TITUS
Black Yajur-Veda: Taittiriya-Samhita
Part No. 42
Previous part

Book: 7 
Chapter: 1 
Paragraph: 1 
Verse: 1 
Sentence: 1    प्र॒जन॑नं॒ ज्योति॑र॒ग्निर्दे॒वता॑नां॒ ज्योति॑र्वि॒राट्छन्द॑सां॒ जोति॑स् ।
Sentence: 2    वि॒राड्वा॒चो ऽग्नौ॒ सं ति॑ष्ठते
Sentence: 3    वि॒राज॑म॒भि सम्प॑द्यते
Sentence: 4    तस्मा॒त्तज्ज्योति॑रुच्यते
Sentence: 5    द्वौ॒ स्तोमौ॑ प्रातःसव॒नं व॑हतो॒ यथा॑ प्रा॒णश्चा॑पा॒नश्च
Sentence: 6    द्वौ॒ माध्यं॑दिनं॒ सव॑नं॒ यथा॒ चक्षु॑श्च॒ श्रोत्रं॑ च
Sentence: 7    द्वौ तृतीयसव॒नं यथा॒ वाक्च॑ प्रति॒ष्ठा च
Sentence: 8    पुरु॑षसम्मितो॒ वा ए॒ष य॒ज्ञो ऽस्थू॑रिः ।।

Verse: 2 
Sentence: 1    यं कामं॑ का॒मय॑ते॒ तमे॒तेना॒भ्य॑श्नुते
Sentence: 2    सर्वं॒ ह्यस्थु॑रिणाभ्यश्नु॒ते ।
Sentence: 3    अ॑ग्निष्टो॒मेन वै प्र॒जाप॑तिः प्र॒जा अ॑सृजत
Sentence: 4    ता अ॑ग्निष्टो॒मेनै॒व पर्य॑गृह्णात्
Sentence: 5    तासा॒म्परि॑गृहीतानामश्वत॒रो ऽत्य॑प्रवत
Sentence: 6    तस्या॑नु॒हाय॒ रेत॒ आद॑त्त
Sentence: 7    तद्ग॑र्द॒भे न्य्मार्ट्^मार्ज्
Sentence: 8    तासा॒म्परि॑गृहीतानामश्वत॒रो ऽत्य॑प्रवत
Sentence: 9    तस्या॑नु॒हाय॒ रेत॒ आद॑त्त
Sentence: 10    तद्ग॑र्द॒भे न्य्मार्ट्^मार्ज्
Sentence: 11    तस्मा॑द्गर्द॒भो द्वि॒रेता॑स् ।
Sentence: 12    अथो॑ आहुस् ।
Sentence: 13    वड॑बायां॒ न्य॑मा॒र्डिति
Sentence: 14    तस्मा॒द्वड॑बा द्वि॒रेता॑स् ।
Sentence: 15    अथो॑ आहुस् ।
Sentence: 16    ओष॑धीषु ।।

Verse: 3 
Sentence: 1    न्य॑मा॒र्डिति
Sentence: 2    तस्मा॒दोष॑ध॒यो ऽन॑भ्यक्ता रेभन्ति ।
Sentence: 3    अथो॑ आहुः
Sentence: 4    प्र॒जासु॒ न्य॑मा॒र्डिति
Sentence: 5    तस्मा॑द्यमौ जायेते
Sentence: 6    तस्मा॑दश्वत॒रो न प्र जा॑यत॒ आत्त॑रेता॒ हि
Sentence: 7    तस्मा॑द्ब॒र्हिष्यन॑वक्ळ्प्तः
Sentence: 8    सर्ववेद॒से वा॑ स॒हस्रे॒ वाव॒क्ळ्प्तस् ।
Sentence: 9    अति॒ ह्यप्र॑वत
Sentence: 10    य ए॒वं वि॒द्वान॑ग्निष्टो॒मेन॒ यज॑ते॒ प्राजा॑ताः प्र॒जा ज॒नय॑ति॒ परि॒ प्रजा॑ता गृह्णाति
Sentence: 11    तस्मा॑दाहुस् ।
Sentence: 12    ज्ये॑ष्ठय॒ज्ञ इति॑ ।।

Verse: 4 
Sentence: 1    प्र॒जाप॑ति॒र्वाव ज्येष्ठः
Sentence: 2    स ह्ये॒तेनाग्रे ऽय॑जत
Sentence: 3    प्र॒जाप॑तिरकामयत
Sentence: 4    प्र जा॑ये॒येति
Sentence: 5    स मु॑ख॒तस्त्रि॒वृतं॒ निर॑मिमीत
Sentence: 6    तम॒ग्निर्दे॒वतान्व॑सृज्यत गाय॒त्री छन्दो॑ रथंत॒रं साम॑ ब्राह्म॒णो म॑नु॒ष्या॑णाम॒जः प॑शू॒नाम् ।
Sentence: 7    तस्मा॑त्ते॒ मुख्या॑स् ।
Sentence: 8    मु॑ख॒तो ह्यसृ॑ज्यन्त ।
Sentence: 9    उर॑सो बा॒हुभ्या॑म्पञ्चद॒शं निर॑मिमीत
Sentence: 10    तमिन्द्रो॑ दे॒वतान्व॑सृज्यत त्रि॒ष्टुप्छन्दो॑ बृ॒हत् ।।

Verse: 5 
Sentence: 1    साम॑ राज॒न्यो॑ मनु॒ष्या॑णा॒मविः॑ पशू॒नाम् ।
Sentence: 2    तस्मा॒त्ते वी॒र्या॑वन्तस् ।
Sentence: 3    वी॒र्या॒द्ध्यसृ॑ज्यन्त
Sentence: 4    मध्य॒तः स॑प्तद॒शं निर॑मिमीत
Sentence: 5    तं विश्वे॑ दे॒वा दे॒वता॒ अन्व॑सृज्यन्त॒ जग॑ती॒ छन्दो॑ वैरू॒पं साम वैश्यो मनु॒ष्या॑णां॒ गावः॑ पशू॒नाम् ।
Sentence: 6    तस्मा॒त्त आ॒द्या॑स् ।
Sentence: 7    अ॑न्न॒धाना॒द्ध्यसृ॑ज्यन्त
Sentence: 8    तस्मा॑द्भूयांसो॒ ऽन्येभ्य॑स् ।
Sentence: 9    भूयि॑ष्ठा॒ हि दे॒वता॒ अन्वसृ॑ज्यन्त
Sentence: 10    प॒त्त ए॑कविं॒शं निर॑मिमीत
Sentence: 11    तम॑नु॒ष्टुप्छन्दः॑ ।।

Verse: 6 
Sentence: 1    अन्व॑सृज्यत वैरा॒जं साम॑ शू॒द्रो म॑नु॒ष्याणा॑म्
Sentence: 2    अश्वः॑ पशू॒नाम् ।
Sentence: 3    तस्मात्तौ भूतसंक्रा॒मिणा॒वश्व॑श्च शू॒द्रश्च
Sentence: 4    तस्मा॑च्छू॒द्रो य॒ज्ञे ऽन॑वक्ळ्प्तस् ।
Sentence: 5    न हि दे॒वता॒ अन्वसृ॑ज्यत
Sentence: 6    तस्मा॒त्पादा॒वुप॑ जीवतः
Sentence: 7    प॒त्तो ह्यसृ॑ज्येताम्
Sentence: 8    प्रा॒णा वै॑ त्रि॒वृत् ।
Sentence: 9    अ॑र्धमा॒साः प॑ञ्चद॒शः
Sentence: 10    प्र॒जाप॑तिः सप्तद॒शस्
Sentence: 11    त्रय॑ इ॒मे लो॒कास् ।
Sentence: 12    अ॒सावा॑दि॒त्य ए॑कविं॒शस् ।
Sentence: 13    ए॒तस्मि॒न्वा ए॒ते श्रि॒ता ए॒तस्मि॒न्प्रति॑ष्ठितास् ।
Sentence: 14    य ए॒वं वेदै॒तस्मि॑न्ने॒व श्र॑यत ए॒तस्मि॒न्प्रति॑ तिष्ठति ।।

