TITUS
Black Yajur-Veda: Taittiriya-Samhita
Part No. 7
Chapter: 7
Paragraph: 1
Verse: 1
Sentence: 1
पा॑कय॒ज्ञं वा अन्वाहि॑ताग्नेः प॒शव॒ उप॑ तिष्ठन्त॒ इडा॒ खलु वै पाकय॒ज्ञः
Sentence: 2
सै॒षान्त॒रा प्र॑याजानूया॒जान्यज॑मानस्य लो॒के ऽव॑हिता । तामा॑ह्रि॒यमा॑णाम॒भि म॑न्त्रयेत
Sentence: 3
सुरू॑पवर्षवर्ण॒ एहीति॑ प॒शवो॒ वा इडा॑ प॒शूने॒वोप॑ ह्वयते । य॒ज्ञं वै॑ दे॒वा अ॑दुह्रन्य॒ज्ञो ऽसु॑रां अदुहत्
Sentence: 4
ते ऽसु॑रा य॒ज्ञदु॑ग्धाः॒ परा॑भव॒न्यो वै॑ य॒ज्ञस्य॒ दोहं॑ वि॒द्वान् ।।
Verse: 2
Sentence: 1
यज॒ते ऽप्य॒न्यं यज॑मानं दुहे । सा मे॑ स॒त्याशीर॒स्य य॒ज्ञस्य॑ भूया॒दित्या॑है॒ष वै॑ य॒ज्ञस्य॒ दोह॑स्
Sentence: 2
तेनैवैनं दुहे । प्रत्ता वै गौर्दुहे॒ प्रत्तेडा॒ यज॑मानाय दुह ए॒ते वा इडा॑यै॒ स्तना॒ इडोप॑हू॒तेति॑ वा॒युर्व॒त्सो । यर्हि॒ होतेडा॑मुप॒ह्व्यये॑त॒ तर्हि॒ यज॑मानो॒ होता॑र॒मीक्ष॑माणो वा॒युम्मन॑सा ध्यायेत् ।।
Verse: 3
Sentence: 1
मा॒त्रे व॒त्समु॒पाव॑सृजति । सर्वे॑ण वै य॒ज्ञेन॑ दे॒वाः सु॑व॒र्गं लो॒कम्
Sentence: 2
पाकय॒ज्ञेन॒ मनु॑रश्राम्य॒त्सेडा॒ मनु॑मु॒पाव॑र्तत॒ तां दे॑वासु॒रा व्य॑ह्वयन्त प्र॒तीचीं॑ दे॒वाः परा॑चीं॒ असु॑राः॒ सा दे॒वानु॑पावर्तत प॒शवो वै॒ तद्दे॒वान॑वृणत प॒शवो ऽसु॑रानजहुर् । यं का॒मये॑ताप॒शुः स्या॒दिति॒ परा॑चीं॒ तस्येडा॒मुप॑ ह्वयेताप॒शुरे॒व भ॑वन्ति
Sentence: 3
यम् ।।
Verse: 4
Sentence: 1
का॒मये॑त पशु॒मान्त्स्या॒दिति॑ प्र॒तीची॒म्तस्येडा॒मुप॑ ह्वयेत पशु॒माने॒व भ॑वति । ब्र॑ह्मवा॒दिनो॑ वदन्ति
Sentence: 2
स त्वा इडां॒ उप॑ ह्वयेत॒ य इडां॑ उप॒हूया॒त्मान॒मिडा॑यामुप॒ह्वये॒तेति॑ । सा नः॑ प्रि॒या सु॒प्रतू॑र्तिर्म॒घोनीत्या॒हेडा॑मे॒वोप॒हूया॒त्मान॑मिडाया॒मुप॑ ह्वयते । व्य॑स्तमिव॒ वा ए॒तद्य॒ज्ञस्य॒ यदिडा॑ सा॒मि प्रा॒श्नन्ति॑ ।।
Verse: 5
Sentence: 1
सा॒मि मा॑र्जयन्त ए॒तत्प्रति॒ वा असु॑राणां य॒ज्ञो व्य॑छिद्यत
Sentence: 2
ब्रह्म॑णा दे॒वाः सम॑दधुर् । बृह॒स्पति॑स्तनुतामि॒मं न॒ इत्या॑ह॒ ब्रह्म वै दे॒वाना॒म्बृह॒स्पति॒र्ब्रह्म॑णै॒व य॒ज्ञं सं द॑धाति । विछि॑न्नं य॒ज्ञं समि॒मं द॑धा॒त्वित्या॑ह
Sentence: 3
संत॑त्यै । विश्वे॑ दे॒वा इ॒ह मा॑दयन्ता॒मित्या॑ह सं॒तत्यै॒व य॒ज्ञं दे॒वेभ्यो ऽनु॑ दिशति । यां वै॑ ।।
Verse: 6
Sentence: 1
य॒ज्ञे दक्षि॑णां॒ ददा॑ति॒ ताम॑स्य प॒शवो ऽनु॒ सं क्रा॑मन्ति
Sentence: 2
स ए॒ष ई॑जा॒नो॑ ऽप॒शुर्भावु॑को॒ यज॑मानेन॒ खलु वै॒ तत्का॒र्य॒मित्या॑हु॒र्यथा॑ देव॒त्रा द॒त्तं कु॑र्वी॒तात्मन्प॒शून्र॒मये॒तेति॑ । ब्रध्न॒ पिन्व॒स्वेत्या॑ह
Sentence: 3
य॒ज्ञो वै॑ ब्र॒ध्नो य॒ज्ञमे॒व तन्म॑हय॒त्यथो॑ देवत्रै॒व द॒त्तं कु॑रुत आ॒त्मन्प॒शून्र॑मयते । दद॑तो मे॒ मा क्षा॒यीत्या॒हाक्षि॑तिमे॒वोपै॑ति । कु॑र्व॒तो मे॒ मोप॑ दस॒दित्या॑ह
Sentence: 4
भू॒मान॑मे॒वोपै॑ति ।।
Paragraph: 2
Verse: 1
Sentence: 1
संश्र॑वा ह सौवर्चन॒सस्तुमिं॑जऔपोदितिमुवाच
Sentence: 2
यत्स॒त्त्रिणां॒ होता॑भूः॒ कामिडा॒मुपा॑ह्वथा॒ इति
Sentence: 3
तामुपा॑ह्व॒ इति॑ होवाच॒ या प्रा॒णेन॑ दे॒वान्द॒धार॑ व्या॒नेन॑ मनु॒ष्या॑नपा॒नेन॑ पि॒तॄनिति
Sentence: 4
छि॒नत्ति॒ सा न छि॑न॒त्ती३ इति
Sentence: 5
छि॒नत्तीति॑ होवाच
Sentence: 6
शरी॑रं॒ वा अ॑स्यै॒ तदु॑पाह्वथा॒ इति॑ होवाच
Sentence: 7
गौर्वै ।।
Verse: 2
Sentence: 1
अ॑स्यै॒ शरी॑रम् ।
Sentence: 2
गां वाव तौ॒ तत्पर्य॑वदताम् ।
Sentence: 3
