TITUS
Svan Prose Texts II (Lower Bal)
Part No. 97
Previous part

Text: 97 
Page of edition: 199 
Line of edition: 28 
XCVII. ბესილადა̈შ ნალმა̈რგი


Line of edition: 29       ლჷმა̈რდელიხ ჩა̈გიშერ ბესილ ი მიჩა ჲორი ლახვბა.

Line of edition: 30       ბესილა̈დ ი ფა̈რიშ ოთარშერ ლევან ლჷმა̈რელიხ მა̈სსგა̈რ. ლევანს
Line of edition: 31    გალდამ ხაწენა ლუშნუ ქორა̈შ დჷრრე ლა̈ჴდას. ჩიდ ქა ხობჟინა ი
Line of edition: 32    ბესილადა̈შდ დემეგ ხოქვა. ხა̈ღლინა ბესილა̈დ ვა̈რგიშ ლიქვისგს,
Line of edition: 33    მარე შომას დემეგ ხა̈ქვე, ეჩქას ბესილა̈დდ დაქა̈რ ადაე
Line of edition: 34    ლალდაღთე: ნებოზს დაჴა̈რ ისგახყა ბესილა̈დს, ნანგა̈ვჲაქ ბარჯს
Line of edition: 35    ხა̈ზ ი ისგა ლა̈ჰიდ ლევანს ი მიჩა გალდამს. ათხე ლახა ამჟი
Page of edition: 200  Line of edition: 1    მუგვრის ხოგხ უშხვარ, ბესილა̈დდ ქა ლოხქა̈ბ, დეჲ ხოჩა ხა̈ქვე ი
Line of edition: 2    დეჲ ხოლა, ლევანდ ღეშგიმხენ ჰერ ლახდე: -- ბესილა̈დ, ნომოღ
Line of edition: 3    ლოხქა̈ბ ქა!

Line of edition: 4       ბესიდ ხაქვე: - მიჩ' ესეროღვ მა̈ზიგ ლახჴედა, ჴანარ ესერ დეშ ჴიდეხ,
Line of edition: 5    ჯინემ ესერ მა̈ ხა̈ყრის?

Line of edition: 6       ათხე ღეშდ ესტა̈ხ ბესი ი ა, ხედა ჴა̈ნ დეშ ხობიდ, ალის უღვა
Line of edition: 7    ჟ'ოხკიდ ი ჴანვემ მჷქაფდ ჯი ლახაგა̈ნ ი ხა̈ქვე ხა̈ლხს, ერე: --
Line of edition: 8    ლოხზახლეხოღვ ჴანვ ი კვარემ ლეჟა ლეჟ' ესერ ხა̈ჲსგუნე ჯი.

Line of edition: 9       ლოხზახლეხ ამ ჴანვ ი ბესილა̈დ ეჯგვა̈რ მეგჭად ესხვიდ, ერე
Line of edition: 10    ჴა̈ნ ღეშდ ანშყა̈დ დჷრქა. ეჩქას მახად ხა̈ქვე ბესილა̈დდ ი: -- მინ
Line of edition: 11    მაროლ, მახეღვაჟა̈რ ესერ ლიხ ი ლოხზახლეხ ესეროღ ჴანვ!

Line of edition: 12       ალი ლევანს ათვა̈შგდჷნ ი ეჯგვა̈რ ხაჴიდ ფაუ ჴანვ ჭაქა̈რქა,
Line of edition: 13    ერე ჴა̈ნ ჩვადგან ამეჩუ.

Line of edition: 14       ლევან ლჷხრინე ატა̈ხ ქორთე ი ბესილა̈დ ი მიჩა ლახვხა ხოშილიდ
Line of edition: 15    ლესისგდ ა̈ნკვა̈რ.

Line of edition: 16       ბესილა̈დ გუდ აჴა̈დ ი მურყვამჟი გარ ა̈რი, მარე მა̈ჲ დო ლა̈სვ
Line of edition: 17    ლევანდ ისგა ლა̈ჲჩქუნე (\ ლა̈ჲმჷკთე) ი ხეკვეს ოხსახთას მოლე.
Line of edition: 18    ლევანდ ბესილა̈დს ლა̈ირ ლახემ და̈დიანშერთე. ანჷგა̈ნ ი აჩა̈დ ი
Line of edition: 19    ქადჰიე ლექსვირთე. ამეჩუ დაჩვირ ხორი ი ალი პაპა̈შ ხეხვ ლი ი
Line of edition: 20    ამთეჲსგ' აჩა̈დ ბა̈ზი. ამეჩუ ათჷნხაჟჷნ მიჩა დაჩვირს ი: -- იმთ'
Line of edition: 21    ესერ ესხრი?

Line of edition: 22       -- იმთ' ესერ ი ამჟი-ამჟი, ლევანს ესერ ლოჰოდა ლა̈ირ ი
Line of edition: 23    ეჯი ესერ ხარ ლეისგ და̈დიანშერთე.

Line of edition: 24       -- ჲაღვ' ესერ ქოღვ ლახწონე ლა̈ირ, -- მიჩა დაჩვირდ ხა̈ქვე.

Line of edition: 25       ალი ბესილა̈დდ ა̈დსისტკე: -- ამიშ ესერ ლაწონა დეჲშა ხარ,
Line of edition: 26    ვოდოდო და̈დიანშერს ოთჴიდე, ეჩქად.

