TITUS
Black Yajur-Veda: Taittiriya-Samhita
Part No. 3
Previous part

Chapter: 3 
Paragraph: 1 
Verse: 1 
Sentence: 1=a    दे॒वस्य॑ त्वा सवि॒तुः प्र॑स॒वे॒ ऽश्विनो॑र्बा॒हुभ्या॑म्पू॒ष्णो हस्ता॑भ्या॒मा द॒दे भ्रि॑रसि॒ नारि॑रसि
Sentence: 2=b    परि॑लिखितं॒ रक्षः॒ परि॑लिखिता॒ अरा॑तय इ॒दम॒हं रक्ष॑सो ग्री॒वा अपि॑ कृन्तामि
Sentence: 3=c    यो॒ ऽस्मान्द्वेष्टि॒ यं च॑ व॒यं द्वि॒ष्म इ॒दम॑स्य ग्री॒वा अपि॑ कृन्तामि
Sentence: 4=d    दि॒वे त्वा॒न्तरि॑क्षाय त्वा पृथिव्यै त्वा
Sentence: 5=e    शुन्ध॑तां लो॒कः पि॑तृ॒षद॑नस् ।
Sentence: 6=f    यवो॑ ऽसि य॒वया॒स्मद्द्वेषः॑ ।।

Verse: 2 
Sentence: 1    य॒वयारा॑तीः
Sentence: 2=g    पितृ॒णां सद॑नमस्य्
Sentence: 3=h    उद्दिवं॑ स्तभा॒नान्तरि॑क्षम्पृण पृथि॒वीं दृं॑ह
Sentence: 4=i    द्युता॒नस्त्वा॑ मारु॒तो मि॑नोतु मि॒त्रावरु॑णयोर्ध्रु॒वेण॒ धर्म॑णा
Sentence: 5=k    ब्रह्म॒वनिं॑ त्वा क्षत्र॒वनिं॑ सुप्रजा॒वनिं॑ रायस्पोष॒वनि॒म्पर्यू॑हामि
Sentence: 6=l    ब्रह्म॑ दृंह क्ष॒त्रं दृं॑ह प्र॒जां दृं॑ह रा॒यस्पोषं॑ दृंह
Sentence: 7=m    घृ॒तेन॑ द्यावापृथिवी॒ आ पृ॑णेथाम्
Sentence: 8=n    इन्द्र॑स्य॒ सदो॑ ऽसि विश्वज॒नस्य॑ छा॒या
Sentence: 9=o    परि॑ त्वा गिर्वणो॒ गिर॑ इ॒मा भ॑वन्तु वि॒श्वतो॑ वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यस् ।
Sentence: 10=p    इन्द्र॑स्य॒ स्यूर॒सीन्द्र॑स्य ध्रु॒वम॑सि ।
Sentence: 11=q    अै॒न्द्रम॑सि ।
Sentence: 12=r    इन्द्रा॑य त्वा ।।

Paragraph: 2 
Verse: 1 
Sentence: 1=a    र॑क्षो॒हणो॑ वलग॒हनो॑ वैष्ण॒वान्ख॑नामि ।
Sentence: 2=b    इ॒दम॒हं तं व॑ल॒गमुद्व॑पामि॒ यं नः॑ समा॒नो यमस॑मानो निच॒खान॑ ।
Sentence: 3=c    इ॒दमे॑न॒मध॑रं करोमि॒ यो नः॑ समा॒नो यो ऽस॑मानो ऽराती॒यति
Sentence: 4=d    गाय॒त्रेण॒ छन्द॒साव॑बाढो वल॒गः
Sentence: 5=e    किमत्र॑ भ॒द्रं तन्नौ॑ स॒ह
Sentence: 6=f    वि॒राड॑सि सपत्न॒हा स॒म्राड॑सि भ्रातृव्य॒हा स्व॒राड॑स्यभिमाति॒हा वि॑श्वा॒राड॑सि{F विश्वा॑सां{W विश्वा॑नां{ASS विश्वा॑सां{BI विश्वा॑सां{GOLS विश्वा॑सां ना॒ष्ट्राणां॑ ह॒न्ता ।।

