TITUS
Black Yajur-Veda: Taittiriya-Samhita
Part No. 41
Previous part

Chapter: 6 
Paragraph: 1 
Verse: 1 
Sentence: 1    सु॑व॒र्गाय॒ वा ए॒तानि॑ लो॒काय॑ हूयन्ते॒ यद्दा॑क्षि॒णानि
Sentence: 2    द्वाभ्यां॒ गार्ह॑पत्ये जुहोति
Sentence: 3    द्वि॒पाद्यज॑मानः
Sentence: 4    प्रति॑ष्ठित्यै ।
Sentence: 5    आग्नी॑ध्रे जुहोति ।
Sentence: 6    अ॒न्तरि॑क्ष ए॒वा क्र॑मते
Sentence: 7    सदो ऽभ्ऐति
Sentence: 8    सुव॒र्गमेवैनं लो॒कं ग॑मयति
Sentence: 9    सौ॒रीभ्या॑मृ॒ग्भ्यां गार्ह॑पत्ये जुहोति ।
Sentence: 10    अ॒मुमेवैनं लो॒कं स॒मारो॑हयति
Sentence: 11    नय॑वत्य॒र्चाग्नी॑ध्रे जुहोति
Sentence: 12    सुव॒र्गस्य॑ लो॒कस्या॒भिनी॑त्यै
Sentence: 13    दिवं॑ गछ॒ सुवः॑ प॒तेति॒ हिर॑ण्यम् ।।

Verse: 2 
Sentence: 1    हु॒त्वोद्गृ॑ह्णाति
Sentence: 2    सुव॒र्गमे॑वैनं लो॒कम्ग॑मयति
Sentence: 3    रू॒पेण॑ वो रू॒पमभ्ऐ॒मीत्या॑ह
Sentence: 4    रू॒पेण॒ ह्या॑सां रू॒पमभ्ऐति॒ यद्धिर॑ण्येन
Sentence: 5    तु॒थो वो॑ वि॒श्ववे॑दा॒ वि भ॑ज॒त्वित्या॑ह
Sentence: 6    तु॒थो ह॑ स्म वै वि॒श्ववे॑दा दे॒वानां॒ दक्षि॑णा॒ वि भ॑जति
Sentence: 7    तेनैवैना॒ वि भ॑जति ।
Sentence: 8    ए॒तत्ते॑ अग्ने॒ राधः॑ ।।

Verse: 3 
Sentence: 1    अै॑ति॒ सोम॑च्युत॒मित्या॑ह
Sentence: 2    सोम॑च्युतं॒ ह्य॑स्य॒ राध ऐति
Sentence: 3    तन्मि॒त्रस्य॑ प॒था न॒येत्या॑ह
Sentence: 4    शान्त्यै॑ ।
Sentence: 5    ऋ॒तस्य॑ प॒था प्रेत॑ च॒न्द्रद॑क्षिणा॒ इत्या॑ह
Sentence: 6    स॒त्यं वा ऋ॒तम् ।
Sentence: 7    स॒त्येनैवैना ऋ॒तेन॒ वि भ॑जति
Sentence: 8    य॒ज्ञस्य॑ प॒था सु॑वि॒ता नय॑न्ती॒रित्या॑ह
Sentence: 9    य॒ज्ञस्य॒ ह्ये॒ताः प॒था यन्ति॒ यद्दक्षि॑णास् ।
Sentence: 10    ब्रा॑ह्म॒णम॒द्य रा॑ध्यासम् ।।

Verse: 4 
Sentence: 1    ऋषि॑मार्षे॒यमित्या॑ह ।
Sentence: 2    ए॒ष वै॑ ब्राह्म॒ण ऋषि॑रार्षे॒यो यः शु॑श्रु॒वान्
Sentence: 3    तस्मा॑दे॒वमा॑ह
Sentence: 4    वि सुवः॒ पश्य॒ व्य॒न्तरि॑क्ष॒मित्या॑ह
Sentence: 5    सुव॒र्गमेवैनं लो॒कं ग॑मयति
Sentence: 6    यत॑स्व सदस्यै॒रित्या॑ह
Sentence: 7    मित्र॒त्वाय॑ ।
Sentence: 8    अ॒स्मद्दा॑त्रा देव॒त्रा ग॑छत॒ मधु॑मतीः॒ प्र दा॒तार॒मा वि॑श॒तेत्या॑ह
Sentence: 9    व॒यमि॒ह प्र॑दा॒तारः॒ स्मो॒ ऽस्मान॒मुत्र॒ मधु॑मती॒रा वि॑श॒तेति॑ ।।

Verse: 5 
Sentence: 1    वावै॒तदा॑ह
Sentence: 2    हिर॑ण्यं ददाति
Sentence: 3    ओतिर्वै॒ हिर॑ण्यम् ।
Sentence: 4    ज्योति॑रे॒व पु॒रस्ता॑द्धत्ते
Sentence: 5    सुव॒र्गस्य॑ लो॒कस्यानु॑ख्यात्यै ।
Sentence: 6    अ॒ग्नीधे॑ ददाति ।
Sentence: 7    अ॒ग्निमु॑खाने॒वर्तून्प्री॑णाति
Sentence: 8    ब्र॒ह्मणे॑ ददाति
Sentence: 9    प्रसू॑त्यै
Sentence: 10    होत्रे॑ ददाति ।
Sentence: 11    आ॒त्मा वा ए॒ष य॒ज्ञस्य॒ यद्धोता॑ ।
Sentence: 12    आ॒त्मान॑मे॒व य॒ज्ञस्य॒ दक्षि॑णाभिः॒ सम॑र्धयति ।।

