TITUS
Rg-Veda: Rg-Veda-Samhita
Part No. 900
Previous part

Hymn: 63_(889) 
Verse: 1 
Halfverse: a    प॑रा॒वतो॒ ये दिधि॑षन्त॒ आप्य॒म्मनु॑प्रीतासो॒ जनि॑मा वि॒वस्व॑तः ।
   प॑रा॒वतो॒ ये दिधि॑षन्त॒ आप्य॑म्
   परा॒वतः ये दिधि॑षन्ते आप्य॑म्
   परा॒वतो ये दिधि॑षन्त आपि॑यम्

Halfverse: b    मनु॑प्रीतासो॒ जनि॑मा वि॒वस्व॑तः ।
   मनु॑प्रीतासः जनि॑म+ वि॒वस्व॑तः ।
   मनु॑प्रीतासो जनि॑मा वि॒वस्व॑तः ।

Halfverse: c    य॒याते॒र्ये न॑हु॒ष्य॑स्य ब॒र्हिषि॑ दे॒वा आस॑ते॒ ते अधि॑ ब्रुवन्तु नः ।।
   य॒याते॒र्ये न॑हु॒ष्य॑स्य ब॒र्हिषि
   य॒यातेः ये न॑हु॒ष्य॑स्य ब॒र्हिषि
   य॒याते॑र् ये न॑हु॒षिय॑स्य ब॒र्हिषि

Halfverse: d    दे॒वा आस॑ते॒ ते अधि॑ ब्रुवन्तु नः ।।
   दे॒वाः आस॑ते ते अधि ब्रुवन्तु नः ।।
   दे॒वा आस॑ते ते अधि ब्रुवन्तु नः ।।


Verse: 2 
Halfverse: a    विश्वा॒ हि वो॑ नम॒स्या॑नि॒ वन्द्या॒ नामा॑नि देवा उ॒त य॒ज्ञिया॑नि वः ।
   विश्वा॒ हि वो॑ नम॒स्या॑नि॒ वन्द्या
   विश्वा हि वः नम॒स्या॑नि वन्द्या
   विश्वा हि वो नम॒सिया॑नि वन्दि॑या

Halfverse: b    नामा॑नि देवा उ॒त य॒ज्ञिया॑नि वः ।
   नामा॑नि देवाः उ॒त य॒ज्ञिया॑नि वः ।
   नामा॑नि देवा उ॒त य॒ज्ञिया॑नि वः ।

Halfverse: c    ये स्थ जा॒ता अदि॑तेर॒द्भ्यस्परि॒ ये पृ॑थि॒व्यास्ते म॑ इ॒ह श्रु॑ता॒ हव॑म् ।।
   ये स्थ जा॒ता अदि॑तेर॒द्भ्यस्परि
   ये स्थ जा॒ताः अदि॑तेः अ॒द्भ्यः परि
   ये स्थ जा॒ता अदि॑तेर् अद्भि॒यस् परि

Halfverse: d    ये पृ॑थि॒व्यास्ते म॑ इ॒ह श्रु॑ता॒ हव॑म् ।।
   ये पृ॑थि॒व्याः ते मे इ॒ह श्रु॑त+ हव॑म् ।।
   ये पृ॑थि॒व्यास् ते म इ॒ह श्रु॑ता हव॑म् ।।


Verse: 3 
Halfverse: a    येभ्यो॑ मा॒ता मधु॑म॒त्पिन्व॑ते॒ पयः॑ पी॒यूषं॒ द्यौरदि॑ति॒रद्रि॑बर्हाः ।
   येभ्यो॑ मा॒ता मधु॑म॒त्पिन्व॑ते॒ पयः
   येभ्यः मा॒ता मधु॑मत् पिन्व॑ते पयः
   येभ्यो मा॒ता मधु॑मत् पिन्व॑ते पयः

Halfverse: b    पी॒यूषं॒ द्यौरदि॑ति॒रद्रि॑बर्हाः ।
   पी॒यूष॑म् द्यौः अदि॑तिः अद्रि॑बर्हाः ।
   पी॒यूषं द्यौर् अदि॑तिर् अद्रि॑बर्हाः ।

