TITUS
Svan Prose Texts II (Lower Bal)
Part No. 173
Previous part

Text: 173 
Page of edition: 311 
Line of edition: 15 
CLXXIII მჷლხამლი ბეგა


Line of edition: 16 
1


Line of edition: 17       ბევა მიჩა დის ჯი გარ ხა̈რდენა ი მერჩილს ისგა ხა̈ბორგოვნა,
Line of edition: 18    ეჯთექა მეჴდე ლალმა̈ჰია ლჷმა̈რ. აშვ ლა̈დეღ ლა̈ჭმათე ოლმარელი
Line of edition: 19    ი მიჩა დის ლეზებ ლჷმარე ლოჰოდა. ბევა ბოგთეჩუ ჩომჩედ ი
Line of edition: 20    ჭალა̈ხენჟი მოლაგვაშვ ხოქვა: "ბევა, ხა̈იდ ესერ ი ლეზებოღვ ხამნე".
Line of edition: 21    ბევას მიჩა ლევიზ ჩოთკვარა ბოგა̈შ ხუნჩუ ი ჯი ეჲ ლა̈დეღ მჷტმად
Line of edition: 22    ლჷმჭემნელი, ნებოზს მიჩა დიცახა̈ნ ქა მოდმა ლოხკვიშა.

Line of edition: 23       მერმა ლა̈დეღ ელმა̈ზჷდ ლულვიზდ ი მაფუახენჟი ახსჷმაჷდ: "ბევა,
Line of edition: 24    ხა̈იდ ესერ ი ლეზებოღვ ხამნე". ბევას ჩვად ოთკვარა მიჩა ლევიზ ი
Line of edition: 25    ჯი ჰამუნღვე ნებოზდ მჷტმადჷდ ლჷმქემნელი. მიჩა დის ქა
Line of edition: 26    მოდეჷდ ლახკეშა.

Line of edition: 27       მესმა ლა̈დეღ ამჟიად ახსჷმა ი მესდე დია̈რ ჩვად ოთკვარა, ეჩქას
Line of edition: 28    ლჷცხენჟი ე მოლაგვაშვ ხოქვა: -- ბევა, ლახ ესერ მიჩა ნა̈ჰერვ ჩოთმაჴდა,
Line of edition: 29    ჯინემოღვი ხაჰერ, მ' ესერ ხეცხენი, ეჯის ესერ ხეჩო.

Line of edition: 30       ბევას ესვცადა ჟიქა: -- ლახ ესერ ამგვა̈რ ჟჷრს ხემედა̈ლ, მეპერიშ
Line of edition: 31    ი ქვინლჷმგენემ ნინოღვ ახთონე!

Line of edition: 32       -- ბევა, სურუ ესერ ხოჰრა, დეშ ესერ ასრულე ეჯის ი ეჩა მჷქაფდ
Line of edition: 33    იშგენოღვ იჰერ.

Line of edition: 34       -- იშგენ ესერ მოდმაგეშ ხაკუ ი ჩვ ესერი ამჴა̈დი, -- ქა ლა̈ჲმედე
Line of edition: 35    ბევად.

Page of edition: 312 
Line of edition: 1       -- ჲა̈ღვე, ხოხალდ ესეროღვ მეპერიშ ი ქვინლჷმგენემ ნინ, მარე
Line of edition: 2    ქ' ესერ ემეგ ლა̈ჲკუშეს მიჩა ნაქვდ, ეჯ ლა̈დღიშ ესერ მედგაროღვ
Line of edition: 3    ლი.

Line of edition: 4       ამჟი ჰერი ჩომქეც ი ბევაი ომჩედ ლა̈ჭმათე.