Verse: 2 
Sentence: 1=g    र॑क्षो॒हणो॑ वलग॒हनः॒ प्रोक्षा॑मि वैष्ण॒वान्
Sentence: 2=h    रक्षो॒हणो॑ वलग॒हनो ऽव॑ नयामि वैष्ण॒वान्
Sentence: 3=i    यवो॑ ऽसि य॒वया॒स्मद्द्वेषो॑ य॒वयारा॑तीस् ।
Sentence: 4=k    र॑क्षो॒हणो॑ वलग॒हनो ऽव॑ स्तृणामि वैष्ण॒वान्
Sentence: 5=l    रक्षो॒हणो॑ वलग॒हनो॒ ऽभि जु॑होमि वैष्ण॒वान्
Sentence: 6=m    रक्षो॒हणौ॑ वलग॒हना॒वुप॑ दधामि वैष्ण॒वी
Sentence: 7=n    र॑क्षो॒हणौ॑ वलग॒हनौ॒ पर्यू॑हामि वैष्ण॒वी
Sentence: 8=o    र॑क्षो॒हणौ॑ वलग॒हनौ॒ परि॑ स्तृणामि वैष्ण॒वी
Sentence: 9=p    र॑क्षो॒हणौ॑ वलग॒हनौ॑ वैष्ण॒वी
Sentence: 10=q    बृ॒हन्न॑सि बृ॒हद्ग्रा॑वा बृह॒तीमिन्द्रा॑य॒ वाचं॑ वद ।।

Paragraph: 3 
Verse: 1 
Sentence: 1=a    वि॒भूर॑सि प्र॒वाह॑णस् ।
Sentence: 2=b    वह्नि॑रसि हव्य॒वाह॑नः
Sentence: 3=c    श्वा॒त्रो॑ ऽसि॒ प्रचे॑तास्
Sentence: 4=d    तु॒थो॑ ऽसि वि॒श्ववे॑दास् ।
Sentence: 5=e    उ॒शिग॑सि क॒विस् ।
Sentence: 6=f    अङ्घा॑रिरसि॒ बम्भा॑रिस् ।
Sentence: 7=g    अ॑व॒स्युर॑सि॒ दुव॒स्वान् ।
Sentence: 8=h    शु॒न्ध्यूर॑सि मार्जा॒लीयः
Sentence: 9=i    स॒म्राड॑सि कृ॒शानुः
Sentence: 10=k    परि॒षद्यो॑ ऽसि॒ पव॑मानः
Sentence: 11=l    प्र॒तक्वा॑सि॒ नभ॑स्वान्
Sentence: 12=m    अस॑म्मृष्टो ऽसि हव्य॒सूद॑स् ।
Sentence: 13=n    ऋ॒तधा॑मासि॒ सुव॑र्ज्योतिस् ।
Sentence: 14=o    ब्रह्म॑ज्योतिरसि॒ सुव॑र्धाम ।
Sentence: 15=p    अ॒जो॒ ऽस्येक॑पाद्
Sentence: 16=q    अहि॑रसि बु॒ध्निय॑स् ।
Sentence: 17=r    रौ॑द्रे॒णानी॑केन पा॒हि मा॑ग्ने पिपृ॒हि मा॒ मा मा॑ हिंसीः ।।

Paragraph: 4 
Verse: 1 
Sentence: 1=a    त्वं सो॑म तनू॒कृद्भ्यो॒ द्वेषो॑भ्यो॒ ऽन्यकृ॑तेभ्य उ॒रु य॒न्तासि॒ वरू॑थं॒ स्वाहा
Sentence: 2=b    जुषा॒णो अ॒प्तुराज्य॑स्य वेतु॒ स्वाहा॑ ।
Sentence: 3=c    अ॒यं नो॑ अ॒ग्निर्वरि॑वः कृणोत्व॒यम्मृधः॑ पु॒र ए॑तु प्रभि॒न्दन् । अ॒यं शत्रू॑ञ्जयतु॒ जर्हृ॑षाणो॒ ऽयं वाजं॑ जयतु॒ वाज॑सातौ ।।
Sentence: 4=d    उ॒रु वि॑ष्णो॒ वि क्र॑मस्वो॒रु क्षया॑य नः कृधि । घृ॒तं घृ॑तयोने पिब॒ प्रप्र॑ य॒ज्ञप॑तिं तिर ।।
Sentence: 5=e    सोमो॑ जिगाति गातु॒वित् ।।

Verse: 2 
Sentence: 1    दे॒वाना॑मेति निष्कृ॒तमृ॒तस्य॒ योनि॑मा॒सद॑म्
Sentence: 2=f    अदि॑त्याः॒ सदो॑ ऽसि ।
Sentence: 3=g    अदि॑त्याः॒ सद॒ आ सी॑द ।
Sentence: 4=h    ए॒ष वो॑ देव सवितः॒ सोम॒स्तं र॑क्षध्व॒म्मा वो॑ दभत् ।
Sentence: 5=i    {F ए॒तत्{W ए॒तं{ASS ए॒तत्{BI ए॒तत्{GOLS ए॒तत् त्वं सो॑म दे॒वो दे॒वानुपा॑गा इ॒दम॒हम्म॑नु॒ष्यो॑ मनु॒ष्या॑न्त्स॒ह प्र॒जया॑ स॒ह रा॒यस्पोषे॑ण
Sentence: 6=k    नमो॑ दे॒वेभ्यः॑ स्व॒धा पि॒तृभ्य॑स् ।
Sentence: 7=l    इ॒दम॒हं निर्वरु॑णस्य॒ पाशा॒त्सुव॑र॒भि ।।

