TITUS
Svan Prose Texts I (Upper Bal)
Part No. 151
Previous part

Text: 156 
Page of edition: 354 
Line of edition: 15 
156. ბაპ ი მიჩა ლელა̈ტ


Line of edition: 16       ლჷმზჷრე̄უ̂ ხი ი ლა̈̄სუ̂ხ ეშხუ ხეხუ̂-ჭა̈შ. ხეხუ̂ს ეშხუ ბაპ ხალტჷნდა.
Line of edition: 17    აშხუ̂ ლადეღ ჭა̈შ იშგანთე აჩა̈დ. ხეხუ̂თე მიჩა ლელა̈ტ ბაპ ანჴა̈დ ი
Line of edition: 18    ხეხუ̂დ ტაბა̈გ ოხგე ი ხოჩა̄მდ ლა̈ხხელა̈̄ნ. ამ დრო̈უ̂ს ჭა̈ში ლახა̄გა̈̄ნ
Line of edition: 19    ყო̄რს. ბაპდ კეცთე̄სგა ადსკინე ი ეჩქა ხეხუ̂დ ჩოთკარე ყო̄რ. ჭა̈შ
Line of edition: 20    ქორთე ანჴა̈დ ი ხა̈̄ქუ̂ მიჩა ხეხუ̂ს, ერე "ლიცუუ̂ ესერ ოხრეკ, გუ̂ეჭ
Line of edition: 21    ლა̈ყუ̂ფა, გუ̂ეჭს ესერ ა̈ძჰენიხ". ხეხუ̂დ ჟ'ოხრეკ ლიც ი ჟ'ა̈ნფუ̈̄ნა̄ნ, ეჩქა
Line of edition: 22    ჭა̈შდ ჩუ̂ა̈ძიჰ გუ̂ეჭ, ქა̄დიე კეცთექა ი კეცჟი ჩუ̂აყუ̂იფ. კეცისგა ბაპ
Line of edition: 23    არდა ი ეჯაი ჩუ̂აყუ̂ა̈ფ.

Line of edition: 24       ეჯ ლე̄თ ჭა̈შდ ლა̈ჲცუ̂ე ბაპ ი ბერლე საყდა̈რთ' ა̄დიე. ლაზჷნგლაგა̈̄რცახა̈ნ
Line of edition: 25    კაპა̈რ ლოხგე ი ჩუ̂ესგენე კაჩუშ ი მიჯნე̄მ ლიზჷნგლა̈გი ა̈დბინე.
Line of edition: 26    ანშჷ̄დხ ქა ბერა̈ლ ქა̈̄მთე ი ლაზჷნგლაგა̈̄რცახა̈ნ მა̄რე ესწუ̂ე̄ნეხ.
Line of edition: 27    ხოჩიდხ ბერა̈ლდ მინე-მინე ყაურჯელა̈რ ი ბაპ ჟ'ა̈ნუნჴუ̂ა̈̄ნ. ბერა̈ლდ
Line of edition: 28    მა̈̄ნკუ̂ი დეშ მირე̄ს ათირხ ბაპ ი ეჩუნღო ჩუ̂ათირხ, ეჩქა ა̈დბინეხ
Line of edition: 29    ლიტფუ̄რა̈̄ლ ი ლიგუ̂ნი. სერ ხა̄რხ ხოლა მიჰმა̈ნ ი ამჩიქქა ეჯ
Line of edition: 30    მა̄რე ანჴა̈დ-ე, ხედუ̂ა̈̄ჲდ ბაპ ამჩუ აცუ̂ირ ი ხა̈̄ქუ̂ ბერა̈ლს: "იმშა
Line of edition: 31    ხოლა მიჰმა̈ნ ესერ ხა̄რხ, მინ მა̄რა̈̄ლ, მა̈ჲ ესერ ხა̈ყრახ?" ბერა̈ლდ
Line of edition: 32    ხა̈̄ქუ̂ხ: ჰამა ესერ მა̈ჲ ხეყრენხ? ლიზჷნგლა̈გი ესერ ჲერე̄ს ოთბინა ი
Line of edition: 33    მინ ესერ ქა̄ლში̄დლიხ ქა̈̄მთე, ხოყრახ ესერ მინე ყაურჯელა̈რ ი
Line of edition: 34    სგ' ე̄სერ ლახდაგრახ ბაპ ი მინს ესერ სგუ̂ებნაუ̂ დეშ ოთთჷრახ". მა̄რემ
Page of edition: 355  Line of edition: 1    ხა̈̄ქუ̂: "ამღა ესერ ნომაუ̂ იწხუ̂აუ̂ა̈̄ლხ, ამის ესერ ჯა ლახშიდ ი ლახუ̂ე̄მხუ
Line of edition: 2    ესერ ესამა". ბერა̈ლდ ხა̈̄ქუ̂ხ, ერე "თეთრს ესერ მასა̈რდ ლაჰო̈დნეხ,
Line of edition: 3    ოდონდ ესერ ქა ნოსაუ̂ ლა̈ჲკუ̂იშ'. ბერა̈ლდ ხუ̂ა̈ჲ თეთრ ლახუ̂ე̄მხ
Line of edition: 4    მა̄რა ი ბაპ ათბა̈რიეხ.

