TITUS
Svan Prose Texts I (Upper Bal)
Part No. 154
Previous part

Text: 159 
Page of edition: 359 
Line of edition: 1 
159. და̈შდუ̂ ი მა̄ლ


Line of edition: 2       ლჷმზჷრე̄უ̂ ხიშდ ი და̈შდუ̂ ი მა̄ლ. ალჲა̈რ ლიხ ლახუ̂ბა ი იზგეხ.
Line of edition: 3    და̈შდუ̂ ხოშა მუხუ̂ბე ლი ი მა̄ლ ხოხუ̂რა. ალჲა̈რს ხორიხ ლა̄შგ ნეზუ̂.
Line of edition: 4    ალა ეჯკა̈ლიბდ ქა̄შგი, ერე მინს, ცხა̈ჲ, ხუღუ̂ახ, მარე ქა ხუ̂ა̈ჲ ხესდენიხ.
Line of edition: 5    აშხუ̂ინ მა̄ლდ ხა̈̄ქუ̂ და̈შდუ̂ს:
Line of edition: 6       -- ეჯა მა̄დე, მიშგუ მუხუ̂ბე და̈შდუ̂, ი ლინზო̄რე̄დდ თა̈შს, ადო
Line of edition: 7    ხუ̂ა̈ჲ გუ̂ება̈̄ქი, დეშ ლაგა̄თუ̂ედ. -- და̈შდუ̂დ ლახტიხ:
Line of edition: 8       -- ალა-უნყს მი̄ჲ მეჭკჷ̄რა̈̄ნ, მარე სი ხოლა კა̈ფიშ ხი ი ქა დეშ
Line of edition: 9    ლა̄ჯეკუ̂შ. ჩუ მაკა̈ფ მიჲ ალა!

Line of edition: 10       მინე ჩუქუ̂ა̄ნ იცხჟი ზექრა (ლალთაშა) ადგეხ ი ინზო̄რეხ ამეისგა
Line of edition: 11    თა̈შს. ჟ'ანგუ̂ეშლეხ ი ქა̈̄ნკილხ. ალა მა̄ლს ესნა̈რ ეჯღა ხა̄რ, ერე ნანზო̄რ
Line of edition: 12    თა̈შ მიჩა ლა̈ქუ̂ნიშა̄ლდ ხამკახა. აჩა̈დ დრო̈უ̂ ი სგო̄ხფხჷკნე ქა̄მენისგა
Line of edition: 13    ქორთე მა̄ლდ ი სგა̄ნსკინე უცეფდ. და̈შდუ̂ ლა̈ხჭუ̂ედდა:
Line of edition: 14       -- ჲა̈რ ესერ ლი მჷფხკჷნე? -- მა̄ლდ ლახტიხ:
Line of edition: 15       -- და̈̄რ, კე̄სა̈რშა! მინე ქორ ა̈დშა̈ნუ̂ა̈̄ნ: ლიპრისდა̈ლ როქ ხა̄რხ ი
Line of edition: 16    ეჩხაუ̂ გუ̂ა̈წჰიხ. სი ხოშა მუხუ̂ბე ხი ქა̄დე, და̈შდუ̂! -- ალა ლუშგუ̂ირ
Line of edition: 17    ლი, ამი̄შ მა̄ლს ჩუ ხოხა. დემჟი აჩა̈დ ი ხა̈̄ქუ̂ მა̄ლს: "მი მა̄მ ღური
Line of edition: 18    ეჩხაუ̂, ს' ადე!"

