TITUS
Rg-Veda: Rg-Veda-Samhita
Part No. 788
Previous part

Hymn: 65_(777) 
Verse: 1 
Halfverse: a    हि॒न्वन्ति॒ सूर॒मुस्र॑यः॒ स्वसा॑रो जा॒मय॒स्पति॑म् ।
   हि॒न्वन्ति॒ सूर॒मुस्र॑यः
   हि॒न्वन्ति सूर॑म् उस्र॑यः
   हि॒न्वन्ति सूर॑म् उस्र॑यः

Halfverse: b    स्वसा॑रो जा॒मय॒स्पति॑म् ।
   स्वसा॑रः जा॒मयः पति॑म् ।
   स्वसा॑रो जा॒मय॑स् पति॑म् ।

Halfverse: c    म॒हामिन्दु॑म्मही॒युवः॑ ।।
   म॒हामिन्दु॑म्मही॒युवः॑ ।।
   म॒हाम् इन्दु॑म् मही॒युवः ।।
   म॒हाम् इन्दु॑म् मही॒युवः ।।


Verse: 2 
Halfverse: a    पव॑मान रु॒चारु॑चा दे॒वो दे॒वेभ्य॒स्परि॑ ।
   पव॑मान रु॒चारु॑चा
   पव॑मान रु॒चारु॑चा
   पव॑मान रु॒चारु॑चा

Halfverse: b    दे॒वो दे॒वेभ्य॒स्परि॑ ।
   दे॒वः दे॒वेभ्यः परि ।
   दे॒वो दे॒वेभि॑यस् परि ।

Halfverse: c    विश्वा॒ वसू॒न्या वि॑श ।।
   विश्वा॑ ।!। वसू॒न्या वि॑श ।।
   विश्वा वसू॑नि आ वि॑श ।।
   विश्वा वसू॑नि आ वि॑श ।।


Verse: 3 
Halfverse: a    आ प॑वमान सुष्टु॒तिं वृ॒ष्टिं दे॒वेभ्यो॒ दुवः॑ ।
   आ प॑वमान सुष्टु॒तिं
   आ प॑वमान सुष्टु॒तिम्
   आ प॑वमान सुष्टु॒तिं

Halfverse: b    वृ॒ष्टिं दे॒वेभ्यो॒ दुवः॑ ।
   वृ॒ष्टिम् दे॒वेभ्यः दुवः ।
   वृ॒ष्टिं दे॒वेभि॑यो दुवः ।

Halfverse: c    इ॒षे प॑वस्व सं॒यत॑म् ।।
   इ॒षे प॑वस्व सं॒यत॑म् ।।
   इ॒षे प॑वस्व सं॒यत॑म् ।।
   इ॒षे प॑वस्व सं॒यत॑म् ।।


Verse: 4 
Halfverse: a    वृषा॒ ह्यसि॑ भा॒नुना॑ द्यु॒मन्तं॑ त्वा हवामहे ।
   वृषा॒ ह्यसि॑ भा॒नुना
   वृषा हि असि भा॒नुना
   वृषा हि असि भा॒नुना

Halfverse: b    द्यु॒मन्तं॑ त्वा हवामहे ।
   द्यु॒मन्त॑म् त्वा हवामहे ।
   द्यु॒मन्तं त्वा हवामहे ।

Halfverse: c    पव॑मान स्वा॒ध्यः॑ ।।
   पव॑मान स्वा॒ध्यः॑ ।।
   पव॑मान स्वा॒ध्यः ।।
   पव॑मान सुआ॒धियः ।।


Verse: 5 
Halfverse: a    आ प॑वस्व सु॒वीर्य॒म्मन्द॑मानः स्वायुध ।
   आ प॑वस्व सु॒वीर्य॑म्
   आ प॑वस्व सु॒वीर्य॑म्
   आ प॑वस्व सु॒वीरि॑यम्

Halfverse: b    मन्द॑मानः स्वायुध ।
   मन्द॑मानः स्वायुध ।
   मन्द॑मानः सुआयुध ।

Halfverse: c    इ॒हो ष्वि॑न्द॒वा ग॑हि ।।
   इ॒हो ष्वि॑न्द॒वा ग॑हि ।।
   इ॒ह उ सु इ॑न्दो आ ग॑हि ।।
   इ॒हो षु इ॑न्दव् आ ग॑हि ।।


