე, ერე "ეჯგუ̂ა̈ჲ მა̈̄ჲ ხეღე̄შგა̄ლდე̄დხ
Line of edition: 29    ხოხუ̂რა ჭყჷნტა̈რ (ლახუ̂ბა), ქა ეში̄ ნო̄სა̄უ̂ ლახუ̂ე̄მ". ეჩქ'
Line of edition: 30    ე̄სერ ზურა̄ლ ჟ'ა̈ნხირნი-ჲ ხეღე̄შგა̄ლუ̂ნი ი ლახ ესერ აკუ̂შურნი-ჲ ჩუ
Line of edition: 31    დოშ ადკუშუ̄რი, ეჩქ' ე̄სერ ჟ'ა̈ნხირნი ი ჟი ლეშიმ ესერ ხე̄რი უშკუ̂ნ.
Line of edition: 32    ეჩქ' ე̄სერ მიჯნე̄მი̄ ჩუ̄უ̂ ადყა̄ლუ̂ე-ჲ ეჩქ' ე̄სერ ქა ლეგჷრგა̈ლი ხე̄რა.

Line of edition: 33       ათხე ა̈გით' ა̄ნჴა̈დ ალა̄, ხელწიფ, ი ლჷგრე ქა ლახუ̂ე̄მ მაშე̄ნა̄მ
Line of edition: 34    ჭყინტს ი ჩუ̂ადშგურა̄ნე, ერე "ეჯგუ̂ა̈ჲ ესერ მა̈̄ჲ ლესუ̂, ალ' ე̄სერ ქა
Line of edition: 35    ნო̄მჟი̄უ̂ ი ნო̄მჟი̄უ̂ ლახუ̂ე̄მ მიჩა გეზლი̄რს, მე̄რმა ბოფშა̈რს". ათხე ხეღე̄შგა̈̄ლხ
Line of edition: 36    ალჲა̈რ-ა, მე̄რმე ბოფშა̈რ, მარე ლახ ქა დო̄მჟი მოშ ოთღეხ,
Line of edition: 37    ეჩქა ჟ'ა̈ნხირნა̈̄ნ ალა̄, ზურა̄ლ, ი ქო̄თღე ალა̄, ლჷგრე. ა̈ნკიდ
Line of edition: 38    კუ̂ა̈თხ ი აკუ̂შუ̄რე, აკუ̂შუ̄რე, მარე ჩუ დე̄მჟი მოშ აკუ̂შუ̄რე, ეჩქა ხა̈̄ქუ̂:

Page of edition: 344  Line of edition: 1    "ფისე̄უ̂ ესერ ხაბა ამი̄ მჷშკა̈̄დის, ამი̄ მჷჴდა-ჲ მინსი̄!" მიჩა ჭა̈შ ყო̄რ
Line of edition: 2    სგა̈̄ნჩუ ჩუ ხაპიჟ-ი სგა̄ჲ ანსკინე ქორთე ი ბოფშა̈რ ქა ხოჲა̈ხხ ყო̄რქა:
Line of edition: 3    "ბაბა, დედეს ესერ გა̈რგლ' ო̄თბინა, ბაბა, დედეს გა̈რგლ' ო̄თბინა!"
Line of edition: 4    მარე ზურა̄ლ ჟი̄დ ა̈ნკჷლა̈̄ნ ი ეჩქა ხანჯა̈რ ა̈ნცხუ̂ა̈პ ჭა̈შდ ი ხა̈̄ქუ̂,
Line of edition: 5    ერე
Line of edition: 6       -- ჩუ ესერ აცლჷ̄რე, ჰ' ე̄სერ ქა დო̄მ გა̈რგლი!
Line of edition: 7       -- ე̄, ჲაღო, მიშგუ̄უ̂ ცოდ ჯა̄რ ი ხოშა ლჷთმი̄ნე მა̄დ ი ხოხუ̂რა
Line of edition: 8    ლეთმი̄ნად მირი! -- ათხე ოხუ̂ბინე ამნე̄მ-ა, მიჩა ჭა̈შდ, ლიჭუ̂დიე̄ლ:
Line of edition: 9    "იმხა̈ნ ნაჴა̈დუ̂ ესერ ლი, ჲედ ესერ იშა გეზალ ლი?" ეჩქა ამნე̄მ-ა,
Line of edition: 10    ზურა̄ლდ, ქო̄ხო̄მბუ̂ე სერ, ერე "ჯ' ე̄სერ ლი ხა̈ჯი̄ და̈უ̂ითი გეზალ".