Paragraph: 2 
Verse: 1 
Sentence: 1    स॑मिष्टय॒जूंषि॑ जुहोति
Sentence: 2    य॒ज्ञस्य॒ समि॑ष्ट्यै
Sentence: 3    यद्वै॑ य॒ज्ञस्य॑ क्रू॒रं यद्विलि॑ष्टं॒ यद॒त्येति॒ यन्नात्येति॒ यद॑तिक॒रोति॒ यन्नापि॑ क॒रोति॒ तदे॒व तैः॑ प्रीणाति
Sentence: 4    नव॑ जुहोति
Sentence: 5    नव वै॒ पुरु॑षे प्रा॒णाः
Sentence: 6    पुरु॑षेण य॒ज्ञः सम्मि॑तस् ।
Sentence: 7    यावा॑ने॒व य॒ज्ञस्तम्प्री॑णाति
Sentence: 8    षडृग्मि॑याणि जुहोति
Sentence: 9    षड्वा ऋ॒तव॑स् ।
Sentence: 10    ऋ॒तूने॒व प्री॑णाति
Sentence: 11    त्रीणि॒ यजूं॑षि ।।

Verse: 2 
Sentence: 1    त्रय॑ इ॒मे लो॒कास् ।
Sentence: 2    इ॒माने॒व लो॒कान्प्री॑णाति
Sentence: 3    यज्ञ॑ य॒ज्ञं ग॑छ य॒ज्ञप॑तिं ग॒छेत्या॑ह
Sentence: 4    य॒ज्ञप॑तिमेवैनं गमयति
Sentence: 5    स्वाम्योनिं॑ ग॒छेत्या॑ह
Sentence: 6    स्वामेवैनं॒ योनिं॑ गमयति ।
Sentence: 7    ष ते॑ य॒ज्ञो य॑ज्ञपते स॒हसू॑क्तवाकः सु॒वीर॒ इत्या॑ह
Sentence: 8    यज॑माम ए॒व वी॒र्यं॑ दधाति
Sentence: 9    वासि॒ष्ठो ह॑ सात्यह॒व्यो दे॑वभा॒गम्प॑प्रछ
Sentence: 10    यत्सृञ्ज॑यान्बहुया॒जिनो ऽयी॑यजो य॒ज्ञे ।।

Verse: 3 
Sentence: 1    य॒ज्ञम्प्रत्य॑तिष्ठि॒पा३ य॒ज्ञप॒ता३विति
Sentence: 2    स हो॑वाच
Sentence: 3    य॒ज्ञप॑ता॒विति
Sentence: 4    स॒त्याद्वै॒ सृञ्ज॑याः॒ परा॑ बभूवु॒रिति॑ होवाच य॒ज्ञे वाव य॒ज्ञः प्र॑ति॒ष्ठाप्य॑ आसी॒द्यज॑मा
Sentence: 5    देवा॑ गातुविदो गा॒तुं वि॒त्त्वा गा॒तुमि॒तेत्या॑ह
Sentence: 6    य॒ज्ञ ए॒व य॒ज्ञम्प्रति॑ ष्ठापयति
Sentence: 7    यज॑मान॒स्याप॑राभावाय ।।

Paragraph: 3 
Verse: 1 
Sentence: 1    अ॑वभृथय॒जूंषि॑ जुहोति
Sentence: 2    यदे॒वार्वा॒चीन॒मेक॑हायना॒देनः॑ क॒रोति॒ तदे॒व तै॒रव॑ यजते ।
Sentence: 3    अ॒पो॑ ऽवभृ॒थमवै॑ति ।
Sentence: 4    अ॒प्सु वै॒ वरु॑णः
Sentence: 5    सा॒क्षादे॒व वरु॑ण॒मव॑ यजते
Sentence: 6    वर्त्म॑ना॒ वा अ॒न्वित्य॑ य॒ज्ञं रक्षां॑सि जिघांसन्ति
Sentence: 7    साम्ना॑ प्रस्तो॒तान्ववै॑ति
Sentence: 8    साम वै रक्षो॒हा
Sentence: 9    रक्ष॑सा॒मप॑हत्यै
Sentence: 10    त्रिर्नि॒धन॒मुपै॑ति
Sentence: 11    त्रय॑ इ॒मे लो॒कास् ।
Sentence: 12    ए॒भ्य ए॒व लो॒केभ्यो॒ रक्षां॑सि ।।

Verse: 2 
Sentence: 1    अप॑ हन्ति
Sentence: 2    पुरु॑षःपुरुषो नि॒धन॒मुपै॑ति
Sentence: 3    पुरु॑षःपुरुषो॒ हि र॑क्ष॒स्वी
Sentence: 4    रक्ष॑सा॒मप॑हत्यै ।
Sentence: 5    उ॒रुं हि राजा॒ वरु॑णश्च॒कारेत्या॑ह
Sentence: 6    प्रति॑ष्ठित्यै
Sentence: 7    श॒तं ते॑ राजन्भि॒षजः॑ स॒हस्र॒मित्या॑ह
Sentence: 8    भेष॒जमे॒वास्मै॑ करोति ।
Sentence: 9    अ॒भिष्ठि॑तो॒ वरु॑णस्य॒ पाश॒ इत्या॑ह
Sentence: 10    वरुणपा॒शमे॒वाभि ति॑ष्ठति
Sentence: 11    ब॒र्हिर॒भि जु॑होति ।
Sentence: 12    आहु॑तीना॒म्प्रति॑ष्ठित्यै ।
Sentence: 13    अथो॑ अग्नि॒वत्ये॒व जु॑होति ।
Sentence: 14    अप॑बर्हिषः प्रया॒जान् ।।

Verse: 3 
Sentence: 1    य॑जति
Sentence: 2    प्र॒जा वै॑ ब॒र्हिः
Sentence: 3    प्र॒जा ए॒व व॑रुणपा॒शान्मु॑ञ्चति ।
Sentence: 4    आज्य॑भागौ यजति
Sentence: 5    य॒ज्ञस्यै॒व चक्षु॑षी॒ नान्तरे॑ति
Sentence: 6    वरु॑णं यजति
Sentence: 7    वरुणपा॒शादेवैनम्मुञ्चति ।
Sentence: 8    अ॒ग्नीवरु॑णौ यजति
Sentence: 9    सा॒क्षादेवैनं वरुणपा॒शान्मु॑ञ्चति ।
Sentence: 10    अप॑बर्हिषावनूयजौ यजति
Sentence: 11    प्र॒जा वै॑ ब॒र्हिः
Sentence: 12    प्र॒जा ए॒व व॑रुणपा॒शान्मु॑ञ्चति
Sentence: 13    च॒तुरः॑ प्रया॒जान्य॑जति॒ द्वाव॑नूयाजौ
Sentence: 14    षट्सम्प॑द्यन्ते
Sentence: 15    षड्वा ऋ॒तवः॑ ।।

