TITUS
Svan Prose Texts II (Lower Bal)
Part No. 139
Previous part

Text: 139 
Page of edition: 285 
Line of edition: 15 
CXXXIX. ეშდჲარვ მაროშვ ლიმორევ


Line of edition: 16       ემდჲარვ მაროშვ ლიმორევ მა̈რემ დაგრას ი ეჯკა̈ლიბ ხოშა გოშა̈რს
Line of edition: 17    ხეჭმენივ. მა̈რემ წორ ლას ლასვ ლესგიდა̈რი, ეშდჲარვ მარად
Line of edition: 18    ხომჷრხელდა დეშ ხეფდალ ი დეი ა̈ხკუთვნივ. ეშდჲარვ მორევს ლერგა̈ვი
Line of edition: 19    მეზგოლ მეგვიდ ითშივხ: ჲარვ ჭჷშხჟი ლახ ა̈ხგენივხ უშხვარ, თვით
Line of edition: 20    უსგვა მა̈რე ხადხ ლეჴდე ი ეჯჲა̈რე ნენსგა მეგნად აშვ მარა ჴიდახ.
Line of edition: 21    ხოფშირა მორევს და̈რ ჴიდა ი ბა̈ლს ჩუბავ დეი
Line of edition: 22    გა̈ნწესდ ზჷსდ.

Line of edition: 23       ეშდჲარვ მორევს ი მინე ნენსგა მეგნა ჩვათხა̈ივხ, ეჩქას სერ
Line of edition: 24    მემორევ მეზგოლ ლამოროვთე ქა მეჴდე ლასვხ ი მორვა̈რს ლაჴვმითე
Line of edition: 25    ადა̈ისგვხ ი ჩვადნაბნისგვხ, ეჯი გარ ხეკვადხ.

Line of edition: 26       მორვა̈რე ლამბა̈ნიჟი ლაჴვმილისგა ფიშირ მა̈რე იჩდინივ, მემორევ
Line of edition: 27    მეზგოლა̈შ ქორა̈შ ი სახვბა̈შ, სერთხი ლეღვჟმა̈რ, ბაჟთექა ქა მეჴდე
Line of edition: 28    ლჷფა̈ყვ, მა̈გ არდ. ეჯჷნქა სოფლიშ მა̈რეი ვობა̈შ ინზერივ.

Line of edition: 29       ნაბნობ ქა ხეშთხენივ, ეჩქანღვე მორვა̈რ მინე ლარდა ქორს
Line of edition: 30    ითხივხ ი ლაშდაბს ხადხ. წესჟი მა̈ნკვი ლჷჭირე მეზგე ანღჷრდ
Line of edition: 31    მინეშთელისგა, ძგიდხენლისგა ხეჭმენივ ი ქა ხემბავ, მა̈გეშ ლექვისგ
Page of edition: 286  Line of edition: 1    ი ლემშერა̈ლ ხად, ეჯის. მორვა̈რ ხოჰვნა̈რივხ ი ხეჭვდალხ მინემინეშჟი,
Line of edition: 2    ლეჭვდელ ი ლეცხრი ემაგეშ ხერივხ, ეჯის. აშვ მეზგემ სა̈რჩელს
Line of edition: 3    ჟი ისმინახ ი ქა̈ისგვხ, ეჩქანღვე მერმახენიშ მეზგა ხად
Line of edition: 4    ლექვისგ მიჩა ნა̈მშერი. ნაბა̈ნ დემეგ ხეჭრა̈ჟივ, ეჩა ნაქვ მორვა̈რს
Line of edition: 5    ჟი ლეკადდ დემეგ ხებჟჷნხ, ვოდდე ჩვადნაბვნისგვხ -- ბა̈ქს დემჷვაშვ
Line of edition: 6    იმ ლოხჩიდნისგვ ეჯჟი. ზურალ მა̈რე ლახა ლასვ ლეჭვდელ, მორვა̈რ
Line of edition: 7    ჩუ დეშ ანბა̈ნივხ.

Line of edition: 8       სა̈რჩელიშ ჟი ნა̈სმინუნღვე მორვა̈რ უშხვართე ლიჴდეს იბნახ,
Line of edition: 9    აშვხენიშ ნაქვს ი მერმახენიშს უშხვარ ხა̈გნახ.

Line of edition: 10       მორვა̈რს ღედიშ უშხვართე ლა̈ჴდას ი ჟი ლაკჩას, ხოშა ე მოდე,
Line of edition: 11    სემი ლა̈დეღ ეჯღა̈ი ქა ხერა̈გივხ. ეჩქად ლეცხრის ჩიგვაშვ ჩვა̈ცხრივხ,
Line of edition: 12    შვიმს ი მაჯონს, მა̈ ეჯკა̈ლიბ ლუჩვმინ ლასვ ი ხესმჷნხ, ეჯის მინე
Line of edition: 13    ლეღდის ხაზმახ, ხესკორალხ ი გვაშვემ ღა̈მგვას ხეშდაბხ.

Line of edition: 14       ვოდდე ღედს ჟ'ანკა̈ჩისგვხ, ეჩქად მორვა̈რ აშვდ არდხ ჰამუნღვე
Line of edition: 15    ნებოზდ, ჩუ ლეთშვ ემის ა̈დყულურივხ, ოდო აშვდ ა̈ლეთახ ი ეჲ
Line of edition: 16    ლა̈დღა̈რჟი ქორა̈რ გა̈ნთე ხადხ მესდე. ლარდა იმგვა̈ ხეცხენივხ
Line of edition: 17    ეჩეჩუ ხადხ.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.