TITUS
Svan Prose Texts I (Upper Bal)
Part No. 152
Previous part

Text: 157 
Page of edition: 355 
Line of edition: 31 
157. ბაპ ი მიჩა ხეხუ̂


Line of edition: 32       ლჷმზჷრეუ̂ ხიშდ ი ლიხ ბაპ ი მიჩა ხეხუ̂. არდახ ეშხუ ბაპ ი მიჩა
Line of edition: 33    ხეხუ̂. აშხუ̂ ლადეღ ბაპ ი დი̄კუ̂ენ აჩა̈დხ ლაბე̄რგათე. ბაპდ ჩუ̂ადშგურა̄ნე
Line of edition: 34    მიჩა ხეხუ̂, ერე "ლა̈დი სა̈დილ როქუ̂ დო̄სგუ ოთჴიდ". ბაპა̈შ ი
Page of edition: 356  Line of edition: 1    დი̄კუ̂ნი მეჩდანღო ბაპა̈ ხეხუ̂ს ოხჴა̈დ ლელა̈ტ. ლა̈დი̄ ლადეღ ა̈რიხ
Line of edition: 2    ალჲა̈რ ამჩუ ი ბაპს სა̈დილ და̈̄რდ ოთჴიდ. იმუ̂ა̈̄ჲ ბაპ ი მიჩა დი̄კუ̂ენ
Line of edition: 3    ხეშდაბდახ, ეჩექა̈̄ მჷბე̄რგას ჩი̄ს ოხჴა̈დხ სა̈დილ ი ალჲა̈რს-დე̄სა.
Line of edition: 4    ბაპს ათსა̈კუ̂რა̈ლჷნ: "იმღა როქუ̂ დო̄სა ა̈ნჴდა მიშგუ ხეხუ̂ სა̈დილს?!"

Line of edition: 5       ნა̈ბოზს დო̄სგ ანჴა̈დხ ა̈გითე. ბაპა̈ ხეხუ̂ მუგუ̂დაჲ ლეგდ ა̈რი, ჩუ̂ადყურდა
Line of edition: 6    ი ეჩჟინ ესხუ̂ი̄დ მიჩა ჭა̈შს. ბაპს ჰელ ესბჷ̄დ: "დოუ̂ როქუ̂
Line of edition: 7    გუნ ლეგდ არდა!" ბაპ ი მიჩა დიკუ̂ენ მა̈იდუ̂შ იდგაროლხ, მარე ეში
Line of edition: 8    დეშმაგუ̂ეშ ხა̈̄ქუ̂ხ ბაპა̈ ხეხუ̂ს. ამ ლე̄თ ჩუ̂ადყურდახ ამჟინ ი ეშხუ უჟ
Line of edition: 9    ერ ჟი ლუუ̂ჟუნე ხა̄დდახ, ეჩქა ხეხუ̂დ ხა̈̄ქუ̂ ჭა̈შს (მახალღა, მუგუ̂დაჲ
Line of edition: 10    ჩუ ხოუ̂ჟა̈̄ნ): "ბა̄ზი როქუ̂ მიჩ ეჯკა̈ლიბ ი̄სნაუ̂ ლახი̄სნაუ̂ა, ერე ჲედ
Line of edition: 11    როქუ̂ ჴანა̈რს ერე ხოქუ̂თერხ, ჲედ ურემს. მა̈დილუ ხე̄რი, ბაპ, ი ჟიუ̂
Line of edition: 12    ესლეჩა̈̄ნ!" ბაპს ალა ტკიცდ ლოხხალდა ი ქა̄ჩა̈დ ი ჩუ̂ადყურდა ურემჟი̄ნ.
Line of edition: 13    ესნა̈რ ბაპა̈ ხეხუ̂ს მიჩა ლელა̈ტ ხა̄რა ლჷმხა̄ლე ი ჰა̄ლ ბაპ ქა̄ჩა̈დ
Line of edition: 14    ყო̄რქა, მე̄რმა ყო̄რისგა ეჯა ა̈ნხინ შიშდ. ალა დი̄კუ̂ენდ ჟი ა̈ნმეჴრე
Line of edition: 15    ი ხოჰუ̂ნა̈რი. ბაპა̈ ხეხუ̂დ ხა̈̄ქუ̂ მიჩა ლელა̈ტს, ერე "მჷხა̈რ როქუ̂
Line of edition: 16    ჯა სა̈დილს ხოჴდე მიჩ, მარე იმე როქუ̂ დო ირდი, ეჩი̄შ მა̄მა ხოხა".
Line of edition: 17    ეჩქა ლელა̈ტდ ხა̈̄ქუ̂, ერე "ჲაღო, ჯა როქუ̂ ესი̄ზინი, ეჩქა შუკუ̂ჟი̄ნ
Line of edition: 18    უ̂ისგუ̂ი ნა̈ბჴუუ̂ა̈რს შიდნუნი ი ეჩისუ ა̈ხჭა̈მ". ალა დი̄კუ̂ენდ ჟი̄დ ა̈ნჰორნე
Line of edition: 19    ი ათხე ქა̄ნსინჯუ̂ე ბაპთე. ალა ესნა̈რ იჭჷრუ̂ელა̈̄ლ ბა̄ზი ლე̄თ
Line of edition: 20    ურემჟი̄ნ ი ჩუ დემჟინ ა̈თუ̄ჟდა.