Paragraph: 2 
Verse: 1 
Sentence: 1    प्रा॑तःसव॒ने वै॑ गाय॒त्रेण॒ छन्द॑सा तृ॒वृते॒ स्तोमा॑य॒ ज्योति॒र्दध॑देति
Sentence: 2    त्रि॒वृता॑ ब्रह्मवर्च॒सेन॑ पञ्चद॒शाय॒ ज्योति॒र्दध॑देति
Sentence: 3    पञ्चद॒शेनौ॑जसा वी॒र्ये॑ण सप्तद॒शाय॒ ज्योति॒र्दध॑देति
Sentence: 4    सप्तद॒शेन॑ प्राजाप॒त्येन॑ प्र॒जन॑नेनैकविं॒शाय॒ ज्योति॒र्दध॑देति
Sentence: 5    स्तोम॑ ए॒व तत्स्तोमा॑य॒ ज्योति॒र्दध॑देति ।
Sentence: 6    अथो॒ स्तोम॑ ए॒व स्तोम॑म॒भि प्र ण॑यति
Sentence: 7    याव॑न्तो वै॒ स्तोमा॒स्ताव॑न्तः॒ कामा॑स्
Sentence: 8    ताव॑न्तो लो॒कास्
Sentence: 9    ताव॑न्ति॒ ज्योतीं॑षि ।
Sentence: 10    ए॒ताव॑त ए॒व स्तोमा॑ने॒ताव॑तः॒ कामा॑ने॒ताव॑तो लो॒काने॒ताव॑न्ति॒ ज्योतीं॒ष्यव॑ रुन्द्धे ।।

Paragraph: 3 
Verse: 1 
Sentence: 1    ब्र॑ह्मवा॒दिनो॑ वदन्ति
Sentence: 2    स त्वै॑ यजेत॒ यो॑ ऽग्निष्टो॒मेन॒ यज॑मा॒नो ऽथ॒ सर्व॑स्तोमेन॒ यजे॒तेति
Sentence: 3    यस्य॑ त्रि॒वृत॑मन्त॒र्यन्ति॑ प्रा॒णांस्तस्या॒न्तर्य॑न्ति
Sentence: 4    प्रा॒णेषु॒ मे ऽप्य॑स॒दिति॒ खलु वै य॒ज्ञेन॒ यज॑मानो यजते
Sentence: 5    यस्य॑ पञ्चद॒शम॑न्त॒र्यन्ति॑ वी॒र्यं॒ तस्या॒न्तर्य॑न्ति
Sentence: 6    वी॒र्ये॒ मे ऽप्य॑स॒दिति॒ खलु वै य॒ज्ञेन॒ यज॑मानो यजते
Sentence: 7    यस्य॑ सप्तद॒शम॑न्त॒र्यन्ति॑ ।।

Verse: 2 
Sentence: 1    प्र॒जां तस्या॒न्तर्य॑न्ति
Sentence: 2    प्र॒जाया॒म्मे ऽप्य॑स॒दिति॒ खलु वै य॒ज्ञेन॒ यज॑मानो यजते
Sentence: 3    यस्यै॑कविं॒शम॑न्त॒र्यन्ति॑ प्रति॒ष्ठां तस्या॒न्तर्य॑न्ति
Sentence: 4    प्रति॒ष्ठाया॒म्मे ऽप्य॑स॒दिति॒ खलु वै य॒ज्ञेन॒ यज॑मानो यजते
Sentence: 5    यस्य॑ त्रिण॒वम॑न्त॒र्यन्त्यृ॒तूंश्च॒ तस्य॑ नक्ष॒त्रियां॑ च वि॒राज॑म॒न्तर्य॑न्ति ।
Sentence: 6    ऋ॒तुषु॒ मे ऽप्य॑सन्नक्ष॒त्रिया॑यां च वि॒राजीति॑ ।।

Verse: 3 
Sentence: 1    खलु वै य॒ज्ञेन॒ यज॑मानो यजते
Sentence: 2    यस्य॑ त्रयस्त्रिं॒शम॑न्त॒र्यन्ति॑ दे॒वता॒स्तस्या॒न्तर्य॑न्ति
Sentence: 3    दे॒वता॑सु॒ मे ऽप्य॑स॒दिति॒ खलु वै य॒ज्ञेन॒ यज॑मानो यजते
Sentence: 4    यो वै॒ स्तोमा॑नामव॒मम्प॑र॒मतां॒ गछ॑न्तं॒ वेद॑ पर॒मता॑मे॒व ग॑छति
Sentence: 5    त्रि॒वृद्वै॒ स्तोमा॑नामव॒मस्त्रि॒वृत्प॑र॒मस्
Sentence: 6    य ए॒वं वेद॑ पर॒मता॑मे॒व ग॑छति ।।

Paragraph: 4 
Verse: 1 
Sentence: 1    अङ्गि॑रसो वै स॒त्त्रमा॑सत
Sentence: 2    ते सु॑व॒र्गं लो॒कमा॑यन्
Sentence: 3    तेषां॑ ह॒विष्मां॑श्च हवि॒ष्कृच्चा॑हीयेताम् ।
Sentence: 4    ताव॑कामयेताम् ।
Sentence: 5    सु॑व॒र्गं लो॒कमि॑या॒वेति
Sentence: 6    तावे॒तं द्वि॑रा॒त्रम॑पश्यताम् ।
Sentence: 7    तमाह॑रताम् ।
Sentence: 8    तेना॑यजेताम् ।
Sentence: 9    ततो वै तौ ऽसुव॒र्गं लो॒कऐ॑ताम् ।
Sentence: 10    य ए॒वं वि॒द्वान्द्वि॑रा॒त्रेण॒ यज॑ते सुव॒र्गमे॒व लो॒कमे॑ति
Sentence: 11    ताऐ॑ता॒म्पूर्वे॒णाह्नाग॑छता॒मुत्त॑रेण ।।

Verse: 2 
Sentence: 1    अ॑भिप्ल॒वः पूर्व॒मह॑र्भवति॒ गति॒रुत्त॑रम्
Sentence: 2    ज्योति॑ष्टोमो ऽग्निष्टो॒मः पूर्व॒मह॑र्भवति॒ तेज॒स्तेनाव॑ रुन्द्धे
Sentence: 3    सर्व॑स्तोमो ऽतिरा॒त्र उत्त॑रं॒ सर्व॒स्याप्त्यै॒ सर्व॒स्याव॑रुद्ध्यै
Sentence: 4    गाय॒त्रम्पूर्वेह॒न्त्साम॑ भवति
Sentence: 5    तेजो वै गाय॒त्री
Sentence: 6    गा॑य॒त्री ब्र॑ह्मवर्च॒सम् ।
Sentence: 7    तेज॑ ए॒व ब्र॑ह्मवर्च॒समा॒त्मन्ध॑त्ते
Sentence: 8    त्रैष्टुभ॒मुत्त॑रे ।
Sentence: 9    ओजो वै वी॒र्यं त्रि॒ष्टुग्^ब्रि॒ष्टुभ्
Sentence: 10    ओज॑ ए॒व वी॒र्य॑मा॒त्मन्ध॑त्ते
Sentence: 11    रथंत॒रम्पूर्वे॑ ।।

Verse: 3 
Sentence: 1    अह॒न्त्साम॑ भवति ।
Sentence: 2    इ॒यं वै॑ रथंत॒रम्
Sentence: 3    अ॒स्यामे॒व प्रति॑ तिष्ठति
Sentence: 4    बृ॒हदुत्त॑रे ।
Sentence: 5    असौ वै बृ॒हत् ।
Sentence: 6    अ॒मुष्या॑मे॒व प्रति॑ तिष्ठति
Sentence: 7    तदा॑हुः
Sentence: 8    क्व॒ जग॑ती चानु॒ष्टुप्चेति
Sentence: 9    वैखान॒सम्पूर्वे ऽह॒न्त्साम॑ भवति॒ तेन॒ जग॑त्यै नैति
Sentence: 10    षोड॒श्युत्त॑रे॒ तेना॑नु॒ष्टुभ॑स् ।
Sentence: 11    अथा॑हुस् ।
Sentence: 12    यत्स॑मा॒ने॑ ऽर्धमा॒से स्याता॑मन्यत॒रस्याह्नो॑ वी॒र्य॒मनु॑ पद्ये॒तेति॑ ।
Sentence: 13    अ॑मावा॒या॑या॒म्पूर्व॒मह॑र्भव॒त्युत्त॑रस्मि॒न्नुत्त॑रम् ।
Sentence: 14    नानै॒वार्ध॑मा॒सयो॑र्भवतस् ।
Sentence: 15    नाना॑वीर्ये भवतस् ।
Sentence: 16    ह॒विष्म॑न्निधन॒म्पूर्व॒मह॑र्भवति हवि॒ष्कृन्नि॑धन॒मुत्त॑रम्
Sentence: 17    प्रति॑ष्ठित्यै ।।

