TITUS
Svan Prose Texts II (Lower Bal)
Part No. 120
Previous part

Text: 120 
Page of edition: 242 
Line of edition: 7 
CXX. ალმა̈სგირ


Line of edition: 8 
1.


Line of edition: 9       ისგე (ჲქალდანრე) ხოშოლუ ჯვინალდ ლატლის ლჷმზიგხ. ხოჩა
Line of edition: 10    ლიზგე ხა̈რენახ. ეშხუ კეც როქვ თუვშვ გვეში ხა̈გნენახ მარა̈ნისგა
Line of edition: 11    ი, მაზუს ქახბირახ, ეჯზუ როქვ სგა ხექმენივ.

Line of edition: 12       ამჲა̈რე ხოშამ ალმა̈სგირ ხა̈შხენა. ალმა̈სგირიშ (\ ალმა̈ცგირიშ)
Line of edition: 13    ხოჩა ლიზგე ჲერხის ხაურცეფენახ ი ა̈მიშ ლიღლა̈ტის ახშდაბახ.
Line of edition: 14    სოფელ მინეშხენჩუ ოთკვარახ ი ისგა ლაშჷდთე ლჷმმარა̈ლხ. ამჟი
Line of edition: 15    აშხვ ერდგვილ მარა ალმა̈სგირიშდ ბა̈ჟინ ხოყრა ა̈მიშ ბედჟი. ალმა̈სგირდ
Line of edition: 16    ა̈დსკორე ი: "ათხეუნღვ' ესერ ამეჩუ მიჩა ლილზიგა̈ლს მამა
Line of edition: 17    ხაყა" ი ბა̈რგნაბა̈რგ მა̈გ ლალა̈ბია̈რს ოსდე ი აყირ ლატვთე
Line of edition: 18    მჷჟლაჰვარ ლაღა̈ლთე.

Line of edition: 19       მერმა ლადეღ სოფელ ისგახშჷდა ალმა̈სგირიშ ლა̈ზგა-ლარდას.
Line of edition: 20    მაშენე კეცისგა̈შ თუმი მაზვაბ ხამკახენახ, მარე ა̈ლი ჩუ ლუფკვე
Line of edition: 21    ესხვიახ. ეჩქას სოფლიშ ხოშ-ხოშოლუ ოხთიშახ ი ეჯჲა̈რ ლოჰელინახ
Line of edition: 22    ალმა̈სგირიშდ ღოშგიმხენ. ალჲა̈რს ხოქვახ ალმა̈სგირიშდ:

Line of edition: 23       -- მინეშდ ესერ მიჩა ამხვა̈რს ოთღორვახ ი ათხ' ესერ სოფელს
Line of edition: 24    ჟი ლჷჰდჷრე ხარ ი ჟ'ოღვ ოსჭენ. ათხეუნღვე მა̈გ ესერ მიჩა
Line of edition: 25    ერდგვილ ირიხ.

Line of edition: 26       . ალმა̈სგირს ვარ ხოქვა ი ქოთყჷრა და̈ლთე. ჷთნა̈რიშ ჴარჴ ჩვა̈ფშხენ
Line of edition: 27    ჟა̈ბე ტიტა̈შ ნაზიმჟი შუკვ ნახვწი კჷნჯბა̈რქ' ესხრი. ამექა
Line of edition: 28    ლაზჟი ეშხუ ჯვედი ბა̈ჩ ლჷმდენ შუკვქა ტაფთე. ალმა̈სგირ ჰვილხენჩუ
Line of edition: 29    ესრეწგა ი ალ ბა̈ჩ შუკვს ჟიბავ ლოხდა. ამ ა̈დგის ამ დრევუნღვე
Line of edition: 30    ალმა̈სგირიშ ბაჩა̈რ ათჟახენა ი ათხეი ალ ჟახე ხასიდ ჟი.

Line of edition: 31       აშხუნღვე ქოთქაბახ ხვარა̈შ ჴარჴდი ი და̈ლთეჲსგ' ათჴედჷნენახ.
Line of edition: 32    ამეჩუ ჩოლზიგელიხ სა̈კენ. ამჲა̈რე ნა̈ლზიგალჟი ფიტკრიშ ქორა̈შ
Line of edition: 33    ი ძღვიდიშ ხუნა̈რ ჩიქი ჩუიდ სიდხ.


Line of edition: 34 
2


Line of edition: 35       ალმა̈სგირს ხა̈რდენა ეშხუ მიჩეშშალ - ლჷჲმედ - ნაღვჟურგეზალ,
Line of edition: 36    მარე ჩიქი მადე ხა̈კვდენა გეზლა̈შ მა̈მედა̈შ ქა ლითნე. ამ მახეღვა̈ჟს
Line of edition: 37    ჟახად მჷრზა ხა̈შხენა.