Line of edition: 19       მა̄ლ ჟ'ა̈ნმა̄რა̈̄ნ ი აჩა̈დ კე̄სა̈რშე̄რემ მა̄მა ა̈წჰეხ ი თა̈შ ლაზობთე
Line of edition: 20    აჩა̈დ. ამის, და̈შდუ̂ს, გარ ხეღროუ̂ა̈̄ლ. ჟ'ესბიზა̈̄ნ თა̈შს ი ა̈გით' ა̈ნტა̈ხ.
Line of edition: 21    და̈შდუ̂ ლა̈ხჭუ̂ედდა:
Line of edition: 22       -- მა̈გუ̂ა̈ჲ აჩუ̂მინხ ი მა̈გუ̂ა̈ჲდ ჯა̄დ, ჲედ მა̈ჲ ათჟა̈ხხ?
Line of edition: 23       -- მინე ქორუ ალშა̈ნუ̂ე̄ლი, ეზერ აჩუ̂მინხ ი მი̄ჲ ეზერდ მა̄დ. იბნი̄ლ-მიბნი̄ლ
Line of edition: 24    ათჟა̈ხხ.
Line of edition: 25       -- მინე ხოშა̄ლე ჟახე ესერ ოთჟახახ!

Line of edition: 26       მე̄რმა ჟინ აჯაღ ამჟი̄დ ოთღორუ̂ე მა̄ლდ. ეჩქა აჯაღ ლა̈ხჭუ̂ედდა
Line of edition: 27    და̈შდუ̂: "მა̈ჲ ესერ ოთჟახახ?" მა̄ლდ ლახტიხ: "იხნჷსგილ-მიხნჷსგილ".

Line of edition: 28       მე̄სმა̄მინ ამჟი ოთღორუ̂ე ი ჩუ ლალე̄მ ალ თა̈შ მა̈გ, -- მა̄დხუ̂ა̈ჲ გარ
Line of edition: 29    ოთსა̈დ. "ათხე ესერ იშთხი̄ლ-მიშთხი̄ლ ოთჟახახ".

Line of edition: 30       მე̄შთხუ̂ა̄მინ აჯაღჷდ ოთფხჷკნე მა̄ლდ. ათხე და̈შდუ̂ ადზჷზე
Line of edition: 31    ძალოშ ლჷწჰათე კე̄სა̈რშე̄რთე. და̈შდუ̂ ლი̄ზა̈̄ლს ლა̈ხჭუ̂ედდა მა̄ლს:
Line of edition: 32    "იმჟი ესერ ჩო̈მინას ეჩე?, მა̄ლდ ჩუ̂ადშგურა̄ნე: "ჰა̄ლ ესერ იჰა̄ლდე̄დს
Line of edition: 33    კე̄სა̈რშა ყო̄რთე̄სგა, ეჩქ' ე̄სერ ამჟიუ̂ ტუ̈̄ლდა: "კე̄სა̈რშა, უჯბა̈̄შ ი
Line of edition: 34    უტყბა̈̄ მუზბა̄ლა, ქა ჲა̈რ ა̈ხსგიდად ქა̈̄მთე!" კე̄სა̈რშე̄რემ ალა ჟ'ა̈ნგოხლეხ,
Line of edition: 35    ქა̈̄ხჭუ̂ა̄დხ ი ლეგდ აჴიდხ და̈შდუ̂. და̈შდუ̂ ა̈გითე ანტა̈ხ ი
Line of edition: 36    ხემშერა̄ლ მა̄ლს. მა̄ლ ა̈თცუ̄დ: "მიჩ ესერ დემნარ ხაყა ი დე ესერ
Line of edition: 37    ხოხა ლამშგუ̂ართე ლი̄ზი!"

Page of edition: 360 
Line of edition: 1       აჩა̈დ დრო̈უ̂ ი მა̄ლდ ხა̈̄ქუ̂ და̈შდუ̂ს:
Line of edition: 2       -- ეჯა მა̄დე, და̈შდუ̂, ი თა̈შ ჟ'ა̈ლწუ̂ე̄ნად, ადო ჩუ დო̄სა ა̈გუ̂-.
Line of edition: 3    ქუ̂ერს.
Line of edition: 4       -- ალა-უნყს მი̄ჲ ჩუ მეჭკჷ̄რა̈̄ნ, მარე ისგოუ̂ მაყლუ̈̄ნდა.