Paragraph: 5 
Verse: 1 
Sentence: 1    आपो॒ वा इ॒दमग्रे॑ सलि॒लमा॑सीत्
Sentence: 2    तस्मि॑न्प्र॒जाप॑तिर्वा॒युर्भू॒त्वाच॑रत्
Sentence: 3    स इ॒माम॑पश्यत्
Sentence: 4    तां व॑रा॒हो भू॒त्वाह॑रत्
Sentence: 5    तां वि॒श्वक॑र्मा भू॒त्वा व्य्मार्ट्^मार्ज्
Sentence: 6    साप्र॑थत
Sentence: 7    सा पृ॑थि॒व्य॑भवत्
Sentence: 8    तत्पृ॑थिव्यै पृथिवि॒त्वम् ।
Sentence: 9    तस्या॑मश्राम्यत्प्र॒जाप॑तिः
Sentence: 10    स दे॒वान॑सृजत॒ वसू॑न्रु॒द्राना॑दि॒त्यान्
Sentence: 11    ते दे॒वाः प्र॒जाप्ति॑मब्रुवन्
Sentence: 12    प्र जा॑यामहा॒ इति
Sentence: 13    सो॑ ऽब्रवीत् ।।

Verse: 2 
Sentence: 1    यथा॒हं यु॒ष्मांस्तप॑सासृक्ष्ये॒वं तप॑सि प्र॒जन॑नमिछध्व॒मिति
Sentence: 2    तेभ्यो॒ ऽग्निमा॒यत॑न॒म्प्राय॑छत् ।
Sentence: 3    ए॒तेना॒यत॑नेन श्राम्य॒तेति
Sentence: 4    ते॒ ऽग्निना॒यत॑नेनाश्राम्यन्
Sentence: 5    ते सं॑वत्स॒र एकां॒ गाम॑सृजन्त
Sentence: 6    तां वसु॑भ्यो रु॒द्रेभ्य॑ आदि॒त्येभ्यः॒ प्राय॑छन् ।
Sentence: 7    ए॒तां र॑क्षध्व॒मिति
Sentence: 8    तां वस॑वो रु॒द्रा आ॑दि॒त्या अ॑रक्षन्त
Sentence: 9    सा वसु॑भ्यो रु॒द्रेभ्य॑ आदि॒त्येभ्यः॒ प्राजा॑यत॒ त्रीणि॑ च ।।

Verse: 3 
Sentence: 1    श॒तानि॒ त्रय॑स्त्रिंशतं च ।
Sentence: 2    अथ सै॒व स॑हस्रत॒म्य॑भवत्
Sentence: 3    ते दे॒वाः प्र॒जाप॑तिमब्रुवन् ।
Sentence: 4    स॒हस्रे॑ण नो याज॒येति
Sentence: 5    सो॑ ऽग्निष्टो॒मेन॒ वसू॑नयाजयत्
Sentence: 6    त इ॒मं लो॒कम॑जयन्
Sentence: 7    तच्चा॑ददुः
Sentence: 8    स उ॒क्थ्ये॑न रु॒द्रान॑याजयत्
Sentence: 9    ते॒ ऽन्तरि॑क्षमजयन्
Sentence: 10    तच्चा॑ददुः
Sentence: 11    सो॑ ऽतिरा॒त्रेणा॑दि॒त्यान॑याजयत्
Sentence: 12    ते॑ ऽमुं लो॒कम॑जयन्
Sentence: 13    तच्चा॑ददुस्
Sentence: 14    तद॒न्तरि॑क्षम् ।।

Verse: 4 
Sentence: 1    व्यवै॑र्यत
Sentence: 2    तस्मा॑द्रु॒द्रा घातु॑कास् ।
Sentence: 3    अ॑नायत॒ना हि
Sentence: 4    तस्मा॑दाहुः
Sentence: 5    शिथि॒लं वै॑ मध्य॒ममह॑स्त्रिरा॒त्रस्य॒ वि हि तदवैर्य॒तेति
Sentence: 6    त्रैष्टुभम्मध्य॒मस्याह्न॒ आज्य॑म्भवति
Sentence: 7    सं॒याना॑नि सू॒क्तानि॑ शंसति
Sentence: 8    षोडशिनं शंसति ।
Sentence: 9    अह्नो॒ धृत्या॒ अशि॑थिलम्भावाय
Sentence: 10    तस्मा॑त्त्रिरा॒त्रस्या॑ग्निष्टो॒म ए॒व प्र॑थ॒ममहः॑ स्या॒दथो॒क्थ्यो ऽथा॑तिरा॒त्रस् ।
Sentence: 11    ए॒षां लो॒कानां॒ विधृ॑त्यै
Sentence: 12    त्रीणि॑त्रीणि श॒तान्य॑नूचीना॒हमव्य॑वछिन्नानि ददाति ।।

Verse: 5 
Sentence: 1    ए॒षां लो॒काना॒मनु॒ संत॑त्यै
Sentence: 2    द॒शतं॒ न वि छि॑न्द्यात् ।
Sentence: 3    वि॒राजं॒ नेद्वि॑छि॒नदा॒नीति॑ ।
Sentence: 4    अथ॒ या स॑हस्रत॒म्यासी॒त्तस्या॒मिन्द्र॑श्च॒ विष्णु॑श्च॒ व्याय॑छेताम् ।
Sentence: 5    स इन्द्रो॑ ऽमन्यत ।
Sentence: 6    अ॒नया॒ वा इ॒दं विष्णुः॑ स॒हस्रं॑ वर्क्ष्यत॒ इति
Sentence: 7    तस्या॑मकल्पेताम् ।
Sentence: 8    द्विभा॑ग॒ इन्द्र॒स्तृती॑ये॒ विष्णु॑स्
Sentence: 9    तद्वा ए॒षाभ्यनू॑च्यते ।
Sentence: 10    उ॒भा जि॑ग्यथु॒रिति
Sentence: 11    तां वा ए॒ताम॑छावा॒कः ।।

Verse: 6 
Sentence: 1    ए॒व शं॑सति ।
Sentence: 2    अथ॒ या स॑हस्रत॒मी सा होत्रे॑ दे॒येति
Sentence: 3    होता॑रं॒ वा अ॒भ्यति॑रिच्यते
Sentence: 4    यद॑ति॒रिच्य॑ते॒ होताना॑प्तस्यापयि॒ता ।
Sentence: 5    अथा॑हुस् ।
Sentence: 6    उ॑न्ने॒त्रे देयेति॑ ।
Sentence: 7    अति॑रिक्ता॒ वा ए॒षा स॒हस्र॑स्य ।
Sentence: 8    अति॑रिक्त उन्ने॒तर्त्विजा॑म्
Sentence: 9    अथा॑हुः
Sentence: 10    सर्वे॑भ्यः सद॒स्ये॑भ्यो॒ देयेति॑ ।
Sentence: 11    अथा॑हुस् ।
Sentence: 12    उ॑दा॒कृत्या॒ सा वशं॑ चरे॒दिति॑ ।
Sentence: 13    अथा॑हुस् ।
Sentence: 14    ब्र॒ह्मणे॑ चा॒ग्नीधे॑ च॒ देयेति॑ ।।

Verse: 7 
Sentence: 1    द्विभा॑गम्ब्र॒ह्मणे॒ तृती॑यम॒ग्नीधे॑ ।
Sentence: 2    अै॒न्द्रो वै॑ ब्र॒ह्मा वै॑ष्ण॒वो॒ ऽग्नीध् ।
Sentence: 3    यथै॒व तावक॑ल्पेता॒मिति॑ ।
Sentence: 4    अथा॑हुस् ।
Sentence: 5    या क॑ल्या॒णी ब॑हुरू॒पा सा देयेति॑ ।
Sentence: 6    अथा॑हुस् ।
Sentence: 7    या द्वि॑रू॒पोभ॒यतए॑नी॒ सा देयेति॑ स॒हस्र॑स्य॒ परि॑गृहीत्यै
Sentence: 8    तद्वा ए॒तत्स॒हस्र॒स्याय॑नम् ।
Sentence: 9    स॒हस्रं॑ स्तो॒त्रीयाः
Sentence: 10    स॒हस्रं॒ दक्षि॑णाः
Sentence: 11    स॒हस्र॑सम्मितः सुव॒र्गो लो॒कः
Sentence: 12    सु॑व॒र्गस्य॑ लो॒कस्या॒भिजि॑त्यै ।।