Verse: 4 
Sentence: 1    ऋ॒तुष्वे॒व प्रति॑ तिष्ठति ।
Sentence: 2    अव॑भृथ निचङ्कु॒णेत्या॑ह
Sentence: 3    यथोदि॒तमे॒व वरु॑ण॒मव॑ यजते
Sentence: 4    समु॒द्रे ते॒ हृद॑यम॒प्स्व॒न्तरित्या॑ह
Sentence: 5    समु॒द्रेह्य॒न्तर्वरु॑णः
Sentence: 6    सं त्वा॑ विश॒न्त्वोष॑धीरु॒ताप॒ इत्या॑ह ।
Sentence: 7    अ॒द्भिरेवैन॒मोष॑धीभिः स॒म्यञ्चं॑ दधाति
Sentence: 8    देवी॑राप ए॒ष वो॒ गर्भ॒ इत्या॑ह
Sentence: 9    यथाय॒जुरेवै॒तत्
Sentence: 10    प॒शवो वै ।।

Verse: 5 
Sentence: 1    सोम॑स् ।
Sentence: 2    यद्भि॑न्दू॒नाम्भ॒क्षये॑त्पशु॒मान्त्स्या॒द्वरु॑ण॒स्त्वे॑नं गृह्णीयात् ।
Sentence: 3    यन्न भ॒क्षये॑दप॒शुः स्यान्नैनं॒ वरु॑णो गृह्णीयात् ।
Sentence: 4    उ॑प॒स्पृश्य॑मे॒व प॑शु॒मान्भ॑वति नैनं॒ वरु॑णो गृह्णाति
Sentence: 5    प्रति॑युतो॒ वरु॑णस्य॒ पाश॒ इत्या॑ह
Sentence: 6    वरुणपा॒शादे॒व निर्मु॑च्यते ।
Sentence: 7    अप्र॑तीक्ष॒मा य॑न्ति॒ वरु॑णस्या॒न्तर्हि॑त्यै ।
Sentence: 8    एधो॑ ऽस्येधिषीम॒हीत्या॑ह
Sentence: 9    स॒मिधै॒वाग्निं न॑म॒स्यन्त॑ उ॒पाय॑न्ति
Sentence: 10    तेजो॑ ऽसि॒ तेजो॒ मयि॑ धे॒हीत्या॑ह
Sentence: 11    तेज॑ ए॒वात्मन्ध॑त्ते ।।

Paragraph: 4 
Verse: 1 
Sentence: 1    स्प्येन॒ वेदि॒मुद्ध॑न्ति रथा॒क्षेण॒ वि मि॑मीते॒ यूप॑म्मिनोति त्रि॒वृत॑मे॒व वज्रं॑ स॒म्भृत्य॒ भ्रातृ॑व्याय॒ प्र ह॑रति॒ स्तृत्यै
Sentence: 2    यद॑न्तर्वे॒दि मि॑नु॒याद्दे॑वलो॒कम॒भि ज॑ये॒द्यद्ब॑हिर्वे॒दि म॑नुष्यलो॒कं वे॑द्य॒न्तस्य॑ संधौ मिनोत्यु॒भयो॑र्लो॒कयो॑र॒भिजि॑त्यै ।
Sentence: 3    उप॑रसम्मिताम्मिनुयात्पितृलो॒कका॑मस्य रश॒नस॑म्मिताम्मनुष्यलो॒कका॑मस्य च॒षाल॑सम्मितामिन्स्य॒ सर्वा॑न्त्स॒मान्प्र॑ति॒ष्ठाका॑मस्य॒ ये त्रयो॑ मध्य॒मास्तान्त्स॒मान्प॒शुका॑मस्यै॒तान्वै॑ ।।

Verse: 2 
Sentence: 1    अनु॑ प॒शव॒ उप॑ तिष्ठन्ते पशु॒माने॒व भ॑वति
Sentence: 2    व्यति॑षजे॒दित॑रान्प्र॒जयैवैनम्प॒शुभि॒र्व्यति॑षजति
Sentence: 3    यं का॒मये॑त प्र॒मायु॑कः स्या॒दिति॑ गर्त॒मितं॒ तस्य॑ मिनुयादुत्तरा॒र्ध्यं॒ वर्षि॑ष्ठ॒मथ॒ ह्रसी॑यांसमे॒षा वै॑ गर्त॒मिद्यस्यै॒वम्मि॒नोति॑ ता॒जक्प्र मी॑यते
Sentence: 4    दक्षिणा॒र्ध्यं॒ वर्षि॑ष्ठम्मिनुयात्सुव॒र्गका॑म॒स्याथ॒ ह्रसी॑यांसमा॒क्रम॑णमे॒व तत्सेतुं॒ यज॑मानः कुरुते सुव॒र्गस्य॑ लो॒कस्य॒ सम॑ष्ट्यै ।।

Verse: 3 
Sentence: 1    यदेक॑स्मि॒न्यूपे॒ द्वे र॑श॒ने प॑रि॒व्यय॑ति॒ तस्मा॒देको॒ द्वे जा॒ये वि॑न्दते॒ यन्नै॑कां रश॒नां द्वयो॒र्यूप॑योः परि॒व्यय॑ति॒ तस्मान्नैका द्वौ॒ पती॑ विन्दते
Sentence: 2    यं का॒मये॑त॒ स्त्र्य॑स्य जाये॒तेत्यु॑पा॒न्ते तस्य॒ व्यति॑षजे॒त्स्त्र्ये॒वास्य॑ जायते
Sentence: 3    यं का॒मये॑त॒ पुमा॑नस्य जाये॒तेत्या॒न्तं तस्य॒ प्र वे॑ष्टये॒त्पुमा॑ने॒वास्य॑ ।।

