TITUS
Black Yajur-Veda: Taittiriya-Samhita
Part No. 44
Previous part

Chapter: 3 
Paragraph: 1 
Verse: 1 
Sentence: 1    प्र॒जवं॒ वा ए॒तेन॑ यन्ति॒ यद्द॑श॒ममह॑र् ।
Sentence: 2    पा॑पाव॒हीयं॒ वा ए॒तेन॑ भवन्ति॒ यद्द॑श॒ममह॑र्
Sentence: 3    यो वै॑ प्र॒जवं॑ य॒तामप॑थेन प्रति॒पद्य॑ते॒ य स्था॒णुं हन्ति॒ यो भ्रेषं॒ न्येति॒ स ही॑यते
Sentence: 4    स यो वै॑ दश॒मे ऽह॑न्नविवा॒क्य उ॑पह॒न्यते॒ स ही॑यते
Sentence: 5    तस्मै॒ य उप॑हताय॒ व्याह॒ तमे॒वान्वा॒रभ्य॒ सम॑श्नुते ।
Sentence: 6    अथ॒ यो व्याह॒ सः ।।

Verse: 2 
Sentence: 1    ही॑यते
Sentence: 2    तस्मा॑द्दश॒मे ऽह॑न्नविवा॒क्य उप॑हताय॒ न व्युच्य॑म्
Sentence: 3    अथो॒ खल्वा॑हुर्
Sentence: 4    य॒ज्ञस्य वै॒ समृ॑द्धेन दे॒वाः सु॑व॒र्गं लो॒कमा॑यन्य॒ज्ञस्य॒ व्यृ॑द्धे॒नासु॑रा॒न्परा॑भावय॒
Sentence: 5    यत्खलु वै य॒ज्ञस्य॒ समृ॑द्धं॒ तद्यज॑मानस्य॒ यद्व्यृ॑द्धं॒ तद्भ्रातृ॑व्यस्य
Sentence: 6    स यो वै॑ दश॒मे ऽह॑न्नविवा॒क्य उ॑पह॒न्यते॒ स ए॒वाति॑ रेचयति
Sentence: 7    ते ये बाह्या॑ दृशी॒कवः॑ ।।

Verse: 3 
Sentence: 1    स्युस्ते वि ब्रू॑युस् ।
Sentence: 2    यदि॒ तत्र॒ न वि॒न्देयु॑रन्तःसद॒साद्व्युच्य॑म् ।
Sentence: 3    तद्व्युच्य॑मे॒व ।
Sentence: 4    अथ॒ वा ए॒तत्स॑र्परा॒ज्ञिया॑ ऋ॒ग्भि स्तु॑वन्ति ।
Sentence: 5    इ॒यं वै॒ सर्प॑तो॒ राज्ञी
Sentence: 6    यद्वा अ॒स्यां किं चार्च॑न्ति॒ यदा॑नृ॒चुस्तेने॒यं स॑र्परा॒ज्ञी
Sentence: 7    ते यदे॒व किं च॑ वा॒चानृ॒चुर्यदतो ऽध्य॑र्चि॒तारः॑ ।।

Verse: 4 
Sentence: 1    तदु॒भय॑मा॒प्त्वाव॒रुध्योत्ति॑ष्ठा॒मेति
Sentence: 2    ताभि॒र्मन॑सा स्तुवते
Sentence: 3    न वा इ॒माम॑श्वर॒थो नाश्व॑तरीर॒थः स॒द्यः पर्या॑प्तुमर्हति
Sentence: 4    मनो॒ वा इ॒मां स॒द्यः पर्या॑प्तुमर्हति॒ मनः॒ परि॑भवितुम्
Sentence: 5    अथ॒ ब्रह्म॑ वदन्ति
Sentence: 6    परि॑मिता॒ वा ऋचः॒ परि॑मितानि॒ सामा॑नि॒ परि॑मितानि॒ यजूं॒ष्यथै॒तस्यै॒वान्तो॒ नास्ति॒ यद्ब्र
Sentence: 7    तत्प्र॑तिगृण॒त आ च॑क्षीत
Sentence: 8    स प्र॑तिग॒रः ।।

Paragraph: 2 
Verse: 1 
Sentence: 1    ब्र॑ह्मवा॒दिनो॑ वदन्ति
Sentence: 2    किं द्वा॑दशा॒हस्य॑ प्रथ॒मेनाह्न॒र्त्विजां॒ यज॑मानो वृङ्क्त॒ इति
Sentence: 3    तेज॑ इन्द्रि॒यमिति
Sentence: 4    किं द्वि॒तीये॒नेति
Sentence: 5    प्रा॒णान॒न्नाद्य॒मिति
Sentence: 6    किं तृ॒तीये॒नेति
Sentence: 7    त्रीनि॒माँ लो॒कानिति
Sentence: 8    किं च॑तु॒र्थेनेति
Sentence: 9    चतु॑ष्पदः प॒शूनिति
Sentence: 10    किम्प॑ञ्च॒मेनेति
Sentence: 11    पञ्चा॑क्षराम्प॒ङ्क्तिमिति
Sentence: 12    किं ष॒ष्ठेनेति
Sentence: 13    षडृ॒तूनिति
Sentence: 14    किं स॑प्त॒मेनेति
Sentence: 15    स॒प्तप॑दां शक्वरी॒मिति॑ ।।

Verse: 2 
Sentence: 1    किम॑ष्ट॒मेनेति॑ ।
Sentence: 2    अ॒ष्टाक्ष॑रां गाय॒त्रीमिति
Sentence: 3    किं न॑व॒मेनेति
Sentence: 4    त्रि॒वृतं॒ स्तोम॒मिति
Sentence: 5    किं द॑श॒मेनेति
Sentence: 6    दशा॑क्षरां वि॒राज॒मिति
Sentence: 7    किमे॑काद॒शेनेति॑ ।
Sentence: 8    एका॑दशाक्षरां तृ॒ष्टुभ॒मिति
Sentence: 9    किं द्वा॑द॒शेनेति
Sentence: 10    द्वाद॑शाक्षरां॒ जग॑ती॒मिति॑ ।
Sentence: 11    ए॒ताव॒द्वा अ॑स्ति॒ याव॑दे॒तत् ।
Sentence: 12    याव॑दे॒वास्ति॒ तदे॑षां वृङ्क्ते ।।

Paragraph: 3 
Verse: 1 
Sentence: 1    ए॒ष वा आ॒प्तो द्वा॑दशा॒हो यत्त्र॑योदशरा॒त्रः
Sentence: 2    स॑मा॒नं ह्ये॒तदह॒र्यत्प्रा॑य॒णीय॑श्चोदय॒नीय॑श्च
Sentence: 3    त्र्य॑तिरात्रो भवति
Sentence: 4    त्रय॑ इ॒मे लो॒कास् ।
Sentence: 5    ए॒षां लो॒काना॒माप्त्यै
Sentence: 6    प्रा॒णो वै॑ प्रथ॒मो॑ ऽतिरा॒त्रो व्या॒नो द्वि॒तीयो॑ ऽपा॒नस्तृ॒तीयः
Sentence: 7    प्राणापानोदा॒नेष्वे॒वान्नाद्ये॒ प्रति॑ तिष्ठन्ति॒ सर्व॒मायु॑र्यन्ति॒ य ए॒वं वि॒द्वांस॑स्त
Sentence: 8    तदा॑हुस् ।
Sentence: 9    वाग्वा ए॒षा वित॑ता ।।

