TITUS
Svan Prose Texts II (Lower Bal)
Part No. 117
Previous part

Text: 117 
Page of edition: 238 
Line of edition: 26 
CXVII. ლერექვ


Line of edition: 27       ამსვალდს ჲორი შვიმიშ ლერექვ ხაწვა: ლაყვრა̈შ ი ლა̈გნა̈შ.
Line of edition: 28    ლაყვრა̈ში ლერექვ წეს ლი: ლერშ, შართქვინ, მჷთაქა, ვოთილ,
Line of edition: 29    ბა̈ლიშ, ზეწა̈რ, შა̈ლთა. ვოთილს ი ლერშს მინე-მინე ბჷდა̈რ ხა̈ზხ.

Line of edition: 30       ლა̈გნა̈შ ლერექვ ვობა̈შ შვიმიშ ლი წეს. ლენზა̈ვდ ღვაჟჰარემ
Line of edition: 31    ლერექვ ი ლელდისგ ხა̈მთქვახ: ხოდთხელა თეთნე, მადეჲ ფა̈რვ
Line of edition: 32    ლუშნუ კურ ფაყვ, ბოლოზა̈, ქა̈მე არშვილ (ბამბიშ, ბარდნა̈შ, მარე
Line of edition: 33    მა̈ტყიშს, კულია̈შს სახვშირ ხაშხა), ისგა̈შ არშვილ, ფატა̈ნ, ზჷთჴარა̈რ,
Line of edition: 34    ბერა̈რ, ლჷლანჩოლ ი ლჷლანჩოლთეჲსგა ლენხი წერქვა.
Line of edition: 35    ნენსგაქა ლა̈რტყს ითლჷრეხ ი ზჷთჴარა̈რქა ნეკურთხა̈რ ხა̈ბხ. არშვნლს
Line of edition: 36    თხუმქა ჟი ლჷკეშდ ხარ ი შიბ ხოზ ეჩექა ი ამნოშ ითლჷრეხ
Line of edition: 37    ეჯის. ჩაფლა̈რს ლჷბარა̈რშვ მეგჭად ითლჷრეხ გაწრა̈რქა.

Page of edition: 239 
Line of edition: 1       ზურალა̈შდ ლენზა̈ვ ლერექვ ი ლელდისგ ნა̈მთქვა: კაბ, კოფთა̈,
Line of edition: 2    ივკა, ფატა̈ნ, არშვილ, ბერა̈რ, ლჷლანჩე ჩაფლა̈რ ი იშგენ. კაბ ი
Line of edition: 3    ივკა ჯვედია̈რ ხა̈მთქვახ, ისგ სკელთეჩუ ეჯღაჲ. ჴვენჟა̈რი ჯვედი
Line of edition: 4    ხა̈მთქვახ, შემბერთე ლექვა მეჰელი.

Line of edition: 5       ლინთვიშდ ლეღვჟმა̈რს ა̈შხბიხ: ვოსა̈რს, მადეჲ სურდუქს, სახშვირს
Line of edition: 6    (კულია̈შს), ზჷთჴარა̈რს, ლექთულარა̈რს ი ხონსგლა̈რშალ
Line of edition: 7    ფაყვა̈რს ჰედ ფა̈რვს, მადეჲ მეშხა. ჩაფლა̈რს ლინთვისგა ტყებერა̈რს
Line of edition: 8    იშხბიხ. ტყებერა̈რს ა̈შხბიხ ღუნიშ, დაჴლა̈შ, მადეჲ ხამემ
Line of edition: 9    ტუფიშს. ტყებერა̈რთე წერქვას ინხიხ სვრილდ ი გაწრა̈რქა ქა
Line of edition: 10    ითლჷრეხ ლჷბარა̈რშვ. ამჷნქა ჩაფლა̈რდ იშხბიხ ჯაბვრა̈რს. ჯაბვრა̈რდ
Line of edition: 11    ლუჰვიჭე ი ლჷღა̈ფ ტუფს იჴმა̈რიხ. ჯაბვრა̈რ ჟიქა ტუფ
Line of edition: 12    ლიხ, ჩუქა თასმოშვ აშხტიხ. ისგა̈შხენ ამხავი წერქვას ინხიხ. ჯაბვრა̈რს
Line of edition: 13    ლა̈თხვარჟი იდისგხ ზავლადეღ კოჯ ა̈დგის ლა̈ზელალდ.

Line of edition: 14       ლელუნთდ ვოსა̈რ ისგა̈შხენ ლექვამდ ღვაჟმარა კაბს ხოშხბიხ.
Line of edition: 15    კაბს ი ვოსა̈რს ღირკლა̈რშვ იგემხ სგებინჟი. ვოსა̈რს მუჭვედქა
Line of edition: 16    საბჷრწმა̈რ ხარ. საბჷრწმა̈რჩუ ჰედ პატრონა̈რს, მადეჲ ლაზმარა̈რს
Line of edition: 17    იცყერიხ.


Line of edition: 18 
თავრალი. ჯანდრე ცინდელიანი. m.kaldani15.VIII.1949



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.