TITUS
Svan Prose Texts II (Lower Bal)
Part No. 137
Previous part

Text: 137 
Page of edition: 281 
Line of edition: 1 
VI. ლახამულური
Line of edition: 2 
CXXXVII. ლახმჷლ ი ნენჴერა


Line of edition: 3       ლახმჷლ შვა̈ნე ჩვა̈ბე ძგიდს ხაშხა ლჷჰოლა̈შხენ ლალვერთელისგა.
Line of edition: 4    ლალვერუნღვე ზა̈ნე ი შვა̈ნე ლაყვალთე ტვიბ-კალთა̈დ ჯვინელ
Line of edition: 5    ხოშოლუს ნენჴერა (ლენჴერა) ოთჟახახ.

Line of edition: 6       ლახმჷლ ისგანჩუ ჲარვდ ლი ჩუ მეყვლე: ხოშა ლაღა̈ლს ჩვა̈ბე
Line of edition: 7    ლახმჷლ ხაშხა ი ხოხვრამ -- ჟა̈ბე ლახმჷლ. ნენჴერაი ჲარვდ ლი მეყვლე:
Line of edition: 8    ყვა̈ჰითეჩუ ჟა̈ბე ნენჴერა ხაშხა ი ყვა̈ჰის ჩუბავ -- ჩვა̈ბე ნენჴერა.

Line of edition: 9       ლანხჷლს ი ნენჴერა̈შ ტყეფ-კალთა̈ს ჯვინალჷნდირ მჷლხამლი
Line of edition: 10    ხეზგე. ლახმჷლა̈შ საბჭოთე ჩჷდა სოფლა̈რს ხაშხახ: თოთელეშ,
Line of edition: 11    ნოდა̈შ, უდეშდ, შდჷღირ, დჷს, მუჴვდარ, გჷნწიშ, ყაზა̈ყ, იფა̈რ ი
Line of edition: 12    ჴელრა. ეჩქანღვე ჴა̈იშდიშ საბჭო იბნი ი სოფლა̈რს ხაშხაშ: ჯორკვა̈რ,
Line of edition: 13    ლაჴან, ლაჴნა̈შ ქედან, ჭერ, ჭერიშ ქედან, ტობა̈რ, ლუხვ,
Line of edition: 14    სა̈გერგილ, ჩვა̈ბე წირმინდ, ჟა̈ბე წირმინდ, ჩვა̈ბე ვედ, ჟა̈ბე ვედ,
Line of edition: 15    ჟიბე ვედ, ნანყვბულ, ჴა̈იშდ, ეჩხე ჴა̈იშდ, ლა̈ჯრა, სკორმეთ, ლალხორალ,
Line of edition: 16    ციცხვა̈რ, ნაკ, შგედ, ნალქევა̈რ; იდლიან ი იდლიანთე
Line of edition: 17    მაჩჷდ სოფლა̈რ: ლებჷრცხილა, ნანგვლი, ლაჴვმია̈შ ჭალა̈, ნენზიშ
Line of edition: 18    ნაკ, ტობ, ნა̈ნჭერ, თოთან ი ბარჯა̈შ.

Line of edition: 19       ლახმჷლა̈შ ი ნენჴერა̈შ მეზგე-მერდე თემ-თემჟი ლი ჩუ მეყვლე.
Line of edition: 20    ა თემა̈რ ლიხ: გიოლა̈რ, კვირკარა̈რ, ბექსოლა̈რ, კვა̈ნჭიანა̈რ (ბადოლა̈რ),
Line of edition: 21    და̈ვთიანა̈რ ი ეშვი მეზგე საბან. თემა̈რ სახუბ-სახუბჟი ლიხ ჩუ
Line of edition: 22    ლჷთალე ი შომა̈ კამელა̈რიობ ახსყენა შვა̈ნს, ეჩქას გვარა̈რ ოთირას:
Line of edition: 23    ჭკადუა, კვა̈ნჭიან, და̈ვთიან ი ქობა̈ლია.