Verse: 4 
Sentence: 1    जा॑यते ।
Sentence: 2    असु॑रा वै दे॒वान्द॑क्षिण॒त उपा॑नय॒न्तान्दे॒वा उ॑पश॒येनै॒वापा॑नुदन्त॒ तदु॑पश॒यस्यो॑पशय॒त्वं यद्द॑क्षिण॒त उ॑पश॒य उ॑प॒शये॒ भ्रातृ॑व्यापनुत्त्यै
Sentence: 3    सर्वे॒ वा अ॒न्ये यूपाः॑ पशु॒मन्तो ऽथो॑पश॒य ए॒वाप॒शुस्तस्य॒ यज॑मानः प॒शुर्यन्न नि॑र्दि॒शेदारनो ऽसौ ते प॒शुरिति॒ निर्दि॑शे॒द्यं द्वि॒ष्याद्यमे॒व ।।

Verse: 5 
Sentence: 1    द्वेष्टि॒ तम॑स्मै प॒शुं निर्दि॑शति
Sentence: 2    यदि॒ न द्वि॒ष्यादा॒खुस्ते॑ प॒शुरिति॑ ब्रूया॒न्न ग्रा॒म्यान्प॒शून्हि॒नस्ति॒ नार॒ण्यान्
Sentence: 3    प्र॒जाप॑तिः प्र॒जा अ॑सृजत॒ सो॒ ऽन्नाद्ये॑न॒ व्या॑र्ध्यत॒ स ए॒तामे॑काद॒शिनी॑मपश्य॒त्तया वै॒ सो॒ ऽन्नाद्य॒मवा॑रुन्द्ध॒ यद्दश॒ यूपा॒ भव॑न्ति॒ दशा॑क्षरा वि॒राडन्नं॑ वि॒राड्वि॒राजैव॑ रुन्द्धे ।।

Verse: 6 
Sentence: 1    य ए॑काद॒श स्तन॑ ए॒वास्यै॒ स दु॒ह एवैनां॒ तेन
Sentence: 2    वज्रो॒ वा ए॒षा सम्मी॑यते॒ यदे॑काद॒शिनी॒ सेश्व॒रा पु॒रस्ता॑त्प्र॒त्यञ्चं॑ य॒ज्ञं सम्म॑र्दितति॑ य॒ज्ञस्य॒ प्रत्युत्त॑ब्ध्यै सय॒त्वाय॑ ।।

Paragraph: 5 
Verse: 1 
Sentence: 1    प्र॒जाप॑तिः प्र॒जा अ॑सृजत॒ स रि॑रिचा॒नो॑ ऽमन्यत॒ स ए॒तामे॑काद॒शिनी॑मपश्य॒त्तया वै॒ स आयु॑रिन्द्रि॒यं वी॒र्य॑मा॒त्मन्न॑धत्त प्र॒जा इ॑व॒ खलु॒ वा ए॒ष सृ॑जते॒ यो यज॑ते॒ स ए॒तर्हि॑ रिरिचा॒न इ॑व॒ यदेषैकाद॒शिनी॒ भव॒त्यायु॑रे॒व तये॑न्द्रि॒यं वी॒र्यं॒ यज॑मान॒ अत्मन्ध॑त्ते
Sentence: 2    प्रै॒वाग्ने॒येन॑ वापयति मिथु॒नं सा॑रस्व॒त्या क॑रोति॒ रेतः॑ ।।

Verse: 2 
Sentence: 1    सौ॑म्येन दधाति॒ प्र ज॑नयति पौ॒ष्णेन॑ बार्हस्प॒त्यो भ॑वति॒ ब्रह्म वै दे॒वाना॒म्बृह॒स्पति॒र्बस्मै॑ प्र॒जाः प्र ज॑नयति वैश्वदे॒वो भ॑वति वैश्वदे॒व्यो वै प्र॒जाः प्र॒जा ए॒वास्मै॒ प्र ज॑नयतीन्द्रि॒यमेवै॒न्द्रेणाव॑रुन्द्धे॒ विश॑म्मारु॒तेनौ॑जो॒ बल॑ऐन्द्रा॒ग्नेन॑ प्रस॒वाय॑ सावि॒त्रो नि॑र्वरुण॒त्वाय॑ वारु॒णस् ।
Sentence: 2    म॑ध्य॒त ऐ॒न्द्रमा ल॑भते मध्य॒त ए॒वेन्द्रि॒यं यज॑माने दधाति ।।

Verse: 3 
Sentence: 1    पु॒रस्ता॑ऐ॒न्द्रस्य॑ वैश्वदे॒वमाल॑भते वैश्वदे॒वं वा अन्न॒मन्न॑मे॒व पु॒रस्ता॑द्धत्ते॒ तस्मा॑त्पु॒रस्ता॒दन्न॑मद्यत ऐ॒न्द्रमा॒लभ्य॑ मारु॒तमा ल॑भते॒ विड्वै॑ म॒रुतो॒ विश॑मे॒स्मा॒ अनु॑ बध्नाति
Sentence: 2    यदि॑ का॒मये॑त॒ यो ऽव॑गतः॒ सो ऽप॑ रुध्यतां॒ यो ऽप॑रुद्धः॒ सो ऽव॑ गछ॒त्वित्ऐ॒न्द्रस्य॑ लो॒के वा॑रु॒णमा ल॑भेत वारु॒णस्य॑ लो॒क ऐ॒न्द्रम् ।।

Verse: 4 
Sentence: 1    य ए॒वाव॑गतः॒ सो ऽप॑ रुध्यते॒ यो ऽप॑रुद्धः॒ सो ऽव॑ गछति
Sentence: 2    यदि॑ का॒मये॑त प्र॒जा मु॑ह्येयु॒रिति॑ प॒शून्व्यति॑षजेत्प्र॒जा ए॒व मो॑हयति
Sentence: 3    यद॑भिवाह॒तो॒ ऽपां वा॑रु॒णमा॒लभे॑त प्र॒जा वरु॑णो गृह्णीयाद्दक्षिण॒त उ॒दञ्च॒मा ल॑भते ऽपवाह॒तो॒ ऽपाम्प्र॒जाना॒मव॑रुणग्राहाय ।।