Line of edition: 5       ჟ'ა̈ნმა̄რა̈̄ნხ ი აჩა̈დხ. ეშხუ გუდრა ტჷტ ლა̄ეხ, ზექრათექა ჰა̄ლ
Line of edition: 6    ადჰეხ, და̈შდუ̂ შიშდ ჟი ლა̈ხკუ̂ა̈ფხ ლალთაშას ი ჟ'აჩა̈დ. მა̄ლდ ესტუ̂ი̄ლ:
Line of edition: 7    "ი,ნჷმ' ა̄ჩე, ნჷმ' ა̄ჩე: ცხა̄რა̈ლს ქა ჯაჭკუ̂რე, ადო თა̈შს ჩუ ხაჟღპჷნე!"
Line of edition: 8    და̈შდუ̂ ჩუ̂ანტა̈ხ, მა̄ლდ ცხა̄რა̈ლ ქა̄თჭკუ̂ერ. ლა̈ხკუ̂ა̈ფხ ათხე
Line of edition: 9    და̈შდუ̂ ი ჩუ̂ანშყა̈დ.
Line of edition: 10       -- მიშგუუ̂-უნყს ლა̈მზჷრ ჯეცუ̂ა̈̄ლ, მა̈ჲ-უნყს მეშდენი ათხე?

Line of edition: 11       მა̄ლდ ლახტიხ:
Line of edition: 12       -- მა̈ჲ ი სი ჟ'ა̈მღე̄ლა̈უ̂ ჩუქუ̂ა̄ნ ი მი ჟ'ოდრი ი ჯიშდუნი თა̈შს.

Line of edition: 13       მა̄ლ ჟ'აჩა̈დ ი იზბი თა̈შს. და̈შდუ̂ს ოხკუ̂ა̈რ ეშხუ ნა̈ქუ̂იც. და̈შდუ̂დ
Line of edition: 14    ხა̈̄ქუ̂: "აჯაღუ ესერ ოხკუ̂ა̈რ, ეზერ გა̈მა̈შ ესერ ლი!" მა̄ლდ ლახტიხ:
Line of edition: 15    "ჲაღო, ჩუ̂ათკა̈რ გუნ! და̈შდუ̂დ ჩუ̂ადკარე ი ჩუ̂ადტრიკე, მა̄ლდ ეშხუ
Line of edition: 16    გუდრა ტჷტ ლახშიდ. და̈შდუ̂ს თე̄რა̈ლ ქა̈̄ხხჷპჷ̄რა̈̄ნ.
Line of edition: 17       -- ა̄, მიშგუ ლა̈მზჷრუ ჯეცუ̂ა̈̄ლ, ათხე მა̈ჲ მეშდენი, ჲედ იმ მა̈ჩო?

Line of edition: 18       მა̄ლდ ხა̈̄ქუ̂:
Line of edition: 19       -- ნჷმა ჯაყლუ̄ნი: მი ზანგლა̈გს ლა̈ხუ̂ყედა̈̄ნი ი სი ეჩი̄ ჰერს ხეჭმინა̄ლდა̈ს
Line of edition: 20    ი ამჟი ლიზელა̄ლუ̂ნიდ. -- მა̄ლდ ამჟი ჩუ̂ემინ. აზჷნგლა̈გი,
Line of edition: 21    და̈შდუ̂ ესჭიმ (\\ ეშჭიმ) უ̂ეშგიმ. კოჯა̈ თხუმთექა ოთჟოღ ი ქა̄დკუ̂ა̈რ
Line of edition: 22    კოჯქა. და̈შდუ̂ ჩუ̂ადგან. მა̄ლ ჩუ̂აჩა̈დ ი სგა̄დჲე ჴურუთე̄სგა ი იზბი
Line of edition: 23    და̈შდუ̂ს. ჯიჯუ̂ს ქა̄მენთე აკუ̂ა̄ნე.