Verse: 3 
Sentence: 1    वि ख्ये॑षं वैश्वान॒रं ज्योति॑स् ।
Sentence: 2=m    अग्ने॑ व्रतपते॒ त्वं व्र॒तानां॑ व्र॒तप॑तिरसि
Sentence: 3=n    या मम॑ त॒नूस्त्वय्यभू॑दि॒यं सा मयि॒ या तव॑ त॒नूर्मय्यभू॑दे॒षा सा त्वयि
Sentence: 4=o    यथाय॒थं नौ॑ व्रतपते व्र॒तिनो॑र्व्र॒तानि॑ ।।

Paragraph: 5 
Verse: 1 
Sentence: 1=a    अत्य॒न्यानगां॒ नान्यानुपा॑गाम्
Sentence: 2=b    अ॒र्वाक्त्वा॒ परै॑रविदम्प॒रोव॑रैस्
Sentence: 3=c    तं त्वा॑ जुषे वैष्ण॒वं दे॑वय॒ज्यायै
Sentence: 4=d    दे॒वस्त्वा॑ सवि॒ता मध्वा॑नक्तु ।
Sentence: 5=e    ओष॑धे॒ त्राय॑स्वैनम् ।
Sentence: 6=f    स्वधि॑ते मैनं हिंसीस् ।
Sentence: 7=g    दिव॒मग्रे॑ण॒ मा ले॑खीर॒न्तरि॑क्ष॒म्मध्ये॑न॒ मा हिं॑सीः पृथि॒व्या सम्भ॑व
Sentence: 8=h    वन॑स्पते श॒तव॑ल्शो॒ वि रो॑ह स॒हस्र॑वल्शा॒ वि व॒यं रु॑हेम
Sentence: 9=i    यं त्वा॒यं स्वधि॑ति॒स्तेति॑जानः प्रणि॒नाय॑ मह॒ते सौ॑भगा॒याछि॑न्नो॒रायः॑ सु॒वीरः॑ ।।

Paragraph: 6 
Verse: 1 
Sentence: 1=a    पृ॑थिव्यै त्वा॒न्तरि॑क्षाय त्वा दि॒वे त्वा
Sentence: 2=b    शुन्ध॑तां लो॒कः पि॑तृ॒षद॑नस् ।
Sentence: 3=c    यवो॑ ऽसि य॒वया॒स्मद्द्वेषो॑ य॒वयारा॑तीः
Sentence: 4=d    पितृ॒णां सद॑नमसि
Sentence: 5=e    स्वावे॒शो॑ ऽस्यग्रे॒गा ने॑तृ॒णां वन॒स्पति॒रधि॑ त्वा स्थास्यति॒ तस्य॑ वित्तात् ।
Sentence: 6=f    दे॒वस्त्वा॑ सवि॒ता मध्वा॑नक्तु
Sentence: 7=g    सुपिप्प॒लाभ्यस्त्वौषधीभ्यस् ।
Sentence: 8=h    उद्दिवं॑ स्तभा॒नान्तरि॑क्षम्पृण पृथि॒वीमुप॑रेण दृंह
Sentence: 9=i    ते ते॒ धामा॑न्युश्मसि ।।

Verse: 2 
Sentence: 1    ग॒मध्ये॒ गावो॒ यत्र॒ भूरि॑शृङ्गा अ॒यासः॑ । अत्राह॒ तदु॑रुगा॒यस्य॒ विष्णोः॑ पर॒मम्प॒दमव॑ भाति॒ भूरेः॑ ।।
Sentence: 2=k    विष्णोः॒ कर्मा॑णि पश्यत॒ यतो॑ व्र॒तानि॑ पस्प॒शे । इन्द्र॑स्य॒ युज्यः॒ सखा॑ ।।
Sentence: 3=l    तद्विष्णोः॑ पर॒मम्प॒दं सदा॑ पश्यन्ति सू॒रयः॑ । दि॒वीव॒ चक्षु॒रात॑तम् ।।
Sentence: 4=m    ब्र॑ह्म॒वनिं॑ त्वा क्षत्र॒वनिं॑ सुप्रजा॒वनिं॑ रायस्पोष॒वनि॒म्पर्यू॑हामि
Sentence: 5=n    ब्रह्म॑ दृंह क्ष॒त्रं दृं॑ह प्र॒जां दृं॑ह रा॒यस्पोषं॑ दृंह
Sentence: 6=o    परि॒वीर॑सि॒ परि॑ त्वा दैवी॒र्विशो॑ व्ययन्ता॒म्परी॒मं रा॒यस्पोषो॒ यज॑मानम्मनु॒ष्या॑स् ।
Sentence: 7=p    अ॒न्तरि॑क्षस्य त्वा॒ साना॒वव॑ गूहामि ।।