या य॒ज्ञे दी॒यते॒ सा प्रा॒णेन॑ दे॒वान्दा॑धार॒ यया॑ मनु॒ष्या॒ जीव॑न्ति॒ सा व्या॒नेन॑ मनु॒ष्या॒न्याम्पि॒तृभ्यो॒ घ्नन्ति॒ सापा॒नेन॑ पि॒तॄन्
Sentence: 4
य ए॒वं वेद॑ पशु॒मान्भ॑वति ।
Sentence: 5
अथ वै॒ तामुपा॑ह्व॒ इति॑ होवाच॒ या प्र॒जाः प्र॒भव॑न्तीः॒ प्रत्या॒भव॒तीति॑ ।
Sentence: 6
अन्नं॒ वा अ॑स्यै॒ तत् ।।
Verse: 3
Sentence: 1
उपा॑ह्वथा॒ इति॑ होवाच ।
Sentence: 2
ओष॑धयो॒ वा अ॑स्या॒ अन्न॑म्
Sentence: 3
ओष॑धयो वै प्र॒जाः प्र॒भव॑न्तीः॒ प्रत्या भ॑वन्ति
Sentence: 4
य ए॒वं वेदा॑न्ना॒दो भ॑वति ।
Sentence: 5
अथ वै॒ तामुपा॑ह्व॒ इति॑ होवाच॒ या प्र॒जाः प॑रा॒भव॑न्तीरनुगृ॒ह्णाति॒ प्रत्या॒भव॑न्तीर्गृ॒ह्
Sentence: 6
प्रति॒ष्ठां वा अ॑स्यै॒ तदुपा॑ह्वथा॒ इति॑ होवाच ।
Sentence: 7
इ॒यं वा अ॑स्यै प्रति॒ष्ठा ।।
Verse: 4
Sentence: 1
इ॒यं वै॑ प्र॒जाः प॑रा॒भव॑न्ती॒रनु॑ गृह्णाति॒ प्रत्या॒भव॑न्तीर्गृह्णाति
Sentence: 2
य ए॒वं वेद॒ प्रत्ये॒व ति॑ष्ठति ।
Sentence: 3
अथ वै॒ तामुपा॑ह्व॒ इति॑ होवाच॒ यस्यै॑ नि॒क्रम॑णे घृ॒तम्प्र॒जाः सं॒जीव॑न्तीः॒ पिब॒न्तीति
Sentence: 4
छि॒नत्ति॒ सा न छि॑न॒त्ती३ इति
Sentence: 5
न छि॑न॒त्तीति॑ होवाच॒ प्र तु ज॑नय॒तीति॑ ।
Sentence: 6
ए॒ष वा इडा॒मुपा॑ह्वथा॒ इति॑ होवाच
Sentence: 7
वृष्टि॒र्वा इडा
Sentence: 8
वृष्ट्यै वै नि॒क्रम॑णे घृ॒तम्प्र॒जाः सं॒जीव॑न्तीः पिबन्ति
Sentence: 9
य ए॒वं वेद प्रै॒व जा॑यते ऽन्ना॒दो भ॑वति ।।
Paragraph: 3
Verse: 1
Sentence: 1
प॒रोऽक्षं वाअ॒न्ये दे॒वा इ॒ज्यन्ते॑ प्र॒त्यक्ष॑म॒न्ये
Sentence: 2
यद्यज॑ते॒ य ए॒व दे॒वाः प॒रोऽक्ष॑मि॒ज्यन्ते॒ ताने॒व तद्य॑जति
Sentence: 3
यद॑न्वाहा॒र्य॑मा॒हर॑त्ये॒ते वै॑ दे॒वाः प्र॒त्यक्षं॒ यद्ब्रा॑ह्म॒णास्ताने॒व तेन॑ प्रीणाति ।
Sentence: 4
अथो॒ दक्षि॑णै॒वास्यै॒षा ।
Sentence: 5
अथो॑ य॒ज्ञस्यै॒व छि॒द्रमपि॑ दधाति
Sentence: 6
यद्वै॑ य॒ज्ञस्य॑ क्रू॒रं यद्विलि॑ष्टं॒ तद॑न्वाहा॒र्ये॑ण ।।
Verse: 2
Sentence: 1
अ॒न्वाह॑रति
Sentence: 2
तद॑न्वाहा॒र्य॑स्यान्वाहार्य॒त्वम् ।
Sentence: 3
दे॑वदू॒ता वा ए॒ते यदृ॒त्विज॑स् ।
Sentence: 4
यद॑न्वाहा॒र्य॑मा॒हर॑ति देवदू॒ताने॒व प्री॑णाति
Sentence: 5
प्र॒जाप॑तिर्दे॒वेभ्यो॑ य॒ज्ञान्व्यादि॑शत्
Sentence: 6
स रि॑रिचा॒नो॑ ऽमन्यत
Sentence: 7
स ए॒तम॑न्वाहा॒र्य॒मभ॑क्तमपश्यत्
Sentence: 8
तमा॒त्मन्न॑धत्त
Sentence: 9
स वा ए॒ष प्रा॑जाप॒त्यो यद॑न्वाहा॒र्य॑स् ।
Sentence: 10
यस्यै॑वंवि॒दुषो॑ ऽन्वाहा॒र्य॑ आह्रि॒यते॑ सा॒क्षादे॒व प्र॒जाप॑तिमृध्नोति ।
Sentence: 11
अप॑रिमितो नि॒रुप्य॑स् ।
Sentence: 12
अप॑रिमितः प्र॒जाप॑तिस् ।
Sentence: 13
प्र॒जाप॑तेः ।।
Verse: 3
Sentence: 1
आप्त्यै
Sentence: 2
दे॒वा वै॒ यद्य॒ज्ञे ऽकु॑र्वत॒ तदसु॑रा अक्रुवत
Sentence: 3
ते दे॒वा ए॒तम्प्रा॑जाप॒त्यम॑न्वाहा॒र्य॑मपश्यन्
Sentence: 4
तम॒न्वाह॑रन्त
Sentence: 5
ततो॑ दे॒वा अभ॑व॒न्परा॑सु॒रास् ।
Sentence: 6
यस्यै॒वं वि॑दुषो ऽन्वाहा॒र्य॑ आह्रि॒यते॒ भव॑त्या॒त्मना॒ परा॑स्य॒ भ्रातृ॑व्यो भवति
Sentence: 7
य॒ज्ञेन॒ वा इ॒ष्टी प॒क्वेन॑ पू॒र्ती
Sentence: 8
यस्यै॒वं वि॒दुषो॑ ऽन्वाहा॒र्य॑ आह्रि॒यते॒ स त्वे॒वेष्टा॑पू॒र्ती
Sentence: 9
प्र॒जाप॑तेर्भा॒गो॑ ऽसि ।।
Verse: 4
Sentence: 1
इत्या॑ह
Sentence: 2
प्र॒जाप॑तिमे॒व भा॑ग॒धेये॑न॒ सम॑र्धयति ।
Sentence: 3
ऊर्ज॑स्वा॒न्पय॑स्वा॒नित्या॑ह ।
Sentence: 4
ऊर्ज॑मे॒वास्मि॒न्पयो॑ दधाति