Line of edition: 24       ამექა ანჴა̈დ თხე̄რე: -- ხოჩაუ̂ ლადეღ ჯა̄რ მა̄ლს! -- ხოჩაუ̂ ჯა̄რ სი!

Line of edition: 25       თხე̄რე იზბ' ამის-ა, ჯიჯუ̂ა̈რს. ჩუ ლალე̄მ მა̈გ ი ხა̈̄ქუ̂ მა̄ლს:
Line of edition: 26       -- სიუ̂ მირ' ი̄უ̂ას, მა̈ჲ ეზერდ მა̄დ! ქა̄ღერ ამნია̈̄ნიდ, ქა ჯეყჰა̈̄ლ!
Line of edition: 27       -- დემნა̈რ მაწჷხ ისგუ ლიყჰა̈̄ლ, ქა̄დე გა̈ნთე! -- თხე̄რე დემ ხაკედ
Line of edition: 28    ჰაჯს, ეში̄ ხაკფუნე ლიყჰა̈̄ლს, მა̄ლ უ̂არს ხაყლე.
Line of edition: 29       -- ჲაღო ჰაკუ̂დი̄ლ ა̈მქუ̂იჭ, ეჩეჟი ჯეყჰა̈̄ლ.

Line of edition: 30       მა̄ლდ ქო̄ხქუ̂იჭე ჰაკუ̂ა̈დ, ჭჷშხა̈რ ქა̄თკიპო̄რე კოჯს, თხე̄რემ ქო̄ხბჷდ
Line of edition: 31    ი ქა ლა̈ხსა̈დ ჰაკუ̂ა̈დ ი აჩა̈დ მიჩა შუკუ̂ს. მა̄ლ ქა̄ჩა̈დ ი სგა
Line of edition: 32    ლა̈ხჩჷ̄დ მე̄რმა მა̄ლა̈რს. ალჲა̈რს ხასკუ̂რელხ: -- იმნა̈რ ესერ ლიზ ამჟი
Line of edition: 33    ლუგუ̂ა̈რ? ქა̄უ̂ ესერ ხა̈̄ქუ̂ ამი̄ ჴერჴ, ღო მინი ესერ ამჟი იჩოხ.

Line of edition: 34       მა̄ლდ ხა̈̄ქუ̂:
Line of edition: 35       -- ჰაკუ̂ა̈დ ესერ ერ ოთქუ̂ი̄ცა, ეჯღ' ე̄სერ ალლუგუ̂რე̄ლი. მინდი̄
Line of edition: 36    ესერ ქა̄უ̂ ა̈დქუ̂იცხ ჰაკუ̂და̈რ, ღო ესერ ჩუ̂ა̈დლუგუ̂რიხ.

Line of edition: 37       მა̄ლა̈რ ლა̈ხჭუ̂ედდახ:

Page of edition: 361 
Line of edition: 1       -- იმჟ' ესერ ა̈დქუც[ურ]ახ?
Line of edition: 2       -- იმჟი ესერ ი მე̄ფხა ლე̄თ სგაუ̂ ესერ ადქუ̂იჭეხ ჰაკუ̂და̈რ ლჷცთე̄სგა.
Line of edition: 3    ლიც ესერ ჟ'ა̈ნკუ̂ერმი ი ჰაკუ̂და̈რ ესერ ჟ'ესსედნიხ. ეჩქ'ე̄სერ
Line of edition: 4    ჩუ̂ა̈დლუგუ̂რიხ.

Line of edition: 5       მა̄ლა̈რდ ამჟი ჩუ̂ემინხ, იმჟი[უ̂ა̈̄ჲ] ამნემ ხა̈̄ქუ̂. ჟ'ესკუ̂ერმა̈̄ნ[ხ], ჲერს
Line of edition: 6    ქა̈̄ხყუ̂ა̈ფხ ჰაკუ̂და̈რ, ჲერ ჟ'ესდაგანხ, ჲერ ჟ'ესხა̈დხ, ჲერს მა̈ჲ ხეყა̈რხ
Line of edition: 7    ი ჲერს მა̈ჲ.