Line of edition: 27       მიჩა დაჩვირდ მად' ოთჯჷრვე. ალის ჩუ ხოხალ, იმჟი მა̈სსგა̈რ
Line of edition: 28    ლიხ ლევან ი ბესილა̈დ ი ხამბაჟ: " იმნა̈რ როქვ ა̈თმუნდ ლევან
Line of edition: 29    ბესილა̈დს?! " ი ხაყლუნი მიჩა ჯიმლა̈შ ღალა̈ტდ. მად' ა̈თყა̈ჩ მიჩა
Line of edition: 30    ჯიმილს ი ქახჴიდვნე ლა̈ირ. ადტყჷცჷრე ჩუ კანვერტ ი ამეჲსგა
Line of edition: 31    ხა̈ჲრა, ერე -- ხემა ქა̈ნჭედნეხ, ამჟი ბესილა̈დ ხეკვეს ჩვადგა̈რიხ და̈დიანშერდ,
Line of edition: 32    მიჩა ლახვხას ესერ ჯი ადგა̈რი ამეჩუ, -- ამის ხოჲრი
Line of edition: 33    და̈დიანშერს ლევან.

Line of edition: 34       ათხე ალ ლა̈ირ ქა̈ნჭედ მიჩა დაჩვირდ, ეჩქას ხა̈ქვე ბესილა̈დს,
Line of edition: 35    ერე: -- ალ ლა̈ირ მიჩა ლაღლატა̈რ როქვ ლი. მიჩა როქვ ჲორი
Line of edition: 36    ლახვბა ქორს ლჷდგა̈რ ლიხ ი მიჩ როქვ ამეჩუ ადგა̈რიხ
Line of edition: 37    და̈დიანშერ.

Page of edition: 201 
Line of edition: 1       ოსჭენ (\ ოშჭენ) ამეჩუ ბესილა̈დდ ჟი ი ანტიხ ღეშდ. მიჩა
Line of edition: 2    დაჩვირდ ადშგურანე, ერე: -- შუკვს ნომოღვ აჩა̈დ. ვიცხილდთეჟი
Line of edition: 3    როქვოღვ ანჴა̈დ, ეჩხენჩუ გვალჷლდთეჩუ. გვალჷლდხენქა როქვ გუდ
Line of edition: 4    ჴედნი, მიჩა ლახვბა ლჷდგა̈რ ირიხ ა მადე, ეჯის.

Line of edition: 5       ანჴა̈დ ბესილა̈დ ი ჩვანჴა̈დ გვალჷლდთეჩუ ი ჭი{რ}სუფა̈ლ მა̈გ
Line of edition: 6    ისგა მეჴდე ლი მეშხად ლჷრექვ ი გუდ აჴა̈დ, ერე მიჩა ლახვბა
Line of edition: 7    ლჷდგა̈რ ლიხ. მა̈ ხეკვეს ჩემნეს, ისკორე მიჩა გუჲსგა: ქორთ' ა̈ნჴდენი
Line of edition: 8    ი მიჩი ჩვადგა̈რიხ. ანჴა̈დ ი, ლატლის ხოზგეხ ლა̈ნბა̈შნა ჯარაშერ,
Line of edition: 9    ლჷც მერმახენ ლეჟა ლეჟ' აჩა̈დ ლატლითე ი ჯარაშერ თეჲსგა.

Line of edition: 10       ჯარაშერ ალა̈რ ვოხუშდ ლახვბა ლიხ ი ვოშთხვ ლექვა მეჴდე
Line of edition: 11    ლიხ მინე გაჭირებათე ი ეშხუ ჩუ სიდ ქორს. ამთეჲსგ' ანჴა̈დ ბესილა̈დ
Line of edition: 12    ი ალა̈რ წა̈მ ჯიმილ-დაჩვრემ გეზლირ ლიხ. ათხე ბესიდ ამ
Line of edition: 13    მიჩა მუხვბა ხა̈ქვე: -- ჲაღვ' ესერ ჲარა̈ღოღვ ა̈ნკიდხ ი ლექვ'ოღვ
Line of edition: 14    აჩა̈დხ ლჷჰათე.

Line of edition: 15       ლექვ' ანჴა̈დხ ათხე ბესილა̈დ ი მიჩა მუხვბე ლჷჰათე. ამეჩუ
Line of edition: 16    ლევანს ნოდა̈რ ხაწა მჷჭმემ ი ბესილადა̈შ ლაროლს ა̈ჭმე კაჩჩუ.
Line of edition: 17    ისგლადეღქა ხა̈რჯ ოხჴიდხ ლევანდ ი მიჩა ვა̈ზრა̈რდ მჷჭმას. ნოდა̈რ ლახ
Line of edition: 18    ჩვა̈დდირა̈ნ, ლევან ჰვილს ხაბურგა ი ჩვაჩა̈დ კაჩჩუ ნაჭემიშ ლაკმა̈რითე.
Line of edition: 19    ამჟი ბესილა̈დდ ი მიჩა მუხვბემ ოსცადუნეხ ი ლევან ჩვადგა̈რხ. ბესიოა̈დ
Line of edition: 20    ი მიჩა მუხვბე ატა̈ხხ ლეჟა ლატლითე.

Line of edition: 21       ესნა̈რი ლევანიშ დაჩვირს ი ბესილა̈დს უშხვარიშ თხჷიმ ხალატხ.

Line of edition: 22       ლევანიშ დაჩვირდ ბჷნა̈ბ ლა̈ჲმიზზე ი: -- ბესილა̈დ ესერ ისგოღვ
Line of edition: 23    ლა̈ჲსყეხ ოთარშერდ, ოდო ჟ' ესერ ხვეტნიხ.

Line of edition: 24       ლიხვეტიშ მაყალშვ ბესილა̈დ ტკისდ ისგა̈ნსყეხ ოთარშერდ ი
Line of edition: 25    ამ ბესილადა̈შ ნაბა̈რწყ ლიხ წულკიანა̈რ, ჩუ მა̈ ა̈რიხ.


Line of edition: 26 
ერმინე ცალანი. ზედა ლუჰა. მ.ქალდანი. 18.VIII.1956



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.