Line of edition: 5       ისგლა̈დლიშ ვონაქა ბევა ჩოლყვინ ლარალისგა ჴაბვ ი დეცს
Line of edition: 6    ხა̈მკვირნა ჟიბავ. დეც ლეჟა ჲორი მეშხე მეპერ ოლმა̈ზხ ი ღეშგმეს
Line of edition: 7    ხოქვა სგებნედ: -- დია, ეჲე, ამსოლდ ესერ ივჟე ლარალისგა, ჩვ ესერ
Line of edition: 8    ღჷრი ასწვა̈მ, თერა̈რს ესერ ქა ხოკედ ი ეჩქად ჯი ჩოღვ ესვღელივ.

Line of edition: 9       -- ნომოღვ აჩა̈დ, დია̈შ თერაჯონ, ოდო ამსოლდ ესერ მა̈ბგა̈რ
Line of edition: 10    ლი ი ჩვ ესერ ემეგ ადჷრმინე, მ' ესერ ხეშდენი.

Line of edition: 11       ბევას ქა ხესმი ა ჭერრე რაგა̈დ ი, შომა̈ ღეშგმე ჩვა̈ხყვალ, ეჩქას
Line of edition: 12    ჯინემ თერა̈რ უშხვარჟი ესთხიფ. ჭერდ ჩვა̈ნწულინე ი ბევა̈შ
Line of edition: 13    ჭჷშხა̈რმიყ ესაგან, ლაჲსჷნჯავე ი მევჟე ლახთირ, ეჩქას ჴადვ ლეჟა
Line of edition: 14    ლეჟ' ესაგან თერა̈რთე. ბევად ისგა ხა̈ფხეჭ ი ჩვადირმ.

Line of edition: 15       -- დია, ამსოლდს ესერ ჩოთხორმა, ლა̈ხშადოღვ მოლოვშვ! --
Line of edition: 16    ლა̈ხშჷმ ჭერ მიჩა დის ჩვიფშხენჟი.

Line of edition: 17       -- ქ' ესერ მოდე ხოქვაჲა, ერე ამსოლდ ესერ მა̈ბგა̈რ ლი, ათხე
Line of edition: 18    ადა̈იდ ამსოლდჷდ ესერ ედე ა̈დმა̈დლი, მიჩ ესერ მა̈შედ მა̈ ხობცა, --
Line of edition: 19    ესვტიხ მიჩა დიდ ა ლჷრმ ჭერს ჟიფშხენჩუ.
Line of edition: 20    ბევად ქაფიშვდ ი ჭერ ლა̈ჰერალშვ აჩა̈დ მიჩა დიეშთე: "მიჩ ესერ
Line of edition: 21    მა̈დილოღვ ხარ ამსოლდს!".


Line of edition: 22 
2


Line of edition: 23       ბევა ქომკეჰ სოფელლისგა ხოჩამშვ. ხოშა ი ხოხვრა მა̈გ მუჴვა̈მი
Line of edition: 24    ხა̈რენა. ხოშამ გეზალშალ ხა̈ბჟენა ჩი, ცა̈ლ მა̈გ მუხვბაშალ ხა̈ბურგენა
Line of edition: 25    ი ჯია̈ი ხოჩამ გარ ხა̈ჩმუნა ჩი.

Line of edition: 26       აშვ დრევჟი ბევა ლა̈თხვართე ომჩედ ი ღვაშა̈შ ჯეგს ათთხანენა.
Line of edition: 27    ბევა ისგა̈ხი ათჴესგა ღვაშა̈რს, გუ ხაჰვდუნა, ეჯჷნქა ჰა̈ვეჯ
Line of edition: 28    დემეგ ოთჰა̈ვჯა. ქა უბა̈ჟინა ღვაშა̈რ მინე .ნა̈ბჟი ლჷმა̈რდხ ი კოჯრე
Line of edition: 29    სოტა̈რხენჩუ ჟვანა̈რ ხა̈შეპინალახ ლაცადუნოშვ. ეშვი ჟვა̈ნ
Line of edition: 30    ლახშჷმა მერმა: "ხოსგდი ესერ მაუა, აფსათა̈შ ჯეგ ლჷშიდბუნად
Line of edition: 31    ა̈რი, ეჯის. ჟიქა, მინე უშხვარ ნენსგა სალაზს, და̈შდვ ესერ
Line of edition: 32    ხალიჩ ი მ' ესერ ხეჩენი, ჟი ლა̈ხდიხ, ეჩქას აცლჷრე ესერ".

