TITUS
Svan Prose Texts II (Lower Bal)
Part No. 172
Previous part

Text: 172 
Page of edition: 309 
Line of edition: 27 
CLXXII და̈ვრე ლიპრისდა̈ლ


Line of edition: 28       ლჷმყა̈ვ მეზგად მოდე ჯიხალა ი ზურალ ესლეჩა ლექერს ი ღვაჟა̈რდ
Line of edition: 29    მოდე ლოხგვავა. ზურალ ლექერს ისგა ხა̈სგვრენა ი, ნა̈ ლიყვნა̈ლს
Line of edition: 30    ლჷყლედ, ეჯ დრევქა და̈ვ ლახგენა ყორს.

Page of edition: 310 
Line of edition: 1       -- ხოჩ' ესეროვ ლეთ ხარ ხოჩა ზურალს!

Line of edition: 2       ა̈მის ათყავნივ ღალ, მარე და̈ვ ყორხენ ა̈რი ი მა̈ ჩემნეს. და̈ვ
Line of edition: 3    გუდ ახჴედ', ერე ზურალს ათყავნივ. იმღა დემ ოხჴედნივ: ჰარა̈კდ
Line of edition: 4    ზი: და̈ვ გუდმეცა̈რ.

Line of edition: 5       -- იმდ ესერ ხაყლუნი? ჯი ესერი ზურალ ლი ი ჯი ესერი. გეზალ
Line of edition: 6    ესერ ხარ ლეპრისდი ი ეჩა ლა̈პრისდალთ' ესერ ა̈ისგ. მიჩ ესერ
Line of edition: 7    ნემნა̈რ ესერ ხაყლუნი, გეზლა̈შ ესერ მჷპრისდი ხარ.

Line of edition: 8       -- ლექვრიშ ესერ გონა̈ბ (\ ბუნა̈ბ) ხარ, -- ზურალდ ესვცა̈დ.

Line of edition: 9       -- ეჯღ' ესერ ნომოვ ხარ.

Line of edition: 10       ა̈ლი ლექვრიშ ყორქა ქანჴა̈დ, ეჩქას და̈ვდ მიჩა ლერსგენ ჭიშხ
Line of edition: 11    აცვირ ღეშდ.

Line of edition: 12       ათხე ისგა ლა̈ჲჴერნე ი ჟიბ, იმჷვალე კოჯ ხარ, ეჲთელისგა
Line of edition: 13    ლა̈ჲჴერნე ა ზურალ. მინე ლარდა ეჩელისგა ლჷმა̈რ. თხუმ პაპ
Line of edition: 14    ხოჟეღხ ი ა̈ნბინეხ და̈ვა̈რდ ლიჴედ ი ჟ'ა̈ნგერშლან მინე ლარდა
Line of edition: 15    და̈ვა̈რშვ.

Line of edition: 16       მინე წესჟი ლიპრისდა̈ლ ჩვაჩვმინხ ი კოტოშვ ხოგხ მოლეგეშ
Line of edition: 17    ლეღვ ისგა ი მინე კა-კერა̈ქა ეშვი სემი დირილდ ლახდეხ.

Line of edition: 18       და̈ვ ზურალს ჩუ ლუშგურანე ხარ ა მჷლქერი ზურალ, ერე
Line of edition: 19    "ეჯგვა̈რ ესერ მ' ახჭარჟახ, ამგვა̈რ მ' ახჭარჟახ, ნომაგეშოვ იკვდუნე
Line of edition: 20    ღვარჩინჷნქა".

Line of edition: 21       ათხე ა̈ჲრა̈ყს ჷთრეხ, იმზირხ ი -- ლეპრისდი ი მჷპრისდი
Line of edition: 22    უშხვარ ესეროვ ლახმეჩენახ! -- ა̈მის გარ იმზირხ ი თან-ნა̈თსა̈ვს დეშ
Line of edition: 23    ხა̈ჩდინეხ.

Line of edition: 24       ათხე ესხრიხ ი: "ჩიდ ესერ ჟჷრდ მა̈ ხოცხა?" ა მჷლქერი ზურალს
Line of edition: 25    ლა̈ხჭედივხ ი: "მიჩ ესერ, ჲა̈ღვე, ზურალ ესერ მა̈რე ლიზ ი ჩიდ
Line of edition: 26    ესერ ღვარჩნილ ხოცხა".

