TITUS Texts: White Yajur-Veda: Brhad-Aranyaka-Upanisad

TITUS
White Yajur-Veda: Brhad-Aranyaka-Upanisad
Part No. 4

Paragraph: 4    {= ŚBM 14.4.2.1-31}    {= ŚBK 16.3.4.1-17}
Verse: MK1
Sentence: a    आ॒त्मै॒वेदम॒ग्र आसीत्पु॒रुषविधः.
   आत्मा एव इद॒म् अ॒ग्रे आसीत् पु॒रुषविधस्

Sentence: b    सो ऽनुवी॒क्ष्य॒ नान्य॒दात्म॒नो ऽपश्यत्.
   स॒स् अनुवी॒क्ष्य न अन्य॒द् आत्म॒नस् अपश्यत्

Sentence: c    सो ऽह॒मस्मीत्य॒ग्रे व्या॒हरत्.
   स॒स् अह॒म् अस्मि इ॒त्य् अ॒ग्रे व्या॒हरत्

Sentence: d    त॒तो ऽहंना॒माभवत्.
   त॒तस् अहंना॒म अभवत्

Sentence: e    त॒स्माद॒प्येतर्ह्या॒मन्त्रितो:
   त॒स्माद् अ॒पि एत॒र्हि आ॒मन्त्रितस्

Sentence: f       ऽह॒मयमि॒त्येवा॒ग्र उक्त्वा॒थान्यन्ना॒म प्र॒ब्रूते य॒दस्य भ॒वति.
      अह॒म् अय॒म् इ॒ति एव अ॒ग्रे उक्त्वा अ॒थ अन्य॒द् ना॒म प्र॒ब्रूते य॒द् अस्य भ॒वति

Verse: M2/K1
Sentence: a    स यत्पू॒र्वो ऽस्मात्स॒र्वस्मात्स॒र्वान्पाप्म॒न औ॒षत्,
   स य॒द् पू॒र्वस् अस्माद् स॒र्वस्माद् स॒र्वान् पाप्म॒नस् औ॒षत्

Sentence: b          त॒स्मात्पु॒रुष.
         त॒स्माद् पु॒रुषस्

Sentence: c    ओ॒षति ह वै स तं,
   ओ॒षति ह वै स त॒म्

Sentence: d          यो ऽस्मात्पू॒र्वो बु॒भूषति,
         य॒स् अस्माद् पू॒र्वस् बु॒भूषति

Sentence: e          य॒ एवं वे॒द.
         य॒स् एव॒म् वे॒द

Verse: M3/K2
Sentence: a    सो ऽबिभेत्;
   स॒स् अबिभेत्

Sentence: b       त॒स्मादेकाकी॒ बिभेति.
      त॒स्माद् एकाकी बिभेति

Sentence: c    स॒ हाय॒मीक्षां॒ चक्रे:
   स ह अय॒म् ईक्षा॒म् चक्रे

Sentence: d       यन्म॒दन्यन्ना॒स्ति,
      य॒द् म॒द् अन्य॒द् न अ॒स्ति

Sentence: e          क॒स्मान्नु॒ बिभेमी॒ति.
         क॒स्माद् नु बिभेमि इ॒ति

Sentence: f    त॒त ए॒वास्य भयं॒ वीयाय.
   त॒तस् एव अस्य भय॒म् वीयाय

Sentence: g    क॒स्माद्ध्य॒भेष्यद्,
   क॒स्माद् हि अ॒भेष्यत्

Sentence: h          द्विती॒याद्वै॒ भयं॒ भवति.
         द्विती॒याद् वै भय॒म् भवति

Verse: M4/K3
Sentence: a    स वै॒ नैव॒ रेमे;
   स वै न एव रेमे

Sentence: b       त॒स्मादेकाकी न॒ रमते.
      त॒स्माद् एकाकी न रमते

Sentence: c    स॒ द्विती॒यऐच्छत्.
   स द्विती॒यम् ऐच्छत्

Sentence: d    स॒ हैता॒वानास य॒था स्त्रीपुमाँ॒सौ सम्प॒रिष्वक्तौ.
   स ह एता॒वान् आस य॒था स्त्रीपुमाँ॒सौ सम्प॒रिष्वक्तौ