Line of edition: 33       ჟვა̈ნ ჟვა̈ნს ხემშერა̈ლ, ა̈ლი ბევას აშ ხესმი, მარე ლა̈თიალ დემთე
Line of edition: 34    ხარ. სა̈ნგეჭვ კოჯა̈რთელისგა სა̈ცრავ დემხენ ლი ი დეი და̈შდვს
Line of edition: 35    ხოსგდი ქა: თეფს ადკვანე ი ღვაშრე სოლა ლიფურთინა̈ლდ ხაყვლუნი
Line of edition: 36    ი ლატვთე ლავარჟი და̈შდვს ხედიხ ჴარჴთეჟი. ჩვა̈რი ამჟი
Line of edition: 37    ბევა ი აშუნღვე ღვაშა̈რი ანჷგანხ, აშვ ფად ლა̈ჲძგარალეს, მერმა
Page of edition: 313  Line of edition: 1    ფად ლა̈ჲრეწვალეხ ი ამჟი ლჷშიდბუნად ჟ'ათაგანხ სალაზჟი.
Line of edition: 2    და̈შდვდ თხუმ მჷჟეღ მაშენ ღვაშ ჟ'აფიშვდ ი ეჩა მეჭემს ქა ლა̈ხშდორ.
Line of edition: 3    ა̈მის გვი ახემხ ღეშგიმ მეჭმად ი ლატვს ათშჷდხ მინე-მინეშჟი.
Line of edition: 4    და̈შდვ ი ღვაშ აშვდ ანშყა̈დხ ქჷრფა̈რჩუ. ჩუქა და̈შდვ ჟ'ანჷგან ი
Line of edition: 5    ბევა ა̈მეჩუ ა̈რი, ა̈მიშ ქვინ იყირ, ადმურღვნინე, ათჭათე ი ლატვთ'
Line of edition: 6    აჩა̈დ.

Line of edition: 7       ბევა ჟ'ა̈ჩა̈დ ღვაშთეჟი ი მაჟჷრშვ ხიარ ლიგვნი ა̈დბინე, ჟ'ა̈თფორცხან
Line of edition: 8    სოტა̈რჟი, მჷჭა̈რ ჟ'ა̈ნთხე ი ჩვანჴიდ ღვაშთეჩუ. ა̈მეჩუ
Line of edition: 9    ღვაშ ქადტუმურე ი ლეღვა̈რ ისგა̈დმაჯე ლასღგომ ფოქთელისგა.
Line of edition: 10    ჩვა̈რი ბა̈ზი ა̈მეჩუ ი მუბვრა̈შდ ჲორი ცხჷმრა̈რ ანჴა̈დხ, მეთხვრა.
Line of edition: 11    ა̈ლჲა̈რ ჰა̈რი ლიხ ი ქა მოდმა ხოთხვარახ. ბევა̈შ ღვაშს ლახა ხეწადხ,
Line of edition: 12    ოხვმეზრეხ მეთხვა̈რიშ წესჟი: "ფა̈თვიშ შელდდ ესეროღვ
Line of edition: 13    ათგენენა!" მეთხვრას მა̈ ხოხალხ, ღვაშ ბევა̈შ ნადგარვ მოდმა ლი,
Line of edition: 14    ეჯი ი ბევაი ქა იმ ლა̈ხკეშნივ, თეფ დემეგ ხოკვრა ეჯის.

