TITUS
Svan Prose Texts II (Lower Bal)
Part No. 123
Previous part

Text: 123 
Page of edition: 247 
Line of edition: 32 
CXXIII. ლიშკდიშიშ ლიმხური


Line of edition: 33       მა̈ნკვიშ ამსვალდს ლიშკდიშ მადმა ხა̈ხლენა. ლიმშავიშ ნა̈ბინუნღვე
Line of edition: 34    ამსვალდს ათა̈ს შვიმიშ ია̈რა̈ღ ესწჷხენა, მარე ამ ჲარაღრე (\ ჲა̈რა̈ღრე)
Line of edition: 35    ლისყი ი ლიშკა̈დი მადმა ხა̈ხლენახ.

Page of edition: 248 
Line of edition: 1       აშხუნ, ჯვინლიშ ჯვინალდ, ოლთენელი ეშხუ ამსვალდ, ნოშ
Line of edition: 2    თველ ი ბაჟ ხა̈ღვენა. ამ მარა ჟი ლუმსურე ხა̈რენა ლამშაჲა̈რ ჲარაღრე
Line of edition: 3    ლიშკა̈დი ი ლუჭკვივ მარემ ლითხელი ოხბინა ლიშკდიშიშ
Line of edition: 4    ლეთვრიდ. აშხვ ლადეღ ამ მარა ხოჩამთეშ მეზვბელა̈რ ჟ'ოხუნჭურა
Line of edition: 5    უშხვა̈რთე, ქოთჴერნა აშხვ მინდერთე. ამ მინდერ ლეჟა შუკვ ხა̈ბმენა.
Line of edition: 6    ლჷხა̈ლ მარა ნენსგა შუკვისგა შიხ ოთჰარა ი ალ მეზვბელა̈რ ამელეჟ'
Line of edition: 7    ოთქინალნა. აშხვ მარაჷნქა ჩი შიხ ლეჟ' ოთქინახ ი
Line of edition: 8    მა̈გ ჟ'ოლკურეკელიხ. აშხვ მარა ქა ლოხქაბა შიხდ გა̈ნხენ ლეჟა ი
Line of edition: 9    მადმ' ოლკურეკელი. ალ მარე გუნ ლჷხა̈ლდ ლახბაჟა ლჷთნე მარა
Line of edition: 10    ი ხოქვი: -- მიჩ ესერ ლეთვრიდ ხა̈ყენა, ქოღვ ოთჴერივ მიჩ ი ჯი
Line of edition: 11    ესერ ლიშკიდს ახმეჴრუნისგ.

Line of edition: 12       ესხრიხ ათხ' ალჲა̈რ ი ქაჩადხ ამ ლჷთნე მარემ ქორთე. ჟ'ოხფანდურე
Line of edition: 13    ამ მარემ მიჩა ლეთვრის ლა̈შკდა̈შ. ქურა შიხშვ ოხგვერშლე,
Line of edition: 14    ქურმილ ოსეგ, კვერ ლახემ, შიხიშ ლა̈ჩდინად კიზ ლახემ ი
Line of edition: 15    ჲარვ ბერჟემ ნა̈ქვიც სგებინჩ' ოსდე: "ალ ბერჟა̈რს ესერ ჩვემოშ
Line of edition: 16    აჭრენი, მიჩეშრიგ ესერ და̈რ ირდი". ალ მარა ღალ ჩითე ლოხკვიჰა
Line of edition: 17    ალ ბერჟა̈რ, მარე უშხვა̈რ დემ ხა̈ჭროლნახ. აშხუნღვე ლემჷნჩხრინე
Line of edition: 18    ბერჟა̈რ უშხვა̈რ ნენსგაქა ქვიშე ლოხშიდა ი ბერჟა̈რ უშხვა̈რ ლახჭარენახ.
Line of edition: 19    ეჩქანღვე ლა̈კვჰალ ოსდა: "ქვიშაურ ესერ ემოშ ხაჭრენი
Line of edition: 20    უშხვა̈რ". ეჲ ლეთ ამ მარემ ხახვ ბელ ლექვა ქვიშ' ოთჰარა". მერმა
Line of edition: 21    ლადეღ ლახკვეჰა ბერჟა̈რე ლაჭრის. ლა̈ბელიჟი ქვიშე ხაჩჷდოლნა
Line of edition: 22    ჰა̈ერს ი ბერჟა̈რ უშხვა̈რ ლახმჷნჩხრინენახ. ეჩქას ლჷთნა მარა მამაგვეშ
Line of edition: 23    ლოხთენა. ლა̈ლკვჰალდ ოსდა ლჷმჷნჩხრინე შა̈ნთიშ ლაბორგ ჲა̈რა̈ღიშ
Line of edition: 24    ლიგნევი. ჩითე ლოხტიხა, მა̈გ ოთკუჰურა. მარე დემგვაშმოშ ლჷმსკორნვლი.
Line of edition: 25    ეჯჟი ამ მჷშკიდ გა̈ნხენჩუ ჟეღ ლუმყვიმლი ი ამ ჟაღვ ჭჷშხა̈რ უშხვა̈რქა
Line of edition: 26    ხა̈დენა. ხახვ ათხარა: -- ამ ჟაღვემ ჭჷშხა̈რსოღვ ლახემ გვი ი ამჷნქა̈შ
Line of edition: 27    ესერ მიჩ მამაგვეშ ხაშიდ.

Line of edition: 28       ჟი ესერ ოხსყა ტკისდ ამ ჟაღვემ ჭჷშხრე მაჯონ ჯვა̈რ ი მარწვიხვ
Line of edition: 29    ეჩქანღვ' ესერ ლი ლუმსურე. ლჷთნა მარა ხოქვა ზურალდ:

Line of edition: 30       -- ჯი ესერ მა̈ბგა̈რ ქა̈ჯიშ ჴადვხენქა ნა̈ჴედვ ლჷმა̈რელი ი მიჩ
Line of edition: 31    ესეროღვი ლჷგენ ხა̈ზ ათხეუნღვე.

Line of edition: 32       ამჟი ოლბინელი ლიშკდიშ ჯვინელ დრევჟი. ეჩქანღვე სგებდ გარ
Line of edition: 33    ესხრი ლიშკდიშიშ გვეშ.

Line of edition: 34       ჩიმი ლაგნევია̈შ ლა̈ნშანა̈რ ქა̈მშხენისგა ხეჰვდი ამსვალდს.


Line of edition: 35 
ლეწფერი (ჭუბერი). მჭედელი შავხან სუბელიანი (\ სუბარი). მ.ქალდანი. 2.1949 წ.



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.