Paragraph: 7 
Verse: 1 
Sentence: 1=a    इ॒षे त्वा॑ ।
Sentence: 2=b    उ॑प॒वीर॑सि ।
Sentence: 3=c    उपो॑ दे॒वान्दै॑वी॒र्विशः॒ प्रागु॒र्वह्नी॑रु॒शिज॑स् ।
Sentence: 4=d    बृह॑स्पते धा॒रया॒ वसू॑नि
Sentence: 5=e    ह॒व्या ते॑ स्वदन्ताम्
Sentence: 6=f    देव॑ त्वष्ट॒र्वसु॑ रण्व
Sentence: 7=g    रेव॑ती॒ रम॑ध्वम्
Sentence: 8=h    अ॒ग्नेर्ज॒नित्र॑मसि
Sentence: 9=i    वृष॑णौ स्थस् ।
Sentence: 10=k    उ॒र्वश्य॑स्या॒युर॑सि पुरू॒रवा॑स् ।
Sentence: 11=l    घृते॑ना॒क्ते वृष॑णं दधाथाम् ।
Sentence: 12=m    गाय॒त्रं छन्दो ऽनु॒ प्र जा॑यस्व त्रैष्टुभं॒ जाग॑तं॒ छन्दो ऽनु॒ प्र जा॑यस्व
Sentence: 13=n    भव॑तम् ।।

Verse: 2 
Sentence: 1    नः॒ सम॑नसौ॒ समो॑कसावरे॒पसौ
Sentence: 2=o    मा य॒ज्ञं हिं॑सिष्ट॒म्मा य॒ज्ञप॑तिं जातवेदसौ शिवौ भवतम॒द्य नः॑ ।।
Sentence: 3=p    अ॒ग्नाव॒ग्निश्च॑रति॒ प्रवि॑ष्ट॒ ऋषी॑णाम्पु॒त्रो अ॑धिरा॒ज ए॒षः । स्वा॑हा॒कृत्य॒ ब्रह्म॑णा ते जुहोमि॒ मा दे॒वाना॑म्मिथु॒या क॑र्भाग॒धेय॑म् ।।

Paragraph: 8 
Verse: 1 
Sentence: 1=a    आ द॑दे ।
Sentence: 2=b    ऋ॒तस्य॑ त्वा देवहविः॒ पाशे॒नार॑भे
Sentence: 3=c    धर्षा॒ मानु॑षान्
Sentence: 4=d    अ॒द्भ्यस्त्वौ॑षधीभ्यः॒ प्रोक्षा॑मि ।
Sentence: 5=e    अ॒पाम्पे॒रुर॑सि
Sentence: 6=f    स्वा॒त्तं चि॒त्सदे॑वं ह॒व्यमापो॑ देवीः स्वदतैनम् ।
Sentence: 7=g    सं ते॑ प्रा॒णो वा॒युना॑ गछतां॒ सं यज॑त्रै॒रङ्गा॑नि॒ सं य॒ज्ञप॑तिरा॒शिषा
Sentence: 8=h    घृ॒तेनाक्तौ प॒शुं त्रा॑येथाम् ।
Sentence: 9=i    रेव॑तीर्य॒ज्ञप॑तिम्प्रिय॒धा वि॑शत ।
Sentence: 10=k    उरो॑ अन्तरिक्ष स॒जूर्दे॒वेन॑ ।।

Verse: 2 
Sentence: 1    वाते॑ना॒स्य ह॒विष॒स्त्मना॑ यज॒ सम॑स्य त॒नुवा॑ भव॒ वर्षी॑यो॒ वर्षी॑यसि य॒ज्ञे य॒ज्ञप॑तिं धाः
Sentence: 2=l    पृथि॒व्याः स॒म्पृचः॑ पाहि
Sentence: 3=m    नम॑स्त आतान ।
Sentence: 4=n    अ॑न॒र्वा प्रेहि॑ घृ॒तस्य॑ कु॒ल्यामनु॑ स॒ह प्र॒जया॑ स॒ह रा॒यस्पोषे॑न ।
Sentence: 5=o    आपो॑ देवीः शुद्धा॒युवः॑ शु॒द्धा यू॒यं दे॒वां ऊ॑ढ्वं शु॒द्धा व॒यम्परि॑विष्टाः परिवे॒ष्टारो॑ वो भूयास्म ।।