Line of edition: 15       ჩვა̈რიხ ბა̈ზი ი ხარხ რაგა̈დ. ბევა ითია̈ლ, ცხჷმრა̈რ დემ ა̈დზე
Line of edition: 16    ლა̈ლისგხ, ეჯის. ხაყვლუნი, ღვაშა̈შ ჯეგს ესერ ნემეგ ა̈თთხანენეხ.
Line of edition: 17    ხოშილ ლი მჷცხმა̈რი, ა̈მის ოხოგან: "მოდმ' ესერ ირია, ა ღვაშს
Line of edition: 18    ჩვა̈დჷთა̈ლისგხ სამდ ი იზნიხ ესერ ქორთე, მჷკხა̈შ ღვაშ სამ მარა
Line of edition: 19    გვა̈მიდ ესერ აქფი".

Line of edition: 20       ქოხჴა̈დ ლალმა̈გნა მჷცხმა̈რი ი მაჴვამ ხა̈ქვ: -- მ' ესერ ლეზელა̈ლს
Line of edition: 21    დემის ხეჩო.

Line of edition: 22       ბევა ი მიჩა აფხნეგა̈რ მერმა ლა̈დეღ ანღჷრდხ ლა̈თხვარხენ, ეჯჟი
Line of edition: 23    ე ღვაშა̈შ ჯეგ ხვანა̈გ ლეჟა ქა ლჷჭარად ესღჷრდ მჷჟემ ლირკა̈ლქა.
Line of edition: 24    მჷცხმა̈რი ლალმა̈ჰიად თერა̈რ ქა ლახცვირ, ლიღეჭ ლახპირე,
Line of edition: 25    მარე ხოშემ ნაქვ დეშ ანჟომე ი, ვოდდე ღვაშა̈რ ისგა ლა̈ხთვაფხ,
Line of edition: 26    ხოსგდივ ლა̈გნახენქა. შუკვლაყვალს ცხჷმრა̈რ მინე ფოყთ' აჩა̈დხ
Line of edition: 27    ი ბევა ქორთ' ანჴა̈დ. სოფელს მა̈ წეს ხად, ეჯჟი ბევასი ჟი ლეთა̈ლი
Line of edition: 28    ხად ნა̈თხვრა სოფელდ, მარე თეფიშ მჷბემ ღვაჟმარე და̈რ
Line of edition: 29    ესხვიდ ქორს ი სერ ლეღვ კვა̈მჟი ადჴჷდჷრე.

Line of edition: 30       ბევა მიჩა დის ლა̈ხჭედივ: -- სოფლიშ ღვაჟმარე მ' ესერ ომდენ?

Line of edition: 31       მიჩა დიდ ქოხუმბავე: -- სოფელ ესერ სალშგართე ომჩედ უსურმა̈ნთე
Line of edition: 32    ი ამბა̈ვ ესერ ოთცვირახ: "ბევ'ოღვ ნომ' ანჴა̈დ, ქორსოღვ
Line of edition: 33    არდ ი, მ' ესერ მინს ხერიხ ნალშგარვ, ეჯი ესერ ხარ ბაც".

Line of edition: 34       ა̈ლი ბევად ა̈დსისტკე ი მიჩა დის ხა̈ქვ: -- ჯ' ესერი ღჷრი ი ლე.
Line of edition: 35    ვიზოღვ ოხმარე!