Line of edition: 5       მა̄რემ ბაპ ადიე ხეხუ̂მჷყ. ბაპს უმუ̂ა̈̄იჟი ჰერ ხო̄სდა̈ნ, მა̈რემ ეჩჟი
Line of edition: 6    ლახტუ̈̄ლ ბაპა̈ ხეხუ̂ს: "ყო̄რ ესერ ჩუუ̂ ოთკარე!" ბაპა̈ ხეხუ̂დ ხა̈̄ქუ̂
Line of edition: 7    ერე "უმუ̂ა̈̄ჲ ესერ ამ მუ̈̄შ ხოჩდა, ეჩხაუ̂უ ესერ აჩად, ჯ' ე̄სერ ამუნღო
Line of edition: 8    ა̈გითე დე̄სა ა̈ნხინნე". ბაპა̈ ხეხუ̂დ ლახ ამჟი უ̂არ ხე̄ქუ̂ ყო̄რა̈ ლიკრე̄შ,
Line of edition: 9    მა̄რე ანჴა̈დ ი ბაპ ჩუ̂ახცჷყე̄რე ბუხუ̂არჩუ ი ჯა ა̈გითე ატა̈ხ.

Line of edition: 10       მე̄რმა ლადეღ ბაპა̈ ხეხუ̂ ჟ'ანჷგა̈̄ნ ი ბაპ ლჷშგრე ა̈ხგუ̂ა̈ბ ბუხუ̂ა̈რცახა̈ნ.
Line of edition: 11    ხეხუ̂დ ათხე ლიგუ̂ნი ა̈დბინე ი გუ̂ის ხამჯა ყო̄რა ნაუ̂კარა:
Line of edition: 12    "ალა ესერ ჩუ მირე̄ს ახცჷყე̄რე̄ნა ბუხუ̂არჩუ ი ჩუ ესერ მირე̄ს
Line of edition: 13    ალყიმე̄ლი!"

Line of edition: 14       სერ ალა ქა̄კუ̂ა̈ჰ ჩიაუ̂, ერე "ბაპ ესერ ალდაგა̈რ" ი მა̈გ აჩა̈დ ლაგუ̂ა̈̄ნათე.
Line of edition: 15    ბაპა̈ ლელა̈ტდ ხა̈̄ქუ̂ მიჩა ჭა̈შს, ერე "ჯაჲ ესერ ღჷრი ლაგუ̂ა̈̄ნათე".
Line of edition: 16    ჭა̈შდ ხა̈̄ქუ̂: "ეზა̈რ, აჩა̈დუ ესერ". ჟ'ა̈ნმა̄რა̈̄ნ ზურა̄ლ ი ლი̄ზა̄ლე პილთე
Line of edition: 17    ხა̈̄ქუ̂ მიჩა ჭა̈შდ, ერე "იუ̂კა ესერ ხოლა̄მდ ხა̄რ ღუ̂ეშგინ, ქაუ̂ ესერ ანჴა̈დ,
Line of edition: 18    ჩუ̂ ესერ ესმესგუ̂ნა̈̄ლი". ზურა̄ლ ქა̄ჩა̈დ მიჩა ჭა̈შთე. ჭა̈შს ეცნა̈რ
Line of edition: 19    ბაპდ ზურა̄ლა̈ ლელა̈ტდ დიე ლუმჰოდე ი ყურნა̈ლ ჟ'ოხქუ̂ი̄ცა ი ჩუ̂ესჩიხნე
Line of edition: 20    ლა̄რტყაჩუ ი ხა̈̄ქუ̂ ხეხუ̂ს, ერე "ლახ ესერ იგუ̂ა̈̄ნე̄დს, ამჟიუ̂
Line of edition: 21    ესერ ხა̈̄ქუ̂: "ისგუ-ჲ მიშგუ ნამეწუ̂ა̈დი̄ლ როქუ̂ მიშგუ̂ა სუმტრუკუ̂ა̈̄ლს
Line of edition: 22    ხეთრა". აჩა̈დ ალა̄, ზურა̄ლ, ბაპა̈ ლაგუ̂ა̈̄ნათე ი ქა̈̄ხჴჷ̄რა̈̄ნ ი ხა̈̄ქუ̂, ერე
Line of edition: 23    ა̈მიჩა-ჲ მიჩა ნამეწუ̂ა̈დი̄ლ ესერ მიჩა სუმტრუკუ̂ა̈ჲს ხეთრა". ლოხსგიდახ
Line of edition: 24    ამის სუმტრუკუ̂ა̈ჲს ი ბაპა̈ ჴუ̂ემ-ყურნა ჟი ხოჩხინა ლა̄რტყაჩუ.
Line of edition: 25    ხა̈ლხს ათსა̈კუ̂რა̈ლჷნხ, ერე "ამის ესერ მირე̄ს ოხქუ̂ი̄ცა ბაპდა̈ ი ნინ
Line of edition: 26    ჟ'ახქუ̂იცხ ზურა̄ლს.

Line of edition: 27       ზურა̄ლ ა̈გითე აჩა̈დ, ეჩქა "ლა, ლა, ლა, ლა", ამჟი გარ გა̈რგა̈ლდა.
Line of edition: 28    ჭა̈შ ხეჭუ̂დია̄ლ: "მა̈გუ̂ა̈ჲ ლაშდღუ̂ა̄ლ ესუ̂რ ოთჩუ̂ემნახ?" ხეხუ̂
Line of edition: 29    ამჟი გარ ხა̈ტხა პასუ̈ხს: "ლა, ლა, ლა, ლა", -- ნინ მექუ̂ცე ხა̄დ.

Line of edition: 30       ჭა̈შდ ხოჩა ლირდე̄-ლიზგე ა̈დჴიდ ი ლჷმზჷრე̄უ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.