Verse: 2 
Sentence: 1    यद्द्वा॑दशा॒हस्
Sentence: 2    तां वि छि॑न्द्यु॒र्यन्मध्ये॑ ऽतिरा॒त्रं कु॒र्युरु॑प॒दासु॑का गृ॒हप॑ते॒र्वाक्स्या॑त् ।
Sentence: 3    उ॒परि॑ष्टाच्छन्दो॒माना॑म्महाव्र॒तं कु॑र्वन्ति॒ संत॑तामे॒व वाच॒मव॑ रु॒न्द्धे ऽनु॑पदासुका गृ॒हप॑ते॒र्वाग्भ॑वति
Sentence: 4    प॒शवो वै छन्दो॒मा अन्न॑म्महाव्र॒तम् ।
Sentence: 5    यदु॒परि॑ष्टाच्छन्दो॒माना॑म्महाव्र॒तं कु॒र्वन्ति॑ प॒शुषु॑ चै॒वान्नाद्ये॑ च॒ प्रति॑ तिष्ठन्ति ।।

Paragraph: 4 
Verse: 1 
Sentence: 1    आ॑दि॒त्या अ॑कामयन्त ।
Sentence: 2    उ॒भयो॑र्लो॒कयो॑रृध्नुया॒मेति
Sentence: 3    त ए॒तं च॑तुर्दशरा॒त्रम॑पश्यन्
Sentence: 4    तमाह॑रन्
Sentence: 5    तेना॑यजन्त
Sentence: 6    ततो वै॒ त उ॒भयो॑र्लो॒कयो॑रार्ध्नुवन्न॒स्मिंश्चा॒मुष्मिं॑श्च
Sentence: 7    य ए॒वं वि॒द्वांस॑श्चतुर्दशरा॒त्रमास॑त उ॒भयो॑रे॒व लो॒कयो॑रृध्नुवन्त्य॒स्मिंश्चा॒मुष्मिं॑
Sentence: 8    चतुर्दशरा॒त्रो भ॑वति
Sentence: 9    स॒प्त ग्रा॒म्या ओष॑धयः स॒प्तार॒ण्या उ॒भयी॑षा॒मव॑रुद्ध्यै
Sentence: 10    यत्प॑रा॒चीना॑नि प्रा॒ष्ठानि॑ ।।

Verse: 2 
Sentence: 1    भव॒न्त्यमु॑मे॒व तै॑र्लो॒कम॒भि ज॑यन्ति
Sentence: 2    यत्प्र॑ती॒चीना॑नि पृ॒ष्ठानि॒ भव॑न्ती॒ममे॒व तै॑र्लो॒कम॒भि ज॑यन्ति
Sentence: 3    त्रयस्त्रिंशौ मध्य॒त स्तोमौ॑ भवतः॒ साम्रा॑ज्यमे॒व ग॑छन्ति ।
Sentence: 4    अ॑धिराजौ भवतो ऽधिरा॒जा ए॒व स॑मा॒नाना॑म्भवन्ति ।
Sentence: 5    अ॑तिरा॒त्रा व॒भितो॑ भवतः
Sentence: 6    परि॑गृहीत्यै ।।

Paragraph: 5 
Verse: 1 
Sentence: 1    प्र॒जाप॑तिः सुव॒र्गं लो॒कऐ॑त्
Sentence: 2    तं दे॒वा अन्वा॑यन्
Sentence: 3    ताना॑दि॒त्याश्च॑ प॒शव॒श्चान्वा॑यन्
Sentence: 4    ते दे॒वा अ॑ब्रुवन्
Sentence: 5    यान्प॒शूनु॒पाजी॑विष्म॒ त इ॒मे॒ ऽन्वाग्म॒न्निति
Sentence: 6    तेभ्य॑ ए॒तं च॑तुर्दशरा॒त्रम्प्रत्औ॑हन्
Sentence: 7    त आ॑दि॒त्याः पृष्ठैः सुव॒र्गं लो॒कमारो॑हन्त्र्य॒हाभ्या॑म॒स्मिँ लो॒के प॒शून्प्रत्औ॑हन्
Sentence: 8    पृष्ठैरादि॒त्या अ॒मुष्मिँ॑ लो॒क आर्ध्नु॑वन्त्र्य॒हाभ्या॑म॒स्मिन् ।।

Verse: 2 
Sentence: 1    लो॒के प॒शव॑स् ।
Sentence: 2    य ए॒वं वि॒द्वांस॑श्चतुर्दशरा॒त्रमास॑त उ॒भयो॑रे॒व लो॒कयो॑रृध्नुवन्त्यस्मिंश्चा॒मुष्मिं॑श
Sentence: 3    पृष्ठैरे॒वामुष्मिँ॑ लो॒क ऋ॑ध्नु॒वन्ति॑ त्र्य॒हाभ्या॑म॒स्मिँ लो॒के
Sentence: 4    ज्योतिर्गौ॒रायु॒रिति॑ त्र्य॒हो भ॑वति ।
Sentence: 5    इ॒यं वाव ज्योति॑र॒न्तरि॑क्षं गौर॒सावायु॑स् ।
Sentence: 6    इ॒माने॒व लो॒कान॒भ्यारो॑हन्ति
Sentence: 7    यद॒न्यतः॑ पृ॒ष्ठानि॒ स्युर्विवि॑वधं स्यात् ।
Sentence: 8    मध्ये॑ पृ॒ष्ठानि॑ भवन्ति सविवध॒त्वाय॑ ।।

Verse: 3 
Sentence: 1    ओजो वै वी॒र्य॑म्पृ॒ष्ठानि॑ ।
Sentence: 2    ओज॑ ए॒व वी॒र्य॑म्मध्य॒तो द॑धते
Sentence: 3    बृहद्रथंत॒राभ्यां॑ यन्ति ।
Sentence: 4    इ॒यं वाव र॑थंत॒रमसौ बृ॒हत् ।
Sentence: 5    आ॒भ्यामे॒व य॑न्ति ।
Sentence: 6    अथो॑ अ॒नयो॑रे॒व प्रति॑ तिष्ठनि ।
Sentence: 7    ए॒ते वै॑ य॒ज्ञस्या॑ञ्ज॒साय॑नी स्रु॒ती
Sentence: 8    ताभ्या॑मे॒व सु॑व॒र्गं लो॒कं य॑न्ति
Sentence: 9    परा॑ञ्चो॒ वा ए॒ते सु॑व॒र्गं लो॒कम॒भ्यारो॑हन्ति॒ ये प॑रा॒चीना॑नि पृ॒ष्ठान्यु॑प॒यन्ति
Sentence: 10    प्र॒त्यञ्त्र्य॒हो भ॑वति प्र॒त्यव॑रूढ्या॒ अथो॒ प्रति॑ष्ठियै ।
Sentence: 11    उ॒भयो॑र्लो॒कयो॑रृ॒द्ध्वोत्ति॑ष्ठन्ति
Sentence: 12    चतु॑र्दशै॒तास् ।
Sentence: 13    तासां॒ या दश॒ दशा॑क्षरा वि॒राडन्नं॑ वि॒राड्वि॒राजै॒वान्नाद्य॒मव॑ रुन्धते
Sentence: 14    याश्चत॑स्र॒श्चत॑स्रो॒ दिशो॑ दि॒क्ष्वे॒व प्रति॑ तिष्ठन्ति ।
Sentence: 15    अ॑तिरा॒त्राव॒भितो॑ भवतः॒ परि॑गृहीत्यै ।।