Paragraph: 6 
Verse: 1 
Sentence: 1    सोमो वै स॒हस्र॑मविन्दत्
Sentence: 2    तमिन्द्रो ऽन्व॑विन्दत्
Sentence: 3    तौ य॒मो न्याग॑छत्
Sentence: 4    ताव॑ब्रवीत् ।
Sentence: 5    अस्तु॒ मे ऽत्रापीति॑ ।
Sentence: 6    अस्तु॒ ही३ इत्य॑ब्रूताम् ।
Sentence: 7    स य॒म एक॑स्यां वी॒र्य॒म्पर्य॑पश्यत् ।
Sentence: 8    इ॒यं वा अ॒स्य स॒हस्र॑स्य वी॒र्य॑म्बिभ॒र्तीति॒ ताव॑ब्रवीदि॒यम्ममास्त्वे॒तद्यु॒वयो॒रिति
Sentence: 9    ताव॑ब्रूताम् ।
Sentence: 10    सर्वे॒ वा ए॒तदे॒तस्यां॑ वी॒र्य॑म् ।।

Verse: 2 
Sentence: 1    परि॑ पश्या॒मो ऽं॑श॒मा ह॑रामहा॒ इति
Sentence: 2    तस्या॒मंश॒माह॑रन्त
Sentence: 3    ताम॒प्सु प्रावे॑शयन् ।
Sentence: 4    सोमा॑यो॒देहीति
Sentence: 5    सा रोहि॑णी पिङ्गलैकहायनी रू॒पं कृ॒त्वा त्रय॑स्त्रिंशता च त्रि॒भिश्च॑ शतैः स॒होदै॑त् ।
Sentence: 6    तस्मा॒द्रोहि॑ण्या पिङ्ग॒लयै॑कहायन्या॒ सोमं॑ क्रीणीयात् ।
Sentence: 7    य ए॒वं वि॒द्वान्रोहि॑ण्या पिङ्ग॒लयै॑कहायन्या॒ सोमं॑ क्री॒णाति॒ त्रय॑स्त्रिंशता चै॒वास्य॑ त्रि॒भिश्च॑ ।।

Verse: 3 
Sentence: 1    शतैः॒ सोमः॑ क्री॒तो भ॑वति
Sentence: 2    सुक्री॑तेन यजते
Sentence: 3    ताम॒प्सु प्रावे॑शयन् ।
Sentence: 4    इन्द्रा॑यो॒देहीति
Sentence: 5    सा रोहि॑णी लक्ष्म॒णा प॑ष्ठौ॒ही वार्त्र॑घ्नी रू॒पं कृ॒त्वा त्रय॑स्त्रिंशता च त्रि॒भिश्च॑ शतैः स॒होदै॑त्
Sentence: 6    तस्मा॒द्रोहि॑णीं लक्ष्म॒णाम्प॑ष्ठौ॒हीं वार्त्र॒घ्नीं द॑द्यात् ।
Sentence: 7    य ए॒वं वि॒द्वान्रोहि॑णीं लक्ष्म॒णाम्प॑ष्ठौ॒हीं वार्त्र॑घ्नीं॒ ददा॑ति॒ त्रय॑स्त्रिंशच्चै॒वस्य॒ त्रीणि॑ च श॒तानि॒ सा द॒त्ता ।।

Verse: 4 
Sentence: 1    भ॑वति
Sentence: 2    ताम॒प्सु प्रावे॑शयन्
Sentence: 3    य॒मायो॒देहीति
Sentence: 4    सा जर॑ती मू॒र्खा त॑ज्जघ॒न्या रू॒पं कृ॒त्वा त्रय॑स्त्रिंशता च त्रि॒भिश्च॑ शतैः स॒होदै॑त्
Sentence: 5    तस्मा॒ज्जर॑तीम्मू॒र्खां त॑ज्जघ॒न्याम॑नु॒स्तर॑णीं कुर्वीत
Sentence: 6    य ए॒वं वि॒द्वाञ्जर॒तीम्मू॒र्खां त॑ज्जघ॒न्याम॑नु॒स्तर॑णीं कुरु॒ते त्रय॑स्त्रिंशच्चै॒वास्य॒ त्रीणि॑ च श॒तानि॒ सामुष्मिँ॑ लो॒के भ॑वति
Sentence: 7    वागे॒व स॑हस्रत॒मी
Sentence: 8    तस्मा॑त् ।।

Verse: 5 
Sentence: 1    वरो॒ देयः
Sentence: 2    सा हि वरः
Sentence: 3    स॒हस्र॑मस्य॒ सा द॒त्ता भ॑वति
Sentence: 4    तस्मा॒द्वरो॒ न प्र॑ति॒गृह्यः
Sentence: 5    सा हि वरः
Sentence: 6    स॒हस्र॑मस्य॒ प्रति॑गृहीतम्भवति ।
Sentence: 7    इ॒यं वर॒ इति॑ ब्रूयात् ।
Sentence: 8    अथा॒न्याम्ब्रू॑यात् ।
Sentence: 9    इ॒यम्ममेति
Sentence: 10    तथा॑स्य॒ तत्स॒हस्र॒मप्र॑तिगृहीतम्भवति ।
Sentence: 11    उ॑भयतए॒नी स्या॑त्
Sentence: 12    तदा॑हुस् ।
Sentence: 13    अ॑न्यतए॒नी स्या॑त्स॒हस्र॑म्प॒रस्ता॒देत॒मिति
Sentence: 14    यै॒व वरः॑ ।।

Verse: 6 
Sentence: 1    क॑ल्या॒णी रू॒पस॑मृद्धा॒ सा स्या॑त्
Sentence: 2    सा हि वरः
Sentence: 3    समृ॑द्ध्यै
Sentence: 4    तामुत्त॑रे॒णाग्नी॑ध्रम्पर्या॒णीया॑हव॒नीय॒स्यान्ते॑ द्रोणकल॒शमव॑ घ्रापयेत् ।
Sentence: 5    आ जि॑घ्र क॒लश॑म्मह्यु॒रुधा॑रा॒ पय॑स्व॒त्या त्वा॑ विश॒न्त्विन्द॑वः समु॒द्रमि॑व॒ सिन्ध॑वः
Sentence: 6    सा मा॑ स॒हस्र॒ आ भ॑ज प्र॒जया॑ प॒शुभिः॑ स॒ह पुन॒र्मा वि॑शताद्र॒यिरिति
Sentence: 7    प्र॒जयैवैनम्प॒शुभी॑ र॒य्या सम् ।।

Verse: 7 
Sentence: 1    अ॑र्धयति
Sentence: 2    प्र॒जावा॑न्पशु॒मान्र॑यि॒मान्भ॑वति॒ य ए॒वं वेद
Sentence: 3    तया॑ स॒हाग्नी॑ध्रम्प॒रेत्य॑ पु॒रस्ता॑त्प्र॒तीच्यां॒ तिष्ठ॑न्त्यां जुहुयात् ।
Sentence: 4    उ॒भा जि॑ग्यथु॒र्न परा॑ जयेथे॒ न परा॑ जिग्ये कत॒रश्चनैनोः ।
Sentence: 5    इन्द्र॑श्च विष्णो॒ यदप॑स्पृधेथां त्रे॒धा स॒हस्रं॒ वि तऐ॑रयेथा॒मिति
Sentence: 6    त्रेधाविभ॒क्तं वै॑ त्रिरा॒त्रे स॒हस्र॑म् ।
Sentence: 7    सा॑ह॒स्रीमेवैनां करोति
Sentence: 8    स॒हस्र॑स्यैवैना॒म्मात्रां॑ ।।