Halfverse: c    उ॒क्थशु॑ष्मान्वृषभ॒रान्स्वप्न॑स॒स्ताँ आ॑दि॒त्याँ अनु॑ मदा स्व॒स्तये॑ ।।
   उ॒क्थशु॑ष्मान्वृषभ॒रान्स्वप्न॑सस्
   उ॒क्थशु॑ष्मान् वृषभ॒रान् स्वप्न॑सः
   उ॒क्थशु॑ष्मान् वृषभ॒रान् सुअप्न॑सस्

Halfverse: d    ताँ आ॑दि॒त्याँ अनु॑ मदा स्व॒स्तये॑ ।।
   तान् आदि॒त्यान् अनु मद+ स्व॒स्तये ।।
   ताँ आ॑दि॒त्याँ अनु मदा सुअ॒स्तये ।।


Verse: 4 
Halfverse: a    नृ॒चक्ष॑सो॒ अनि॑मिषन्तो अ॒र्हणा॑ बृ॒हद्दे॒वासो॑ अमृत॒त्वमा॑नशुः ।
   नृ॒चक्ष॑सो॒ अनि॑मिषन्तो अ॒र्हणा
   नृ॒चक्ष॑सः अनि॑मिषन्तः अ॒र्हणा
   नृ॒चक्ष॑सो अनि॑मिषन्तो अ॒र्हणा

Halfverse: b    बृ॒हद्दे॒वासो॑ अमृत॒त्वमा॑नशुः ।
   बृ॒हत् दे॒वासः अमृत॒त्वम् आनशुः ।
   बृ॒हद् दे॒वासो अमृत॒त्वम् आनशुः ।

Halfverse: c    ज्यो॒तीर॑था॒ अहि॑माया॒ अना॑गसो दि॒वो व॒र्ष्माणं॑ वसते स्व॒स्तये॑ ।।
   ज्यो॒तीर॑था॒ अहि॑माया॒ अना॑गसो
   ज्यो॒तीर॑थाः अहि॑मायाः अना॑गसः
   ज्यो॒तीर॑था अहि॑माया अना॑गसो

Halfverse: d    दि॒वो व॒र्ष्माणं॑ वसते स्व॒स्तये॑ ।।
   दि॒वः व॒र्ष्माण॑म् वसते स्व॒स्तये ।।
   दि॒वो व॒र्ष्माणं वसते सुअ॒स्तये ।।


Verse: 5 
Halfverse: a    स॒म्राजो॒ ये सु॒वृधो॑ य॒ज्ञमा॑य॒युरप॑रिह्वृता दधि॒रे दि॒वि क्षय॑म् ।
   स॒म्राजो॒ ये सु॒वृधो॑ य॒ज्ञमा॑य॒युर्
   स॒म्राजः ये सु॒वृधः य॒ज्ञम् आय॒युः
   स॒म्राजो ये सु॒वृधो य॒ज्ञम् आय॒युर्

Halfverse: b    अप॑रिह्वृता दधि॒रे दि॒वि क्षय॑म् ।
   अप॑रिह्वृताः दधि॒रे दि॒वि क्षय॑म् ।
   अप॑रिह्वृता दधि॒रे दि॒वि क्षय॑म् ।

Halfverse: c    ताँ आ वि॑वास॒ नम॑सा सुवृ॒क्तिभि॑र्म॒हो आ॑दि॒त्याँ अदि॑तिं स्व॒स्तये॑ ।।
   ताँ आ वि॑वास॒ नम॑सा सुवृ॒क्तिभि॑र्
   तान् आ वि॑वास नम॑सा सुवृ॒क्तिभिः
   ताँ आ वि॑वास नम॑सा सुवृ॒क्तिभि॑र्

Halfverse: d    म॒हो आ॑दि॒त्याँ अदि॑तिं स्व॒स्तये॑ ।।
   म॒हः आ॑दि॒त्यान् अदि॑तिम् स्व॒स्तये ।।
   म॒हो आ॑दि॒त्याँ अदि॑तिं सुअ॒स्तये ।।


Verse: 6 
Halfverse: a    को व॒ स्तोमं॑ राधति॒ यं जुजो॑षथ॒ विश्वे॑ देवासो मनुषो॒ यति॒ ष्ठन॑ ।
   को व॒ स्तोमं॑ राधति॒ यं जुजो॑षथ
   कः वः स्तोम॑म् राधति यम् जुजो॑षथ
   को व स्तोमं राधति यं जुजो॑षथ

Halfverse: b    विश्वे॑ देवासो मनुषो॒ यति॒ ष्ठन॑ ।
   विश्वे देवासः मनुषः यति स्थन ।
   विश्वे देवासो मनुषो यति ष्ठन ।

