TITUS
Svan Prose Texts II (Lower Bal)
Part No. 121
Previous part

Text: 121 
Page of edition: 245 
Line of edition: 23 
CXXI. ბა̈ჲ მეზგე ი საბრალ ზურალ


Line of edition: 24       თეკერ ჩუქა̈შ ი ლაწომბა ჟა̈ფშხენ ლეჟა̈შ აშხვ სვრიღ ნაკს
Line of edition: 25    ლამურყვამ ხაშხა. ალ ნაკ ათხე ლეგრევდ ლი ლჷსპე, ჯვინალდ ლამურყვამ
Line of edition: 26    სოფელ ლჷმა̈რელი, ეშხუ ბა̈ჲ მეზგე ლჷმზიგ ი მერმე ღალ
Line of edition: 27    საბრალ. ბა̈ჲ მეზგა საბრალ მეზგემ ზურალ მერბალდ ხა̈ყენა. ჩუ
Line of edition: 28    როქვ დემის ა̈და̈რივხ მერბელს ი ეჯჟი ღალ ლჷმტეხოლნელი ქა
Line of edition: 29    მიჩა ქორთე ი ნამარალ შია̈რს როქვ ქა დემის იბარ ი ეჩა როქვ
Line of edition: 30    ლჷცფექილს ხოსყივ მიჩა გეზლირს. ეჯის გუდ ახჴედახ ი ეჩქანღვე
Line of edition: 31    შია̈რს ქა როქვ ხაბარხ ი უბრად დემ როქვ ფიშვდახ.

Line of edition: 32       სერ ბოფშა̈რ მჷტმად ხა̈ჭკჟოლნა. მინე დის ხაჴჷრალახ: -- ჰა,
Line of edition: 33    მა̈დილ ხერი, ლეზებ ოხსახთას, იდგა̈რიხ მა̈იდშვ!

Page of edition: 246 
Line of edition: 1       ლეჟრი მინე დის ჭყერუა̈რ ოთგა კონტჷლდშვ ბოფშრე
Line of edition: 2    ლაღროვალდ ი: -- ლაჲჭკჷრნეხოღვ მოლიდ ი ალ ლეღვილდა̈რ ესერ
Line of edition: 3    ჩუჲ ა̈დჯა̈ბიხ ი მაგვა̈რდ ესეროღვ ადდირას.

Line of edition: 4       იმედ-იმედშვ ხა̈გჭენა გეზლირ ი მაჰრენამ ეჯღაჲ ლა̈დი-ბა̈ზი
Line of edition: 5    ქვინ ხა̈ჩდოლნ', ეჯჟი ა̈მის ლახმუშგვრენა ჯგჷრა̈გ ი ზურალს ლახჭედნა:
Line of edition: 6    -- მ' ესერ ხოგ კონტისგა?

Line of edition: 7       -- ბოფშრე ლაღროვალდ ესერ ხოგ ჭყერუარ.

Line of edition: 8       -- აღვე ჟ'ოღვ ა̈ნკიდ.

Line of edition: 9       -- მ' ესერ ა̈ნკჷდეს ჭყერუა̈რ?

Line of edition: 10       -- ეჯღა ჟ'ოღვ ა̈ნკიდ.

Line of edition: 11       ოხკიდა ჟი ი ხოშა ტაბა̈გ გვეში ლაღვდ ესერ ოლსიპელიხ,
Line of edition: 12    ჯგჷრა̈გს ხოქვაიდ ი: -- ათხე კიბდენოღვ ადკარე ი დირა̈როღვ
Line of edition: 13    ანნაყე ბოფშრეშჲაქ.

Line of edition: 14       -- კიბდენ ესერ იმნა̈რ ადკარას, მიჩა მა̈ზიგ მიჩ, ეშხუ ითქილდა̈შ
Line of edition: 15    ესერ ნა̈ხიპვ მადმაგვეშ ხოცჷხ კიბდენისგა.

Line of edition: 16       -- ეჯღა ნომოღვ ხარ, ჩოღვ ადკარე.

Line of edition: 17       ომჩედელი ტკისდ კიბდენთექა ი კიბდენ ფაქვშვ გვეში დერ
Line of edition: 18    ლია! ათხე ჯგჷრა̈გს ხოქვა: -- ჲაღვე ჯი ესერ ღჷრი ი, ეჯგვა̈რ
Line of edition: 19    ესერ ი ამგვა̈რ სა̈ხმა̈ხ მა̈ დო ა̈ხსყენეს ბა̈ზი, ყორ ი ლაჴვრა ქოღვ
Line of edition: 20    ოხშემბურე ი ქამავ ნომეგოღვ ა̈ნსგიდივ.

Line of edition: 21       ზურალს ყორ-ლაჴვრა გუნ ოთჩემნა. ისგლეთიშ ვანაქა ეჯგვა̈რ.
Line of edition: 22    ოლბინელი ტურშუნ-ბურგუნ, ერე მა̈გ ღეთ ხა̈რხოლნა უშხვა̈რ.
Line of edition: 23    ლახ ამჟი ხოლა სა̈ხმა̈ხ ახსყენა, მერმე სობ, ეჩქას ზურაოს დეშ
Line of edition: 24    ოთჭკჷრნა ი ლაჴვრ' ოსტკირა ი ეჩექ' ოთციქვარა. ამეჲსგა ჩხჷტ
Line of edition: 25    ომშყედელი იმხვალეხენ, ა̈ლი ხა̈ვხა თეჲსგა ი თე ქახხეპა.

Line of edition: 26       ღოშგიმ ისგომჴედელი ჯგჷრა̈გ ამთეჲსგა ი ლახჭედნა: -- ჯი
Line of edition: 27    ზურალ, მ' ესერ ხა̈კრა თეს?

Line of edition: 28       -- მ' ესერ ი დეშ ესერ ოთგიჭა გვი ი ლაჴვრ' ესერ ოსტკირა
Line of edition: 29    ი ჩხჷტ, ესერ ხა̈ვხა.

Line of edition: 30       -- ჲაღვ' ესერ ა̈ლი მად' ოთჭაბა მიჩ ი ეჯღაჲ დეშ ესერ ოთჭკჷრნა ე,
Line of edition: 31    მიჩი შან გარ ესეროღვ ხარ.

Line of edition: 32       სერ ა̈ლიი ისგოთჩიდინა. სოფელ ლეგრევს ოთნახა ჩუ ი
Line of edition: 33    ეშდჲარვ ზავ ესერ ამჟიიდ ლჷმყჷლინ მამვილ ამ ლეგრევისგა.


Line of edition: 34 
თავრალი. მაჰარბი ცინდელიანი. მ.ქალდანი. 10.IX.1956



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.