TITUS
Black Yajur-Veda: Taittiriya-Samhita
Part No. 13
Chapter: 5
Paragraph: 1
Verse: 1
Sentence: 1
वि॒श्वरू॑पो वै त्वा॒ष्ट्रः पु॒रोहि॑तो दे॒वाना॑मासीत्स्व॒स्रीयो ऽसु॑राणाम् ।
Sentence: 2
तस्य॒ त्रीणि॑ शी॒र्षाण्या॑सन्त्सोम॒पानं॑ सुरा॒पान॑म॒न्नाद॑नम् ।
Sentence: 3
स प्र॒त्यक्षं॑ दे॒वेभ्यो॑ भा॒गम॑वदत्प॒रोऽक्ष॒मसु॑रेभ्यः॒ सर्व॑स्मै वै प्र॒त्यक्ष॑म्भा॒गं व॑दन्ति॒ यस्मा॑ ए॒व प॒रोऽक्षं॒ वद॑न्ति॒ तस्य॑ भा॒ग उ॑दि॒तस्
Sentence: 4
तस्मा॒दिन्द्रो॑ ऽबिभेद्
Sentence: 5
ई॒दृङ्वै॑ रा॒ष्ट्रं वि प॒र्याव॑र्तय॒तीति
Sentence: 6
तस्य॒ वज्र॑मा॒दाय॑ शी॒र्षाण्य॑छिन॒द्यत्सो॑म॒पान॑म् ।।
Verse: 2
Sentence: 1
आसी॒त्स क॒पिञ्ज॑लो ऽभव॒त्यत्सु॑रा॒पानं॒ स क॑ल॒विङ्को॒ यद॒न्नाद॑नं॒ स ति॑त्ति॒रिस् । तस्या॑ञ्ज॒लिना॑ ब्रमह॒त्यामुपा॑गृह्णा॒त्तां सं॑वत्स॒रं अ॑बिभ॒स्तम्भू॒तान्य॒भ्य॑क्रोशन्
Sentence: 2
ब्रह्म॑ह॒न्निति॑ । स पृ॑थि॒वीमुपा॑सीदद्
Sentence: 3
अस्यै ब्रह्मह॒त्यायै॒ तृती॑य॒म्प्रति॑ गृहा॒णेति
Sentence: 4
साब्र॑वीद्
Sentence: 5
वरं॑ वृणै खा॒तात्प॑राभवि॒ष्यन्ती॑ मन्ये॒ ततो॒ मा प॒रा भू॑व॒मिति
Sentence: 6
पु॒रा ते॑ ।।
Verse: 3
Sentence: 1
सं॑वत्स॒रादपि॑ रोहा॒दित्य॑ब्रवी॒त्तस्मा॑त्पु॒रा सं॑वत्स॒रात्पृ॑थिव्यै खा॒तमपि॑ रोहति॒ वारे॑वृतं॒ ह्य॑स्यै
Sentence: 2
तृती॑यम्ब्रह्मह॒त्यायै॒ प्रत्य॑गृह्णा॒त्तत्स्वकृ॑त॒मिरि॑णमभव॒त्तस्मा॒दाहि॑ताग्निः श्र॒द्धादे॑वः॒ स्वकृ॑त॒ इरि॑णे॒ नाव॑ स्येद्ब्रह्मह॒त्यायै॒ ह्ये॒ष वर्णः॑ । स वन॒स्पती॒नुपा॑सीदद्
Sentence: 3
अस्यै ब्रह्मह॒त्यायै॒ तृती॑य॒म्प्रति॑ गृह्णी॒तेति
Sentence: 4
ते॑ ऽब्रुवन्
Sentence: 5
वरं॑ वृणामहै वृ॒क्णात् ।।
Verse: 4
Sentence: 1
प॑राभवि॒ष्यन्तो॑ मन्यामहे॒ ततो॒ मा परा॑ भू॒मेति॑ ।
Sentence: 2
आ॒व्रश्च॑ना॒द्वो भूयां॑स॒ उत्ति॑ष्ठा॒नित्य॑ब्रवी॒त्तस्मा॑दा॒व्रश्च॑नाद्वृ॒क्षाणा॒म्भूय॑स॒ उत्ति॑ष्ठन्ति॒ वारे॑वृतं॒ ह्ये॑षाम् ।
Sentence: 3
तृती॑यम्ब्रह्मह॒त्यायै॒ प्रत्य॑गृह्ण॒न्त्स नि॑र्या॒सो॑ ऽभव॒त्तस्मा॑न्निर्या॒सस्य॒ नाश्य॑म्ब्रह्मह॒त्यायै॒ ह्ये॒ष वर्णो ऽथो॒ खलु॒ य ए॒व लोहि॑तो॒ यो वा॒व्रश्च॑नान्नि॒र्ये॑ति॒ तस्य॒ नाश्य॑म् ।।
Verse: 5
Sentence: 1
काम॑म॒न्यस्य॑ । स स्त्री॑षंसा॒दमुपा॑सीदद्
Sentence: 2
अस्यै ब्रह्मह॒त्यायै॒ तृती॑य॒म्प्रति॑ गृह्णी॒तेति
Sentence: 3
ता अ॑ब्रुवन्
Sentence: 4
वरं॑ वृणामहा॒ ऋत्वि॑यात्प्र॒जां वि॑न्दामहै॒ काम॒मा विज॑नितोः॒ सम्भ॑वा॒मेति॒ तस्मा॒दृत्वि॑यः॑ प्र॒जां वि॑न्दन्ते॒ काम॒मा विज॑नितोः॒ सम्भ॑वन्ति॒ वारे॑वृतं॒ ह्या॑साम् ।
Sentence: 5
तृती॑यम्ब्रह्मह॒त्यायै॒ प्रत्य॑गृह्ण॒न्त्सा मल॑वद्वासा अभव॒त्तस्मा॒न्मल॑वद्वाससा॒ न सं व॑देत ।।
Verse: 6
Sentence: 1
न स॒हासी॑त॒ नास्या॒ अन्न॑म॒द्याद्ब्र॑ह्मह॒त्यायै॒ ह्ये॒षा वर्ण॑म्प्रति॒मुच्यास्ते॑ ।
Sentence: 2
अथो॒ खल्वा॑हुर्
Sentence: 3
अ॒भ्यञ्ज॑नं॒ वाव स्त्रि॒या अन्न॑म॒भ्यञ्ज॑नमे॒व न प्र॑ति॒गृह्यं॒ काम॑म॒न्यदिति॑ । याम्मल॑वद्वाससं स॒म्भव॑न्ति॒ यस्ततो॒ जाय॑ते॒ सो॑ ऽभिश॒स्तो यामर॑ण्ये॒ तस्यै॑ स्ते॒नो याम्परा॑चीं॒ तस्यै॑ ह्रीतमु॒ख्य॑पग॒ल्भो या स्नाति॒ तस्या॑ अ॒प्सु मारु॑को॒ या ।।
Verse: 7
Sentence: 1
अ॑भ्य॒ङ्क्ते तस्यै॑ दु॒श्चर्मा॒ या प्र॑लि॒खते॒ तस्यै॑ खल॒तिर॑पमा॒री याङ्क्ते तस्यै॑ का॒णो या द॒तो धाव॑ते॒ तस्यै॑ श्या॒वद॒न्या न॒खानि॑ निकृ॒न्तते॒ तस्यै॑ कुन॒खी या कृ॒णत्ति॒ तस्यै॑ क्ली॒बो या रज्जुं॑ सृ॒जति॒ तस्या॑ उ॒द्बन्धु॑को॒ या प॒र्णेन॒ पिब॑ति॒ तस्या॑ उ॒न्मादु॑को॒ या ख॒र्वेण॒ पिब॑ति॒ तस्यै॑ ख॒र्वस्
Sentence: 2
ति॒स्रो रात्री॑र्व्र॒तं च॑रेदञ्ज॒लिना॑ वा॒ पिबे॒दख॑र्वेण वा॒ पात्रे॑ण प्र॒जायै॑ गोपी॒थाय॑ ।।
Paragraph: 2
Verse: 1
Sentence: 1
त्वष्टा॑ ह॒तपु॑त्रो॒ वीन्द्रं॒ सोम॒माह॑रत्
Sentence: 2
तस्मि॒न्निन्द्र॑ उपह॒वमै॑छत
Sentence: 3
तं नोपा॑ह्वयत
Sentence: 4
पु॒त्रम्मे॑ ऽवधी॒रिति
Sentence: 5
स य॑ज्ञवेश॒सं कृ॒त्वा प्रा॒सहा॒ सोम॑मपिबत्
Sentence: 6
तस्य॒ यद॒त्यशि॑ष्यत॒ तत्त्वष्टा॑हव॒नीय॒मुप॒ प्राव॑र्तयत्
Sentence: 7
स्वाहेन्द्र॑शत्रुर्वर्ध॒स्वेति
Sentence: 8
यदव॑र्तय॒त्तद्वृ॒त्रस्य॑ वृत्र॒त्वम् ।
Sentence: 9
यदब्र॑वीत्
Sentence: 10
स्वाहेन्द्र॑शत्रुर्वर्ध॒स्वेति॒ तस्मा॑दस्य ।।
Verse: 2
Sentence: 1
इन्द्रः॒ शत्रु॑रभवत्
Sentence: 2
स स॒म्भव॑न्न॒ग्नीषोमा॑व॒भि सम॑भवत्
Sentence: 3
स इ॑षुमा॒त्रमि॑षुमात्रं॒ विष्व॑ङ्ङवर्धत
Sentence: 4
स इ॒माँ लो॒कान॑वृणोत् ।
Sentence: 5
यदि॒माँ लो॒कानवृ॑णो॒त्तद्वृ॒त्रस्य॑ वृत्र॒त्वम् ।
Sentence: 6
तस्मा॒दिन्द्रो॑ ऽबिभेत्
Sentence: 7
स प्र॒जाप॑ति॒मुपा॑धावत् ।
Sentence: 8
शत्रु॑र्मे ऽज॒नीति
Sentence: 9
तस्मै॒ वज्रं॑ सि॒क्त्वा प्राय॑छत् ।
Sentence: 10
ए॒तेन॑ ज॒हीति॒ तेना॒भ्या॑यत
Sentence: 11
ताव॑ब्रूताम॒ग्नीषोमौ
Sentence: 12
मा ।।
Verse: 3
Sentence: 1
प्र हा॑रा॒वम॒न्तः स्व॒ इति
Sentence: 2