Verse: M5/K3
Sentence: a    स॒ इम॒मे॒वात्मानं द्वे॒धापातयत्;
   स इम॒म् एव आत्मा॒नम् द्वेधा अपातयत्

Sentence: b       त॒तः प॒तिश्च प॒त्नी चाभवतां.
      त॒तस् प॒तिस् च प॒त्नी च अभवताम्

Sentence: c    त॒स्मादिद॒मर्धबृगल॒मिव स्व इ॒ति ह स्माह या॒ज्ञवल्क्यस्.
   त॒स्माद् इद॒म् अर्धबृगल॒म् इव स्वस् इ॒ति ह स्म अह या॒ज्ञवल्क्यस्

Sentence: d    त॒स्मादय॒माकाशः॒ स्त्रिया॒ पूर्य॒त एव.
   त॒स्माद् अय॒म् आकाश॒स् स्त्रिया पूर्य॒ते एव

Sentence: e    ताँ स॒मभवत्:
   ता॒म् स॒मभवत्

Sentence: f       त॒तो मनु॒ष्या अजायन्त.
      त॒तस् मनु॒ष्यास् अजायन्त

Verse: M6/K4
Sentence: a    सो हेय॒मीक्षां॒ चक्रे:
   सा उ ह इय॒म् ईक्षा॒म् चक्रे

Sentence: b       कथं नु॒ मात्म॒न एव॒ जनयित्वा स॒म्भवति.
      कथ॒म् नु मा आत्म॒नस् एव जनयित्वा स॒म्भवति

Sentence: c    ह॒न्त तिरो॒ ऽसानी॒ति.
   ह॒न्त तिर॒स् अ॒सानि इ॒ति

Verse: M7/K4
Sentence: a    सा गौर॒भवद्,
   सा गौ॒स् अ॒भवत्

Sentence: b          वृषभ इ॒तरस्;
         वृषभ॒स् इ॒तरस्

Sentence: c       ताँ स॒मे॒वाभवत्:
      ताम् स॒म् एव अभवत्

Sentence: d       त॒तो गा॒वो ऽजायन्त.
      त॒तस् गा॒वस् अजायन्त

Verse: M8/K4
Sentence: a    व॒डवे॒तरा॒भवद्,
   व॒डवा इ॒तरा अ॒भवत्

Sentence: b          अश्ववृष इ॒तरो;
         अश्ववृष॒स् इ॒तरस्

Sentence: c       गर्दभी॒तरा,
      गर्दभी इ॒तरा

Sentence: d          गर्दभ इ॒तरस्;
         गर्दभ॒स् इ॒तरस्

Sentence: e       ताँ स॒मे॒वाभवत्:
      ता॒म् स॒म् एव अभवत्

Sentence: f       त॒त ए॒कशपमजायत.
      त॒त ए॒कशपम् अजायत

Verse: M9/K4
Sentence: a    अजे॒तरा॒भवद्,
   अजा इ॒तरा अभवत्

Sentence: b          बस्त इ॒तरो;
         बस्त॒स् इ॒तरस्

Sentence: c       ऽविरि॒तरा,
      अवि॒स् इ॒तरा

Sentence: d          मेष इ॒तरस्;
         मेष॒स् इ॒तरस्

Sentence: e       ताँ स॒मे॒वाभवत्:
      ता॒म् स॒म् एव अभवत्

Sentence: f       त॒तो ऽजावयो ऽजायन्तैव॒मेव य॒दिदं कि॒ञ्च मिथुनमा॒ पिपी॒लिकाभ्यस्,
      त॒तस् अजाव॒यस् अजायन्त एव॒म् एव य॒द् इद॒म् कि॒ञ्च मिथुन॒म् आ पिपी॒लिकाभ्यस्

Sentence: g          तत्स॒र्वमसृजत.
         त॒द् स॒र्वम् असृजत

Verse: M10/K5
Sentence: a    सो ऽवेद्:
   स॒स् अवेत्

Sentence: b       अहं वाव सृ॒ष्टिरस्म्य्,
      अह॒म् वाव सृ॒ष्टिस् अस्मि

Sentence: c          अहँ॒ हीदँ स॒र्वम॒सृक्षी॒ति.
         अह॒म् हि इद॒म् स॒र्वम् अ॒सृक्षि इ॒ति

