TITUS
Black Yajur-Veda: Taittiriya-Samhita
Part No. 5
Chapter: 5
Paragraph: 1
Verse: 1
Sentence: 1
दे॑वासु॒राः संय॑त्ता आस॒न्ते दे॒वा वि॑ज॒यमु॑प॒यन्तो ऽग्नौ वा॒मं वसु॒ सं न्य॑दधत ।
Sentence: 2
इ॒दमु॑ नो भवैष्यति॒ यदि॑ नो जे॒ष्यन्ती॑ति
Sentence: 3
तद॒ग्निर्न्य॑कामयत॒ तेनापा॑क्रामत्
Sentence: 4
तद्दे॒वा वि॒जित्या॑व॒रुरु॑त्समाना॒ अन्वा॑य॒न्तद॑स्य॒ सह॒सादि॑त्सन्त
Sentence: 5
सो॑ ऽरोदी॒द्यदरो॑दी॒त्तद्रु॒द्रस्य॑ रुद्र॒त्वम् ।
Sentence: 6
यदश्र्वशी॑यत॒ तत् ।।
Verse: 2
Sentence: 1
र॑ज॒तं हिर॑ण्यमभव॒त्तस्मा॑द्रज॒तं हिर॑ण्यमदक्षि॒ण्यम॑श्रु॒जं हि
Sentence: 2
यो ब॒र्हिषि॒ ददा॑ति पु॒रास्य॑ संवत्स॒राद्गृ॒हे रु॑दन्ति॒ तस्मा॑द्ब॒र्हिषि॒ न देय॑म् ।
Sentence: 3
सो॒ ऽग्निर॑ब्रवीद्भा॒ग्य॑सा॒न्यथ॑ व इ॒दमिति॑ पुनरा॒धेयं॑ ते॒ केव॑ल॒मित्य॑ब्रुवन्नृ॒ध्नव॒तलु॒ स इत्य॑ब्रवी॒द्यो म॑द्देव॒त्य॑म॒ग्निमा॒दधा॑ता॒ इति
Sentence: 4
तम्पू॒षाध॑त्त॒ तेन॑ ।।
Verse: 3
Sentence: 1
पू॒षार्ध्नो॒त्तस्मा॑त्पौ॒ष्णाः प॒शव॑ उच्यन्ते॒ तम्त्वष्टाध॑त्त॒ तेन॒ त्वष्टा॑र्ध्नो॒त्तस॒ष्ट्राः प॒शव॑ उच्यन्ते
Sentence: 2
तम्मनु॒राध॑त्त॒ तेन॒ मनु॑रार्ध्नो॒त्तस्मा॑न्मान॒व्यः॑ प्र॒जा उ॑च्यन्ते
Sentence: 3
तम्धा॒ताध॑त्त॒ तेन॑ धा॒तार्ध्नो॑त्संवत्स॒रो वै॑ धा॒ता तस्मा॑त्संवत्स॒रम्प्र॒जाः प॒शवोनु॒ प्र जा॑यन्ते । य ए॒वम्पु॑नरा॒धेय॒स्यर्द्धिं॒ वेद॑ ।।
Verse: 4
Sentence: 1
ऋ॒ध्नोत्ये॒व यो॑ ऽस्यै॒वं ब॒न्धुतां॒ वेद॒ बन्धु॑मान्भवति ।
Sentence: 2
भा॑ग॒धेयं वाअ॒ग्निराहि॑त इ॒छमा॑नः प्र॒जाम्प॒शून्यज॑मान॒स्योप॑ दोद्राव ।
Sentence: 3
उ॒द्वास्य॒ पुन॒रा द॑धीत भाग॒धेये॑नैवैनं॒ सम॑र्धय॒त्यथो॒ शान्ति॑रे॒वास्यै॒षा
Sentence: 4
पुन॑र्वस्वो॒रा द॑धीतै॒तद्वै॑ पुनरा॒धेय॑स्य॒ नक्ष॑त्रं॒ यत्पुन॑र्वसू॒ स्वाया॑मेवैनं दे॒वता॑यामा॒धाय॑ ब्रह्मवर्च॒सी भ॑वति
Sentence: 5
दर्भै॒रा द॑धा॒त्यया॑तयामवाय
Sentence: 6
दर्भै॒रा द॑धात्य॒द्भ्य एवैन॒मोष॑धीभ्यो ऽव॒रुध्याध॑त्ते
Sentence: 7
पञ्च॑कपालः पुरो॒डाशो॑ भवति पञ्च॒ वा ऋ॒तव॑ ऋ॒तुभ्य॑ एवैनमव॒रुध्याध॑त्ते ।।
Paragraph: 2
Verse: 1
Sentence: 1
परा॒ वा ए॒ष य॒ज्ञम्प॒शून्व॑पति॒ यो॒ ऽग्निमु॑द्वा॒सय॑ते ।
Sentence: 2
पञ्च॑कपालः पुरोडाशो भवति
Sentence: 3
पाङ्क्तो॑ य॒ज्ञः पाङ्क्ताः॑ प॒शवो॑ य॒ज्ञमे॒व प॒शूनव॑रुन्द्धे ।
Sentence: 4
वी॑र॒हा वा ए॒ष दे॒वानां॒ यो॒ ऽग्निमु॑द्वा॒सय॑ते
Sentence: 5
न वा ए॒तस्य॑ ब्राह्म॒णा ऋ॑ता॒यवः॑ पु॒रान्न॑मक्षन् ।
Sentence: 6
प॒ङ्क्त्यो॑ याज्यानुवा॒क्या॑ भवन्ति
Sentence: 7
पाङ्क्तो॑ य॒ज्ञः पाङ्क्तः॒ पुरु॑षो दे॒वाने॒व वी॒रं नि॑रव॒दाया॒ग्निम्पुन॑रा ।।
Verse: 2
Sentence: 1
ध॑त्ते
Sentence: 2
श॒ताक्ष॑रा भवन्ति श॒तायुः॒ पुरु॑षः श॒तेन्द्रि॑य॒ आयु॑ष्ये॒वेन्द्रि॒ये प्रति॑ तिष्ठति
Sentence: 3
यद्वा अ॒ग्निराहि॑तो॒ नर्ध्यते॒ ज्यायो॑ भाग॒धेयं॑ निका॒मय॑मानो॒ यदा॑ग्ने॒यं सर्व॒म्भव॑ति सै॒वास्यर्द्धिः
Sentence: 4
सं वा ए॒तस्य॑ गृ॒हे वाक्सृ॑ज्यते॒ यो॒ ऽग्निमु॑द्वा॒सय॑ते॒ स वाचं॒ संसृ॑ष्टां॒ यज॑मान ईश्व॒रो ऽनु॒ परा॑भवितो॒र्विभ॑क्तयो भवन्ति वा॒चो वि॑धृत्यै॒ यज॑मान॒स्याप॑राभावाय ।।
Verse: 3
Sentence: 1
विभ॑क्तिं करोति॒ ब्रह्मै॒व तद॑कर् ।
Sentence: 2