Paragraph: 6 
Verse: 1 
Sentence: 1    इन्द्रो वै स॒दृङ्दे॒वता॑भिरासीत्
Sentence: 2    स न व्या॒वृत॑मगछत्
Sentence: 3    स प्र॒जाप॑ति॒मुपा॑धावत्
Sentence: 4    तस्मा॑ ए॒तम्प॑ञ्चदशरा॒त्रम्पाय॑छत्
Sentence: 5    तमाह॑रत्
Sentence: 6    तेना॑यजत
Sentence: 7    ततो वै॒ सो॒ ऽन्याभि॑र्दे॒वता॑भिर्व्या॒वृत॑मगछत् ।
Sentence: 8    य ए॒वं वि॒द्वांसः॑ पञ्चदशरा॒त्रमास॑ते व्या॒वृत॑मे॒व पा॒प्मना॒ भ्रातृ॑व्येण गछन्ति
Sentence: 9    ज्योतिर्गौ॒रायु॒रिति॑ त्र्य॒हो भ॑वति ।
Sentence: 10    इ॒यं वाव ज्योति॑र॒न्तरि॑क्षम् ।।

Verse: 2 
Sentence: 1    गौ॑र॒सावायु॑स् ।
Sentence: 2    ए॒ष्वे॒व लो॒केषु॒ प्रति॑ तिष्ठन्ति ।
Sentence: 3    अस॑त्त्रं॒ वा ए॒तद्यद॑छन्दो॒मम् ।
Sentence: 4    यच्छ॑न्दो॒मा भव॑न्ति॒ तेन॑ स॒त्त्रम् ।
Sentence: 5    दे॒वता॑ ए॒व पृष्ठै॒रव॑ रुन्धते प॒शूञ्छ॑न्दोमैस् ।
Sentence: 6    ओज॑स्ये॒व वी॒र्ये॑ प॒शुषु॒ प्रति॑ तिष्ठन्ति
Sentence: 7    पञ्चदशरा॒त्रो भ॑वति
Sentence: 8    पञ्चद॒शो वज्र॑स् ।
Sentence: 9    वज्र॑मे॒व भ्रातृ॑व्येभ्यः॒ प्र ह॑रन्ति ।
Sentence: 10    अ॑तिरा॒त्राव॒भितो॑ भवतस् ।
Sentence: 11    इ॑न्द्रि॒यस्य॒ परि॑गृहीत्यै ।।

Paragraph: 7 
Verse: 1 
Sentence: 1    इन्द्रो वै शिथि॒ल इ॒वाप्र॑तिष्ठित आसीत्
Sentence: 2    सो ऽसु॑रेभ्यो ऽबिभेत्
Sentence: 3    स प्र॒जाप॑ति॒मुपा॑धावत्
Sentence: 4    तस्मा॑ ए॒तम्प॑ञ्चदशरा॒त्रं वज्र॒म्प्राय॑छत्
Sentence: 5    तेनासु॑रान्परा॒भाव्य॑ वि॒जित्य॒ श्रिय॑मगछत् ।
Sentence: 6    अ॑ग्नि॒ष्टुता॑ पा॒प्मानं॒ निर॑दहत पञ्चदशरा॒त्रेणौ॑जो॒ बल॑मिन्द्रि॒यं वी॒र्य॑मा॒त्मन्न॑धत
Sentence: 7    य ए॒वं वि॒द्वांसः॑ पञ्चदशरा॒त्रमास॑ते॒ भ्रातृ॑व्याने॒व प॑रा॒भाव्य॑ वि॒जित्य॒ श्रियं॑ गछन्ति ।
Sentence: 8    अ॑ग्नि॒ष्टुता॑ पा॒प्मानं॒ निः ।।

Verse: 2 
Sentence: 1    द॑हन्ते पञ्चदशरा॒त्रेणौ॑जो॒ बल॑मिन्द्रि॒यं वी॒र्य॑मा॒त्मन्द॑धते ।
Sentence: 2    ए॒ता ए॒व प॑श॒व्याः
Sentence: 3    पञ्च॑दश॒ वा अ॑र्ध॒मास॑स्य॒ रात्र॑यस् ।
Sentence: 4    अ॑र्धमास॒शः सं॑वत्स॒र आ॑प्यते
Sentence: 5    संवत्स॒रम्प॒शवो ऽनु॒ प्र जा॑यन्ते
Sentence: 6    तस्मा॑त्पश॒व्या॑स् ।
Sentence: 7    ए॒ता ए॒व सु॑व॒र्ग्याः
Sentence: 8    पञ्च॑दश॒ वा अ॑र्धमा॒सस्य॒ रात्र॑यस् ।
Sentence: 9    अ॑र्धमास॒शः सं॑वत्स॒र आ॑प्यते
Sentence: 10    संवत्स॒रः सु॑व॒र्गो लो॒कस्
Sentence: 11    तस्मा॑द्सुव॒र्ग्या॑स् ।
Sentence: 12    ज्योतिर्गौ॒रायु॒रिति॑ त्र्य॒हो भ॑वति ।
Sentence: 13    इ॒यं वाव ज्योति॑र॒न्तरि॑क्षम् ।।

Verse: 3 
Sentence: 1    गौ॑र॒सावायु॑स् ।
Sentence: 2    इ॒माने॒व लो॒कान॒भ्यारो॑हन्ति
Sentence: 3    यद॒न्यतः॑ पृ॒ष्ठानि॒ स्युर्विवि॑वधं स्यात् ।
Sentence: 4    मध्ये॑ पृ॒ष्ठानि॑ भवन्ति सविवध॒त्वाय॑ ।
Sentence: 5    ओजो वै वी॒र्य॑म्पृ॒ष्ठानि॑ ।
Sentence: 6    ओज॑ ए॒व वी॒र्य॑म्मध्य॒तो द॑धते
Sentence: 7    बृहद्रथंत॒राभ्यां॑ यन्ति ।
Sentence: 8    इ॒यं वाव र॑थंत॒रमसौ बृ॒हत् ।
Sentence: 9    आ॒भ्यामे॒व य॑न्ति ।
Sentence: 10    अथो॑ अ॒नयो॑रे॒व प्रति॑ तिष्ठनि ।
Sentence: 11    ए॒ते वै॑ य॒ज्ञस्या॑ञ्ज॒साय॑नी स्रु॒ती
Sentence: 12    ताभ्या॑मे॒व सु॑व॒र्गं लो॒कम् ।।

