TITUS
Svan Prose Texts II (Lower Bal)
Part No. 158
Previous part

Text: 158 
Page of edition: 300 
Line of edition: 10 
CLVIII ლაგვანა


Line of edition: 11       ლაგვანა ხოშაი წეს ლასვ, ნენსგა̈შ ი ხოხვრაი. ხოხვრა ლაგვანა,
Line of edition: 12    ლახა გვიდა̈მ ლაგვანა ქა ქეხნივ ი ლჷდგა̈რს ლაშდღვიჟი მოლა
Line of edition: 13    უსპა დია̈რშვ ი ლეთროშ ხა̈ჭმინახ, ეჲნა̈რ ხოშხონხ. ნენსგა̈შ ლაგვანაჲაქდ
Line of edition: 14    ვოშთხვ ი ვოხუშდ კვიდოლ (ჲ ჲორი ფუთ ი ხჷნსგა), ჲშდ ი
Line of edition: 15    ეშდჲორი ფუთთეჟი კეცენ ლახ შის ხეღენივხ, ქა მარად ხებჟჷნხ.
Line of edition: 16    ხოშა ლაგვანას არა კვიდოლხენჟი ეშდჲარვ კვიდოლთეჟი კეცენ
Line of edition: 17    ხეკვად.

Line of edition: 18       ლექვრა̈რხენ ფექა̈რ ლიჴედს იბნახ, ეჩქას ქორს დირიშ ლირბის
Line of edition: 19    ქა დემის ხა̈ქვცახ ღეშდ. სოფლიშ ჲეხვა̈რ უქვად ანღჷრდხ. ჯა̈რ ი ეჯკა̈ლიბ
Line of edition: 20    ქორს მა̈ დემეგ ლჷგან, ეჯის ჩიგვაშვ ჴიდახ. ჲა̈რ ლა̈ცხრილის ხეგნივხ, ჲა̈რ
Line of edition: 21    ძევლა̈რე ლა̈გნას. ძევლა̈რ ჟია̈ ტეხნივხ, ჴიცა̈რს ჟი იბურდივხ. ჴიციშ
Line of edition: 22    ლაზმის ქა ხა̈ქვცახ ი ეჩქად ი ეჩქად ზექ-მჷხრიშ მჷმარე მიჩას ხეშდაბ.
Line of edition: 23    ამხენ კა ლასვ ლეკარე ი მჷარე ღვაჟა̈რ ეჩთ' ესღჷრდხ,
Line of edition: 24    ლახა სოფელლისგა ეჯკა̈ლიბ ხოშა კა და̈ს ხოგან ეჩქადიშ ნაკარვ.

Line of edition: 25       მჷლქერის ი მჷრბის მჷჲრაყა ქა დემის ხექვცენივხ. ვარჩხლიშ
Line of edition: 26    გეშ, ქორხენ ირივ ა ქა̈მშხენ, ლაგას ხეგნივ, ეჩქას შიშდ მჷჲრაყა
Line of edition: 27    ქა იბრევივხ ი სოფელს მა̈ ქა ხაკლივ, ეჯი ლეთრე ქა̈მე სოფლა̈რხენ
Line of edition: 28    ხეკვეს ოხჴიდენხ.

Line of edition: 29       მჷჲრა̈ყის ხოლა ა̈ჲრა̈ყს და̈რ ხაჰვდივ. ლაგვანა̈შჲაქ მა̈ მოშ
Line of edition: 30    ხოჩა ა̈ჲრა̈ყს ი ხოშა ლაზმიშვ ლაჰედნა, ქა მუჰვდის ეჯი ხოცხონ.
Line of edition: 31    ღვე სოფელ ხემზჷრ ი კა̈ლუნ მაჴვამსი იჴდახ ეჯკა̈ლიბ ხოჩა ა̈ჲრა̈ყღა.
Line of edition: 32    ხოლამღა ამკა̈ლიბს და̈რ რაგდივ ი სოფლიშ ხოლა რაგა̈დდ ჩი
Line of edition: 33    ხაყლუნივ. მჷჲრაყა ა̈ჲრა̈ყს იმგვა̈ ა̈დკა̈რქისგვხ, ეჩხავ ესღჷრდხ
Line of edition: 34    მა̈ ჭჷშხშვ ი მა̈ ლასგვროლშვ. მეზგა ჰა̈რიდ დემის ხეტხენივხ ისგა,
Line of edition: 35    ლა̈იდ ჟა̈ხე ჴევთე, მოდეი ლექვა ზა̈ნთე ლეზი ხერივხ ეჰე.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.