Paragraph: 9 
Verse: 1 
Sentence: 1=a    वाक्त॒ आ प्या॑यताम्प्रा॒णस्त॒ आ प्या॑यतां॒ चक्षु॑स्त॒ आ प्या॑यता॒म्श्रोत्रं॑ त॒ आ प्या॑यताम
Sentence: 2=b    या ते॑ प्रा॒णाञ्छुग्ज॒गाम॒ या चक्षु॒र्या श्रोत्रं॒ यत्ते॑ क्रू॒रं यदास्थि॑त॒म्तत्त॒ आ प्या॑यतां॒ तत्त॑ ए॒तेन॑ शुन्धताम् ।
Sentence: 3=c    नाभि॑स्त॒ आ प्या॑यताम्पा॒युस्त॒ आ प्या॑यताम् ।
Sentence: 4=d    शु॒द्धाश्च॒रित्राः
Sentence: 5=e    शम॒द्भ्यः ।।

Verse: 2 
Sentence: 1    शमोष॑धीभ्यः॒ शम्पृ॑थिव्यै॒ शमहो॑भ्याम्
Sentence: 2=f    ओष॑धे॒ त्राय॑स्वैनम् ।
Sentence: 3=g    स्वधि॑ते मैनं हिंसीस् ।
Sentence: 4=h    रक्ष॑सा॒म्भागो॑ ऽसि ।
Sentence: 5=i    इ॒दम॒हं रक्षो॑ ऽध॒मम्तमो॑ नयामि
Sentence: 6=k    यो॒ ऽस्मान्द्वेष्टि॒ यं च॑ व॒यं द्वि॒ष्म इ॒दमे॑नमध॒मं तमो॑ नयामि ।
Sentence: 7=l    इ॒षे त्वा
Sentence: 8=m    घृ॒तेन॑ द्यावापृथिवी॒ प्रोर्ण्वा॑थाम्
Sentence: 9=n    अछि॑न्नो॒ रायः॑ सु॒वीर॑स् ।
Sentence: 10=o    उ॒र्व॒न्तरि॑क्ष॒मन्वि॑हि
Sentence: 11=p    वायो॒ वीहि॑ स्तो॒काना॑म् ।
Sentence: 12=q    स्वाहो॒र्ध्वन॑भसं मारु॒तं ग॑छतम् ।।

Paragraph: 10 
Verse: 1 
Sentence: 1=a    सं ते॒ मन॑सा॒ मनः॒ सम्प्रा॒णेन॑ प्रा॒णस् ।
Sentence: 2=b    जुष्टं॑ दे॒वेभ्यो॑ ह॒व्यं घृ॒तव॒त्स्वाहा॑ ।
Sentence: 3=c    अै॒न्द्रः प्रा॒णो अङ्गेअ॑ङ्गे॒ नि दे॑ध्यऐ॒न्द्रो॑ ऽपा॒नो अङ्गेअ॑ङ्गे॒ वि बो॑भुवत् ।
Sentence: 4=d    देव॑ त्वष्ट॒र्भूरि॑ ते॒ संस॑मेतु॒ विषु॑रूपा॒ यत्सल॑क्ष्माणो॒ भव॑थ । दे॑व॒त्रा यन्त॒मव॑से॒ सखा॒यो ऽनु॑ त्वा मा॒ता पि॒तरो॑ मदन्तु ।।
Sentence: 5=e    श्रीर॑सि ।
Sentence: 6=f    अ॒ग्निस्त्वा॑ श्रीणातु ।
Sentence: 7=g    आपः॒ सम॑रिणन्
Sentence: 8=h    वात॑स्य ।। त्वा॒ ध्रज्यै॑ पू॒ष्णो रंह्या॑ अ॒पामोष॑धीनां॒ रोहि॑ष्यै

Verse: 2 
Sentence: 1=i    घृ॒तं घृ॑तपावानः पिबत॒ वसां॑ वसापावानः पिबत ।
Sentence: 2=k    अ॒न्तरि॑क्षस्य ह॒विर॑सि
Sentence: 3=l    स्वाहा॑ त्वा॒न्तरि॑क्षाय
Sentence: 4=m    दिशः॑ प्र॒दिश॑ आ॒दिसो॑ वि॒दिश॑ उ॒द्दिशः
Sentence: 5=n    स्वाहा॑ दि॒ग्भ्यस् ।
Sentence: 6=o    नमो॑ दि॒ग्भ्यः