मम वै यु॒वं स्थ॒ इत्य॑ब्रवी॒न्माम॒भ्येत॒मिति
Sentence: 3
तौ भाग॒धेय॑ऐछेताम् ।
Sentence: 4
ताभ्या॑मे॒तम॑ग्नीषो॒मीय॒मेका॑दशकपालम्पू॒र्णमा॑से॒ प्राय॑छत्
Sentence: 5
ताव॑ब्रूताम्
Sentence: 6
अ॒भि संद॑ष्टौ वै स्वो॒ न श॑क्नुव ऐतु॒मिति
Sentence: 7
स इन्द्र॑ आ॒त्मनः॑ शीतरू॒राव॑जनयत्
Sentence: 8
तच्छी॑तरू॒रयो॒र्जन्म
Sentence: 9
य ए॒वं शी॑तरू॒रयो॒र्जन्म॒ वेद॑ ।।
Verse: 4
Sentence: 1
नै॑नं शीतरूरौ हतस्
Sentence: 2
ताभ्या॑मेनम॒भ्य॑नयत्
Sentence: 3
तस्मा॑ज्जञ्ज॒भ्यमा॑नाद॒ग्नीषोमौ॒ निर॑क्रामताम्
Sentence: 4
प्राणापानौ॒ वा ए॑नं॒ तद॑जहिताम्
Sentence: 5
प्रा॒नो वै॒ दक्षो॑ ऽपा॒नः क्रतु॑स्
Sentence: 6
तस्मा॑ज्जञ्ज॒भ्यमा॑नो ब्रूयात् ।
Sentence: 7
मयि॑ दक्षक्र॒तू इति
Sentence: 8
प्राणापा॒नावे॒वात्मन्ध॑त्ते
Sentence: 9
सर्व॒मायु॑रेति
Sentence: 10
स दे॒वता॑ वृ॒त्रान्नि॒र्हूय॒ वार्त्र॑घ्नं ह॒विः पू॒र्णमा॑से॒ निर॑वपत् ।
Sentence: 11
घ्नन्ति॒ वा ए॑नम्पू॒र्णमा॑स॒ आ ।।
Verse: 5
Sentence: 1
अ॑मावा॒स्या॑याम्प्याययन्ति
Sentence: 2
तस्मा॒द्वार्त्र॑घ्नी पू॒र्णमा॒से ऽनू॑च्येते॒ वृध॑न्वती अमावा॒स्या॑याम् ।
Sentence: 3
तत्सं॒स्थाप्य॒ वार्त्र॑घ्नं ह॒विर्वज्र॑मा॒दाय॒ पुन॑र॒भ्या॑यत
Sentence: 4
ते अ॑ब्रूतां॒ द्यावा॑पृथि॒वी
Sentence: 5
मा प्र हा॑रा॒वयोर्वै श्रि॒त इति
Sentence: 6
ते अ॑ब्रूताम् ।
Sentence: 7
वरं॑ वृणावहै॒ नक्ष॑त्रविहिता॒हम॑सा॒नीत्य॒साव॑ब्रवीच्चि॒त्रवि॑हिता॒हमिती॒यम् ।
Sentence: 8
तस्मा॒न्नक्ष॑त्रविहितासौ चि॒त्रवि॑हिते॒ ऽयम् ।
Sentence: 9
य ए॒वं द्यावा॑पृथि॒व्योः ।।
Verse: 6
Sentence: 1
वरं॒ वेदै॑नं॒ वरो॑ गछति
Sentence: 2
स आ॒भ्यामे॒व प्रसू॑त॒ इन्द्रो॑ वृ॒त्रम॑हन्
Sentence: 3
ते दे॒वा वृ॒त्रं ह॒त्वाग्नीषोमा॑वब्रुवन्
Sentence: 4
ह॒व्यं नो॑ वहत॒मिति
Sentence: 5
ताव॑ब्रूताम्
Sentence: 6
अप॑तेजसौ वै त्यौ वृ॒त्रे वै॒ त्ययो॒स्तेज॒ इति
Sentence: 7
ते॑ ऽब्रुवन्
Sentence: 8
क इ॒दमछै॒तीति
Sentence: 9
गौ॒रित्य॑ब्रुवन्गौ॒र्वाव सर्व॑स्य मि॒त्रमिति
Sentence: 10
साब्र॑वीत् ।।
Verse: 7
Sentence: 1
वरं॑ वृणै॒ मय्ये॒व स॒तो ऽभये॑न भुनजाध्वा॒ इति
Sentence: 2
तद्गौ॒राह॑रत्
Sentence: 3
तस्मा॒द्गवि॑ स॒तो ऽभये॑न भुञ्जते ।
Sentence: 4
ए॒तद्वा अ॒ग्नेस्तेजो॒ यद्घृ॒तम्
Sentence: 5
ए॒तत्सोम॑स्य॒ यत्पय॑स् ।
Sentence: 6
य ए॒वम॒ग्नीषोम॑यो॒स्तेजो॒ वेद॑ तेज॒स्व्ये॒व भ॑वति
Sentence: 7
ब्रह्मवा॒दिनो॑ वदन्ति
Sentence: 8
किंदेव॒त्य॑म्पौ॒र्णमा॑स॒मिति
Sentence: 9
प्राजाप॒त्यमिति॑ ब्रूयात्
Sentence: 10
तेनेन्द्रं॑ ज्ये॒ष्ठम्पु॒त्रं नि॒रवा॑सायय॒दिति
Sentence: 11
तस्मा॑ज्ज्ये॒ष्ठम्पु॒त्रं धने॑न नि॒रव॑साययन्ति ।।
Paragraph: 3
Verse: 1
Sentence: 1
इन्द्रं॑ वृ॒त्रं ज॑घनि॒वांस॒म्मृधो॒ ऽभि प्रावे॑पन्त॒ स ए॒तं वै॑मृ॒धम्पू॒णमा॑से ऽनुनिर्वा॒प॒त्तं निर॑वप॒त्तेन वै॒ स मृधो ऽपा॑हत॒ यद्वै॑मृ॒धः पू॒र्णमा॑से ऽनुनिर्वा॒प्यो॒ भव॑ति॒ मृध॑ ए॒व तेन॒ यज॑मा॒नो ऽप॑ हते ।
Sentence: 2
इन्द्रो॑ वृ॒त्रं ह॒त्वा दे॒वता॑भिश्चेन्द्रि॒येण॑ च॒ व्या॑र्ध्यत॒ स ए॒तमा॑ग्ने॒यम॒ष्टाक॑पा॒न्द्रं दधि॑ ।।
Verse: 2
Sentence: 1
तं निर॑वप॒त्तेन वै॒ स दे॒वता॑श्चेन्द्रि॒यं चावा॑रुन्द्ध
Sentence: 2
यदा॑ग्ने॒यो॑ ऽष्टाकपालो ऽमावा॒स्या॑या॒म्भव॑त्ऐ॒न्द्रं दधि॑ दे॒वता॑श्चै॒व तेने॑न्द्रि॒यं च॒ यज॑मा॒नो ऽव॑ रुन्द्धे ।
Sentence: 3
इन्द्र॑स्य
{F
वृ॒त्रं
{W
व्रि॒त्रं
{GOLS
वृ॒त्रं
ज॒घ्नुष॑ इन्द्रि॒यं वी॒र्य॑म्पृथि॒वीमनु॒ व्या॑र्छ॒त्तदोष॑धयो वी॒रुधो॑ ऽभवन्
Sentence: 4
स प्र॒जाप॑ति॒मुपा॑धावद्
Sentence: 5
वृ॒त्रम्मे॑ ज॒घ्नुष॑ इन्द्रि॒यं वी॒र्य॑म् ।।
Verse: 3
Sentence: 1
पृ॑थि॒वीमनु॒ व्या॑र॒त्तदोष॑धयो वी॒रुधो॑ ऽभूव॒निति
Sentence: 2
तत्प॒शव॒ ओष॑धी॒भ्यो ऽध्या॒त्मन्त्सम॑नय॒न्तत्प्रत्य॑दुह॒न्यत्स॒मन॑य॒न्तत्सां॑ना॒य्यस्य॑ सांनाय्य॒त्वं यत्प्र॒त्यदु॑ह॒न्तत्प्र॑ति॒धुषः॑ प्रतिधु॒क्त्वम् ।
Sentence: 3
सम॑नैषुः॒ प्रत्य॑धुक्ष॒न्न तु मयि॑ श्रयत॒ इत्य॑ब्रवीदे॒तद॑स्मै ।।
Verse: 4
Sentence: 1
शृ॒तं कु॑रु॒तेत्य॑ब्रवी॒त्तद॑स्मै शृ॒तम॑कुर्वन्निन्द्रि॒यं वावास्मि॑न्वी॒र्यं॒ तद॑श्रय॒स्य॑ शृत॒त्वम् ।
Sentence: 2
सम॑नैषुः॒ प्रत्य॑धुक्षञ्छृ॒तम॑क्र॒न्न तु मा॑ धिनो॒तीत्य॑ब्रवीदे॒तद॑स्मै॒ दधि॑ कुरु॒तेत्य॑॑स्मै॒ दध्य॑कुर्व॒न्तदे॑नमधिनो॒त्तद्द॒ध्नो द॑धि॒त्वम्
Sentence: 3
ब्रह्मवा॒दिनो॑ वदन्ति द॒ध्नः पूर्व॑स्याव॒देय॑म् ।।
Verse: 5
Sentence: 1
दधि॒ हि पूर्वं॑ क्रि॒यत॒ इत्यना॑दृत्य॒ तच्छृ॒तस्यै॒व पूर्व॒स्याव॑ द्येदिन्रि॒यमे॒वास्मि॑न॒र्यं॑ श्रि॒त्वा द॒ध्नोपरि॑ष्टाद्धिनोति यथापू॒र्वमुपै॑ति
Sentence: 2
यत्पू॒तीकै॑र्वा पर्णवल्कैर्वात॒ञ्च्यात्सौ॒म्यं तद्यत्क्व॑लै राक्ष॒सं तद्यत्त॑ण्डुलैर्वै॒वं तद्यदा॒तञ्च॑नेन मानु॒षं तद्यद्द॒ध्ना तत्सेन्द्रं॑ द॒ध्ना त॑नक्ति ।।
Verse: 6
Sentence: 1
से॑न्द्र॒त्वाय॑ ।
Sentence: 2
अ॑ग्निहोत्रोछेष॒णम॒भ्यात॑नक्ति य॒ज्ञस्य॒ संत॑त्यै ।