Page of edition: 243 
Line of edition: 1       აშხუნ მჷრზა მიჩა მუეშ უჭვდალდ ლა̈თხვართ' ოლზვირ ი მიჩა
Line of edition: 2    დიეშდ ხოქვა: -- დია, მა̈დილ ესერ ხერი ი ეშხუ სემი ლემზირი
Line of edition: 3    ლოღვ ოხნაყე ბა̈ზი მჷხრიშ ლევიზჲაქ.

Line of edition: 4       მიჩა დის მამა ლახჩონა, მარე ვა̈რია დეშ ხოქვა გეზალდ ი
Line of edition: 5    ლევიზჲაქ ლემზჷრა̈რ ქა ლოხსერა. ჰამს ურჰად მჷრზა ლა̈თხვართე
Line of edition: 6    მეჩდე ესხვიახ. ნებოზს, მახე ნაბურჟი, ყორისგა ჰა̈რიდ ლომჴედ
Line of edition: 7    მჷრზა ი მიჩო მუ ლახჭედნა: -- იმეგ ესერ ლჷმა̈რდ ლა̈დი, ბუაჯო,
Line of edition: 8    ჰამუნღვე?

Line of edition: 9       -- ლა̈ზელალს ესერ ლჷმა̈რდელი, ბუა.

Line of edition: 10       -- ღვე ხაკჷრქ' ესერ მაგვეშა?

Line of edition: 11       -- ჲორი ლა̈ჩვ ესერ ხაკჷრქა, სერ მამაგვეშ.

Line of edition: 12       -- ღვე მ' ესერ ხოყრა?

Line of edition: 13       -- მა̈-ი სა̈ნჴდ ესერ ოსრეკა ქა უძენძურად ი კალვისგ' ესერ
Line of edition: 14    ოსდა.

Line of edition: 15       ოხპარხ მახეღვაჟა̈რ ი ქაჩადხ ლა̈ჩვრე სგა ლა̈ჴდათე, მარე ძჷძჷ
Line of edition: 16    დეშ ხა̈ყერხ ი ჰა̈რიდ ანტახხ ყორისგა.

Line of edition: 17       -- ჰა̈რიდ ესერ იმღ' ომტეხხ? -- ალმა̈სგირ ლახჭედნა.

Line of edition: 18       -- იმღა ი ეჯგვა̈რ ესერ ლიხ ლა̈ჩვა̈რ სვრილ, ერე ქ' ესერ
Line of edition: 19    დეშ ოთქუთნახ.

Line of edition: 20       ოხპარ ეჩქას მჷრზა ი ჲორი ლა̈ჩვ ჲექდა ყერბჩუ ესდე. ალმა̈სგირ
Line of edition: 21    ლალმა̈გნათე მეჴდე ლასვ ი მიჩა ლიმარვ მჷრზას ოსმეზრე.


Line of edition: 22 
3


Line of edition: 23       აშხუნ ალმა̈სგირიშ ვეთხვმალე ანდავს ფურა̈რ ოთხვაჲა ლალდაღთე.
Line of edition: 24    ნებზვა̈შ ჩიქს ვეთხვმალს ქორთე ლუმუნჭურინ, ეჩქას ეშხუ
Line of edition: 25    ფუ̈რ ღოშგდ ლუმზურა̈ლ. ოხკიდა ეშხუ კურენჭ ალ ნაღვჟურს,
Line of edition: 26    ოხსვილა ფურდ ი ლესგისგა ხოყირა. კურენჭს ფურქა აშგარ
Line of edition: 27    ცხჷლ ოხკიდა ი ვორჩუ ჴურუიდ ლოხყენა. ფუ̈რ ჟ'ახსიპა ი ჩოლდაგა̈რ,
Line of edition: 28    ცხა̈ჲ. ანდავს ლიგვნი ლოხბინა ი ქორთე ლაგვნიშვ გარ
Line of edition: 29    ომჴედელი. ალმა̈სგირს ათჷმბაჟენა ი ანდავს ლახჭედნა: -- მ' ესერ
Line of edition: 30    ამბა̈ვ ლი, იმღ' ესერ იგვნი?

Line of edition: 31       -- იმღ' ესერ ი აშ-აშ, ფურდ ესერ ოხფიშვდა ბა̈ჩ, ფურქა
Line of edition: 32    ქ' ესერ ოთსკინა მერმათე ი ფუ̈რ ჩვ ესერ ოლდაგა̈რ.

Line of edition: 33       -- ჰა, ეჯღა ჯინემ შვა̈ბ გაროღვ იყირ ი ხონჴრივოღვ, ქოღვ
Line of edition: 34    ლახთონე ეჯ ა̈დგი.