Paragraph: 11 
Verse: 1 
Sentence: 1=a    स॑मु॒द्रं ग॑छ॒ स्वाहा॒न्तरि॑क्षं गछ॒ स्वाहा॑ दे॒वं स॑वि॒तारं॑ गछ॒ स्वाहा॑होरा॒त्रे ग॑छ॒ स्वाहा॑ मि॒त्रावरु॑णौ गछ॒ स्वाहा॒ सोमं॑ गछ॒ स्वाहा॑ य॒ज्ञं ग॑छ॒ स्वाहा॒ छन्दां॑सि गछ॒ स्वाहा॒ द्यावा॑पृथि॒वी ग॑छ॒ स्वाहा॒नभो॑ दि॒व्यं ग॑छ॒ स्वाहा॒ग्निं वै॑श्वान॒रं ग॑छ॒ स्वाहा॑ ।
Sentence: 2=b    अ॒द्भ्यस्त्वौ॑षधीभ्यस् ।
Sentence: 3=c    मनो॑ मे॒ हार्दि॑ यछ
Sentence: 4=d    त॒नूं त्वच॑म्पु॒त्रं नप्ता॑रमशीय
Sentence: 5=e    शुग॑सि॒ तम॒भि शो॑च॒ यो॒ ऽस्मान्द्वेष्टि॒ यं च॑ व॒यं द्वि॒ष्मस् ।
Sentence: 6=f    धाम्नो॑धाम्नो राजन्नि॒तो व॑रुण नो मुञ्च॒ यदापो॒ अघ्नि॑या॒ वरु॒णेति॒ शपा॑महे॒ ततो॑ वरुण नो मुञ्च ।।

Paragraph: 12 
Verse: 1 
Sentence: 1=a    ह॒विष्म॑तीरि॒मा आपो॑ ह॒विष्मा॑न्दे॒वो अ॑ध्व॒रो ह॒विष्मां॒ आ वि॑वासति ह॒विष्मां॑ अस्तु॒ सूर्यः॑ ।।
Sentence: 2=b    अ॒ग्नेर्वो ऽप॑न्नगृहस्य॒ सद॑सि सादयामि सु॒म्नाय॑ सुम्निमीः सु॒म्ने मा॑ धत्त ।
Sentence: 3=c    इ॑न्द्राग्नि॒योर्भा॑ग॒धेयी॑ स्थ मि॒त्रावरु॑णयोर्भाग॒धेयी॑ स्थ॒ विश्वे॑षां दे॒वानां॑ भाग॒धेयी॑ स्थ
Sentence: 4=d    य॒ज्ञे जा॑गृत ।।

Paragraph: 13 
Verse: 1 
Sentence: 1=a    हृ॒दे त्वा॒ मन॑से त्वा दि॒वे त्वा॒ सूर्या॑य त्वा ।
Sentence: 2=b    ऊ॒र्ध्वमि॒मम॑ध्व॒रं कृ॑धि दि॒वि दे॒वेषु॒ होत्रा॑ यछ
Sentence: 3=c    सोम॑ राज॒न्नेह्यव॑ रोह
Sentence: 4=d    मा भेर्मा सं वि॑क्थास् ।
Sentence: 5=e    मा त्वा॑ हिंसिषम्
Sentence: 6=f    प्र॒जास्त्वमु॒पाव॑रोह प्र॒जास्त्वामु॒पाव॑रोहन्तु
Sentence: 7=g    शृ॒णोत्व॒ग्निः स॒मिधा॒ हव॑म्मे शृ॒ण्वन्त्वापो॑ धि॒षणा॑श्च दे॒वीः । शृ॒णोत॑ ग्रावाणो वि॒दुषो॒ नु ।। य॒ज्ञं शृ॒णोतु॑ दे॒वः स॑वि॒ता हव॑म्मे ।।

Verse: 2 
Sentence: 1=h    देवी॑रापो अपां नपा॒द्य ऊ॒र्मिर्ह॑वि॒ष्य॑ इन्द्रि॒यावा॑न्म॒दिन्त॑म॒स्तं दे॒वेभ्यो॑ देव॒त्रा ध॑त्त शु॒क्रं शु॑क्र॒पेभ्यो॒ येषा॑म्भा॒ग स्थ स्वाहा
Sentence: 2=i    कार्षि॑र॒स्यपा॒पाम्मृ॒ध्रम् ।
Sentence: 3=k    स॑मु॒द्रस्य॒ वोक्षि॑त्या॒ उन्न॑ये
Sentence: 4=l    यम॑ग्ने पृ॒त्सु मर्त्य॒मावो॒ वाजे॑षु॒ यं जु॒नाः । स यन्ता॒ शश्व॑ती॒रिषः॑ ।।