Line of edition: 21       ლირჰა̈̄ლთე ა̈ხკუ̂ა̈დ მიჩა ხეხუ̂თე ლი̄ზი, მარე მა̈ჲ ჩუ̂ემინეს: სგა ჰე̄
Line of edition: 22    ღჷრი ი ჴანა̈რ ი ურემ ხა̈გუ̂ნებ, მა̄დეჲ ხეხუ̂მი ლიყუ̂ნა̈̄ლ ხაკუ.

Line of edition: 23       მე̄რმა ლადეღ ბაპა̈ ხეხუ̂დ აჯაღ ლეგდ ლირდე̄დ ა̈ნმეზზე ი ბაპდ
Line of edition: 24    ი მიჩა დი̄კუ̂ენდ სა̈დილ შუნ ლა̄ეხ ი აჩა̈დხ. ჰა̄ლ ალჲა̈რ ქე̄სწუ̂ე̄ნე
Line of edition: 25    ყო̄რქა, შიშდ ჟ'ანჷგა̈̄ნ ი ქათალ ა̈ძიჰ ი ჟ'ანჯა̈ბ. ათხ' ე̄ჯკა̈ლიბ სა̈დალ
Line of edition: 26    ჟ'ანმა̄რე, ერე ხოჩა მა̄მა ხეკუ̂ა̈დ ი ადჲე მიჩა ლელა̈ტთე. მარე
Line of edition: 27    დი̄კუ̂ენ ი ბაპ ერ ესღჷრდახ, ეჩქა ანჴა̈დ დი̄კუ̂ენ ი ეჯ შუკუ̂ს ჟი̄კა̈დდა
Line of edition: 28    უ̂ისგუ̂ი ნა̈ბჴუუ̂ა̈რს-ე́, ხედუ̂ა̈̄ჲხა̈ნ ბაპა̈ ხეხუ̂მი ლელა̈ტ შიდა, ი, მინ
Line of edition: 29    იმუ̂ა̈̄ჲთე ესღჷრდახ, ეჩხა̈ნ შიდა. სა̈დლი ლიჴდე̄ დუ̂რეუ̂ ერ ანჴა̈დ,
Line of edition: 30    ეჩქა ბაპა̈ ხეხუ̂ს სგა ლა̈ხჴა̈დჷ̄ნ მიჩა ჭა̈შთე̄სგა. ბაპს ათსა̈კუ̂რა̈ლჷნ ი
Line of edition: 31    მე̄უ̂არ ლოხუ̂ჟინდა ლეგდმერდე ხეხუ̂ ამხაუ̂ მეჴა̈დდ. ხეხუ̂ს მა̄მა ლოხუ̂ცხა̈̄ნ
Line of edition: 32    ალჲა̈რთე̄სგა ლიჴედ, მარე ქაჲ დეშ ლა̈ჲთენე. ბაპდ ერ ხა̈̄ქუ̂:
Line of edition: 33    "მინს როქუ̂ სა̈დილ შუნ ხაღუ̂ე̄ნახ ი სერ მიჩ იმნა̈რ ოხჴი̄და", ეჩქა
Line of edition: 34    ხეხუ̂დ ლახტიხ, ერე "დო̄სა იმე როქუ̂ ჟ'ახიდე̄ნხ ი ეჯღა როქუ̂ ოხჴი̄და".
Line of edition: 35    ჩუ̂ესგურდახ ი ისდილა̈̄ლხ.