Sentence: d    त॒तः सृ॒ष्टिरभवत्.
   त॒तस् सृ॒ष्टिस् अभवत्

Sentence: e    सृ॒ष्ट्याँ हास्यैत॒स्यां भवति,
   सृ॒ष्ट्याम् ह अस्य एत॒स्याम् भवति

Sentence: f          य॒ एवं वे॒द.
         य॒स् एव॒म् वे॒द

Verse: M11/K6
Sentence: a    अथे॒त्य॒भ्यमन्थत्.
   अ॒थ इ॒ति अ॒भ्यमन्थत्

Sentence: b    स मु॒खाच्च यो॒नेर्ह॒स्ताभ्यां चाग्नि॒मसृजत.
   स मु॒खाद् च यो॒नेस् ह॒स्ताभ्याम् च अग्नि॒म् असृजत

Sentence: c    त॒स्मादेत॒दुभ॒यमलो॒मकमन्तर॒तो,
   त॒स्माद् एत॒द् उभ॒यम् अलो॒मकम् अन्तरत॒स्

Sentence: d          ऽलो॒मका हि यो॒निरन्तरतः.
         अलो॒मका हि यो॒निस् अन्तरत॒स्

Verse: M12/K6
Sentence: a    तद्य॒दिद॒माहुर्:
   त॒द् य॒द् इद॒म् आहुर्

Sentence: b       अमुं॒ यजामुं॒ यजेत्ये॒कैकं देव॒म्,
      अमु॒म् यज अमु॒म् यज इ॒ति ए॒कैकम् देव॒म्

Sentence: c          एत॒स्यैव सा वि॒सृष्टिर्,
         एत॒स्य एव सा वि॒सृष्टिस्

Sentence: d          एष॒ उ॒ ह्येव स॒र्वे देवा.
         एष॒स् उ हि एव स॒र्वे देवा॒स्

Verse: M13/K6
Sentence: a    अ॒थ यत्कि॒ञ्चेद॒मार्द्रं,
   अ॒थ य॒द् कि॒ञ्च इद॒म् आर्द्र॒म्

Sentence: b          तद्रे॒तसो ऽसृजत;
         त॒द् रे॒तसस् असृजत

Sentence: c       त॒दु सो॒म.
      त॒द् उ सो॒मस्

Sentence: d    एता॒वद्वा॒ इदँ स॒र्वम॒न्नं चै॒वान्नाद॒श्च;
   एता॒वत् वै इद॒म् स॒र्वम् अ॒न्नम् च एव अन्नद॒स् च

Sentence: e       सो॒म एवा॒न्नम्,
      सो॒म एव अ॒न्नम्

Sentence: f          अग्नि॒रन्नादः.
         अग्नि॒स् अन्नाद॒स्

Verse: M14/K6
Sentence: a    सैषा ब्र॒ह्मणो॒ ऽतिसृष्टिर्;
   सा एषा ब्र॒ह्मणस् अ॒तिसृष्टिस्

Sentence: b       यच्छ्रे॒यसो देवान॒सृजता॒थ यन्म॒र्त्यः स॒न्नमृ॒तानसृजत,
      य॒द् श्रे॒यसस् देवा॒न् अ॒सृजत अ॒थ य॒द् म॒र्त्यस् स॒न् अमृ॒तान् असृजत

Sentence: c          त॒स्माद॒तिसृष्टिर्,
         त॒स्माद् अ॒तिसृष्टिस्

Sentence: d          अ॒तिसृष्ट्याँ हास्यैत॒स्यां भवति,
         अ॒तिसृष्ट्याम् ह अस्य एत॒स्याम् भवति

Sentence: e          य॒ एवं वे॒द.
         य॒स् एव॒म् वे॒द

Verse: M15/K7
Sentence: a    त॒द्धेदं तर्ह्य॒व्याकृतमासीत्.
   त॒द् ह इद॒म् त॒र्हि अ॒व्याकृतम् आसीत्

Sentence: b    त॒न्नामरूपा॒भ्यामेव व्या॒क्रियतासौ ना॒माय॒मिदँ॒रूप इ॒ति.
   त॒द् नामरूपा॒भ्याम् एव व्या॒क्रियत असौ ना॒म अय॒म् इदँ॒रूपस् इ॒ति