Line of edition: 11    ალა ლახ ა̈დკუ̂იჰ ხელწიფდ, მე̄უ̂არ ათჩო̄ნ: "ო̄, ჲაღო, ჯაჲ ესერ ამი̄თა̄ნს
Line of edition: 12    ხათხე̄ლინა ხახუ̂დ!" ათხე მახან ქუ̂ერწილ აჩუ̂მინ. ქუ̂ერწილუნღო
Line of edition: 13    ზურა̄ლ ჟ'ანმა̄რე მე̄ზიდ მიჩა ლამუ̂არა̈ლთე. ეშდჲერუ დი̄ნა მოჲა̈ხლ
Line of edition: 14    ლოხჴერნე ი ეშდჲერუ უ̂ა̈ზირ ი სემი მიჩა გეზლი̄რ. ათხე ანჴა̈დხ
Line of edition: 15    ალჲა̈რ-ა́, უ̂ა̈ზრა̈ლ, ი თუ̂ით ბოთლიკ ბა̈ნგ ჩიემ ჟ'ა̈ნყიდხ ი შჷნ
Line of edition: 16    ლა̄ჲეხ.

Line of edition: 17       ესღრიხ, ესღრიხ ი ჯუ̂ე̄დია-ნაჯუ̂და მინდუ̂ერისგა ჩუ̂ა̈თბურა̈̄ნხ ი
Line of edition: 18    ჩუ̂ა̈დკარუ̂ა̈̄ნხ. ალჲა̈რდ-ა, უ̂ა̈ზრა̈ლდ, თუ̂ით ბოთლიკ ბა̈ნგ ჩი̄ ჩუ ლახა̈̄შხ
Line of edition: 19    დი̄ნა̈̄ლს ი ჩუ̂ადბა̈ნგუ̂ეხ. ათხე მეცქუ̂ილ ლოხზჷზეხ ხელწიფი ხეხუ̂ს, ერე
Line of edition: 20    ა̈სგა̄უ̂ ესერ ლა̈ჲყუ̂ინე, ადო მიჩა გეზალს ესერ ჩუ ხოძჰენიხ". ლა̈ჲმოხლა
Line of edition: 21    ეჯღა ადბა̈ნგუ̂ეხ, ე ა̈ღო როქუ̂ მა̄მ ხემჲე̄დიხ ლიწე̄ნა̈̄ლ ხელწიფი ხეხუ̂მიშ".
Line of edition: 22    ჟი ლა̄პა̈რ ალა̄, ზურა̄ლ, ი ქა̄ჩა̈დ ლა̈სიამქათე, ა̈ჲცხუნე ალჲა̈რს,
Line of edition: 23    თუ̂ით ჯაყუ̂ ჩი̄ სგა ხაძგერ, მარე ჟი და̈̄რ მოშ ანჲა̈ცხუ̂ნე. ათხე ხოშა
Line of edition: 24    გეზალ ჩოთძიჰხ ღალ ალ ზურა̄ლს. ათხე მანე̄სგირილსჷდ ხოძჰენიხ,
Line of edition: 25    მარე ზურა̄ლდ ხა̈̄ქუ̂, ერე "ჰა̈დურდ ესერ ლახ ჩი̄ ჟ'ოხხუ̂იტეხ, ეში̄
Line of edition: 26    ესერ დე̄მის ითლე მინს ნა̈ფდიათე!" ათხე მაჰუ̂რე̄ნა̄მ გეზალსჷდ ხოძჰენიხ, მარე
Line of edition: 27    ზურა̄ლდჷდ ლახტიხ, ერე "ჩუ̄უ̂ ესერ ოთძიჰხ ეჯაი̄, მინს
Line of edition: 28    ესერ ეში̄ მა̄მა იყუ̂ნე!" ათხე სგო̄ხჯჷრქუ̂ეხ ღალ სერ ხელწიფი ხეხუ̂ს,
Line of edition: 29    მარე ამნე̄მ ხა̈̄ქუ̂, ერე "ეშხუ̂ ესერ ქა̈̄მთე ქა̄უ̂ აფუ̈შდხ ი ეჩჷნღო̄ნ
Line of edition: 30    ესერ მა̈̄ჲ ხეკუ̂ეხ, ეჯა̄უ̂ ხაყერხ!" მარე ალა აშ მა̄დ აფუ̈შდხ ი თა̈კუ̂
Line of edition: 31    ათბეხ ი ამჟი̄ნ აფიშუ̂დხ. ეჩქა ზურა̄ლდ თა̈კუ̂ ქა̈̄ნფიშგ ი ჟაჴუ̂რა̈
Line of edition: 32    ჯირკს სგა̄თბე. ჯა ჩოთჩა̈დხ.

