TITUS
Svan Prose Texts II (Lower Bal)
Part No. 98
Previous part

Text: 98 
Page of edition: 201 
Line of edition: 27 
XCVIII. ლაყვრია̈შ ლიტყეც


Line of edition: 28       ალ სოფელს ლაყვრი ხაშხა. ათხე ეშხუ გარ მეზგე ხვიზგე.

Line of edition: 29       ათა̈ს ი ჩხარ' აშირ ი ჲერვეშდიეშდიშგვიდ ზავჟი მა̈რტიშ თევლისგა
Line of edition: 30    აშხვ ლეთ მიშგუ მუხვბე მახა̈ილ ღეშდერ კრებას არდა.
Line of edition: 31    ქანჴა̈დ, ეჩქას ლოხჭედ: -- მა̈იჯ ამბა̈ვ ლა̈სვ კრებას?

Line of edition: 32       ეჲნემ მა̈ქვე: -- ეჯისოღვ ნომა ლოხჭედ ი მა̈გ ესერ ა̈მის ხარგა̈დნა:
Line of edition: 33    ამხენქა ქოღვ ოჩვა̈დ, მადეჲ დემის ესერ ფეშნიხ ნიშგეშღა.

Line of edition: 34       სოფელ ჟიქამშხენჩუ ეჯ მჷიშ ბაჩა̈რ ანღჷრდახ: -- ეჯნა̈რ ლეგნებ
Line of edition: 35    ესერ ხვიდ ი იშგანთ' ესეროღვ ოქა̈ხდ მჷხა̈რ.

Page of edition: 202 
Line of edition: 1       -- ჲაღვე ლახაიჯ ამჟი ლი, ხოჩ'ოღჴიჯ ჰამ გვარ ი სემი უღვა
Line of edition: 2    ჴანა̈რიჯ ა̈რიხ ამეჩუ ი მჷხა̈რიჯ ბა̈რგს ქა ლა̈ისგდ.

Line of edition: 3       ირჰალ ეჩქას, ლა̈იდ ლეჰჷრმაშთე, ნა̈ ლარდაჟი ხვაყვრედ ჩუ ი
Line of edition: 4    ფიცრიშ ლარდა, ფიტკრიშ ქორ ი მერმე ლარღა, ქორს ჟიქაქა
Line of edition: 5    ხაგა̈ნ, ა̈ლი მა̈გ აშხვჟი ა̈ხსგა̈ნ.

Line of edition: 6       სოფელ ჟიქაქა, ათხე ლჷხეკ იწვენი, ამექა ხოშა ფაფალ ხად.
Line of edition: 7    ესნა̈რი ა̈ლი ა̈ხძგვა̈ბ ჩუ, ჩუ ხოვა̈ხ სოფელს ი ლა̈ლზიგალ ნაკჷლტ
Line of edition: 8    ა̈ლი ჩვადაჲე. ა̈ლი ფიკვიდ გარ ესღჷრდა ჩუ. ჟიქაქა ხირდვ, ხოლემ
Line of edition: 9    ჰარა̈კ, ჭგშხა̈რ დემის ჯეჟრივ ჩუ.

Line of edition: 10       მი ნებჷვა ი სა̈ულდ მებჴვე მად ი ჴადვისგა ლჷქა̈ჩ ხვა̈სვ. მახა̈ილს
Line of edition: 11    მამაგვეშ ახრეკა ი ფიტკრიშ ქორთ' ოთქინა ქა ი ამხენქა
Line of edition: 12    მა̈ჲდანქა ქა მეჴღე, მა̈გ მიჩ ოხიყა გიმთეჩუ. ამ წა̈მჟი ქორი ჩომთვეფელი.
Line of edition: 13    მა̈გ ფატა̈ნშვ გარ ი არშვილშვ გარ ასა̈დ სერ.

Line of edition: 14       მი მიხალდა: მახა̈ილიჯ ლუდვაშე ირი. ა̈მის ხვეყჷლელ, ჯინემ
Line of edition: 15    ჟიბ ემცა̈დ: -- ჯი ესერ ამეჩუ ა̈რი, ქა ჰენწთექა ლაშდობთექა მეჴდ'
Line of edition: 16    ესერ ლი მა̈გ, გონა̈ბ ნომოღვ მარ.

Line of edition: 17       ეჩქად მი სეითბეშ ქორთეჲსგ' ოდვირ ი ჩვა̈მჭენხ მა̈გ, ლერქვა̈რ
Line of edition: 18    ლამა̈ქვხ. ამზუქა ჩვა̈დრჷჰა̈ნ ი გიმ ლექვა მეჩდე ლა̈სვ ჭალა̈თე.

Line of edition: 19       მიშგვა ქორა̈შ ჲერვეშდიარა მეგრე მანგა̈რხენქა ჰარა̈კ ეშხუ დემეგ
Line of edition: 20    ასა̈დხ ჩუ. ჲერვეშდ ღოლა̈ქხენქა ჲეშდ ქოხსა̈დხ ი ჲეშდ ჩვა̈დდავშა̈ნხ.
Line of edition: 21    ჲერვეშდ ხა̈მ მა̈გ ქოხსა̈დხ: ჩვალხენქა ქა ხეყვფენივხ.

Line of edition: 22       ჩოჩვა̈დდ ი ბარგა̈რ ქა ხეწვენივხ. ვობა̈შ ოხთხედ ჟი მოლემოლე.
Line of edition: 23    ქვინჷმგენოლ აშხვ ა̈დგის ჲერვეშდ ღეთ ადტუმურეხ. სოფელ
Line of edition: 24    მა̈გ ნა̈ ნიმა̈რჯვივ.

Line of edition: 25       მერმა ლადეღ შიშდ თავრობ ანჴა̈დ მესტიახენ. თავრობ დემიჯრა̈ვივ: --
Line of edition: 26    ამეჩუ ქორა̈რ როქვ იმჟი იგნივხ, ნა̈ როქვ ეჩეჲსგა იმჟი ხვირდივდ, მადეჲ
Line of edition: 27    ქ' ესერ იმჟი ოხსედნივდ.

Line of edition: 28       თავრობდ, -- მ' ესერ ნა̈ღვენა, ქვინჷმგენ' ესერ ვოშა ნა̈რდენა,
Line of edition: 29    ნამშა̈ მაზუ ნა̈ღენა, ლაყვრა̈შ ი ლა̈გნა̈შ ლერექვ ესერ ვოშა ში
Line of edition: 30    ნა̈დენა, კიბდონა̈რ ი შკაფა̈რ ვოშა ნა̈გნენა, -- ა̈ლი მა̈გ ჟ'ა̈დიჲრ
Line of edition: 31    ი: -- მისიშ ლეზობდ ნამშა̈ს ესერ ნაჰვდიხ ი ეჯჷნქა ვარჩხილშვ.

Line of edition: 32       ა̈ლი ქა ლანემხ.

Line of edition: 33       მერმოლუ მად' ა̈დზიგა̈ნხ ამეჩუ, აჩა̈დხ ტაფ ი ათხე მი გარ
Line of edition: 34    ხვა̈რი სერ.


Line of edition: 35 
ნ.ცალანი. ლაყვრი. მ.ქალდანი. 21.VIII.1956.



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.