TITUS
Svan Prose Texts II (Lower Bal)
Part No. 118
Previous part

Text: 118 
Page of edition: 240 
Line of edition: 1 
გადმოცემანი, ამბები
Line of edition: 2 
CXVIII. ბეკარობ


Line of edition: 3       აშხვ დრევქა (შომა დორ, ათხე ლჷცხჷრდ და̈ს ხოხალ) შვა̈ნს
Line of edition: 4    ლჷმა̈რ ლიმახველ ი ბეკარობ. გვა̈რს ი გვა̈რს უშხვა̈რ ნენსგა ლიმახვ
Line of edition: 5    ხა̈რენახ, თემ თემს ხა̈ბკა ი ვა̈შჲამჷნ თემისგა ი გვა̈რისგაჲ
Line of edition: 6    დეშ ხა̈სყუნახ უშხვა̈რ ი მეზგე ი მეზგე ხა̈ბკენახ უშხვა̈რ.

Line of edition: 7       ამ დრევჟი თხუმემ ლა̈ნთხლად შვანა̈რ მურჟვმა̈რს ლჷმგემნელიხ.
Line of edition: 8    მა̈ნკვიშ მურყვმა̈რ სემი სართულია̈ნ გარ ლჷმა̈რხ. ალ მურყვმა̈რ
Line of edition: 9    ჩუქა ხომშარა ლიხ ი, ხემა ჟი ესხრიხ, ეჯჟი ინხუწიხ. ჩვიბე
Line of edition: 10    სართულ ქვინჷმგენემ ლარდა ხა̈რენახ, ნენსგა̈შ სართულ ამსვალდა̈შ
Line of edition: 11    ლარდა ი მესმე სართულ თხუნემ ლა̈ნთხლა ი ლა̈შიალ. ალ მურყვმა̈რ
Line of edition: 12    ათხეჲ სიდხ ი გუნ ლუჯვნელე ლიხ. ეჩქანღვე ფიტკრიშ
Line of edition: 13    ძღვიდიშ ლიჭმინ' ოხბინახ ა̈ზვ-(\ აზ)-აგამდ ი ქვინჷმგენემ ლარდად
Line of edition: 14    ფიტკრიშ ქორა̈შ სგირი ომსედელი ი თხუმემ ლა̈ნთხლად ი ლა̈შიალდ
Line of edition: 15    -- მურყვმა̈რ. მახე მურყვმა̈რ ხოკლათხაჲ ლიხ, ხოშილ საგუნზილი
Line of edition: 16    ლიხ ი ხოფშირა სართულია̈ნი ლიხ. ბეკარობჟი ამ მჟრყვმა̈რე ქვინ
Line of edition: 17    ხა̈გნენახ შვანა̈რს.

Line of edition: 18       ბეკარობს ეჯჟი ოთდავშა ხა̈ლხ, ერე ჲერხი-ჲრხის ხოლემ ლაჩომთე
Line of edition: 19    გარ ოთყევანახ. ეშხუ თემიშ ლემხეღვაჟე მერმა თემს ხაშჷდოლნახ,
Line of edition: 20    ქონებას ხა̈ღეშგალახ ი, ჲესვა ა̈ნდარასგვხ ი ა̈თწინივხ,
Line of edition: 21    ტყვედ ოჷმჴიდვნელიხ. ტყვედ ხოშა ლაღალ ხეხვა̈რ ი ბოფშა̈რ
Line of edition: 22    ახეენახ. ალჲა̈რს' ჰედ ჴულა̈რს ხა̈დისგუნახ ჭჷშხ, მადეჲ დილეგთე
Line of edition: 23    ლუმკვარნელიხ. ლეზობდ ტებდი ლჷც ი შველჷნქა დემგვაშვ
Line of edition: 24    ხაჰდუნახ. ჭირსუფა̈ლს ქა ხა̈ჭრუნახ, ერე ალ ი ალ მარე ამ ა̈დგის
Line of edition: 25    ხაყახ ლუნტყოვნე ი დრევს ხაკცუნახ. ამ დრეეისგა ქ'ემოშ ა̈დჴიდახ
Line of edition: 26    სა̈ჭირო სახსა̈რს, ეჰე ეზერ, მადეჲ ლაჰვდითე ლჷმა̈ისგვნელიხ
Line of edition: 27    უსურმა̈ნთე. ტყვეღა სვრილ ფასვ ლჷმკიდვნეტიხ. მაშენე ლუგვნიშ
Line of edition: 28    ხეკეეს ლჷმა̈რლასუნ დინა ტყვე. მოლემ სურუ წჷხი ლახა ხარხ,
Line of edition: 29    ათხეი ამჟი რაგდიხ: "ა̈ლი ესერ დინა ტყვედ ხოჯეშ ათხე".