Verse: 8 
Sentence: 1    क॑रोति
Sentence: 2    रू॒पाणि॑ जुहोति
Sentence: 3    रूपैरेवैनां॒ सम॑र्धयति
Sentence: 4    तस्या॑ उपो॒त्थाय॒ कर्ण॒मा ज॑पेत् ।
Sentence: 5    इडे॒ रन्ते ऽदि॑ते॒ सर॑स्वति॒ प्रिये॒ प्रेय॑सि॒ महि॒ विश्रु॑त्ये॒तानि॑ ते अघ्निये॒ नामा॑नि
Sentence: 6    सु॒कृत॑म्मा दे॒वेषु॑ ब्रूता॒दिति
Sentence: 7    दे॒वेभ्य॑ एवैन॒मा वे॑दयति ।
Sentence: 8    अन्वे॑नं दे॒वा बु॑ध्यन्ते ।।

Paragraph: 7 
Verse: 1 
Sentence: 1    स॑हस्रत॒म्या वै॒ यज॑मानः सुव॒र्गं लो॒कमे॑ति
Sentence: 2    सैनं सुव॒र्गं लो॒कं ग॑मयति
Sentence: 3    सा मा॑ सुव॒र्गं लो॒कं ग॑म॒येत्या॑ह
Sentence: 4    सुव॒र्गमेवैनं लो॒कं ग॑मयति
Sentence: 5    सा मा॒ ज्योति॑ष्मन्तं लो॒कं ग॑म॒येत्या॑ह
Sentence: 6    ज्योति॑ष्मन्तमेवैनं लो॒कं ग॑मयति
Sentence: 7    सा मा॒ सर्वा॒न्पुण्याँ॑ लो॒कान्ग॑म॒येत्या॑ह
Sentence: 8    सर्वा॑नेवैन॒म्पुण्याँ॑ लो॒कान्ग॑मयति
Sentence: 9    सा ।।

Verse: 2 
Sentence: 1    मा॑ प्रति॒ष्ठां ग॑मय प्र॒जया॑ प॒शुभिः॑ स॒ह पुन॒र्मा वि॑शताद्र॒यिरिति॑ प्र॒जयैवैनम्प॒शुभी॑ र॒य्याम्प्रति॑ ष्ठापयति
Sentence: 2    प्र॒जावा॑न्पशु॒मान्र॑यि॒मान्भ॑वति॒ य ए॒वं वेद
Sentence: 3    ताम॒ग्नीधे॑ वा ब्र॒ह्मणे॑ वा॒ होत्रे॑ वोद्गा॒त्रे वा॑ध्व॒र्यवे॑ वा दद्यात्
Sentence: 4    स॒हस्र॑मस्य॒ सा द॒त्ता भ॑वति
Sentence: 5    स॒हस्र॑मस्य॒ प्रति॑गृहीतम्भवति॒ यस्तामवि॑द्वान् ।।

Verse: 3 
Sentence: 1    प्र॑तिगृ॒ह्णाति
Sentence: 2    ताम्प्रति॑ गृह्णीयात् ।
Sentence: 3    एका॑सि॒ न स॒हस्र॑म्
Sentence: 4    एकां॑ त्वा भू॒ताम्प्रति॑ गृह्णामि॒ न स॒हस्र॑म्
Sentence: 5    एका॑ मा भू॒ता वि॑श॒ मा स॒हस्र॒मिति॑ ।
Sentence: 6    एका॑मेवैनाम्भू॒ताम्प्रति॑ गृह्णाति॒ न स॒हस्रं॒ य ए॒वं वेद
Sentence: 7    स्यो॒नासि॑ सु॒षदा॑ सु॒शेवा॑ स्यो॒ना मा वि॑श सु॒षदा॒ मा वि॑श सु॒शेवा॒ मा वि॑श ।।

Verse: 4 
Sentence: 1    इत्या॑ह
Sentence: 2    स्योनैवैनं सु॒षदा॑ सु॒शेवा॑ भू॒त्वा वि॑शति नैनं हिनस्ति
Sentence: 3    ब्रह्मवा॒दिनो॑ वदन्ति
Sentence: 4    स॒हस्रं॑ सहस्रत॒म्यन्वे॒ती३ स॑हस्रत॒मीं स॒हस्रा३मिति
Sentence: 5    यत्प्राची॑मुत्सृ॒जेत्स॒हस्रं॑ सहस्रत॒म्यन्वि॑यात्
Sentence: 6    तत्स॒हस्र॑मप्रज्ञा॒त्रम् ।
Sentence: 7    सु॑व॒र्गं लो॒कं न प्र जा॑नीयात्
Sentence: 8    प्र॒तीची॒मुत्सृ॑जति
Sentence: 9    तां स॒हस्र॒मनु॑ प॒र्याव॑र्तते
Sentence: 10    सा प्र॑जान॒ती
Sentence: 11    सु॑व॒र्गं{F लो॒कम्{W लो॒कं ए॑ति
Sentence: 12    यज॑मानम॒भ्युत्सृ॑जति
Sentence: 13    क्षि॒प्रे स॒हस्र॒म्प्र जा॑यते ।
Sentence: 14    उ॑त्त॒मा नी॒यते॑ प्रथ॒मा दे॒वान्ग॑छति ।।

Paragraph: 8 
Verse: 1 
Sentence: 1    अत्रि॑रददाऔर्वाय प्र॒जाम्पु॒त्रका॑माय
Sentence: 2    स रि॑रिचा॒नो॑ ऽमन्यत॒ निर्वी॑र्यः शिथि॒लो या॒तया॑मा
Sentence: 3    स ए॒तं च॑तूरा॒त्रम॑पश्यत्
Sentence: 4    तमाह॑रत्
Sentence: 5    तेना॑यजत
Sentence: 6    ततो वै॒ तस्य॑ च॒त्वारो॑ वी॒रा आजा॑यन्त॒ सुहो॑ता॒ सूद्गा॑ता॒ स्व॑ध्वर्युः॒ सुस॑भेयस् ।
Sentence: 7    य ए॒वं वि॒द्वांश्च॑तूरा॒त्रेण॒ यज॑त॒ आस्य॑ च॒त्वारो॑ वी॒रा जा॑यन्ते॒ सुहो॑ता॒ सूद्गा॑ता॒ स्व॑ध्वर्युः॒ सुस॑भेयस् ।
Sentence: 8    ये च॑तुर्विं॒शाः पव॑माना ब्रह्मवर्च॒सं तत् ।।

Verse: 2 
Sentence: 1    य उ॒द्यन्त॒ स्तोमाः॒ श्रीः सा ।
Sentence: 2    अत्रिं॑ श्र॒द्धादे॑वं॒ यज॑मानं च॒त्वारि॑ वी॒र्या॑णि॒ नोपा॑नम॒न्तेज॑ इन्द्रि॒यम्ब्र॑ह्मवर्॑म् ।
Sentence: 3    स ए॒तांश्च॒तुर॒श्चतु॑ष्टोमा॒न्त्सोमा॑नपश्यत्
Sentence: 4    तानाह॑रत्तैरयजत
Sentence: 5    तेज॑ ए॒व प्र॑थ॒मेनावा॑रुन्द्धेन्द्रि॒यं द्वि॒तीये॑न ब्रह्मवर्च॒सं तृ॒तीये॑ना॒न्नाद्यं॑ चतु॒र्थेन
Sentence: 6    य ए॒वं वि॒द्वांश्च॒तुर॒श्चतु॑ष्टोमा॒न्त्सोमा॑ना॒हर॑ति तै॒र्यज॑ते॒ तेज॑ ए॒व प्र॑थ॒मेनाव॑ रुन्द्ध इन्द्रि॒यं द्वि॒तीये॑न ब्रह्मवर्च॒सं तृ॒तीये॑ना॒न्नाद्यं॑ चतु॒र्थेन
Sentence: 7    यामे॒वात्रि॒रृद्धि॒मार्ध्नो॒त्तामे॒व यज॑माना ऋध्नोति ।।

