TITUS
Svan Prose Texts II (Lower Bal)
Part No. 162
Previous part

Text: 162 
Page of edition: 302 
Line of edition: 32 
CLXII კონჩხა̈რ


Line of edition: 33       ლაგვანა ლა̈დეღ ჲერვა̈ ჰაყბა̈რს ჩუ იკცენივ ი საფლა̈თელისგა
Line of edition: 34    ისგა̈სკნა, ე ლჷდგა̈რს კონჩხა̈რს ეჯი ხეჩმუდ. ლაჩჩურა ლასვხ ჯიმ
Page of edition: 303  Line of edition: 1    ლა̈შ მუკუნჩხი, ჲეხვ -- ჭაშვემ მუკუნჩხი, დინაგეზალ -- დიეშ ი მუეშ
Line of edition: 2    მუკუნჩხი, ვიდილ -- მიჩა ვიდლა̈შ.

Line of edition: 3       კონჩხა̈რს ნა̈ნკდი იჩმუდხ ი უშხვარ ლატყუბალშვი. ნა̈ნკდ მუკუნჩხი
Line of edition: 4    ჯი გარ ხეხელივ სოფელს ი, კონჩხა̈რს მა̈ ხეკვდენივ, ეჯის
Line of edition: 5    ჯი გარ ჴიდა. ეჯღა̈ჲ ხოშა ლაღა̈ლ უშხვარ ხეტყუბივხ ი კონჩხა̈რს
Line of edition: 6    ლატყუბალშვ იჩმუდხ. უშხვრე მეტყუბა̈ლ ჲერვა̈ ლასვხ, მინე-მინე
Line of edition: 7    ჭჷშხჟი ჴიდახ: ლენყა, ლა̈ზჰას, თაშვ ი ქა ღერღილჲაქთექა ჩიგვაშვ.
Line of edition: 8    ამჟი ხადხ ლეჴდე ლეთრეი.

Line of edition: 9       კონჩხა̈რ ლა̈დეღ მეზგე სოფლიშ მეხელი ლასვ. დია̈რ ლენყე ქა
Line of edition: 10    მჷნა̈ყ ხად, დირიშ ნაზიმ ეშვი ლასვ. მა̈რემ ქუნჟი ჲარვ ანყახ, ამჟი
Line of edition: 11    ერე მა̈ხეღვა̈ჟ მა̈რე აშვჟი ქჷრდა̈შ ჩუ იზბუდ.

Line of edition: 12       ლეკუნჩხი ზურალ ირივ ი ზურალა̈შ ნახა̈ზ ხადხ ლესყი, მოდეი
Line of edition: 13    ლვაჟმარემ, შომა̈ კონჩხა̈რს ღვაჟმარა ხეჩმუდხ.

Line of edition: 14       ლჷდგა̈რიშ ნახა̈ზჲაქდ უშკ ლახა ა̈სყივხ, მახა მიტკა̈შ ნა̈ქვიცს
Line of edition: 15    ჩვაქჷრგა̈ვივხ: თერრე ნახა̈ზს, ნექჭა̈რე, ნეფხვნა̈შ, პილრე ი ნეპკა̈შ
Line of edition: 16    ნახზილა̈რს ჩი თეთნაჟი მეშხა ქიპშვ ჟი ხაქჷრგა̈ვივხ. ეჩქანღვე ეჯკა̈ლიბ
Line of edition: 17    ფაუს ჯვა̈რდ ა̈სყივხ, ეჯის ჟიბავ მასარქა ი იშგნა̈გი, პინტშვ
Line of edition: 18    ირივ ა ლერქვა̈რე ლაჭენიშვ, ქაგორშლახ მა̈რემ თხუმშალ ი ტანშალ.
Line of edition: 19    თხუმქა უშკდ ე ლჷქჷრგავა ხაჭენივხ ი ისგა ხა̈შხბივხ. ტან, ლერაქვ
Line of edition: 20    ხაქვამხ, ზურალს -- ზურალა̈შს ი ღვაჟმარა -- ღვაჟმარემს.
Line of edition: 21    ლვაჟმარემ ნახა̈ზს მა̈გ ღვაჟმარემ ხაქუდ ი ხასდ: თხუა̈ჟი -- მა̈ხე ფაყვ,
Line of edition: 22    ტან -- კაბ ი ვოსა̈რ, ნენსგაქა -- ლა̈რტყი ი ხანჯა̈რ: ამჟი ზურალა̈შ
Line of edition: 23    ნახა̈ზსი: თხუმჟი -- აბურშვიმიშ ლეჭენი, ტან -- ტანემ ლერექვ: ივკა,
Line of edition: 24    ჟიბავიშ ი იშგენ, ლეზვრა̈ლ გა̈ნზ მა̈ ირივ, ჯინჯილ, ჩაბრა̈სტ ი
Line of edition: 25    ჟჯკა̈ლიბ მა̈გ 'ისგა ხენყან.

Line of edition: 26       კონჩხა̈რთე სოფლიშ მა̈გ ანღჷრდ უყლად, ხოშა ირივ ა ხოხვრა,
Line of edition: 27    ლიჴედ ჲესვა̈ს ხემედივ, ღეშდ და̈რ იგნივ. ქა̈მე სოფლა̈რთე
Line of edition: 28    ლა̈დეღს ქა კვიჰახ, მარე ლა̈იდ უჭრად ი ხოჩა ლუნთვირურ ლიჴედ
Line of edition: 29    ეშვმერ ხამჭინდხშალ.

Line of edition: 30       ლასგვროლს კონჩხა̈რჟია̈ ა̈სყივხ. ფიშირ მა̈რე ლახ ინზერივ,
Line of edition: 31    დაბქ' ა̈სყივხ, მოდეი ა̈ზვ-აგამლისგა, ჩუ მესგვრა მიჩა დია̈რ,
Line of edition: 32    ლეღვ, ღერღილ ი თა̈შ -- მა̈გთან ხოჴდენივ. დიარს დირიშ მჷდისგალა
Line of edition: 33    ხოდისგა̈ლივხ ჩი, ლაღვ -- მელღვა ი თაშვ ი ღერღილს მინე-მინეშჟი
Line of edition: 34    მჷდისგ'ლი ახჭიმჷდხ. კონჩხა̈რხენ სოფელ ლაგა̈ფს ქა̈ისგვ,
Line of edition: 35    კვა̈მჟი ხოლგა̈ფივხ, ვოშა ა̈ხკუთნოვნივ ჲა̈ს დია̈რ ი იშგენ, ქა გზა̈რდ
Line of edition: 36    ირდივ, ეჩა ლაგა̈ფთექა.

Line of edition: 37       იშგენ ლაგვანაჟიშშალ ხემთქუნხ მა̈გთან.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.