Line of edition: 33       მე̄რმა ლადა̈ღ ჟ'ანჲა̈ცხხ ალჲა̈რ-ა, დი̄ნა̈̄ლ, ითუ̂ით ჯაყუ̂ა̈ ნაძგა̈რუ̂
Line of edition: 34    ჩი̄ ხა̄რხ ი უ̂ეშგდ ანტა̈ხხ ხელწიფიშთე ლა̈ჲმოხლა-ჲ უ̂ა̈ზრა̈ლი̄. ლა̈ხჭუ̂ედდა
Line of edition: 35    ხელწიფ: "მა̈ჲ ესერ ხოჩუ̂მინახ-ი?" ეჩქა უ̂ა̈ზრა̈ლდ ლახტიხხ,
Line of edition: 36    ერე "ეჯე̄, ზურა̄ლ, ესერ ქა̈ჯიშ ლჷმა̈̄რ ი ჩიქ' ე̄სერ ჭყჷნტა̈რ ოთძიჰნიე̄ლა-ჲ
Line of edition: 37    ღო ლა̈სიამქად ხოძგრა თუ̂ით ჯაყუ̂ ი ეჩჷნღო̄ნ ესერ ჯაჲ
Line of edition: 38    ჩუ̂ათჩედახ".

Page of edition: 345 
Line of edition: 1       ალა̄, დი̄ნა, ესღრი ღალ, ესღრი ი სგა̄დჰე იმუ̂ა̄ლე მიჩა ლამუ̂არა̈
Line of edition: 2    სოფელთე̄სგა. სგა ლა̈ხჴა̈დჷ̄ნ მიჩა ლამუ̂არლე ჭიშგა̈რთე̄სგა, სგა
Line of edition: 3    ლოხუ̂ფხჷკნე ალჲა̈რს ი ქა̈̄ნსგიდა მიჩა ჯჷმილ ი ხა̈̄ქუ̂ ალას: "ჲაღო,
Line of edition: 4    მინს ესერ მომსახუ̂ირ ხეწხიხ იმუ̂ა̄ლე ი მიჩ ესერ ეზერ ლირბიე̄ლ
Line of edition: 5    ხოხა-ჲ სგა̄უ̂ ა̈დხინხ მომსახუ̂ირდ!" ამნე̄მ-ა́, ჭყინტდ, შიშდ ლახმა̈ჯო̄ნე
Line of edition: 6    მიჩა დაჩუ̂ირს თე̄რა̈ლქა-ჲ ლახლატჷნ ი სგა̄ჩა̈დ ი ლა̄ხჴჷ̄რა̈̄ნ მიჩა დის
Line of edition: 7    ი მუს, ერე "ამჩუ̄ნ ესერ ა̈რი დი̄ნა-ჲ ჩუ̄უ̂ ესერ ა̈დგენეხ მომსახუ̂ირდ!"
Line of edition: 8    ეჯჲა̈რდ ნა̈ბ ლახუ̂ე̄მხ-ე́, მიჩა დიდ ი მუდ, ი ხა̈̄ქუ̂ხ: "სგა̄უ̂ ესერ ა̈ნჴერნე".
Line of edition: 9    მიჩა დიდ ი მუდ ჩუ დეშ ათირხ ალა̄, ზურა̄ლ: ეჯა ჩუ ლჷძიჰ ხოხალდახ-ე́,
Line of edition: 10    დი̄ნა. ალა ჩუ̂ა̈რი ამჩუ ი ხემსახუ̂ირ ეზა̈რდ ალჲა̈რს-ა́,
Line of edition: 11    მიჩა დის ი მუს.

Line of edition: 12       აშხუ̂ ლე̄თ ალჲა̈რს-ა́, ხა̈ჯი̄ და̈უ̂ითს ი მიჩა ხეხუ̂ს, ლჷწჰობ ხა̄დხ.