Verse: 4 
Sentence: 1    य॑न्ति
Sentence: 2    परा॑ञ्चो॒ वा ए॒ते सु॑व॒र्गं लो॒कम॒भ्यारो॑हन्ति॒ ये प॑रा॒चीना॑नि पृ॒ष्ठान्यु॑प॒यन्ति
Sentence: 3    प्र॒त्यञ्त्र्य॒हो भ॑वति प्र॒त्यव॑रूढ्या॒ अथो॒ प्रति॑ष्ठियै ।
Sentence: 4    उ॒भयो॑र्लो॒कयो॑रृ॒द्ध्वोत्ति॑ष्ठन्ति
Sentence: 5    पञ्च॑दशै॒तास्
Sentence: 6    तासां॒ या दश॒ दशा॑क्षरा वि॒राडन्नं॑ वि॒राड्वि॒राजै॒वान्नाद्य॒मव॑ रुन्धते
Sentence: 7    याः पञ्च॑ पञ्च॒ दिशः॑ दि॒क्ष्वे॒व प्रति॑ तिष्ठन्ति ।
Sentence: 8    अ॑तिरा॒त्राव॒भितो॑ भवतस् ।
Sentence: 9    इ॑न्द्रि॒यस्य॑ वी॒र्य॑स्य प्र॒जाय॑ति पशू॒नाम्परि॑गृहीत्यै ।।

Paragraph: 8 
Verse: 1 
Sentence: 1    प्र॒जाप॑तिरकामयत ।
Sentence: 2    अ॑न्ना॒दः स्या॒मिति
Sentence: 3    स ए॒तं स॑प्तदशरा॒त्रम॑पश्यत्
Sentence: 4    तमाह॑रत्
Sentence: 5    तेना॑यजत
Sentence: 6    ततो वै॒ सो॑ ऽन्ना॒दो॑ ऽभवत् ।
Sentence: 7    य ए॒वं वि॒द्वांसः॑ सप्तदशरा॒त्रमास॑ते ऽन्ना॒दा ए॒व भ॑वन्ति
Sentence: 8    पञ्चा॒हो भ॑वति
Sentence: 9    पञ्च॒ वा ऋ॒तवः॑ संवत्स॒रस् ।
Sentence: 10    ऋ॒तुष्वे॒व सं॑वत्स॒रे प्रति॑ तिष्ठन्ति ।
Sentence: 11    अथो॒ पञ्चा॑क्षरा प॒ङ्क्तिः
Sentence: 12    पाङ्क्तो॑ य॒ज्ञस् ।
Sentence: 13    यज्ञ॑मे॒वाव॑ रुन्धते ।
Sentence: 14    अस॑त्त्रं॒ वा ए॒तत् ।।

Verse: 2 
Sentence: 1    यद॑छन्दो॒मम् ।
Sentence: 2    यच्छ॑न्दो॒मा भव॑न्ति॒ तेन॑ स॒त्त्रम् ।
Sentence: 3    दे॒वता॑ ए॒व पृष्ठै॒रव॑ रुन्धते प॒शूञ्छ॑न्दोमैस् ।
Sentence: 4    ओज॑स्ये॒व वी॒र्ये॑ प॒शुषु॒ प्रति॑ तिष्ठन्ति
Sentence: 5    सप्तदशरा॒त्रो भ॑वति
Sentence: 6    सप्तद॒शः प्र॒जाप॑तिः
Sentence: 7    प्र॒जाप॑ते॒राप्त्यै॑ ।
Sentence: 8    अ॑तिरा॒त्राव॒भितो॑ भवतस् ।
Sentence: 9    अ॒न्नाद्य॑स्य॒ परि॑गृहीत्यै ।।

Paragraph: 9 
Verse: 1 
Sentence: 1    सा वि॒राड्वि॒क्रम्या॑तिष्ठ॒द्ब्रह्म॑णा दे॒वेष्वन्ने॒नासु॑रेषु
Sentence: 2    ते दे॒वा अ॑कामयन्त ।
Sentence: 3    उ॒भयं॒ सं वृ॑ञ्जीमहि॒ ब्रह्म॒ चान्नं॒ चेति
Sentence: 4    त ए॒ता विं॑श॒तिं रात्री॑रपश्यन्
Sentence: 5    ततो वै॒ त उ॒भयं॒ सम॑वृञ्जत॒ ब्रह्म॒ चान्नं॑ च ब्रह्मवर्च॒सिनो॑ ऽन्ना॒दा अ॑भवन्
Sentence: 6    य ए॒वं वि॒द्वांस॑ ए॒ता आस॑त उ॒भय॑मे॒व सं वृ॑ञ्जते॒ ब्रह्म॒ चान्नं॑ च ।।

Verse: 2 
Sentence: 1    ब्र॑ह्मवर्च॒सिनो॑ ऽन्ना॒दा भ॑वन्ति
Sentence: 2    द्वे वा ए॒ते वि॒राजौ
Sentence: 3    तयो॑रे॒व नाना॒ प्रति॑ तिष्ठन्ति
Sentence: 4    विं॒शो वै॒ पुरु॑षो॒ दश॒ हस्त्या॑ अ॒ङ्गुल॑यो॒ दश॑ पद्यास् ।
Sentence: 5    यावा॑ने॒व पुरु॑ष॒स्तमा॒प्त्वोत्ति॑ष्ठन्ति
Sentence: 6    ज्योतिर्गौ॒रायु॒रिति॑ त्र्य॒हा भ॑वन्ति ।
Sentence: 7    इ॒यं वाव ज्योति॑र॒न्तरि॑क्षं गौर॒सावायु॑स् ।
Sentence: 8    इ॒माने॒व लो॒कान॒भ्यारो॑हन्ति ।
Sentence: 9    अ॑भिपू॒र्वं त्र्य॒हा भ॑वन्ति ।
Sentence: 10    अ॑भिपू॒र्वमे॒व सु॑व॒र्गम् ।।