Line of edition: 36       მიჩა დიდ სემი ქუთ ოხვნაყე, ა̈ლჲა̈რ შედთ' ესდე, ჟი ლა̈იცვ ი
Line of edition: 37    აჩა̈დ. ხვა̈ლმიშთექა ქანჴა̈დ ი ა̈მეჩუ შუკვქა ჰერწემ აყვრა ხოშა:
Line of edition: 38    -- ბევა, ხა̈იდ ესერ ი ლეზებოღვ ხამნე! -- ი ჰერწემდ ვიშკ ჩვადკარე.
Page of edition: 314  Line of edition: 1    ბევად ეშვი ქუთ ჟ'ა̈ნკიდ ი ჩვესვდე. ჯი ანღრი ჟი თავრა̈რთეჟი ი
Line of edition: 2    ა̈მეჩუ შუკვლისგა ხოშა ჰერწემჷდ აყვრე. აბნემი ჩქადკარე ვიშკ ი
Line of edition: 3    ხა̈ქვ: -- ბევა, ხა̈იდ ესერ ი ლეზებოღვ ხამნე! -- ბევად მერმე დია̈რ
Line of edition: 4    ა̈მის ესვდე. ანღრი ი ლა̈შხრა̈შხენლისგა ისგა ლა̈სპა ლი მურჰვიშთე,
Line of edition: 5    ა̈მეჩუ ჰერწემჷდ აყვრე შუკვქა ი ამნემი ხა̈ქვ: -- ბევა, ხა̈იდ ესერ,

Line of edition: 6       -- ბევად მესმე ქუთ ჟ'ა̈ნკიდ ი ა ჰერწემს ესვდე. ჯი ლევზურ ასა̈დ.

Line of edition: 7       ანღრი ბევა ტვიბ ლეჟა ი ლა̈ჲშემ წიფრა ჩუქა. წიფრაჟი კვინჩ
Line of edition: 8    ლახაგან ი მერმა კვინჩს ხა̈ქვ: -- ლახმჷლ ლაშგა̈რ ესერ ანღრი ტვიბს
Line of edition: 9    ი ეჯზჷ ესერ ქვინლჷმგენე ახყა, ერე გიმ ესერ ქუთნი, მარე ეშვი
Line of edition: 10    ესერ მჷკლი მესტულ ოთცვირახ დერაჟი, ეჯნა̈რ ესერ, მ' ახყახ, ეჯი
Line of edition: 11    ჯეგ მა̈გ დეშ ხა̈ჯეშ. ეჯის ლედ' ესერ ხოზ ჴადვლისგა.

Line of edition: 12       ბევა ჟ'ანჷგან ი ესხრი, ამჟი, ხოშა ტვიბ დეშ ისკდუნე, ეჯი ჯეგ
Line of edition: 13    ახყახ მიჩა სოფლა̈რს.

Line of edition: 14       -- ბევა, მიჩ ესერ მა̈ ხა̈კვდენა ა̈მელეჟა? მიჩა ნა̈თი მინს ესერ
Line of edition: 15    ახყახ ი აშ ესერ ხა̈თშუნეხ.

Line of edition: 16       ბევად მაჴვამ ხა̈ქვ ი ლა̈ხჭედივ: -- ათსედახ ესერ მა̈ჲა ღეშდ?

Line of edition: 17       სოფლა̈რდ ქოხუმბავეხ: -- ხოჩ' ესერ შვიდობდ ახყახ მა̈გ ი ეშვი
Line of edition: 18    ესერ მჷკლი მესტულ ათსედახ ხანსარჟი, მარე ეჯის ლეჴდად ესერ
Line of edition: 19    დემეგ ხაყა.

Line of edition: 20       ბევად ესვცა̈დ: -- ჲა̈ღვე, ეჯის ესერ ჯი ჴიდე ი სერ ნა̈თიოღვ
Line of edition: 21    ნომ' ესვგენეხ.

Line of edition: 22       ა̈ლი სოფლა̈რდ ლაცვდ გარ ესყედნეხ, მარე, ბევა ლახა მიჩას
Line of edition: 23    ხაგან, თანახმათე ოხჴა̈დხ: -- ჲა̈ღვე ეზერ ესერ, აჩა̈დოღვ ე მესტავთე,
Line of edition: 24    ეჯიოღვი მიჩ ხად ი ნა̈თი ესერ ეჯღა̈ჲ ბაც ხარ.