Sentence: 3
इन्द्रो॑ वृ॒त्रं ह॒त्वा परा॑म्परा॒वत॑मगछ॒दपा॑राध॒मिति॒ मन्य॑मान॒स्तं दे॒वताः प्रैषऐछ॒न्त्सो॑ ऽब्रवीत्प्र॒जाप॑ति॒र्यः प्र॑थ॒मो॑ ऽनुवि॒न्दति॒ तस्य॑ प्रथ॒मम्भा॑ग॒धेय॒मिति॒ तम्पि॒तरो ऽन्व॑विन्द॒न्तस्मा॑त्पि॒तृभ्यः॑ पूर्वे॒द्युः क्रि॑यते
Sentence: 4
सो॑ ऽमावा॒स्या॒म्प्रत्याग॑छ॒त्तं दे॒वा अ॒भि सम॑गछ॒न्तामा वै॑ नः ।।
Verse: 7
Sentence: 1
अ॒द्य वसु॑ वस॒तीतीन्द्रो॒ हि दे॒वानां॒ वसु॒ तद॑मावा॒स्या॑या अमावास्य॒त्वम्
Sentence: 2
ब्रह्मवा॒दिनो॑ वदन्ति किंदेव॒त्यं॑ सांना॒य्यमिति॑ वैश्वदे॒वमिति॑ ब्रूया॒द्विश्वे॒ हि तद्दे॒वा भा॑ग॒धेय॑म॒भि स॒मग॑छ॒न्तेत्यथो॒ खल्ऐ॒न्द्रमित्ये॒व ब्रू॑या॒दिन्द्रं॒ वाव ते तद्भि॑ष॒ज्यन्तो॒ ऽभि सम॑गछ॒न्तेति॑ ।।
Paragraph: 4
Verse: 1
Sentence: 1
ब्र॑ह्मवा॒दिनो॑ वदन्ति
Sentence: 2
स त्वै॑ दर्शपूर्णमासौ यजेत॒ य ए॑नौ॒ सेन्द्रौ॒ यजे॒तेति
Sentence: 3
वैमृ॒धः पू॒र्णमा॑से ऽनुनिर्वा॒प्यो॑ भवति॒ तेन॑ पू॒र्णमा॑सः॒ सेन्द्र॑ ऐ॒न्द्रं दध्य॑मावा॒स्॑यां॒ तेना॑मावा॒स्या॒ सेन्द्रा॒ य ए॒वं वि॒द्वान्द॑र्शपूर्णमासौ॒ यज॑ते॒ सेन्द्रा॑वेवैनौ यजते॒ श्वःश्वो॑ ऽस्मा ईजा॒नाय॒ वसी॑यो भवति
Sentence: 4
दे॒वा वै॒ यद्य॒ज्ञे ऽकु॑र्वत॒ तदसु॑रा अकुर्वत॒ ते दे॒वा ए॒ताम् ।।
Verse: 2
Sentence: 1
इष्टि॑मपश्यन् ।
Sentence: 2
आ॑ग्नावैष्ण॒वमेका॑दशकपालं॒ सर॑स्वत्यै च॒रुं सर॑स्वते च॒रुं ताम्पौ॑र्णमा॒सं सं॒स्थाप्यानु॒ निर॑वप॒न्ततो॑ दे॒वा अभ॑व॒न्परासु॑रास् ।
Sentence: 3
यो भ्रातृ॑व्यवा॒न्त्स्यात्स पौ॑र्णमा॒सं सं॒स्थाप्यै॒तामिष्टि॒मनु॒ निर्व॑पेत्पौर्णमा॒सेन॒व वज्र॒म्भ्रातृ॑व्याय प्र॒हृत्या॑ग्नावैष्ण॒वेन॑ दे॒वता॑श्च य॒ज्ञं च॒ भ्रातृ॑व्यस्य वृङ्क्ते
Sentence: 4
मिथु॒नान्प॒शून्त्सा॑रस्व॒ताभ्यां॒ याव॑दे॒वा स्यास्ति॒ तत् ।।
Verse: 3
Sentence: 1
सर्वं॑ वृङ्क्ते
Sentence: 2
पौर्णमा॒सीमे॒व य॑जेत॒ भ्रातृ॑व्यवा॒न्नामा॑वा॒स्यां॑ ह॒त्वा भ्रातृ॑व्यं॒ ना प्या॑ययति
Sentence: 3
साकम्प्रस्था॒यीये॑न यजेत प॒शुका॑मस् ।
Sentence: 4
यस्मै॒ वा अल्पे॑ना॒हर॑न्ति॒ नात्मना॒ तृप्य॑ति॒ नान्यस्मै॑ ददाति॒ यस्मै॑ मह॒ता तृप्य॑त्या॒त्ना॒ ददा॑त्य॒न्यस्मै॑ मह॒ता पू॒र्णं हो॑त॒व्य॑म् ।
Sentence: 5
तृ॒प्त एवैन॒मिन्द्रः॑ प्र॒जया॑ प॒शुभि॑स्तर्पयति
Sentence: 6
दारुपा॒त्रेण॑ जुहोति
Sentence: 7
न हि मृ॒न्मय॒माहु॑तिं आन॒शे ।
Sentence: 8
अौ॑दुम्बरम् ।।
Verse: 4
Sentence: 1
भ॑व॒त्यूर्ग्वा उ॑दु॒म्बर॒ ऊर्क्प॒शव॑ ऊर्जै॒वास्मा॒ ऊर्ज॑म्प॒शूनव॑ रुन्द्धे
Sentence: 2
नाग॑तश्रीर्महे॒न्द्रं य॑जेत
Sentence: 3
त्रयो वै ग॒तश्रि॑यः शुश्रु॒वान्ग्रा॑म॒णी रा॑ज॒न्य॒स्तेषा॑म्महे॒न्द्रो दे॒वता॒ यो वै॒ स्वां दे॒वतां॑ अति॒यज॑ते॒ प्रस्वायै॑ दे॒वता॑यै च्यवते॒ न परा॒म्प्राप्नो॑ति॒ पापी॑यान्भ
Sentence: 4
संवत्स॒रमिन्द्रं॑ यजेत संवत्स॒रं हि व्र॒तं नाति॒ स्वा ।।
Verse: 5
Sentence: 1
एवैनं दे॒वते॒ज्यमा॑ना॒ भूत्या॑ इन्द्धे॒ वसी॑यान्भवति
Sentence: 2
संवत्स॒रस्य॑ प॒रस्ता॑द॒ग्नये॑ व्र॒तप॑तये पुरो॒डाश॑म॒ष्टाक॑पालं॒ निर्व॑पेत्
Sentence: 3
संवत्स॒रमेवैनं वृ॒त्रं ज॑घ्नि॒वांस॑म॒ग्निर्व्र॒तप॑तिर्व्र॒तमा ल॑म्भयति
Sentence: 4
ततो ऽधि॒ कामं॑ यजेत ।।
Paragraph: 5
Verse: 1
Sentence: 1
नासो॑मयाजी॒ सं न॑ये॒दना॑गतं॒ वा ए॒तस्य॒ पयो॒ यो ऽसो॑मयाजी
Sentence: 2
यदसो॑मयाजी सं॒नये॑त्परिमो॒ष ए॒व सो ऽनृ॑तं करोति ।
Sentence: 3
अथो॒ परै॒व सि॑च्यते
Sentence: 4
सोमया॒ज्ये॒व सं न॑ये॒त्पयो वै॒ सोमः॒ पयः॑ सांना॒य्यम्पय॑सै॒व पय॑ आ॒त्मन्ध॑त्ते
Sentence: 5
वि वा ए॒तम्प्र॒जया॑ प॒शुभि॑रर्धयति व॒र्धय॑त्यस्य॒ भ्रातृ॑व्यं॒ यस्य॑ ह॒विर्निरु॑प्तम्पु॒रमाः॑ ।।
Verse: 2
Sentence: 1
अ॒भ्यु॒देति
Sentence: 2
त्रे॒धा त॑ण्डु॒लान्वि भ॑जेद्
Sentence: 3
ये म॑ध्य॒माः स्युस्तान॒ग्नये॑ दा॒त्रे पु॑रो॒डाश॑म॒ष्टाक॑पालं कुर्याद्
Sentence: 4
ये स्थवि॑ष्ठा॒स्तानिन्द्रा॑य प्रदा॒त्रे द॒धंश्च॒रुम् ।
Sentence: 5
ये ऽणि॑ष्ठा॒स्तान्विष्ण॑वे शिपिवि॒ष्टाय॑ शृ॒ते च॒रुम्
Sentence: 6
अ॒ग्निरे॒वास्मै॑प्र॒जाम्प्र॑ज॒नय॑ति वृ॒द्धामिन्द्रः॒ प्र य॑छति
Sentence: 7
य॒ज्ञो वै॒ विष्णुः॑ प॒शवः॒ शिपि॑र्य॒ज्ञ ए॒व प॒शुषु॒ प्रति॑ तिष्ठति
Sentence: 8
न द्वे ।।
Verse: 3
Sentence: 1
य॑जेत
Sentence: 2
यत्पूर्व॑या सम्प्र॒ति यजे॒तोत्त॑रया छ॒म्बट्कु॑र्याद्
Sentence: 3
यदुत्त॑रया सम्प्र॒ति यजे॑त॒ पूर्व॑या छ॒म्बट्कु॑र्या॒न्नेष्टि॒र्भव॑ति॒ न य॒ज्ञस्तदनु॑ ह्रीत मु॒ख्य॑पग॒ल्भो जा॑यते ।
Sentence: 4
एका॑मे॒व य॑जेत प्रग॒ल्भो॑ ऽस्य जायते ।
Sentence: 5
अ॑नादृत्य॒ तद्द्वे ए॒व य॑जेत
Sentence: 6
यज्ञमु॒खमे॒व पूर्व॑या॒लभ॑ते॒ यज॑त॒ उत्त॑रया दे॒वता॑ ए॒व पूर्व॑यावरु॒न्द्ध इ॑न्द्रि॒यमुत्तया देवलो॒कमे॒व ।।
Verse: 4
Sentence: 1
पूर्व॑याभि॒जय॑ति मनुष्यलो॒कमुत्त॑रया
Sentence: 2
भूय॑सो यज्ञक्र॒तूनुपै॑ति ।
Sentence: 3
ए॒षा वै॑ सु॒मना॒ नामे॑ष्टि॒र्यम॒द्येजा॒नम्प॒श्चाच्च॒न्द्रमा॑ अ॒भ्यु॒देत्य॒स्मिन्ने॒वास्मै॑ लो॒के ऽर्धु॑कम्भवति