Line of edition: 8       მე̄რმაჟინ ალ მა̄ლ (კუდა̈ჲ) მალა̈რცახა̈ნ ა̈რი ი თხე̄რე̄დ ანჴა̈დ
Line of edition: 9    ამექა.
Line of edition: 10       -- ო, ნა̈ტიალუ ჯა̄ქუ̂ა მა̄ლს, მა̈ჲ ლუგუ̂ა̈რ ხი!
Line of edition: 11       -- მა̈ჲღენუ̂ა̈̄ჲ ამჟი ჯაშა მიშგოუ̂ ნალგუ̂ა̈რი, ნა̈ჴჩულა̈ ბოგ ალდად,
Line of edition: 12    ეჩექა ქა̄ნრეკლედ მა̈გ მა̄ლა̈რ, ხოლგუ̂არა ჰე ხუ̂ი̄რი ი ხონგუ̂მა,
Line of edition: 13    ეჩქა მი ჩუ̂ა̈მძგუ̂ებნი.

Line of edition: 14       ალა ტკისდ ამჟი ჩუ̂ემინხ. მა̈გ ქა̄ჩა̈დხ მა̄ლა̈რ ბოგქა ი კუდა̈ჲ
Line of edition: 15    მა̄ლს ჩოთძგუ̂ა̈ბ ბოგ ი ჩუ̂აშყა̈დ ჭალა̈ჲთე. თხე̄რე ჟ'ათსგურდა ჟიქა̄ნ.
Line of edition: 16       -- ა, ლჷკჩეუ̂ ლიზ მიშგუ ბედ, ათხე ჩუ ლა̈ჯზუ̂ები! -- მა̄ლდ ლახტიხ:
Line of edition: 17       -- მი დაგრა მა̄მ მამჭირ, მარე ეშხუ ქა ლამსგიდნა̈̄უ̂ინ დეცთე.
Line of edition: 18       -- იმნა̈რ ესერ? -- თხე̄რემ ლახტიხ.
Line of edition: 19       -- იმნა̈რ-ი ალა მიშგუ ნა̈ჭრა̈ლუ̂ ლ'-ა, დეც, ი მა̈წდუნი. -- თხე̄რე
Line of edition: 20    ჟ'ა̈დსგიდა დეცთე: ეზერ ლესგდი ლახბაჟჷნ მე̄ფხე ანტყუ̂სგა̈რშუ̂
Line of edition: 21    ლჷჭრელე დეც ი ლა̈ხჭუ̂ედდა მა̄ლს: -- ამი̄თა̄ნდ ე მოშ ჩუ მა̈ჭრელე,
Line of edition: 22    დე̄მის ჯიზბი. -- ამი̄თა̄ნდ მა̄დე ი ხოჩა̄მდ[ი̄] აჯჭერლი.

Line of edition: 23       ჟ'ანფიშუ̂დ მა̄ლ თხე̄რემ ი აჩა̈დხ. თხე̄რე̄ ლა̈ხჭუ̂ედდა: -- იმჟი ლიჩოდ?
Line of edition: 24       -- იმჟი̄ნ-ი გუშგუ̂ეჲ ლეჟა̈̄ნჩუ ბაპშა აჴნიხ. ნა̈ჲ გუ̂აწჷხ მჷკრა-ჲ
Line of edition: 25    წემა̈შ. სი ქა̄ხეშგბ ეჯჲარე დაჴა̈რს ი ეშხუ დაჴჷლ ქო̄თოღ, ეჯჲა̈რ
Line of edition: 26    ს' ა̈ჯღუ̂ეჭნიხ, ეჩქა მი სგა ლა̈ხუ̂ქა̈̄ლი ი წემა̈შს ი მჷკრას ქო̄თქუ̂ითნე.
Line of edition: 27    ჩუ̂ა̈ლყუ̂აბე̄ნდ ლექუ̂ე̄რისგა.