Verse: 3 
Sentence: 1    लो॒कम॒भ्यारो॑हन्ति
Sentence: 2    यद॒न्यतः॑ पृ॒ष्ठानि
Sentence: 3    मध्ये॑ पृ॒ष्ठानि॑ भवन्ति सविवध॒त्वाय॑ ।।
Sentence: 4    ओजो वै वी॒र्य॑म्पृ॒ष्ठानि॑ ।
Sentence: 5    ओज॑ ए॒व वी॒र्य॑म्मध्य॒तो द॑धते
Sentence: 6    बृहद्रथंत॒राभ्यां॑ यन्ति ।
Sentence: 7    इ॒यं वाव र॑थंत॒रमसौ बृ॒हत् ।
Sentence: 8    आ॒भ्यामे॒व य॑न्ति ।
Sentence: 9    अथो॑ अ॒नयो॑रे॒व प्रति॑ तिष्ठनि ।
Sentence: 10    ए॒ते वै॑ य॒ज्ञस्या॑ञ्ज॒साय॑नी स्रु॒ती
Sentence: 11    ताभ्या॑मे॒व सु॑व॒र्गं लो॒कं य॑न्ति
Sentence: 12    परा॑ञ्चो॒ वा ए॒ते सु॑व॒र्गं लो॒कम॒भ्यारो॑हन्ति॒ ये प॑रा॒चीना॑नि पृ॒ष्ठान्यु॑प॒यन्ति
Sentence: 13    प्र॒त्यञ्त्र्य॒हो भ॑वति प्र॒त्यव॑रूढ्या॒ अथो॒ प्रति॑ष्ठियै ।
Sentence: 14    उ॒भयो॑र्लो॒कयो॑रृ॒द्ध्वोत्ति॑ष्ठन्ति ।
Sentence: 15    अ॑तिरा॒त्राव॒भितो॑ भवतस् ।
Sentence: 16    ब्र॑ह्मवर्च॒सस्या॒न्नाद्य॑स्य॒ परि॑ गृहीत्यै ।।

Paragraph: 10 
Verse: 1 
Sentence: 1    अ॒साव॑ आदि॒त्यो॒ ऽस्मिँ लो॒क आ॑सीत्
Sentence: 2    तं दे॒वाः पृष्ठैः परि॒गृह्य॑ सुव॒र्गं लो॒कम॑गमयन्
Sentence: 3    परै॑र॒वस्ता॒त्पर्य॑गृह्णन्दिवाकी॒र्त्ये॑न सुव॒र्गे लो॒के प्रत्य॑स्थापयन्
Sentence: 4    परैः॑ प॒रस्ता॒त्पर्य॑गृह्णन्पृष्ठैरु॒पावा॑रोहन् ।
Sentence: 5    स वा अ॒सावा॑दि॒त्यो॒ ऽमुष्मिँ॑ लो॒के परै॑रुभ॒यतः॒ परि॑गृहीतस् ।
Sentence: 6    यत्पृ॒ष्ठानि॒ भव॑न्ति सुव॒र्गमे॒व तै॑र्लो॒कं यज॑माना यन्ति
Sentence: 7    परै॑र॒वस्ता॒त्परि॑ गृह्णन्ति दिवाकी॒र्त्ये॑न ।।

Verse: 2 
Sentence: 1    सु॑व॒र्गे लो॒के प्रति॑ तिष्ठन्ति
Sentence: 2    परैः॑ प॒रस्ता॒त्परि॑ गृह्णन्ति पृष्ठैरु॒पाव॑रोहन्ति
Sentence: 3    यत्परे॑ प॒रस्ता॒न्न स्युः परा॑सुव॒र्गाल्लो॒कान्निष्प॑द्येरन्ञ्चः
Sentence: 4    यद॒वस्ता॒न्न स्युः प्र॒जा निर्द॑हेयुस् ।
Sentence: 5    अ॒भितो॑ दिवाकी॒र्त्य॒म्परः॑सामानो भवन्ति
Sentence: 6    सुव॒र्ग एवैनाँ लो॒क उ॑भ॒यतः॒ परि॑ गृह्णन्ति
Sentence: 7    यज॑माना वै दिवाकी॒र्त्य॑म् ।
Sentence: 8    सं॑वत्स॒रः परः॑सामानस् ।
Sentence: 9    अ॒भितो॑ दिवाकी॒र्त्य॒म्परः॑सामानो भवन्ति
Sentence: 10    संवत्स॒र ए॒वोभ॒यतः॑ ।।

Verse: 3 
Sentence: 1    प्रति॑ तिष्ठन्ति
Sentence: 2    पृ॒ष्ठं वै॑ दिवाकी॒र्त्य॑म्पा॒र्श्वे परः॑सामानस् ।
Sentence: 3    अ॒भितो॑ दिवाकी॒र्त्य॒म्परः॑सामानो भवन्ति
Sentence: 4    तस्मा॒द्भितः॑ पृ॒ष्ठम्पा॒र्श्वे
Sentence: 5    भूयि॑ष्ठा॒ ग्रहा॑ गृह्यन्ते
Sentence: 6    भूयि॑ष्ठं शस्यते
Sentence: 7    य॒ज्ञस्यै॒व तन्म॑ध्य॒तो ग्र॒न्थिं ग्र॑थ्न॒न्त्यवि॑स्रंसाय
Sentence: 8    स॒प्त गृ॑ह्यन्ते
Sentence: 9    स॒प्त वै॑ शीर्ष॒ण्याः॑ प्रा॒णाः
Sentence: 10    प्रा॒णाने॒व यज॑मानेषु दधति
Sentence: 11    यत्प॑रा॒चीना॑नि पृ॒ष्थानि॒ भव॑न्त्य॒मुमे॒व तै॑र्लो॒कम॒भ्यारो॑हन्ति
Sentence: 12    यदि॒मं लो॒कं न ।।

Verse: 4 
Sentence: 1    प्र॑त्यव॒रोहे॑यु॒रुद्वा॒ माद्ये॑यु॒र्यज॑मानाः॒ प्र वा॑ मीयेरन्
Sentence: 2    यत्प्र॑ती॒चीना॑नि पृ॒ष्ठानि॒ भव॑न्ति ।
Sentence: 3    इ॒ममे॒व तै॑र्लो॒कम्प्र॒त्यव॑रोहन्ति ।
Sentence: 4    अथो॑ अ॒स्मिन्ने॒व लो॒के प्रति॑ तिष्ठ॒न्त्यनु॑न्मादाय ।
Sentence: 5    इन्द्रो॒ वा अप्र॑तिष्ठित आसीत्
Sentence: 6    स प्र॒जाप॑ति॒मुपा॑धावत्
Sentence: 7    तस्मा॑ ए॒तमे॑कविंशतिरा॒त्रम्प्राय॑छत्
Sentence: 8    तमाह॑रत्
Sentence: 9    तेना॑यजत
Sentence: 10    ततो वै॒ स प्रत्य॑तिष्ठत् ।
Sentence: 11    ये भु॑या॒जिनो ऽप्र॑तिष्ठिताः ।।