Verse: 6 
Halfverse: a    यद॒द्भिः प॑रिषि॒च्यसे॑ मृ॒ज्यमा॑नो॒ गभ॑स्त्योः ।
   यद॒द्भिः प॑रिषि॒च्यसे
   यत् अ॒द्भिः प॑रिषि॒च्यसे
   यद् अ॒द्भिः प॑रिषि॒च्यसे

Halfverse: b    मृ॒ज्यमा॑नो॒ गभ॑स्त्योः ।
   मृ॒ज्यमा॑नः गभ॑स्त्योः ।
   मृ॒ज्यमा॑नो गभ॑स्तियोः ।

Halfverse: c    द्रुणा॑ स॒धस्थ॑मश्नुषे ।।
   द्रुणा॑ स॒धस्थ॑मश्नुषे ।।
   द्रुणा स॒धस्थ॑म् अश्नुषे ।।
   द्रुणा स॒धस्थ॑म् अश्नुषे ।।


Verse: 7 
Halfverse: a    प्र सोमा॑य व्यश्व॒वत्पव॑मानाय गायत ।
   प्र सोमा॑य व्यश्व॒वत्
   प्र सोमा॑य व्यश्व॒वत्
   प्र सोमा॑य विअश्व॒वत्

Halfverse: b    पव॑मानाय गायत ।
   पव॑मानाय गायत ।
   पव॑मानाय गायत ।

Halfverse: c    म॒हे स॒हस्र॑चक्षसे ।।
   म॒हे स॒हस्र॑चक्षसे ।।
   म॒हे स॒हस्र॑चक्षसे ।।
   म॒हे स॒हस्र॑चक्षसे ।।


Verse: 8 
Halfverse: a    यस्य॒ वर्ण॑म्मधु॒श्चुतं॒ हरिं॑ हि॒न्वन्त्यद्रि॑भिः ।
   यस्य॒ वर्ण॑म्मधु॒श्चुतं
   यस्य वर्ण॑म् मधु॒श्चुत॑म्
   यस्य वर्ण॑म् मधु॒श्चुतं

Halfverse: b    हरिं॑ हि॒न्वन्त्यद्रि॑भिः ।
   हरि॑म् हि॒न्वन्ति अद्रि॑भिः ।
   हरिं हि॒न्वन्ति अद्रि॑भिः ।

Halfverse: c    इन्दु॒मिन्द्रा॑य पी॒तये॑ ।।
   इन्दु॒मिन्द्रा॑य पी॒तये॑ ।।
   इन्दु॑म् इन्द्रा॑य पी॒तये ।।
   इन्दु॑म् इन्द्रा॑य पी॒तये ।।


Verse: 9 
Halfverse: a    तस्य॑ ते वा॒जिनो॑ व॒यं विश्वा॒ धना॑नि जि॒ग्युषः॑ ।
   तस्य॑ ते वा॒जिनो॑ व॒यं
   तस्य ते वा॒जिनः व॒यम्
   तस्य ते वा॒जिनो व॒यं

Halfverse: b    विश्वा॒ धना॑नि जि॒ग्युषः॑ ।
   विश्वा धना॑नि जि॒ग्युषः ।
   विश्वा धना॑नि जि॒ग्युषः ।

Halfverse: c    स॑खि॒त्वमा वृ॑णीमहे ।।
   स॑खि॒त्वमा वृ॑णीमहे ।।
   स॑खि॒त्वम् आ वृ॑णीमहे ।।
   स॑खि॒त्वम् आ वृ॑णीमहे ।।


Verse: 10 
Halfverse: a    वृषा॑ पवस्व॒ धार॑या म॒रुत्व॑ते च मत्स॒रः ।
   वृषा॑ पवस्व॒ धार॑या
   वृषा पवस्व धार॑या
   वृषा पवस्व धार॑या

Halfverse: b    म॒रुत्व॑ते च मत्स॒रः ।
   म॒रुत्व॑ते च मत्स॒रः ।
   म॒रुत्व॑ते च मत्स॒रः ।

Halfverse: c    विश्वा॒ दधा॑न॒ ओज॑सा ।।
   विश्वा॒ दधा॑न॒ ओज॑सा ।।
   विश्वा दधा॑नः ओज॑सा ।।
   विश्वा दधा॑न ओज॑सा ।।


