TITUS
Svan Prose Texts II (Lower Bal)
Part No. 159
Previous part

Text: 159 
Page of edition: 301 
Line of edition: 1 
CLIX ქუნემ ლიტხე


Line of edition: 2       ჯვინალდ ლახა ჲერვა̈ ქორს ი სოფელს ქამავ იდგა̈რივ: ლანგზარს,
Line of edition: 3    ლა̈თხვარჟი კოჯს, მოდეი ბოგს შყედნივ, ჰედ ჟა̈ჰ, მოდეი
Line of edition: 4    ნა̈დირ, მეგემ, ბა̈ჩ ი ეჯკა̈ლიბ ადვა̈შივ, მიჩა ჭირსუფა̈ლს ქვინ ქორთე
Line of edition: 5    ხად ლეტხე. ქუნემ მჷტხე მაროლ ქა ხოთრონხ სოფელლისგა ი, შომ'
Line of edition: 6    ეჩქას, ქუნემ ლა̈ტხათე ეჯჲა̈რლისგა ეშვი ხოჩილთე ჲერვა̈
Line of edition: 7    ირივ, ეჯის ინჴრინახ.

Line of edition: 8       ქუნემ მჷტხა ჩა̈ნგ ჰედ ჭინირ ესღვანდ ი მამილ ისყად. ლჷდგა̈რიშ
Line of edition: 9    ნადვაშმიყ ქუნემ მჷტხე ჩა̈ნგს აშმა, ლოცს რაგდივ ლუშნუს
Line of edition: 10    ი ქართვილს ჩუ ლუფურთინა, იზელალ ე ნადვაშიშ ა̈გრევას ი
Line of edition: 11    "ნაქნოვალს ხეთხელივ". აშვ ჰალა̈გდ ამჟი სიპჷდ, ეჩქანღვე, ლალთოღვე
Line of edition: 12    ლოხმათრან, ეჯჟი ჩუ იგნივ ი ლაჩქოვალს ხად. ტოტა̈რს
Line of edition: 13    ჟ'აკჩა ი ჩუ იტხა, ქუნ ხეჴჷრალ: "მიჩა ლა̈ნჴრინათ' ესერ ომჴედხ
Line of edition: 14    ი ქორთე ლიტეხოღვ იშგედ". აშხვა̈ნს ამჟი ლალცოვალ ი ლაჴჷრალ ხად,
Line of edition: 15    ეჩქანღვე ქუნემ ხჷტხე ჟი ხოქფენივ ეჩეჩუ. მამილ ლახკალთა̈დ ხოჭონან,
Line of edition: 16    ჩა̈ნგ შის ხუღვანდ, მოდეი მამილს ლერთან შივშვ იყდა̈ნივ, ეჩქას ჩა̈ნგ
Line of edition: 17    აშ ხორკჷნ, ლერსგვან შივშვ ეჯჟი აშმა ი ლოცრე მუნჴვა̈რს რაგდივ.

Line of edition: 18       "ქუნ ლჷცდ ხაყლუნი ესერი", ეჯღა ლა̈იდ აშგარ ლება̈ჴ ირივ
Line of edition: 19    ეჰე, ქუნემ მჷტხე აბურშვიმიშ ქიპს აგთხჷნა ჟიქაქა ი "ქვინ ეჩექ'
Line of edition: 20    ესერ ღჷრი, ოდო ლჷცემ ჩჷრჩხჷნდ ხაყვლუნი ესერ". ბოგს ლახა
Line of edition: 21    იმეგ ხედივხ, "ქვინ ამსოლდა̈შ ნა̈ზელალქა ლიზის დემ ესერ იშგდე",
Line of edition: 22    ეჯღა ბოგა̈რს აშვხენ ი მერმახენ იჩქოვალ, ჩა̈ნგს აშმა ი მუნჴვა̈რე
Line of edition: 23    ლა̈ქვისგს ქა ლჷთმარე ლასვ. ბოგქა აბურშვიმიშ ქიპსი ფიშვდახ,
Line of edition: 24    აშვხენ მერმათე ქა მეჰელიდ: "აბურშვიმიშ ქიპქა ქვინ ქ' ესერ ხემინდვ".

Line of edition: 25       ქუნემ მჷტხა ლახა ხეჭვდალხ: -- იმნოშვ ესერ ჴედნი გუდ, ქვინ
Line of edition: 26    ანღრი, ეჯის? -- ეჯი ხოცა̈დივ: -- მამილ ესერ ქუნ აშ ხოსგდი ი ქუნემ
Line of edition: 27    ლატახჟი კჷრკნი ესერ.

Line of edition: 28       ქუნემ უტიხად ქორს ქამავ ნადგარვს ლეგემიშ სკა̈მს დემის ხოგამხ:
Line of edition: 29    "იამსოლდა̈შ ლადვა̈შიმიყ ქვინ ურინჲერვეშდ ლა̈დეღ ღელი
Line of edition: 30    ესერ ი ეჩქანღვე ჩვ ესერ თეფნი".


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.