Halfverse: c    को वो॑ ऽध्व॒रं तु॑विजाता॒ अरं॑ कर॒द्यो नः॒ पर्ष॒दत्यंहः॑ स्व॒स्तये॑ ।।
   को वो॑ ऽध्व॒रं तु॑विजाता॒ अरं॑ करद्
   कः वः अध्व॒रम् तुविजाताः अर॑म् करत्
   को वो ऽध्व॒रं तु॑विजाता अरं करद्

Halfverse: d    यो नः॒ पर्ष॒दत्यंहः॑ स्व॒स्तये॑ ।।
   यः नः पर्ष॑त् अति अंहः स्व॒स्तये ।।
   यो नः पर्ष॑द् अति अंहः सुअ॒स्तये ।।


Verse: 7 
Halfverse: a    येभ्यो॒ होत्रा॑म्प्रथ॒मामा॑ये॒जे मनुः॒ समि॑द्धाग्नि॒र्मन॑सा स॒प्त होतृ॑भिः ।
   येभ्यो॒ होत्रा॑म्प्रथ॒मामा॑ये॒जे मनुः
   येभ्यः होत्रा॑म् प्रथ॒माम् आये॒जे मनुः
   येभ्यो होत्रा॑म् प्रथ॒माम् आये॒जे मनुः

Halfverse: b    समि॑द्धाग्नि॒र्मन॑सा स॒प्त होतृ॑भिः ।
   समि॑द्धाग्निः मन॑सा स॒प्त होतृ॑भिः ।
   समि॑द्धाग्निर् मन॑सा स॒प्त होतृ॑भिः ।

Halfverse: c    त आ॑दित्या॒ अभ॑यं॒ शर्म॑ यछत सु॒गा नः॑ कर्त सु॒पथा॑ स्व॒स्तये॑ ।।
   त आ॑दित्या॒ अभ॑यं॒ शर्म॑ यछत
   ते आ॑दित्याः अभ॑यम् शर्म यछत
   त आ॑दित्या अभ॑यं शर्म यछत

Halfverse: d    सु॒गा नः॑ कर्त सु॒पथा॑ स्व॒स्तये॑ ।।
   सु॒गा नः कर्त सु॒पथा स्व॒स्तये ।।
   सु॒गा नः कर्त सु॒पथा सुअ॒स्तये ।।


Verse: 8 
Halfverse: a    य ईशि॑रे॒ भुव॑नस्य॒ प्रचे॑तसो॒ विश्व॑स्य स्था॒तुर्जग॑तश्च॒ मन्त॑वः ।
   य ईशि॑रे॒ भुव॑नस्य॒ प्रचे॑तसो
   ये ईशि॑रे भुव॑नस्य प्रचे॑तसः
   य ईशि॑रे भुव॑नस्य प्रचे॑तसो

Halfverse: b    विश्व॑स्य स्था॒तुर्जग॑तश्च॒ मन्त॑वः ।
   विश्व॑स्य स्था॒तुः जग॑तः च मन्त॑वः ।
   विश्व॑स्य स्था॒तुर् जग॑तश् च मन्त॑वः ।

Halfverse: c    ते नः॑ कृ॒तादकृ॑ता॒देन॑स॒स्पर्य॒द्या दे॑वासः पिपृता स्व॒स्तये॑ ।।
   ते नः॑ कृ॒तादकृ॑ता॒देन॑स॒स्पर्य्
   ते नः कृ॒तात् अकृ॑तात् एन॑सः परि
   ते नः कृ॒ताद् अकृ॑ताद् एन॑सस् परि

Halfverse: d    अ॒द्या दे॑वासः पिपृता स्व॒स्तये॑ ।।
   अ॒द्य+ दे॑वासः पिपृत+ स्व॒स्तये ।।
   अ॒द्या दे॑वासः पिपृता सुअ॒स्तये ।।


Verse: 9 
Halfverse: a    भरे॒ष्विन्द्रं॑ सु॒हवं॑ हवामहे ऽंहो॒मुचं॑ सु॒कृतं॒ दैव्यं॒ जन॑म् ।
   भरे॒ष्विन्द्रं॑ सु॒हवं॑ हवामहे
   भरे॑षु इन्द्र॑म् सु॒हव॑म् हवामहे
   भरे॑षु इन्द्रं सु॒हवं हवामहे

