TITUS
Svan Prose Texts II (Lower Bal)
Part No. 113
Previous part

Text: 113 
Page of edition: 229 
Line of edition: 1 
საქმიანობა, ზნე-ჩვეულებანი
Line of edition: 2 
CXIII. ლიჴნი, ლილა̈ში ი ფიმჷჰერი


Line of edition: 3       გუთნა̈რე ლიჴდა̈ლდ დაბრე ლაჴნიდ ღენწშა̈რ ნუღვანდა ნა̈.
Line of edition: 4    ლენწიშჲაქდ ჲარვთე მენკვა მეგამ ხვიკედდ ნენჩაჲსგა. ა̈მის ხოჩამდ
Line of edition: 5    ქატაბეხ ი ზუჰე ხაშხა. ზუჰად მაჩენე ლი წიფრა. ზუჰა ჩუქამშხენ
Line of edition: 6    ბერს ხოსგვრედ ი ბერიშ კა̈ცხს მჷკრას ხვა̈დისგდ. ზუჰა ღოშგიმჩუ
Line of edition: 7    შიმი ლაბორგ ლი მეფშვდე. ა̈მის ქვა̈ჯ ხაშხა.

Line of edition: 8       ლაჴნიჟი ეშხუ მარე ჴანა̈რს ხოჟეღ, ეშხუ ხოღენწიში, ეშხუ, მადეჲ
Line of edition: 9    ჲორი მარე ლა̈ბერგიშვ ხაჭიმხ. ალჲა̈რ კიცხა̈რს რიღვეხ ი
Line of edition: 10    მავინ მელიშ წჷსხა ჟიბავ აკვანეხ ლაფრათე. მჷჟეღს ჴანა̈რ მეწვინდ
Line of edition: 11    ლეისგ ხარ, მჷღეხწიში "ჟიხი"ს ლახ ხექინე, ჟიბავ ლებიდ ხარ
Line of edition: 12    ჴანა̈რდ, "ჩუხი"ს ლას ხექინე -- ჩუბავ. ეჩხე-ამხე ძგჷდა̈რს ხოჩამდ
Line of edition: 13    ხეკვეს ესჭონნას ჴანა̈რს. მჷჟოღდ ხოშა ლაღა̈ლ ბოფშა̈რ ხაყახ.

Line of edition: 14       მჷღენწიშიდ ღენწიშ ნა̈ბა̈შ სკედიდ ხეკვეს აფუშდეს ჩუბავ,
Line of edition: 15    ბაჩა̈რს ი წუსხუნდა̈რს ქათქაბვნას, ლაჭენიჟი ღენწშიშ ბერ ქადშდაბვნას
Line of edition: 16    ხოჩამდ ი ჴანა̈რს ხოზხა̈ლიდეს. ათხე ლაჴნიდ ხოშა ლაღა̈ლ გუთნა̈რ ნუღვე.

Line of edition: 17       ლიჴნელ მუჟღურ ი ქამიზა̈ლს ლი შვა̈ნისგა. მუჟღურ აჴნიხ
Line of edition: 18    მუჟღვრეშიშ კვეცან, ქამიზა̈ლს -- ქამიზა̈ლიშ კვეცან, კულს, ჭჷმინს,
Line of edition: 19    სიმინდს, ფეტვს ი იშგან ნამშა̈ს.

Line of edition: 20       კვეცენ ი კულ ჲორი შვიმიშ წვა ნიშგეშმჷყ: გურ ი ლჷფხა̈.

Line of edition: 21       ხოშა ბა̈რ ა̈დგითე სიმინდს ხვალა̈შიდ. ჭუბერ ი ნაკს მაჩენამ
Line of edition: 22    სიმინდ ჴედნი. ლახვა̈ნი ა̈დგითე კვეცან, მანა̈შს, ჭჷმინს, ქართებილს
Line of edition: 23    ი ამკა̈ლიბს ხვალა̈შიდ ი ა̈მიშ მოსავა̈ლ ჴედნი ხოჩამ. მახე
Line of edition: 24    ნა̈კვიშ გიმისგა სიმინდცახა̈ნ ალჯიხ ქართებილს ი ჲექდა ეზარ
Line of edition: 25    ჴედნიხ. სიმინდისგა ალა̈შიხ ადა̈იდ ლებიას ი კოპეშიას.