Sentence: c    त॒दिदम॒प्येत॒र्हि नामरूपा॒भ्यामेव व्या॒क्रियत असौ ना॒माय॒मिदँ॒रूप इ॒ति.
   त॒द् इद॒म् अ॒पि एत॒र्हि नामरूपा॒भ्याम् एव व्या॒क्रियते असौ ना॒म अय॒म् इदँ॒रूपस् इ॒ति

Verse: M16/K7
Sentence: a    स॒ एष॒ इह प्र॒विष्ट आ॒ नखाग्रे॒भ्यो.
   स॒स् एष॒स् इह प्र॒विष्ट आ नखाग्रे॒भ्यस्

Sentence: b    य॒था क्षुरः॒ क्षुरधाने॒ ऽवहितः स्या॒द्,
   य॒था क्षुर॒स् क्षुरधाने अ॒वहितस् स्या॒त्

Sentence: c          विश्वम्भरो॒ वा विश्वम्भरकुलाये,
         विश्वम्भर॒स् वा विश्वम्भरकुलाये

Sentence: d          तं न प॒श्यन्त्य्,
         त॒म् न प॒श्यन्ति

Sentence: e          अ॒कृत्स्नो हि सः;
         अ॒कृत्स्नस् हि स॒स्

Verse: M17/K7
Sentence: a    प्राण॒न्नेव॒ प्राणो ना॒म भ॒वति,
   प्राण॒न् एव प्राण॒स् ना॒म भ॒वति

Sentence: b          व॒दन्वा॒क्,
         व॒दन् वा॒क्

Sentence: c          प॒श्यंश्च॒क्षुः,
         प॒श्यन् च॒क्षुस्

Sentence: d          शृण्वञ्छ्रो॒त्रं,
         शृण्व॒न् श्रो॒त्रम्

Sentence: e          मन्वानो म॒नस्.
         मन्वान॒स् म॒नस्

Sentence: f    ता॒न्यस्यैता॒नि कर्मनामा॒न्येव.
   ता॒नि अस्य एता॒नि कर्मनामा॒नि एव

Sentence: g    स यो॒ ऽत ए॒कैकमुपा॒स्ते,
   स य॒स् अ॒तस् ए॒कैकम् उपा॒स्ते

Sentence: h          न स॒ वेदा॒कृत्स्नो॒ ह्येषो॒ ऽत ए॒कैकेन भ॒वति.
         न स वेद अ॒कृत्स्नस् हि एष॒स् अ॒तस् ए॒कैकेन भ॒वति

Verse: M18/K7
Sentence: a    आत्मे॒त्येवो॒पासीता॒त्र॒ ह्येते स॒र्व ए॒कं भ॒वन्ति.
   आत्मा इ॒ति एव उ॒पासीत अ॒त्र हि एते स॒र्वे ए॒कम् भ॒वन्ति

Sentence: b    त॒देत॒त्पदनी॒यमस्य स॒र्वस्य य॒दय॒मा॒त्माने॒न॒ ह्येतत्स॒र्वं वे॒द.
   त॒द् एत॒द् पदनी॒यम् अस्य स॒र्वस्य य॒द् अय॒म् आत्मा अने॒न हि एत॒द् स॒र्वम् वे॒द

Sentence: c    य॒था ह वै॒ पदे॒नानुविन्दे॒द्,
   य॒था ह वै पदे॒न अनुविन्दे॒त्

Sentence: d          एवं॒ कीर्तिँ श्लो॒कं विन्दते,
         एव॒म् कीर्ति॒म् श्लो॒कम् विन्दते

Sentence: e          य॒ एवं वे॒द.
         य॒स् एव॒म् वे॒द

Verse: M19/K8
Sentence: a    त॒देतत्प्रे॒यः पुत्रा॒त्,
   त॒द् एत॒द् प्रे॒यस् पुत्रा॒द्

Sentence: b          प्रे॒यो वित्ता॒त्,
         प्रे॒यस् वित्ता॒द्

Sentence: c          प्रे॒यो ऽन्य॒स्मात्स॒र्वस्माद्,
         प्रे॒यस् अन्य॒स्माद् स॒र्वस्माद्

Sentence: d          अ॒न्तरतरं,
         अ॒न्तरतरम्

Sentence: e          य॒दय॒मात्मा.
         य॒द् अय॒म् आत्मा

Sentence: f    स॒ यो ऽन्य॒मात्म॒नः प्रियं॒ ब्रुवाणं॒ ब्रूया॒त्:
   स य॒स् अन्य॒म् आत्म॒नस् प्रिय॒म् ब्रुवाण॒म् ब्रूया॒त्