Paragraph: 6 
Verse: 1 
Sentence: 1    इन्द्रः॒ पत्नि॑या॒ मनु॑मयाजय॒त्ताम्पर्य॑ग्निकृता॒मुद॑सृज॒त्तया॒ मनु॑रार्ध्नो॒द्यत्पर्य॑ति॒ यामे॒व मनु॒रृद्धि॒मार्ध्नो॒त्तामे॒व यज॑मान ऋध्नोति
Sentence: 2    य॒ज्ञस्य॒ वा अप्र॑तिष्ठिताद्य॒ज्ञः परा॑ भवति य॒ज्ञम्प॑रा॒भव॑न्तं॒ यज॑मा॒नो ऽनु॒ परा॑ भवति॒ यदाज्ये॑ण पात्नीव॒तं सं॑स्था॒पय॑ति य॒ज्ञस्य॒ प्रति॑ष्ठित्यै य॒ज्ञम्प्र॑ति॒तिष्ठ॑न्तं॒ यज॑मा॒नो ऽनु॒ प्रति॑ तिष्ठति ।
Sentence: 3    इ॒ष्टं व॒पया॑ ।।

Verse: 2 
Sentence: 1    भव॑ति॒ अनि॑ष्टं व॒शयाथ॑ पात्नीव॒तेन॒ प्र च॑रति ती॒र्थ ए॒व प्र च॑र॒त्यथो॑ ए॒तर्ह्ये॒वास्य॒ याम॑स्
Sentence: 2    त्वा॒ष्ट्रो भ॑वति॒ त्वष्टा वै॒ रेत॑सः सि॒क्तस्य॑ रू॒पाणि॒ वि क॑रोति॒ तमे॒व वृषा॑ण॒म्पत्नी॒षपि॑ सृजति॒ सो॑ ऽस्मै रू॒पाणि॒ वि क॑रोति ।।

Paragraph: 7 
Verse: 1 
Sentence: 1    घ्नन॑ति॒ वा ए॒तत्सोमं॒ यद॑भिषु॒ण्वन्ति
Sentence: 2    यत्सौ॒म्यो भव॑ति॒ यथा॑ मृ॒ताया॑नु॒स्तर॑णीं॒ घ्नन्ति॑ ता॒दृगे॒व तत् ।
Sentence: 3    यदु॑त्तरा॒र्धे वा॒ मध्ये॑ वा जुहु॒यात्दे॒वता॑भ्यः स॒मदं॑ दध्याद्दक्षिणा॒र्धे जु॑होत्ये॒षा वै॑ पितृ॒णां दिक्स्वाया॑मे॒व दि॒शि पि॒तॄन्नि॒रव॑दयते ।
Sentence: 4    उ॑द्गा॒तृभ्यो॑ हरन्ति सामदव॒त्यो वै सौ॒म्यो यदे॒व साम्न॑श्छम्बट्कु॒र्वन्ति॒ तस्यै॒व स शान्ति॑स् ।
Sentence: 5    अव॑ ।।

Verse: 2 
Sentence: 1    ई॑क्षन्ते प॒वित्रं वै सौ॒म्य आ॒त्मान॑मे॒व प॑वयन्ते
Sentence: 2    य आ॒त्मानं॒ न प॑रि॒पश्ये॑दि॒तासुः॑ स्यादभिद॒दिं कृ॒त्वावे॑क्षेत॒ तस्मि॒न्ह्या॒त्मान॑म्परिथो॑ आ॒त्मान॑मे॒व प॑वयते
Sentence: 3    यो ग॒तम॑नाः॒ स्यात्सो ऽवे॑क्षेत॒ यन्मे॒ मनः॒ परा॑गतं॒ यद्वा॑ मे॒ अप॑रागतम् । राज्ञा॒ सोमे॑न॒ तद्व॒यम॒स्मासु॑ धारयाम॒सीति॒ मन॑ ए॒वात्मन्दा॑धार ।।

Verse: 3 
Sentence: 1    न ग॒तम॑ना भवति ।
Sentence: 2    अप वै तृतीयसव॒ने य॒ज्ञः क्रा॑मतीजा॒नादनी॑जानम॒भ्या॑ग्नावैष्ण॒व्यर्चा घृ॒तस्य॑ यजत्य॒ग्निः सर्वा॑ दे॒वता॒ विष्णु॑र्य॒ज्ञो दे॒वता॑श्चै॒व य॒ज्ञं च॑ दाधार ।
Sentence: 3    उ॑पां॒शु य॑जति मिथुन॒त्वाय
Sentence: 4    ब्रह्मवा॒दिनो॑ वदन्ति मि॒त्रो य॒ज्ञस्य॒ स्वि॑ष्टं युवते॒ वरु॑णो॒ दुरि॑ष्टं॒ क्व॒ तर्हि॑ य॒ज्ञः क्व॒ यज॑मानो भव॒तीति॒ यन्मै॑त्रावरु॒णीं व॒शामा॒लभ॑ते मि॒त्रेणै॒व ।।

Verse: 4 
Sentence: 1    य॒ज्ञस्य॒ स्वि॑ष्टं शमयति॒ वरु॑णेन॒ दुरि॑ष्टं॒ नार्ति॒मार्छ॑ति॒ यज॑मानस् ।
Sentence: 2    यथा वै॒ लाङ्ग॑लेनो॒ ऽर्वरा॑म्प्रभि॒न्दन्त्ये॒वमृ॑क्सा॒मे य॒ज्ञम्प्र भि॑न्त्तो॒ यन्मै॑त्रा॒णीं व॒शामा॒लभ॑ते य॒ज्ञायै॒व प्रभि॑न्नाय म॒त्य॑म॒न्ववा॑स्यति॒ शान्त्यै
Sentence: 3    या॒तया॑मानि॒ वा ए॒तस्य॒ छन्दां॑सि॒ य ई॑जा॒नश्छन्द॑सामे॒ष रसो॒ यद्व॒शा यन्मै॑त्रावरु॒णीं व॒शामा॒लभ॑ते॒ छन्दां॑स्ये॒व पुन॒रा प्री॑णा॒त्यया॑तयामत्वा॒याथो॒ छन्दः॑स्वे॒व रसं॑ दधाति ।।

