TITUS
Svan Prose Texts II (Lower Bal)
Part No. 95
Previous part

Text: 95 
Page of edition: 198 
Line of edition: 7 
XCV. ყჷრჷმშერ ლიხვტე


Line of edition: 8       ყჷრჷმშერ ჩხარა ლახვბა ლჷმა̈რელიხ. ალჲა̈რ ლამხერ ლჷმზიგხ,
Line of edition: 9    ისლამ ი ციოყ ფა̈რს ლჷმზიგხ.

Line of edition: 10       ყჷრჷმშერს ციოყრე მემახველდ ჰეცრიშ ოთარშერ ფადა̈ს ოხხჷნაბ
Line of edition: 11    ჩუ. ეჯი, ცხა̈ჲ, ბა̈ჟინ ათჴეღახ ციოყა̈რს. ეჯჲა̈რი ჰედურდ მაღვა̈ნს ჩი
Line of edition: 12    ისგახშჷმახ. ფა̈რ ლექვა შუკვ ანღრი, ამელექვა ჰინკა̈რ
Line of edition: 13    ჩუ ჲესვა ხა̈გნენახ, გურებდ ოხსყახ ი ლიშხი ხა̈კვდენახ ყჷრჷმშერ
Line of edition: 14    ი ჰეცრიშ ფადსიშ. გურებ ქოხთჷრჷლახ ი ლექვა ხეკვეს ოხკჷრანკენენხ
Line of edition: 15    ი ისგა ხეკვეს ლოხდენხ ყჷრჷმშერ ლა̈ზგა-ლარღად ჟიქამშხვნჩუ
Line of edition: 16    ი ჟი ხეკვეს ოხბიდნენხ. გურებს ლაკრა̈ნკის ვოშთხვ მარე
Line of edition: 17    ხა̈გნენა ისგა ი ლჷმკჷრანკვნელიხ ლექვა. ისგთე ლექვა ლექვ' ოხკჷრანკახ
Line of edition: 18    ი ჩომრეღველი ეჩქას. ამხენიშ ეჯი ხა̈შიალახ, მარე ეჯჲა̈რ
Line of edition: 19    ისგა ლახყვინენახ გურებს ი დემეგ ხარენახ მაყალვ. ჩოთბურახ
Line of edition: 20    ეჯჟი.

Line of edition: 21       ჰეცრიშ ფადა̈ს გუდ ომქედელი ი ლატვთ' ომჩედელი ეჲ ლეთ.
Line of edition: 22    ამეჩუ ომჩედელიხ ი ჭალა̈ ლეჟა მჷლჷცრ ომჩედელიხ ჩჲა̈გ, ჟი
Line of edition: 23    ლახვთე ი ყორა̈რიშ ბაჩა̈რისგა ომჩედელიხ ისგა. ეჩქანღვე ახარახ
Line of edition: 24    ლიმცოქულ ჟა̈ბიშ ვარგა̈რს ი ალჲა̈რს. ქახჴედახ ლა̈რგავალთე უშხვარ.
Line of edition: 25    ჲერდგვილჟი უშხვარ ხეკვეს ა̈თნაბნენეხ. ამეჩუ ლადეღ ოთნიშნახ ი
Line of edition: 26    ყჷრჷმშერ ჩხარა ლახვბას ლეჟ' ათშჷმახ ციოყა̈რ ლა̈რგავალთე ი ლანბანალ
Line of edition: 27    ხა̈ტ ჩუ ოხჴიდახ.

Line of edition: 28       ციოყს ი ისლამს ამჲა̈რე მჷღლატა ქორა̈შ ი მურყვმა̈შ სა̈ნცხვერა̈რდ
Line of edition: 29    ჟ'ოთგენახ. ნაბნობ ეჯი ლაგალვამჷყ ხარენახ.

Line of edition: 30       ალჲა̈რ ლეჟ' ომჩედელიხ, ყჷრჷმშერ. მჷღლატა ჩუ ლუშგურანე.
Line of edition: 31    ხარენა ისლამს: -- მიჩ ესერ ხა̈ტ ხეღვენი შილისგა, მინ, ლახვბ',
Line of edition: 32    აშხვხენ ესერ იგნიხ ი ეჯჲა̈რ მერმახენ ესერ იგნიხ. შომ' ესერ ჯი
Line of edition: 33    გარცა̈მს ქა ხექინე, ერე "ლა̈დიუნღვე როქვ ლიურდგულ ლესეს ი
Line of edition: 34    ლიღლა̈ტი დემეგ" ი ჯინემ ხა̈ტ ესერ ჟ'ოხოსგეს, ხაჴიდხოღვ თოფა̈რ.

Line of edition: 35       ამჟი ხა̈ტ ჟიჲ ოხოსგა ისლამს ი შიშდ აშხვ ჰერდ ოთტიხახ ი
Line of edition: 36    არა უშხვარჟი ოსდახ ი მეჲჩხრე, მაჰრენ მუხვბე, ქათჩედახ ი
Page of edition: 199  Line of edition: 1    ლჷა̈რ ომსედ. ტვიბ ლექვ' ომჩედელი ი ბაჴლისგა ისგათჩედახ
Line of edition: 2    უსგვირთე. ეჩეჩუ ეშხუ ნაგზი ჟ'ახარა ი ეჩქანღვე ისგათჴედჷნენა
Line of edition: 3    ლეჩხუმთე. ეჩეჩუ, ვა̈რდიას, მოლე მაშედ ხეკჷრქივ, აღვე მა̈ ირივ,
Line of edition: 4    ი ქოლჩიჟელი. ეჩა შთამომავლობა ათხე როქვი ამჟი ა̈რი.

Line of edition: 5       ამეჩუ ლექვა ხა̈ვხახ ი ბა̈რგ მა̈გ ქოხჴიდახ ი ქორა̈რდ ჟ'ოხბიდნახ.
Line of edition: 6    ქონება მეშიალადი ლოხოთახ, ხეხვა̈რ მა̈ ხაჩჷდახ, ქოთჰოდახ. გიმა̈რ ისგ
Line of edition: 7    ჩუბავ მა̈გ ყჷრჷმშერ ლჷმა̈რელიხ. ეჯჲა̈რ ხჷნსგა ფასვჟი ქოთჰოდახ ი
Line of edition: 8    მინს ლოხსჷრგებახ.


Line of edition: 9 
ალექსანდრე ნარსავიძე. ლამხერი. მ.ქალდანი. 20.VIII.195



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.