Halfverse: b    ऽंहो॒मुचं॑ सु॒कृतं॒ दैव्यं॒ जन॑म् ।
   अं॑हो॒मुच॑म् सु॒कृत॑म् दैव्य॑म् जन॑म् ।
   अं॑हो॒मुचं सु॒कृतं दैवि॑यं जन॑म् ।

Halfverse: c    अ॒ग्निम्मि॒त्रं वरु॑णं सा॒तये॒ भगं॒ द्यावा॑पृथि॒वी म॒रुतः॑ स्व॒स्तये॑ ।।
   अ॒ग्निम्मि॒त्रं वरु॑णं सा॒तये॒ भगं
   अ॒ग्निम् मि॒त्रम् वरु॑णम् सा॒तये भग॑म्
   अ॒ग्निम् मि॒त्रं वरु॑णं सा॒तये भगं

Halfverse: d    द्यावा॑पृथि॒वी म॒रुतः॑ स्व॒स्तये॑ ।।
   द्यावा॑पृथि॒वी म॒रुतः स्व॒स्तये ।।
   द्यावा॑पृथि॒वी म॒रुतः सुअ॒स्तये ।।


Verse: 10 
Halfverse: a    सु॒त्रामा॑णम्पृथि॒वीं द्याम॑ने॒हसं॑ सु॒शर्मा॑ण॒मदि॑तिं सु॒प्रणी॑तिम् ।
   सु॒त्रामा॑णम्पृथि॒वीं द्याम॑ने॒हसं
   सु॒त्रामा॑णम् पृथि॒वीम् द्याम् अने॒हस॑म्
   सु॒त्रामा॑णम् पृथि॒वीं द्याम् अने॒हसं

Halfverse: b    सु॒शर्मा॑ण॒मदि॑तिं सु॒प्रणी॑तिम् ।
   सु॒शर्मा॑णम् अदि॑तिम् सु॒प्रणी॑तिम् ।
   सु॒शर्मा॑णम् अदि॑तिं सु॒प्रणी॑तिम् ।

Halfverse: c    दैवीं॒ नावं॑ स्वरि॒त्रामना॑गस॒मस्र॑वन्ती॒मा रु॑हेमा स्व॒स्तये॑ ।।
   दैवीं॒ नावं॑ स्वरि॒त्रामना॑गसम्
   दैवी॑म् नाव॑म् स्वरि॒त्राम् अना॑गसम्
   दैवीं नावं सुअरि॒त्राम् अना॑गसम्

Halfverse: d    अस्र॑वन्ती॒मा रु॑हेमा स्व॒स्तये॑ ।।
   अस्र॑वन्तीम् आ रु॑हेम+ स्व॒स्तये ।।
   अस्र॑वन्तीम् आ रु॑हेमा सुअ॒स्तये ।।


Verse: 11 
Halfverse: a    विश्वे॑ यजत्रा॒ अधि॑ वोचतो॒तये॒ त्राय॑ध्वं नो दु॒रेवा॑या अभि॒ह्रुतः॑ ।
   विश्वे॑ यजत्रा॒ अधि॑ वोचतो॒तये
   विश्वे यजत्राः अधि वोचत ऊ॒तये
   विश्वे यजत्रा अधि वोचतो॒तये

Halfverse: b    त्राय॑ध्वं नो दु॒रेवा॑या अभि॒ह्रुतः॑ ।
   त्राय॑ध्वम् नः दु॒रेवा॑याः अभि॒ह्रुतः ।
   त्राय॑ध्वं नो दु॒रेवा॑या अभि॒ह्रुतः ।

Halfverse: c    स॒त्यया॑ वो दे॒वहू॑त्या हुवेम शृण्व॒तो दे॑वा॒ अव॑से स्व॒स्तये॑ ।।
   स॒त्यया॑ वो दे॒वहू॑त्या हुवेम
   स॒त्यया वः दे॒वहू॑त्या हुवेम
   स॒त्यया वो दे॒वहू॑त्या हुवेम

Halfverse: d    शृण्व॒तो दे॑वा॒ अव॑से स्व॒स्तये॑ ।।
   शृ॑ण्व॒तः दे॑वाः अव॑से स्व॒स्तये ।।
   शृ॑ण्व॒तो दे॑वा अव॑से सुअ॒स्तये ।।