Sentence: 4
दाक्षायणय॒ज्ञेन॑ सुव॒र्गका॑मो यजेत
Sentence: 5
पू॒र्णमा॑से॒ सं न॑येन्मैत्रावरु॒ण्यामिक्ष॑यामावा॒स्या॑यां यजेत
Sentence: 6
पू॒र्णमा॑से वै दे॒वानां॑ सु॒तस्तेषा॑मे॒तम॑र्धमा॒सम्प्रसु॑तस्
Sentence: 7
तेश्षाम्मैत्रावरु॒णी व॒शामा॑वा॒स्या॑यामनूब॒न्ध्या॒ यत् ।।
Verse: 5
Sentence: 1
पू॑र्वे॒द्युर्यज॑ते॒ वेदि॑मे॒व तत्क॑रोति
Sentence: 2
यद्व॒त्सान॑पाक॒रोति॑ सदोहविर्धा॒ने ए॒व सम्मि॑नोति
Sentence: 3
यद्यज॑ते देवैरे॒व सु॒त्यां सम्पा॑दयति॒ स ए॒तम॑र्धमा॒सं स॑ध॒मादं॑ देवैः॒ सोम॑म्पिबति
Sentence: 4
यन्मै॑त्रावरु॒ण्यामि॑क्षयामावा॒स्या॑यां॒ यज॑ते यै॒वासौ॑ दे॒वानां॑ व॒शानू॑ब॒न्ध्या॒ सो एवैषै॒तस्य
Sentence: 5
सा॒क्षाद्वा ए॒ष दे॒वान॒भ्यारो॑हति॒ य ए॑षां य॒ज्ञम् ।।
Verse: 6
Sentence: 1
अ॑भ्या॒रोह॑ति॒ यथा॒ खलु वै॒ श्रेया॑न॒भ्यारू॑ढः का॒मय॑ते॒ तथा॑ करोति
Sentence: 2
यद्य॑व॒विध्य॑ति॒ पापी॑यान्भवति॒ यदि॒ नाव॒विध्य॑ति स॒दृङ्व्या॒वृत्का॑म ए॒तेन॑ य॒ज्ञेन॑ यजेत क्षु॒रप॑वि॒र्ह्ये॒ष य॒ज्ञस्ता॒जक्पुण्यो॑ वा॒ भव॑ति॒ प्र वा॑ मीयते
Sentence: 3
तस्यै॒तद्व्र॒तम् ।
Sentence: 4
नानृ॑तं वदे॒न्न मां॒सम॑श्नीया॒न्न स्त्रिय॒मुपे॑या॒न्नास्य॒ पल्पू॑लनेन॒ वासः॑ पल्पूलयेयुरेद्धि दे॒वाः सर्वं॒ न कु॒र्वन्ति॑ ।।
Paragraph: 6
Verse: 1
Sentence: 1
ए॒ष वै॑ देवर॒थो यद्द॑र्शपूर्णमासौ
Sentence: 2
यो द॑र्शपूर्णमा॒सावि॒ष्ट्वा सोमे॑न॒ यज॑ते॒ रथ॑स्पष्ट ए॒वाव॒साने॒ वरे॑ दे॒वाना॒मव॑ स्यति ।
Sentence: 3
ए॒तानि॒ वा अङ्गा॒परूं॑षि संवत्स॒रस्य॒ यद्द॑र्शपूर्णमासौ
Sentence: 4
य ए॒वं वि॒द्वान्द॑र्शपूर्णमासौ॒ यज॒ते ऽङ्गा॒परूं॑ष्ये॒व सं॑वत्स॒रस्य॒ प्रति॑ दधाति ।
Sentence: 5
ए॒ते वै॑ संवत्स॒रस्य॒ चक्षु॑षी॒ यद्द॑र्शपूर्णमासौ
Sentence: 6
य ए॒वं वि॒द्वान्द॑र्शपूर्णमासौ॒ यज॑ते॒ ताभ्या॑मे॒व सु॑व॒र्गं लो॒कमनु॑ पश्यति ।।
Verse: 2
Sentence: 1
ए॒षा वै॑ दे॒वानां॒ विक्रा॑न्ति॒र्यद्द॑र्शपूर्णमासौ
Sentence: 2
य ए॒वं वि॒द्वान्द॑र्शपूर्णमासौ॒ यज॑ते दे॒वाना॑मे॒व विक्रा॑न्ति॒मनु॒ वि क्र॑मते ।
Sentence: 3
ए॒ष वै॑ देव॒यानः॒ पन्था॒ यद्द॑र्शपूर्णमासौ
Sentence: 4
य ए॒वं वि॒द्वान्द॑र्शपूर्णमासौ॒ यज॑ते॒ य ए॒व दे॑व॒यानः॒ पन्था॒स्तं स॒मारो॑हति ।
Sentence: 5
एतौ वै दे॒वानां॒ हरी॒ यद्द॑र्शपूर्णमासौ
Sentence: 6
य ए॒वं वि॒द्वान्द॑र्शपूर्णमासौ॒ यज॑ते॒ यावे॒व दे॒वानां॒ हरी॒ ताभ्या॑म् ।।
Verse: 3
Sentence: 1
एवैभ्यो ह॒व्यं व॑हति ।
Sentence: 2
ए॒तद्वै॑ दे॒वाना॑मा॒स्यं॒ यद्द॑र्शपूर्णमासौ
Sentence: 3
य ए॒वं वि॒द्वान्द॑र्शपूर्णमासौ॒ यज॑ते सा॒क्षादे॒व दे॒वाना॑मा॒स्ये॑ जुहोति ।
Sentence: 4
ए॒ष वै॑ हविर्धा॒नी यो द॑र्शपूर्णमासया॒जी
Sentence: 5
सा॒यम्प्रा॑तरग्निहो॒त्रं जु॑होति॒ यज॑ते दर्शपूर्णमा॒सावह॑रहर्हविर्धा॒निनां॑ सु॒तस् ।
Sentence: 6
य ए॒वं वि॒द्वान्द॑र्शपूर्णमासौ॒ यज॑ते हविर्धा॒न्य॒स्मीति॒ सर्व॑मे॒वास्य॑ बर्हि॒ष्यं॑ द॒त्
Sentence: 7
दे॒वा वा अहः॑ ।।
Verse: 4
Sentence: 1
य॒ज्ञियं॒ नावि॑न्द॒न्ते द॑र्शपूर्णमा॒साव॑पुनन्
Sentence: 2
तौ॒ वा एतौ पूतौ॒ मेध्यौ॒ यद्द॑र्शपूर्णमासौ
Sentence: 3
य ए॒वं वि॒द्वान्द॑र्शपूर्णमासौ॒ यज॑ते पू॒तावेवैनौ॒ मेध्यौ॑ यजते
Sentence: 4
नामा॑वा॒स्या॑यां च पौर्णमा॒स्यां च॒ स्त्रिय॒मुपे॑यात् ।
Sentence: 5
यदु॑पे॒यान्निरि॑न्द्रियः स्यात्
Sentence: 6
सोम॑स्य वै॒ राज्ञो॑ ऽर्ध॒मास॑स्य॒ रात्र॑यः॒ पत्न॑य आसन्
Sentence: 7
तासा॑ममावा॒स्यां॑ च पौर्णमा॒सीं च॒ नोपै॑त् ।।
Verse: 5
Sentence: 1
ते ए॑नम॒भि सम॑नह्येताम् ।
Sentence: 2
तं यक्ष्म॑ आर्छत् ।
Sentence: 3
राजा॑नं॒ यक्ष्म॑ आर॒दिति॒ तद्रा॑जय॒क्ष्मस्य॒ जन्म
Sentence: 4
यत्पापी॑या॒नभ॑व॒त्तत्पा॑पय॒क्ष्मस्य
Sentence: 5
यज्जा॒याभ्या॒मवि॑न्द॒त्तज्जा॒येन्य॑स्य
Sentence: 6
य ए॒वमे॒तेषां॒ यक्ष्मा॑णां॒ जन्म॒ वेद नैनमे॒ते यक्ष्मा॑ विन्दन्ति
Sentence: 7
स ए॒ते ए॒व न॑म॒स्यन्नुपा॑धावत्
Sentence: 8
ते अ॑ब्रूताम् ।
Sentence: 9
वरं॑ वृणावहा आ॒वं दे॒वाना॑म्भाग॒धे अ॑साव ।।
Verse: 6
Sentence: 1
आ॒वदधि॑ दे॒वा इ॑ज्यान्ता॒ इति
Sentence: 2
तस्मा॑त्स॒दृशी॑नां॒ रात्री॑णाममावा॒स्या॑यां च पौर्णमा॒स्यां च॑ दे॒वा इ॑ज्यन्ते ।
Sentence: 3
ए॒ते हि दे॒वाना॑म्भाग॒धे
Sentence: 4
भा॑ग॒धा अ॑स्मै मनु॒ष्या॑ भवन्ति॒ य ए॒वं वेद
Sentence: 5
भू॒तानि॒ क्षुध॑मघ्नन्त्स॒द्यो म॑नु॒ष्या॑ अर्धमा॒से दे॒वा मा॒सि पि॒तरः॑ संवत्स॒रे वन॒स्पत॑य
Sentence: 6
तस्मा॒दह॑रहर्मनु॒ष्या॒ अश॑नमिछन्ते ऽर्धमा॒से दे॒वा इ॑ज्यन्ते मा॒सि पि॒तृभ्यः॑ क्रियते संवत्स॒रे वन॒स्पत॑यः॒ पलं॑ गृह्णन्ति
Sentence: 7
य ए॒वं वेद॒ हन्ति॒ क्षुध॒म्भ्रातृ॑व्यम् ।।
Paragraph: 7
Verse: 1
Sentence: 1
दे॒वा वै॒ नर्चि न यजु॑ष्यश्रयन्त
Sentence: 2
ते साम॑न्ने॒वाश्र॑यन्त
Sentence: 3
हिं क॑रोति॒ सामै॒वाक॑र्
Sentence: 4
हिं क॑रोति॒ यत्रै॒व दे॒वा अश्र॑यन्त॒ तत॑ एवैना॒न्प्र यु॑ङ्क्ते
