TITUS
Svan Prose Texts I (Upper Bal)
Part No. 155
Previous part

Text: 160 
Page of edition: 363 
Line of edition: 9 
160.   ჭუ̂ე̄რო̄ლ


Line of edition: 10       ლჷმზჷრე̄უ̂ ხიშდ ი ა̈რი ამჩუ ეშხუ ჭუ̂ე̄რო̄ლ. ალას მეგმი კა̈ცხჟი
Line of edition: 11    ლა̈ცჷნდაუ̂ ხა̄რ მჷსყე ი სემი ლჷგრილ ჩუ ხო̄ზ. ნაგზალადაღუ̂ ქა̈̄ნკუ̂იშ
Line of edition: 12    სემი ლჷფა̈თო̄ლ. ლახა̄სდ აშხუ̂ ლადა̈ღ ამელექუ̂ა მა̄ლ ი ესწუ̂ე̄ნე,ჭუ̂ე̄რო̄ლს
Line of edition: 13    მეგმი კა̈ცხჟი ლა̈ცჷნდაუ̂ ხა̄რ ი სემი ლჷფა̈თო̄ლ ჩუ ხორი
Line of edition: 14    ი ლახტუ̂ი̄ლ: -- უ̂ო̄, ჭუ̂ე̄რ! -- უ̂ო̄ჰო! ლახტიხ ჭუ̂ე̄რდ. -- ეშხუ ისგუ ლჷფა̈თო̄ლ
Line of edition: 15    ჩუ̂ა̈მიკუ̂რ, ადო ლა̈ხუ̂გემ დაჴლა̈ ანზს, ეჩხა̈ნი̄ აჯქუ̂იცე ი
Line of edition: 16    ამხა̈ნი̄ ი სი̄-ჲ ისგუ̂ა ლჷფა̈თო̄ლა̈რს ჩი̄ ჩუ ლა̈ჯზუ̂ებნე!

Line of edition: 17       ათყალუ̂ი̄ნდა ჭუ̂ე̄რო̄ლს ი ეშხუ ლჷფა̈თო̄ლ ჩუ ლეკუ̂ა̄ნე ხა̄დ. ჲორი̄ლ
Line of edition: 18    გარ ესსა̈დ.

Line of edition: 19       ახა̄სდჷდ მე̄რმა ლადა̈ღ მა̄ლ ი ლახტუ̂ი̄ლჷდ ჭუ̂ე̄რს: "უ̂ო̄, ჭუ̂ერ!
Line of edition: 20    ეშხუ ისგუ ლჷფა̈თო̄ლ ჩუ̂ა̈მიკუ̂რ, ადო ლა̈ხუ̂გემ დაჴლა̈ ანზს ი ეჩხა̈ნი̄
Line of edition: 21    აჯქუ̂იცე ი ამხა̈ნი̄ ი სი̄-ჲ ისგუ̂ა ლჷფა̈თო̄ლა̈რს ჩი̄ ჩუ ლა̈ჯზუ̂ებნე!"
Line of edition: 22    ათყალუ̂ი̄ნდა̄დ ჭუ̂ე̄რს ი ჩუ ლეკუ̂ა̄ნე̄დ ხა̄დდა ეშხუ ლჷფა̈თო̄ლ. მა̄ლ
Line of edition: 23    აჩა̈დ სერ ლაქუ̂ლე̄სია̄ლოშ ი მე̄სმა ლადა̈ღ სგა̄დ ლა̈ხტა̈ხ ჭუ̂ე̄რო̄ლს
Line of edition: 24    ი ლახტუ̂ი̄ლჷდ მეგმი კა̈ცხთეჟი: "ეშხუ ისგუ ლჷფა̄თო̄ლ ჩუ̂ა̈მიკუ̂რ,
Line of edition: 25    ადო ლა̈ხუ̂გემ დაჴლა̈ ანზს, ეჩხა̈ნი̄ აჯქუ̂იცე, ამხა̈ნი̄ ი სი̄-ჲ ისგუ̂ა
Line of edition: 26    ლჷფა̈თო̄ლა̈რს ჩი̄ ჩუ ლა̈ჯზუ̂ებნე!" მე̄უ̂არ თჷმი ღალ ხა̄დ ჭუ̂ე̄რო̄ლს,
Line of edition: 27    მარე მა̈ჲუ ხოჩუ̂მინა̈̄ნ ი ჩუ ლეკუ̂ა̄ნე̄დ ხა̄დ ეშხუ ლჷფა̈თო̄ლ ი სერ
Line of edition: 28    ესსა̈დი̄ დე̄სამა ი მა̈ჲუ ხეკუ̂ა̈დ მეგმი კა̈ცხჟი ი ქა̄პა̈რ ლაყუ̂ა̄უ̂ოშ მინდუ̂ერთე
Line of edition: 29    ი სგა̈̄თნა̈ჩდა̈̄ნ ჭო̄რა̈ლს ი ჩუ̂ა̈რი ამჩუ.