उ॑पां॒शु य॑जति॒ यथा॑ वा॒मं वसु॑ विविदा॒नो गूह॑ति ता॒दृगे॒वतद॒ग्निम्प्रति॑ स्विष्ट॒कृतं॒ निरा॑ह॒ यथा॑ वा॒मं वसु॑ विविदा॒नः प्र॑का॒शं जिग॑मिषति ता॒दृगे॒व तत् ।
Sentence: 3
विभ॑क्तिमु॒क्त्वा प्र॑या॒जेन॒ वष॑ट्करोत्या॒यत॑नादे॒वनै॑ति
Sentence: 4
यज॑मानो वै पुरो॒डाशः॑ प॒शव॑ ए॒ते आहु॑ती॒ यद॒भितः॑ पुरो॒डाश॑मे॒ते आहु॑ती ।।
Verse: 4
Sentence: 1
जु॒होति॒ यज॑मानमे॒वोभ॒यतः॑ प॒शुभिः॒ परि॑ गृह्णाति
Sentence: 2
कृ॒तय॑जुः॒ सम्भृ॑तसम्भार॒ इत्या॑हु॒र्न स॒म्भृत्याः॑ सम्भा॒रा न यजुः॑ कर्त॒व्य॑मिति ।
Sentence: 3
अथो॒ खलु॑ स॒म्भृत्या॑ ए॒व स॑म्भा॒राः क॑र्त॒व्यं॒ यजु॑र्य॒ज्ञस्य॒ समृ॑द्ध्यै
Sentence: 4
पुनर्निष्कृ॒तो रथो॒ दक्षि॑णा पुनरुत्स्यू॒तं वासः॑ पुनरुत्सृ॒ष्टो॑ ऽन॒ड्वान्पु॑नर्दा॒धेय॑स्य॒ समृ॑द्ध्यै
Sentence: 5
स॒प्त ते॑ अग्ने स॒मिधः॑ स॒प्त जि॒ह्वा इत्य॑ग्निहो॒त्रं जु॑होति
Sentence: 6
यत्र॑यत्रै॒वास्य॒ न्य॑क्तं॒ ततः॑ ।।
Verse: 5
Sentence: 1
एवैन॒मव॑ रुन्द्धे
Sentence: 2
वीर॒हा वा ए॒ष दे॒वाना॒म्यो॒ ऽग्निमु॑द्वा॒सय॑ते॒ तस्य॒ वरु॑ण ए॒वर्ण॒यादा॑ग्निवारु॒णमेका॑दशनु॒ निर्व॑पे॒द्यं चै॒व हन्ति॒ यश्चा॑स्यर्ण॒यात्तौ॑ भाग॒धेये॑न प्रीणाति॒ नार्ति॒मार्छ॑ति॒ यज॑मानः ।।
Paragraph: 3
Verse: 1
Sentence: 1=a
भूमि॑र्भू॒म्ना द्यौ॑र्वरि॒णान्तरि॑क्षम्महि॒त्वा । उ॒पस्थे॑ ते देव्यदिते॒ ऽग्निम॑न्ना॒दम॒न्नाद्या॒या द॑धे ।।
Sentence: 2=b
आयं गौः॒ पृश्नि॑रक्रमी॒दस॑नन्मा॒तर॒म्पुनः॑ । पि॒तरं॑ च प्र॒यन्त्सुवः॑ ।।
Sentence: 3=c
त्रिं॒शद्धाम॒ वि रा॑जति॒ वाक्प॑तं॒गाय॑ शिश्रिये । प्रत्य॑स्य वह॒ द्युभिः॑ ।।
Sentence: 4=d
अ॒स्य प्रा॒णाद॑पान॒त्य॒न्तश्च॑रति रोच॒ना । व्य॑ख्यन्महि॒षः सुवः॑ ।।
Sentence: 5=e
यत्त्वा॑ ।।
Verse: 2
Sentence: 1
क्रु॒द्धः प॑रो॒वप॑ म॒न्युना॒ यदव॑र्त्या । सु॒कल्प॑मग्ने॒ तत्तव॒ पुन॒स्त्वोद्दी॑पयामसि ।।
Sentence: 2=f
यत्ते॑ म॒न्युप॑रोप्तस्य पृथि॒वीमनु॑ दध्व॒से । आ॑दि॒त्या विश्वे॒ तद्दे॒वा वस॑वश्श स॒माभ॑रन् ।।
Sentence: 3=g
मनो॒ ज्योति॑र्जुषता॒माज्यं॒ विछि॑न्नं य॒ज्ञं समि॒मं द॑धातु । बृह॒स्पति॑स्तनुतामि॒मं नो॒ विश्वे॑ दे॒वा इ॒ह मा॑दयन्ताम् ।।
Sentence: 4=h
स॒प्त ते॑ अग्ने स॒मिधः॑ स॒प्त जि॒ह्वाः स॒प्त ।।
Verse: 3
Sentence: 1
ऋष॑यः स॒प्त धाम॑ प्रि॒याणि॑ । स॒प्त होत्राः॑ सप्त॒धा त्वा॑ यजन्ति स॒प्त योनी॒रा पृ॑णस्वा घृ॒तेन॑ ।।
Sentence: 2=i
पुन॑रू॒र्जा नि व॑र्तस्व॒ पुन॑रग्न इ॒षायु॑षा । पुन॑र्नः पाहि वि॒श्वतः॑ ।।
Sentence: 3=k
स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या । वि॒श्वप्स्नि॑या वि॒श्वत॒स्परि॑ ।।
Sentence: 4=l
लेकः॒ सले॑कः सु॒लेक॒स्ते न॑ आदि॒त्या आज्यं॑ जुषा॒णा वि॑यन्तु॒ केतः॒ सके॑तः सु॒केत॒स्ते न॑ आदि॒त्या आज्यं॑ जुषा॒णा वि॑यन्तु॒ विव॑स्वां॒ अदि॑ति॒र्देव॑जूति॒स्ते न॑ आदि॒त्या आज्यं॑ जुषा॒णा वि॑यन्तु ।।
Paragraph: 4
Verse: 1
Sentence: 1
भूमि॑र्भू॒म्ना द्यौ॑र्वरि॒णेत्या॑हा॒शिषैवैन॒मा ध॑त्ते
Sentence: 2
स॒र्पा वै॒ जीर्य॑न्तो ऽमन्यन्त॒ स ए॒तं क॑स॒र्णीरः॑ काद्रवे॒यो मन्त्र॑मपश्य॒त्ततो वै॒ ते जी॒र्णास्त॒नूरपा॑घ्नत
Sentence: 3
सर्परा॒ज्ञिया॑ ऋ॒ग्भिर्गार्ह॑पत्य॒मा द॑धाति पुनर्न॒वमेवैनम॒जरं॑ कृ॒त्वा ध॑त्ते ।
Sentence: 4
अथो॑ पू॒तमे॒व पृ॑थि॒वीम॒न्नाद्यं॒ नोपा॑नमत्सै॒तम् ।।
Verse: 2
Sentence: 1
मन्त्र॑मपश्य॒त्ततो वै॒ ताम॒न्नाद्य॒मुपा॑नमत् ।
Sentence: 2