Paragraph: 14 
Verse: 1 
Sentence: 1=a    त्वम॑ग्ने रु॒द्रो असु॑रो म॒हो दि॒वस्त्वं शर्धो॒ मारु॑तम्पृ॒क्ष ई॑शिषे । त्वं वातै॑ररुणैर्यासि शंग॒यस्त्वम्पू॒षा वि॑ध॒तः पा॑सि॒ नु त्मना॑ ।।
Sentence: 2=b    आ वो॒ राजा॑नमध्व॒रस्य॑ रु॒द्रं होता॑रं सत्य॒यजं॒ रोद॑स्योः । अ॒ग्निम्पु॒रा त॑नयि॒त्नोरचि॑त्ता॒द्धिर॑ण्यरूप॒मव॑से कृणुध्वम् ।।
Sentence: 3=c    अ॒ग्निर्होता॒ नि ष॑सादा॒ यजी॑यानु॒पस्थे॑ मा॒तुः सु॑र॒भावु॑ लो॒के । युवा॑ क॒विः पु॑रुनि॒ष्ठः ।।

Verse: 2 
Sentence: 1    ऋतावा॑ ध॒र्ता कृ॑ष्टी॒नामु॒त मध्य॑ इ॒द्धः ।।
Sentence: 2=d    सा॒ध्वीम॑कर्दे॒ववी॑तिं नो द॒य य॒ज्ञस्य॑ जि॒ह्वाम॑विदाम॒ गुह्या॑म् । स आयु॒रागा॑त्सुर॒भिर्वसा॑नो भ॒द्राम॑कर्दे॒वहू॑तिं नो अ॒द्य ।।
Sentence: 3=e    अक्र॑न्दद॒ग्नि स्त॒नय॑न्निव द्यौः॒ क्षामा॒ रेरि॑हद्वी॒रुधः॑ सम॒ञ्जन् । स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ।।
Sentence: 4=f    त्वे वसू॑नि पुर्वणीक ।।

Verse: 3 
Sentence: 1    हो॑तर्दो॒षा वस्तो॒रेरि॑रे य॒ज्ञिया॑सः । क्षामे॑व॒ विश्वा॒ भुव॑नानि॒ यज्मि॒न्त्सं सौ॑भगानि दधि॒रे पा॑व॒के ।।
Sentence: 2=g    तुभ्यं॒ ता अ॑ङ्गिरस्तम॒ विश्वाः॑ सुक्षि॒तयः॒ पृथ॑क् । अग्ने॒ कामा॑य येमिरे ।।
Sentence: 3=h    अ॒श्याम॒ तं काम॑मग्ने॒ तवो॒ ऽत्य॒श्याम॑ र॒यिं र॑यिवः सु॒वीर॑म् । अ॒श्याम॒ वाज॑म॒भि वा॒जय॑न्तो॒ ऽश्याम॑ द्यु॒म्नम॑जरा॒जरं॑ ते ।।
Sentence: 4=i    श्रेष्ठं॑ यविष्ठ भार॒ताग्ने॑ द्यु॒मन्त॒मा भ॑र ।।

Verse: 4 
Sentence: 1    वसो॑ पुरु॒स्पृहं॑ र॒यिम् ।।
Sentence: 2=k    स श्वि॑ता॒नस्त॑न्य॒तू रो॑चन॒स्था अ॒जरे॑भि॒र्नान॑दद्भि॒र्यवि॑ष्ठः । यः पा॑व॒कः पु॑रु॒तमः॑ पु॒रूणि॑ पृ॒थून्य॒ग्निर॑नु॒याति॒ भर्व॑न् ।।
Sentence: 3=l    आयु॑ष्टे वि॒श्वतो॑ दधद॒यम॒ग्निर्वरे॑ण्यः । पुन॑स्ते॒ प्राण आय॑ति॒ परा॒ यक्ष्मं॑ सुवामि ते ।।
Sentence: 4=m    आ॑यु॒र्दा अ॑ग्ने ह॒विषो॑ जुषा॒णो घृ॒तप्र॑तीको घृ॒तयो॑निरेधि । घृ॒तम्पी॒त्वा मधु॒ चारु॒ गव्य॑म्पि॒तेव॑ पु॒त्रम॒भि ।।