Paragraph: 9 
Verse: 1 
Sentence: 1    ज॒मद॑ग्निः॒ पुष्टि॑कामश्चतूरा॒त्रेणा॑यजत
Sentence: 2    स ए॒तान्पोषां॑ अपुष्यत्
Sentence: 3    तस्मा॑त्पलितौ॒ जाम॑दग्नियौ॒ न सं जा॑नाते
Sentence: 4    ए॒ताने॒व पोषा॑न्पुष्यति॒ य ए॒वं वि॒द्वांश्च॑तूरा॒त्रेण॒ यज॑ते
Sentence: 5    पुरोडा॒शिन्य॑ उप॒सदो॑ भवन्ति
Sentence: 6    प॒शवो वै पुरो॒डाशः
Sentence: 7    प॒शूने॒वाव॑ रुन्द्धे ।
Sentence: 8    अन्नं वै पुरो॒डाश॑स् ।
Sentence: 9    अन्न॑मे॒वाव॑ रुन्द्धे ।
Sentence: 10    अ॑न्ना॒दः प॑शु॒मान्भ॑वति॒ य ए॒वं वि॒द्वांश्च॑तूरा॒त्रेण॒ यज॑ते ।।

Paragraph: 10 
Verse: 1 
Sentence: 1    सं॑वत्स॒रो वा इ॒दमेक॑ आसीत्
Sentence: 2    सो॑ ऽकामयत ।
Sentence: 3    ऋ॒तून्त्सृ॑जे॒येति
Sentence: 4    स ए॒तम्प॑ञ्चरा॒त्रम॑पश्यत्
Sentence: 5    तमाह॑र॒त्तेना॑यजत
Sentence: 6    ततो वै॒ स ऋ॒तून॑सृजत
Sentence: 7    य ए॒वं वि॒द्वान्प॑ञ्चरा॒त्रेण॒ यज॑ते प्रैव जायते
Sentence: 8    त ऋ॒तवः॑ सृ॒ष्टा न व्याव॑र्तन्त
Sentence: 9    त ए॒तम्प॑ञ्चरा॒त्रम॑पश्यन्
Sentence: 10    तमाह॑रन्
Sentence: 11    तेना॑यजन्त
Sentence: 12    ततो वै॒ ते व्याव॑र्तन्त ।।

Verse: 2 
Sentence: 1    य ए॒वं वि॒द्वान्प॑ञ्चरा॒त्रेण॒ यज॑ते॒ वि पा॒प्मना॒ भ्रातृ॑व्ये॒णा व॑र्तते
Sentence: 2    सार्व॑सेनिः शौचे॒यो॑ ऽकामयत
Sentence: 3    पशु॒मान्त्स्या॒मिति
Sentence: 4    स ए॒तम्प॑ञ्चरा॒त्रमाह॑रत्
Sentence: 5    तेना॑यजत
Sentence: 6    ततो वै॒ स स॒हस्र॑म्प॒शून्प्राप्नो॑त् ।
Sentence: 7    य ए॒वं वि॒द्वान्पञ्च॑रा॒त्रेण॒ यज॑ते॒ प्र स॒हस्र॑म्प॒शूना॑प्नोति
Sentence: 8    बब॒रः प्रावा॑हणिरकामयत
Sentence: 9    वा॒चः प्र॑वदि॒ता स्या॒मिति
Sentence: 10    स ए॒तम्प॑ञ्चरा॒त्रमा ।।

Verse: 3 
Sentence: 1    अ॑हरत्
Sentence: 2    तेना॑यजत
Sentence: 3    ततो वै॒ स वा॒चः प्र॑वदि॒ताभ॑वत् ।
Sentence: 4    य ए॒वं वि॒द्वान्प॑ञ्चरा॒त्रेण॒ यज॑ते प्रवदितै॒व वा॒चो भ॑वति ।
Sentence: 5    अथो॑ एनं वा॒चस्पति॒रित्या॑हुस् ।
Sentence: 6    अना॑प्तश्चतूरा॒त्रो ऽति॑रिक्तः षड्रा॒त्रो ऽथ॒ वा ए॒ष स॑म्प्र॒ति य॒ज्ञो यत्प॑ञ्चरा॒त्रस् ।
Sentence: 7    य ए॒वं वि॒द्वान्प॑ञ्चरा॒त्रेण॒ यज॑ते सम्प्र॒त्ये॒व य॒ज्ञेन॑ यजते
Sentence: 8    पञ्चरा॒त्रो भ॑वति
Sentence: 9    पञ्च॒ वा ऋ॒तवः॑ संवत्स॒रः ।।

Verse: 4 
Sentence: 1    ऋ॒तुष्वे॒व स॑म्वत्स॒रे प्रति॑ तिष्ठति ।
Sentence: 2    अथो॒ पञ्चा॑क्षरा प॒ङ्क्तिः
Sentence: 3    पाङ्क्तो॑ य॒ज्ञस् ।
Sentence: 4    य॒ज्ञमे॒वाव॑ रुन्द्धे
Sentence: 5    त्रि॒वृद॑ग्निष्टो॒मो भ॑वति
Sentence: 6    तेज॑ ए॒वाव॑ रुन्द्धे
Sentence: 7    पञ्चद॒शो भ॑वति ।
Sentence: 8    इ॑न्द्रि॒यमे॒वाव॑ रुन्द्धे
Sentence: 9    सप्तद॒शो भ॑वति ।
Sentence: 10    अ॒न्नाद्य॒स्याव॑रुद्ध्यै ।
Sentence: 11    अथो प्रै॒व तेन॑ जायते
Sentence: 12    पञ्चविं॒शो॑ ऽग्निष्टो॒मो भ॑वति प्र॒जाप॑ते॒राप्त्यै
Sentence: 13    महाव्र॒तवा॑न॒न्नाद्य॒स्याव॑रुद्ध्यै
Sentence: 14    विश्व॒जित्सर्व॑पृष्ठो ऽतिरा॒त्रो भ॑वति
Sentence: 15    सर्व॑स्या॒भिजि॑त्यै ।।

Paragraph: 11 
Verse: 1 
Sentence: 1=a    दे॒वस्य॑ त्वा सवि॒तुः प्र॑स॒वे॒ ऽश्विनो॑र्बा॒हुभ्या॑म्पू॒ष्णो हस्ता॑भ्या॒मा द॑दे ।
Sentence: 2=b    इ॒माम॑गृभ्णन्रश॒नामृ॒तस्य॒ पूर्व॒ आयु॑षि वि॒दथे॑षु क॒व्या । तया॑ दे॒वाः सु॒तमा ब॑भूवुरृ॒तस्य॒ साम॑न्त्स॒रमा॒रप॑न्ती ।।
Sentence: 3=c    अ॑भि॒धा अ॑सि॒ भुव॑नमसि य॒न्तासि॑ ध॒र्तासि॒ सो॒ ऽग्निं वै॑श्वान॒रं सप्र॑थसं गछ॒ स्वाहा॑कृतः
Sentence: 4=d    पृथि॒व्यां य॒न्ता राड्य॒न्तासि॒ यम॑नो ध॒र्तासि॑ ध॒रुणः
Sentence: 5=e    कृष्यै त्वा॒ क्षेमा॑य त्वा रय्यै त्वा॒ पोषा॑य त्वा
Sentence: 6=f    पृथिव्यै त्वा॒न्तरि॑क्षाय त्वा दि॒वे त्वा
Sentence: 7=g    स॒ते त्वास॑ते त्वा॒द्भ्यस्त्वौ॑षधीभ्यस्त्वा॒ विश्वे॑भ्यस्त्वा भू॒तेभ्यः॑ ।।

Paragraph: 12 
Verse: 1 
Sentence: 1=a    वि॒भूर्मा॒त्रा प्र॒भूः पि॒त्राश्वो॑ ऽसि॒ हयो॒ ऽस्यत्यो॑ ऽसि॒ नरो॒ ऽस्यर्वा॑सि॒ सप्ति॑रसि वा॒ज्य॑सि॒ वृषा॑सि नृ॒मणा॑ असि॒ ययु॒र्नामा॑स्यादि॒त्याना॒म्पत्वान्वि॑हि ।
Sentence: 2=b    अ॒ग्नये॒ स्वाहा॒ स्वाहे॑न्द्रा॒ग्निभ्यां॒ स्वाहा॑ प्र॒जाप॑तये॒ स्वाहा॒ विश्वे॑भ्यो दे॒वेभ्यः॒ स्वाहा॒ सर्वा॑भ्यो दे॒वेता॑भ्यस् ।
Sentence: 3=c    इ॒ह धृतिः॒ स्वाहे॒ह विधृ॑तिः॒ स्वाहे॒ह रन्तिः॒ स्वाहे॒ह रम॑तिः॒ स्वाहा
Sentence: 4=d    भूर॑सि भु॒वे त्वा॒ भव्या॑य त्वा भविष्य॒ते त्वा॑ विश्वेभ्यस्त्वा भू॒तेभ्य॑स् ।
Sentence: 5=e    देवा॑ आशापाला ए॒तं दे॒वेभ्यो ऽश्व॒म्मेधा॑य॒ प्रोक्षि॑तं गोपायत ।।