Line of edition: 13    ლჷწჰად ხორდახ ხელწიფ ი მიჩა უ̂ა̈ზრა̈ლ ი ეფენდი. ათხე ზურა̄ლდ
Line of edition: 14    (ხელწიფი ხეხუ̂დ) შო̈თილდ ანნაყე ი ხა̈̄ქუ̂ ალ შო̈თილდს ეჩქე̄, შომუ̂ა̈̄ჲ
Line of edition: 15    ნაქა̄მუ̂ა̈რ მა̈გ ჩუ ლუსგუ̂რე ლა̈სუ̂ხ ტაბა̈გჟი, ერე "ცჷგნილუ ესერ
Line of edition: 16    ანა̄მბუ̂ე!" შო̈თილდდ ლახტიხ: "მიჯნე̄მუ ესერ ანა̄მბუ̂ე!" ათხე ჟ'ა̈ნბინე
Line of edition: 17    სერ ხა̈ჯი̄ და̈უ̂ითი დი̄ნაგეზალდ, ერე

Line of edition: 18       "ჲაღო, ლჷმა̈რდ ესერ აშხუ̂ ქუ̂ეყანას ხა̈ჯი̄ და̈უ̂ით. ხარდე̄ნა ესერ
Line of edition: 19    ეშხუ ჭყინტ ი მე̄რმე დი̄ნა. ეჯ ხეხუ̂-ჭა̈შს ხა̈ჯი̄ და̈უ̂ითს ი მიჩა ხეხუ̂ს
Line of edition: 20    ესერ ქუ̂ინ ლა̈ტხა̈̄ლთე ლი̄ზი ხა̈კუ̂დახ. მუს ესერ ხა̈კუ̂და ჭყინტი
Line of edition: 21    ლინჴრინე ი ზურა̄ლს დი̄ნა̈̄შ. მარე ღუ̂ა̈ჟმა̄რე̄მი ნა̄ქუ̂ ესერ ჩიგარ ხოშა
Line of edition: 22    ლი ი ჭყინტ ესერ ოთჴერნახ, დი̄ნა ესერ სგა ლოხუ̂ბა̈რჲახ ჭყინტი
Line of edition: 23    ბაბა-ეფენდი̄შდ. ალ ეფენდი-ჲ ალ ხა̈ჯი̄ და̈უ̂ით ესერ მა̄დ ლჷმა̈̄რხ-ა,
Line of edition: 24    ამჩუ ერ ა̈რიხ, ეჯ' ე̄სერ მე̄რმა ქუ̂ეყანას ლჷმა̈̄რ. -- ათხე ეფენდიდ
Line of edition: 25    ლი̄ზი ლა̈ჲკჷლდა̄ლე, დი̄ნად ლახფანჩუ̂ლე მიჩა ჯჷმილს: "მიშგუ ჯჷმილ,
Line of edition: 26    ყო̄რა̈ლ ბჷგიდ ოთდა̈̄ლ!" ეჩშელდინ მიჩა ჯჷმილ ქა ღჷრი-ჲ ყო̄რა̈ლს
Line of edition: 27    ბჷგიდ ხოდა̈̄ლი. -- ამჩიქქ' ე̄სერ ეფენდის ლახლატა მჷრე̄ს დი̄ნა-ჲ
Line of edition: 28    ლიმციქულ ლოხუ̂ბინა, ერე "ჟი̄უ̂ ა̈ნსყე ჯა". მარე დი̄ნა ესერ მა̄მ
Line of edition: 29    ლჷმა̈̄რ ეჯკა̈ლი ი ნა̈ფდჲათე̄ჲ ესერ მა̄დ ლოხუ̂თი̄ლა. დი̄ნა ქ' ე̄სერ
Line of edition: 30    ღალ ა̈მჩედ ქალქი პილთე ი ამჩუ̄ნ ესერ კოტო̄ლ ლარდო̄ლ ოხუ̂ქირჲა-ჲ
Line of edition: 31    ჩუ̂ ესერ ლჷმა̈რდ ეჩე̄სგა. ათხე ეფენდის ესერ დედბერ ოთქადუ̂ნა,