Line of edition: 24       შვა̈ნე მერმე ჴევრე ნამსგიდინ ლახმჷლ ი ნენჴერა ხოშა ბა̈რ
Line of edition: 25    ლი, ნამშა̈ ი ხილმა̈ხილ მა̈გ იმა̈რგ ქა ყუნზალთექა. ნამშა̈რხენ ხოლაშახ:
Line of edition: 26    კეცენ (ლჷფხა̈ ი გურ), კულ (მუჟღვრეშიშ ი ქამლიზა̈ლიშ,
Line of edition: 27    ლჷფხა̈ ირი ა გურ), ლუვრუსუ კეცენ, მეშხე ი მეწრან კულ, ჭჷმინ,
Line of edition: 28    მანა̈შ (ნამჟოღვირ ი ნაქამლიზალ), ფეტვ (თეთნე ი მეშხე), ზჷნთხ,
Line of edition: 29    სიმინდ (ცჷც, ლულჩხუმუ, თეთნე ი ყვითელ); ლჷითქჷრახენ: ლებია
Line of edition: 30    ფიშირ თანა̈შ (გიმიშ ი ხერხა̈ლიშ), როგ, ღედა̈რ, ბეგვა, ქირს.
Line of edition: 31    იმგვა̈ ნა̈ნკდ ხოლჯახ, მოდეი სიმინდდ ხოჩდინახ ლებიაცახა̈ნ: გარდვიშ,
Line of edition: 32    კოპეშია (ლუშნუ ირი, ლჷლტეხუ ა ლუზნუ), ლუვრუსუ შდიხ
Line of edition: 33    ("სემიჭკა") ი გჲმიშ ვისგ. ხოჩა ლისგდი ლახ ხარ, ა̈ლი მა̈გ ჩუ
Line of edition: 34    აქვჯვინ ფასდ.

Page of edition: 282 
Line of edition: 1       ლახმჷლა̈რ ქანსი ალა̈შიხ, მაწჷხჲაქ ეჯღა̈ი ჩიშალ ხარ. დადალ
Line of edition: 2    ქან ქიპდ ი ლჷბა̈რდ ხამკა̈ხხ ი ჴერჴ -- თა̈კვდი ეჯკა̈ლიბდ. ქანა̈შ გიმბა̈შს
Line of edition: 3    ნაყუნდ იჴმა̈რიხ, ლეჩდინად ი ლეზთუნად.

Line of edition: 4       ჲეხვა̈რს არტმა̈რე (ლაქჷრთჲა̈რე) ლისყი ხა̈მთქვახ ი მოშ-მოშ
Line of edition: 5    მალაშა ხოლაშახ ი ხოლჯახ: ქართ (ლუშნუ, ლუზნუ, ლჷძიკვ ი ძიკურ),
Line of edition: 6    ლახანა, ჩიგინდვირ (წჷრნი ი თეთნე), ხა̈ხვ (ლუთხვიმ ი ბა̈ლემ),
Line of edition: 7    სოხ (ჭაგვ), ნივრა, პრასა, შა̈ბლიკა̈, ქინზ, კამა, ნიახურ,
Line of edition: 8    ვოხრახუშ, ქვანდარ. ღეშგმავ ლილჯი (ლილა̈ში) ა̈დბინეხ ი, იმგვა̈იმგვა̈
Line of edition: 9    ა̈დგის ლახა ხოსგუ, მასა̈რდ ჴედნი: შინკა, ხაბურზა̈კ (\ ხარბუზ), კჷნტჷრ,
Line of edition: 10    პა̈მიდორ მიჩოვშვ (\ მიჩეშვ) მეგნია ი აშ ნალაჯვი.