Paragraph: 13 
Verse: 1 
Sentence: 1    आय॑नाय॒ स्वाहा
Sentence: 2    प्राय॑णाय॒ स्वाहा॑ ।
Sentence: 3    उ॑द्द्रा॒वाय॒ स्वाहा॑ ।
Sentence: 4    उद्द्रु॑ताय॒ स्वाहा
Sentence: 5    शूका॒राय॒ स्वाहा
Sentence: 6    शूकृ॑ताय॒ स्वाहा
Sentence: 7    पला॑यिताय॒ स्वाहा॑ ।
Sentence: 8    आ॒पला॑यिताय॒ स्वाहा॑ ।
Sentence: 9    आ॒वल्ग॑ते॒ स्वाहा
Sentence: 10    परा॒वल्ग॑ते॒ स्वाहा॑ ।
Sentence: 11    आ॑य॒ते स्वाहा
Sentence: 12    प्रय॒ते स्वाहा
Sentence: 13    सर्व॑स्मै॒ स्वाहा॑ ।।

Paragraph: 14 
Verse: 1 
Sentence: 1    अ॒ग्नये॒ स्वाहा
Sentence: 2    सोमा॑य॒ स्वाहा
Sentence: 3    वा॒यवे॒ स्वाहा॑ ।
Sentence: 4    अ॒पाम्मोदा॑य॒ स्वाहा
Sentence: 5    सवि॒त्रे स्वाहा
Sentence: 6    सर॑स्वत्यै॒ स्वाहा॑ ।
Sentence: 7    इन्द्रा॑य॒ स्वाहा
Sentence: 8    बृह॒स्पत॑ये॒ स्वाहा
Sentence: 9    मि॒त्राय॒ स्वाहा
Sentence: 10    वरु॑णाय॒ स्वाहा
Sentence: 11    सर्व॑स्मै॒ स्वाहा॑ ।।

Paragraph: 15 
Verse: 1 
Sentence: 1    पृ॑थिव्यै॒ स्वाहा॑ ।
Sentence: 2    अ॒न्तरि॑क्षाय॒ स्वाहा
Sentence: 3    दि॒वे स्वाहा
Sentence: 4    सूर्या॑य॒ स्वाहा
Sentence: 5    च॒न्द्रम॑से॒ स्वाहा
Sentence: 6    नक्ष॑त्रेभ्यः॒ स्वाहा
Sentence: 7    प्राच्यै॑ दि॒शे स्वाहा
Sentence: 8    दक्षि॑णायै दि॒शे स्वाहा
Sentence: 9    प्र॒तीच्यै॑ दि॒शे स्वाहा॑ ।
Sentence: 10    उदी॑च्यै दि॒शे स्वाहा॑ ।
Sentence: 11    ऊ॒र्ध्वायै॑ दि॒शे स्वाहा
Sentence: 12    दि॒ग्भ्यः स्वाहा॑ ।
Sentence: 13    अ॑वान्तरदि॒शाभ्यः॒ स्वाहा
Sentence: 14    समा॑भ्यः॒ स्वाहा
Sentence: 15    श॒रद्भ्यः॒ स्वाहा॑ ।
Sentence: 16    अ॑होरा॒त्रेभ्यः॒ स्वाहा॑ ।
Sentence: 17    अ॑र्धमा॒सेभ्यः॒ स्वाहा
Sentence: 18    मासे॑भ्यः॒ स्वाहा॑ ।
Sentence: 19    ऋ॒तुभ्यः॒ स्वाहा
Sentence: 20    संवत्स॒राय॒ स्वाहा
Sentence: 21    सर्व॑स्मै॒ स्वाहा॑ ।।

Paragraph: 16 
Verse: 1 
Sentence: 1    अ॒ग्नये॒ स्वाहा
Sentence: 2    सोमा॑य॒ स्वाहा
Sentence: 3    सवि॒त्रे स्वाहा
Sentence: 4    सर॑स्वत्यै॒ स्वाहा
Sentence: 5    पू॒ष्णे स्वाहा
Sentence: 6    बृह॒स्पत॑ये॒ स्वाहा॑ ।
Sentence: 7    अ॒पाम्मोदाय॒ स्वाहा
Sentence: 8    वा॒यवे॒ स्वाहा
Sentence: 9    मि॒त्राय॒ स्वाहा
Sentence: 10    वरु॑णाय॒ स्वाहा
Sentence: 11    सर्व॑स्मै॒ स्वाहा॑ ।।

Paragraph: 17 
Verse: 1 
Sentence: 1    पृ॑थिव्यै॒ स्वाहा॑ ।
Sentence: 2    अ॒न्तरि॑क्षाय॒ स्वाहा
Sentence: 3    दि॒वे स्वाहा॑ ।
Sentence: 4    अ॒ग्नये॒ स्वाहा
Sentence: 5    सोमा॑य॒ स्वाहा
Sentence: 6    सूर्या॑य॒ स्वाहा
Sentence: 7    च॒न्द्रम॑से॒ स्वाहा॑ ।
Sentence: 8    अह्ने॒ स्वाहा
Sentence: 9    रात्रि॑यै॒ स्वाहा॑ ।
Sentence: 10    ऋ॒जवे॒ स्वाहा
Sentence: 11    सा॒धवे॒ स्वाहा
Sentence: 12    सुक्षित्यै॒ स्वाहा
Sentence: 13    क्षु॒धे स्वाहा॑ ।
Sentence: 14    आ॑शिति॒म्ने स्वाहा
Sentence: 15    रोगा॑य॒ स्वाहा
Sentence: 16    हि॒माय॒ स्वाहा
Sentence: 17    शी॒ताय॒ स्वाहा॑ ।
Sentence: 18    आ॑त॒पाय॒ स्वाहा॑ ।
Sentence: 19    अर॑ण्याय॒ स्वाहा
Sentence: 20    सुव॒र्गाय॒ स्वाहा
Sentence: 21    लो॒काय॒ स्वाहा
Sentence: 22    सर्व॑स्मै॒ स्वाहा॑ ।।

Paragraph: 18 
Verse: 1 
Sentence: 1=a    भुवो॑ दे॒वानां॒ कर्म॑णा॒पस॒र्तस्य॑ प॒थ्या॑सि॒ वसु॑भिर्दे॒वेभि॑र्दे॒वत॑या गाय॒त्रेण॑ त्वा॒ छन्द॑सा युनज्मि वस॒न्तेन॑ त्व॒र्तुना॑ ह॒विषा॑ दीक्षयामि
Sentence: 2=b    रु॒द्रेभि॑र्दे॒वेभि॑र्दे॒वत॑या त्रैष्टुभेन त्वा॒ छन्द॑सा युनज्मि ग्री॒ष्मेण॑ त्व॒र्तुना॑ ह॒विषा॑ दीक्षयामि ।
Sentence: 3=c    आ॑दि॒त्येभि॑र्दे॒वेभि॑र्दे॒वत॑या॒ जाग॑तेन त्वा॒ छन्द॑सा युनज्मि व॒र्षाभि॑र्त्व॒र्तुना॑ ह॒विषा॑ दीक्षयामि
Sentence: 4=d    विश्वे॑भिर्दे॒वेभि॑र्दे॒वत॒यानु॑ष्टुभेन त्वा॒ छन्द॑सा युनज्मि ।।

