TITUS
Svan Prose Texts II (Lower Bal)
Part No. 157
Previous part

Text: 157 
Page of edition: 298 
Line of edition: 31 
CLVII. ტჷტა̈შ დირობ


Line of edition: 32       ლაგვანა სგებნე ლეთ მეზგე ტჷტა̈შ დირობს იჩმუდ. ამ ლეთ
Line of edition: 33    სოფელ კვა̈მჟი ნეცინ, უსპა კეცნემ დირა̈რს ანყა: არა, ჲეშდ,
Page of edition: 299  Line of edition: 1    ეშდჲორი ა ხოფშირაჷდ, მეზგემ გეშ ლასვ. ტჷტა̈შ დია̈რჲაქ ჴიცს ჩვასფაჷრივხ,
Line of edition: 2    ჰედ სგიმშვ იბურდივხ ი უსპად ანყახ, ჰედი ხა̈ჩდინახ
Line of edition: 3    ისგა̈შხენ: გარდვიშს, ლებიას, კაკს, გიმბა̈შს ი ამკა̈ლიბს. აშ კეცენ
Line of edition: 4    მაგვა̈რ წყილია̈ნ ირივ, ეჯი მეზგემ შის არდ. სოფელთე ხოლამ
Line of edition: 5    ეჯღა̈ი და̈რ ჴიდა. დია̈რცახა̈ნ საუჭმ ნაყუნი სემთქუნხ, იმა̈შ დე
Line of edition: 6    ირივ. ნაყუნიშ ლიჴდე მაკაფშვ ლასვ" მჷნა̈ყ დია̈რს ჲერვა̈ დეშ ჴიდა,
Line of edition: 7    ეჯის ფექ ოხღვანდ ქა ღჷმგჷნად.

Line of edition: 8       ტჷტა̈შ დია̈რ მიჩა მჷჴდა ტაბა̈გშვ ოხღვანდ. ბარჯჟი ხაგან, ეჯჟი
Line of edition: 9    ანღჷრდ ლჷდგა̈რთელისგა. ეჩეჩუ ბარჯხენჩუ ჩუ ხა̈გმუნახ ი ტაბა̈გს
Line of edition: 10    ჩი კუბს ხაგამხ გა̈ნხენ ლეჟა. ტაბგიშ მჷჴდე იმზჷრ: "ამკა̈ლიბ
Line of edition: 11    ჭირობ მიჩა ქორს ნემეგ ესეროღ ახდენა! ტაბგა̈რს ხემ' ეჯჟი
Line of edition: 12    ხექმენივხ გარ. სოფლიშ დია̈რ მა̈გ ისგა ლიხ ჴედნივ, ლასკჷდ.
Line of edition: 13    დემეგ ლასვ ი დირა̈რს უშხვართე ხაქმჷრახ.

Line of edition: 14       ტჷტა̈შ დია̈რს მა̈გ ისგა ჴიდა, ეჩქას მასა̈რდ მუბვირ ლასვ სერ.
Line of edition: 15    ლჷღგა̈რს მჷთმი კუბა̈შ მესგვრე მა̈გ ისგა ხასგურდ, ტაბგა̈რჟი ნეცინ
Line of edition: 16    ლეტვროლ ხოყარხ, ლჷდგა̈რიშ კირვენ ჟი ხატვანდ. დირიშ
Line of edition: 17    ლირბი ქა მჷლი ემოშ ირივ, მოდეი მეგრა დირიშ ლინყეს ჟი იქვცახ
Line of edition: 18    ი, ტჷტა̈შ დირობა̈შვ ნეცინს ენის ანნა̈ყისგვხ ქემად, მოდეი,
Line of edition: 19    სერთხი მჷცხიარობ ლას მოდე ლასვ, ლემასგვ ჩუ დიგახ.