Line of edition: 26       როგ, ღედა̈რ ი ქირს ნა̈ნკდ ხოლაშა ჩი. როგს ღედა̈რშალ ი
Line of edition: 27    ლებიაშალ ნაყუნდ ა̈სყიხ ი მა̈ჲდარობჟი ჲერხი სოფლა̈რ ჩუ როქვ
Line of edition: 28    აფრეხ, ქა როქვ ილქვერიხ ი კვეცნემ, მადეჲ ჭჷმნიშ ფაქვ როქვ
Line of edition: 29    ხა̈ჩდინეხ, ამხენქა დია̈რს როქვ ანყეხ ი ამ დია̈რს კოკერა̈ჲშ დია̈რ
Line of edition: 30    ხაშხა. ქირსი ლებიაშალ ლესყი ლი ნაყუნდ. ზჷნთხ, მანა̈შ ი ჭჷმინ
Line of edition: 31    ხოშა მჷნწირ ლეჲრა̈ყი ლი.

Line of edition: 32       მაშენე დოსდ ნიშგეშმჷყ ჭჷმინ იჰელი, ღვე მანა̈შ ი ეჯის ხაჭიმ
Line of edition: 33    კვეცენ, ლებია ი იშგენ მალაშა.

Page of edition: 230 
Line of edition: 1       ლითელ გვირკისგა იბნი. ლა̈თიდ ათხე ხოჩა ფოლედიშ ნაშთქა̈რ
Line of edition: 2    ხუღვეხ. მჷთი ზურალმარე ლი. ლითელქა ნოდობ ხემთქუნხ. ნა̈თევ
Line of edition: 3    ნამშა̈ს ნადრად ა̈დისგხ მჷთა. ეშხუ მარე ლანჩვრის ხაჭიმ ღოშგიმ ი
Line of edition: 4    ლუნჩვრა̈რს უშხვა̈რთე ხა̈დისგ ქვირთ-ქვირთდ. ჭჷმინს ი
Line of edition: 5    ზჷნთხს ლინჩვრი მადმა ხაკუ, ლენჩვრი კვეცენ, კულ ი მანა̈შ გარ
Line of edition: 6    ლიხ.

Line of edition: 7       ნებზვაშა̈რს ჩი ლადღიშ ნა̈თევ მოღა̈ვს ჟი ხაგემხ ღაბისგალგნჩერ
Line of edition: 8    მა̈ ლი, ეჯის პაშანდ ხაგემხ ი, უნჩვრა მა̈ ლი, ეჯის -- ჴა̈შდ.
Line of edition: 9    პაშან ი ჴა̈შ ეჯჟი ხეკვეს ა̈დიგენეს, ერე მჷჟირს ლანწჷრა ქამავ
Line of edition: 10    ხადეს ი ისგაშხენ ფიკვიდ სედნიდეს. მოლა ხა̈ნუნღვე ამ მიღა̈ვს
Line of edition: 11    სა̈ვა̈რჟი ხოლჯიხ ი ჴანშვ ისგა იმღა̈ვიხ ქორთე. ქორს ამ მოღა̈ვს
Line of edition: 12    ლასჷმისგა ჟიიდ ხაგემხ. მოღა̈ვიშ ლაშხვნი ცაომა̈გისგა ნარ.

Line of edition: 13       ლეკლა̈ვიდ მა̈ნკვი წყილია̈ნს (კვეცან ი კულს) ხვაკლა̈ვიდ. ჭჷმნიშ
Line of edition: 14    ნაკლავ კალვისგა წყილია̈ნს დემ აკლა̈ვიხ, ჭჷმინ ხენჩჷდი კვეცან.

Line of edition: 15       ნებოზს ჩვა̈ჟრეხ კალვს, ჰამს ქა̈ჯელვეხ ი მჷჟემ ლიწღა̈ლჟი
Line of edition: 16    შიშდხი ქა ხოფხჟეხ (ქა ხოქვცეხ კალვს). მოლიდ ნაფჷრუნღვე
Line of edition: 17    კალვს გჷრკა̈ნდ ხეჭმენი ეშხუ მაშენამთეშ ბერჟა̈რე ლარსკჷნოშვ ი
Line of edition: 18    ქა̈ჯს ი ჲეშმა̈ს ქა ხოჰერინე კალვხენქა. ეჩქანღვე კეურს ჴასა̈რს
Line of edition: 19    ხობემხ კა̈ვშვ ი აკლა̈ვიხ. მეზ-მეჩედდ კალვთეჲსგა "ხოჩა ლადეღ"იშ
Line of edition: 20    მჷქაფდ ივობა̈შოღვ ა̈ჲფასახ!" ხეკვეს ხექეს. მჷკლავა ხა̈ტხეს:
Line of edition: 21    "ჰა, ვობა̈შოღვ ლადეღ ჯიზ ა!"