Line of edition: 28       ალა ამჟი ჩუ̂ემინხ: თხე̄რე დაჴა̈რს ოხშგა̈ბ ი ქო̄თღე ეშხუ დაჴჷლ.
Line of edition: 29    ბაპშა (მჷჴნა) მა̈გ ამის ა̈თღუ̂ა̈ჭხ, მა̄ლ სგა ლა̈ხქა̄ლ ი ლაჴა̈ნხა̈ქა
Line of edition: 30    მჷკრა-ჲ ი წემა̈შ ქო̄თქუ̂ით. ეჩუნღო სგა̄ჩა̈დხ ლექუ̂ე̄რთე̄სგა, ლემესგ
Line of edition: 31    ადა̄შუ̂ეხ, მჷკრა სგა ლახდე მა̄ლდ ლა̈ქჷნთრინას ლემასგუ̂ისგა. თხე̄რე
Line of edition: 32    ხეჭუ̂დიე̄ლ:
Line of edition: 33       -- წემა̈შ მა̈ჲ ჯა̄რ ი ჲედე მჷკრას იმღა ხა̈ქჷნთრინე?
Line of edition: 34       -- მა̈ჲ-ი́ წემაშშუ̂ ჟი ჯა̈ბურკილე (ჟი ჯაკულთხა̈ნი), ერე მჷკროშ
Line of edition: 35    ერ ჯა̈ჭრა̈ლუ̂ნი, ეჩქა ლაქთუნა̄ლ დო̄სა ჯა̈̄ც, ადო ეჩურ დეშ ჯა̈ჭრელე.
Line of edition: 36    -- თხე̄რე ჩუ̂ადყუ̂ინე მა̄ლდ, ჟ'ანკულთხნე ი ხა̈̄ქუ̂: "ლა̈ჲზრი̄ნთხა̄ლეუ̂
Line of edition: 37    ესერ!" თხე̄რემ ლა̈ჲზრი̄ნთხა̄ლე ი ჟ'ა̈ნფუშდუ̄რე. მა̄ლდ მახანჷდ
Line of edition: 38    ანკულთხნე (ანჯჷრქნე). ესზრი̄ნჴა̄ლე თხე̄რემ ი ქუ̂ინ დეშ ა̈ნკიდ. ქა̈̄ნკიდ
Page of edition: 362  Line of edition: 1    მა̄ლდ ალა̄, ლჷქჷნთრინე მჷკრა ლემასგუ̂ხა̈ნქა, ხაზმე თხე̄რა ყიაჩუ ი
Line of edition: 2    ყჷლე: "ა̈ჭი-კა̈ჭი, მეშხე ბედიშ გელია̈ჲ!" რამდენიმეჯერ გაიმეორა
Line of edition: 3    ეს-ფიშრა̄მინ რა̈̄ქუ̂ ალა. თხე̄რე ლა̈ხჭუ̂ედდა მაყლუუ̂ა̄რდ:
Line of edition: 4       -- ალას ესერ იმნა̈რ იჩო?
Line of edition: 5       -- იმნა̈რ ესერ-ი́ ამურ ესერ დემ იჭრელი, -- ი ჟი ხაჴიდ ალა̄, მჷკრა,
Line of edition: 6    თხე̄რა ყიაქა ი ქა̄თქუ̂იც. ყო̄რ ქო̄თდე მა̄ლდ ლექუ̂ე̄რს, ჩუ̂ადყურდა,
Line of edition: 7    თხე̄რე-ჲ დაჴჷლ სგა ლა̈ჲდე გა̈ნხა̈ნ, იზბი ი ხოჩა ბედ ხა̄რ. ჩუ̂ა̈დლუგუ̂რა̈̄ნ
Line of edition: 8    ეჯჟი, ერე ლიქუ̂თუნა̈̄ლ ოთჩა̈დ. ჩუ̂ა̈რი ამჟი. ამ დრო̈უ̂ჟი ყო̄რა̈
Line of edition: 9    მეწკრაისგა ნა̈პო̄ლ ა̈ხქად ი ჟ'ესა̄გა̈ნ მა̄ლს. მა̄ლდ ჟ'ა̈ნჷრმე ი ხა̈̄ქუ̂:
Line of edition: 10    "ლჷკჩეუ̂ ლი მიშგუ ბედ, ლეზუ̂ებ მეშთხე მა̄დ, ათხე სი ლა̈ჯზუ̂ებნე!"
Line of edition: 11    ნა̈პო̄ლდ ლიჴჷ̄რა̈̄ლ ოთბინე: -- მიშგუ̂ა ლიზუ̂ებს იმ ახფა̈სნე, მა̈დილ
Line of edition: 12    ჯე̄რი, ქა̄მფუ, ეჩნია̈̄ნიდ მა̈̄ჲ ჯეცხე̄ნი, ეჯას ჯა̈ჩო.
Line of edition: 13       -- სი მა̈მგუ̂ეშ ჯა̈მჲედა ი ჩუ ჯიზბი. -- ნა̈პო̄ლ აჯაღ ხეჴჷრა̈̄ლ ი
Line of edition: 14    ხაყლე: "მა̈̄ჲ [ესერ] ხოცხე̄ნს, ეჯაუ̂ ხაშგუ̂მინ". მა̄ლდ ჩოთჯჷრუ̂ე ი ხა̈̄ქუ̂:
Line of edition: 15       -- ჲაღო, ჯ' ე̄სერ მა̈ბზა̈̄რ ლიზ სურუ ი ხა̈ქი̄ზანა̄ლუ̂ნე.
Line of edition: 16       -- ჲაღო, ხონჴერდაუ̂ ესერ ამეჩუ საყდა̈რთე.