Verse: 5 
Sentence: 1    स्युस्त ए॑कविंशतिरा॒त्रमा॑सीरन्
Sentence: 2    द्वाद॑श॒ मासाः॒ पञ्च॒र्तव॒स्त्रय॑ इ॒मे लो॒का अ॒सावा॑दि॒त्य ए॑कविं॒शस् ।
Sentence: 3    ए॒ताव॑न्तो वै देवलो॒कास्
Sentence: 4    तेष्वे॒व य॑थापू॒र्वम्प्रति॑ तिष्ठन्ति ।
Sentence: 5    अ॒सावा॑दि॒त्यो न व्य॑रोचत
Sentence: 6    स प्र॒जाप॑ति॒मुपा॑धावत्
Sentence: 7    तस्मा॑ ए॒तमे॑कविंशति रा॒त्रम्प्राय॑छत्
Sentence: 8    तमाह॑रत्
Sentence: 9    तेना॑यजत
Sentence: 10    ततो वै॒ सो॑ ऽरोचत
Sentence: 11    य ए॒वं वि॒द्वांस॑ एकविंशतिरा॒त्रमास॑ते॒ रोच॑न्त ए॒व ।
Sentence: 12    ए॑क्विंशतिरा॒त्रो भ॑वति
Sentence: 13    रुग्वा ए॑कविं॒शस् ।
Sentence: 14    रुच॑मे॒व ग॑छ॒न्त्यथो॑ प्रति॒ष्ठामे॒व
Sentence: 15    प्र॑ति॒ष्ठा ह्ये॑कविं॒शस् ।
Sentence: 16    अ॑तिरा॒त्राव॒भितो॑ भवतो ब्रह्मवर्च॒सस्य॒ परि॑गृहीत्यै ।।

Paragraph: 11 
Verse: 1 
Sentence: 1=a    अ॒र्वाङ्य॒ज्ञः सं क्रा॑मत्व॒मुष्मा॒दधि॒ माम॒भि । ऋषी॑णां॒ यः पु॒रोहि॑तः ।।
Sentence: 2=b    निर्दे॑वं॒ निर्वी॑रं कृ॒त्वा विष्क॑न्धं॒ तस्मि॑न्हीयतां॒ यो॒ ऽस्मान्द्वेष्टि॒ शरी॑रं यज्ञशम॒लं कुसी॑दं॒ तस्मि॑न्त्सीदतु॒ यो॒ ऽस्मान्द्वेष्टि॑ ।।
Sentence: 3=c    यज्ञ॑ य॒ज्ञस्य॒ यत्तेज॒स्तेन॒ सं क्रा॑म॒ माम॒भि । ब्रा॑ह्म॒णानृ॒त्विजो॑ दे॒वान्य॒ज्ञस्य॒ तप॑सा॒ ते स॑वा॒हमा हु॑वे ।।
Sentence: 4=d    इ॒ष्टेन॑ प॒क्वमुप॑ ।।

Verse: 2 
Sentence: 1    ते॑ हुवे स॒वाहम् । सं ते॑ वृञ्जे सुकृ॒तं सम्प्र॒जाम्प॒शून् ।।
Sentence: 2=e    प्रै॒षान्त्सा॑मिधे॒नीरा॑घा॒रावाज्य॑भागा॒वाश्रु॑तम्प्र॒त्याश्रु॑त॒मा शृ॑णामि ते । प्र॑याजानूया॒जान्त्स्वि॑ष्ट॒कृत॒मिडा॑मा॒शिष॒ आ वृ॑ञ्जे॒ सुवः॑ ।।
Sentence: 3=f    अ॒ग्निनेन्द्रे॑ण॒ सोमे॑न॒ सर॑स्वत्या॒ विष्णु॑ना दे॒वता॑भिः । या॑ज्यानुवा॒क्या॑भ्या॒मुप॑ ते हुवे स्वा॒हं य॒ज्ञमा द॑दे ते॒ वष॑ट्कृतम् ।।
Sentence: 4=g    स्तु॒तं श॒स्त्रम्प्र॑तिग॒रं ग्रह॒मिडा॑मा॒शिषः॑ ।।

Verse: 3 
Sentence: 1    आ वृ॑ञ्जे॒ सुवः॑ । प॑त्नीसंया॒जानुप॑ ते हुवे सवा॒हं स॑मिष्टय॒जुरा द॑दे॒ तव॑ ।।
Sentence: 2=h    प॒शून्त्सु॒तम्पु॑रो॒डाशा॒न्त्सव॑ना॒न्योत य॒ज्ञम् । दे॒वान्त्सेन्द्रा॒नुप॑ ते हुवे सवा॒हम॒ग्निमु॑खा॒न्त्सोम॑वतो॒ ये च॒ विश्वे॑ ।।

Paragraph: 12 
Verse: 1 
Sentence: 1    भू॒तम्भव्य॑म्भवि॒ष्यद्वष॒ट्स्वाहा॒ नम॑स् ।
Sentence: 2    ऋक्साम॒ यजु॒र्वष॒ट्स्वाहा॒ नम॑स् ।
Sentence: 3    गा॑य॒त्री त्रि॒ष्टुब्जग॑ती॒ वष॒ट्स्वाहा॒ नमः
Sentence: 4    पृथि॒व्य॒न्तरि॑क्षं द्यौ॒र्वष॒ट्स्वाहा॒ नम॑स् ।
Sentence: 5    अ॒ग्निर्वा॒युः सूर्यो॒ वष॒ट्स्वाहा॒ नमः
Sentence: 6    प्रा॒णो व्या॒नो॑ ऽपा॒नो वष॒ट्स्वाहा॒ नम॑स् ।
Sentence: 7    अन्नं॑ कृ॒षिर्वृष्टि॒र्वष॒ट्स्वाहा॒ नमः
Sentence: 8    पि॒ता पु॒त्रः पौ॑त्रो॒ वष॒ट्स्वाहा॒ नम॑स् ।
Sentence: 9    भूर्भुवः॒ सुव॒र्वष॒ट्स्वाहा॒ नमः॑ ।।

Paragraph: 13 
Verse: 1 
Sentence: 1=a    आ मे॑ गृ॒हा भ॑व॒न्त्वा प्र॒जा म॒ आ मा॑ य॒ज्ञो वि॑शतु वी॒र्या॑वान् । आपो॑ दे॒वीर्य॒ज्ञिया॒ मा वि॑शन्तु स॒हस्र॑स्य मा भू॒मा मा प्र हा॑सीत् ।।
Sentence: 2=b    आ मे॒ ग्रहो॑ भव॒त्वा पु॑रो॒रुक्स्तु॑तश॒स्त्रे मा वि॑शतां स॒मीची॑ । आ॑दि॒त्या रु॒द्रा वस॑वो मे सद॒स्याः॑ स॒हस्र॑स्य मा भू॒मा मा प्र हा॑सीत् ।।
Sentence: 3=c    आ मा॑ग्निष्टो॒मो वि॑शतू॒क्थ्य॑श्चातिरा॒त्रो मा वि॑शत्वापिशर्व॒रः । तिरोअह्निया॒ मा सुहु॑ता॒ आ वि॑शन्तु स॒हस्र॑स्य मा भू॒मा मा॒ प्र हा॑सीत् ।।