Line of edition: 32    ქ' ე̄სერ ოხუ̂ზჷზა დი̄ნათე ლაღუ̂რუ̄უ̂ა̄ლდ. სგ' ე̄სერ ლახმუშგუ̂რე̄ნა-ჲ
Line of edition: 33    დი̄ნას ესერი̄ მე̄უ̂არ ათჩო̄ნა ეჩი̄ ლიჴედ-ე́, დედბერიშ. ათხე
Line of edition: 34    დი̄ნა ესერ შიშდ ლეზუ̂ებ ოხჴი̄და, მარე დედბერს მა̄დ ლოხუ̂მამა;
Line of edition: 35    ღო მე̄რმე̄დ ესერ ოხუ̂ჴი̄და, მა̄დჷდ ლოხმამა; ღო მე̄სმე, ეჯაჲ მა̄დჷდ,
Line of edition: 36    მა̈გ ჩოთწინუ̂ა ეჩქ' ე̄სერ დი̄ნას ხო̄ქუ̂ა: -- იმღ' ე̄სერ დო̄მ იზბი მიჩა
Line of edition: 37    ნანყა̈უ̂ ლეზუ̂ებს? -- ქუ̂ინ ესერ ხოჴან. -- ალა ლახტიხ დედბერდ. -- იმშა
Line of edition: 38    ტა̈რ ესერ ლი ღო ალაჲ? -- იმშ' ე̄სერ ი ჩუ̂ ესერ დე̄სა მჷრე̄ს ხოსტღუნა̄ლა-ჲ
Page of edition: 346  Line of edition: 1    ეჩი̄შ. -- ალ' ე̄სერ გუნ ლახსაკუ̂რელე̄ნა. დი̄ნას: -- ჯ' ე̄სერ
Line of edition: 2    ჩი საფტინს ისტღუნა̈̄ლი ეჯ' ე̄სერ იმჟი ლი? -- მარე დედბერს ესერ
Line of edition: 3    ლოხუ̂ტი̄ხა: -- აბანოთე ესერ დე̄სა მჷრე̄ს ხო̄ზნა-ჲ ეჩი̄ ტა̈რ ესერ ლი
Line of edition: 4    ეჯა̄. -- მე̄რმა ლადა̈ღ ესერ სერ დი̄ნაჲ ქა̄თჴერნა დედბერს აბანოთე.
Line of edition: 5    დედბერილ ესერ ლახჭუ̂ედნე̄ნა: -- საცუ̂ლა̈რ ესერ უ̂ოშა რიგ ხუღუ̂ე?
Line of edition: 6       -- უ̂ოშა-ჲ ეშხუ ესერ გარ. -- ალ' ე̄სერ გარ დეშ ხა̄რ ი სემი რიგ ესერ
Line of edition: 7    ხაკუ ნაცა̄და̈რ. მიჩა მომსახუ̂რილ ესერ უ̂ეშგდუ ატიხ. -- ალა უ̂ეშგდ
Line of edition: 8    ატიხ. ათხე დედბერილს ესერ ჯა სგო̄თღორუ̂ა ეფენდი̄ ყო̄რისგა ი
Line of edition: 9    ეფენდის ესერ აშ-ი-აშ ხოყრა. ალ ეფენდი ესერ მა̄დ ლჷმა̈̄რ ეჯა.
Line of edition: 10       -- ყო̄რა̈ლ ესერ ბჷგიდუ ოთდა̄ლე მიჩ ჯჷმილდ, მარე ეფენდიდ ლი̄ზი̄დ
Line of edition: 11    ლა̈ჲკლდა̄ლე. -- ალას-ა, დი̄ნას ხოშგუ̂მინა ეფენდი̄შდ საპონშუ̂ ბჷგიდ ჩუ
Line of edition: 12    ლიბრა̄ლუ̂ნე, ეჩქ' ე̄სერ თე̄რა̈ლქა ბჷგიდ საპო̈ნ ოთხჷჯნა ეფენდი̄შდ.