Sentence: g       प्रियँ॒ रोत्स्यती॒तीश्वरो॒ ह त॒थैव॒ स्याद्.
      प्रिय॒म् रोत्स्यति इ॒ति ईश्वर॒स् ह त॒था एव स्यात्

Sentence: h    आत्मा॒नमेव॒ प्रियमु॒पासीत.
   आत्मा॒नम् एव प्रिय॒म् उ॒पासीत

Sentence: i    स य॒ आत्मा॒नमेव॒ प्रिय॒मुपा॒स्ते,
   स य॒स् आत्मा॒नम् एव प्रिय॒म् उपा॒स्ते

Sentence: j          न॒ हास्य प्रियं॒ प्रमा॒युकं भवति.
         न ह अस्य प्रिय॒म् प्रमा॒युकम् भवति

Verse: M20/K9
Sentence: a    त॒दाहुर्:
   त॒द् आहुर्

Sentence: b       य॒द्ब्रह्मविद्य॒या स॒र्वं भविष्य॒न्तो मनु॒ष्या म॒न्यन्ते,
      य॒द् ब्रह्मविद्य॒या स॒र्वम् भविष्य॒न्तस् मनु॒ष्यास् म॒न्यन्ते

Sentence: c          कि॒मु तद्ब्र॒ह्मावेद्,
         कि॒म् उ त॒द् ब्र॒ह्म अवेत्

Sentence: d          य॒स्मात्तत्स॒र्वम॒भवदि॒ति.
         य॒स्माद् त॒द् स॒र्वम् अ॒भवत् इ॒ति

Verse: M21/K10
Sentence: a    ब्र॒ह्म वा॒ इदम॒ग्र आसीत्.
   ब्र॒ह्म वै इद॒म् अ॒ग्रे आसीत्

Sentence: b    त॒दात्मा॒नमे॒वावेद्:
   त॒द् आत्मा॒नम् एव अवेत्

Sentence: c       अहं ब्र॒ह्मास्मी॒ति;
      अह॒म् ब्र॒ह्म अस्मि इ॒ति

Sentence: d       त॒स्मात्तत्स॒र्वमभवत्.
      त॒स्माद् त॒द् स॒र्वम् अभवत्

Sentence: e    तद्यो॒यो देवा॒नां प्रत्य॒बुध्यत,
   त॒द् यो॒यस् देवा॒नाम् प्रत्य॒बुध्यत

Sentence: f          स॒ एव तद॒भवत्,
         स॒स् एव त॒द् अ॒भवत्

Sentence: g          तथ॒र्षीनां,
         त॒था ऋ॒षीनाम्

Sentence: h          त॒था मनु॒ष्याणाम्.
         त॒था मनु॒ष्याणाम्

Verse: M22/K10
Sentence: a    त॒द्धैतत्प॒श्यन्नृ॒षिर्वाम॒देवः प्र॒तिपेदे:
   त॒द् ह एत॒द् प॒श्यन् ऋ॒षिस् वाम॒देवस् प्र॒तिपेदे

Sentence: b    ऽहं म॒नुरभवँ सू॒र्यश्चे॒ति.
   अह॒म् म॒नुस् अभवम् सू॒र्यस् च इ॒ति

Sentence: c    त॒दिदम॒प्येत॒र्हि य॒ एवं वे॒दाहं ब्र॒ह्मास्मी॒ति,
   त॒द् इद॒म् अ॒पि एत॒र्हि य॒स् एव॒म् वे॒द अह॒म् ब्र॒ह्म अस्मि इ॒ति

Sentence: d          स॒ इदँ स॒र्वं भवति,
         स इद॒म् स॒र्वम् भवति

Sentence: e          त॒स्य ह न॒ देवा॒श्चना॒भूत्या ईशत,
         त॒स्य ह न देवा॒स् चन अ॒भूत्यास् ईशते

Sentence: f          आत्मा॒ ह्येषाँ स भ॒वत्य्.
         आत्मा हि एषा॒म् स भ॒वति

Sentence: g    अ॒थ॒ यो ऽन्यां॒ देव॒तामुपा॒स्ते:
   अ॒थ य॒स् अन्या॒म् देव॒ताम् उपा॒स्ते