Paragraph: 14 
Verse: 1 
Sentence: 1    अ॒ग्निना॒ तपो ऽन्व॑भवत् ।
Sentence: 2    वा॒चा ब्रह्म
Sentence: 3    म॒णिना॑ रू॒पाणि॑ ।
Sentence: 4    इन्द्रे॑ण दे॒वान्
Sentence: 5    वाते॑न प्रा॒णान् ।
Sentence: 6    सूर्ये॑ण॒ द्याम् ।
Sentence: 7    च॒न्द्रम॑सा॒ नक्ष॑त्राणि
Sentence: 8    य॒मेन॑ पि॒तृन्
Sentence: 9    राज्ञा॑ मनु॒ष्या॑न्
Sentence: 10    प॒लेन॑ नादे॒यान्
Sentence: 11    अजग॒रेण॑ स॒र्पान्
Sentence: 12    व्या॒घ्रेणा॑र॒ण्यान्प॒शून् ।
Sentence: 13    श्ये॒नेन॑ पत॒त्रिण॑स् ।
Sentence: 14    वृष्णाश्वा॑न्
Sentence: 15    ऋष॒भेण॒ गास् ।
Sentence: 16    ब॒स्तेना॒जास् ।
Sentence: 17    वृ॒ष्णिनावी॑स् ।
Sentence: 18    व्री॒हिणा॑न्नानि
Sentence: 19    यवेनौषधीस् ।
Sentence: 20    न्य॒ग्रोधे॑न॒ वन॒स्पती॑न्
Sentence: 21    उदु॒म्बरे॒णोर्ज॑म् ।
Sentence: 22    गा॑यत्रि॒या छन्दां॑सि
Sentence: 23    त्रि॒वृता॒ स्तोमा॑न्
Sentence: 24    ब्राह्म॒णेन॒ वाच॑म् ।।

Paragraph: 15 
Verse: 1 
Sentence: 1    स्वाहा॒धिमाधी॑ताय॒ स्वाहा॒ स्वाहाधी॑तम्
Sentence: 2    मन॑से॒ स्वाहा॒ स्वाहा॒ मनः
Sentence: 3    प्र॒जाप॑तये॒ स्वाहा
Sentence: 4    काय॒ स्वाहा
Sentence: 5    कस्मै॒ स्वाहा
Sentence: 6    कत॒मस्मै॒ स्वाहा॑ ।
Sentence: 7    अदि॑त्यै॒ स्वाहा॑ ।
Sentence: 8    अदि॑त्यै मह्यै॒ स्वाहा॑ ।
Sentence: 9    अदि॑त्यै सुमृडी॒कायै॒ स्वाहा
Sentence: 10    सर॑स्वत्यै॒ स्वाहा
Sentence: 11    सर॑स्वत्यै बृहत्यै॒ स्वाहा
Sentence: 12    सर॑स्वत्यै पाव॒कायै॒ स्वाहा
Sentence: 13    पू॒ष्णे स्वाहा
Sentence: 14    पू॒ष्णे प्र॑प॒थ्या॑य॒ स्वाहा
Sentence: 15    पू॒ष्णे न॒रंधि॑षाय॒ स्वाहा
Sentence: 16    त्वष्ट्रे॒ स्वाहा
Sentence: 17    त्वष्ट्रे॑ तु॒रीपा॑य॒ स्वाहा
Sentence: 18    त्वष्ट्रे॑ पुरु॒रूपा॑य॒ स्वाहा
Sentence: 19    विष्ण॑वे॒ स्वाहा
Sentence: 20    विष्ण॑वे निखुर्य॒पाय॒ स्वाहा
Sentence: 21    विष्ण॑वे निभूय॒पाय॒ स्वाहा॑ ।।

Paragraph: 16 
Verse: 1 
Sentence: 1    द॒द्भ्यः स्वाहा
Sentence: 2    हनू॑भ्यां स्वाह्।^ स्वाहा
Sentence: 3    ।ओष्ठा॑भ्यां॒ स्वाहा
Sentence: 4    मुखा॑य॒ स्वाहा
Sentence: 5    नासि॑काभ्यां॒ स्वाहा॑ ।
Sentence: 6    अ॒क्षीभ्यां॒ स्वाहा
Sentence: 7    कर्णा॑भ्यां॒ स्वाहा
Sentence: 8    पा॒र इ॒क्षवो॑ ऽवा॒र्ये॑भ्यः॒ पक्ष्म॑भ्यः॒ स्वाहा॑ ।
Sentence: 9    अ॑वा॒र इ॒क्षवः॑ पा॒र्ये॑भ्यः॒ पक्ष्म॑भ्यः॒ स्वाहा
Sentence: 10    शी॒र्ष्णे स्वाहा
Sentence: 11    भ्रू॒भ्यां स्वाहा
Sentence: 12    ल॒लाटा॑य॒ स्वाहा
Sentence: 13    मू॒र्ध्ने स्वाहा
Sentence: 14    म॒स्तिष्का॑य॒ स्वाहा
Sentence: 15    केशे॑भ्यः॒ स्वाहा
Sentence: 16    वहा॑य॒ स्वाहा
Sentence: 17    ग्री॒वाभ्यः॒ स्वाहा
Sentence: 18    स्क॒न्धेभ्यः॒ स्वाहा
Sentence: 19    कीक॑साभ्यः॒ स्वाहा
Sentence: 20    पृ॒ष्टीभ्यः॒ स्वाहा
Sentence: 21    पाज॒स्या॑य॒ स्वाहा
Sentence: 22    पा॒र्श्वाभ्यां॒ स्वाहा॑ ।।

Verse: 2 
Sentence: 1    अंसा॑भ्यां॒ स्वाहा
Sentence: 2    दो॒षभ्यां॒ स्वाहा
Sentence: 3    बा॒हुभ्यां॒ स्वाहा
Sentence: 4    जङ्घा॑भ्यां॒ स्वाहा
Sentence: 5    श्रोणी॑भ्यां॒ स्वाहा॑ ।
Sentence: 6    ऊ॒रुभ्यां॒ स्वाहा॑ ।
Sentence: 7    अ॑ष्ठी॒वद्भ्यां॒ स्वाहा
Sentence: 8    जङ्घा॑भ्यां॒ स्वाहा
Sentence: 9    भ॒सदे॒ स्वाहा
Sentence: 10    शिख॒ण्डेभ्यः॒ स्वाहा
Sentence: 11    वाल॒धाना॑य॒ स्वाहा॑ ।
Sentence: 12    आ॒ण्डाभ्यां॒ स्वाहा
Sentence: 13    शेपा॑य॒ स्वाहा
Sentence: 14    रेत॑से॒ स्वाहा
Sentence: 15    प्र॒जाभ्यः॒ स्वाहा
Sentence: 16    प्र॒जन॑नाय॒ स्वाहा
Sentence: 17    प॒द्भ्यः स्वाहा
Sentence: 18    श॒पेभ्यः॒ स्वाहा
Sentence: 19    लोम॑भ्यः॒ स्वाहा
Sentence: 20    त्व॒चे स्वाहा
Sentence: 21    लोहि॑ताय॒ स्वाहा
Sentence: 22    मां॒साय॒ स्वाहा
Sentence: 23    स्नाव॑भ्यः॒ स्वाहा॑ ।
Sentence: 24    अ॒स्थभ्यः॒ स्वाहा
Sentence: 25    म॒ज्जभ्यः॒ स्वाहा॑ ।
Sentence: 26    अङ्गे॑भ्यः॒ स्वाहा॑ ।
Sentence: 27    आ॒त्मने॒ स्वाहा
Sentence: 28    सर्व॑स्मै॒ स्वाहा॑ ।।

