TITUS
Svan Prose Texts II (Lower Bal)
Part No. 166
Previous part

Text: 166 
Page of edition: 306 
Line of edition: 1 
CLXVI. ლიჯიშ


Line of edition: 2       ლა̈ჯიშ ლა̈დეღ ლა̈ჯშა̈რიშ მესგვრა ლა̈ჯშა̈რ ჟი ლუვღვინე ხარ,
Line of edition: 3    ლეჯიშ მა̈ ხარ, ეჯი ლელჯვმა̈რ-ლა̈ცხნირქა ქა ლუცუე ხარ, ეჯჷნქა
Line of edition: 4    სდუგვდ ხარ ჟი მჷსყე. ლელჯვმა̈რ ი ლა̈ცხნირ ჟი ხორკახ, ჟიფშხენჩუ
Line of edition: 5    თა̈კულდა̈რ ლიხ მეფშვდე, ეჯჲა̈რდ ი ჩუქა აჴა̈რ ლჷგ, ეჲთელისგა
Line of edition: 6    ხომწვინა. მგჯიშს უღვახენ სკა̈მ ხოგ ი ისგა ხასგურ. ლეჯიშიშ
Line of edition: 7    ლათხა̈შ ქიპ მა̈გ უღვას ხაჯანგა ისგა. ლელჯვმარა̈რს სა̈ფჴალა̈რ
Line of edition: 8    ხა̈ბხ ჩუბავ. ეჯჲა̈რქა, მჷჯიშ ჲერვა̈ ლი, ეჯის ჭჷშხა̈რ ხოგ ქა. მარქვს
Line of edition: 9    მასჷლ ქა ლჷმსჷლე ისგა ხოზ ი სერ ლიჯიშს ა̈ნბინისგ, ეჯი გარ
Line of edition: 10    ხაკუ.

Line of edition: 11       ლა̈ჯშა̈რიშ მესგვრე სა̈ფჴა̈ლს აშვ ჭჷშხ ჟ'ესვთილე ი აშვ ლელჯვმა̈რქა
Line of edition: 12    ლუცუე ქიპ მა̈გ ჩუბავ ხედა̈წყი. ეჩქას მჯჷიშ ჰალყ ქიპა̈რქა
Line of edition: 13    ლერსგვან შივშვ მარქვს ქავზე ი მასლიშ ქიპს გა̈ნჟი ისგაი ხა̈მგვე,
Line of edition: 14    მერმა ჭჷშხშვ მერმა სა̈ფჴა̈ლს ხოჯვირი ჩუ ი მა̈ნკვიშ. ჭჷშხშვ
Line of edition: 15    ლელჯვმა̈რს ჟი ფიშვდე. მერმე ჭჷშხემ ჟი ნა̈თილვჟი მერმე ლელჯვმა̈რ
Line of edition: 16    ხეცა̈დი ჩუ ი ლათხა ქიპა̈რი ყა̈რშალ იგნიხ მერმად. მჷჯიშ
Line of edition: 17    მარქვს ღეშდ ხა̈ტხე ი ქიპს გა̈ნს მერმათე ქა̈ისგ, ეჩქას დაფა̈რს
Line of edition: 18    ხოისგ შია̈რს ი მიჩეშთე იყერ, ლა̈ჯიშ ქიპა̈რ უშხვარ ესერ ლა̈ხსკებნიხ,
Line of edition: 19    ეჯღა. ამჟი იბნე ი ქა ხაჭყრენი ეჩქანღვე ლიჯიშს, ლა̈ჯშა̈რს
Line of edition: 20    მესგვრე ჲერვა̈ ლი, ეჯი. ჭჷშხა̈რს ხა̈სდ ი ხა̈სდ ხოცადუნე,
Line of edition: 21    ჟიქა მარქვს ხაჴალუნე ეშ ი აშ, ეჯშელდუნ დაფა̈რს ისგა იყერ ურინ
Line of edition: 22    ღეთ. ა̈ლი მა̈გ ხოჩამდ ჟი ლუმსურე ხარ, ისგა ხოსყა ი თერრე
Line of edition: 23    ლიღვჭინეი დემეგ ხაკუ, ნა̈ჯიშვ ხემ' ეჯჟი იცხემ. მჷმსჷლი ლას ისგა
Line of edition: 24    ხასგურ ი ჲორი ღეთ მარქვ ეჯღა̈ი ხუღვე, ქა ნაჰარვს ქაკვანე ი
Line of edition: 25    მიჩ ჟი გეშის ხოცა̈დიხ. შომა̈ უღვა̈შ ლაჭენიცა̈ლ ხარ ლჷჯიშ, ლა̈ჯშა̈რს
Line of edition: 26    მესგვრე ქა იჭენი ი ეჯცა̈ლს ქიპს ხა̈ფშვდეხ ქა სდუგვხენქა.
Line of edition: 27    ეშვი ისგა ხედა̈წყი ხოჩამდ, ეჩქანღვე მჷჯიშ ქა ლჷთმარე ხაშდბა ი ქა
Line of edition: 28    ლიქეხ ხიზვრა ხა̈მთქვა, ეჯგვა̈რს ხეჰია̈ლ.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.