Line of edition: 35       ათაგანხ ქა ი აშხუნღვე სგა̈თჴედჷნხ ლჷდგა̈რ ფურთეჲსგი. გიმჩუ
Line of edition: 36    ტკისდ ჴურუ ხარ ბაჩვემ ნაზვ. ლოხბინეხ ლიფხრიჭი ი ა̈ფხრიჭიხ,
Line of edition: 37    ა̈ფხრიჭიხ ი ჩუ ვედდ გარ ადჰიეხ ბაჩვთეჩუ. ა̈ნკიდ ჟი ალ ბა̈ჩ
Page of edition: 244  Line of edition: 1    ალმა̈სგირდ ი ალმა̈ს. შიშდხი მჷშკიდთ' ადაჲე ი ხანგრიშ ლიშკა̈დი
Line of edition: 2    ხა̈ჰერ ამხენქა. მჷშკიდდ იმედ ხა̈ქვე ი დრევ ლოხკა̈ც ი ამ დრევჟი
Line of edition: 3    ესერ ლჷმარე ხერი. ალმა̈სგირ ა̈თჴჷრან ი: -- ეშხუ თეტენოღვ ოხშკა̈დ
Line of edition: 4    ამხენქა ლა̈დი.

Line of edition: 5       მჷშკიდდ ჟ'ოხშკა̈დ ა̈მიშ თეტნილ ი ალმა̈სგირ აჩად მიჩა ქორთე.
Line of edition: 6    ლჷკა̈ც ლადეღ ალმა̈სგირ აჩად მჷშკიდთე ი მიჩა ხანგა̈რ ხა̈ჰერ.
Line of edition: 7    მჷშკიდდ ქოხჴიდ ეშხუ ხანგა̈რ ი ქა ლახემ ალმა̈სგირს. ალმა̈სგირდ.
Line of edition: 8    თეტნილ ლა̈ჲკიდ ჯიბხენჟი, ლახგენე ამ ხანგა̈რს ი მერმათე აშგარ
Line of edition: 9    ცხჷლ ათღანე. ეჩქას ალმა̈სგირ ჟ'ოლხირნელი ი მჷშკიდს ჟი ლოხკიდა
Line of edition: 10    ალსმიშ ხანგა̈რ ვოქრშვ ლჷშკა̈დ ი ქა ლოჰოდა ალმა̈სგირიშდ. ლოხგენა
Line of edition: 11    ამნა̈რ ალსმიშ თეტნილ ი იმ ხეჩმუდ ალმა̈სს ალმა̈ს. ალმა̈სგირს მაჴვამ
Line of edition: 12    ხოქვა ი ომჩედ მიჩა შუკვს.


Line of edition: 13 
4


Line of edition: 14       ამ დრევჟი ლიშია̈ლ ლჷმა̈რელი და̈ლ ლეჟა. ნა̈მჴედვ ჯა̈რ როქვ
Line of edition: 15    სურუ ლჷმა̈რ ი მეხელი მოლე გარ. ლახსგურენა ალმა̈სგირ მიჩა ჰვილს,
Line of edition: 16    ჟი ლოხკიდა ალსმიშ ხანგა̈რ, ახფურთინენა ისგა ჯა̈რს ი
Line of edition: 17    ბერჟემ ხანგრა̈რს ი კინჩხა̈რს მეგუდ ხაქცურნა. ნა̈შიალუნღვე
Line of edition: 18    ქორთ' ომტეხ ალმა̈სგირ ი მიჩა ხახვ ხოქვა: -- ქოღვ ადკვეცნე
Line of edition: 19    ხანგა̈რ, ლეგ ესერ ლესგდი ლი.

Line of edition: 20       ალმა̈სგირს ლაკვცა̈ნიდ მა̈შკქა ლოხჭემა მიჩა ხანგა̈რ, ესსიპენა
Line of edition: 21    ჟი ი ალმა̈სგირ ისგდ ოთქვიცა ალ ხანგა̈რს.


Line of edition: 22 
5


Line of edition: 23       ალმა̈სგირიშ ხეხვ ი მიჩა გეზლირ ლასკორათ' ომშყედელიხ.
Line of edition: 24    ქოხქვიცახ, ერე ათხეუნღვე სა̈კენ მინე ლილზიგა̈ლს მამა ხაყა ი.
Line of edition: 25    შვა̈ნთე ხეკვეს ანტეხეხ. ამ დრევქა ლახვა̈რს მუსვ ხა̈დენა ი ჩუქა
Line of edition: 26    ხეკვეს ომჴედენლასვხ აფხზეთხენ ი ზა̈ნხენ.