Verse: 5 
Sentence: 1    र॑क्षतादि॒मम् ।।
Sentence: 2=n    तस्मै॑ ते प्रति॒हर्य॑ते॒ जात॑वेदो॒ विच॑र्षणे । अग्ने॒ जना॑मि सुष्टु॒तिम् ।।
Sentence: 3=o    दि॒वस्परि॑ प्रथ॒मं ज॑ज्ञे अ॒ग्निर॒स्मद्द्वि॒तीय॒म्परि॑ जा॒तवे॑दाः । तृ॒तीय॑म॒प्सु नृ॒मणा॒ अज॑स्र॒मिन्धा॑न एनं जरते स्वा॒धीः ।।
Sentence: 4=p    शुचिः॑ पावक॒ वन्द्यो ऽग्ने॑ बृ॒हद्वि रो॑चसे । त्वम्घृ॒तेभि॒राहु॑तः ।।
Sentence: 5=q    दृ॑शा॒नो रु॒क्म उ॒र्व्या व्य॑द्यौद्दु॒र्मर्ष॒मायुः॑ श्रि॒ये रु॑चा॒नः । अ॒ग्निर॒मृतो॑ अभव॒द्वयो॑भिः ।।

Verse: 6 
Sentence: 1    यदे॑नं द्यौ॒रज॑नयत्सु॒रेताः॑ ।।
Sentence: 2=r    आ यदि॒षे नृ॒पतिं॒ तेज॒ आन॒ट्छुचि॒ रेतो॒ निषि॑क्तं द्यौरभीके । अ॒ग्निः शर्ध॑मनव॒द्यं युवा॑नं स्वा॒धियं॑ जनयत्सू॒दय॑च्च ।।
Sentence: 3=s    स तेजी॑यसा॒ मन॑सा॒ त्वोत॑ उ॒त शि॑क्ष स्वप॒त्यस्य॑ शि॒क्षोः । अग्ने॑ रा॒यो नृत॑मस्य॒ प्रभू॑तौ भू॒याम॑ ते सुष्टु॒तय॑श्च॒ वस्वः॑ ।।
Sentence: 4=t    अग्ने॒ सह॑न्त॒मा भ॑र द्यु॒म्नस्य॑ प्रा॒सहा॑ र॒यिम् । विश्वा॒ यः ।।

Verse: 7 
Sentence: 1    चर्ष॑णीर॒भ्या॒सा वाजे॑षु सा॒सह॑त् ।।
Sentence: 2=u    तम॑ग्ने पृतना॒सहं॑ र॒यिं स॑हस्व॒ आ भ॑र । त्वं हि स॒त्यो अद्भु॑तो दा॒ता वाज॑स्य॒ गोम॑तः ।।
Sentence: 3=v    उ॒क्षान्ना॑य व॒शान्ना॑य॒ सोम॑पृष्ठाय वे॒धसे॑ । स्तोमै॑र्विधेमा॒ग्नये॑ ।।
Sentence: 4=w    व॒द्मा हि सू॑नो॒ अस्य॑द्म॒सद्वा॑ च॒क्रे अ॒ग्निर्ज॒नुषाज्मान्न॑म् । स त्वं न॑ ऊर्जसन॒ ऊर्जं॑ धा॒ राजे॑व जेरवृ॒के क्षे॑ष्य॒न्तः ।।
Sentence: 5=x    अग्न॒ आयूं॑षि ।।

Verse: 8 
Sentence: 1    प॑वस॒ आ सु॒वोर्ज॒मिषं॑ च नः । आ॒रे ब॑धस्व दु॒छुना॑म् ।।
Sentence: 2=y    अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य॑म् । दध॒त्पोषं॑ र॒यिम्मयि॑ ।।
Sentence: 3=z    अग्ने॑ पावक रो॒चिषा॑ म॒न्द्रया॑ देव जि॒ह्वया॑ । आ दे॒वान्व॑क्षि॒ यक्षि॑ च ।।
Sentence: 4=aa    स नः॑ पावक दीदि॒वो ऽग्ने॑ दे॒वां इ॒हा व॑ह । उप॑ य॒ज्ञं ह॒विश्च॑ नः ।।
Sentence: 5=bb    अ॒ग्निः शुचि॑व्रततमः॒ शुचि॒र्विप्रः॒ शुचिः॑ क॒विः । शुची॑ रोचत॒ आहु॑तः ।।
Sentence: 6=cc    उद॑ग्ने॒ शुच॑य॒स्तव॑ शु॒क्रा भ्राज॑न्त ईरते । तव॒ ज्योतीं॑ष्य॒र्चयः॑ ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.