Line of edition: 17       მა̄ლდ ჩუ̂აფიშუ̂დ ნა̈პო̄ლ ი ოთჴერდა. ნა̈პო̄ლ სგა̄ჩა̈დ საყდა̈რთე̄სგა,
Line of edition: 18    მა̄ლ ჩუ̂ათპა̈ჟუ̂ნე საყდა̈რისგა ლა̈სგიდ ა̈გის. საყდა̈რისგა ა̈წჷრუ̂ე̄ლიხ
Line of edition: 19    ეშდჲორი ბერ-ბაპ. ყაურჯელა̈რ ჩი̄ შუნ ხუღუ̂ეხ, ნა̈პო̄ლ ჟ'ესა̄გა̈ნ
Line of edition: 20    თხუმია̈ ბაპს თხუმჟი. ამის მე̄რმა ბაპდ ყაურჯელ ახფიშუ̂დ, ნა̈პო̄ლ
Line of edition: 21    ჟ'ანპა̈რ, ყაურჯელ ბაპს ხოჲა̈ხ თხუმ. ათხე ნა̈პო̄ლ მე̄რმა ბაპს ესა̄გა̈ნ
Line of edition: 22    თხუმჟი. ამის ეჯნემ, (ნა̈ყირ) ბაპდ, ახფიშუ̂დ ყაურჯელ, ნა̈პო̄ლ ჟი̄დ
Line of edition: 23    ოხჩა̈შ ი ყაურჯელ ბაპს ხოჲა̈ხ. ა̈თჩჷ̄დხ უშხუ̂ა̄რ ბაპა̈რ ი მა̈გ ხატყციხ
Line of edition: 24    უშხუ̂ა̄რ. მა̄ლს ხაჩა ეჯჟი, ერე ჴადა̈რ დე̄სა ხესდენი. ნა̈პო̄ლ ქა̄ნჴა̈დ
Line of edition: 25    მა̄ლთექა ი ლა̈ხჭუ̂ედდა:
Line of edition: 26       -- მა̈გუ̂ა̈ჲდ ესერ ხა̄რა, ჲედ ხაკუ ესერ ესამა სერ?
Line of edition: 27       -- ათხე ეჯზუმ მიქი̄ზანა̄ლა, ერე ჟ'ამი̄დჷნ ი ლეზბუ̄რას ჰე მოშ
Line of edition: 28    მითმე! -- ჲაღო, მინჴერ!