Line of edition: 11       ლახმჷლ ი ნენჴერას ხილმა̈ხილ მასა̈რდ წვა, ველს გარ დერი,
Line of edition: 12    ჰარა̈კ, ცხეკსი ხეჩდა. ჯვინლა̈რე ნა̈შნავ ლეხლერა̈რ ათხეი ეზარ
Line of edition: 13    იშნეხ. ხილს (უცხ ი უსგ) ხოშა ლაღა̈ლს ჩი მიჩა-მიჩა ჟა̈ხე ხაშხა.
Line of edition: 14    უცხრე ჟახოლდ სიდხ: გიმბ, ბება̈ნი, ლჷლყინ, კეხილ, ფხანჭა̈შ,
Line of edition: 15    ლჷშყერუ, ლამჩქვა̈რი, ჯავგა, თითნა̈, დეშდოლ, თებლექ, წაქა̈,
Line of edition: 16    სვიკვა̈, ჭჷრელ ფხანჭა̈შ, ლეჲრა̈ყ. ამჟი მინე-მინე ჟახოლ ხაშხახ
Line of edition: 17    უსგა̈რსი: ა̈ნთრელ (ა̈ნთროლ), სანაფ, ლენგეჭვ, ქოშ, ლჷლტეხუ...
Line of edition: 18    მეზგა ფიშირს ხოგ ნალაჯვ, მოდეი მიჩეშვ ნა̈გენვ: ქირვა̈დ, მარგვილ,
Line of edition: 19    ბია, ატამა, ნა̈ლყინვ ჰებ (თეთნე ი მეშხე); ბა̈რყენ (ყვითელ
Line of edition: 20    ი წჷრნი).

Line of edition: 21       მჷლხმალი მარა ყუნზალდი მასა̈რდ ლჷგენ ხოზ, ლახმჷლს ირი
Line of edition: 22    ა ნენჴერას. ჯვინლა̈რე ყუნზლა̈რ ნენჴერა ლექვა ათხეი ამჟი ხეჩდახ
Line of edition: 23    ცხეკს. ღეშგმავიშ ნალაჯვ ლაყუნზელჲა̈რ ხარს, მოდეი მეგმა̈რდ ხობულინახ:
Line of edition: 24    ლუშნუ, ადესა, ნოვა, ოჯალეშ ი ფრა̈ნგულა.
Line of edition: 25    ხოშოლუ ჯვინალდ ყუნზლიშ რა̈ნგს ლჷმჩომნელიხ ი რაყა̈რშვ ხა̈გნენახ,
Line of edition: 26    ხოჩა ლაღობა̈რ ხა̈რენახ ი ღვინალთელისგა თუ ხა̈ჩმუნახ.
Line of edition: 27    ეჩქანღვე იმგვა̈-იმგვა̈ ღვინლა̈შ ლიგნე ოლბინელი ი, ხემა ამქა̈ხი,
Line of edition: 28    ეჯჟი ხოცხემ მა̈გ.

Line of edition: 29       ნენჴერა̈შ ვორჟი კაკ მასა̈რდ წვა, იმგვა̈-იმგვა̈ ლა̈იდ ცხეკდ
Line of edition: 30    ლჷგ ი ცხეკიშ მა̈შიანდ სიდ ჩუ. მიჩა-მიჩა კაკ ჩი ხოგ, ჲესვა̈ს ხაკუ.
Line of edition: 31    ლახმჷლს ლაჩჷდალ კაკა̈რ ი ხილა̈რ ათხეი ამჟი ლჷგხ, მა̈შიანს სახუბ
Line of edition: 32    ითა̈ლი. ნენჴერას გა̈ნჭვ მასა̈რდ წვა ცხეკრე ნა̈შხვა̈რლისგა. გა̈ნჭვს
Line of edition: 33    გა̈ნჭობქა აჯა̈ბხ ი აშვ ფა მეზგოლს ზავ ამჟი ხოგხ ჩუ
Line of edition: 34    ლჷტხანჭ.

Line of edition: 35       შვა̈ნს ცხეკიშ მა̈შიან ი ლეზებ მელ მა̈ წვა, ეჯი ლახმჷლ ი ნენჴერასი
Line of edition: 36    წვა. მელა̈რლისგა ლეზობდ იმა̈რგხ: ბირღვ, მუკურთხი, ტკიც, ლეცირი,
Line of edition: 37    წჷნწხა, მურთხვა̈ლი, დაჴლა̈შ სკელ, გიცრულ ტელეფი, შიშგილ, ღეჰი,
Line of edition: 38    მერხელ, მჷთ, მუჭკულ, ნენჩა̈შ პირპილ;
Page of edition: 283  Line of edition: 1    ცხეკიშ მა̈შიან: წიფ, ცხეკიშ (ტყა̈რ) ჰებ, გვიჯ, მურგვი (ლახვა̈შ
Line of edition: 2    ი ბა̈რიშ), წონწოფ, მენცხვა̈რ, ცინყა, მელგმჷლ, ბა̈სყ, ინღა, ვიღვმელა̈რ
Line of edition: 3    ჩჷჩქჟი ლიხ ლეზებ ი მა̈შიან მჷჰიჟი.