Verse: 12 
Halfverse: a    अपामी॑वा॒मप॒ विश्वा॒मना॑हुति॒मपारा॑तिं दुर्वि॒दत्रा॑मघाय॒तः ।
   अपामी॑वा॒मप॒ विश्वा॒मना॑हुतिम्
   अप अमी॑वाम् अप विश्वा॑म् अना॑हुतिम्
   अपामी॑वाम् अप विश्वा॑म् अना॑हुतिम्

Halfverse: b    अपारा॑तिं दुर्वि॒दत्रा॑मघाय॒तः ।
   अप अरा॑तिम् दुर्वि॒दत्रा॑म् अघाय॒तः ।
   अपारा॑तिं दुर्वि॒दत्रा॑म् अघाय॒तः ।

Halfverse: c    आ॒रे दे॑वा॒ द्वेषो॑ अ॒स्मद्यु॑योतनो॒रु णः॒ शर्म॑ यछता स्व॒स्तये॑ ।।
   आ॒रे दे॑वा॒ द्वेषो॑ अ॒स्मद्यु॑योतन
   आ॒रे दे॑वाः द्वेषः अ॒स्मत् युयोतन
   आ॒रे दे॑वा द्वेषो अ॒स्मद् युयोतन

Halfverse: d     उ॒रु णः॒ शर्म॑ यछता स्व॒स्तये॑ ।।
   उ॒रु नः शर्म यछत+ स्व॒स्तये ।।
   उ॒रु णः शर्म यछता सुअ॒स्तये ।।


Verse: 13 
Halfverse: a    अरि॑ष्टः॒ स मर्तो॒ विश्व॑ एधते॒ प्र प्र॒जाभि॑र्जायते॒ धर्म॑ण॒स्परि॑ ।
   अरि॑ष्टः॒ स मर्तो॒ विश्व॑ एधते
   अरि॑ष्टः स मर्तः विश्वः एधते
   अरि॑ष्टः स मर्तिओ % विश्व एधते

Halfverse: b    प्र प्र॒जाभि॑र्जायते॒ धर्म॑ण॒स्परि॑ ।
   प्र प्र॒जाभिः जायते धर्म॑णः परि ।
   प्र प्र॒जाभि॑र् जायते धर्म॑णस् परि ।

Halfverse: c    यमा॑दित्यासो॒ नय॑था सुनी॒तिभि॒रति॒ विश्वा॑नि दुरि॒ता स्व॒स्तये॑ ।।
   यमा॑दित्यासो॒ नय॑था सुनी॒तिभि॑र्
   यम् आदित्यासः नय॑थ+ सुनी॒तिभिः
   यम् आदित्यासो नय॑था सुनी॒तिभि॑र्

Halfverse: d    अति॒ विश्वा॑नि दुरि॒ता स्व॒स्तये॑ ।।
   अति विश्वा॑नि दुरि॒ता स्व॒स्तये ।।
   अति विश्वा॑नि दुरि॒ता सुअ॒स्तये ।।


Verse: 14 
Halfverse: a    यं दे॑वा॒सो ऽव॑थ॒ वाज॑सातौ॒ यं शूर॑साता मरुतो हि॒ते धने॑ ।
   यं दे॑वा॒सो ऽव॑थ॒ वाज॑सातौ
   यम् देवासः अव॑थ वाज॑सातौ
   यं दे॑वासो अव॑थ वाज॑सातौ

Halfverse: b    यं शूर॑साता मरुतो हि॒ते धने॑ ।
   यम् शूर॑साता मरुतः हि॒ते धने ।
   यं शूर॑साता मरुतो हि॒ते धने ।

Halfverse: c    प्रा॑त॒र्यावा॑णं॒ रथ॑मिन्द्र सान॒सिमरि॑ष्यन्त॒मा रु॑हेमा स्व॒स्तये॑ ।।
   प्रा॑त॒र्यावा॑णं॒ रथ॑मिन्द्र सान॒सिम्
   प्रात॒र्यावा॑णम् रथ॑म् इन्द्र सान॒सिम्
   प्रात॒र्यावा॑णं रथ॑म् इन्द्र सान॒सिम्

Halfverse: d    अरि॑ष्यन्त॒मा रु॑हेमा स्व॒स्तये॑ ।।
   अरि॑ष्यन्तम् आ रु॑हेम+ स्व॒स्तये ।।
   अरि॑ष्यन्तम् आ रु॑हेमा सुअ॒स्तये ।।


