TITUS
Svan Prose Texts I (Upper Bal)
Part No. 153
Previous part

Text: 158 
Page of edition: 357 
Line of edition: 21 
158. ჩა̈ჩია̈ჲ ბაპჷლდ


Line of edition: 22       ლჷმზჷრეუ̂ ხიშდ ი ჩა̈ჩია̈ჲ ბაპჷლდ. არდა ეშხუ ჩა̈ჩია̈ჲ ბაპჷლდ.
Line of edition: 23    აშხუ̂ინ ეჩის ჯუ̂ე̄დია შუკუ̂ს ხა̄დ ლე̄ზი. ესღრი, ესღრი, ჩუ̂ა̈თბურა̈̄ნ.
Line of edition: 24    ამჩუ მეზგე ლი ი სგა̄ჩა̈დ ალჲა̈რთე̄სგა. ამჩუნ (ქორს) ზურლა̈̄რ გარ
Line of edition: 25    არდახ ი ირბია̄ლხ. ქა̄ნნაყეხ ხოშა დია̈რ ი მე̄რმა̈̄ლ ხოხუ̂რა̈̄ლ; ტუ̄ნუშუ̂
Line of edition: 26    ხო̄გა̈ნხ ნა̈̄ყუნდ ღედერ. ღედერ ქე̄სგოშა̄ლეხ აშხუ̂ ხოშა̄მ ფაკა̈ნთე
Line of edition: 27    ი სერ ხოხუ̂რა̈̄ლთე. ბაპ ანღელდა, ერე ხოშა̄მ დია̈რს ი ხოშა̄მ
Line of edition: 28    ფაკა̈ნს მიჩ ლაჰო̈დნახ. ჩოხგეხ ტაბა̈გ ი ჩუ̂ესდეხ ხოხუ̂რა დია̈რ, ჩუ̂ესგეხ
Line of edition: 29    ხოხუ̂რა ფაკა̈ნ ნა̈̄ყუნ. ბაპს ლახლო̄ნ, მარე მა̈ჲუ ხოჩუ̂მინა̈̄ნ. ჩუ̂ა̈დდი̄რა̈̄ნ,
Line of edition: 30    მარე ისგთექა დეშ ახა̄დ. ადირშხ ლაყუ̂რა̈̄ლ: ეშხუ ხოჩა ი
Line of edition: 31    მე̄რმე ხოდრა. ხოდრა̈მ ლაყუ̂რაჟი̄ნ ცა̈გ ი მერხელ ა̈დირშხ. ბაპ ანღელდა,
Line of edition: 32    ერე ხოჩა̄მ ლაყუ̂რაისგა მიჩ ადყუ̂ინნახ, მარე ამჟი̄ნ ზურლა̈̄რდ
Line of edition: 33    მა̄მა ჩუ̂ემინხ. ხოჩა̄მ ლაყუ̂რაისგა მინ ადყურდახ ი ცა̈გ ი მერხელჟი̄ნ
Line of edition: 34    ბაპ ადყუ̂ინეხ. ბაპ მე̄უ̂არ ა̈ნხირნა̈̄ნ, მარე იმუ̂ა̈̄ჲჟი მუშგუ̂რის
Line of edition: 35    ქა ლიკუ̂შე ხოშგუნდა. ჩუ̂ადყურდახ მა̈გ, მარე ბაპს მა̄მა ა̈თუ̄ჟდა. ისი̄პანა̈̄ლ
Line of edition: 36    ბაპ, მარე ჩუქუ̂ა̄ნ ცაგა̈რ ხეჴლიხ ი ჟიქა̄ნ მერხლა̈რ ხეჴფიხ.
Page of edition: 358  Line of edition: 1    უ̂ეშგიმპილს სერ ჟ'ა̈ხფა̈შ ი ჩუ̂ა̈თუ̄ჟდა. ალ დრო̈უ̂ს ზურლა̈̄რდ ჯუ̂ა̈რ
Line of edition: 2    ქო̄თქუ̂ითხ ი ლა̄რტყაჩუნ ჩუ̂ესჩიხნეხ.

Line of edition: 3       ჟ'ანჷ̄გა̈ნ ბაპ ი აჩა̈დ. შუკუ̂ჟინ ლა̈ხშყა̈დ, ერე ჯუ̂ა̈რ მამა ხუღუ̂ა̈̄ნ.
Line of edition: 4    ჟ'ა̈ნწახუ̂ა̈̄ნ ი უ̂ეშგდ ანტა̈ხ. ამჩუნ ზურლა̈̄რს ათსა̈კუ̂რა̈ლჷნხ ი ლა̈ხჭუ̂ედდახ: -- მა̈ჲ
Line of edition: 5    ესერ ხა̈ყრა, ბაპ? -- ჰმ, ჰამა მა̈ჲ მო̄დე, ჯუ̂ა̈რ ჩუ̂ა̈მსა̈დ
Line of edition: 6    ისგუ̂ეჲმჷყ ი ქა̈̄მჴიდდ. -- ზურლა̈̄რს ათსა̈კუ̂რა̈ლჷნხ ი ხა̈̄ქუ̂ხ: "მინეშმჷყ
Line of edition: 7    ესერ მა̄მგუ̂ეშ ხა̈სდა".