Sentence: 5
प्राणापानौ मे पाहि समानव्यानौ मे पा॒हीत्या॑ह ।
Sentence: 6
आ॒शिष॑मेवै॒तामा शा॑स्ते ।
Sentence: 7
अक्षि॑तो॒ ऽस्यक्षि॑त्यै त्वा॒ मा मे॑ क्षेष्ठा अ॒मुत्रा॒मुष्मिँ॑ लो॒क इत्या॑ह
Sentence: 8
क्षीय॑ते॒ वा अ॒मुष्मिँ॑ लो॒के ऽन्न॑म्
Sentence: 9
इ॒तःप्र॑दानं॒ ह्य॑मुष्मिँ लो॒के प्र॑जा उप॒जीव॑न्ति
Sentence: 10
यदे॒वम॑भिमृ॒शत्यक्षि॑तिमेवैनद्गमयति॒ नास्या॒मुष्मिँ॑ लो॒के ऽन्नं॑ क्षीयते ।।
Paragraph: 4
Verse: 1
Sentence: 1
ब॒र्हिषो॒ ऽहं दे॑वय॒ज्यया॑ प्र॒जावा॑न्भूयास॒मित्या॑ह
Sentence: 2
ब॒र्हिषा वै प्र॒जाप॑तिः प्र॒जा अ॑सृजत
Sentence: 3
तेनै॒व प्र॒जाः सृ॑जते
Sentence: 4
नरा॒शंस॑स्या॒हं दे॑वय॒ज्यया॑ पशु॒मान्भू॑यास॒मित्या॑ह
Sentence: 5
नरा॒शंसे॑न वै प्र॒जाप॑तिः प॒शून॑सृजत
Sentence: 6
तेनै॒व प॒शून्त्सृ॑जते ।
Sentence: 7
अ॒ग्नेः स्वि॑ष्ट॒कृतो॒ ऽहं दे॑वय॒ज्ययायु॑ष्मान्य॒ज्ञेन॑ प्रति॒ष्ठां ग॑मेय॒मित्या॑ह ।
Sentence: 8
आयु॑रे॒वात्मन्ध॑त्ते॒ प्रति॑ य॒ज्ञेन॑ तिष्ठति
Sentence: 9
दर्शपूर्णमा॒सयोः॑ ।।
Verse: 2
Sentence: 1
वै॑ दे॒वा उज्जि॑ति॒मनूद॑जयन्दर्शपूर्णमा॒साभ्या॒मसु॑रा॒नपा॑नुदन्त ।
Sentence: 2
अ॒नेर॒हमुज्जि॑ति॒मनूज्जे॑ष॒मित्या॑ह
Sentence: 3
दर्शपूर्णमा॒सयो॑रे॒व दे॒वता॑नां॒ यज॑मान॒ उज्जि॑ति॒मनूज्ज॑यति दर्शपूर्णमा॒साभ्या॒म्भ्रातप॑ नुदते
Sentence: 4
वाज॑वतीभ्यां॒ व्यू॑हति ।
Sentence: 5
अन्नं वै॒ वाज॑स् ।
Sentence: 6
अन्न॑मे॒वाव॑ रुन्द्धे
Sentence: 7
द्वाभ्या॒म्प्रति॑ष्ठित्यै
Sentence: 8
यो वै॑ य॒ज्ञस्य द्वौ॒ दोहौ॑ वि॒द्वान्यज॑त उभ॒यतः॑ ।।
Verse: 3
Sentence: 1
ए॒व य॒ज्ञं दु॑हे पु॒रस्ता॑ च्चो॒परि॑ष्टाच्चै॒ष वा अ॒न्यो य॒ज्ञस्य॒ दोह॒ इडा॑याम॒न्यस् ।
Sentence: 2
यर्हि॒ होता॒ यज॑मानस्य॒ नाम॑ गृह्णी॒यात्तर्हि॑ ब्रूयात् ।
Sentence: 3
एमा अ॑ग्मन्ना॒शिषो॒ दोह॑कामा॒ इति
Sentence: 4
संस्तु॑ता ए॒व दे॒वता॑ दुहे ।
Sentence: 5
अथो॑ उभ॒यत॑ ए॒व य॒ज्ञं दु॑हे पु॒रस्ता॑च्चो॒परि॑ष्ठाच्च
Sentence: 6
रोहि॑तेन त्वा॒ग्निर्दे॒वतां॑ गमय॒त्वित्या॑ह ।
Sentence: 7
ए॒ते वै॑ देवा॒श्वाः ।।
Verse: 4
Sentence: 1
यज॑मानःप्रस्त॒रस् ।
Sentence: 2
यदेतैः प्रस्त॒रम्प्र॒हर॑ति देवाश्वैरे॒व यज॑मानं सुव॒र्गं लो॒कं ग॑मयति
Sentence: 3
वि ते॑ मुञ्चामि रश॒ना वि र॒श्मीनित्या॑ह ।
Sentence: 4
ए॒ष वा अ॒ग्नेर्वि॑मो॒कस्
Sentence: 5
तेनैवैनं॒ वि मु॑ञ्चति
Sentence: 6
विष्णोः॑ श॒म्योर॒हं दे॑वय॒ज्यया॑ य॒ज्ञेन॑ प्रति॒ष्ठां ग॑मेय॒मित्या॑ह
Sentence: 7
य॒ज्ञो वै॒ विष्णु॑र्य॒ज्ञ ए॒वान्त॒रः प्रति॑ तिष्ठति
Sentence: 8
सोम॑स्या॒हं दे॑वय॒ज्यया॑ सु॒रेताः॑ ।।
Verse: 5
Sentence: 1
रेतो॑ धिषी॒येत्या॑ह
Sentence: 2
सोमो वै रेतो॒धास्तेनै॒व रेत॑ आ॒त्मन्ध॑त्ते
Sentence: 3
त्वष्टु॑र॒हं दे॑वय॒ज्यया॑ पशू॒नां रू॒पम्पु॑षेय॒मित्या॑ह
Sentence: 4
त्वष्टा वै पशू॒नाम्मि॑थु॒नानां॑ रूप॒कृत्
Sentence: 5
तेनै॒व प॑शू॒नां रू॒पमा॒त्मन्ध॑त्ते
Sentence: 6
दे॒वाना॒म्पत्नी॑र॒ग्निर्गृ॒हप॑तिर्य॒ज्ञस्य॑ मिथु॒नं तयो॑र॒हं दे॑वय॒ज्यया॑ मिथु॒नेन॒ प्र भू॑यास॒मित्या॑ह ।
Sentence: 7
ए॒तस्माद्वै मिथु॒नात्प्र॒जाप॑तिर्मिथु॒नेन॑ ।।
Verse: 6
Sentence: 1
प्राजा॑यत
Sentence: 2
तसं॑दे॒व यज॑मानो मिथु॒नेन॒ प्र जा॑यते
Sentence: 3
वे॒दो॑ ऽसि॒ वित्ति॑रसि वि॒देयेत्या॑ह
Sentence: 4
वे॒देन वै दे॒वा असु॑राणां वि॒त्तं वेद्य॑मविन्दन्त