Paragraph: 17 
Verse: 1 
Sentence: 1    अ॑ञ्ज्ये॒ताय॒ स्वाहा॑ ।
Sentence: 2    अ॑ञ्जिस॒क्थाय॒ स्वाहा
Sentence: 3    शिति॒पदे॒ स्वाहा
Sentence: 4    शिति॑ककुदे॒ स्वाहा
Sentence: 5    शिति॒रन्ध्रा॑य॒ स्वाहा
Sentence: 6    शितिपृ॒ष्ठाय॒ स्वाहा
Sentence: 7    शि॒त्यंसा॑य॒ स्वाहा
Sentence: 8    पुष्प॒कर्णा॑य॒ स्वाहा
Sentence: 9    शि॒त्योष्ठा॑य॒ स्वाहा
Sentence: 10    शिति॒भ्रवे॒ स्वाहा
Sentence: 11    शिति॑भसदे॒ स्वाहा
Sentence: 12    श्वे॒तानू॑काशाय॒ स्वाहा॑ ।
Sentence: 13    अ॒ञ्जये॒ स्वाहा
Sentence: 14    ल॒लामा॑य॒ स्वाहा॑ ।
Sentence: 15    असि॑तज्ञवे॒ स्वाहा
Sentence: 16    कृष्णै॒ताय॒ स्वाहा
Sentence: 17    रोहितै॒ताय॒ स्वाहा॑ ।
Sentence: 18    अ॑रुणै॒ताय॒ स्वाहा॑ ।
Sentence: 19    ई॒दृशा॑य॒ स्वाहा
Sentence: 20    की॒दृशा॑य॒ स्वाहा
Sentence: 21    ता॒दृशा॑य॒ स्वाहा
Sentence: 22    स॒दृशा॑य॒ स्वाहा
Sentence: 23    विस॑दृशाय॒ स्वाहा
Sentence: 24    सुस॑दृ॒शाय॒ स्वाहा
Sentence: 25    रू॒पाय॒ स्वाहा
Sentence: 26    सर्व॑स्मै॒ स्वाहा॑ ।।

Paragraph: 18 
Verse: 1 
Sentence: 1    कृ॒ष्णाय॒ स्वाहा
Sentence: 2    श्वे॒ताय॒ स्वाहा
Sentence: 3    पि॒शंगा॑य॒ स्वाहा
Sentence: 4    सा॒रंगा॑य॒ स्वाहा॑ ।
Sentence: 5    अ॑रु॒णाय॒ स्वाहा
Sentence: 6    गौ॒राय॒ स्वाहा
Sentence: 7    ब॒भ्रवे॒ स्वाहा
Sentence: 8    नकु॒लाय॒ स्वाहा
Sentence: 9    रोहि॑ताय॒ स्वाहा
Sentence: 10    शोणा॑य॒ स्वाहा
Sentence: 11    श्या॒वाय॒ स्वाहा
Sentence: 12    श्या॒माय॒ स्वाहा
Sentence: 13    पाक॒लाय॒ स्वाहा
Sentence: 14    सुरू॒पाय॒ स्वाहा॑ ।
Sentence: 15    अनु॑रूपाय॒ स्वाहा
Sentence: 16    विरू॑पाय॒ स्वाहा
Sentence: 17    सरू॑पाय॒ स्वाहा
Sentence: 18    प्रति॑रूपाय॒ स्वाहा
Sentence: 19    श॒बला॑य॒ स्वाहा
Sentence: 20    कम॒लाय॒ स्वाहा
Sentence: 21    पृश्न॑ये॒ स्वाहा
Sentence: 22    पृश्निस॒क्थाय॒ स्वाहा
Sentence: 23    सर्व॑स्मै॒ स्वाहा॑ ।।

Paragraph: 19 
Verse: 1 
Sentence: 1    ओष॑धीभ्यः॒ स्वाहा
Sentence: 2    मूले॑भ्यः॒ स्वाहा
Sentence: 3    तूले॑भ्यः॒ स्वाहा
Sentence: 4    काण्डे॑भ्यः॒ स्वाहा
Sentence: 5    वल्शे॑भ्यः॒ स्वाहा
Sentence: 6    पुष्पे॑भ्यः॒ स्वाहा
Sentence: 7    पले॑भ्यः॒ स्वाहा
Sentence: 8    गृही॒तेभ्यः॒ स्वाहा॑ ।
Sentence: 9    अगृ॑हीतेभ्यः॒ स्वाहा॑ ।
Sentence: 10    अव॑पन्नेभ्यः॒ स्वाहा
Sentence: 11    शया॑नेभ्यः॒ स्वाहा
Sentence: 12    सर्व॑स्मै॒ स्वाहा॑ ।।

Paragraph: 20 
Verse: 1 
Sentence: 1    वन॒स्पति॑भ्यः॒ स्वाहा
Sentence: 2    मूले॑भ्यः॒ स्वाहा
Sentence: 3    तूले॑भ्यः॒ स्वाहा
Sentence: 4    स्कन्धो॑भ्यः॒ स्वाहा
Sentence: 5    शाखा॑भ्यः॒ स्वाहा
Sentence: 6    प॒र्णेभ्यः॒ स्वाहा
Sentence: 7    पुष्पे॑भ्यः॒ स्वाहा
Sentence: 8    पले॑भ्यः॒ स्वाहा
Sentence: 9    गृही॒तेभ्यः॒ स्वाहा॑ ।
Sentence: 10    अगृ॑हीतेभ्यः॒ स्वाहा॑ ।
Sentence: 11    अव॑पन्नेभ्यः॒ स्वाहा
Sentence: 12    शया॑नेभ्यः॒ स्वाहा
Sentence: 13    शि॒ष्टाय॒ स्वाहा॑ ।
Sentence: 14    अति॑शिष्टाय॒ स्वाहा
Sentence: 15    परि॑शिष्टाय॒ स्वाहा
Sentence: 16    संशि॑ष्टाय॒ स्वाहा॑ ।
Sentence: 17    उच्छि॑ष्टाय॒ स्वाहा
Sentence: 18    रि॒क्ताय॒ स्वाहा॑ ।
Sentence: 19    अरि॑क्ताय॒ स्वाहा
Sentence: 20    प्ररि॑क्ताय॒ स्वाहा
Sentence: 21    संरि॑क्ताय॒ स्वाहा॑ ।
Sentence: 22    उद्रि॑क्ताय॒ स्वाहा
Sentence: 23    सर्व॑स्मै॒ स्वाहा॑ ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.