Sentence: 5
हिं क॑रोति वा॒च एवै॒ष योग॑स् ।
Sentence: 6
हिं क॑रोति प्र॒जा ए॒व तद्यज॑मानः सृजते
Sentence: 7
त्रिः प्र॑थ॒मामन्वा॑ह॒ त्रिरु॑त्त॒माम् ।
Sentence: 8
य॒ज्ञस्यै॒व तद्ब॒र्सम् ।।
Verse: 2
Sentence: 1
न॑ह्य॒त्यप्र॑स्रंसाय
Sentence: 2
संत॑त॒मन्वा॑ह प्रा॒णाना॑म॒न्नाद्य॑स्य॒ संत॑त्यै ।
Sentence: 3
अथो॒ रक्ष॑सा॒मप॑हत्यै
Sentence: 4
राथं॑तरीम्प्रथ॒मामन्वा॑ह
Sentence: 5
राथं॑तरो॒ वा अ॒यं लो॒कस् ।
Sentence: 6
इ॒ममे॒व लो॒कम॒भि ज॑यति
Sentence: 7
त्रिर्वि गृ॑ह्णाति
Sentence: 8
त्रय॑ इ॒मे लो॒कास् ।
Sentence: 9
इ॒माने॒व लो॒कान॒भि ज॑यति
Sentence: 10
बार्ह॑तीमुत्त॒मामन्वा॑ह
Sentence: 11
बार्ह॑तो॒ वा असौ लो॒कस् ।
Sentence: 12
अ॒मुमे॒व लो॒कम॒भि ज॑यति
Sentence: 13
प्र वः॑ ।।
Verse: 3
Sentence: 1
वाजा॒ इत्यनि॑रुक्ताम्प्राजाप॒त्यामन्वा॑ह
Sentence: 2
य॒ज्ञो वै॑ प्र॒जाप॑तिस् ।
Sentence: 3
य॒ज्ञमे॒व प्र॒जाप॑ति॒मा र॑भते
Sentence: 4
प्र वो॒ वाजा॒ इत्यन्वा॑ह ।
Sentence: 5
अन्नं वै॒ वाज॑स् ।
Sentence: 6
अन्न॑मे॒वाव॑ रुन्द्धे
Sentence: 7
प्र वो॒ वाजा॒ इत्या॑न्वाह
Sentence: 8
तस्मा॑त्प्रा॒चीनं॒ रेतो॑ धीयते ।
Sentence: 9
अग्न॒ आ या॑हि वी॒तय॒ इत्या॑ह
Sentence: 10
तस्मा॑त्प्र॒तीचीः॑ प्र॒जा जा॑यन्ते
Sentence: 11
प्र वो॒ वाजाः॑ ।।
Verse: 4
Sentence: 1
इत्यन्वा॑ह
Sentence: 2
मासा वै॒ वाजा॑ अर्धमा॒सा अ॒भिद्य॑वो दे॒वा ह॒विष्म॑न्तो गौर्घृ॒ताची॑ य॒ज्ञो दे॒वाञ्जि॑गाति॒ यज॑मानः सुम्न॒युस् ।
Sentence: 3
इ॒दम॑सी॒दम॒सीत्ये॒व य॒ज्ञस्य॑ प्रि॒यं धामाव॑ रुन्द्धे
Sentence: 4
यं का॒मये॑त
Sentence: 5
सर्व॒मायु॑रिया॒दिति॒ प्र वो॒ वाजा॒ इति॒ तस्या॒नूच्याग्न॒ आ या॑हि वी॒तय॒ इति॒ सं त॑त॒मुत्त॑रममा ल॑भेत ।।
Verse: 5
Sentence: 1
प्रा॒णेनै॒वास्या॑पा॒नं द॑धार॒ सर्व॒मायु॑रेति
Sentence: 2
यो वा अ॑र॒त्निं सा॑मिधे॒नीनां॒ वेदा॑र॒त्नावे॒व भ्रातृ॑व्यं कुरुते ।
Sentence: 3
अ॑र्धर्चौ॒ सं द॑धाति ।
Sentence: 4
ए॒ष वा अ॑र॒त्निः सा॑मिधे॒नीना॑म् ।
Sentence: 5
य ए॒वं वेदा॑र॒त्नावे॒व भ्रातृ॑व्यं कुरुते ।
Sentence: 6
ऋषे॑रृषे॒र्वा ए॒ता निर्मि॑ता॒ यत्सा॑मिधे॒न्य॑स्
Sentence: 7
ता यदसं॑युक्ताः॒ स्युः प्र॒जया॑ प॒शुभि॒र्यज॑मानस्य॒ वि ति॑ष्ठेरन् ।
Sentence: 8
अ॑र्धर्चौ॒ संद॑धाति
Sentence: 9
सं यु॑नक्त्येवैनास्
Sentence: 10
ता अ॑स्मै॒ संयु॑क्ता अ॒वरु॑द्धाः॒ सर्वा॑मा॒शिषं॑ दुह्रे ।।
Paragraph: 8
Verse: 1
Sentence: 1
अय॑ज्ञो॒ वा ए॒ष यो॑ ऽसा॒मा ।
Sentence: 2
अग्न॒ आ या॑हि वी॒तय॒ इत्या॑ह राथंत॒रस्यै॒ष वर्ण॑स्
Sentence: 3
तं त्वा॑ स॒मिद्भि॑रङ्गिर॒ इत्या॑ह वामदे॒व्यस्यै॒ष वर्ण॑स् ।
Sentence: 4
बृ॒हद॑ग्ने सु॒वीर्य॒मित्या॑ह बृह॒त ए॒ष वर्ण॑स् ।
Sentence: 5
यदे॒तं तृ॒चम॒न्वाह॑ य॒ज्ञमे॒व तत्साम॑न्वन्तं करोति ।
Sentence: 6
अ॒ग्निर॑मुष्मिँ लो॒क आसी॑दादि॒त्यो॒ ऽस्मिन्
Sentence: 7
ताविमौ लो॒कावशा॑न्तौ ।।
Verse: 2
Sentence: 1
आ॑स्ताम् ।
Sentence: 2
ते दे॒वा अ॑ब्रुवन् ।
Sentence: 3
एतेमौ॒ वि पर्यू॑हा॒मेति॑ ।
Sentence: 4
अग्न॒ आ या॑हि वी॒तय॒ इत्य॑स्मिँ लो॒के॒ ऽग्निम॑दधुर्बृ॒हद॑ग्ने सु॒वीर्य॒मित्य॒मुष्मिँ॑ लो॒क आ॑दि॒त्यम् ।
Sentence: 5
ततो॒ वा इमौ लो॒काव॑शाम्यताम् ।
Sentence: 6
यदे॒वम॒न्वाहा॒नयो॑र्लो॒कयोः॒ शान्त्यै
Sentence: 7
शाम्य॑तो ऽस्मा इमौ लोकौ॒ य ए॒वं वेद
Sentence: 8
पञ्च॑दश सामिधे॒नीरन्वा॑ह
Sentence: 9
पञ्च॑दश ।।
Verse: 3
Sentence: 1
वा अ॑र्धमा॒सस्य॒ रात्र॑यस् ।
Sentence: 2
अ॑र्धमास॒शः सं॑वत्स॒र आ॑प्यते
Sentence: 3
तासां॒ त्रीणि॑ च श॒तानि॑ ष॒ष्टिश्चा॒क्षरा॑णि
Sentence: 4
ताव॑तीः संवत्स॒रस्य॒ रात्र॑यस् ।
Sentence: 5
अ॑क्षर॒श ए॒व सं॑वत्स॒रमा॑प्नोति
Sentence: 6
नृ॒मेध॑श्च॒ परु॑छेपश्च ब्रह्म॒वाद्य॑मवदेताम्
Sentence: 7
अ॒स्मिन्दारा॑वा॒र्द्रे॒ ऽग्निं ज॑नयाव॒ यत॑रो नौ॒ ब्रह्मी॑या॒निति
Sentence: 8
नृ॒मेधो॒ ऽभ्य॑वद॒त्स धू॒मम॑जनयत्
Sentence: 9
परु॑छेपो॒ ऽभ्य॑वद॒त्सो॒ ऽग्निम॑जनयत् ।
Sentence: 10
ऋष॒ इत्य॑ब्रवीत् ।।
Verse: 4
Sentence: 1
यत्स॒माव॑द्वि॒द्व क॒था त्वम॒ग्निमजी॑जनो॒ नाहमिति
Sentence: 2
सामिधे॒नीना॑मे॒वाहं वर्णं॑ वे॒देत्य॑ब्रवीत् ।
Sentence: 3
यद्घृ॒तव॑त्प॒दम॑नू॒च्यते॒ स आ॑सां॒ वर्ण॑स्
Sentence: 4
तं त्वा॑ स॒मिद्भि॑रङ्गिर॒ इत्या॑ह सामिधे॒नीष्वे॒व तज्ज्योति॑र्जनयति
Sentence: 5
स्त्रिय॒स्तेन॒ यदृच॒ स्त्रिय॒स्तेन॒ यद्गा॑य॒त्रिय॒ स्त्रिय॒स्तेन॒ यत्सा॑मिधे॒न्य॑स् ।
Sentence: 6
वृष॑ण्वती॒मन्वा॑ह ।।
Verse: 5
Sentence: 1
तेन॒ पुंस्व॑ती॒स्तेन॒ सेन्द्रा॒स्तेन॑ मिथु॒नास् ।
Sentence: 2
अ॒ग्निर्दे॒वानां॑ दू॒त आसी॑दु॒शना॑ का॒व्यो ऽसु॑राणाम् ।
Sentence: 3
तौ॑ प्र॒जाप॑तिम्प्र॒श्नऐ॑ताम्
Sentence: 4
स प्र॒जाप॑तिर॒ग्निं दू॒तं वृ॑णीमह॒ इत्य॒भि प॑र्यावर्तत
Sentence: 5
ततो॑ दे॒वा अभ॑वन्प॒रासु॑रास् ।
Sentence: 6
यस्यै॒वं वि॒दुषो॒ ऽग्निं दू॒तं वृ॑णीमह॒ इत्य॒न्वाह॒ भव॑त्या॒त्मना॒ परा॑स्य॒ भ्रातृ॑व्यो भवति ।