Paragraph: 8 
Verse: 1 
Sentence: 1    दे॒वा वा इ॑न्द्रि॒यं वी॒र्यं॒ व्य॑भजन्त
Sentence: 2    ततो॒ यद॒त्यशि॑ष्यत॒ तद॑तिग्रा॒ह्या॑ अभवन्
Sentence: 3    तद॑तिग्रा॒ह्या॑णामतिग्राह्य॒त्वम् ।
Sentence: 4    यद॑तिग्रा॒ह्या॑ गृ॒ह्यन्त॑ इन्द्रि॒यमे॒व तद्वी॒र्यं॒ यज॑मान आ॒त्मन्ध॑त्ते
Sentence: 5    तेज॑ आग्ने॒येने॑न्द्रि॒यऐ॒न्द्रेण॑ ब्रह्मवर्च॒सं सौ॒र्येण॑ ।
Sentence: 6    उ॑प॒स्तम्भ॑नं॒ वा ए॒तद्य॒ज्ञस्य॒ यद॑तिग्रा॒ह्या॑श्च॒क्रे पृ॒ष्ठानि
Sentence: 7    यत्पृष्ठ्ये॒ न गृ॑ह्णी॒यात्प्राञ्चं॑ य॒ज्ञम्पृ॒ष्ठानि॒ सं शृ॑णीयुस् ।
Sentence: 8    यदु॒क्थ्ये॑ ।।

Verse: 2 
Sentence: 1    गृ॑ह्णी॒यात्प्र॒त्यञ्चं॑ य॒ज्ञम॑तिग्रा॒ह्याः॒ सं शृ॑णीयुस् ।
Sentence: 2    वि॑श्व॒जिति॒ सर्व॑पृष्ठे ग्रहीत॒व्या॑ य॒ज्ञस्य॑ सवीर्य॒त्वाय
Sentence: 3    प्र॒जाप॑तिर्दे॒वेभ्यो॑ य॒ज्ञान्व्यादि॑शत्
Sentence: 4    स प्रि॒यास्त॒नूरप॒ न्य॑धत्त
Sentence: 5    तद॑तिग्रा॒ह्या॑ अभवन्
Sentence: 6    वित॑नु॒स्तस्य॑ य॒ज्ञ इत्या॑हु॒र्यस्या॑तिग्रा॒ह्या॒ न गृ॒ह्यन्त॒ इति॑ ।
Sentence: 7    अप्य॑ग्निष्टो॒मे ग्रा॑हीत॒व्या॑ य॒ज्ञस्य॑ सतनु॒त्वाय
Sentence: 8    दे॒वता वै॒ सर्वाः॑ स॒दृशी॑रासन्
Sentence: 9    ता न व्या॒वृत॑मगछन्
Sentence: 10    ते दे॒वाः ।।

Verse: 3 
Sentence: 1    ए॒त ए॒तान्ग्रहा॑नपश्यन्
Sentence: 2    तान॑गृह्णत ।
Sentence: 3    आग्ने॒यम॒ग्निऐ॒न्द्रमिन्द्रः॑ सौ॒र्यं सूर्य॑स्
Sentence: 4    ततो वै॒ ते॒ ऽन्याभि॑र्दे॒वता॑भिर्व्या॒वृत॑मगछन्
Sentence: 5    यस्यै॒वं वि॒दुष॑ ए॒ते ग्रहा॑ गृ॒ह्यन्ते॑ व्या॒वृत॑मे॒व पा॒प्मना॒ भ्रातृ॑व्येण गछति ।
Sentence: 6    इ॒मे लो॒का ज्योति॑ष्मन्तः स॒माव॑द्वीर्याः का॒र्या॒ इत्या॑हुस् ।
Sentence: 7    आ॑ग्ने॒येना॒स्मिँ लो॒के ज्योति॑र्धत्त ऐ॒न्द्रेणा॒न्तरि॑क्षे ।
Sentence: 8    इ॑न्द्रवा॒यू हि स॒युजौ
Sentence: 9    सौ॒र्येणा॒मुष्मिँ॑ लो॒के ।।

Verse: 4 
Sentence: 1    ज्योति॑र्धत्ते
Sentence: 2    ज्योति॑ष्मन्तो ऽस्मा इ॒मे लो॒का भ॑वन्ति स॒माव॑द्वीर्यानेनान्कुरुते ।
Sentence: 3    ए॒तान्वै॒ ग्रहा॑न्ब॒म्बावि॒श्वव॑यसाववित्ताम् ।
Sentence: 4    ताभ्या॑मि॒मे लो॒काः परा॑ञ्चश्चा॒र्वाञ्च॑श्च॒ प्राभु॑स् ।
Sentence: 5    यस्यै॒वं वि॒दुष॑ ए॒ते ग्रहा॑ गृ॒ह्यन्ते॒ प्रास्मा॑ इ॒मे लो॒काः परा॑ञ्चश्चा॒र्वाञ्च॑श्च भान्ति ।।

Paragraph: 9 
Verse: 1 
Sentence: 1    दे॒वा वै॒ यद्य॒ज्ञे ऽकु॑र्वत॒ तदसु॑रा अकुर्वत
Sentence: 2    ते दे॒वा अदा॑भ्ये॒ छन्दां॑सि॒ सव॑नानि॒ सम॑स्थापयन्
Sentence: 3    ततो॑ दे॒वा अभ॑व॒न्परासु॑रास् ।
Sentence: 4    यस्यै॒वं वि॒दुषो ऽदा॑भ्यो गृ॒ह्यते॒ भव॑त्या॒त्मना॒ परा॑स्य॒ भ्रातृ॑व्यो भवति
Sentence: 5    यद्वै॑ दे॒वा असु॑रा॒नदा॑भ्ये॒नाद॑भ्नुव॒न्तददा॑भ्यस्यादाभ्य॒त्वम् ।
Sentence: 6    य ए॒वं वेद॑ द॒भ्नोत्ये॒व भ्रातृ॑व्यं नैन॒म्भ्रातृ॑व्यो दभ्नोति ।।