यत्स॑र्परा॒ज्ञिया॑ ऋ॒ग्भिर्गार्ह॑पत्यमा॒दधा॑त्य॒न्नाद्य॒स्याव॑रुद्ध्यै ।
Sentence: 3
अथो॑ अ॒स्यामेवैन॒म्प्रति॑ष्ठित॒मा ध॑त्ते
Sentence: 4
यत्त्वा॑ क्रु॒द्धः प॑रो॒वपेत्या॒हाप॑ ह्नुत ए॒वास्मै॒ तत्
Sentence: 5
पुन॒स्त्वोद्दी॑पयाम॒सीत्या॑ह॒ समि॑न्द्ध एवैनम् ।
Sentence: 6
यत्ते॑ म॒न्युप॑रोप्त॒स्येत्या॑ह दे॒वता॑भिरे॒व ।।
Verse: 3
Sentence: 1
ए॑नं॒ सम्भ॑रति
Sentence: 2
वि वा ए॒तस्य॑ य॒ज्ञश्छि॑द्यते॒ यो॒ ऽग्निमु॑द्वा॒सय॑ते॒ बृह॒स्पति॑वत्य॒र्चोप॑ तिष्ठते॒ ब्रह्म वै दे॒वाना॒म्बृह॒स्पति॒र्ब्रह्म॑णै॒व य॒ज्ञं सं द॑धाति
Sentence: 3
वि छि॑न्नं य॒ज्ञं स॑मि॒मं द॑धा॒त्वित्या॑ह सं॒तत्यै
Sentence: 4
विश्वे॑ दे॒वा इ॒ह मा॑दयन्ता॒मित्या॑ह सं॒तत्यै॒व य॒ज्ञं दे॒वेभ्यो ऽनु॑ दिशति
Sentence: 5
स॒प्त ते॑ अग्ने स॒मिधः॑ स॒प्त जि॒ह्वाः ।।
Verse: 4
Sentence: 1
इत्या॑ह स॒प्तस॑प्त वै सप्त॒धाग्नेः प्रि॒यास्त॒नुव॒स्ता ए॒वाव॑ रुन्द्धे
Sentence: 2
पुन॑रू॒र्जा स॒ह र॒य्येत्य॒भितः॑ पुरो॒डाश॒माहु॑ती जुहोति॒ यज॑मानमे॒वोर्जा च॑ र॒य्या चो॑भ॒यतः॒ परि॑ गृह्णाति ।
Sentence: 3
आ॑दि॒त्या वा अ॒स्माल्लो॒काद॒मुं लो॒कमा॑य॒न्ते॒ ऽमुष्मिँ॑ लो॒के व्य॑तृष्य॒न्त इ॒मं लो॒कम्पु॒स्त आ॑र्ध्नुव॒न्ते सु॑व॒र्गं लो॒कमा॑यन्
Sentence: 4
यः प॑रा॒चीन॑म्पुनरा॒धेया॑द॒ग्निमा॒दधी॑त॒ स ए॒तान्होमा॑ञ्जुहुया॒द्यामे॒वादि॒त्या ऋद्धि॒म
Paragraph: 5
Verse: 1
Sentence: 1=a
{F
उपप्र॒यन्तो
{W
उयप्र॒यन्तो
अध्व॒रम्मन्त्रं॑ वोचेमा॒ग्नये॑ । आ॒रे अ॒स्मे च॑ शृण्व॒ते ।।
Sentence: 2=b
अ॒स्य प्र॒त्नामनु॒ द्युतं॑ शु॒क्रं दु॑दुह्रे॒ अह्र॑यः । पयः॑ सहस्र॒सामृषि॑म् ।।
Sentence: 3=c
अ॒ग्निर्मू॒र्धा दि॒वः क॒कुत्पतिः॑ पृथि॒व्या अ॒यम् । अ॒पां रेतां॑सि जिन्वति ।।
Sentence: 4=d
अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्यः॑ । यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भुवं॑ वि॒शेवि॑शे ।।
Sentence: 5=e
उ॒भा वा॑मिन्द्राग्नी आहु॒वध्यै॑ ।।
Verse: 2
Sentence: 1
उ॒भा राध॑सः स॒ह मा॑द॒यध्यै॑ । उ॒भा दा॒तारा॑वि॒षां र॑यी॒णामु॒भा वाज॑स्य सा॒तये॑ हुवे वाम् ।
Sentence: 2=f
अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः । तं जा॒नन्न॑ग्न॒ आ रो॒हाथा॑ नो वर्धया र॒यिम् ।
Sentence: 3=g
अग्न॒ आयूं॑षि पवस॒ आ सु॒वोज्र॒मिषं॑ च नः । आ॒रे बा॑धस्व दु॒छुना॑म् ।।
Sentence: 4=h
अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य॑म् ।। दध॒त्पोषं॑ र॒यिम् ।।
Verse: 3
Sentence: 1
मयि॑ ।।
Sentence: 2=i
अग्ने॑ पावक रो॒चिषा॑ म॒न्द्रया॑ देव जि॒ह्वया॑ । आ दे॒वान्व॑क्षि॒ यक्षि॑ च ।।
Sentence: 3=k
स नः॑ पावक दीदि॒वो ऽग्ने॑ दे॒वां इ॒हा व॑ह । उप॑ य॒ज्ञं ह॒विश्च॑ नः ।।
Sentence: 4=l
अ॒ग्निः शुचि॑व्रततमः॒ शुचि॒र्विप्रः॒ शुचिः॑ क॒विः । शुची॑ रोचत॒ आहु॑तः ।।
Sentence: 5=m
उद॑ग्ने॒ शुच॑य॒स्तव॑ शु॒क्रा भ्राज॑न्त ईरते । तव॒ ज्योतीं॑ष्य॒र्चयः॑ ।।
Sentence: 6=n
आ॑यु॒र्दा अ॑ग्ने॒ ऽस्यायु॑र्मे ।।
Verse: 4
Sentence: 1
दे॑हि वर्चो॒दा अ॑ग्ने ऽसि॒ वर्चो॑ मे देहि तनू॒पा अ॑ग्ने ऽसि त॒नुव॑म्मे पाहि ।
Sentence: 2=o
अग्ने॒ यन्मे॑ त॒नुवा॑ ऊ॒नं तन्म॒ आ पृ॑ण ।
Sentence: 3=p
चित्रा॑वसो स्व॒स्ति ते॑ पा॒रम॑शीय ।
Sentence: 4=q