Line of edition: 27       ა̈ლი ქა ლახემხ. ა და̈ვ ზურალ ისგად ლოხჴერიჭ ი ლექერმიყჷდ
Line of edition: 28    ესგენე.

Line of edition: 29       -- ა, მიჩა სვინა̈, ათხოვ ა̈დსგიდივ ლექერთელისგა!
Line of edition: 30    ა̈დსგიდივხ ამთელისგა ი შიროლ დემეგ ხოწვახ ჟი ი ფექ ყა̈რს
Line of edition: 31    ხაბიკ ჟი ი: -- 'ა, ფუე 'სერ ფექ ლექერლისგა!

Line of edition: 32       -- ათხე ლეჟოვ აჩა̈დ ქორთე, ჴანა̈რ, ჲორი ლესეს, ა სემი უღვა,
Line of edition: 33    ლექვ'ოვ ანჴიდხ ი ჯინემ კიბდენოვ ჟ'ანმარე ქორს, ღვარჩინ ეჯისოვ
Line of edition: 34    ესვნა̈ხ ჩუქა. ა̈ლის ამაჯახოვ. ქორშა̈რ ჩოვ ადშგურანე, ერე
Line of edition: 35    ნომაგეშოვ ლა̈ხქადხ, იკადვხოვ ი ა̈ისგვხ, ეჯჷნქა: ა̈ლი ესერ ჩოვ
Line of edition: 36    ა̈დგიჭ მა̈გ. ლჷხა̈ლჷნქა უხლა ნა̈როვ ანფიშვდხ ლექერთ', ოდო
Line of edition: 37    უხლას ესერ მოლე ხექვი ი ხოლ' ესერ ლიზ.

Page of edition: 311 
Line of edition: 1       ლეჟ' აჩა̈დ ზურალ ი სემი უღვა ჴანა̈რ ანვიღვნეხ ი ლექვა ი
Line of edition: 2    ა̈ლჲა̈რს ლემბა̈ჟდ ოხჴა̈დხ, მარე ჩუ ლუშგურანე ლიხ ი იმ რექინახ,
Line of edition: 3    მინე ხოლა ხეკვდენივხა? მარე ესნერი ბეფშ ახღეჭახ ღეშგიმხენლისგა.
Line of edition: 4    სემი ლეჟა ლჷე ხა̈რენახ ი ლექერს ნა̈ბირვ დემეგჷდ ხა̈რენა. ამჟი ა
Line of edition: 5    ბეფშ ახღეჭახ ი შია̈რ ხოყირა ფშხვარდ ი:."ფექ ესერ
Line of edition: 6    ქა̈მჩუ ანღრი, ფექ! შჷლ გარ ესერ ათღანა ი შიროლ ესერ ჟ'ახშყიბენახ
Line of edition: 7    ი ფექ ისგესჩემა (\ ისგესთქეშა).

Line of edition: 8       ეჯ მეზგა ახბჷდახ ღალ ესერ ი, ჟი ესერ ხა̈ბდენახ, ეჩქას ყვისგ
Line of edition: 9    ესერ ათღანა მოლაგვაშვ ი ყა̈რა̈შ ზეგჷრჟი ესერ ოხსკინა, ხემა მჷხირ
Line of edition: 10    მუტვა̈რ, ამჟი. ხემ' ესერ ნამპა̈რ მუტვა̈რ, ამჟი ესერ ელმა̈ზ-ელმა̈ზ
Line of edition: 11    ი მა̈ კოჯხენქა ა̈ლი (ჲღვარჩინ) ოხჴიდახ, ეჯ კოჯს ესერ
Line of edition: 12    ლახდეგა ისგა.

Line of edition: 13       სერ ეჯგიშ ხოჩა მა̈გ ისგვა სგებინ ი ხოლა მა̈გ მჷქა̈ბიოვ ჯარ.


Line of edition: 14 
ალი დავითიანი. ქვედა ლახამილა. მ.ქალდანი. 7.VIII.1953



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.