Verse: 2 
Sentence: 1    ए॒षा वै॑ प्र॒जाप॑तेरतिमो॒क्षिणी॒ नाम॑ त॒नूर्यददा॑भ्यस् ।
Sentence: 2    उप॑नद्धस्य गृह्णा॒त्यति॑मुक्त्यै ।
Sentence: 3    अति॑ पा॒प्मान॒म्भ्रातृ॑व्यम्मुच्यते॒ य ए॒वं वेद
Sentence: 4    घ्नन्ति॒ वा ए॒तत्सोमं॒ यद॑भिषु॒ण्वन्ति
Sentence: 5    सोमे॑ ह॒न्यमा॑ने य॒ज्ञो ह॑न्यते य॒ज्ञे यज॑मानस् ।
Sentence: 6    ब्र॑ह्मवा॒दिनो॑ वदन्ति
Sentence: 7    किं तद्य॒ज्ञे यज॑मानः कुरुते॒ येन॒ जीव॑न्त्सुव॒र्गं लो॒कमे॒तीति
Sentence: 8    जीवग॒हो वा ए॒ष यददा॑भ्यस् ।
Sentence: 9    अन॑भिषुतस्य गृह्णाति
Sentence: 10    जीव॑न्तमेवैनं सुव॒र्गं लो॒कं ग॑मयति
Sentence: 11    वि वा ए॒तद्य॒ज्ञं छि॑न्दन्ति॒ यददा॑भ्ये संस्था॒पय॑न्ति ।
Sentence: 12    अं॒शूनपि॑ सृजति य॒ज्ञस्य॒ संत॑त्यै ।।

Paragraph: 10 
Verse: 1 
Sentence: 1    दे॒वा वै॑ प्र॒बाहु॒ग्ग्रहा॑नगृह्णत
Sentence: 2    स ए॒तम्प्र॒जाप॑तिरं॒शुम॑पश्यत्
Sentence: 3    तम॑गृह्णीत
Sentence: 4    तेन वै॒ स आ॑र्ध्नोत् ।
Sentence: 5    यस्यै॒वं वि॒दुषो॑ ऽं॒शुर्गृ॒ह्यत॑ ऋ॒ध्नोत्ये॒व
Sentence: 6    स॒कृद॑भिषुतस्य गृह्णाति
Sentence: 7    स॒कृद्धि स तेनार्ध्नो॑त् ।
Sentence: 8    मन॑सा गृह्णाति
Sentence: 9    मन॑ इव॒ हि प्र॒जाप॑तिः
Sentence: 10    प्र॒जाप॑ते॒राप्त्यै॑ ।
Sentence: 11    अौ॑दुम्बरेण गृह्णाति ।
Sentence: 12    ऊर्ग्वा उ॑दु॒म्बर॑स् ।
Sentence: 13    ऊर्ज॑मे॒वाव॑ रुन्द्धे
Sentence: 14    चतुः॑स्रक्ति भवति
Sentence: 15    दि॒क्षु ।।

Verse: 2 
Sentence: 1    ए॒व प्रति॑ तिष्ठति
Sentence: 2    यो वा अं॑शोरा॒यत॑नं॒ वेदा॒यत॑नवान्भवति
Sentence: 3    वामदे॒व्यमिति॒ साम॒ तद्वा अ॑स्या॒यत॑न॒म्मन॑सा॒ गाय॑मानो गृह्णाति ।
Sentence: 4    आ॒यत॑नवाने॒व भ॑वति
Sentence: 5    यद॑ध्व॒र्युरं॒शुं गृ॒ह्णन्नार्धये॑दु॒भाभ्यां॒ नर्ध्ये॑ताध्व॒र्यवे॑ च॒ यज॑मानाय च
Sentence: 6    यद॒र्धये॑दु॒भाभ्या॑मृध्येत ।
Sentence: 7    अन॑वानं गृह्णाति सै॒वास्यर्द्धि॑स् ।
Sentence: 8    हिर॑ण्यम॒भि व्य॑निति ।
Sentence: 9    अ॒मृतं वै॒ हिर॑ण्य॒मायुः॑ प्रा॒ण आयु॑षै॒वामृत॑म॒भि धि॑नोति
Sentence: 10    श॒तमा॑नम्भवति
Sentence: 11    श॒तायुः॒ पुरु॑षः श॒तेन्द्रि॑यस् ।
Sentence: 12    आयु॑ष्ये॒वेन्द्रि॒ये प्रति॑ तिष्ठति ।।

Paragraph: 11 
Verse: 1 
Sentence: 1    प्र॒जाप॑तिर्दे॒वेभ्यो॑ य॒ज्ञान्व्यादि॑शत्
Sentence: 2    स रि॑रिचा॒नो॑ ऽमन्यत
Sentence: 3    स य॒ज्ञानां॑ षोडश॒धेन्द्रि॒यं वी॒र्य॑मा॒त्मान॑म॒भि सम॑क्खिदत्
Sentence: 4    तत्षो॑ड॒श्य॑भवत्
Sentence: 5    न वै॑ षोड॒शी नाम॑ य॒ज्ञो॑ ऽस्ति
Sentence: 6    यद्वाव षो॑ड॒शं स्तो॒त्रं षो॑ड॒शं श॒स्त्रं तेन॑ षोड॒शी
Sentence: 7    तत्षो॑ड॒शिनः॑ षोडशि॒त्वम् ।
Sentence: 8    यत्षो॑ड॒शी गृ॒ह्यत॑ इन्द्रि॒यमे॒व तद्वी॒र्यं॒ यज॑मान आ॒त्मन्ध॑त्ते
Sentence: 9    दे॒वेभ्यो वै सुव॒र्गो लो॒कः ।।