इन्धा॑नास्त्वा श॒तं हिमा॑ द्यु॒मन्तः॒ समि॑धीमहि॒ वय॑स्वन्तो वय॒स्कृतं॒ यश॑स्वन्तो यश॒स्कृतं॑ सु॒वीरा॑सो॒ अदा॑भ्यम् । अग्ने॑ सपत्न॒दम्भ॑नं॒ वर्षि॑ष्ठे॒ अधि॒ नाके॑ ।
Sentence: 5=r
सं त्वम॑ग्ने॒ सूर्य॑स्य॒ वर्च॑सागथाः॒ समृषी॑णां स्तु॒तेन॒ सम्प्रि॒येण॒ धाम्ना॑ ।
Sentence: 6=s
त्वम॑ग्ने॒ सूर्य॑वर्चा असि॒ सम्मामायु॑षा॒ वर्च॑सा प्र॒जया॑ सृज ।।
Paragraph: 6
Verse: 1
Sentence: 1=a
सम्प॑श्यामि प्र॒जा अ॒हमिड॑प्रजसो मान॒वीः । सर्वा॑ भवन्तु नो गृ॒हे ।।
Sentence: 2=b
अम्भ॒ स्थाम्भो॑ वो भक्षीय॒ मह॑ स्थ॒ महो॑ वो भक्षीय॒ सह॑ स्थ॒ सहो॑ वो भक्षी॒योर्ज॒ स्थोर्जं॑ वो भक्षीय
Sentence: 3=c
रेव॑ती॒ रम॑ध्वम॒स्मिँ लो॒के॒ ऽस्मिन्गो॒ष्ठे॒ ऽस्मिन्क्षये॒ ऽस्मिन्योना॑विहै॒व स्ते॒तो माप॑ गात ब॒ह्वीर्मे॑ भूयास्त ।।
Verse: 2
Sentence: 1=d
सं॑हि॒तासि॑ विश्वरू॒पीरा मो॒र्जा वि॒शा गौ॑प॒त्येना रा॒यस्पोषे॑ण
Sentence: 2=e
सहस्रपो॒षं वः॑ पुष्यास॒म्मयि॑ वो॒ रायः॑ श्रयन्ताम्
Sentence: 3=f
उप॑ त्वाग्ने दि॒वेदि॑वे॒ दोषा॑वस्तर्धि॒या व॒यम् । नमो॒ भर॑न्त॒ एम॑सि ।।
Sentence: 4=g
राज॑न्तमध्व॒राणा॑म्गो॒पामृ॒तस्य॒ दीदि॑विम् । वर्ध॑मानं॒ स्वे दमे॑ ।।
Sentence: 5=h
स नः॑ पि॒तेव॑ सू॒ववे ऽग्ने॑ सूपाय॒नो भ॑व । सच॑स्वा नः स्व॒स्तये॑ ।।
Sentence: 6=i
अग्ने॑ ।।
Verse: 3
Sentence: 1
त्वं नो॒ अन्त॑मः । उ॒त त्रा॒ता शि॒वो भ॑व वरू॒थ्यः॑ । तं त्वा॑ शोचिष्ठ दीदिवः । सु॒म्नाय॑ नू॒नमी॑महे॒ सखि॑भ्यः । वसु॑र॒ग्निर्वसु॑श्रवाः । अछा॑ नक्षि द्यु॒मत्त॑मो र॒यिं दाः॑ ।।
Sentence: 2=k
ऊ॒र्जा वः॑ पश्याम्यू॒र्जा मा॑ पश्यत रा॒यस्पोषे॑ण वः पश्यामि रा॒यस्पोषे॑ण मा पश्यत ।
Sentence: 3=l
इडा॑ स्थ मधु॒कृतः॑ स्यो॒ना मा वि॑श॒तेरा॒ मदः॑ । स॑हस्रपो॒षं वः॑ पुष्यासम् ।।
Verse: 4
Sentence: 1
मयि॑ वो॒ रायः॑ श्रयन्ताम् ।।
Sentence: 2=m
तत्स॑वि॒तुर्वरे॑ण्य॒म्भर्गो॑ दे॒वस्य॑ धीमहि । धियो॒ यो नः॑ प्रचो॒दया॑त् ।।
Sentence: 3=n
सो॒मानं॒ स्वर॑णं कृणु॒हि ब्र॑ह्मणस्पते । क॒क्षीव॑न्त॒म्य औ॑शि॒जम् ।।
Sentence: 4=o
क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ । उपो॒पेन्नु म॑घव॒न्भुय॒ इन्नु ते॒ दानं॑ दे॒वस्य॑ पृच्यते ।।
Sentence: 5=p
परि॑ त्वाग्ने॒ पुरं॑ व॒यं विप्रं॑ सहस्य धीमहि । धृ॒षद्व॑र्णं दि॒वेदि॑वे भे॒त्तार॑म्भङ्गु॒राव॑तः ।।
Sentence: 6=q
अग्ने॑ गृहपते सुगृहप॒तिर॒हं त्वया॑ गृ॒हप॑तिना भूयासं सुगृहप॒तिर्मया॒ त्वं गृ॒हप॑तिना भूयाः श॒तं हि॒मास्तामा॒शिष॒मा शा॑से॒ तन्त॑वे॒ ज्योति॑ष्मतीं॒ तामा॑शिष॒मा शा॑से॒ ऽमुष्मै॒ ज्योति॑ष्मतीम् ।।
Paragraph: 7
Verse: 1
Sentence: 1
अय॑ज्ञो॒ वा ए॒ष यो॑ ऽसा॒मोप॑प्र॒यन्तो॑ अध्व॒रमित्या॑ह॒ स्तोम॑मे॒वास्मै॑ युन॒क्त्युपेत्या॑ह प्र॒जा वै॑ प॒शव॒ उपे॒मं लो॒कम्प्र॒जामे॒व प॒शूनि॒मं लो॒कमुपै॑ति ।
Sentence: 2
अ॒स्य प्र॒त्नामनु॒ द्युत॒मित्या॑ह सुव॒र्गो वै॑ लो॒कः प्र॒त्नः सु॑व॒र्गमे॒व लो॒कं स॒मारो॑हति ।
Sentence: 3
अ॒ग्निर्मू॒र्धा दि॒वः क॒कुदित्या॑ह मू॒र्धान॑म् ।।
Verse: 2
Sentence: 1
एवैनं समा॒नानां॑ करो॒त्यथो॑ देवलो॒कादे॒व म॑नुष्यलो॒के प्रति॑ तिष्ठति ।
Sentence: 2
अ॒यमि॒ह प्र॑थ॒मो धा॑यि धा॒तृभि॒रित्या॑ह॒ मुख्य॑मेवैनं करोति ।
Sentence: 3
उ॒भा वा॑मिन्द्राग्नी आहु॒वध्या॒ इत्याहौजो॒ बल॑मे॒वाव॑ रुन्द्धे ।
Sentence: 4
अ॒यं ते॒ योनि॑रृ॒त्विय॒ इत्या॑ह प॒शवो वै र॒यिः प॒शूने॒वाव॑ रुन्द्धे
Sentence: 5
ष॒ड्भिरुप॑ तिष्ठते॒ षड्वै॑ ।।