Line of edition: 25       ბევა̈შ ხოჩა ლიზგე ქაკვა̈ჰ ჩითე. ე მესტვა̈შ ფხოტლა̈ნ მაღვნა̈შ
Line of edition: 26    ლედე ლჷმა̈რ ი ქორლისგა ხოჩერება აშ ხოჰრჷნ. მეჴედ მა̈რე უქვიცდ
Line of edition: 27    ახა̈ზივ ი ქა ბერა ისგა ქემად ხესპივ. ბევა ქა̈დჩიჟან ი სოფელს
Line of edition: 28    აშვ შიჟი ხა̈ხდჷნ, ჲეხვ ღანავ ხად, ეჯი.

Line of edition: 29       აშვ ლა̈დეღ მიჩა ჲეხვ წირვთე ესვჴერივ ი ჩაჟვდ ხოსგურდ, ჯი
Line of edition: 30    თხუმ ხოჟოღ ი ჩაჟვ სა̈ბელ ღეშგიმ ხეჭამ.

Line of edition: 31       -- დია, ჩოღვ ესვღელივ, ოდო ახფეშ' ესერ, -- ლა̈ხშჷმ სა̈ბელ
Line of edition: 32    ღეშგიმხენლისგა.

Line of edition: 33       -- დიაჯო, ჯი ჰა̈შთქ' ესერ ლი ი ღანავ ზურალი ჟი ხასგურ, მიჩ
Line of edition: 34    ესერჷდ ახფეშა ეჰე, არდოღვ ი დემის ესერ ხეღლენი.

Line of edition: 35       ბევას ქათსჷმდ ა̈ლი ი ლიცვ ოთთხა̈რ.

Line of edition: 36       -- იმღ' ესერ იცვნა̈ლ? -- ლა̈ხჭედივ მიჩა ჲეხვ ჩაჟვხენჩუ.

Line of edition: 37       ბევა ქა იმ ლა̈ხკეშნივ: -- დემღ' ესერ, ამჟი ესერ ათთხერა ლიცვ.

Page of edition: 315 
Line of edition: 1       ა̈ლი ზურალდ მოდ' ა̈დჯჷრვე ი ჰაჯს დემ ხა̈კედ: -- ქოღვ ხა̈ქვ,
Line of edition: 2    ოდო წირვთე დემ ესერ ხენჴრენი, -- ი ჩაჟვხენჩუ ჩუ ლაჴადს ლახად.
Line of edition: 3    ლახა დემთე ლა̈თიალ ხად, ბევად ხა̈ქვ: -- ეზერ ესერ, ჲა̈ღვე, წირვხენ
Line of edition: 4    ესერ ა̈ნტხენიხ, ეჩქას ესერ ქა ხოცხრი.

Line of edition: 5       ანტა̈ხხ წირვხენ ი, ჩაჟვხენჩუ ჩუა̈ი ანჴა̈დ, ზურალდ ლოხბინეჷდ
Line of edition: 6    ბევას: -- ჰა̈, ქ' ესერ მოდე ხომედაჲა, ქოღვ ხა̈ქვ ათხე, ლიცვ იმღა
Line of edition: 7    ათთხერა, ეჯი.

Line of edition: 8       -- ჲა̈ღვე ეჯღა̈ჲ ესერ ე დემის ხეყჩენი ი ხა̈ქვნე, მა̈ნკვი ლაგვან'
Line of edition: 9    ოღვ ჟ'ოხმარე ი ქ' ესერ ხექინე.

Line of edition: 10       ლახად ა ზურალ ი, ლაგვანას მა̈ ხეკვად, ა̈ლი მა̈გ ჟ'ანმარე.
Line of edition: 11    სერ ლაგვანა მჷხა̈რ ხეკვეს ათყერის ჲახვემ ი ბევა ჰამს ქა ხეკვშენი
Line of edition: 12    მეპერიშ ი ქვინლტგენემ რაგა̈დიშ ლევშდედილს.