Line of edition: 30       აშხუ̂ ლადა̈ღ ეჯჟი და̈რ ჩუ ლა̈სუ̂, ერე სა̈რკდ ლჷ̄გა̈ნ დეც ი
Line of edition: 31    ძუღუ̂' ე̄შ ალსდჷნა. სგა ხა̄გ მა̄ლ ძუღუ̂ათე̄სგა-ჲ ისტღუნა̈̄ლ, ნინ ქა
Line of edition: 32    ხო̄ზ ქა̄მენჩუ. ხა̈წდაჲ ესერ ა̄დუ̂ ალას ჭუ̂ე̄რ ი ა̈ნთჷრგჲა̈ლი̄ნე-ჲ ჭჷშხჟ'
Line of edition: 33    ესკრეტ, მა̄მ' ა̄ფა̈შ მა̄ლ, მუგუ̂დაჲ დო̄სა ა̈ნმეჴრე; ა̈ნთჷრგჲა̈ლი̄ნე-ჲ
Line of edition: 34    ჰაკუ̂ა̈დჟ' ესკრეტ, დე̄სამა̄დ რა̈̄ქუ̂; ა̈ნთჷრგჲა̈ლი̄ნე-ჲ შჷყჟ' ესკრეტ,
Line of edition: 35    მა̄მა̄დ აფა̈შ მა̄ლ; ა̈ნთჷრგჲა̈ლი̄ნე-ჲ თხუმჟ' ესკრეტ, მარე მა̄ლ მუგუ̂დაჲ
Line of edition: 36    ჩუ იუ̂ჟე. ათხ' ა̈̄ნთჷრგჲა̈ლი̄ნე ჭუ̂ე̄რდ ი ნჷნჟ' ესკრეტ, სგა̄ჲ ხაფხეჭ
Page of edition: 364  Line of edition: 1    მა̄ლდ, შჷნ ხუღუ̂ე ჴაფშუ̂ ი ესღუ̂ა მინდუ̂ერ ლექუ̂ა, ხა̈წდახ ესერი̄
Line of edition: 2    ა̄დუ̂ ალას ჭო̄რა̈ლ ი ა̈ხღუ̂ა̈ჭხ მა̈ლს მა̈გ უ̂ეშგინ ი ხატუ̄ლიხ: უ̂ო̄,
Line of edition: 3    მა̄ლ, მა̈დილ ჯე̄რა-ჲ ნომ' ა̄თხჲა ამჟი: ნიშგუ̂ეჲ გუ̂ა̈რიშ ზა̈რურ და̈̄რ
Line of edition: 4    ლუშდღუ̂ე̄ლი-ჲ ზა̈რ ხე̄ქა!" მა̄ლს შდჷქა̈რ ჟი ხო̄გ ჭუ̂ე̄რდ ი ტუ̄ლი:
Line of edition: 5    "ზა̄რა-ჲ ზარა!" -- "ა̄, ალა გარ მა̄დ ლი ნიშგუ̂ეჲ ზა̈რ ი ხოშე̄ლ ათკა̈რ!"
Line of edition: 6    მა̄ლდ ხოშე̄ლ ლაჲკარე ჴარჴ ი რა̈̄ქუ̂' ა̈ზა̄რა-ჲ ზარა!" მარე ჭო̄რა̈ლდ
Line of edition: 7    მა̄დჷდ ახკიდხ ჰაჯ ი ხა̈̄ქუ̂ხჷდ: "ა̄, ხოლა მა̄ლ, ალა გარ მა̄დ ლი ნიშგუ̂ეჲ
Line of edition: 8    ზა̈რ ი ხოშე̄ლ ათკა̈რ!" ჩუ̄ჲ ადკარე მა̄ლდ ჴარჴ, ჰა̄ლ მოშ
Line of edition: 9    ხემჲე̄და̈̄ნ, ჭუ̂ე̄რდ ათხე ლა̈ჲთჷლხნე-ჲ ეშ ლა̈ხქარუ̂ა̈̄ნ ლაყუ̂ა̄უ̂ოშ ჭო̄რა̈ლთე,
Line of edition: 10    მა̄ლ ჩუ̂ასა̈დ მჷგლიჯ ი ლჷმზჷრე̄უ̂ ხიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.