Verse: 3
Sentence: 1
ऋ॒तव॑ ऋ॒तुष्वे॒व प्रति॑ तिष्ठति
Sentence: 2
ष॒ड्भिरुत्त॑राभि॒रुप॑ तिष्ठते॒ द्वाद॑श॒ सम्प॑द्यन्ते॒ द्वाद॑श॒ मासाः॑ संवत्स॒रः सं॑वत्स॒र ए॒व प्रति॑ तिष्ठति
Sentence: 3
यथा वै॒ पुरु॒षो ऽश्वो गौ॒र्जीर्य॑त्ये॒वम॒ग्निराहि॑तो जीर्यति संवत्स॒रस्य॑ प॒रस्ता॑दाग्निपप॑ तिष्ठते पुनर्न॒वमेवैनम॒जरं॑ करो॒त्यथो॑ पु॒नात्ये॑व ।
Sentence: 4
उप॑ तिष्ठते॒ योग॑ ए॒वास्यै॒ष उप॑ तिष्ठते ।।
Verse: 4
Sentence: 1
दम॑ ए॒वास्यै॒ष उप॑ तिष्ठते याच्नै॒वास्यै॒षोप॑ तिष्ठते॒ यथा॒ पापी॑या॒ञ्छ्रेय॑स आ॒हृत्य॑ नम॒स्यति॑ ता॒दृगे॒व तत् ।
Sentence: 2
आ॑यु॒र्दा अ॑ग्ने॒ ऽस्यायु॑र्मे दे॒हीत्या॑हायु॒र्दा ह्ये॒ष
Sentence: 3
व॑र्चो॒दा अ॑ग्ने ऽसि॒ वर्चो॑ मे दे॒हीत्या॑ह वर्चो॒दा ह्ये॒ष
Sentence: 4
त॑नू॒पा अ॑ग्ने ऽसि त॒नुव॑म्मे पा॒हीत्या॑ह ।।
Verse: 5
Sentence: 1
त॑नू॒पा ह्ये॒षस् ।
Sentence: 2
अग्ने॒ यन्मे॑ त॒नुवा॑ ऊ॒नं तन्म॒ आ पृ॒णेत्या॑ह॒ यन्मे॑ प्र॒जायै॑ पशू॒नामू॒नं तन्म॒ आ पू॑र॒येति॒ वावै॒तदा॑ह
Sentence: 3
चित्रा॑वसो स्व॒स्ति ते॑ पा॒रम॑शी॒येत्या॑ह॒ रात्रिर्वै चि॒त्राव॑सु॒रव्यु॑ष्ट्यै॒ वा ए॒तस्यै॑ पु॒रा ब्रा॑ह्म॒णा अ॑भैषु॒र्व्यु॑ष्टिमे॒वाव॑ रुन्द्धे ।
Sentence: 4
इन्धा॑नास्त्वा श॒तम् ।।
Verse: 6
Sentence: 1
हिमा॒ इत्या॑ह श॒तायुः॒ पुरु॑षः श॒तेन्द्रि॑य॒ आयु॑ष्ये॒वेन्द्रि॒ये प्रति॑ तिष्ठति ।
Sentence: 2
ए॒षा वै॑ सू॒र्मी कर्ण॑कावत्ये॒तया॑ ह स्म वै दे॒वा असु॑राणां शतत॒र्हांस्तृं॑हन्ति॒ यदे॒तया॑ स॒मिध॑मा॒दधा॑ति॒ वज्र॑मेवै॒तच्छ॑त॒घ्नीं यज॑मानो॒ भ्रातृ॑व्याय॒ प्र ह॑रति॒ स्तृत्या॒ अछ॑म्बट्कारम् ।
Sentence: 3
सं त्वम॑ग्ने॒ सूर्य॑स्य॒ वर्च॑सागथा॒ इत्या॑है॒तत्त्वम॑सी॒दम॒हम्भू॑यास॒मिति॒ वावै॒तदा॑ह
Sentence: 4
त्वम॑ग्ने॒ सूर्य॑वर्चा अ॒सीत्या॑हा॒शिष॑मेवै॒तामा शा॑स्ते ।।
Paragraph: 8
Verse: 1
Sentence: 1=a
सम्प॑श्यामि प्र॒जा अ॒हम्
Sentence: 2
इत्या॑ह॒ याव॑न्त ए॒व ग्रा॒म्याः प॒शव॒स्ताने॒वाव॑ रुन्द्धे ।
Sentence: 3
अ॑म्भ॒ स्थाम्भो॑ वो भक्षीय ।
Sentence: 4
इत्या॒हाम्भो॒ ह्ये॑तास् ।
Sentence: 5
मह॑ स्थ॒ महो॑ वो भक्षीय ।
Sentence: 6
इत्या॑ह॒ महो॒ ह्ये॑ताः
Sentence: 7
स्सह॑ स्थ॒ सहो॑ वो भक्षीय ।
Sentence: 8
इत्या॑ह शहो॒ ह्ये॑तास् ।
Sentence: 9
ऊर्ज॒ स्थोर्जं॑ वो भक्षीय ।
Sentence: 10
इति॑ ।।
Verse: 2
Sentence: 1
आ॒होर्जो॒ ह्ये॑तास् ।
Sentence: 2
रेव॑ती॒ रम॑ध्वम्
Sentence: 3
इत्या॑ह प॒शवो वै र॒वतीः॑ प॒शूने॒वात्मन्र॑मयते ।
Sentence: 4
इहै॒व स्ते॒तो माप॑ गात ।
Sentence: 5
इत्या॑ह ध्रु॒वा एवैना॒ अन॑पगाः कुरुते ।
Sentence: 6
इ॑ष्टक॒चिद्वा अ॒न्यो॒ ऽग्निः प॑शु॒चिद॒न्यः सं॑हि॒तासि॑ विश्वरू॒पीस् ।
Sentence: 7
इति॑ व॒त्सम॒भि मृ॑श॒त्युपैवैनं धत्ते पशु॒चित॑मेनं कुरुते
Sentence: 8
प्र ।।
Verse: 3
Sentence: 1
वा ए॒षो॒ ऽस्माल्लो॒काच्च्य॑वते॒ य आ॑हव॒नीय॑मुप॒तिष्ठ॑ते॒ गार्ह॑पत्य॒मुप॑ तिष्ठते॒ ऽस्मिन्॑व लो॒के प्रति॑ तिष्ठति ।
Sentence: 2
अथो॒ गार्ह॑पत्यायै॒व नि ह्नु॑ते
Sentence: 3
गाय॒त्रीभि॒रुप॑ तिष्ठते॒ तेजो वै गाय॒त्री तेज॑ ए॒वात्मन्ध॑त्ते ।
Sentence: 4
अथो॒ यदे॒तं तृ॒चम॒न्वाह॒ संत॑त्यै
Sentence: 5
गार्ह॑पत्यं॒ वा अनु॑ द्वि॒पादो॑ वी॒राः प्र जा॑यन्ते
Sentence: 6
य ए॒वं वि॒द्वान्द्वि॒पदा॑भि॒र्गार्ह॑पत्यमुप॒तिष्ठ॑ते ।।