Verse: 2 
Sentence: 1    श॒रदा॑ त्व॒र्तुना॑ ह॒विषा॑ दीक्षयामि ।
Sentence: 2=e    अङ्गि॑रोभिर्दे॒वेभि॑र्दे॒वत॑या॒ पाङ्क्ते॑न त्वा॒ छन्द॑सा युनज्मि हेमन्तशिशि॒राभ्यां॑ त्व॒र्तुना॑ ह॒विषा॑ दीक्षयामि ।
Sentence: 3=f    आहं दी॒क्षाम॑रुहमृ॒तस्य॒ पत्नीं॑ गाय॒त्रेण॒ छन्द॑सा॒ ब्रह्म॑णा च॒र्तं स॒त्ये॑ ऽधां स॒त्यमृ॒ते॑ ऽधाम् ।।
Sentence: 4=g    म॒हीमू॒ षु
Sentence: 5=h    सु॒त्रामा॑णम्
Sentence: 6=i    इ॒ह धृतिः॒ स्वाहा॑ ।
Sentence: 7=k    इ॒ह विधृ॑तिः॒ स्वाहा॑ ।
Sentence: 8=l    इ॒ह रन्तिः॒ स्वाहा॑ ।
Sentence: 9=m    इ॒ह रम॑तिः॒ स्वाहा॑ ।।

Paragraph: 19 
Verse: 1 
Sentence: 1    ईं॑का॒राय॒ स्वाहा॑ ।
Sentence: 2    ईंकृ॑ताय॒ स्वाहा
Sentence: 3    क्रन्द॑ते॒ स्वाहा॑ ।
Sentence: 4    अ॑व॒क्रन्द॑ते॒ स्वाहा
Sentence: 5    प्रोथ॑ते॒ स्वाहा
Sentence: 6    प्र॒प्रोथ॑ते॒ स्वाहा
Sentence: 7    ग॒न्धाय॒ स्वाह
Sentence: 8    घ्रा॒ताय॒ स्वाहा
Sentence: 9    प्रा॒णाय॒ स्वाहा
Sentence: 10    व्या॒नाय॒ स्वाहा॑ ।
Sentence: 11    अ॑पा॒नाय॒ स्वाहा
Sentence: 12    संदी॒यमा॑नाय॒ स्वाहा
Sentence: 13    संदि॑ताय॒ स्वाहा
Sentence: 14    विचृ॒त्यमा॑नाय॒ स्वाहा
Sentence: 15    विचृ॑त्ताय॒ स्वाहा
Sentence: 16    पलायि॒ष्यमा॑णाय॒ स्वाहा
Sentence: 17    पला॑यिताय॒ स्वाहा॑ ।
Sentence: 18    उ॑परंस्य॒ते स्वाहा॑ ।
Sentence: 19    उप॑रताय॒ स्वाहा
Sentence: 20    निवेक्ष्य॒ते स्वाहा
Sentence: 21    निवि॒शमा॑नाय॒ स्वाहा
Sentence: 22    निवि॑ष्टाय॒ स्वाहा
Sentence: 23    निषत्स्य॒ते स्वाहा
Sentence: 24    नि॒षीद॑ते॒ स्वाहा
Sentence: 25    निष॑ण्णाय॒ स्वाहा॑ ।।

Verse: 2 
Sentence: 1    आ॑सिष्य॒ते स्वाहा॑ ।
Sentence: 2    आसी॑नाय॒ स्वाहा॑ ।
Sentence: 3    आ॑सि॒ताय॒ स्वाहा
Sentence: 4    निपत्स्य॒ते स्वाहा
Sentence: 5    नि॒पद्य॑मानाय॒ स्वाहा
Sentence: 6    निप॑न्नाय॒ स्वाहा
Sentence: 7    शयिष्य॒ते स्वाहा
Sentence: 8    शया॑नाय॒ स्वाहा
Sentence: 9    शयि॒ताय॒ स्वाहा
Sentence: 10    सम्मीलिष्य॒ते स्वाहा
Sentence: 11    स॒म्मील॑ते॒ स्वाहा
Sentence: 12    सम्मी॑लिताय॒ स्वाहा
Sentence: 13    स्वप्स्य॒ते स्वाहा
Sentence: 14    स्वप॒ते स्वाहा
Sentence: 15    सु॒प्ताय॒ स्वाहा
Sentence: 16    प्रभोत्स्य॒ते स्वाहा
Sentence: 17    प्र॒बुध्य॑मानाय॒ स्वाहा
Sentence: 18    प्रबु॑द्धाय॒ स्वाहा
Sentence: 19    जागरिष्य॒ते स्वाहा
Sentence: 20    जाग्र॑ते॒ स्वाहा
Sentence: 21    जागरि॒ताय॒ स्वाहा
Sentence: 22    शुश्रू॑षमाणाय॒ स्वाहा
Sentence: 23    शृण्व॒ते स्वाहा
Sentence: 24    श्रु॒ताय॒ स्वाहा
Sentence: 25    वीक्षिष्य॒ते स्वाहा॑ ।।

Verse: 3 
Sentence: 1    वीक्ष॑माणाय॒ स्वाहा
Sentence: 2    वीक्षि॑ताय॒ स्वाहा
Sentence: 3    संहास्य॒ते स्वाहा
Sentence: 4    स्मा॒जिहा॑नाय॒ स्वाहा॑ ।
Sentence: 5    उ॒ज्जिहा॑नाय॒ स्वाहा
Sentence: 6    विवर्त्स्य॒ते स्वाहा
Sentence: 7    वि॒वर्त॑मानाय॒ स्वाहा
Sentence: 8    विवृ॑त्ताय॒ स्वाहा॑ ।
Sentence: 9    उ॑त्थास्य॒ते स्वाहा॑ ।
Sentence: 10    उ॒त्तिष्ठ॑ते॒ स्वाहा॑ ।
Sentence: 11    उत्थि॑ताय॒ स्वाहा
Sentence: 12    विधविष्य॒ते स्वाहा
Sentence: 13    विधून्वा॒नाय॒ स्वाहा
Sentence: 14    विधू॑ताय॒ स्वाहा॑ ।
Sentence: 15    उ॑त्क्रंस्य॒ते स्वाहा॑ ।
Sentence: 16    उ॒त्क्राम॑ते॒ स्वाहा॑ ।
Sentence: 17    उत्क्रा॑न्ताय॒ स्वाहा
Sentence: 18    चंक्रमिष्य॒ते स्वाहा
Sentence: 19    चंक्र॒म्यमा॑णाय॒ स्वाहा
Sentence: 20    चंक्रमि॒ताय॒ स्वाहा
Sentence: 21    कण्डूयिष्य॒ते स्वाहा
Sentence: 22    कण्डू॒यमा॑नाय॒ स्वाहा
Sentence: 23    कण्डूयि॒ताय॒ स्वाहा
Sentence: 24    निकषिष्य॒ते स्वाहा
Sentence: 25    नि॒कष॑माणाय॒ स्वाहा
Sentence: 26    निक॑षिताय॒ स्वाहा
Sentence: 27    यदत्ति॒ तस्मै॒ स्वाहा
Sentence: 28    यत्पिब॑ति॒ तस्मै॒ स्वाहा
Sentence: 29    यन्मेह॑ति॒ तस्मै॒ स्वाहा
Sentence: 30    यच्छकृ॑त्क॒रोति॒ तस्मै॒ स्वाहा
Sentence: 31    रेत॑से॒ स्वाहा
Sentence: 32    प्र॒जाभ्यः॒ स्वाहा
Sentence: 33    प्र॒जन॑नाय॒ स्वाहा
Sentence: 34    सर्व॑स्मै॒ स्वाहा॑ ।।

Paragraph: 20 
Verse: 1 
Sentence: 1=a    अ॒ग्नये॒ स्वाहा॑ वा॒यवे॒ स्वाहा॒ सूर्या॑य॒ स्वाहा॑ ।
Sentence: 2=b    ऋ॒तम॑स्यृ॒तस्य॒र्तम॑सि स॒त्यम॑सि स॒त्यस्य॑ स॒त्यम॑सि ।
Sentence: 3=c    ऋ॒तस्य॒ पन्था॑ असि दे॒वानां॑ छा॒यामृत॑स्य॒ नाम॒ तत्स॒त्यं यत्त्वम्प्र॒जाप॑ति॒रसि॑ ।
Sentence: 4=d    अधि॒ यद॑स्मिन्वा॒जिनी॑व॒ शुभ॒ स्पर्ध॑न्ते॒ दिवः॒ सूर्ये॑ण॒ विशो॒ ऽपो वृ॑णा॒नः प॑वते क॒व्यन्प॒शुं न गो॒पा इर्यः॒ परि॑ज्मा ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.