Line of edition: 13       ბა̈ზი ჩვადყურახ აშვდ ბევა ი მიჩა ჲეხვ, ჩუ დეხედა̈შ ხევჟუნიხ:
Line of edition: 14    ზურალს ეჩა მა̈ხჲადშვ, ერე მჷხა̈რ ჰამს უცხრას ა̈ცხრი მიჩა ჭაშვხენქა,
Line of edition: 15    ბევას ღალ ეჯღა, ერე მჷხა̈რ ჰამს უკვშუნა̈შ მუკვშე ლი ი
Line of edition: 16    ჩუ მედგარ.

Line of edition: 17       ესხრი ლეთ ი ციცვ ეჯგვა̈რს იჟღამურა̈ლ, ერე დანწარებილ
Line of edition: 18    ხოკიდ მა̈გ ჟი, ხაჭიმ ქორს ი ჟღჷლი. ა̈ლი მამილდ ოთსისტკე ჟიფშხენჩუ:
Line of edition: 19    -- ციცვ, გვა̈რდ ბა̈ზი მ' ესერ ხოშა ღერმეთ ახჩედა, ლავჟას ესერ
Line of edition: 20    იმღა დემ იჩო, იმა̈შ ესერ ჟღჷლმაჟღჷლ ხარ, ჩოღვ აქვიც!

Line of edition: 21       -- ჰა, ჯი ესერ აგრა̈ი ხოლა თელიშ მამილ, ოდო მჷხა̈რ ესერ
Line of edition: 22    მინე ხოჩა ბევას მიჩა ჲეხვ უკვშუნას ხა̈კვშუნე ი ბევა ჩვ ესერ იდგა̈რი, ეჯის
Line of edition: 23    ესერ ხეგვნი ი ხეჟღამურა̈ლ, -- ესვცა̈დ ციცვდ.

Line of edition: 24       -- 'ა̈ჰ, ბევ' ესერ ჩი ხოჩა მარად ხოთრა, ეჯი დერი მოდმაგეშ
Line of edition: 25    ესერ ხა̈ხლენა. მიჩ ესერ ა̈მელექვა, ა ცხენ ლექვა, ეშდჲორი
Line of edition: 26    ჲეხვ ესერ ხოჭარა ი ჰამს ესერ, ლახა ჩვა̈მპრენიხ ი ჯი ითქილდს
Line of edition: 27    ოხვთხენე, ხოჩ' ესერ ეჯი ლესეს, მიჩა უჭვდალდ ნჷნძგ ლახთჷლეს.
Line of edition: 28    ბევას ესერ ეშვი გშვი გარ ზურალ ხორი, ეჯის ესერ დეშ აფსვდეჲა?
Line of edition: 29    ზურალ ესერ ლახა ამჟი ათშკადენა, ჰამს ქოღვ აჩა̈დ დოსდ ცხეკთე,
Line of edition: 30    ლაბორგთე ნეცინ ლესეს, ეჯი ნაკვდრესილოღვ ა̈ნქა̈ჩ ჯიჰრა̈შ,
Line of edition: 31    ქოღვ ადა̈ჲე უკვიშა ზურალ ყორთექა, ა̈დნა̈ხოღვ ჩუ ი აშოღვ აჴიდ
Line of edition: 32    ლაყარს, ერე უკვშუნა̈შ ლიკვშუნე დერი ქუნ გარ იკადვდეს.

Line of edition: 33       ბევას ა̈ლი მა̈გ ქათსჷმდ ი ხოჩილ გვი ესოსდ. ჟ'ამჷგანხ ჰამს ი
Line of edition: 34    ზურალ ლახ ისგად ა̈თშკადან, ხა̈ქვ: -- ეზერ ესერ, ჲა̈ღვე, ასწვა̈მ
Line of edition: 35    ესერ ცხეკხენ ისგა̈ნტხენი, ეჩქად ჯინემოღვ მა̈გთან ჟ'ანმარე, ქ'ე
Line of edition: 36    სერ ხექინე ჩიგვაშვ.