Verse: 4
Sentence: 1
आस्य॑ वी॒रो जा॑यते ।
Sentence: 2
ऊ॒र्जा वः॑ पश्याम्यू॒र्जा मा॑ पश्यत ।
Sentence: 3
इत्या॑हा॒शिष॑मेवै॒तामा शा॑स्ते
Sentence: 4
तत्स॑वि॒तुर्वरे॑ण्यम्
Sentence: 5
इत्या॑ह॒ प्रसू॑त्यै
Sentence: 6
सो॒मानं॒ स्वर॑णम्
Sentence: 7
इत्या॑ह सोमपी॒थमे॒वाव॑ रुन्द्धे
Sentence: 8
कृणु॒हि ब्र॑ह्मणस्पते ।
Sentence: 9
इत्या॑ह॒ प्रसू॑त्यै
Sentence: 10
सो॒मानं॒ स्वर॑णम्
Sentence: 11
इत्या॑ह सोमपी॒थमे॒वाव॑ रुन्द्धे
Sentence: 12
कृणु॒हि ब्र॑ह्मणस्पते ।
Sentence: 13
इत्या॑ह ब्रह्मवर्च॒समे॒वाव॑ रुन्द्धे
Sentence: 14
क॒दा च॒न स्त॒रीर॑सि ।
Sentence: 15
इत्या॑ह॒ न स्त॒रीं रात्रिं॑ वसति ।।
Verse: 5
Sentence: 1
य ए॒वं वि॒द्वान॒ग्निमु॑प॒तिष्ठ॑ते
Sentence: 2
परि॑ त्वाग्ने॒ पुरं॑ व॒यम्
Sentence: 3
इत्या॑ह परि॒धिमेवै॒तम्परि॑ ददः॒त्यस्क॑न्दाय ।
Sentence: 4
अग्ने॑ गृहपते ।
Sentence: 5
इत्या॑ह यथाय॒जुरेवै॒तत् ।
Sentence: 6
श॒तं हिमा॑स् ।
Sentence: 7
इत्या॑ह
Sentence: 8
श॒तं त्वा॑ हेम॒न्तानि॑न्धिषीय ।
Sentence: 9
इत्य्वावै॒तदा॑ह
Sentence: 10
पु॒त्रस्य॒ नाम॑ गृह्णात्यन्ना॒दमेवैनं करोति
Sentence: 11
तामा॒शिष॒मा शा॑से॒ तन्त॑वे॒ ज्योति॑ष्मतीम्
Sentence: 12
इति॑ ब्रूया॒द्यस्य॑ पु॒त्रो ऽजा॑तः स्यात्तेज॒स्व्ये॒वास्य॑ ब्रह्मवर्च॒सी पु॒त्रो जा॑यते
Sentence: 13
तामा॒शिष॒मा शा॑से॒ ऽमुष्मै॒ ज्योति॑ष्मतीम्
Sentence: 14
इति॑ ब्रूया॒द्यस्य॑ पु॒त्रो जा॒तः स्यात्
Sentence: 15
तेज॑ ए॒वास्मि॑न्ब्रह्मवर्च॒सं द॑धाति ।।
Paragraph: 9
Verse: 1
Sentence: 1
अ॑ग्निहो॒त्रं जु॑होति
Sentence: 2
यदे॒व किं च॒ यज॑मानस्य॒ स्वं तस्यै॒व तत् ।
Sentence: 3
रेतः॑ सिञ्चति प्र॒जन॑ने प्र॒जन॑नं॒ हि वा अ॒ग्निस् ।
Sentence: 4
अथौ॑षधी॒रन्त॑गता दहति॒ तास्ततो॒ भूय॑सीः॒ प्र जा॑यन्ते
Sentence: 5
यत्सा॒यं जु॒होति॒ रेत॑ ए॒व तत्सि॑ञ्चति
Sentence: 6
प्रै॒व प्रा॑त॒स्तने॑न जनयति॒ तत् ।
Sentence: 7
रेतः॑ सि॒क्तं न त्वष्ट्रावि॑कृत॒म्प्र जा॑यते॒ याव॒च्छो वै॒ रेत॑सः सि॒क्तस्य॑ ।।
Verse: 2
Sentence: 1
त्वष्टा॑ रू॒पाणि॑ विक॒रोति॑ ताव॒च्छो वै॒ तत्प्र जा॑यत ए॒ष वै दैव्य॒स्त्वष्टा॒ यो यज॑ते ब॒ह्वीभि॒रुप॑ तिष्ठते॒ रेत॑स एव सि॒क्तस्य॑ बहु॒शो रू॒पाणि॒ वि क॑रोति
Sentence: 2
स परै॒व जा॑यते॒ श्वःश्वो॒ भूया॑न्भवति॒ य ए॒वं वि॒द्वान॒ग्निमु॑प॒तिष्ठ॑ते ।
Sentence: 3
अह॑र्दे॒वाना॒मासी॒द्रात्रि॒रसु॑राणां॒ ते ऽसु॑रा॒ यद्दे॒वानां॑ वि॒त्तं वेद्य॒मासी॒त्तेन॑ स॒ह ।।
Verse: 3
Sentence: 1
रात्रि॒म्प्रावि॑शन्
Sentence: 2
ते दे॒वा ही॒ना अ॑मन्यन्त
Sentence: 3
ते॑ ऽपश्यन् ।
Sentence: 4
आ॑ग्ने॒यी रात्रि॑राग्ने॒याः प॒शव॑ इ॒ममे॒वाग्निं स्त॑वाम॒ स न॑ स्तु॒तः प॒शून्पुन॑र्दास्य॒ती
Sentence: 5
ते॒ ऽग्निम॑स्तुव॒न्त्स ए॑भ्य स्तु॒तो रात्रि॑या॒ अध्यह॑र॒भि प॒शून्निरा॑र्ज॒त्ते दे॒वाः प॒शून्वि॒त्त्वा कामां॑ अकुर्वत
Sentence: 6
य ए॒वं वि॒द्वान॒ग्निमु॑प॒तिष्ठ॑ते पशु॒मान्भ॑वति ।।
Verse: 4
Sentence: 1
आ॑दि॒त्यो वा अ॒स्माल्लो॒काद॒मुं लो॒कऐ॑त्
Sentence: 2
सो॒ ऽमुं लो॒कं ग॒त्वा पुन॑रि॒मं लो॒कम॒भ्य॑ध्याय॒त्स इ॒मं लो॒कमा॒गत्य॑ मृ॒त्योर॑बिभेन्मृ॒त्त इव॒ ह्य॒यं लो॒कः
Sentence: 3
सो॑ ऽमन्यते ।
Sentence: 4
अ॒ममे॒वाग्निं स्त॑वानि॒ स मा॑ स्तु॒तः सु॑व॒र्गं लो॒कं ग॑मयिष्य॒तीति
