TITUS
Svan Prose Texts II (Lower Bal)
Part No. 122
Previous part

Text: 122 
Page of edition: 247 
Line of edition: 1 
CXXII. კესრილჷფაშფ


Line of edition: 2       ჩვიბეჴევხენ მჷჟლაჰვართე, უთვრიშ ჴარჴ ჩვა̈ფშხენ, ჟა̈ჴვრა̈შ ჭალა̈ჲშ
Line of edition: 3    ნაზიმქა, აშხვ გორა̈გჟი ნენსგა ნენჩაჲსგა ზი მასა̈რდ ჯვედი ი მაშრი
Line of edition: 4    შვიშელ ნაკ. ამ ა̈დგის ჟახად კესრილჷფაშდ ხაშხა. კესრილჷფაშდს
Line of edition: 5    ფედიას ხა̈ზხ შვა̈ნისგა̈შ მაჩენამთეშ ლახვა̈რ. მაშენამ
Line of edition: 6    აფშდიხ უთვირს, ჷთნა̈რს, ჟა̈ჴვრა̈შ ჭალა̈ს. მცლაჰვარხენ კესრილჷფაშდს
Line of edition: 7    ხოშა ტვიბ ხა̈ზ. ამ ტვიბს ლუხვ ხაშხა. ლუხვიშ ი ჷთნა̈რიშ
Line of edition: 8    თხუმ გუნ კჷლთხი კჷნჯბა̈რ ლიხ. ამჲა̈რს კირა̈რ ხაშხახ. ალ ქჷნჯბა̈რ
Line of edition: 9    კირიშ გარ ლიხ ი ჟახადი ეჯღა ათჟახენახ კირა̈რ.

Line of edition: 10       ნამბუალდ სიდ, ერე ჯვინლიშ ჯვინალდ, ბა̈რობა̈შ დრევჟი,
Line of edition: 11    კესრილჷფაშდ ეშხუ გუნ ლჷჲმედ მეზგე ლჷმზიგ. მეგრე მანგრიშ
Line of edition: 12    ლა̈დჲარუნა ხა̈რენახ ჟა̈ჴვრა̈შ ჭალა̈, უთვირ ი ჷთნა̈რ, დაჴლა̈შ
Line of edition: 13    -- ლუხვ. მეშგ ქვინჷმგენემ ლარდა ი ლაშგა̈ლი კესრილჷფაშდ ხა̈რენახ ი
Line of edition: 14    ლა̈ყელი -- შდჷხირ. ნაშგვს ვორემ სტურა̈რშვ ლჷმფიშვდნელიხ
Line of edition: 15    კესრილჷფაშდხენ შდჷხირთე. ამხენ შდჷხირთე არა ღეთ კილომეტრ
Line of edition: 16    ხოზი. შდჷხრიშა̈რს აშგარ ხეხელიხ კესრილჷფაშდა̈შ ი
Line of edition: 17    შდჷხრიშ უშხვა̈რ ნენსგა ჲარვ ღეთ ფხულემ ნა̈ნსგლი ვორემ
Line of edition: 18    სტურა̈რ.

Line of edition: 19       კესრილჷფაშდ კჷლთხი ზაგა̈რ ლეჟა ლი ი ლიც დემეგ-იმეგ ახა̈ზი
Line of edition: 20    ნა̈ფდიას, მარე კესრილჷფაშდა̈რს ეჩქა̈ჲშ დრევჟი ლიცი ქა ლუკვა̈რ
Line of edition: 21    ხა̈რენახ ამხავ ჷთნა̈რხენ. უთვრია შჷყხენქა ლა̈ხსგიდნი, ათხეი ჟი
Line of edition: 22    ხეთრა ლჷცემ ნაკვარ ჷთნა̈რიშ ლესგ ლექვა. ალ ლჷლჰენს უსგვა
Line of edition: 23    გარ კილომეტრ მადე ხა̈ღვენა ნაჯვდი. ათხე ლემბა̈ჟდ მეჴდე ხარ
Line of edition: 24    ჩი: იმჟი როქვ ოთკვარახ ლიც ამჟი ხოლა ა̈დგია̈რს?! ვობა̈შ ა̈დგის
Line of edition: 25    ეჯკა̈ლიბ კჷნჯბა̈რქ' ოთიყახ ლიც, ერე ხოჩა მეთხვა̈რურ ჰა̈რი მარე
Line of edition: 26    ქა დეშ ღჷრი.

Line of edition: 27       რაგდიხ, ერე ეჯ დრევჟი შვა̈ნეშ ლასჷნჯა̈ვითე იმხვალეხენ კესა̈რ
Line of edition: 28    როქვ ომჴედელი ი შუკვდ ამ ა̈დგის როქვ ახდენა. ალ ა̈დგი ი ამეჩუშ
Line of edition: 29    ლა̈ზგა-ლარდა კესა̈რს სურუ როქვ ლახლატა ი გუნ როქვ ფაშდ ხოქვა
Line of edition: 30    ამ ა̈დგია̈შ. კესრილჷფაშდ ჟახად ექანღვე როქვ ესსედა.


Line of edition: 31 
კურხვაიში. დათა გვარმიანი. მ.ქალდანი. 12.VIII.1949



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.