Line of edition: 20       ვოდდე ლიფანა̈ლდ, ლეტვროლ ლახა ჟი მჷსყე მოდმა ხადხ, ეჩქას
Line of edition: 21    ხეშდაბხ ი სოფლიშ ისგა ლინჭურა̈ლდ ჟ'ამარახ. მეჴედ მა̈რე
Line of edition: 22    უყლად, მა̈გ დემისშალ ჴედნივ, მარე მეზგე ლაყჷლალთე ხოთვრივ
Line of edition: 23    ი ეჩქას ხოშოლუა̈ აჩღჷრდხ. მა̈გ ისგა მეჴდე ლასვ, ეჩქას ჯვინალდ
Line of edition: 24    პაპს ხა̈გნახ ი ჩუ ხაჯგრუნახ.

Line of edition: 25       ლჷდგა̈რიშ ლაფანას ხეგნივხ, ეჩქას მეკვშდე ლეტვრილა̈რს
Line of edition: 26    აჰვდა̈ლავხ. ლაჯგრი-ლაფანაჟი სისოდ ხესყივ, მა̈გ კაჩ ლჷგან, ჩი მიჩა-მიჩა
Line of edition: 27    მუტვა̈რ ლეტვრე ხოყდინან ი თხვიმ ჩუ ლუკვა̈რ სად. აშვ
Line of edition: 28    ჰალა̈გდ ამჟი სჷმან ლასვ. ეჩქანღვე სოფლიშ ხოშამთე ჲერვა̈ ირივ,
Line of edition: 29    ეჯი ლიშჷნდების იბნა: "იმგვ' ესერ ზეთშვ უჩხადეს ი ბამბა̈შვ შდუადეს,
Line of edition: 30    ლაქუნ ესერ ეჩეჩუოღვ ხარ, ქორდ ი მიჩა სოფელდ ხოჩ'
Line of edition: 31    ესეროღვ ჭიშხ ხოცვირა!"

Line of edition: 32       მჷშჷნდებია̈შ ჟი ნა̈ბინუნღვე მა̈გ მიჩა-მიჩეშჟი ხოშჷნდებივ ი
Line of edition: 33    ლა̈შჷნდობა̈რს რაგდივ, ლეზვრა̈ლ მიჩეშხენ ი ლეღვჟმა̈რ მიჩეშხენ,
Line of edition: 34    ეჩქად ი ეჩქად ლეტვრილა̈რი ყარვხ ლაჴაჩთე. ნამჴიჩვს ჲა̈რ ლემასგვთე
Line of edition: 35    აკვანა, ჲა̈რ ლა̈შგლა̈რია̈შ ქანდრა̈რს ხალწივ, ჟი ტვანდხ
Line of edition: 36    ეჯჟი. მა̈გ ხემზჷრ მეზგა: "სერუნღვე ჭირობ მჷქა̈ბი ესეროღ ხარ!"

Page of edition: 300 
Line of edition: 1       ჟი ნაშჷნდობუნღვე ლასგვროლს ადაწყახ. კჷლთხი რაგა̈დს მა̈გ
Line of edition: 2    ინთხლალ: ზურალ ი ღვაჟმარე, ხოშა ი ხოხვრა მა̈გ ისგვრივ:
Line of edition: 3    ლეზვრა̈ლ აშვთე ი ლეღვჟმა̈რ მერმათე. ქორ გეში ლასვ ვობა̈შუნ,
Line of edition: 4    მარე ჩუ ეჯღა̈ი მა̈გ ჩუ სკჷდჷდ. ეჩხენ მოსპა ჲეხვა̈რ დირა̈რს კვიდოლა̈რთე
Line of edition: 5    იკადვხ.

Line of edition: 6       დირიშ მჷდისგალა ლა̈დისგა̈ლის ხეჭამხ. მა̈რემ ქუნჟი ჲარვ დია̈რს
Line of edition: 7    ხოდისგვხ ი ეჩეჟი ღერღილ ხასდ. ხათარვ, ეჩქას ეშვი ჲერვალე
Line of edition: 8    ხოშამთე ხოჩა ამბა̈ვს იჴდა ჩიმი ლესმინად. ლჷდგა̈რს ხოშჷნდებივ ი
Line of edition: 9    ჷთრა, ეჩქანღვე მა̈გ იბნა ლიზებს ი ლითრეს.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.