Sentence: 5
सो॒ ऽग्निम॑स्तौ॒त्स ए॑नं स्तु॒तः सु॑व॒र्गं लो॒कम॑गमयत् ।
Sentence: 6
यः ।।
Verse: 5
Sentence: 1
ए॒वं वे॒द्वान॒ग्निमु॑प॒तिष्ठ॑ते सुव॒र्गमे॒व लो॒कमे॑ति॒ सर्व॒मायु॑रेति ।
Sentence: 2
अ॒भि वा ए॒षो॒ ऽग्नी आ रो॑हति॒ य ए॑नावुप॒तिष्ठ॑ते॒ यथा॒ खलु वै॒ श्रेया॑न॒भ्यारू॑ढः का॒मय॑ते॒ तथा॑ करोति
Sentence: 3
नक्त॒मुप॑ तिष्ठते॒ न प्रा॒तः सं हि नक्तं॑ व्र॒तानि॑ सृ॒ज्यन्ते॑ स॒ह श्रेयां॑श्च॒ पापी॑यां॒श्॑ते॒ ज्योति॒र्वा अ॒ग्निस्तमो॒ रात्रि॒र्यत् ।।
Verse: 6
Sentence: 1
नक्त॑मुप॒तिष्ठ॑ते॒ ज्योतिषै॒व तम॑स्तरति ।
Sentence: 2
उ॑प॒स्थेयो॒ ऽग्नी३र्नोप॒स्थेया३^ नोप॒स्थेया३स्
Sentence: 3
इत्या॑हुर्मनु॒ष्या॒येन्न्वै॒ यो ऽह॑रहरा॒हृत्याथै॑नं॒ याच॑ति॒ स इन्न्वै॒ तमु॒पार्छ॑ति ।
Sentence: 4
अथ॒ को दे॒वानह॑रहर्याचिष्यति ।
Sentence: 5
इति॒ तस्मा॒न्नोप॒स्थेय॑स् ।
Sentence: 6
अथो॒ खल्वा॑हुरा॒शिषे वै॒ कं यज॑मानो यजते ।
Sentence: 7
इत्ये॒षा खलु वै ।।
Verse: 7
Sentence: 1
आहि॑ताग्नेरा॒शीर्यद॒ग्निमु॑प॒तिष्ठ॑ते॒ तस्मा॑दुप॒स्थेयः
Sentence: 2
प्र॒जाप॑तिः प॒शून॑सृजत॒ ते सृ॒ष्टा अ॑होरा॒त्रे प्रावि॑शन्
Sentence: 3
ताञ्छन्दो॑भि॒रन्व॑विन्द॒द्यच्छन्दो॑भिरुप॒तिष्ठ॑ते॒ स्वमे॒व तदन्वि॑छति
Sentence: 4
न तत्र॑ जा॒म्य॑स्ति ।
Sentence: 5
इत्या॑हु॒र्यो ऽह॑रहरुप॒तिष्ठ॑त॒ इति
Sentence: 6
यो वा अ॒ग्निम्प्र॒त्यङ्ङु॑प॒तिष्ठ॑ते॒ प्रत्ये॑नमोषति॒ यः परा॒ङ्विष्व॑ङ्प्र॒जया॑ प॒शुभि॑रे
Sentence: 7
कवा॑तिर्यङ्ङि॒वोप॑ तिष्ठेत नैनम्प्र॒त्योष॑ति॒ न विष्व॑ङ्प्र॒जया॑ प॒शुभि॑रेति ।।
Paragraph: 10
Verse: 1
Sentence: 1=a
मम॒ नाम॑ प्रथ॒मं जा॑तवेदः पि॒ता मा॒ता च॑ दधतु॒र्यदग्रे॑ । तत्त्वम्बि॑भृहि॒ पुन॒रा मऐ॑तो॒स्तवा॒हं नाम॑ बिभराण्यग्ने ।।
Sentence: 2=b
मम॒ नाम॒ तव॑ च जातवेदो॒ वास॑सी इव वि॒वसा॑नौ॒ ये चरा॑वः । आयु॑षे॒ त्वं जी॒वसे॑ व॒यं य॑थाय॒थं वि परि॑ दधावहै॒ पुन॒स्ते ।।
Sentence: 3=c
नमो॒ ऽग्नये ऽप्र॑तिविद्धाय॒ नमो ऽना॑धृष्टाय॒ नमः॑ स॒म्राजे॑ । अषा॑ढः ।।
Verse: 2
Sentence: 1
अ॒ग्निर्बृ॒हद्व॑या विश्व॒जित्सह॑न्त्यः॒ श्रेष्ठो॑ गन्ध॒र्वः ।।
Sentence: 2=d
त्वत्पि॑तारो अग्ने दे॒वास्त्वामा॑हुतय॒स्त्वद्वि॑वाचनाः । सम्मामायु॑षा॒ सं गौ॑प॒त्येन॒ सुहि॑ते मा धाः ।।
Sentence: 3=e
अ॒यम॒ग्निः श्रेष्ठ॑तमो॒ ऽयम्भग॑वत्तमो॒ ऽयं स॑हस्र॒सात॑मः । अ॒स्मा अ॑स्तु सु॒वीर्य॑म् ।।
Sentence: 4=f
मनो॒ ज्योति॑र्जुषता॒माज्यं॒ विछि॑न्नं य॒ज्ञं समि॒मं द॑धातु । या इ॒ष्टा उ॒षसो॑ नि॒म्रुच॑श्च॒ ताः सं द॑धामि ह॒विषा॑ घृ॒तेन॑ ।।
Sentence: 5=g
पय॑स्वती॒रोष॑धयः ।।
Verse: 3
Sentence: 1
पय॑स्वद्वी॒रुधा॒म्पयः॑ । अ॒पाम्पय॑सो॒ यत्पय॒स्तेन॒ मामि॑न्द्र॒ सं सृ॑ज ।।
Sentence: 2=h
अग्ने॑ व्रतपते व्र॒तं च॑रिष्यामि॒ तच्छ॑केयं॒ तन्मे॑ राध्यताम् ।
Sentence: 3=i
अ॒ग्निं होता॑रमि॒ह तं हु॑वे दे॒वान्य॒ज्ञिया॑नि॒ह यान्हवा॑महे ।। आ य॑न्तु दे॒वाः सु॑मन॒स्यमा॑ना वि॒यन्तु॑ दे॒वा ह॒विषो॑ मे अस्य
Sentence: 4=k
कस्त्वा॑ युनक्ति॒ स त्वा॑ युनक्तु
Sentence: 5=l
यानि॑ घ॒र्मे क॒पाला॑न्युपचि॒न्वन्ति॑ ।।
Verse: 4
Sentence: 1
वे॒धसः॑ । पू॒ष्णस्तान्यपि॑ व्र॒त इ॑न्द्रवा॒यू वि मु॑ञ्चताम् ।।
Sentence: 2=m
अभि॑न्नो घ॒र्मो जी॒रदा॑नु॒र्यत॒ आत्त॒स्तद॑ग॒न्पुनः॑ । इ॒ध्मो वेदिः॑ परि॒धय॑श्श॒ सर्वे॑ य॒ज्ञस्यायु॒रनु॒ सं च॑रन्ति ।।