Line of edition: 36       ათხე ბაპა̈ ხეხუ̂დ ესსგი̄დრა̄ლე ი ქა ხეწა̈დ მიჩა ლელა̈ტს ი ბაპს
Line of edition: 37    ხა̈̄ქუ̂: "ბაპ, ნა̈ჲ მა̈გ მასა̈რდ გუღუ̂ე ი ეჩ' ე̄რ აბე̄რგე, ეჩას ხეჲდი
Page of edition: 357  Line of edition: 1    იმუ̂ა̄ლე ი ქა̄ლტუ̄ლედ!" ალა ბაპსი ეზერდ ლახბაჟჷნ ი ესღრი ეჩი̄ ლა̈წიჰთე.
Line of edition: 2    დი̄კუ̂ენს ათხი̄დჷნ ალა ი ბაპა̈ მჷქაფ ჯ' ა̄ჩა̈დ. ქა̄ჩა̈დ ბაპა̈ ხეხუ̂მი
Line of edition: 3    ლელა̈ტთე ი ხა̈̄ქუ̂: "ჰე̄, ჯა მა̄რე, თხუმუ ხოწა̄დ, ადო ბაპს ესერ ეჯა
Line of edition: 4    ჩუ ხოხე̄, ჯა ლე̄თი მიჩა ხეხუ̂ცახა̈ნ ლჷმა̈რდ ი ათხ' ე̄სერ ყა̈რუ̂შ გარ
Line of edition: 5    ოთგი̄ჭა ი მე̄უ̂არ ესერ ხა̈ზჷრზე". ამნემ მაჴუ̂ა̄მ ხე̄ქუ̂ ი დი̄კუ̂ენ ანტა̈ხ
Line of edition: 6    მიჩა დაბუ̂თე. ბაპ ი მიჩა ხეხუ̂ ლა̈ხჭუ̂ედდახ: -- იმღ' ე̄სერ მო̄დ ა̈მჴედე̄ლი?" -- მა̄მ'
Line of edition: 7    ე̄სერ გუ̂აწხუ̂ა̈უ̂ი.

Line of edition: 8       ათხე ჟ'ანჷ̄გა̈ნ ბაპ ი ესღრი, დი̄კუ̂ენდ ხა̈̄ქუ̂: "ქ'ე̄სერ-ე́ ღჷრი,
Line of edition: 9    ბერგ ბარჯსუ ესდე". ამნემ ბერგ ბარჯს ესდე ი აჩა̈დ ეჩჟი̄ნ. ალას
Line of edition: 10    ქა ხეწა̈დ ბაპა̈ ხეხუ̂მი ლელა̈ტ ი ეჩჟინ ქა̄დსკინე ლა̄ტუ̂თე, ერე თე
Line of edition: 11    უ̂ედდ ხეჰო̄ლ. ბაპ ქა̈̄თღუ̂ა̈ჭ, მარე ეში̄ დეშ ა̈ჰი̄დ. ქა̄ნტა̈ხ ბაპ, ჩუ̂ა̈დსა̈დლა̈̄ნხ,
Line of edition: 12    მარე მიჩა ხეხუ̂ ხოლა̄მ გუჟინ ა̈დჷრდა ი ქა̈̄ნჰა̄ლე ა̈გითე.

Line of edition: 13       ნა̈ბოზს ა̈გითე ერ ანღჷრდახ, ეჩქა ლახსჷმდახ მეთხუ̂ჲარა̈̄ ლიტუ̂ი̄ლიელ
Line of edition: 14    ი წეუ̂ა̈რ-მეძბარლე ლიჴშდე. დი̄კუ̂ენდ ხა̈̄ქუ̂ ბაპს: "ჰაუ̂, ხოლა
Line of edition: 15    ბაპ, მა̈ჲ დო ჯიჩუ̂მინა! სგა̄დე ამხაუ̂თე̄სგა, ჩალ ჩუქუ̂ა̈ნთე̄სგა ი ჩუ̂ათეპჟ!"
Line of edition: 16    ბაპ ჩუ̂ა̈თპა̈ჟ ი წეუ̂ა̈რ-მეძბარა̈ლდი ანჰეხ ამხაუ̂თექა. დი̄კუ̂ენდ
Line of edition: 17    ქო̄თსჷსნე ბაპს წეუ̂ა̈რ-მეძბარა̈ლ ი ალჲა̈რდ ბაპ ჩუ̂ადცჷლჷ̄რეხ.

Line of edition: 18       ა̈გითე ანჴა̈დ დი̄კუ̂ენ ი ბაპა̈ ხეხუ̂ ი მიჩა ლიზგე-ლირდე მა̈გ მიჩ
Line of edition: 19    ესსა̈დ ი ლჷმზჷრეუ̂ ხიშდ.

Line of edition: 20       ალ ცჷგინ ლჷმლახუ ლი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.