Sentence: h       ऽन्यो ऽसा॒व्,
      अन्य॒स् असौ

Sentence: i          अ॒न्यो ऽह॒मस्मी॒ति,
         अन्य॒स् अह॒म् अस्मि इ॒ति

Sentence: j          न स॒ वेद.
         न स वेद

Sentence: k    य॒था पशु॒रेवँ स॒ देवा॒नां.
   य॒था पशु॒स् एव॒म् स देवा॒नाम्

Sentence: l    य॒था ह वै॒ बह॒वः पश॒वो मनु॒ष्यं भुञ्ज्यु॒र्,
   य॒था ह वै बह॒वस् पश॒वस् मनु॒ष्यम् भुञ्ज्यु॒र्

Sentence: m          एवमे॒कैकः पु॒रुषो देवा॒न्भुनक्त्य्.
         एव॒म् ए॒कैकस् पु॒रुषस् देवा॒न् भुनक्ति

Sentence: n    ए॒कस्मिन्नेव॒ पशा॒वादीय॒माने॒ ऽप्रियं भवति,
   ए॒कस्मिन् एव पशौ आदीय॒माने अ॒प्रियम् भवति

Sentence: o          कि॒मु बहु॒षु;
         कि॒म् उ बहु॒षु

Sentence: p       त॒स्मादेषां तन्न॒ प्रियं य॒देत॒न्मनु॒ष्या विद्युः.
      त॒स्माद् एषाम् त॒द् न प्रिय॒म् य॒द् एत॒द् मनु॒ष्यास् विद्यु॒र्

Verse: M23/K11
Sentence: a    ब्र॒ह्म वा॒ इदम॒ग्र आसीदे॒कमेव.
   ब्र॒ह्म वै इद॒म् अ॒ग्रे आसीत् ए॒कम् एव

Sentence: b    तदे॒कँ सन्न॒ व्यभवत्.
   त॒द् ए॒कम् स॒न् न व्यभवत्

Sentence: c    तच्छ्रे॒यो रूपम॒त्यसृजत क्षत्रं,
   त॒द् श्रे॒यस् रूप॒म् अ॒त्यसृजत क्षत्र॒म्

Sentence: d          या॒न्येता॒नि देवत्रा॒ क्षत्राणी॒न्द्रो व॒रुणः सो॒मो रुद्रः॒ पर्ज॒न्यो यमो॒ मृत्युरी॒शान इ॒ति.
         या॒नि एता॒नि देवत्रा क्षत्रा॒णि इ॒न्द्रस् व॒रुणस् सो॒मस् रुद्र॒स् पर्ज॒न्यस् यम॒स् मृत्यु॒स् ई॒शानस् इ॒ति

Sentence: e    त॒स्मात्क्षत्रात्प॒रं॒ नास्ति;
   त॒स्माद् क्षत्रा॒द् प॒रम् न अस्ति

Sentence: f       त॒स्माद्!ब्राह्मणः॒ क्षत्रि॒यं अध॒स्तादु॒पास्ते राजसू॒ये.
      त॒स्माद् ब्राह्मण॒स् क्षत्रि॒यम् अध॒स्ताद् उ॒पास्ते राजसू॒ये

Sentence: g    क्षत्र॒ एव तद्य॒शो दधाति,
   क्षत्रे एव त॒द् य॒शस् दधाति

Sentence: h          सैषा॒ क्षत्र॒स्य यो॒निर्यद्ब्र॒ह्म.
         सा एषा क्षत्र॒स्य यो॒निस् य॒द् ब्र॒ह्म

Sentence: i    त॒स्माद्यद्य॒पि रा॒जा परम॒तां ग॒च्छति,
   त॒स्माद् य॒दि अ॒पि रा॒जा परम॒ताम् ग॒च्छति

Sentence: j          ब्र॒ह्मै॒वान्तत॒ उपनि॒श्रयति स्वां यो॒निं.
         ब्र॒ह्म एव अन्तत॒स् उपनि॒श्रयति स्वा॒म् यो॒निम्