Line of edition: 13    ეჩჷნღო̄ნ ესერ ხოყრა უ̂იშდ ლაჴუ̂რად ი ქ' ე̄სერ ოთსკინა ამექა. სგა̄დ
Line of edition: 14    ესერ ა̈მტეხ მიჩა ლარდო̄ლთე̄სგა. ამჩიქქ' ე̄სერ ეფენდის ლა̈ირ ოთზჷზა
Line of edition: 15    დი̄ნა̈̄ დიდ ი მუდ, ერე "მინე დი̄ნაგეზალ ესერ ამჟი-ჲ-ამჟი ხოლა
Line of edition: 16    ლი ი შგუ̂ირ ესერ ხოწუ̂ე̄ნა მიჩა̈შდ". ეჩქ' ე̄სერ მიჩა დის ი მუს
Line of edition: 17    მიჩა ჯჷმილ ოთზჷზახ დი̄ნა̈̄ ლა̈ძჰენთე ი პლატოკ ესერ ოთუ̂ბა̈რჲახ
Line of edition: 18    ზისხი ლაჭუ̂ე̄ნდ, მარე ესერ ჭყინტს ფინია̈̄ლ ოთძიჰა ი ჯა ჩოთცუ̂ი̄რა
Line of edition: 19    ლეტე̄უ̂რ ცხეკისგა. ეჩუნღო̄ნ ესერ ჰა̈ლუ̂ა̈ მეგა̈მთეჟი̄ნ ა̈მჩედ ი ამეჩუ̄ნ
Line of edition: 20    ესერ გა̈რგლა ჟ'ოხკაუ̂ა ეშდჲარუ̂ ზაუ̂. ეჩქ' ე̄სერ ხელწიფს ჩოხუ̂ტი̄ხა
Line of edition: 21    მიჩა ხახუ̂დ, მარე გა̈რგლას ესერ მა̄მა̄დ ლჷმჩომინ ი სემი გეზალ ესერ
Line of edition: 22    ამჟი̄ნ ახთენე̄ნა ი ეჩჷნღო̄ნ ესერ ხელწიფს მიჩა ხეხუ̂ მიჩა ლამუ̂ართე
Line of edition: 23    ოთჷნგზა̄უ̂რა ი ეშდჲორი უ̂ა̈ზირ ი ეშდჲორი ლა̈ჲმოხლა ლოხჴერნა.
Line of edition: 24    მარე უ̂ა̈ზრა̈ლს ესერ მიჩა ლიქდუნე ხა̈კუ̂დახ ი ლახ ესერ მო̄დ ხოჩუ̂მინა,
Line of edition: 25    ეჩქ' ე̄სერ გეზლი̄რ ჩოთძიჰნიე̄ლახ ი მინ უ̂ეშგდ ა̈მტეხხ ხელწიფთე
Line of edition: 26    ი ზურა̄ლდ ესერ გეზლი̄რე ლიქდენი ლოხუ̂ბჷრლახ ი სერ
Line of edition: 27    ესერ მიჩ ათჴა̈დჷ̄ნე̄ნა მინეშთე, -- მიჩა დითე-ჲ მუთე, -- ხა̈ჯი̄ და̈უ̂ითიშთე
Line of edition: 28    ი მიჩა ხახუ̂თე მომსახუ̂ირდ ი ლა̈დი ესერ ამჩუ̄ნ ა̈რი ჯაი̄.
Line of edition: 29    ხა̈ჯი̄ და̈უ̂ით ი მიჩა ხეხუ̂ ესერ მიჩა დი-ჲ მუ ლიხ, ალ' ე̄სერ მიჩა
Line of edition: 30    ჯჷმილ-ა, ხელწიფ ესერ მიჩა ჭა̈შ, ეჯ მიჩა მოღლა̈ტ ეფენდი-ჲ მიჩა
Line of edition: 31    უ̂ა̈ზრა̈ლ ესერ ალჲა̈რ ლიხ-ა́.
Line of edition: 32       -- მიჩა ჯჷმილ, ყო̄რა̈ლ ესერ ბჷგიდუ ოთდა̄ლე, ჩუ̂ ესერ ნო̄რუ
Line of edition: 33    ოთჩა̈დ!

Line of edition: 34       ლახ ამნე̄მ მიჩა გაჭიუ̂რება ამჟი̄ნ ქა̄ნა̄მბუ̂ე ი ჩოთცხირე ჩი̄, ეჩქა
Line of edition: 35    უ̂ა̈ზრა̈ლ მა̈გ ჟ'ანხუ̂იტხ. ადქჷნთრინეხ ეჩუნღო ჩეი̄ კა ი ეფენდი ჩუ̂ა̈შიხხ
Line of edition: 36    ამეჟი. ალ ზურა̄ლ სგა̄დ ლა̈ხტა̈ხ მიჩა ჭაშუ̂ ხელწიფს. ხა̈ჯი̄
Line of edition: 37    და̈უ̂ითდ ი მიჩა ხეხუ̂დ საჩქუ̂რა̈ლ ლახუ̂ე̄მხ მინე დი̄ნას ი ხელწიფს.
Line of edition: 38    ალჲა̈რ ა̈გით' ა̄ტა̈ხხ ი ხოჩა ლირდე-ლიზგ' ა̈̄დჴიდხ ი ჯა̈მზჷრახ ღერთემ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.