Verse: 15 
Halfverse: a    स्व॒स्ति नः॑ प॒थ्या॑सु॒ धन्व॑सु स्व॒स्त्य॒प्सु वृ॒जने॒ स्व॑र्वति ।
   स्व॒स्ति नः॑ प॒थ्या॑सु॒ धन्व॑सु
   स्व॒स्ति नः प॒थ्या॑सु धन्व॑सु
   सुअ॒स्ति नः ? प॒थिया॑सु धन्व॑सु

Halfverse: b    स्व॒स्त्य॒प्सु वृ॒जने॒ स्व॑र्वति ।
   स्व॒स्ति अ॒प्सु वृ॒जने स्व॑र्वति ।
   सुअ॒स्ति अ॒प्सु वृ॒जने सुव॑र्वति ।

Halfverse: c    स्व॒स्ति नः॑ पुत्रकृ॒थेषु॒ योनि॑षु स्व॒स्ति रा॒ये म॑रुतो दधातन ।।
   स्व॒स्ति नः॑ पुत्रकृ॒थेषु॒ योनि॑षु
   स्व॒स्ति नः पुत्रकृ॒थेषु योनि॑षु
   सुअ॒स्ति नः पुत्रकृ॒थेषु योनि॑षु

Halfverse: d    स्व॒स्ति रा॒ये म॑रुतो दधातन ।।
   स्व॒स्ति रा॒ये म॑रुतः दधातन ।।
   सुअ॒स्ति रा॒ये म॑रुतो दधातन ।।


Verse: 16 
Halfverse: a    स्व॒स्तिरिद्धि प्रप॑थे॒ श्रेष्ठा॒ रेक्ण॑स्वत्य॒भि या वा॒ममेति॑ ।
   स्व॒स्तिरिद्धि प्रप॑थे॒ श्रेष्ठा
   स्व॒स्तिः इत् हि प्रप॑थे श्रेष्ठा
   सुअ॒स्तिर् इद् धि प्रप॑थे श्रयि॑ष्ठा

Halfverse: b    रेक्ण॑स्वत्य॒भि या वा॒ममेति॑ ।
   रेक्ण॑स्वती अ॒भि या वा॒मम् एति ।
   रेक्ण॑स्वती अ॒भि या वा॒मम् एति ।

Halfverse: c    सा नो॑ अ॒मा सो अर॑णे॒ नि पा॑तु स्वावे॒शा भ॑वतु दे॒वगो॑पा ।।
   सा नो॑ अ॒मा सो अर॑णे॒ नि पा॑तु
   सा नः अ॒मा स उ अर॑णे नि पा॑तु
   सा नो अ॒मा सो अर॑णे नि पा॑तु

Halfverse: d    स्वावे॒शा भ॑वतु दे॒वगो॑पा ।।
   स्वा॑वे॒शा भ॑वतु दे॒वगो॑पा ।।
   सुआ॑वे॒शा भ॑वतु दे॒वगो॑पा ।।


Verse: 17 
Halfverse: a    ए॒वा प्ल॒तेः सू॒नुर॑वीवृधद्वो॒ विश्व॑ आदित्या अदिते मनी॒षी ।
   ए॒वा प्ल॒तेः सू॒नुर॑वीवृधद्वो
   ए॒व+ प्ल॒तेः सू॒नुः अ॑वीवृधत् वः
   ए॒वा प्ल॒तेः सू॒नुर् अवीवृधद् वो

Halfverse: b    विश्व॑ आदित्या अदिते मनी॒षी ।
   विश्वे आदित्याः अदिते मनी॒षी ।
   विश्व आदित्या अदिते मनी॒षी ।

Halfverse: c    ई॑शा॒नासो॒ नरो॒ अम॑र्त्ये॒नास्ता॑वि॒ जनो॑ दि॒व्यो गये॑न ।।
   ई॑शा॒नासो॒ नरो॒ अम॑र्त्येन
   ईशा॒नासः नरः अम॑र्त्येन
   ईशा॒नासो नरो अम॑र्तियेन

Halfverse: d     अस्ता॑वि॒ जनो॑ दि॒व्यो गये॑न ।।
   अस्ता॑वि जनः दि॒व्यः गये॑न ।।
   अस्ता॑वि जनो दिवि॒यो गये॑न ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.