Sentence: 5
तद्वे॒दस्य॑ वेद॒त्वम् ।
Sentence: 6
यद्य॒द्भ्रातृ॑व्यस्याभि॒ध्याये॒त्तस्य॒ नाम॑ गृह्णीयात्
Sentence: 7
तदे॒वास्य॒ सर्वं॑ वृङ्क्ते
Sentence: 8
घृ॒तव॑न्तं कुला॒यिनं॑ रा॒यस्पोषं॑ सह॒स्रिणं॑ वे॒दो द॑दातु वा॒जिन॒मित्या॑ह
Sentence: 9
प्र स॒हस्र॑म्प॒शूना॑प्नोति ।
Sentence: 10
आस्य॑ प्र॒जायां॑ वा॒जी जा॑यते॒ य ए॒वं वेद॑ ।।
Paragraph: 5
Verse: 1
Sentence: 1
ध्रु॒वां वै॒ रिच्य॑मानां य॒ज्ञो ऽनु॑ रिच्यते य॒ज्ञं यज॑मानो॒ यज॑मानम्प्र॒जास् ।
Sentence: 2
ध्रु॒वामा॒प्याय॑मानां य॒ज्ञो ऽन्वा प्या॑यते य॒ज्ञं यज॑मानो॒ यज॑मानम्प्र॒जास् ।
Sentence: 3
आ प्या॑यतां ध्रु॒वा घृ॒तेनेत्या॑ह
Sentence: 4
ध्रु॒वामे॒वा प्या॑ययति
Sentence: 5
तामा॒प्याय॑मानां य॒ज्ञो ऽन्वा प्या॑यते य॒ज्ञं यज॑मानो॒ यज॑मानम्प्र॒जाः
Sentence: 6
प्र॒जाप॑तेर्वि॒भान्नाम॑ लो॒कस्तस्मिं॑स्त्वा दधामि स॒ह यज॑माने॒नेति॑ ।।
Verse: 2
Sentence: 1
आ॑ह ।
Sentence: 2
अ॒यं वै॑ प्र॒जाप॑तेर्वि॒भान्नाम॑ लो॒कस्
Sentence: 3
तस्मि॑न्नेवैनं दधाति स॒ह यज॑मानेन
Sentence: 4
रिच्य॑त इव॒ वा ए॒तद्यद्यज॑ते
Sentence: 5
यद्य॑जमानभा॒गम्प्रा॒श्नात्या॒त्मान॑मे॒व प्री॑णाति ।
Sentence: 6
ए॒तावान्वै य॒ज्ञो यावा॑न्यजमानभा॒गस् ।
Sentence: 7
य॒ज्ञो यज॑मानस् ।
Sentence: 8
यद्य॑जमान भा॒गम्प्रा॒श्नाति॑ य॒ज्ञ ए॒व य॒ज्ञम्प्रति॑ ष्ठापयति ।
Sentence: 9
ए॒तद्वै॑ सू॒यव॑सं॒ सोद॑कं॒ यद्ब॒र्हिश्चाप॑श्च ।
Sentence: 10
ए॒तत् ।।
Verse: 3
Sentence: 1
यज॑मानस्या॒यत॑नं॒ यद्वेदि॑स् ।
Sentence: 2
यद्पू॑र्णपा॒त्रम॑न्तर्वे॒दि नि॒नय॑ति॒ स्व ए॒वायत॑ने सू॒यव॑सं॒ सोद॑कं कुरुते
Sentence: 3
सद॑सि॒ सन्मे॑ भूया॒ इत्या॑ह ।
Sentence: 4
आपो वै य॒ज्ञस् ।
Sentence: 5
आपो॒ ऽमृत॑म् ।
Sentence: 6
य॒ज्ञमे॒वामृत॑मा॒त्मन्ध॑त्ते
Sentence: 7
सर्वा॑णि वै भू॒तानि॑ व्र॒तमु॑प॒यन्त॒मनूप॑ यन्ति
Sentence: 8
प्राच्यां॑ दि॒शि दे॒वा ऋ॒त्विजो॑ मार्जयन्ता॒मित्या॑ह ।
Sentence: 9
ए॒ष वै॑ दर्शपूर्णमा॒सयो॑रवभृ॒थः ।।
Verse: 4
Sentence: 1
यान्येवैनम्भू॒तानि॑ व्र॒तमु॑प॒यन्त॑मनूप॒यन्ति तैरे॒व स॒हाव॑भृ॒थमवै॑ति
Sentence: 2
विष्णु॑मुखा वै दे॒वाश्छन्दो॑भिरि॒माँ लो॒कान॑नपज॒य्यम॒भ्य॑जयन्
Sentence: 3
यद्वि॑ष्णुक्र॒मान्क्रम॑ते॒ विष्णु॑रे॒व भू॒त्वा यज॑मानस् ।
Sentence: 4
छन्दो॑भिरि॒माँ लो॒कान॑नपज॒य्यम॒भि ज॑यति
Sentence: 5
विष्णोः॒ क्रमो॑ ऽस्यभिमाति॒हेत्या॑ह
Sentence: 6
गाय॒त्री वै॑ पृथि॒वी त्रै॑ष्टुभम॒न्तरि॑क्षं॒ जाग॑ती द्यौ॒रानु॑ष्टुभी॒र्दिश॑स् ।
Sentence: 7
छन्दो॑भिरे॒वेमाँ लो॒कान्य॑थापू॒र्वम॒भि ज॑यति ।।
Paragraph: 6
Verse: 1
Sentence: 1
अग॑न्म॒ सुवः॒ सुव॑रग॒न्मेत्या॑ह॒ सुव॒र्गमे॒व लो॒कमे॑ति
Sentence: 2
सं॒दृश॑स्ते॒ मा छि॑त्सि॒ यत्ते॒ तप॒स्तस्मै॑ ते॒ मा वृक्षीत्या॑ह
Sentence: 3
यथाय॒जुरेवै॒तत्
Sentence: 4
सु॒भूर॑सि॒ श्रेष्ठो॑ रश्मी॒नामा॑यु॒र्धा अ॒स्यायु॑र्मे धे॒हीत्या॑ह ।
Sentence: 5
आ॒शिष॑मेवै॒तामा शा॑स्ते॒ प्र वा ए॒षो॒ ऽस्माल्लो॒काच्च्य॑वते॒ यः ।।
Verse: 2
Sentence: 1
वि॑ष्णुक्र॒मान्क्रम॑ते सुव॒र्गाय॒ हि लो॒काय॑ विष्णुक्र॒माः क्र॒म्यन्ते
Sentence: 2
ब्रह्मवा॒दिनो॑ वदन्ति
Sentence: 3
स त्वै॑ विष्णुक्र॒मान्क्र॑मेत॒ य इ॒माँ लो॒कान्भ्रातृ॑व्यस्य सं॒विद्य॒ पुन॑रि॒मं लो॑कम्प्रतति॑ ।
Sentence: 4
ए॒ष वा अ॒स्य लो॒कस्य॑ प्रत्यवरो॒हो यदा॑ह ।
Sentence: 5
