TITUS
Svan Prose Texts II (Lower Bal)
Part No. 150
Previous part

Text: 150 
Page of edition: 293 
Line of edition: 5 
CL. ჰასვშემ სამჷრთა̈ლ


Line of edition: 6       ლა̈წვილა̈შთექა ქა ჴედნივ დინა, ეჩქანღვე ეჯი ლამუარს ლერსგენ
Line of edition: 7    ჭჷშხ ხა̈ცვრა ი ქესღჷრდ ქორხენქა, ლამუარ ნა̈ყდანვირს იკადვ.
Line of edition: 8    ჭჷშხე ლა̈ფშვდა̈შს ი ნაჭვლაშვს, ეჩხავ ლა̈ფშვდა̈შს ემის ათყერნა,
Line of edition: 9    მოდეი ვობა̈შ ეჯღა̈ი დემის ფეშნივ, ეჯჟი ღჷრდ მიჩა შუკვს. ჭაშვთე
Line of edition: 10    ქა ნაზუნღვე ლამუარს ჰასვშიშ წესჟი ხად ლებერგ: ჰასვშარობქა
Line of edition: 11    ხა̈წჰივხ, ლილა̈ჲობქა ლილა̈ს ხოჴდახ, აშვ მანა̈თიშ ხჷნსგემ თერეშს ი,
Line of edition: 12    ვოდდე ირდივ, ა̈მის ზავლისგა დემის ხოქდენივხ.

Line of edition: 13       ჲერხი ა̈დგის ლასვ, ჰასვიშ ი ლამუარ უშხვართე ჟი იჟვმივხ,
Line of edition: 14    ეჯი. ჰასვიშ ლამუარს ხეზგეჯჷდ ი სამჷრთა̈ლს ხეთხელივ, ეჩქას ლამუარს
Line of edition: 15    ღეშდ ლა̈გნა დემეგ ხად. ჰასვიშ ლახა ხემოროვ, სამჷრთა̈ლ ხად ლეჩემ.
Line of edition: 16    მირევ მარა მ'ა̈ხკა̈ფივ, ეჯი ქა ლეჴდე ხად.

Line of edition: 17       ჰასვშემ სამჷრთა̈ლთელისგა თხუმდ ნაჭვლაშვ ხეჩიდივ. ზურალ
Line of edition: 18    მიჩა ნაჭვლაშვს ხეთხელივ ლამუარცახა̈ნ, ჰედ ლა̈ფშვდა̈შ მოდმა
Line of edition: 19    ხოყრან, ეჯღა, მოდე ი ჰასვშემ წესჟი მოდმა ხებურგან, ეჯღა. მჷრგა̈დი
Line of edition: 20    მაროლ ქა ხოკადვხ ჰასვიშს მიჩა ნა̈მშერის. ლახ ეჯღა̈ჲ
Line of edition: 21    ეჯღა̈ჲ ჰასვიშ ნაჭვლაშვს ა̈თშდჷკნივ, ლამუარ ვარს დეშ ხეგნივ,
Line of edition: 22    ლარგა̈დი დემეგ ხად, ეჯღა. ნაჭვლაშვ ზურალა̈შ ლასვ ი, მა̈ ხეცხენივ,
Line of edition: 23    ეჯის ხეჩმუდ.

Line of edition: 24       ჰასვიშს ლამუარხენქა ნაჭვლაშვ გარ ხეტხენივ ღეშდ. ნა̈ყდანვირს
Line of edition: 25    ი ჭჷშხე ლა̈ფშვდა̈შს მაროლ ხოშა ლაღა̈ლ დემის ხეფდალხ.
Line of edition: 26    ლამუარს ლა̈ფშვდა̈შ ემავ ხეყრივ, ნაჭვლაშვ ისგდ ყელნივ: ვოხუშდ
Line of edition: 27    თვიმენ ლამუარს ხესდენივ ლა̈ფშვდა̈შლისგა ი მერმე ვოხუშდ
Line of edition: 28    თვიმენ ჰასვიშს ხეტხენივ ქა, ვარჩხილშვ ირივ ა ვეთხმა̈ლშვ, მაროლა̈შ
Line of edition: 29    ლჷლგენჟი.

Line of edition: 30       ჰახვიშს ლამუარ ლახა ჟი ხოხვტენივ, კუმა̈შჷნქა იშგან, დეცეგიმს
Line of edition: 31    ი ეჯკა̈ლიბს დემ ხაჰვდივხ ლუშნუ წესჟი. ამ ბედჟი ბა̈ჩ ხელჯჷნ.
Line of edition: 32    ბა̈ლს ჩუბავ მეზგემ ნამხვიტ მეხვიბს ხესდენიევ ი ზურალ მოდმა
Line of edition: 33    ლასვ ქა მჷისგ.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.