Verse: 11 
Halfverse: a    तं त्वा॑ ध॒र्तार॑मो॒ण्योः॒ पव॑मान स्व॒र्दृश॑म् ।
   तं त्वा॑ ध॒र्तार॑मो॒ण्योः
   तम् त्वा ध॒र्तार॑म् ओ॒ण्योः
   तं त्वा ध॒र्तार॑म् ओ॒णियोः

Halfverse: b    पव॑मान स्व॒र्दृश॑म् ।
   पव॑मान स्व॒र्दृश॑म् ।
   पव॑मान सुव॒र्दृश॑म् ।

Halfverse: c    हि॒न्वे वाजे॑षु वा॒जिन॑म् ।।
   हि॒न्वे वाजे॑षु वा॒जिन॑म् ।।
   हि॒न्वे वाजे॑षु वा॒जिन॑म् ।।
   हि॒न्वे वाजे॑षु वा॒जिन॑म् ।।


Verse: 12 
Halfverse: a    अ॒या चि॒त्तो वि॒पानया॒ हरिः॑ पवस्व॒ धार॑या ।
   अ॒या चि॒त्तो वि॒पानया
   अ॒या चि॒त्तः वि॒पा अ॒नया
   अ॒या चि॒त्तो वि॒पानया

Halfverse: b    हरिः॑ पवस्व॒ धार॑या ।
   हरिः पवस्व धार॑या ।
   हरिः पवस्व धार॑या ।

Halfverse: c    युजं॒ वाजे॑षु चोदय ।।
   युजं॒ वाजे॑षु चोदय ।।
   युज॑म् वाजे॑षु चोदय ।।
   युजं वाजे॑षु चोदय ।।


Verse: 13 
Halfverse: a    आ न॑ इन्दो म॒हीमिष॒म्पव॑स्व वि॒श्वद॑र्शतः ।
   आ न॑ इन्दो म॒हीमिष॑म्
   आ नः इन्दो म॒हीम् इष॑म्
   आ न इन्दो म॒हीम् इष॑म्

Halfverse: b    पव॑स्व वि॒श्वद॑र्शतः ।
   पव॑स्व वि॒श्वद॑र्शतः ।
   पव॑स्व वि॒श्वद॑र्शतः ।

Halfverse: c    अ॒स्मभ्यं॑ सोम गातु॒वित् ।।
   अ॒स्मभ्यं॑ सोम गातु॒वित् ।।
   अ॒स्मभ्य॑म् सोम गातु॒वित् ।।
   अ॒स्मभ्यं सोम गातु॒वित् ।।


Verse: 14 
Halfverse: a    आ क॒लशा॑ अनूष॒तेन्दो॒ धारा॑भि॒रोज॑सा ।
   आ क॒लशा॑ अनूषत
   आ क॒लशाः अनूषत
   आ क॒लशा अनूषत

Halfverse: b     इन्दो॒ धारा॑भि॒रोज॑सा ।
   इन्दो धारा॑भिः ओज॑सा ।
   इन्दो धारा॑भिर् ओज॑सा ।

Halfverse: c    एन्द्र॑स्य पी॒तये॑ विश ।।
   एन्द्र॑स्य पी॒तये॑ विश ।।
   आ इन्द्र॑स्य पी॒तये विश ।।
   एन्द्र॑स्य पी॒तये विश ।।


Verse: 15 
Halfverse: a    यस्य॑ ते॒ मद्यं॒ रसं॑ ती॒व्रं दु॒हन्त्यद्रि॑भिः ।
   यस्य॑ ते॒ मद्यं॒ रसं
   यस्य ते मद्य॑म् रस॑म्
   यस्य ते मदि॑यं रसं

Halfverse: b    ती॒व्रं दु॒हन्त्यद्रि॑भिः ।
   ती॒व्रम् दु॒हन्ति अद्रि॑भिः ।
   ती॒व्रं दु॒हन्ति अद्रि॑भिः ।

Halfverse: c    स प॑वस्वाभिमाति॒हा ।।
   स प॑वस्वाभिमाति॒हा ।।
   स प॑वस्व अभिमाति॒हा ।।
   स प॑वस्वाभिमाति॒हा ।।


Verse: 16 
Halfverse: a    राजा॑ मे॒धाभि॑रीयते॒ पव॑मानो म॒नावधि॑ ।
   राजा॑ मे॒धाभि॑रीयते
   राजा मे॒धाभिः ईयते
   राजा मे॒धाभि॑र् ईयते