इ॒दम॒हम॒मुम्भ्रातृ॑व्यमा॒भ्यो दि॒ग्भ्यो ऽस्यै दि॒व इति॑ ।
Sentence: 6
इ॒माने॒व लो॒कान्भ्रातृ॑व्यस्य सं॒विद्य॒ पुन॑रि॒मं लो॒कम्प्र॒त्यव॑रोहति
Sentence: 7
सम् ।।
Verse: 3
Sentence: 1
ज्योति॑षाभूव॒मित्या॑ह ।
Sentence: 2
अ॒स्मिन्ने॒व लो॒के प्रति॑ तिष्ठति ।
Sentence: 3
अै॒न्द्रीमा॒वृत॑म॒न्वाव॑र्त॒ इत्या॑ह ।
Sentence: 4
असौ॒ वा आ॑दि॒त्य इन्द्र॒स्तस्यै॒वावृत॒मनु॑ प॒र्याव॑र्तते
Sentence: 5
दक्षि॒णा प॒र्याव॑र्तते॒ स्वमे॒व वी॒र्य॒मनु॑ प॒र्याव॑र्तते॒ तस्मा॒द्दक्षि॒नो ऽर्ध॑ आ॒त्मनो॑ वी॒र्या॑वत्त॒रो ऽथो॑ आदि॒त्यस्यै॒वावृत॒मनु॑ प॒र्याव॑र्तते
Sentence: 6
सम॒हम्प्र॒जया॒ सम्मया॑ प्र॒जेत्या॑ह ।
Sentence: 7
आ॒शिष॑म् ।।
Verse: 4
Sentence: 1
एवै॒तामा शा॑स्ते
Sentence: 2
समि॑द्धो अग्ने मे दीदिहि समे॒द्धा ते॑ अग्ने दीद्यास॒मित्या॑ह
Sentence: 3
यथाय॒जुरेवै॒तत् ।
Sentence: 4
वसु॑मान्य॒ज्ञो वसी॑यान्भूयास॒मित्या॑ह ।
Sentence: 5
आ॒शिष॑मेवै॒तामा शा॑स्ते
Sentence: 6
ब॒हु वै॒ गार्ह॑पत्य॒स्यान्ते॑ मि॒श्रमि॑व चर्यत आग्निपावमा॒नीभ्या॒म्गार्ह॑पत्य॒मुप॑ तिष्ठते पु॒नात्ये॒वाग्निम्पु॑नी॒त आ॒त्मानं॒ द्वाभ्या॒म्प्रति॑ष्ठित्यै ।
Sentence: 7
अग्ने॑ गृहपत॒ इत्या॑ह ।।
Verse: 5
Sentence: 1
य॑थाय॒जुरेवै॒तच्छ॒तं हिमा॒ इत्या॑ह श॒तं त्वा॑ हेम॒न्तानि॑न्धिषी॒येति॒ वावै॒तदा॑ह
Sentence: 2
पु॒त्रस्य॒ नाम॑ गृह्णात्यन्ना॒दमेवैनं करोति
Sentence: 3
तामा॒शिष॒मा शा॑से॒ तन्त॑वे॒ ज्योति॑ष्मती॒मिति॑ ब्रूया॒द्यस्य॑ पु॒त्रो ऽजा॑तः॒ स्यात्ते॑ज॒स्य॑ ब्रह्मवर्च॒सी पु॒त्रो जा॑यते
Sentence: 4
तामा॒शिष॒मा शा॑से॒ ऽमुष्मै॒ ज्योति॑ष्मती॒मिति॑ ब्रूया॒द्यस्य॑ पु॒त्रः ।।
Verse: 6
Sentence: 1
जा॒तः स्यात्तेज॑ ए॒वास्मि॑न्ब्रह्मवर्च॒सं द॑धाति
Sentence: 2
यो वै॑ य॒ज्ञम्प्र॒युज्य॒ न वि॑मु॒ञ्चत्य॑प्रतिष्ठा॒नो वै॒ स भ॑वति
Sentence: 3
कस्त्वा॑ युनक्ति॒ स त्वा॒ वि मु॑ञ्च॒त्वित्या॑ह प्र॒जाप॑तिर्वै॒ कः प्र॒जाप॑तिनैवैनं यु॒नक्ति॑ प्र॒जाप॑तिना॒ वि मु॑ञ्चति॒ प्रति॑ष्ठित्यै ।
Sentence: 4
ई॑श्व॒रं वै॑ व्र॒तमवि॑सृष्टम्प्र॒दहो ऽग्ने॑ व्रतपते व्र॒तम॑चारिष॒मित्या॑ह व्र॒तमे॒व ।।
Verse: 7
Sentence: 1
वि सृ॑जते॒ शान्त्या॒ अप्र॑दाहाय
Sentence: 2
परा॒ङ्वाव य॒ज्ञ ए॑ति॒ न नि व॑र्तते॒ पुन॒र्यो वै॑ य॒ज्ञस्य॑ पुनराल॒म्भं वि॒द्वान्यज॑ते॒ तम॒भि नि व॑र्तते
Sentence: 3
य॒ज्ञो ब॑भूव॒ स आ ब॑भू॒वेत्या॑है॒ष वै॑ य॒ज्ञस्य॑ पुनराल॒म्भस्तेनैवैन॒म्पुन॒रा ल॑भते ।
Sentence: 4
अन॑वरुद्धा॒ वा ए॒तस्य॑ वि॒राड्य आहि॑ताग्निः॒ सन्न॑स॒भः प॒शवः॒ खलु वै ब्राह्म॒णस्य॑ स॒भा ।
Sentence: 5
इ॒ष्ट्वा प्राङु॒त्क्रम्य॑ ब्रूया॒द्गोमां॑ अ॒ग्ने ऽवि॒मां अ॒श्वी य॒ज्ञ इत्यव॑ स॒भां रु॑न्द्धे॒ प्र स॒हस्र॑म्प॒शूना॑प्नो॒त्यास्य॑ प्र॒जायां॑ वा॒जी जा॑यते ।।
Paragraph: 7
Verse: 1
Sentence: 1=a
देव॑ सवितः॒ प्र सु॑व य॒ज्ञम्प्र सु॑व य॒ज्ञप॑ति॒म्भगा॑य दि॒व्यो ग॑न्ध॒र्वः के॑त॒पूः के॒तं नः॑ पुनातु॒ वाच॒स्पति॒र्वाच॑म॒द्य स्व॑दाति नः ।
Sentence: 2=b
इन्द्र॑स्य॒ वज्रो॑ ऽसि॒ वार्त्र॑घ्न॒स्त्वया॒यं वृ॒त्रं व॑ध्यात् ।
Sentence: 3=c
वा॒जस्य॒ नु प्र॑स॒वे मा॒तर॑म्म॒हीमदि॑तिं॒ नाम॒ वच॑सा करामहे । यस्या॑मि॒दं विश्व॒म्भुव॑नमावि॒वेश॒ तस्यां॑ नो दे॒वः स॑वि॒ता धर्म॑ साविषत् ।
Sentence: 4=d
अ॒प्सु ।।
Verse: 2
Sentence: 1
अ॒न्तर॒मृत॑म॒प्सु भे॑ष॒जम॒पामु॒त प्रश॑स्ति॒ष्वश्वा॑ भवथ वाजिनः ।।