Line of edition: 22       ლახა ჟიბავიშთეშ ხოჩამდ ლჷკლავე თერა, ჴანა̈რს ქა ხა̈გნეხ ქამავ,
Line of edition: 23    ქა ხოფშგეხ ი კალვს ჟ'ა̈სპეხ. ამჟუნეხიდ მოლე ხა̈ნს ი აკლა̈ვიხ ეჩქანღვე.
Line of edition: 24    მესმა̈შჟი ი მეუშთხვა̈შჟი ლიფთხჷნე ხაკუ ი დოსდ
Line of edition: 25    ლა̈ფშგა̈შ ლი სერ. ჴანრე ქა ნა̈ფიშგუნღვე ბეფშ მერხელს იკიჩი ი
Line of edition: 26    ამნოშვ ჩუ იგვრა̈ნ კალვისგა ი ეშხუ ტეტ ნა̈კლავს თხუმ ლეჟა იშდე,
Line of edition: 27    ეჩქანღვე კალვს უშხვა̈რთ' ანჭურეხ ლაქხირა̈რშვ ლა̈წვრემი ა̈დგითეჲსგა,
Line of edition: 28    ნანგავა̈რშვ სგა̈ჯელვეხ ითქს ი ლა̈მენირს ქა ხოდისგხ
Line of edition: 29    ლა̈წვრემი ფოყხენ ი ლიწვრემის იბნეხ. ჩიქი როკა̈რშვ, მარდა̈რშ
Line of edition: 30    ი ბიწრა̈რშვ ა̈წვრემიხ, ღვე ითქიშ მჷნწირ გარ სედნი, ეჩქას -- ლავხია̈რშვ.
Line of edition: 31    ქა ნა̈წვრემუნღვე ითქ (\ მაშდ) აშხვთე სედნი ი ნა̈კლავ მერმათე.
Line of edition: 32    ნა̈კლავს ღვაჟა̈რ იმაჯეხ გოდრა̈რშვ დარბა̈ზთე ი მაშდს
Line of edition: 33    ხეხვა̈რ ა̈ცხრილიხ ლანკვაჩხა̈შ ცხჷრილშვ ი, ლანკვაჩხა̈შ ცხჷრილისგა მა̈
Line of edition: 34    სედნი, ა̈მის გა̈ნთე ა̈დისგხ. ა̈ლი ლი ყვიჟბა̈რ. ითქს
Line of edition: 35    ძაძროლთე იკედხ ი ჰედი ამნოშვ ჷგემხ, მადეჲ რაყთე ა̈დისგხ.
Line of edition: 36    ამეჲსგა ითქს მოლიდს გარ ხარაგუნეხ. აშხვ-ჲარვ ფანუნღვე, მა̈
Line of edition: 37    მა̈ნკვი ხოჩა და̈რ ირი, ამ ითქს ჟი იშყვდიხ ვეჭნახვისგა. ვეჭნახვა̈შ
Line of edition: 38    ჴომ ძაძრას ხოხლინეხ ი ხოლამთეშ ამთეჲსგა ინჭური მა̈გ. ა̈მისი
Page of edition: 231  Line of edition: 1    ყვიჟბა̈რ ხაშხა ი ნა̈ნკდ ა̈დისგხ. ხოჩა წჟილია̈ნ ითქს ნა̈ნკდ იკედხ
Line of edition: 2    ი ტელაფქა მჷჟ ხოდისგხ ლაფრას. ნაფჷრუნღვე ქაიდ ა̈წვრემიხ
Line of edition: 3    კარკოშვ შედთეჲსგა ი ეჯჟი კიბდენთეჲსგ' ა̈დისგხ.

Line of edition: 4       მანა̈შს, ჭჷმინს, ზჷნთხს ი ფეტვს აშ აპარტეხ, კვეცან ი კულს
Line of edition: 5    ჩუ კვიშეხ, ნა̈კლავდ ა̈სპეხ.