Sentence: 7
अ॑ध्व॒रव॑ती॒मन्वा॑ह
Sentence: 8
भ्रातृ॑व्यमेवै॒तया॑ ।।
Verse: 6
Sentence: 1
ध्व॑रति
Sentence: 2
शो॒चिष्के॑श॒स्तमी॑मह॒ इत्या॑ह
Sentence: 3
प॒वित्र॑मेवै॒तत् ।
Sentence: 4
यज॑मानमेवै॒तया॑ पवयति
Sentence: 5
समि॑द्धो अग्न आहु॒तेत्या॑ह
Sentence: 6
परि॒धिमेवै॒तम्परि॑ दधा॒त्यस्क॑न्दाय
Sentence: 7
यदत॑ ऊ॒र्ध्वम॑भ्याद॒ध्याद्यथा॑ बहिःपरि॒धि स्कन्द॑ति ता॒दृगे॒व तत्
Sentence: 8
त्रयो॒ वा अ॒ग्नयो॑ हव्य॒वाह॑नो दे॒वानां॑ कव्य॒वाह॑नः पितृ॒णां स॒हर॑क्षा॒ असु॑राणाम् ।
Sentence: 9
त ए॒तर्ह्या शं॑सन्ते
Sentence: 10
मां व॑रिष्यते॒ माम् ।।
Verse: 7
Sentence: 1
इति
Sentence: 2
वृणी॒ध्वं ह॑व्य॒वाह॑न॒मित्या॑ह
Sentence: 3
य ए॒व दे॒वानां॒ तं वृ॑णीते ।
Sentence: 4
आ॑र्षे॒यं वृ॑णीते
Sentence: 5
बन्धो॑रे॒व नै॑ति ।
Sentence: 6
अथो॒ संत॑त्यै
Sentence: 7
प॒रस्ता॑द॒र्वाचो॑ वृणीते
Sentence: 8
तस्मा॑त्प॒रस्ता॑द॒र्वाञ्चो॑ मनु॒ष्या॑न्पित॒रो ऽनु॒ प्र पि॑पते ।।
Paragraph: 9
Verse: 1
Sentence: 1
अग्ने॑ म॒हां अ॒सीत्या॑ह म॒हान्ह्ये॒ष यद॒ग्निस् ।
Sentence: 2
ब्रा॑ह्म॒णेत्या॑ह ब्राह्म॒णो ह्य्े॒ष^ ए॒षस्
Sentence: 3
भार॒तेत्या॑है॒ष हि दे॒वेभ्यो॑ ह॒व्यम्भर॑ति
Sentence: 4
दे॒वेद्ध॒ इत्या॑ह दे॒वा ह्ये॒तऐ॑न्धत
Sentence: 5
मन्वि॑द्ध॒ इत्या॑ह॒ मनु॒र्ह्ये॒तमुत्त॑रो दे॒वेभ्य ऐन्द्ध ।
Sentence: 6
ऋषि॑ष्टुत॒ इत्या॒हर्ष॑यो॒ ह्ये॒तमस्तु॑वन्
Sentence: 7
विप्रा॑नुमदित॒ इत्या॑ह ।।
Verse: 2
Sentence: 1
विप्रा॒ ह्ये॒ते यच्छु॑श्रु॒वांसः
Sentence: 2
कविश॒स्त इत्या॑ह क॒वयो॒ ह्ये॒ते यच्छ्श्रु॒वांस॑स् ।
Sentence: 3
ब्रह्म॑संशित॒ इत्या॑ह॒ ब्रह्म॑संशितो ह्य्े॒ष^ ए॒षस्
Sentence: 4
घृ॒ताह॑वन॒ इत्या॑ह घृताहु॒तिर्ह्य॑स्य प्रि॒यत॑मा
Sentence: 5
प्र॒णीर्य॒ज्ञाना॒मित्या॑ह प्र॒णीर्ह्ये॒ष य॒ज्ञाना॑म् ।
Sentence: 6
र॒थीर॑ध्व॒राणा॒मित्या॑है॒ष हि दे॑वर॒थस् ।
Sentence: 7
अ॒तूर्तो॒ होतेत्या॑ह॒ न ह्ये॒तं कश्च॒न ।।
Verse: 3
Sentence: 1
तर॑ति
Sentence: 2
तूर्णि॑र्हव्य॒वाडित्या॑ह
Sentence: 3
सर्वं॒ ह्ये॒ष तर॑ति ।
Sentence: 4
आस्पात्रं॑ जु॒हूर्दे॒वाना॒मित्या॑ह जु॒हूर्ह्ये॒ष दे॒वाना॑म् ।
Sentence: 5
च॑म॒सो दे॑व॒पान॒ इत्या॑ह चम॒सो ह्ये॒ष दे॑व॒पान॑स् ।
Sentence: 6
अ॒रां इ॑वाग्ने ने॒मिर्दे॒वांस्त्वम्प॑रि॒धूर॒सीत्या॑ह दे॒वान्ह्ये॒ष प॑रि॒भूस् ।
Sentence: 7
यद्ब्रू॒यात् ।
Sentence: 8
आ व॑ह दे॒वान्दे॑वय॒ते यज॑माना॒येति॒ भ्रातृ॑व्यमस्मै ।।
Verse: 4
Sentence: 1
ज॑नयेत् ।
Sentence: 2
आ व॑ह दे॒वान्यज॑माना॒येत्या॑ह॒ यज॑मानमेवै॒तेन॑ वर्धयति ।
Sentence: 3
अ॒ग्निम॑ग्न॒ आ व॑ह॒ सोम॒मा व॒हेत्या॑ह दे॒वता॑ ए॒व तद्य॑थापू॒र्वमुप॑ ह्वयते ।
Sentence: 4
आ चा॑ग्ने दे॒वान्व॑ह सु॒यजा॑ च यज जातवेद॒ इत्या॑ह ।
Sentence: 5
अ॒ग्निमे॒व तत्सं श्य॑ति
Sentence: 6
सो॑ ऽस्य॒ संशि॑तो दे॒वेभ्यो॑ ह॒व्यं व॑हति ।
Sentence: 7
अ॒ग्निर्होता॑ ।।
Verse: 5
Sentence: 1
इत्या॑ह ।
Sentence: 2
अ॒ग्निर्वै॑ दे॒वानां॒ होता
Sentence: 3
य ए॒व दे॒वानां॒ होता॒ तं वृ॑णीते
Sentence: 4
स्मो व॒यमित्या॑हा॒त्मान॑मे॒व स॒त्त्वं ग॑मयति
Sentence: 5
सा॒धु ते॑ यजमान दे॒वतेत्या॑हा॒शिष॑मेवै॒तामा शा॑स्ते
Sentence: 6
यद्ब्रू॒यात् ।
Sentence: 7
यो॒ ऽग्निं होता॑र॒मवृ॑था॒ इत्य॒ग्निनो॑ ऽभ॒यतो॒ यज॑मान॒म्परि॑ गृह्णीयात्
Sentence: 8
प्र॒मायु॑कः स्यात् ।
Sentence: 9
य॑जमानदेव॒त्या वै जु॒हूर्भ्रा॑तृव्यदेव॒त्यो॑ ऽप॒भृत् ।।
Verse: 6
Sentence: 1
यद्द्वे इ॑व ब्रू॒याद्भ्रातृ॑व्यमस्मै जनयेत् ।
Sentence: 2
घृ॒तव॑तीमध्वर्यो॒ स्रुच॒मास्य॒स्वेत्या॑ह॒ यज॑मानमेवै॒तेन॑ वर्धयति
Sentence: 3
देवा॒युव॒मित्या॑ह दे॒वान्ह्ये॒षाव॑ति
Sentence: 4
वि॒श्ववा॑रा॒मित्या॑ह॒ विश्वं॒ ह्ये॒षाव॑ति ।
Sentence: 5
ईडा॑महै दे॒वां ई॒डेन्या॑न्नम॒स्याम॒ वा ई॒डेन्याः॑ पि॒तरो॑ नम॒स्या॑ दे॒वा य॒ज्ञिया॑स् ।
Sentence: 6
दे॒वता॑ ए॒व तद्य॑थाभा॒गं य॑जति ।।
Paragraph: 10
Verse: 1
Sentence: 1
{F
त्रींस्
{W
त्रींस्
{GLOS
त्रींस्
तृ॒चाननु॑ ब्रूयाद्राज॒न्य॑स्य
Sentence: 2
त्रयो॒ वा अ॒न्ये रा॑ज॒न्या॒त्पुरु॑षा ब्राह्म॒णो वै॑श्यः शू॒द्रस्ताने॒वास्मा॒ अनु॑कान्करोत
Sentence: 3
पञ्च॑द॒शानु॑ ब्रूयाद्राज॒न्य॑स्य
Sentence: 4
पञ्चद॒शो वै॑ राज॒न्यः
Sentence: 5
स्व एवैनं॒ स्तोमे॒ प्रति॑ ष्ठापयति
Sentence: 6
तृ॒ष्टुभा॒ परि॑ दध्यात् ।
Sentence: 7
इ॑न्द्रि॒यं वै त्रि॒ष्टुग्^त्रि॒ष्टुभ्
Sentence: 8
इन्द्रि॒यका॑मः॒ खलु वै राज॒न्यो॑ यजते
Sentence: 9
त्रिष्टुभै॒वास्मा॑ इन्द्रि॒यम्परि॑ गृह्णाति
Sentence: 10
यदि॑ का॒मये॑त ।।
Verse: 2
Sentence: 1
ब्र॑ह्मवर्च॒सम॒स्त्विति॑ गायत्रि॒या परि॑ दध्यात् ।
Sentence: 2
ब्र॑ह्मवर्च॒सं वै॑ गाय॒त्री
Sentence: 3
ब्र॑ह्मवर्च॒समे॒व भ॑वति
Sentence: 4
स॒प्तद॒शानु॑ ब्रूयाद्वैश्यस्य
Sentence: 5
सप्तद॒शो वै वैश्यः
Sentence: 6
स्व एवैनं॒ स्तोमे॒ प्रति॑ ष्ठापयति