Line of edition: 4       ლახმჷლ ი ნენჴერას ვობა̈შ სგიმ ახზვიბ: ხოშა სგიმ, სარგა̈შ
Line of edition: 5    სგიმ, ბოგ ჟა̈ფშხენიშ, ლა̈ჰნია̈შიშ სგიმა̈რ, ნოდშიშ სგიმილდ, იფრიშ
Line of edition: 6    ტვიბ ლეჟა̈შ (ფილოსა̈ნია̈შ) სგიმა̈რ, ჯორკვრიშ ი ხვირჯიშ
Line of edition: 7    სგიმა̈რ. ხოშა სგიმს ლაბურდიდ იჴმა̈რიხ ი დია̈რს ჟი პირე. ა სგიმ
Line of edition: 8    დირიშ თხუმემ მა̈ზიგს ხოჩა ხარ ი ქვინლჷმგენაი ნახონსორ ხოშა
Line of edition: 9    ხალა̈ტ.

Line of edition: 10       ლახმჷლა̈შ ღვაჟა̈რს ლითხვარ ი ლიცხკი ჯვინალჷნდირ ხა̈მურჯვენახ
Line of edition: 11    ი ათხეი ამჟი ლჷგენ ხოზხ. ქორა̈შ ლეღვჟმა̈რ ილზიგა̈ლ:
Line of edition: 12    აჴნი, ალა̈ში, ალთხომლი, იგჷლტეზ ი იმშივ.

Line of edition: 13       ნა̈თხვრა ი ლჷცხა̈ ჯვინალდ მასა̈რდ ლჷმა̈რდ ი ათხეი ა̈რიხ:
Line of edition: 14    ღვაშ, კვიცრა, ჰერსკნ. ათხე ჟი მეკდე ლიხ: ლა̈ჩვ, ილ, დომბა̈, ტყა̈რ
Line of edition: 15    ხა̈მ. ლჷცხა̈ხენ ა̈რი: და̈შვდ, თხერე, მალვ, კენ (ნა̈ცხეკვ), ყუნდვისვ,
Line of edition: 16    ფორენცხ, სილევსი. მეპერხენ ა̈რი: ჟვა̈ნ, ლახვა̈შ ქათალ, ცხეკიშ
Line of edition: 17    ქათალ, ტყა̈რ ღარღად, წყა̈სინჯ ი ამკა̈ლიბ.

Line of edition: 18       მჷლხამლი ზურალ ლიჴჷლტარს ხოხვრამ ხა̈ჭყბენა ჩიგარ. აშ ზურალა̈შ
Line of edition: 19    ლემშივ მა̈ ლი: ლიფყური, ლიჩფჷლი, ბარდნჷრა̈შ ლიცბურე
Line of edition: 20    ი ითქიშ ლაგას ლიგნე, ხოჩილ მოდე ხაკუ, ეჯჟი ხარს ჟი მეკდე.
Line of edition: 21    ხოშა ეჩქა̈ხიქა̈შ ჲეხვა̈რს ლიტუნუა̈რი ხა̈ხლენახ, საპნიშ ლიჩემ,
Line of edition: 22    ტჷტიშ ი ჟა̈გიშ ლიწურინე მა̈ ქორა̈შჲაქდ ი მა̈ ქა ლეჰვდიდ.