Line of edition: 29       ამელექუ̂ა ანღრიხ ჲორი ზურალა̈̄რ, ლალა̄შა̈რ ჟი ხა̈̄ცუ̂ხ ქუთუ̂ა̈რდ
Line of edition: 30    გუ̂ეში. ნა̈პო̄ლ სგა ლახა̄გა̈ნ სგუ̂ებინისგა მჷდბაშას ლაპჷრჭილა̈უ̂ს, მა̄ლ
Line of edition: 31    უ̂ეშგიმ ლა̈ხქა̄ლ, ქუთუ̂ა̈რს იკედ ლალა̄შხა̈ნჟი, გუ̂იგუ̂ს ქა ხოკედ ი ჩუ
Line of edition: 32    იზბი, ტეფა̈რს უშხუ̂ა̄რ ხა̈ტხე ი სგა ტიხე ლალა̄შთე. ჟ'ესბიზა̈̄ნ ი
Line of edition: 33    ეჩქა ქა̈̄თყა̈ჩ ი გა̈ნთე აჩა̈დ. ზურალა̈̄რ ა̈გითე ანჴა̄დხ, ა̈ნგეხ ჩუ ტაბა̈გ
Line of edition: 34    ი ტეფა̈რ გარ ა̈ხგუ̂ა̈ბხ. ჩუ ა̈რიხ ლუსკუ̂რელე ი დეშ ა̈ცხრეხ: მა̈ჲ დო
Line of edition: 35    ლი ი მა̈ჲ. ნა̈პო̄ლ ლა̈ხჭუ̂ედდა მა̄ლს: -- სერ ესერ მა̈ჲ ხაკუ?
Line of edition: 36       -- მა̈ჲ ესერ ი ათხე მა̈ბზა̈̄რ ლიზ გუნ ი ხაჭმურია̄ლუ̂ნე ესერ,
Line of edition: 37    ღო ესერ ა̈ხჴეჩნი.

Page of edition: 363 
Line of edition: 1       -- ჲაღო, ამეჩუ კე̄სა̈რშა იზგეხ. ეჯჲა̈რს წეუ̂ა̈რ-მეძბარა̈ლ ხორიხ,
Line of edition: 2    ეჯჲა̈რ სი დეშ ჯეჰახ. ჩუ̂ადერ ი ჩუ̂ესი̄გნ ეჯჲარე ყო̄რჟი ი ხატუ̈̄ლდა̈ს:
Line of edition: 3    "კე̄სა̈რშა, უტყბა̈̄შ ი უჯბა̈̄ მუზბა̄ლა, წეუ̂ა̈რ-მეძბარა̈ლ ა̈მსჷსნედ: სჷ-სჷ̄!"

Line of edition: 4       მა̄ლდ ამჟი ჩო̈მინ ოხსჷსნეხ ქა წეუ̂არ-მეძბარა̈ლ. სგუ̂ებინ მა̄ლ,
Line of edition: 5    უ̂ეშგიმ ეჯჲა̈რ. უ̂ოდ-ი-უ̂ოდ ესჭომახ, სგა̈̄ჰი̄დხ ი გინჯილდ ადგენეხ.
Line of edition: 6    ნა̈პო̄ლ მიჩა ლა̄ზს აჩა̈დ ი ლჷმზჷრეუ̂ ხიშდ.

Line of edition: 7       უ̂ოდე ალა-ჲ-ალა დო̄სა ა̈გუ̂ჰი̄დს ნა̈ჲ, ეჩქადუ ლა̈რიდ. -- ო̄, ხუ̂ა̈ჲ
Line of edition: 8    ხა̈ნსუ ხა̈რი!



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.