Sentence: 7
जग॑त्या॒ परि॑ दध्यात् ।
Sentence: 8
जाग॑ता वै प॒शवः
Sentence: 9
प॒शुका॑मः॒ खलु वै वैश्यो यजते
Sentence: 10
जग॑त्यै॒वास्मै॑ प॒शून्परि॑ गृह्णाति ।
Sentence: 11
एक॑विंशति॒मनु॑ ब्रूयात्प्रति॒ष्ठाका॑मस्य ।
Sentence: 12
ए॑कविं॒श स्तोमा॑नाम्प्रति॒ष्ठा
Sentence: 13
प्रति॑ष्ठित्यै ।।
Verse: 3
Sentence: 1
चतु॑र्विंशति॒मनु॑ ब्रूयाद्ब्रह्मवर्च॒सका॑मस्य
Sentence: 2
चतु॑र्विंशत्यक्षरा गाय॒त्री
Sentence: 3
गा॑य॒त्री ब्र॑ह्मवर्च॒सम् ।
Sentence: 4
गा॑यत्रियै॒वास्मै॑ ब्रह्मवर्च॒समव॑ रुन्द्धे
Sentence: 5
त्रिं॒शत॒मनु॑ ब्रूया॒दन्न॑कामस्य
Sentence: 6
त्रिं॒शद॑क्षरा विराड्^वि॒राज्
Sentence: 7
अन्नं विराड्^वि॒राज्
Sentence: 8
वि॒राजै॒वास्मा॑ अ॒न्नाद्य॒मव॑ रुन्द्धे
Sentence: 9
द्वात्रिं॑शत॒मनु॑ब्रूयात्प्रति॒ष्ठाका॑मस्य
Sentence: 10
द्वात्रिं॑शदक्षरानुष्टुग्^द्वात्रिं॑शदक्षरानुष्टुभ्
Sentence: 11
अनु॒ष्टुप्छन्द॑साम्प्रति॒ष्ठा
Sentence: 12
प्रति॑ष्ठित्यै
Sentence: 13
षट्त्रिं॑शत॒मनु॑ ब्रूयात्प॒शुका॑मस्य
Sentence: 14
षट्त्रिं॑शदक्षरा बृह॒ती
Sentence: 15
बार्ह॑ताः प॒शव॑स् ।
Sentence: 16
बृ॑हत्यै॒वास्मै॑ प॒शून् ।।
Verse: 4
Sentence: 1
अव॑ रुन्द्धे
Sentence: 2
चतु॑श्चत्वारिंशत॒मनु॑ ब्रूयादिन्द्रि॒यका॑मस्य
Sentence: 3
चतु॑श्चत्वारिंशदक्षरा त्रि॒ष्टुग्^त्रि॒ष्टुभ्
Sentence: 4
इन्द्रि॒यं त्रि॒ष्टुप्^त्रि॒ष्टुभ्
Sentence: 5
त्रि॒ष्टुभै॒वास्मा॑ इन्द्रि॒यमव॑ रुन्द्धे ।
Sentence: 6
अ॒ष्टाच॑त्वारिंशत॒मनु॑ ब्रूयात्प॒शुका॑मस्य ।
Sentence: 7
अ॒ष्टाच॒त्वरिं॑शदक्षरा॒ जग॑ती
Sentence: 8
जाग॑ताः प॒शव॑स् ।
Sentence: 9
जग॑त्यै॒वास्मै॑ प॒शूनव॑ रुन्द्धे
Sentence: 10
सर्वा॑णि॒ छन्दां॒स्यनु॑ ब्रूयाद्बहुया॒जिनः
Sentence: 11
सर्वा॑णि॒ वा ए॒तस्य॒ छन्दां॒स्यव॑रुन्द्धानि॒ यो ब॑हुयाजी ।
Sentence: 12
अप॑रिमित॒मनु॑ ब्रूयात् ।
Sentence: 13
अप॑रिमित॒स्याव॑रुद्ध्यै ।।
Paragraph: 11
Verse: 1
Sentence: 1
निवी॑तम्मनु॒ष्या॑णाम्
Sentence: 2
प्राचीनावी॒तम्पि॑तृ॒णाम्
Sentence: 3
उप॑वीतं दे॒वाना॑म्
Sentence: 4
उप॑ व्ययते
Sentence: 5
देवल॒क्ष्ममे॒व तत्कु॑रुते
Sentence: 6
तिष्ठ॒न्नन्वा॑ह
Sentence: 7
तिष्ठ॒न्ह्याश्रु॑ततरं॒ वद॑ति
Sentence: 8
तिष्ठ॒न्नन्वा॑ह
Sentence: 9
सुव॒र्गस्य॑ लो॒कस्या॒भिजि॑त्यै ।
Sentence: 10
आसी॑नो यजति ।
Sentence: 11
अ॒स्मिन्ने॒व लो॒के प्रति॑ तिष्ठति
Sentence: 12
यत्क्रौ॒ञ्चम॒न्वाहा॑सु॒रं तत् ।
Sentence: 13
यन्म॒न्द्रम्मा॑नु॒षं तत् ।
Sentence: 14
यद॑न्त॒रा तत्सदे॑वम्
Sentence: 15
अन्त॒रानूच्य॑म् ।
Sentence: 16
स॑देव॒त्वाय
Sentence: 17
वि॒द्वांसो वै ।।
Verse: 2
Sentence: 1
पु॒रा होता॑रो ऽभूवन्
Sentence: 2
तस्मा॒द्विधृ॑ता॒ अध्वा॑नो ऽभूव॒न्न पन्था॑नः॒ सम॑रुक्षन् ।
Sentence: 3
अ॑न्तर्वे॒द्य॒न्यः पादो॒ भव॑ति बहिर्वे॒द्य॒न्यस् ।
Sentence: 4
अथान्वा॑ह ।
Sentence: 5
अध्व॑नां॒ विधृ॑त्यै प॒थामसं॑रोहाय ।
Sentence: 6
अथो॑ भू॒तं चै॒व भ॑वि॒ष्यच्चाव॑ रुन्द्धे ।
Sentence: 7
अथो॒ परि॑मितं चै॒वाप॑रिमितं॒ चाव॑ रुन्द्धे ।
Sentence: 8
अथो॑ ग्रा॒म्यांश्चै॒व प॒शूना॑र॒ण्यांश्चाव॑ रुन्द्धे ।
Sentence: 9
अथो॑ ।।
Verse: 3
Sentence: 1
दे॑वलो॒कं चै॒व म॑नुष्यलो॒कं चा॒भि ज॑यति
Sentence: 2
दे॒वा वै॑ सामिधे॒नीर॒नूच्य॑ य॒ज्ञं नान्व॑पश्यन् ।
Sentence: 3
स प्र॒जाप॑तिस्तू॒ष्णीमा॑घा॒रमाघा॑रयत्
Sentence: 4
ततो वै दे॒वा य॒ज्ञमन्व॑पश्यन्
Sentence: 5
यत्तू॒ष्णीमा॑घा॒रमा॑घा॒रय॑ति य॒ज्ञस्यानु॑ख्यात्यै ।
Sentence: 6
अथो॑ सामिधे॒नीरे॒वाभ्य॑नक्ति ।
Sentence: 7
अलू॑क्षो भवति॒ य ए॒वं वेद॑ ।
Sentence: 8
अथो॑ तर्पयत्येवैनास्
Sentence: 9
{F
तृप्य॑ति
{W
तृप्य॒ति
{GLOS
तृप्य॑ति
प्र॒जया॑ प॒शुभिः॑ ।।
Verse: 4
Sentence: 1
य ए॒वं वेद
Sentence: 2
यदेक॑याघा॒रये॒देका॑म्प्रीणीयात् ।
Sentence: 3
यद्द्वाभ्यां॒ द्वे प्री॑णीयात् ।
Sentence: 4
यत्ति॒सृभि॒रति॒ तद्रे॑चयेत् ।
Sentence: 5
मन॒सा घा॑रयति॒ मन॑सा॒ ह्यना॑प्तमा॒प्यते
Sentence: 6
ति॒र्यञ्च॒मा घा॑रय॒त्यछ॑म्बट्कारम् ।
Sentence: 7
वाक्च॒ मन॑श्चार्तीयेताम्
Sentence: 8
अ॒हं दे॒वेभ्यो॑ ह॒व्यं व॑हा॒मीति॒ वाग॑ब्रवीद॒हं दे॒वेभ्य॒ इति॒ मन॑स्
Sentence: 9
तौ प्र॒जाप॑तिम्प्र॒श्नऐ॑ताम् ।
Sentence: 10
सो॑ ऽब्रवीत् ।।
Verse: 5
Sentence: 1
प्र॒जाप॑तिस् ।
Sentence: 2
दू॒तीरे॒व त्वम्मन॑सो ऽसि॒ यद्धि मन॑सा॒ ध्याय॑ति॒ तद्वा॒चा वद॒तीति
Sentence: 3
तत्खलु॒ तुभ्यं॒ न वा॒चा जु॑हव॒न्नित्य॑ब्रवीत्
Sentence: 4
तस्मा॒न्मन॑सा प्र॒जाप॑तये जुह्वति
Sentence: 5
मन॑ इव॒ हि प्र॒जाप॑तिः
Sentence: 6
प्र॒जाप॑ते॒राप्त्यै
Sentence: 7
परि॒धीन्त्सम्मा॑र्ष्टि
Sentence: 8
पु॒नात्येवैनान्
Sentence: 9
त्रिर्म॑ध्य॒मं त्रयो वै प्रा॒णाः ।।
Verse: 6
Sentence: 1
इ॒मे लो॒का इ॒माने॒व लो॒कान॒भि ज॑यति
Sentence: 2
त्रिरु॑त्तरा॒र्ध्यं॒ त्रयो वै देव॒यानाः॒ पन्था॑न॒स्ताने॒वाभि ज॑यति