Sentence: 2=e
वा॒युर्वा॑ त्वा॒ मनु॑र्वा त्वा गन्ध॒र्वाः स॒प्तविं॑शतिः । ते अग्रे॒ अश्व॑मायुञ्ज॒न्ते अ॑स्मिञ्ज॒वमाद॑धुः ।।
Sentence: 3=f
अपां॑ नपादाशुहेम॒न्य ऊ॒र्मिः क॒कुद्मा॒न्प्रतू॑र्तिर्वाज॒सात॑म॒स्तेना॑यं॒ वाजं॑ सेत् ।
Sentence: 4=g
विष्णोः॒ क्रमो॑ ऽसि॒ विष्णोः॑ क्रा॒न्तम॑सि॒ विष्णो॒र्विक्रा॑न्तमसि ।
Sentence: 5=h
अङ्कौ न्य॒ङ्काव॒भितो॒ रथं यौ ध्वा॒न्तं वा॑ता॒ग्रमनु॑ सं॒चर॑न्तौ । दू॒रेहे॑तिरिन्द्रि॒यावा॑न्पत॒त्री ते नो॒ ऽग्नयः॒ पप्र॑यः पारयन्तु ।।
Paragraph: 8
Verse: 1
Sentence: 1=a
दे॒वस्या॒हं स॑वि॒तुः प्र॑स॒वे बृह॒स्पति॑ना वाज॒जिता॒ वाजं॑ जेषम् ।
Sentence: 2=b
दे॒वस्या॒हं स॑वि॒तुः प्र॑स॒वे बृह॒स्पति॑ना वाज॒जिता॒ वर्षि॑ष्ठं॒ नाकं॑ रुहेयम्
Sentence: 3=c
इन्द्रा॑य॒ वाचं॑ वद॒तेन्द्रं॒ वाजं॑ जापय॒तेन्द्रो॒ वाज॑मजयित् ।
Sentence: 4=d
अश्वा॑जनि वाजिनि॒ वाजे॑षु वाजिनीव॒त्यश्वा॑न्त्स॒मत्सु॑ वाजय ।
Sentence: 5=e
अर्वा॑सि॒ सप्ति॑रसि वा॒ज्य॑सि
Sentence: 6=f
वाजि॑नो॒ वाजं॑ धावत म॒रुता॑म्प्रस॒वे ज॑यत॒ वि योज॑ना मिमीध्व॒मध्व॑न स्कभ्नीत ।।
Verse: 2
Sentence: 1
काष्ठां॑ गछत
Sentence: 2=g
वाजे॑वाजे ऽवत वाजिनो नो॒ धने॑षु विप्रा अमृता ऋतज्ञाः । अ॒स्य मध्वः॑ पिबत मा॒दय॑ध्वं तृ॒प्ता या॑त प॒थिभि॑र्देव॒यानैः॑ ।।
Sentence: 3=h
ते नो॒ अर्व॑न्तो हवन॒श्रुतो॒ हवं॒ विश्वे॑ शृण्वन्तु वा॒जिनः॑ ।
Sentence: 4=i
मि॒तद्र॑वः
Sentence: 5=i
सहस्र॒सा मे॒धसा॑ता सनि॒ष्यवः॑ । म॒हो ये रन्तं॑ समि॒थेषु॑ जभ्रि॒रे शं नो॑ भवन्तु वा॒जिनो॑ ह॒वेषु
Sentence: 6=k
दे॒वता॑ता मि॒तद्र॑वः स्व॒र्काः । ज॒म्भय॒न्तो ऽहिं॒ वृकं॒ रक्षां॑सि॒ सने॑म्य॒स्मद्यु॑यवन् ।।
Verse: 3
Sentence: 1
अमी॑वाः ।।
Sentence: 2=l
ए॒ष स्य वा॒जी क्षि॑प॒णिं तु॑रण्यति ग्री॒वाया॑म्ब॒द्धो अ॑पिक॒क्ष आ॒सनि॑ । क्रतुं॑ दधि॒क्रा अनु॑ सं॒तवी॑त्वत्प॒थामङ्कां॒स्यन्वा॒पनी॑पणत् ।।
Sentence: 3=m
उ॒त स्मा॑स्य॒ द्रव॑तस्तुरण्य॒तः प॒र्णं न वेरनु॑ वाति प्रग॒र्धिनः॑ । श्ये॒नस्ये॑व॒ ध्रज॑तो अङ्क॒सम्परि॑ दधि॒क्राव्णः॑ स॒होर्जा तरि॑त्रतः ।।
Sentence: 4=n
आ मा॒ वाज॑स्य प्रस॒वो ज॑गम्या॒दा द्यावा॑पृथि॒वी वि॒श्वश॑म्भू । आ मा॑ गन्ताम्पि॒तरा॑ ।।
Verse: 4
Sentence: 1
मा॒तरा॒ चा मा॒ सोमो॑ अमृत॒त्वाय॑ गम्यात् ।।
Sentence: 2=o
वाजि॑नो वाजजितो॒ वाजं॑ सरि॒ष्यन्तो॒ वाजं॑ जे॒ष्यन्तो॒ बृह॒स्पते॑र्भा॒गमव॑ जिघ्रत ।।
Sentence: 3=p
वाजि॑नो वाजजितो॒ वाजं॑ ससृ॒वांसो॒ वाजं॑ जिगि॒वांसो॒ बृह॒स्पते॑र्भा॒गे नि मृ॑ड्ढ्वम्
Sentence: 4=q
इ॒यं वः॒ सा स॒त्या सं॒धाभू॒द्यामिन्द्रे॑ण स॒मध॑द्ध्वम्
Sentence: 5=r
अजी॑जिपत वनस्पतय॒ इन्द्रं॒ वाजं॒ वि मु॑च्यध्वम् ।।
Paragraph: 9
Verse: 1
Sentence: 1=a
क्षत्र॒स्योल्ब॑मसि क्ष॒त्रस्य॒ योनि॑रसि
Sentence: 2=b
जाय॒ एहि॒ सुवो॒ रोहा॑व॒ रोहा॑व॒ हि सुव॑र॒हं ना॑वु॒भयोः॒ सुवो॑ रोक्ष्यामि
Sentence: 3=c
वाज॑श्च प्रस॒वश्चा॑पि॒जश्च॒ क्रतु॑श्च॒ सुव॑श्च मू॒र्धा च॒ व्यश्नि॑यश्चान्त्याय॒नश्चान्त्य॑श्च भौव॒नश्च॒ भुव॑न॒श्चाधि॑पतिश्च ।
Sentence: 4=d
आयु॑र्य॒ज्ञेन॑ कल्पताम्प्रा॒णो य॒ज्ञेन॑ कल्पतामपा॒नः ।।
Verse: 2
Sentence: 1
य॒ज्ञेन॑ कल्पतां व्या॒नो य॒ज्ञेन॑ कल्पतां॒ चक्षु॑र्य॒ज्ञेन॑ कल्पतां॒ श्रोत्रं॑ य॒ज्ञेन॑ कल्पता॒म्मनो॑ य॒ज्ञेन॑ कल्पतां॒ वाग्य॒ज्ञेन॑ कल्पतामा॒त्मा य॒ज्ञेन॑ कल्पतां य॒ज्ञो य॒ज्ञेन॑ कल्पताम् ।