Line of edition: 23       ლახმჷლს ი ნენჴერას ვობა̈შ ლასჷრგებ ცხეკ ი ლახვ ხაჭრა.
Line of edition: 24    ცხეკა̈რს ა̈მგემიხ, ვობა̈შ ხა̈ნ ლი მეჩდე, ეჩქანდირ ჭალა̈შვ ლეისჷდ.
Line of edition: 25    ლახვა̈რს იჩა̈ხვხ ლახმჷლა̈შ, ჴა̈იშდიშ ი იდლიანა̈შ კოლექტივრე
Line of edition: 26    ქვინლჷმგენოლ ი ქა დემთემოშ ხეჰელიხ.

Line of edition: 27       ლახმჷლა̈შ ლახვ ი ბა̈რ ჯვინალდ მა̈დნა̈რე ლაშდაბ ლჷმა̈რ:
Line of edition: 28    იფა̈რ ეჩქანდირ ხორევშალ ზიხ ვორემ ნეცინ ი მეგრე სტურა̈რ,
Line of edition: 29    ი'დლიან ვორემ შედრე ნა̈კვიშ აშ ხაჰრა, ვედხენ ტყუია̈შ ბაჩა̈რ
Line of edition: 30    ესღენახ. ათხე ჴა̈იშდ ბა̈რიტს ხაშდბახ ი დჷსს მარმალილოს. ა
Line of edition: 31    სოფლა̈რ ქალქიდა̈რს ხა̈ჯეშხ, ეჯგვა̈რ ლჷლგიმალე ლიხ. სერთხი
Line of edition: 32    ჴა̈იშდ, ხოჩა მოდე ხაკუ, ეჯგვა̈რ ლჷშნავე ლი. ცხეკიშ მეურნეობა
Line of edition: 33    შვა̈ნე მეგმემ ლაქჩას ჴა̈იშდხენქა ხაშდბა ი კომბინა̈ტ ზავ მერმან
Line of edition: 34    ხოცხემ ლაჴმა̈შის ი ქალქიშ შვიმჟი ლისკეთის. ათხეხის ნა̈სყევ შვა̈ნე
Line of edition: 35    მა̈ხე შუკვ ნენჴერა ლეჟ' ესხრი, ჩიქი ჴა̈იშდს ხედი, ღვე ლახმჷლს
Line of edition: 36    ი ლაცხამ-ლაცხამთე ესყა.

Line of edition: 37       ლახმჷლ ჯვინალდ ეშვი ვოშთხვ განყოფილებია̈ნ კლა̈ს გარ ლჷგან.
Line of edition: 38    ათხე, ჰარა̈კ, ხოხვრა სოფლიდა̈რსი კლასა̈რ ლჷგხ: ჲორი -- იდლიან,
Page of edition: 284  Line of edition: 1    ეჯჷნქა -- სკორმეთ, ვედს, ჯორკვა̈რ, იფა̈რ ი დჷსს მგიდთეშ მეზგოლა̈შ
Line of edition: 2    ბოფშრე ი დინოლა̈შვ. ჴა̈იშდ საშუალო კლა̈ს ლჷგ ი ლახმჷლ
Line of edition: 3    არაზა̈ჲა̈ნ. უმაღლეს ვობა̈შ მჷლხამლი დინას ი ნაღვჟურს ხოლია ი
Line of edition: 4    ათხეი ითვრიხ. ლახმჷლ ი ჴა̈იშდ ბა̈ლნიცოლ ლჷგხ ათხე. ხოშ-ხოშა
Line of edition: 5    სოფლა̈რლისგა კოპერატიოლ ლიხ მეფშგე ი, ხა̈ლხს მა̈ ხაწჷხ, ეჯი
Line of edition: 6    მა̈გ ყორჟი წვა.

Line of edition: 7       ლახმჷლა̈შ, ჴა̈იშდიშ ი იდლიანა̈შ კოლექტივა̈რს ლაცხამთე
Line of edition: 8    ეზერ ლა̈თიალ ხარს. ხილიშ ლა̈შნა̈ვი, ღებიშ ი, ჯეგიშ ლა̈ფშირი
Line of edition: 9    ლახმჷლა̈შ ი ნენჴერა̈შ ტვიბ-კალთა̈ლისგა ლი, ეჯგვა̈რ შვა̈ნს დემეგ
Line of edition: 10    იმეგ ლი.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.