Sentence: 3=n
त्रय॑स्त्रिंश॒त्तन्त॑वो॒ ये वि॑तत्नि॒रे य इ॒मं य॒ज्ञं स्व॒धया॒ दद॑न्ते॒ तेषां॑ छि॒न्नम्प्रतमि॒ स्वाहा॑ घ॒र्मो दे॒वां अप्ये॑तु ।।
Paragraph: 11
Verse: 1
Sentence: 1=a
वै॑श्वान॒रो न॑ ऊ॒त्या प्र या॑तु परा॒ वतः॑ । अ॒ग्निरु॒क्थेन॒ वाह॑सा ।।
Sentence: 2=b
ऋ॒तावा॑नं वैश्वान॒रमृ॒तस्य॒ ज्योति॑ष॒स्पति॑म् । अज॑स्रं घ॒र्ममी॑महे ।।
Sentence: 3=c
वै॑श्वान॒रस्य॑ दं॒सना॑भ्यो बृ॒हदरि॑णा॒देकः॑ स्वप॒स्य॑या क॒विः । उ॒भा पि॒तरा॑ म॒हय॑न्नजायता॒ग्निर्द्यावा॑पृथि॒वी भूरि॑रेतसा ।।
Sentence: 4=d
पृ॒ष्टो दि॒वि पृ॒ष्टो अ॒ग्निः पृ॑थि॒व्याम्पृ॒ष्टो विश्वा॒ ओष॑धी॒रा वि॑वेश । वै॑श्वान॒रः सह॑सा पृ॒ष्टो अ॒ग्निः स नो॒ दिवा॒ सः ।।
Verse: 2
Sentence: 1
रि॒षः पा॑तु॒ नक्त॑म् ।
Sentence: 2=e
जा॒तो यद॑ग्ने॒ भुव॑ना॒ व्यख्यः॑ प॒शुं न गो॒पा इर्यः॒ परि॑ज्मा । वै॑श्वानर॒ ब्रह्म॑णे विन्द गा॒तुं यू॒यम्पा॑त स्व॒स्तिभिः॒ सदा॑ नः ।।
Sentence: 3=f
त्वम॑ग्ने शो॒चिषा॒ शोशु॑चान॒ आ रोद॑सी अपृणा॒ जाय॑मानः । त्वम्दे॒वां अ॒भिश॑स्तेरमुञ्चो वैश्वानर जातवेदो महि॒त्वा ।।
Sentence: 4=g
अ॒स्माक॑मग्ने म॒घव॑त्सु धार॒याना॑मि क्ष॒त्रम॒जरं॑ सु॒वीर्य॑म् । व॒यं ज॑येम श॒तिनं॑ सह॒सृणं वैश्वानर ।।
Verse: 3
Sentence: 1
वाज॑मग्ने॒ तवो॒ ऽतिभिः॑ ।।
Sentence: 2=h
वै॑श्वान॒रस्य॑ सुमतौ स्याम॒ राजा॒ हिक॒म्भुव॑नानामभि॒श्रीः । इ॒तो जा॒तो वि॑श्वमि॒दं वि च॑ष्टे वैश्वान॒रो य॑तते॒ सूर्ये॑ण ।।
Sentence: 3=i
अव॑ ते॒ हेडो॑ वरुण॒ नमो॑भि॒रव॑ य॒ज्ञेभि॑रीमहे ह॒विर्भिः॑ । क्षय॑न्न॒स्मभ्य॑मसुर प्रचेतो॒ राज॒न्नेनां॑सि सिश्रथः कृ॒तानि॑ ।।
Sentence: 4=k
उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मं श्र॑थाय । अथा॑ व॒यमा॑दित्य ।।
Verse: 4
Sentence: 1
व्र॒ते तवाना॑गसो॒ अदि॑तये स्याम ।।
Sentence: 2=l
द॑धि॒क्राव्णो॑ अकारिषं जि॒ष्णोरश्व॑स्य वा॒जिनः॑ । सु॑र॒भि नो॒ मुखा॑ कर॒त्प्र ण॒ आयूं॑षि तारिषत् ।।
Sentence: 3=m
आ द॑धि॒क्राः शवा॑सा॒ पञ्च॑ कृ॒ष्टीः सूर्य॑ इव॒ ज्योति॑षा॒पस्त॑तान । स॑हस्र॒साः श॑त॒सा वा॒ज्यर्वा॑ पृ॒णक्तु॒ वध्वा॒ समि॒मा वचां॑सि ।।
Sentence: 4=n
अ॒ग्निर्मू॒र्धा
Sentence: 5=o
भुवः॑ ।
Sentence: 6=p
मरु॑तो॒ यद्ध॑ वो दि॒वः सु॑म्ना॒यन्तो॒ हवा॒महे॑ । आ तू नः॑ ।।
Verse: 5
Sentence: 1
उप॑ गन्तन ।।
Sentence: 2=q
या वः॑ शर्म शशमा॒नाय॒ सन्ति॑ त्रि॒धातू॑नि दा॒शुषे॑ यछ॒ताधि॑ । अ॒स्मभ्यं॒ तानि॑ मरुतो॒ वि य॑न्त र॒यिं नो॑ धत्त वृषणः सु॒वीर॑म्
Sentence: 3=r
अदि॑तिर्न उरुष्य॒त्वदि॑तिः॒ शर्म॑ यछतु । अदि॑तिः पा॒त्वंह॑सः ।।
Sentence: 4=s
म॒हीमू॒ षु मा॒तरं॑ सुव्र॒ताना॑मृ॒तस्य॒ पत्नी॒मव॑से हुवेम । तु॑विक्ष॒त्राम॒जर॑न्तीमुरू॒चीं सु॒शर्मा॑ण॒मदि॑तिं सु॒प्रणी॑तिम् ।।
Sentence: 5=t
सु॒त्रामा॑णम्पृथि॒वीं द्याम॑ने॒हसं॑ सु॒शर्मा॑ण॒मदि॑तिं सु॒प्रणी॑तिम् । दै॑वीं॒ नावं॑ स्वरि॒त्रामना॑गस॒मस्र॑वन्ती॒मा रु॑हेमा स्व॒स्तये॑ ।।
Sentence: 6=u
इ॒मां सु नाव॒मारु॑हं श॒तारि॒त्रां श॒तस्प्या॑म् । अछि॑द्राम्पारयि॒ष्णुम् ।।
This text is part of the
TITUS
edition of
Black Yajur-Veda: Taittiriya-Samhita
.
Copyright
TITUS Project
, Frankfurt a/M, 10.12.2008. No parts of this document may be republished in any form without prior permission by the copyright holder.
