TITUS
Svan Prose Texts II (Lower Bal)
Part No. 152
Previous part

Text: 152 
Page of edition: 294 
Line of edition: 22 
CLII. ჲეხვრობ


Line of edition: 23       ჲეხვრობ უფლიშიშ დეშდილა̈დეღ ლასვ. ამ ლა̈დღიშვ მჷლხამლი
Line of edition: 24    ზურალ, შვა̈ნე ი ნენჴერა̈შ ნენსგა, მა̈გ იმარალ. ეჩქა̈შიშ
Line of edition: 25    ღრევჟი მჷნჴერი ლახმჷლთე ანღჷრდ ლეჟა ი სკარვ ჩი შვა̈ნს ხად
Line of edition: 26    სახუბსახუბჟი. ნენჴერას ქორა̈შ მელეჩ ი ვეთხმალლიშ თემი მუხვტე გარ
Line of edition: 27    სედნივ.

Line of edition: 28       ჲეხვრობ ლა̈დეღ ზურალ, ხოშა ი ხოხვრა, მა̈გ ხოჩამდ იმარალ,
Line of edition: 29    ლერექვ-ლელდისგ, მაჩენ მა̈ ჲა̈ს ხედივ, მა̈გ ეჯის იქვამ ი იდისგვ.
Line of edition: 30    გა̈ნზ-ნაგა̈ნზ: ჩაბრა̈სტ, ლეგმა̈რ, ჯინჯილ, ღილიკ, მჷსკა̈დ ი სამანჯო
Line of edition: 31    ჲესვა̈ს მა̈ ხოსდ, ეჯის ჩი ისგა იქვამხ ი იბამხ ხოშა ხოშემ
Line of edition: 32    შვიმჟი ი ხოხვრა ხოხვრემ.

Line of edition: 33       ჲეხვრობ ლა̈დეღ ლასკარვ-ლასკარშვ იბნივ ლიმარა̈ლ. შიშდ
Line of edition: 34    ჰამხენ ლაჴვმია̈რთე ლეისგ ლესკა̈რ-ლემზირიშ ლანყას ხეგნივხ.
Page of edition: 295  Line of edition: 1    მინე-მინე შვიმჟი ამარახ ზურალა̈შ ლეისგს ნა̈ნკდ ი ღვაჟმარემს
Line of edition: 2    ნა̈ნკდ, ლა̈მზჷრთე მეზი ვოშა ირდივ ლასკარვლისგა, ეჯ შელდს.

Line of edition: 3       ჟა̈ბე ლახმჷლა̈შ მელსკა̈რს ფუსდთ' ესღვანდ ი ჩვა̈ბე ლახმჷლა̈შს --
Line of edition: 4    ჯგჷრა̈გთე. ღვაჟა̈რ ლა̈მზჷრს ნა̈ნკდ ხეგნივხ ი ჲეხვა̈რ -- ნა̈ნკდ. ჩუა̈
Line of edition: 5    ნა̈ნკდ ისგვრივხ მინე-მინეშჟი, უშხვართე უჩჷდდ, ლასკარვ-ლასკარვჟი.
Line of edition: 6    ჲეხვა̈რ მინე ლემზირს ჟია̈ მინ ა̈მზჷრივხ ი ლასგვრაი ნა̈ნკდ
Line of edition: 7    ხადხ. ეჩთელისგა ღვაჟა̈რ დემ ხეჩიდივხ გა̈ნწესდ.

Line of edition: 8       ლა̈მზჷრს ხოშა ლაღა̈ლ ქა მეჴდე ჲეხვა̈რ ხოსკობახ. სიმაქ იეჯკა̈ლიბ,
Line of edition: 9    ისგა ხეჩიდივ ეჯჷნქა, ლა̈იდ ნებოზდ ტაბა̈გს დემის ხესდენივ ი
Line of edition: 10    სოფელთე ტეხნივ, მოდეი ლაღრალ-ლაჭარალთე ხეჩიდივ.
Line of edition: 11    ხოშა ლაღრალს ნებოზთე ა̈სყივხ, ჰედ იმგვა̈ ლა̈მზჷრ ლასვ, ეჩეჩუ, ჰედი
Line of edition: 12    სოფლიშ სვიფა̈რლისგა. ლაჭარალს ხოშა ჲეხვა̈რი ხეტყუბივხ,
Line of edition: 13    ხოხვროღუცახა̈ნ მინი იჩჷდალხ, ჲესვა̈ს მეშხე მოდე ხაქუდ
Line of edition: 14    ი ლაღრალ ხად.

Line of edition: 15       ლახმჷლა̈შ ჲეხვრობ მერმა ჴევა̈რთე ქა მეკვჰე ლასვ ი ვობა̈შ
Line of edition: 16    ჴედსიჴ ისგა̈ხიშ ჴევა̈რხენ. მა̈ხეღვაჟა̈რს ი სიმაქა̈რს ლიჴედ ხოშა
Line of edition: 17    ხა̈ლხნჷდხ. მეჴედს სოფელ პა̈ტივურ დემის ფიშვდა. ცა̈ლ ცა̈ლს
Line of edition: 18    ხეხელივ, ლასკარვთე ინჴრინა სიმაქს სიმაქ ი მა̈ხეღვა̈ჟს მა̈ხეღვა̈ჟ,
Line of edition: 19    აშვდ ირივხ ა ნა̈ნკ-ნა̈ნკდ.

Line of edition: 20       ლიშდრა̈ლ ი ლიღრა̈ლ მასკვბა̈შ ნებოზდ დემის ქეცნივ. ვობა̈შუნ
Line of edition: 21    ლაჭარალ ჲარვ ი სამ ფად ხესყივ, ხოშოლუ ჯვინელ ლაჭშხშა̈რს ხეგნივხ.
Line of edition: 22    ხოშა ჲეხვა̈რს მაშენ თამარეშ ჭჷშხდ ხოსდხ ლჷგენ, მა̈ნკვი
Line of edition: 23    ლაჟღვა̈შს ყჷლახ ჲორი ღეთ ი სემი, ეჩქანღვე ლაცადუნოშვ
Line of edition: 24    ლა̈ლერსათე ხება̈ჴივხ ამჟი:

Line of edition: 25       ვოო რჲა დელა, თამარ დედვფა̈ლ თაამარე,

Line of edition: 26       ვოო რჲა დეელა, შინა ვარდა თაამარე..."

Line of edition: 27       სიმაქს ი მა̈ხეღვა̈ჟს ჯედი ლაჭშხაშა̈რდ მეკვშდოლუ -- გჷრკდიშენ
Line of edition: 28    ლიჴედ ი ლაშვპარალ ხოცხოხ: "ვარა დიელასა", "შამარე", "ვადილასა",
Line of edition: 29    "შინა ვაგი", "დომბარა" ი ამკა̈ლიბ. მეღრა̈ლ-მეჭარა̈ლს
Line of edition: 30    ლაღრალს დემ ხეფშენივ, მჷსგდის ი მუჰვნა̈რის ლისგდი-ლიჰვნა̈რი
Line of edition: 31    დემ ხაჟანდ ი მასკვბა̈შ ნებოზდ ამჟი ხოჩა ლარდა ლასვ, ჲეხვრობს
Line of edition: 32    ზავა̈შ ი ზავა̈შ უშხვარ ნენსგა ლეზვრა̈ლ აშ ხესევდალ.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.