Line of edition: 27       აშხვ ლეთ ზა̈ნს ისგა ლახმუშგვრენახ აშხვ მეზგა. ალჲა̈რს ხა̈რდენახ
Line of edition: 28    ეშხუ უწვილა სიმაქ. ალმა̈სგირიშ გეზლირ სემი ლჷმა̈რელიხ
Line of edition: 29    მახეღვაჟა̈რ ი მაჰრენამ ეჯგვა̈რ ლახლატა ალ სიმაქ, ერე მერმა
Line of edition: 30    ლადეღ შვა̈ნთე ლიზია̈შ ვარ ხოქვა ი ამჲა̈რს ესჩიჟენა ისგა. ჲორი
Line of edition: 31    ლახვბა ი მინე დი ლეჟ' ომჴედელიხ შვა̈ნთე. ამჲა̈რე ნაპა̈რწყ როქვ
Line of edition: 32    ხიდ, შვა̈ნს ქალდანა̈რ ჩუ მა̈ ხიზგედ, ი მაჰრენ მუხვბემ ნაბა̈რწყ
Line of edition: 33    როქვ ზა̈ნეშ ქარდავოლ ლიხ.

Page of edition: 245 
Line of edition: 1       ეჩქანღვე ალმა̈ცგირიშ ნაბა̈რწყისგა გვიანდ ეშხუ მეკვჰე მარე
Line of edition: 2    ოლწესელი ი ამნა̈რი მჷრზაიდ ოთჟახახ. ეჩქას სგა̈ (ჲბურნაყა̈რ)
Line of edition: 3    ლა̈შხრა̈შ ჩუქა ლჷმზიგხიდ ი ჟახად გელა̈რ ჯა̈შხენახ.

Line of edition: 4       აშხუნ მჷრზა ლა̈თხვარს ლჷმა̈რდ კვარმა̈შ ლეჟა ი ღვაშ ხაკჷრქა.
Line of edition: 5    ეჯ ლეთ მიჩა ლჷნჟა̈ხ მჷრზა̈შ ბაჩა̈რ ჩოლსადგემ. ლერყია̈შ შჷხენქა
Line of edition: 6    კვარმა̈შთე და̈ლ ლახშჷმა მერმა და̈ლს:

Line of edition: 7       -- ვო 'სერ, ერენქილ!

Line of edition: 8       -- მ' ესერ ლი, დერენქილ?

Line of edition: 9       -- მ' ესერ დერ ი, ვიდლა̈შ, მაგვა̈რ ესერ ოლჩემნელი?

Line of edition: 10       -- მ' ესერ, მინე ლივდილჯონ? -- ი

Line of edition: 11       -- მ' ესერ დერ ი ჲესვალა ქალდანა̈შ ალმა̈ცგირ ოთდაგრა
Line of edition: 12    კიჩხჷლდა̈შ, ეჩ' ესერ ურწყვ ლი ი ეშხუ ესერ ნაყუნ ჯიმოღვ ლახშდებ.
Line of edition: 13    ჰა 'სერ, ვა̈ჲ, ვა̈ჲ, ფოთაშ ესერ ქა ხორი ლაჯმის ქა̈რთ-კახეთს,
Line of edition: 14    ეჩა ლიტხა̈ლდ კახეთს, ეჩა ლიტხა̈ლდ დემეგ ესერ ხოზ, ოდო ქ' ესერ მადე
Line of edition: 15    ლახშდების, ცა̈შ-თახშიშ ნანშურს ესეროღვ ხეჩდა მიჩა ქვინ, ოდო ეჩა
Line of edition: 16    ურწყვ ჯი ესერი ლი, ვიდლა̈შ!

Line of edition: 17       ა̈ლი მჷრზას ქა ხასმოლნა. ღვაშ ჟი ლოხცვა ი ლექვა. ჰადჷლდს
Line of edition: 18    ხოშა ვიცხ ხა̈გნენა (ათხელდ ამჟი ხაგან ეჩა ჯიკ), ამნა̈რ ჟი ლოხრეკა
Line of edition: 19    ღვაშ, ჯი ჩუ ი მიჩო მუ ჩოთწორა, ღვე ჟ'ომტეხ ი ღვაშ ჟი
Line of edition: 20    ლოხცვა ი ლექვა, გელაშერ მურყვამ ლჷგ ლა̈შხრა̈შ, ამთე ლექვა.
Line of edition: 21    ისგომჴედ ქორთე ი ალმა̈ცგირ ღალ ტკისდ ლჷდგა̈რ ლჷმა̈რ.


Line of edition: 22 
თავრალი. მაჰარბი ცინდელიანი. მ.ქალდანი. 10. IX.1956



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.