Line of edition: 8       ბაპს ლაგუ̂ნია̈ გუ̂ი ოთო̄სდ ი აჩა̈დ მიჩა შუკუ̂ს. ესღრი, ესღრი ი
Line of edition: 9    სგა ლახხუ̂ი̄დ აშხუ̂ მა̄რა. ალას ქა ლახმეშრა̄ლე, მარე მა̈ჲ სა̈რგიბდ
Line of edition: 10    ოხჴა̈დ. ალ მა̄რე ქა ხეწა̈დ, ერე ბაპს ჯუ̂ა̈რ უ̂ეშგინჩუ ხორა̈კ. ქა
Line of edition: 11    ლოხქა̈̄ბ ამჟინ ი გუისგა ხაჩო̄ნ. ესღრი ბაპ ი მე̄რმა მა̄რა̄დ ლახხუ̂ი̄დ.
Line of edition: 12    ალასი ამჟინ ლახმეშრა̄ლე, მარე ამნემი მა̄მგუ̂ეშ ხაყერ: "ხოლა გუ̂ეშ
Line of edition: 13    ესერ ხა̈ყრა", ეჩი ლი̄ქუ̂ი̄სგჷნქა.

Line of edition: 14       ესღრი ბაპ ი ათა̄სდ აშხუ̂ მჷლდეღს. მჷლდეღსი ამჟინ ლახმეშრა̄ლე
Line of edition: 15    ი ეჩქას მჷლდეღდ ხა̈̄ქუ̂: "ჟიუ̂ როქ ა̈ნშუ̂ემ!" ჩუ̂ესგურდახ
Line of edition: 16    ჲერქჷდა: ბაპ ი მჷლდეღ. ბაპდ ქო̄ხო̄მბუ̂ე მა̈გ მიჩა ნა̈ნჭირ: "ლე̄თი
Line of edition: 17    ესერ ჯა ლჷმა̈რდ მეზგაისგა ი ეჯჲა̈რს ესერ კათე ხა̈̄შუ̂ნენახ ეჯ
Line of edition: 18    დრო̈უ̂ს-ე́, შომუ̂ა̈̄ჲ ჯა ა̈მჩედ, ქო̄ხნაყახ ეშხუ ხოშა დია̈რ ი მე̄რმა̈̄ლ
Line of edition: 19    ხოხუ̂რა̈̄ლ. ხოშა დია̈რ ესერ მიჩოშდ ხახლე̄ნა. ნა̈̄ყუნდ ესერ ხა̈გნენახ
Line of edition: 20    ღედერ ტუ̄ნუშუ̂. ქ' ე̄სერ ესგოშა̄ლახ ღედერ აშხუ̂ ხოშა̄მ ფაკა̈ნთე ი
Line of edition: 21    მე̄რმალ ხოხუ̂რა̄ლთე, ხოშა ფაკა̈ნ ესერ მიჩოშდ ხახლე̄ნა. ჩუ̂ესერ ოხგახ
Line of edition: 22    ტაბა̈გ, ხოხუ̂რა დია̈რ ი ხოხუ̂რა ფაკა̈ნ ესერ მიჩოშდ ლოჰოდახ, ხოშა
Line of edition: 23    დია̈რ ი ხოშა ფაკა̈ნ მინეშდ ეს[უ̂]გახ. ჩუ ესერ ალდი̄რე̄ლი, მარე ისგთექა
Line of edition: 24    ესერ დეშ ახა̄რა. ათხე ჩუ ესერ ოთჷრშახ ლაყუ̂რა̈̄ლ, ხოჩა ლაყუ̂რა
Line of edition: 25    ესერ მიჩა̈შდ ხახლე̄ნა, ხოდრა ლაყუ̂რა ეჯჲარეშდ. ხოდრამ ლაყუ̂რაჟი̄ნ
Line of edition: 26    ესერ ჯა ოთყუ̂ინახ ი ხოჩა̄მ ლაყუ̂რაჟი̄ნ მინ ალყუ̂ინე̄ლიხ.
Line of edition: 27    ლე̄თი̄ ლე̄თ ჩუ ესერ დე̄სა ხოუ̂ჟა. ცა̈გდ გუ̂ეში ესერ ხა̄რ ტა̈ნ. ლა̈დი
Line of edition: 28    ჰამს ესერ ალგენე̄ლი ჟი ი უდიარად ა̈მჴედ. შუკუ̂ჟინ ესერ ჯუ̂ა̈რ
Line of edition: 29    ჩუ̂ათქარუ̂ე̄ნა".

Line of edition: 30       ათხე მჷლდეღს ლოხუ̂ჟინდა ი, მიჩა̈შდ მა̈̄ჲ დია̈რ ხუღუ̂ა̈̄ნ, ეჯა
Line of edition: 31    ბაპს ხა̄მნე. ბაპდ მე̄უ̂არ მაჴუ̂ა̄მ ხა̈̄ქუ̂ ი ჩუ̂ა̈დდი̄რა̈̄ნ. ლჷდიარუნღო
Line of edition: 32    ჟ'ანჷ̄გა̈ნ ი ესღჷრდა. ამჩიქქა ხეწა̈დ მიჩა ნასგურჟი ჯუ̂ა̈რს. ბაპს
Line of edition: 33    ათსა̈კუ̂რა̈ლჷნ ი ლოხხალდა ღერთა̈ ნა̈ჴიდ ჯუ̂ა̈რ, სტა̄რუ̈ნ ა̈დირე ი
Line of edition: 34    ჟ'ა̈ნკიდ. მჷლდეღს ხა̈̄ქუ̂: "ალ ჯუ̂ა̈რ შუკუ̂ჟინ ესერ ათქარუ̂ე̄ნა ი ღე̄რბათ
Line of edition: 35    ესერ ოხჴი̄და მიჩა̈შდ".

Line of edition: 36       ლჷმზჷრეუ̂ ხიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.