Halfverse: b    पव॑मानो म॒नावधि॑ ।
   पव॑मानः म॒नौ अधि ।
   पव॑मानो म॒नाव् अधि ।

Halfverse: c    अ॒न्तरि॑क्षेण॒ यात॑वे ।।
   अ॒न्तरि॑क्षेण॒ यात॑वे ।।
   अ॒न्तरि॑क्षेण यात॑वे ।।
   अ॒न्तरि॑क्षेण यात॑वे ।।


Verse: 17 
Halfverse: a    आ न॑ इन्दो शत॒ग्विनं॒ गवा॒म्पोषं॒ स्वश्व्य॑म् ।
   आ न॑ इन्दो शत॒ग्विनं
   आ नः इन्दो शत॒ग्विन॑म्
   आ न इन्दो शत॒ग्विनं

Halfverse: b    गवा॒म्पोषं॒ स्वश्व्य॑म् ।
   गवा॑म् पोष॑म् स्वश्व्य॑म् ।
   गवा॑म् पोषं सुअश्वियम् ।

Halfverse: c    वहा॒ भग॑त्तिमू॒तये॑ ।।
   वहा॒ भग॑त्तिमू॒तये॑ ।।
   वह+ भग॑त्तिम् ऊ॒तये ।।
   वहा भग॑त्तिम् ऊ॒तये ।।


Verse: 18 
Halfverse: a    आ नः॑ सोम॒ सहो॒ जुवो॑ रू॒पं न वर्च॑से भर ।
   आ नः॑ सोम॒ सहो॒ जुवो
   आ नः सोम सहः जुवः
   आ नः सोम सहो जुवो

Halfverse: b    रू॒पं न वर्च॑से भर ।
   रू॒पम् न वर्च॑से भर ।
   रू॒पं न वर्च॑से भर ।

Halfverse: c    सु॑ष्वा॒णो दे॒ववी॑तये ।।
   सु॑ष्वा॒णो दे॒ववी॑तये ।।
   सु॑ष्वा॒णः दे॒ववी॑तये ।।
   सु॑ष्वा॒णो दे॒ववी॑तये ।।


Verse: 19 
Halfverse: a    अर्षा॑ सोम द्यु॒मत्त॑मो॒ ऽभि द्रोणा॑नि॒ रोरु॑वत् ।
   अर्षा॑ सोम द्यु॒मत्त॑मो
   अर्ष+ सोम द्यु॒मत्त॑मः
   अर्षा सोम द्यु॒मत्त॑मो

Halfverse: b    ऽभि द्रोणा॑नि॒ रोरु॑वत् ।
   अ॒भि द्रोणा॑नि रोरु॑वत् ।
   अ॒भि द्रोणा॑नि रोरु॑वत् ।

Halfverse: c    सीद॑ञ्छ्ये॒नो न योनि॒मा ।।
   सीद॑ञ्छ्ये॒नो न योनि॒मा ।।
   सीद॑न् श्ये॒नः न योनि॑म् आ ।।
   सीद॑ञ् छ्ये॒नो न योनि॑म् आ ।।


Verse: 20 
Halfverse: a    अ॒प्सा इन्द्रा॑य वा॒यवे॒ वरु॑णाय म॒रुद्भ्यः॑ ।
   अ॒प्सा इन्द्रा॑य वा॒यवे
   अ॒प्साः इन्द्रा॑य वा॒यवे
   अ॒प्सा इन्द्रा॑य वा॒यवे

Halfverse: b    वरु॑णाय म॒रुद्भ्यः॑ ।
   वरु॑णाय म॒रुद्भ्यः ।
   वरु॑णाय म॒रुद्भि॑यः ।

Halfverse: c    सोमो॑ अर्षति॒ विष्ण॑वे ।।
   सोमो॑ अर्षति॒ विष्ण॑वे ।।
   सोमः अर्षति विष्ण॑वे ।।
   सोमो अर्षति विष्ण॑वे ।।


Verse: 21 
Halfverse: a    इषं॑ तो॒काय॑ नो॒ दध॑द॒स्मभ्यं॑ सोम वि॒श्वतः॑ ।
   इषं॑ तो॒काय॑ नो॒ दध॑द्
   इष॑म् तो॒काय नः दध॑त्
   इषं तो॒काय नो दध॑द्