Sentence: 3
त्रिरुप॑ वाजयति॒ त्रयो वै देवलो॒का दे॑वलो॒काने॒वाभि ज॑यति
Sentence: 4
द्वाद॑श॒ सम्प॑द्यन्ते॒ द्वाद॑श॒ मासाः॑ संवत्स॒रः
Sentence: 5
सं॑वत्स॒रमे॒व प्री॑णाति ।
Sentence: 6
अथो॑ संवत्स॒रमे॒वास्मा॒ उप॑ दधाति
Sentence: 7
सुव॒र्गस्य॑ लो॒कस्य॒ सम॑ष्ट्यै ।
Sentence: 8
आ॑घा॒रमा घा॑रयति
Sentence: 9
ति॒र इ॑व ।।
Sentence: 10
Verse: 7
Sentence: 1
वै॑ सुव॒र्गो लो॒कः
Sentence: 2
सु॑व॒र्गमे॒वास्मै॑ लो॒कम्प्र रो॑चयति ।
Sentence: 3
ऋ॒जुमा घा॑रयत्यृ॒जुरि॑व॒ हि प्रा॒णः
Sentence: 4
संत॑त॒मा घा॑रयति प्रा॒णाना॑म॒न्नाद्य॑स्य॒ संत॑त्यै ।
Sentence: 5
अथो॒ रक्ष॑सा॒मप॑हत्यै
Sentence: 6
यं का॒मये॑त
Sentence: 7
प्र॒मायु॑कः स्या॒दिति॑ जि॒ह्मं तस्या घा॑रयेत्
Sentence: 8
प्रा॒णमे॒वास्मा॑ज्जि॒ह्मं न॑यति
Sentence: 9
ता॒जक्प्र मी॑यते
Sentence: 10
शिरो॒ वा ए॒तद्य॒ज्ञस्य॒ यदा॑घा॒र आ॒त्मा ध्रु॒वा ।।
Verse: 8
Sentence: 1
आ॑घा॒रमा॒घार्य॑ ध्रु॒वां सम॑नक्ति ।
Sentence: 2
आ॒त्मन्ने॒व य॒ज्ञस्य॒ शिरः॒ प्रति॑ दधाति ।
Sentence: 3
अ॒ग्निर्दे॒वानां॑ दू॒त आसीद्दै॒व्यो ऽसु॑राणाम् ।
Sentence: 4
तौ॑ प्र॒जाप॑तिम्प्र॒श्नऐ॑ताम् ।
Sentence: 5
स प्र॒जाप॑तिर्ब्राह्म॒णम॑ब्रवीत् ।
Sentence: 6
ए॒तद्वि ब्रू॒हीति॑ ।
Sentence: 7
आ श्रा॑व॒येती॒दं दे॑वाः शृणु॒तेति॒ वाव तद॑ब्रवीद॒ग्निर्दे॒वो होतेति
Sentence: 8
य ए॒व दे॒वानां॒ तम॑वृणीत
Sentence: 9
ततो
{F
दे॒वाः
{W
दे॑वाः
{GLOS
दे॒वाः
।।
Verse: 9
Sentence: 1
अभ॑व॒न्परा॑सुरास् ।
Sentence: 2
यस्यै॒वं वि॒दुषः॑ प्रव॒रम्प्र॑वृ॒णते॒ भव॑त्या॒त्मना॒ परा॑स्य॒ भ्रातृ॑व्यो भवति
Sentence: 3
यद्ब्रा॑ह्म॒णश्चाब्रा॑ह्मणश्च प्र॒श्नमे॒याता॑म्ब्राह्म॒णायाधि॑ ब्रूयात् ।
Sentence: 4
यद्ब्रा॑ह्म॒णाया॒ध्याहा॒त्मने ऽध्या॑ह
Sentence: 5
यद्ब्रा॑ह्म॒णम्प॒राहा॒त्मन॒म्परा॑ह
Sentence: 6
तस्मा॑द्ब्राह्म॒णो न प॒रोच्यः॑ ।।
Paragraph: 12
Verse: 1
Sentence: 1=a
आयु॑ष्टे ।
Sentence: 2=b
आ॑यु॒र्दा अ॑ग्ने ।
Sentence: 3=c
आ प्या॑यस्व
Sentence: 4=d
सं ते॑ ।
Sentence: 5=e
अव॑ ते॒ हेड॑स् ।
Sentence: 6=f
उदु॑त्त॒मम्
Sentence: 7=g
प्र णो॑ दे॒वी ।
Sentence: 8=h
आ नो॑ दि॒वस् ।
Sentence: 9=i
अग्ना॑विष्णू
Sentence: 10=k
अग्ना॑विष्णू
Sentence: 11=l
इ॒मं मे॑ वरुण
Sentence: 12=m
तत्त्वा॑ यामि ।
Sentence: 13=n
उदु॒ त्यम् ।
Sentence: 14=o
चि॑त्रम्
Sentence: 15=p
अ॒पां नपा॒दा ह्यस्था॑दु॒पस्थं॑ जि॒ह्माना॑मू॒र्ध्वो वि॒द्युतं॒ वसा॑नः । तस्य॒ ज्येष्ठ॑म्महि॒मानं॒ वह॑न्ती॒र्हिर॑ण्यवर्णाः॒ परि॑ यन्ति य॒ह्वीः
Sentence: 16=q
सम् ।।
Verse: 2
Sentence: 1
अ॒न्या यन्त्युप॑ यन्त्य॒न्याः स॑मा॒नमू॒र्वं न॒द्यः॑ पृणन्ति । तमू॒ शुचिं॒ शुच॑यो दीदि॒वांस॑म॒पां नपा॑त॒म्परि॑ तस्थु॒रापः॑ ।।
Sentence: 2=r
तमस्मे॑रा युव॒तयो॒ युवा॑नम्मर्मृ॒ज्यमा॑नाः॒ परि॑ य॒न्त्यापः॑ । स शु॒क्रेण॒ शिक्व॑ना रे॒वद॒ग्निर्दी॒दाया॑नि॒ध्मो घृ॒तनि॑र्णिग॒प्सु ।।
Sentence: 3=s
इन्द्रा॒वरु॑णयोर॒हं स॒म्राजो॒रव॒ आ वृ॑णे । ता नो॑ मृदात ई॒दृशे॑ ।।
Sentence: 4=t
इन्द्रा॑वरुना यु॒वम॑ध्व॒राय॑ नः ।।
Verse: 3
Sentence: 1
वि॒शे जना॑य॒ महि॒ शर्म॑ यछतम् । दी॒र्घप्र॑यज्यु॒मति॒ यो व॑नु॒ष्यति॑ व॒यं ज॑येम॒ पृत॑नासु दू॒ढ्यः॑ ।।
Sentence: 2=u
आ नो॑ मित्रावरुणा
Sentence: 3=v
प्र बा॒हवा
Sentence: 4=w
त्वं नो॑ अग्ने॒ वरु॑णस्य वि॒द्वान्दे॒वस्य॒ हेदो ऽव॑ यासिसीष्ठाः । यजि॑ष्ठो॒ वह्नि॑तमः॒ शोशु॑चानो॒ विश्वा॒ द्वेषां॑सि॒ प्र मु॑मुग्ध्य॒स्मत्
Sentence: 5=x
स त्वं नो॑ अग्ने ऽव॒मो भ॑वो॒ती नेदि॑ष्ठो अ॒स्या उ॒षसो॒ व्यु॑ष्टौ । अव॑ यक्ष्व नो॒ वरु॑णम् ।।
Verse: 4
Sentence: 1
ररा॑णो वी॒हि मृ॑डी॒कं सु॒हवो॑ न एधि
Sentence: 2=y
प्रप्रा॒यम॒ग्निर्भ॑र॒तस्य॑ शृण्वे॒ वि यत्सूर्यो॒ न रोच॑ते बृ॒हद्भाः । अ॒भि यः पू॒रुम्पृत॑नासु तस्थौ दी॒दाय दैव्यो॒ अति॑थिः शि॒वो नः
Sentence: 3=z
प्र ते॑ यक्षि॒ प्र त॑ इयर्मि॒ मन्म॒ भुवो॒ यथा॒ वन्द्यो॑ नो॒ हवे॑षु । धन्व॑न्निव प्र॒पा अ॑सि॒ त्वम॑ग्न इय॒क्षवे॑ पू॒रवे॑ प्रत्न राजन् ।।
Verse: 5
Sentence: 1=aa
वि पाज॑सा
Sentence: 2=bb
वि ज्योति॑षा
Sentence: 3=cc
स त्वम॑ग्ने॒ प्रती॑केन॒ प्रत्यो॑ष यातुधा॒न्यः॑ । उ॑रु॒क्षये॑षु॒ दीद्य॑त्
Sentence: 4=dd
तं सु॒प्रती॑कं सु॒दृशं॒ स्वञ्च॒मवि॑द्वांसो वि॒दुष्ट॑रं सपेम । स य॑क्ष॒द्विश्वा॑ व॒युना॑नि वि॒द्वान्प्र ह॒व्यम॒ग्निर॒मृते॑षु वोचत् ।।
Sentence: 5=ee
अं॑हो॒मुचे
Sentence: 6=ff
वि॒वेष॒ यन्मा
Sentence: 7=gg
वि न॑ इन्द्र ।
Sentence: 8=hh
इन्द्र॑ क्ष॒त्रम्
Sentence: 9=ii
इन्द्रि॒याणि॑ शतक्रतो
Sentence: 10=kk
अनु॑ ते दायि ।।
This text is part of the
TITUS
edition of
Black Yajur-Veda: Taittiriya-Samhita
.
Copyright
TITUS Project
, Frankfurt a/M, 10.12.2008. No parts of this document may be republished in any form without prior permission by the copyright holder.