Sentence: 2=e
सुव॑र्दे॒वां अ॑गन्मा॒मृता॑ अभूम प्र॒जाप॑तेः प्र॒जा अ॑भूम
Sentence: 3=f
सम॒हम्प्र॒जया॒ सम्मया॑ प्र॒जा सम॒हं रा॒यस्पोषे॑ण॒ सम्मया॑ रा॒यस्पोष॑स् ।
Sentence: 4=g
अन्ना॑य त्वा॒न्नाद्या॑य त्वा॒ वाजा॑य त्वा वाजजि॒त्यायै॑ त्वा ।
Sentence: 5=h
अ॒मृत॑मसि॒ पुष्टि॑रसि प्र॒जन॑नमसि ।।
Paragraph: 10
Verse: 1
Sentence: 1=a
वाज॑स्ये॒मम्प्र॑स॒वः सु॑षुवे॒ अग्रे॒ सोमं॒ राजा॑न॒मोष॑धीष्व॒प्सु । ता अ॒स्मभ्य॒म्मधु॑मतीर्भवन्तु व॒यं रा॒ष्ट्रे जा॑ग्रियाम पु॒रोहि॑ताः ।।
Sentence: 2=b
वाज॑स्ये॒दम्प्र॑स॒व आ ब॑भूवे॒मा च॒ विश्वा॒ भुव॑नानि स॒र्वतः॑ । स वि॒राज॒म्पर्ये॑ति प्रजा॒नन्प्र॒जम्पुष्टिं॑ व॒र्धय॑मानो अ॒स्मे ।।
Sentence: 3=c
वाज॑स्ये॒माम्प्र॑स॒वः शि॑श्रिये॒ दिव॑मि॒मा च॒ विश्वा॒ भुव॑नानि स॒म्राट् । अदि॑त्सन्तं दापयतु प्रजा॒नन्र॒यिम् ।।
Verse: 2
Sentence: 1
च॑ नः॒ सर्व॑वीरां॒ नि य॑छतु ।।
Sentence: 2=d
अग्ने॒ अछा॑ वदे॒ह नः॒ प्रति॑ नः सु॒मना॑ भव । प्र णो॑ यछ भुवस्पते धन॒दा अ॑सि न॒स्त्वम् ।।
Sentence: 3=e
प्र णो॑ यछत्वर्य॒मा प्र भगः॒ प्र बृह॒स्पतिः॑ । प्र दे॒वाः प्रोत सू॒नृता॒ प्र वाग्दे॒वी द॑दातु नः ।।
Sentence: 4=f
अ॑र्य॒मन॒म्बृह॒स्पति॒मिन्द्रं॒ दाना॑य चोदय । वाचं॒ विष्णुं॒ सर॑स्वतीं सवि॒तार॑म् ।।
Verse: 3
Sentence: 1
च॑ वा॒जिन॑म् ।।
Sentence: 2=g
सोमं॒ राजा॑नं॒ वरु॑णम॒ग्निम॒न्वार॑भामहे । आ॑दि॒त्यान्विष्णुं॒ सूर्य॑म्ब्र॒ह्माणं॑ च॒ बृह॒स्पति॑म् ।
Sentence: 3=h
दे॒वस्य॑ त्वा सवि॒तुः प्र॑स॒वे ऽश्विणो॑र्बा॒हुभ्या॑म्पू॒ष्णो हस्ता॑भ्यां॒ सर॑स्वत्यै वा॒चो य॒न्तुर्य॒न्त्रेणा॒ग्नेस्त्वा॒ साम्रा॑ज्येना॒भि षि॑ञ्चा॒मीन्द्र॑स्य॒ बृह॒स्पत॑स्त्वा॒ साम्रा॑ज्येणा॒भि षि॑ञ्चामि ।।
Paragraph: 11
Verse: 1
Sentence: 1
अ॒ग्निरेका॑क्षरेण॒ वाच॒मुद॑जयत् ।
Sentence: 2
अ॒श्विनौ॒ द्व्य॑क्षरेण प्राणापा॒नवुद॑जयताम् ।
Sentence: 3
विष्णु॒स्त्र्य॑क्षरेण॒ त्रीन्लो॒कानुद॑जयत्
Sentence: 4
सोम॒श्चतु॑रक्षरेण॒ चतु॑ष्पदः प॒शूनुद॑जयत्
Sentence: 5
पू॒षा पञ्चक्ष॑रेण प॒ङ्क्तिमुद॑जयत् ।
Sentence: 6
धा॒ता षड॑क्षरेण॒ षडृ॒तूनुद॑जयत् ।
Sentence: 7
म॒रुतः॑ स॒प्ताक्ष॑रेण स॒प्तप॑दां॒ शक्व॑री॒मुद॑जयन्
Sentence: 8
बृह॒स्पति॑र॒ष्टाक्ष॑रेण गाय॒तृमुद॑जयत् ।
Sentence: 9
मि॒त्रो नवा॑क्षरेण त्रि॒वृतं॑ स्तोम॒मुद॑जयत् ।।
Verse: 2
Sentence: 1
वरु॑णो॒ दशा॑क्षरेण वि॒राज॒मुद॑जयत् ।
Sentence: 2
इन्द्र॒ एका॑दशाक्षरेण त्रि॒ष्टुभ॒मुद॑जयत् ।
Sentence: 3
विश्वे॑ दे॒वा द्वाद॑शाक्षरेण॒ जग॑ती॒मुद॑जयन्
Sentence: 4
वस॑व॒स्त्रयो॑दशाक्षरेण त्रयोद॒शं स्तोम॒मुद॑जयन् ।
Sentence: 5
रु॒द्राश्चतु॑र्दशाक्षरेण चतुर्द॒शं स्तोम॒मुद॑जयन् ।
Sentence: 6
आ॑दि॒त्याः पञ्च॑दशाक्षरेण पञ्चद॒शं स्तोम॒मुद॑जयत्
Sentence: 7
प्र॒जाप॑तिः स॒प्तद॑शाक्षरेण सप्तद॒शं स्तोम॒मुद॑जयत् ।।
Paragraph: 12
Verse: 1
Sentence: 1=a
उ॑पया॒मगृ॑हीतो ऽसि नृ॒षदं॑ त्वा द्रु॒षद॑म्भुवन॒सद॒मिन्द्रा॑य॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा ।
Sentence: 2=b
उ॑पया॒मगृ॑हीतो ऽसि अप्सु॒षदं॑ त्वा घृत॒सद॑म्व्योम॒सद॒मिन्द्रा॑य॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा ।
Sentence: 3=c
उ॑पया॒मगृ॑हीतो ऽसि पृथिवि॒षदं॑ त्वान्तरिक्ष॒सद॑म्नाक॒सद॒मिन्द्रा॑य॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा
Sentence: 4=d
ये ग्रहाः॑ पञ्चज॒नीना॒ येषां॑ ति॒स्रः प॑रम॒जाः । दै॑व्यः कोशः ।।
Verse: 2
Sentence: 1
समु॑ब्जितः । तेषां॒ विशि॑प्रियाणा॒मिष॒मूर्जं॒ सम॑ग्रभीमे॒ष ते॒ योनि॒रिन्द्रा॑य त्वा ।
Sentence: 2=e
अ॒पां रस॒मुद्व॑यसं॒ सूर्य॑रश्मिं स॒माभृ॑तम् । अ॒पां रस॑स्य॒ यो रस॒स्तं वो॑ गृह्णाम्युत्त॒ममे॒ष ते॒ योनि॒रिन्द्रा॑य त्वा ।
Sentence: 3=f
अ॒या वि॒ष्ठा ज॒नय॒न्कर्व॑राणि॒ स हि घृणि॑रु॒रुर्वरा॑य गा॒तुः । स प्रत्युऐ॑द्ध॒रुणो॒ मध्वो॒ अग्रं॒ स्वायां॒ यत्त॒नुवां॑ त॒नूऐ॑रयत ।
Sentence: 4=g
उ॑पया॒मगृ॑हीतो ऽसि प्र॒जाप॑तये त्वा॒ जुष्टं॑ गृह्णाम्ये॒ष ते॒ योनिः॑ प्र॒जाप॑तये त्वा ।।
Paragraph: 13
Verse: 1
Sentence: 1=a
अन्वह॒ मासा॒ अन्विद्वना॒न्यन्वोष॑धी॒रनु॒ पर्व॑तासः । अन्विन्द्रं॒ रोद॑सी वावशा॒ने अन्वापो॑ आजिहत॒ जाय॑मानम् ।।
Sentence: 2=b
अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये॑ । अनु॑ क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये॑ ।
Sentence: 3=c
इ॑न्द्रा॒णीमा॒सु नारि॑षु सु॒पत्नी॑म॒हम॑श्रवम् । न ह्य॑स्या अप॒रं च॒न ज॒रसा॑ ।।
Verse: 2
Sentence: 1
मर॑ते॒ पतिः॑ ।।
Sentence: 2=d
नाहमि॑न्द्राणि रारण॒ सख्यु॑र्वृ॒षाक॑पेरृ॒ते । यस्ये॒दमप्यं॑ ह॒विः प्रि॒यं दे॒वेषु॒ गछ॑ति ।।
Sentence: 3=e
यो जा॒त ए॒व प्र॑थ॒मो मन॑स्वान्दे॒वो दे॒वान्क्रतु॑ना प॒र्यभू॑षत् । यस्य॒ शुष्मा॒द्रोद॑सी॒ अभ्य॑सेताम्नृ॒म्णस्य॑ म॒ह्ना स ज॑नास॒ इन्द्रः॑ ।।
Sentence: 4=f
आ ते॑ म॒ह इ॑न्द्रो॒त्यु॑ग्र॒ सम॑न्यवो॒ यत्स॒मर॑न्त॒ सेनाः॑ । पता॑ति दि॒व्युन्नर्य॑स्य बाहु॒वोर्मा ते॑ ।।
Verse: 3
Sentence: 1
मनो॑ विष्व॒द्रिय॒ग्वि चा॑रीत् ।।
Sentence: 2=g
मा नो॑ मर्धी॒रा भ॑रा द॒द्धि तन्नः॒ प्र दा॒शुषे॒ दात॑वे॒ भूरि॒ यत्ते॑ । नव्ये॑ दे॒ष्णे श॒स्ते अ॒स्मिन्त॑ उ॒क्थे प्र ब्र॑वाम व॒यमि॑न्द्र स्तु॒वन्तः॑ ।।
Sentence: 3=h
आ तू भ॑र॒ माकि॑रे॒तत्परि॑ ष्ठाद्वि॒द्मा हि त्वा॒ वसु॑पतिं॒ वसू॑नाम् । इन्द्र॒ यत्ते॒ माहि॑नं॒ दत्त्र॒मस्त्य॒स्मभ्यं॒ तद्ध॑र्यश्व ।।
Verse: 4
Sentence: 1
प्र य॑न्धि ।।
Sentence: 2=i
प्र॑दा॒तारं॑ हवामह॒ इन्द्र॒मा ह॒विषा॑ व॒यम् । उ॒भा हि हस्ता॒ वसु॑ना पृ॒णस्वा प्र य॑छ॒ दक्षि॑णा॒दोत स॒व्यात् ।।
Sentence: 3=k
प्र॑दा॒ता व॒ज्री वृ॑ष॒भस्तु॑रा॒षाट्छु॒ष्मी राजा॑ वृत्र॒हा सो॑म॒पावा॑ । अ॒स्मिन्य॒ज्ञे ब॒र्हिष्या नि॒षद्याथा॑ भव॒ यज॑मानाय॒ शं योः ।।
Sentence: 4=l
इन्द्रः॑ सु॒त्रामा॒ स्ववां॒ अवो॑भिःह्सुमृडी॒को भ॑वतु वि॒श्ववे॑दाः । बाध॑तां॒ द्वेषो॒ अभ॑यं कृणोतु सु॒वीर्य॑स्य ।।
Verse: 5
Sentence: 1
पत॑यः स्याम ।।
Sentence: 2=m
तस्य॑ व॒यं सु॑मतौ य॒ज्ञिय॒स्यापि॑ भ॒द्रे सौ॑मन॒से स्या॑म । स सु॒त्रामा॒ स्ववां॒ इन्द्रो॑ अ॒स्मे आ॒राच्चि॒द्द्वेषः॑ सनु॒तर्यु॑योतु ।।
Sentence: 3=n
रे॒वती॑र्नः सध॒माद॒ इन्द्रे॑ सन्तु तु॒विवा॑जाः । क्षु॒मन्तो॒ याभि॒र्मदे॑म ।।
Sentence: 4=o
प्रो ष्व॑स्मै पुरोर॒थमिन्द्रा॑य शू॒षम॑र्चत । अ॒भीके॑ चिदु लोक॒कृत्सं॒गे स॒मत्सु॑ वृत्र॒हा । अ॒स्माक॑म्बोधि चोदि॒ता नभ॑न्तामन्य॒केषा॑म् । ज्या॒का अधि॒ धन्व॑सु ।।
This text is part of the
TITUS
edition of
Black Yajur-Veda: Taittiriya-Samhita
.
Copyright
TITUS Project
, Frankfurt a/M, 10.12.2008. No parts of this document may be republished in any form without prior permission by the copyright holder.