Halfverse: b    अ॒स्मभ्यं॑ सोम वि॒श्वतः॑ ।
   अ॒स्मभ्य॑म् सोम वि॒श्वतः ।
   अ॒स्मभ्यं सोम वि॒श्वतः ।

Halfverse: c    आ प॑वस्व सह॒स्रिण॑म् ।।
   आ प॑वस्व सह॒स्रिण॑म् ।।
   आ प॑वस्व सह॒स्रिण॑म् ।।
   आ प॑वस्व सह॒स्रिण॑म् ।।


Verse: 22 
Halfverse: a    ये सोमा॑सः परा॒वति॒ ये अ॑र्वा॒वति॑ सुन्वि॒रे ।
   ये सोमा॑सः परा॒वति
   ये सोमा॑सः परा॒वति
   ये सोमा॑सः परा॒वति

Halfverse: b    ये अ॑र्वा॒वति॑ सुन्वि॒रे ।
   ये अ॑र्वा॒वति सुन्वि॒रे ।
   ये अ॑र्वा॒वति सुन्वि॒रे ।

Halfverse: c    ये वा॒दः श॑र्य॒णाव॑ति ।।
   ये वा॒दः श॑र्य॒णाव॑ति ।।
   ये वा अ॒दः श॑र्य॒णाव॑ति ।।
   ये वा॒दः श॑र्य॒णाव॑ति ।।


Verse: 23 
Halfverse: a    य आ॑र्जी॒केषु॒ कृत्व॑सु॒ ये मध्ये॑ प॒स्त्या॑नाम् ।
   य आ॑र्जी॒केषु॒ कृत्व॑सु
   ये आ॑र्जी॒केषु कृत्व॑सु
   य आ॑र्जी॒केषु कृत्व॑सु

Halfverse: b    ये मध्ये॑ प॒स्त्या॑नाम् ।
   ये मध्ये प॒स्त्या॑नाम् ।
   ये मध्ये प॒स्तिया॑नाअम् ।

Halfverse: c    ये वा॒ जने॑षु प॒ञ्चसु॑ ।।
   ये वा॒ जने॑षु प॒ञ्चसु॑ ।।
   ये वा जने॑षु प॒ञ्चसु ।।
   ये वा जने॑षु प॒ञ्चसु ।।


Verse: 24 
Halfverse: a    ते नो॑ वृ॒ष्टिं दि॒वस्परि॒ पव॑न्ता॒मा सु॒वीर्य॑म् ।
   ते नो॑ वृ॒ष्टिं दि॒वस्परि
   ते नः वृ॒ष्टिम् दि॒वः परि
   ते नो वृ॒ष्टिं दि॒वस् परि

Halfverse: b    पव॑न्ता॒मा सु॒वीर्य॑म् ।
   पव॑न्ताम् आ सु॒वीर्य॑म् ।
   पव॑न्ताम् आ सु॒वीरि॑यम् ।

Halfverse: c    सु॑वा॒ना दे॒वास॒ इन्द॑वः ।।
   सु॑वा॒ना दे॒वास॒ इन्द॑वः ।।
   सु॑वा॒नाः दे॒वासः इन्द॑वः ।।
   स्वा॒ना % दे॒वास इन्द॑वः ।।


Verse: 25 
Halfverse: a    पव॑ते हर्य॒तो हरि॑र्गृणा॒नो ज॒मद॑ग्निना ।
   पव॑ते हर्य॒तो हरि॑र्
   पव॑ते हर्य॒तः हरिः
   पव॑ते हर्य॒तो हरि॑र्

Halfverse: b    गृणा॒नो ज॒मद॑ग्निना ।
   गृ॑णा॒नः ज॒मद॑ग्निना ।
   गृ॑णा॒नो ज॒मद॑ग्निना ।

Halfverse: c    हि॑न्वा॒नो गोरधि॑ त्व॒चि ।।
   हि॑न्वा॒नो गोरधि॑ त्व॒चि ।।
   हि॑न्वा॒नः गोः अधि त्व॒चि ।।
   हि॑न्वा॒नो गोर् अधि त्व॒चि ।।


Verse: 26 
Halfverse: a    प्र शु॒क्रासो॑ वयो॒जुवो॑ हिन्वा॒नासो॒ न सप्त॑यः ।
   प्र शु॒क्रासो॑ वयो॒जुवो
   प्र शु॒क्रासः वयो॒जुवः
   प्र शु॒क्रासो वयो॒जुवो

