TITUS
Svan Prose Texts II (Lower Bal)
Part No. 151
Previous part

Text: 151 
Page of edition: 294 
Line of edition: 1 
CLI. ცერა


Line of edition: 2       ზურალა̈შ ცერა შვა̈ნს გუნ გვაშვდ ლასვ ლჷკიდ ი ცერას ი
Line of edition: 3    დაგრას ფიშირ ხაგოვა̈რივ უშხვარ. ცერა ლასვ, ჩუ ლჷნშა̈ნ ზურალ
Line of edition: 4    ქორთე ისგა ლიისგა̈ლდ გა̈ნთე ლა̈ხსედნივ, მოდეი ქორს ირდივ ი
Line of edition: 5    ეჩხენქა ქა̈ნგენივ, ეჯი. შომა̈ დე ირივ, ცერას ჟი იგვხელივ ზურალა̈შ
Line of edition: 6    მარდ, ლამუარ თხუმდ, ეჩქანღვე ლამურა̈რდ ხეხელივ, ეჯკა̈ლიბ სახუბ.
Line of edition: 7    ცერას ლა̈იდ მოდმაგეშ ა̈ხჭემხივ, ეჯი წეს დე ლასვ, აშ ზურალს მჷთხელი
Line of edition: 8    ჩუ ე ჲა̈რ ხერდივ.

Line of edition: 9       ზურალა̈შ ცერას ხოშაჷდ ლაკფი ხად, მარე ღვაჟმარემ ცერას
Line of edition: 10    ღეშგიმხენ ხოშა ხოლა მჷრგა̈დი ხად ბაც. ლეცვრა გვა̈რდ ღვაჟმარემ გვი
Line of edition: 11    ემავ ხედივ, მიჩა გვაშვ მოლა ჟი ხა̈ჭმინა ჩუ ლირგავა̈ლდ.

Line of edition: 12       ხედვა̈შთე დე ირივ, ცერა უსგვ' აშირ მანა̈თდ ლასვ ლჷკიდ,
Line of edition: 13    მარე მჷრგა̈დი მა̈რე ეჯღა̈ი ხეკვად. მჷრგა̈დიდ უსგვა მარა ჴიდახ. სამ
Line of edition: 14    აშვხენ ი სამ მერმახენ, ეჩქანღვე ნენსგა მეგნე ქჷრდა̈შ ხადხ ლეთში.
Line of edition: 15    ა მაროლ ჩუ ლემბა̈ნი ხადხ, ეჲნურ ლეცვრე ი მუცვრე' დეშ ხეჯრავხ.
Line of edition: 16    ლესგიდა̈რი ვობა̈შ ხეთხივხ ი მჷრგადას ჟი ლეკადდ მ'ა̈ხკა̈ფივხ, ჰედ
Line of edition: 17    ჩუ ლეთვფად, ეჯი მა̈გ ხა̈ტ ჩუქა ხადხ ლაგას ლეგნეჟი
Line of edition: 18    ლეკედ მა̈ ირივ, ეჯი გვაშვ ისგა ხეგივ ი მჷრგა̈დი მარა ნა̈ცვრერხენჩუ
Line of edition: 19    ჩუ ლებრე ხად.

Line of edition: 20       ცერა სა̈ყდვირდ ხესდენივ, ზურალ ირივ ა ღვაჟმარა. ნამცვირს
Line of edition: 21    ჟი და̈რ ხოკადვ ეჩქანღვე.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.