Line of edition: 6       მაშენ დოსდ ფეტვ იკლა̈ვი, შიშდ ქა ხეფურშგვინი, აშგარ
Line of edition: 7    ხალმჷნა ითქ, მარე მანდრენე ლეკლა̈ვი ლი: ლიჰუყვე ხა̈მთქვა. ლებიას აშ
Line of edition: 8    აბგუნეხ კალვისგა ი ღედა̈რს ი როგს აშ აკლა̈ვის.

Line of edition: 9       გვიანდ, ენკენობა̈შ ლიშთხა̈ლჟი იჰელი სიმინდ. ამ დრევდ ლიყვჩელ
Line of edition: 10    ნიშხა. ჭუხერ ი ნაკს სიმინდს დაბისგა ხა̈ყვჩეხ. ნა̈ყვიჩ შდას
Line of edition: 11    უშხვა̈რთე შიდეხ ი ჭას ჟი ხა̈ქვცეხ, ნეწვიდ კვედალშვ კჷლა̈რს
Line of edition: 12    ა̈სყიხ ი ჰედ ჰანწვალდ ხაგემხ მეგმა̈რჟი, მადეჲ ქორთე ჴიდეხ ი
Line of edition: 13    დარბა̈ზთ' ა̈დისგხ. შდას ქორთე ჴიდეხ, ქაფურჩა̈იხ. ფურჩა̈ დარბა̈ზთე
Line of edition: 14    ხეკვეს ადჲახ ი შდას მაღაზათეჟი იმაჯეხ. ამეჟი ლიჩდინე
Line of edition: 15    ხაკუ აშგარხი, ვოდე ხოჩამდ ჩუ იფრი, ეჩქად. ლეჴმა̈რიდ ლახა
Line of edition: 16    ხაკუხ, ჰედ შივშვ იჩხვარეხ, მადეჲ აშ აჩაჩეხ ლაჩაჩა̈რშვ.

Line of edition: 17       სიმინდიშ ნა̈ყვიჩუნღვე ჩიქი კოპეშიას იკედხ ი ეჩქანღვე ქართებილს
Line of edition: 18    იბარჯეხ. კოპეშიას ქორთე ჴიდეხ ი მა̈ დარბა̈ზჟი იშხვნიხ ი მა̈ ნეშკა ლექვ'
Line of edition: 19    ა̈დისგხ. ჩუ ხეკვეს ნომ' ა̈დკვერმენეს. კვარემ ჩვადვა̈ში ი დემნა̈რ ხაყა
Line of edition: 20    ეჩქანღვე. ქართებილს ქორთე ჴიდეს ი ხოჩა ლა̈მფიკვ ა̈დგის ა̈დისგხ აშხვ
Line of edition: 21    ალა̈გდ ი ჩუშალ ხეკვეს ა̈დწჷრდენეს მოლე ი ეჩქანღვე ფათქს აბარჯეხ
Line of edition: 22    ხოჩა ლა̈მფიკვ ა̈დგის ი ამეჲსგა იშხვნიხ. ქართებილიშ ლაშხვნიდ ლექვშერ
Line of edition: 23    ა̈დგი ხოჩა.

Line of edition: 24       ამსვალდა̈შ ლეზობჷნქა ნიშგეშმჷყ ზავ ლეჟა-ლექვა ქვინჷმგენემ
Line of edition: 25    ლეზობი ხვიმოწედ. ამეჩუ დაბდ ხოშილ ა̈დგი ლარა ხოყდინა ი
Line of edition: 26    ვობა̈შ ნენი ხეჭმი ჩვიბეჴევიშ ლარა. ეჯჷნქა ლახვა̈რს ა̈ჭმეხ ი ეჩხენ
Line of edition: 27    ახღვეხ მასა̈რდ ნენი.

Line of edition: 28       ამზავ სურუ ხოჩა ლაქვნიმგენ ლი ნიშგეშმჷყ, მარე ლინთვ სურუ
Line of edition: 29    გარჯ ლი ქვინჷმგენემ ლისელვე: სურუ ნენი ხაკუ.


Line of edition: 30 
ლაწომბა. ილო ქალდანი. მ.ქალდანი. 10.VIII.1949



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.