Halfverse: b    हिन्वा॒नासो॒ न सप्त॑यः ।
   हि॑न्वा॒नासः न सप्त॑यः ।
   हि॑न्वा॒नासो न सप्त॑यः ।

Halfverse: c    श्री॑णा॒ना अ॒प्सु मृ॑ञ्जत ।।
   श्री॑णा॒ना अ॒प्सु मृ॑ञ्जत ।।
   श्री॑णा॒नाः अ॒प्सु मृ॑ञ्जत ।।
   श्री॑णा॒ना अ॒प्सु मृ॑ञ्जत ।।


Verse: 27 
Halfverse: a    तं त्वा॑ सु॒तेष्वा॒भुवो॑ हिन्वि॒रे दे॒वता॑तये ।
   तं त्वा॑ सु॒तेष्वा॒भुवो
   तम् त्वा सु॒तेषु आ॒भुवः
   तं त्वा सु॒तेषु आ॒भुवो

Halfverse: b    हिन्वि॒रे दे॒वता॑तये ।
   हि॑न्वि॒रे दे॒वता॑तये ।
   हि॑न्वि॒रे दे॒वता॑तये ।

Halfverse: c    स प॑वस्वा॒नया॑ रु॒चा ।।
   स प॑वस्वा॒नया॑ रु॒चा ।।
   स प॑वस्व अ॒नया रु॒चा ।।
   स प॑वस्वा॒नया रु॒चा ।।


Verse: 28 
Halfverse: a    आ ते॒ दक्ष॑म्मयो॒भुवं॒ वह्नि॑म॒द्या वृ॑णीमहे ।
   आ ते॒ दक्ष॑म्मयो॒भुवं
   आ ते दक्ष॑म् मयो॒भुव॑म्
   आ ते दक्ष॑म् मयो॒भुवं

Halfverse: b    वह्नि॑म॒द्या वृ॑णीमहे ।
   वह्नि॑म् अ॒द्य+ वृ॑णीमहे ।
   वह्नि॑म् अ॒द्या वृ॑णीमहे ।

Halfverse: c    पान्त॒मा पु॑रु॒स्पृह॑म् ।।
   पान्त॒मा पु॑रु॒स्पृह॑म् ।।
   पान्त॑म् आ पु॑रु॒स्पृह॑म् ।।
   पाअन्त॑म् आ पु॑रु॒स्पृह॑म् ।।


Verse: 29 
Halfverse: a    आ म॒न्द्रमा वरे॑ण्य॒मा विप्र॒मा म॑नी॒षिण॑म् ।
   आ म॒न्द्रमा वरे॑ण्यम्
   आ म॒न्द्रम् आ वरे॑ण्यम्
   आ म॒न्द्रम् आ वरे॑णियम्

Halfverse: b    आ विप्र॒मा म॑नी॒षिण॑म् ।
   आ विप्र॑म् आ म॑नी॒षिण॑म् ।
   आ विप्र॑म् आ म॑नी॒षिण॑म् ।

Halfverse: c    पान्त॒मा पु॑रु॒स्पृह॑म् ।।
   पान्त॒मा पु॑रु॒स्पृह॑म् ।।
   पान्त॑म् आ पु॑रु॒स्पृह॑म् ।।
   पाअन्त॑म् आ पु॑रु॒स्पृह॑म् ।।


Verse: 30 
Halfverse: a    आ र॒यिमा सु॑चे॒तुन॒मा सु॑क्रतो त॒नूष्वा ।
   आ र॒यिमा सु॑चे॒तुन॑म्
   आ र॒यिम् आ सु॑चे॒तुन॑म्
   आ र॒यिम् आ सु॑चे॒तुन॑म्

Halfverse: b    आ सु॑क्रतो त॒नूष्वा ।
   आ सु॑क्रतो त॒नूषु आ ।
   आ सु॑क्रतो त॒नूषु आ ।

Halfverse: c    पान्त॒मा पु॑रु॒स्पृह॑म् ।।
   पान्त॒मा पु॑रु॒स्पृह॑म् ।।
   पान्त॑म् आ पु॑रु॒स्पृह॑म् ।।
   पाअन्त॑म् आ पु॑रु॒स्पृह॑म् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.