Verse: 2 
Sentence: 1    न प्राभ॑वत्
Sentence: 2    त ए॒तं षो॑ड॒शिन॑मपश्यन्
Sentence: 3    तम॑गृह्णत
Sentence: 4    ततो वै॒ तेभ्यः॑ सुव॒र्गो लो॒कः प्राभ॑वत् ।
Sentence: 5    यत्षो॑ड॒शी गृ॒ह्यते॑ सुव॒र्गस्य॑ लो॒कस्या॒भिजि॑त्यै ।
Sentence: 6    इन्द्रो वै दे॒वाना॑मानुजाव॒र आ॑सीत्
Sentence: 7    स प्र॒जाप॑ति॒मुपा॑धावत्
Sentence: 8    तस्मा॑ ए॒तं षो॑ड॒शिन॒म्प्राय॑छत्
Sentence: 9    तम॑गृह्णीत
Sentence: 10    ततो वै॒ सो ऽग्रं॑ दे॒वता॑ना॒म्पर्ऐ॑त् ।
Sentence: 11    यस्यै॒वं वि॒दुषः॑ षोड॒शी गृ॒ह्यते॑ ।।

Verse: 3 
Sentence: 1    अग्र॑मे॒व स॑मा॒नाना॒म्पर्ये॑ति
Sentence: 2    प्रातःसव॒ने गृ॑ह्णाति
Sentence: 3    वज्रो वै षोड॒शी
Sentence: 4    वज्रः॑ प्रातःसव॒नम् ।
Sentence: 5    स्वादेवैनं॒ योने॒र्नि गृ॑ह्णाति
Sentence: 6    सव॑नेसवने॒ ऽभि गृ॑ह्णाति
Sentence: 7    सव॑नात्सवनादेवैन॒म्प्र ज॑नयति
Sentence: 8    तृतीयसव॒ने प॒शुका॑मस्य गृह्णीयात् ।
Sentence: 9    वज्रो वै षोड॒शी प॒शव॑स्तृतीयसव॒नम् ।
Sentence: 10    वज्रे॑णै॒वास्मै॑ तृतीयसव॒नात्प॒शूनव॑ रुन्द्धे
Sentence: 11    नोक्थ्ये॑ गृह्णीयात्
Sentence: 12    प्र॒जा वै॑ प॒शव॑ उ॒क्थानि
Sentence: 13    यदु॒क्थ्ये॑ ।।

Verse: 4 
Sentence: 1    गृ॑ह्णी॒यात्प्र॒जाम्प॒शून॑स्य॒ निर्द॑हेत् ।
Sentence: 2    अ॑तिरा॒त्रे प॒शुका॑मस्य गृह्णीयात् ।
Sentence: 3    वज्रो वै षोड॒शी
Sentence: 4    वज्रे॑णै॒वास्मै॑ प॒शून॑व॒रुध्य॒ रात्रि॑यो॒परि॑ष्टाच्छमयति ।
Sentence: 5    अप्य॑ग्निष्टो॒मे रा॑ज॒न्य॑स्य गृह्णीयत् ।
Sentence: 6    व्या॒वृत्का॑मो॒ हि रा॑ज॒न्यो॒ यज॑ते
Sentence: 7    सा॒ह्न ए॒वास्मै॒ वज्रं॑ गृह्णाति
Sentence: 8    स ए॑नं॒ वज्रो॒ भूत्या॑ इन्द्धे॒ निर्वा॑ दहति ।
Sentence: 9    ए॑कविं॒शं स्तो॒त्रम्भ॑वति॒ प्रति॑ष्ठित्यै
Sentence: 10    हरि॑वच्छस्यते ।
Sentence: 11    इन्द्र॑स्य प्रि॒यं धाम॑ ।।

Verse: 5 
Sentence: 1    उपा॑प्नोति
Sentence: 2    कनी॑यांसि वै दे॒वेषु॒ छन्दां॒स्यास॒ञ्ज्यायां॒स्यसु॑रेषु
Sentence: 3    ते दे॒वाः कनी॑यसा॒ छन्द॑सा॒ ज्याय॒श्छन्दो॒ ऽभि व्य॑शंसन्
Sentence: 4    ततो वै॒ ते ऽसु॑राणां लो॒कम॑वृञ्जत
Sentence: 5    यत्कनी॑यसा॒ छन्द॑सा॒ ज्याय॒श्छन्दो॒ ऽभि वि॒शंस॑ति॒ भ्रातृ॑व्यस्यै॒व तल्लो॒कं वृ॑ङ्क्ते
Sentence: 6    षड॒क्षरा॒ण्यति॑ रेचयन्ति
Sentence: 7    षड्वा ऋ॒तव॑स् ।
Sentence: 8    ऋ॒तूने॒व प्री॑णाति
Sentence: 9    च॒त्वारि॒ पूर्वा॒ण्यव॑ कल्पयन्ति ।।

Verse: 6 
Sentence: 1    चतु॑ष्पद ए॒व प॒शूनव॑ रुन्द्धे॒ द्वे उत्त॑रे द्वि॒पद॑ ए॒वाव॑ रुन्द्धे ।
Sentence: 2    अ॑नु॒ष्टुभ॑म॒भि सम्पा॑दयन्ति
Sentence: 3    वाग्वा अनु॒ष्टुप्^नु॒ष्टुभ्
Sentence: 4    तस्मा॑त्प्रा॒णानां॒ वागु॑त्त॒मा
Sentence: 5    स॑मयाविषि॒ते सूर्ये॑ षोड॒शिन॑ स्तो॒त्रमु॒पाक॑रोति ।
Sentence: 6    ए॒तस्मिन्वै लो॒क इन्द्रो॑ वृ॒त्रम॑हन् ।
Sentence: 7    सा॒क्षादे॒व वज्र॒म्भ्रातृ॑व्याय॒ प्र ह॑रति ।
Sentence: 8    अ॑रुणपिशं॒गो ऽश्वो॒ दक्षि॑णा ।
Sentence: 9    तद्वै॒ वज्र॑स्य रू॒पम् ।
Sentence: 10    समृ॑द्ध्यै ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.