TITUS
Svan Prose Texts II (Lower Bal)
Part No. 165
Previous part

Text: 165 
Page of edition: 305 
Line of edition: 5 
CLXV ლიჴგლტარ


Line of edition: 6       კულიჲაქ მა̈ტყ მა̈ნკვი ქა ლეშყვდი ლი. ხოჩა ეჯი, ლახა ჲარვ
Line of edition: 7    ღეთ ლა̈დეღ ლჷცთელისგა ხებქვი, ხოლა წიდ ი ნერღედ მა̈ ხეყენი,
Line of edition: 8    ეჯი მა̈გ ქა ხერჴვენი ი ეჩქანღვე ხოჩა ლეშყვდი ლი. ხოჩა წყილიანდ
Line of edition: 9    ქა ლჷშყედს მჷჟ ხოდისგხ ი ჩვა̈ფკვეხ. ეჩქანღვე სერ ჩვაბძღჷნეხ
Line of edition: 10    ხოჩამდ. მჷბძღჷნად მა̈გ იმა̈რგ, ეჩა ბედშვ ხოხვრა დინილა̈რს იშდეხ
Line of edition: 11    ი ეჯჲა̈რ ლა̈იდ ხოჩამდ ა̈პინწყელიხ ი მოლე თეს ხესსგი, ეჯკა̈ლიბ
Line of edition: 12    კვირკვილდს დემ ხა̈ცვრეხ ხოლემ პარა̈კდ.

Line of edition: 13       ჩუ ლჷბძღჷნე მა̈ტყს სერ ჩუ ლიპტყჷნე გარ ხაკუ. მჷპტყჷნე,
Line of edition: 14    ჴელტრა̈შ ხეხლი, ეჯი ლი. გიმ ქა ლჷჯელვაქა ირი ა ტელაფჟი ი
Line of edition: 15    ეჯკა̈ლიბ ლჷფცარაჟი, წყილია̈ნ მოდე ირი, მოლაგვაშვ ჷრშიხ ი
Line of edition: 16    ლეპტყჷნა მა̈ტყს ეჩეჟი ა̈დისგხ. მჷპტყჷნე ლესგხენლისგა ხესგვრი,
Line of edition: 17    შილისგა ლაპტყჷნა̈რ ხუღვე, ეჯი ფხულაცა̈ლ ღეთ მეგრე, ჴემდშალ
Line of edition: 18    მენკვე ლი ი, ტკჷჩ. მოდმა ლი, ეჯჟი ლჷბა̈რ ხა̈ბ. ა ლაპტყჷნა̈რს
Line of edition: 19    ზურალ ლერთან შივშვ ნენსგაქა ხაბურგა, მატყვ ისგა ხა̈გნე, ეჯჟი
Line of edition: 20    ლჷბა̈რს ქოხბიდ ნენსგაქა ლერსგვან შივშვ ი ეჯშელდუნ ისგა ხა̈ფშვდე.
Line of edition: 21    ლჷბა̈რ მატყვ ხოვხენი, მიჩეშთე ისგა იშდე ი ნეწვიდს, ეჯკა̈ლიბ
Line of edition: 22    ხოლა მეგრე მა̈ ხეჩიდი, ეჯის ქა ითში. კვირკვს ქაკვანე ი,
Line of edition: 23    სურუ ნეწვიდ მა̈ ირი, ეჯის ლჷბა̈რ მოლა-მოლაჟი იჩონთე, ა̈მის
Line of edition: 24    დრევნ ი დრევნ შის ხა̈ჭმინეხ ი ლჷბა̈რს ქა ხა̈ღრეხ, ლაპტყჷნა̈რს
Line of edition: 25    მავინ ესერ ხარ, ეჯღა.

Line of edition: 26       ჩუ ლჷპტყჷნა მა̈ტყს ჩუ ლიფთი ხაკუ ლა̈ფთირშვ, ეჲნურ დემ
Line of edition: 27    ა̈ლთეხ. მჷფთი ხეჭმენი ძიდხენლისგა ი ჩვა̈ფთი, ქუდა̈-ქუდა̈ჟი ჟ'ა̈სყი
Line of edition: 28    ი ეჩქანღვე სერ ლილთე გარ ხაკუ.

Line of edition: 29       ლჷლეთ ქიპს, ჩუ ლენჩრე ლახ მოდმა ხარხ, ჩერია̈რხენქა ქა
Line of edition: 30    ითვდიხ, მოდეი ჩუ ლენჩრა მახად ხჷჭმენიხ ი ჲარვ ფას აშვ ფად ტიხეხ,
Line of edition: 31    ლჷნჩრე ეჩქას ლი (კულიჲაქიშ ჩუ ლინჩრე ხოშა ბა̈ლს ჟიბავ
Line of edition: 32    ხა̈მთქვახ ჯვინალჷნდირ). თოდა̈რს ჰა̈კფა̈რდ ა̈სყიხ ი ეჯჲა̈რს ქაშყვდიხ
Line of edition: 33    ი ეჩქანღვე ჟი იხინჭლა̈ვიხ. ჟი ნა̈ხინჭლავს ქა ფიშვდეხ ი
Line of edition: 34    ეჩქანღვე სერ ჟ'აღბა̈ბიხ. ხოშა კულიჲაქ ღჷბბა̈რი ხოშა ლიხ შელდდ
Line of edition: 35    ი ნასრულან.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.