Line of edition: 37       ცხეკხენ ისგანტა̈ხ ი ზურალ მა̈ხჲადშვ იმეგ ა̈რი, ა̈ცხრი ათხე,
Line of edition: 38    მა̈ გუთ' ოთჩა̈დ, ეჯის. ბევად ამჟი ქა̈დჴერნე ყორთექა ქა ლა̈ქვისგთე,
Page of edition: 316  Line of edition: 1    ი ა̈მეჩუ ხა̈ფხეჭ ისგა, ა̈დნა̈ხ ჩუ ი ლოხვბინე ნაკვდრესშვ ლიყერ.
Line of edition: 2    ხატყცი, ხატყცი ი ზურალ ხეჴჷრა̈ლ: -- მა̈დილ ესერ ხერი, ბევა,
Line of edition: 3    ლა̈იდ ჩუ ნომოღვ ადგა̈რ ი ივალა̈დეღ ლერშვნიდ ესერ დემ ხორშვნი
Line of edition: 4    დემგვაშვ.


Line of edition: 5 
3


Line of edition: 6       აშუნ ბევად ა̈ნჷნდუნე: ხოჩა ლიზგე ხარ ი ვოთარს ესერ
Line of edition: 7    იკმა̈რი. ადა̈ჲე თეთნე ჴა̈ნ ი აჩა̈დ ფა̈რთე. ა̈მეჩუ ვოთარ ხოჩამდ ესხვიდ
Line of edition: 8    ი ბა̈ზი ლითრე-ლიზებ ხარხ მასა̈რდ. ჰამს ბევა სარაგთექა ანჴა̈დ
Line of edition: 9    ლაბრალთე ი კვინჩა̈რ ლახაგანხ ლა̈ჯჟი, უშხვარ აქა̈ნი ოხკიდხ,
Line of edition: 10    ეჩქანღვე აშვემ ხა̈ქვ მერმა კვინჩს: -- ჯი ესერ ლახმჷლხენ ანღრი.
Line of edition: 11    ბევა ესერ ვოთაოშერ ქორს იზბი ი ჷთრე, მიჩა ქორს ლეთი დეცთე
Line of edition: 12    კუნჭულ ესერ ხა̈ფშვდენა.

Line of edition: 13       ა̈ლი ქახსჷმდ ბევას, გუნკვაშა̈რ ისგანტა̈ხ ი ლაზთე იმარა̈ლ. ა̈ლი
Line of edition: 14    ვოთარდ ა̈დბა̈ჟ ი დემ ფიშვდე: -- იმღ' ესერ იჰია̈ლ, საჩქვა̈რღა საჩქვა̈რს
Line of edition: 15    ესერ ლაჰედნე, -- მარე ბევა დემ იჩო: -- ლეთი ქორ ესერ ათშიხენა.

Line of edition: 16       -- ბევა, ჲა̈ს ესერ ხოქვა ამჟი ურჰად, მეჴდე და̈რ ესერ ლი!

Line of edition: 17       -- კვინჩს ესერ ხოქვა, -- ქაშალ ლა̈ხქად ბევას ი აჩა̈დ. ქვანა̈შ
Line of edition: 18    ფაფალხენლისგა ხეწად ი მიჩა ქორ ისგანჩუ მეყვჩე ხად.

Line of edition: 19       -- ტაბგილ ესერ ოხღახ მოშ ქა? -- ლა̈ხშჷმ ბევა ი: -- ქესერ ოხღახ.
Line of edition: 20    ეჯი ლახ ლახტიხხ, ფაყვს ლოხბჷდ ჟიბავ ი რა̈ქვ: -- დიდა̈ბ ესეროღვ
Line of edition: 21    ათჴედა ჯგჷრა̈გ ლახმჷლა̈შს, სერ ქორღა დემის ესერ ფეშნი!


Line of edition: 22 
ჯაჯა კვანჭიანი. ალი დავითიანი. ზადა ლახამულა. VIII.1953



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.