Line of edition: 30       ბეკარობჟი ბოფშა̈რს ჰენწა̈რშვ ხა̈ქვთარახ, ლაჲხვას ლაყვროლ ხენქა
Line of edition: 31    ხა̈ბიშდოლნახ, ლემხეღვაჟე უშხვჷრ ხა̈ჭკჟოლნა.

Page of edition: 241 
Line of edition: 1       ამ დრევქა ლა̈შიალდ ხა̈ღვენახ: ხანგრა̈რ, კალდმა̈რ, ცჷემდა̈რ,
Line of edition: 2    ჯიჰრა̈შ ი ლა̈ჯრა̈შ ტყონა̈რ ი ღოშგმავ ლუშნუ თოფა̈რ ი ჯიჰრა̈შ
Line of edition: 3    ზარბუზნა̈რ.

Line of edition: 4       მურყვმა̈რს ლა̈შიალ სა̈ნცხვრა̈რ ხარხ. სა̈ნცხვრა̈რ ისგა̈შხენ
Line of edition: 5    მაშრი ლიხ, ხია̈რ ღეთ ეშხუ მეტრ, ნაკლათხანი ა̈მიცა̈ლ ღეთ ლიხ,
Line of edition: 6    მარე ქა̈მშხენ ეჯჟი ინხუწიხ, ერე ქა̈ხიხენქა ნეწვიდ ხა̈ზილდ გარ
Line of edition: 7    ხეთრა: ღვე როქვ ქა̈მშხენისგა ნა̈ფიშვდ ცხვი დემ ა̈თხელი ი ისგა̈შხენი
Line of edition: 8    ნა̈რჰი ხოჩამდ იფხჟოლნი.

Line of edition: 9       მურყვმა̈რე ხოშა ლაღა̈ლს თხუმჟი თხა̈ფ ხაჭიმ გჷრკა̈ნდ (\ კჷრკა̈ნდ).
Line of edition: 10    ამთეჟი ვობა̈შ დოლებს ლჷმმაჯვნელიხ ი უშხვა̈რჟი ლჷმწკჷტნელიხ.
Line of edition: 11    სა̈ნცხვრა̈რხენქა ცჷჴემდშვ ი თოფშვ ლა̈შიალ ხა̈რენახ, მარე
Line of edition: 12    ხუნთეჲსგა სგა ხა̈ჩდოლნახ ლალფარა̈რშვ ი ეჩქანღვე სა̈ნცხვრა̈რხენჩუ
Line of edition: 13    დემგვაშმოშ ხაჩმუნახ. ეჩქას ხუნიშ ლიბარჯეს ლჷმბინვნელიხ
Line of edition: 14    ი მაშენ ლემყა̈ლვ ამნოშ ლჷმა̈რ მურყვამ. ამ დრევჟიშდ ხა̈ღვენახ
Line of edition: 15    ლჷმარე მურყვმა̈რე თხუმჟი დოლბა̈რ ი თხა̈ფხენჩუ თხუმ ლექვა
Line of edition: 16    ხა̈შდუნახ ხუნიშ მჷბარჯას ი ამნოშ ლჷმვიჩნელიხ მემახველას.

Line of edition: 17       ლიმახველ მამ' ოლგენელი და̈ჩქელანობუნღვეი. ვარგა̈რ უშხვა̈რ
Line of edition: 18    ხა̈სსგუნახ თემს ი თემს, გვა̈რს ი გვა̈რს, მეზგა ი მეზგა, ღვე უშხვა̈რ
Line of edition: 19    ხა̈ხ{ვ}ტუნახ ი ნა̈მხვიტ გიმს ი ლა̈ზგა-ლარდას მინ ხა̈ფსვდოლნახ.
Line of edition: 20    ამსვალდა̈შ ლინტყოვნე ი ჰედ სახსრიშ ლიკედ, მადეჲ უსურმა̈ნთე
Line of edition: 21    ქა ლიჰვდი, ალჲა̈რსი ჲელწესდ ხა̈ღვენახ.

Line of edition: 22       მუშვნი მჷრგა̈დი ეჯ დრევს ქა ვენდ გარ ახსედა.


Line of edition: 23 
თავრალი. დათა გვარმიანი. მ.ქალდანი. 12.VIII.1949



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.