Sentence: k    य॒ उ एनँ हिन॒स्ति,
   य॒स् उ एनम् हिन॒स्ति

Sentence: l          स्वाँ स यो॒निमृच्छति.
         स्वा॒म् स यो॒निम् ऋच्छति

Sentence: m    स पा॒पीयान्भवति,
   स पा॒पीयान् भवति

Sentence: n          य॒था श्रे॒याँसँ हिँसित्वा.
         य॒था श्रे॒याँसम् हिँसित्वा

Verse: M24/K12
Sentence: a    स॒ नैव॒ व्यभवत्.
   स न एव व्यभवत्

Sentence: b    स वि॒शमसृजत,
   स वि॒शम् असृजत

Sentence: c          या॒न्येता॒नि देवजाता॒नि गणश॒ आख्याय॒न्ते,
         या॒नि एता॒नि देवजाता॒नि गणश॒स् आख्याय॒न्ते

Sentence: d          व॒सवो रुद्रा॒ आदित्या वि॒श्वे देवा॒ मरु॒त इ॒ति.
         व॒सवस् रुद्रा॒स् आदित्या॒स् वि॒श्वे देवा॒स् मरु॒तस् इ॒ति

Verse: M25/K13
Sentence: a    स॒ नैव॒ व्यभवत्.
   स न एव व्यभवत्

Sentence: b    स शौ॒द्रं व॒र्णमसृजत पूष॒णम्.
   स शौ॒द्रम् व॒र्णम् असृजत पूष॒णम्

Sentence: c    इयं वै॒ पू॒षेयँ॒ हीदँ स॒र्वं पु॒ष्यति य॒दिदं कि॒ञ्च.
   इय॒म् वै पूषा इय॒म् हि इद॒म् स॒र्वम् पु॒ष्यति य॒द् इद॒म् कि॒ञ्च

Verse: M26/K14
Sentence: a    स॒ नैव॒ व्यभवत्.
   स न एव व्यभवत्

Sentence: b    तच्छ्रे॒यो रूपम॒त्यसृजत ध॒र्मं.
   त॒द् श्रे॒यस् रूप॒म् अ॒त्यसृजत ध॒र्मम्

Sentence: c    त॒देत॒त्क्षत्र॒स्य क्षत्रं यद्ध॒र्मस्.
   त॒द् एत॒त् क्षत्र॒स्य क्षत्र॒म् य॒द् ध॒र्मस्

Sentence: d    त॒स्माद्ध॒र्मात्प॒रं॒ नास्त्य्.
   त॒स्माद् ध॒र्माद् प॒रम् न अस्ति

Sentence: e    अ॒थो अ॒बलीयान्ब॒लीयाँसमा॒शँसते ध॒र्मेण य॒था रा॒ज्ञैवं.
   अ॒थ उ अ॒बलीयान् ब॒लीयाँसम् आ॒शँसते ध॒र्मेण य॒था रा॒ज्ञा एव॒म्

Sentence: f    यो वै स ध॒र्मः,
   य॒स् वै स ध॒र्मस्

Sentence: g          सत्यं वै त॒त्.
         सत्य॒म् वै त॒द्

Sentence: h    त॒स्मात्सत्यं व॒दन्तमाहुर्:
   त॒स्माद् सत्य॒म् व॒दन्तम् आहुर्

Sentence: i       ध॒र्मं वदती॒ति,
      ध॒र्मम् वदति इ॒ति

Sentence: j          ध॒र्मं वा व॒दन्तँ:
         ध॒र्मम् वा व॒दन्तम्

Sentence: k       सत्यं॒ वदती॒त्य्;
      सत्य॒म् वदति इ॒ति

Sentence: l       एत॒द्ध्ये॒वैत॒दुभ॒यं भ॒वति.
      एत॒द् हि एव एत॒द् उभ॒यम् भ॒वति

Verse: M27/K15
Sentence: a    त॒देतद्ब्र॒ह्म क्षत्रं वि॒ट्शूद्र॒स्.
   त॒द् एत॒द् ब्र॒ह्म क्षत्र॒म् वि॒ट् शूद्र॒स्

Sentence: b    त॒दग्नि॒नैव॒ देवे॒षु ब्रह्मा॒भवद्,
   त॒द् अग्नि॒ना एव देवे॒षु ब्र॒ह्म अ॒भवत्

Sentence: c          ब्राह्मणो॒ मनु॒ष्येषु,
         ब्राह्मण॒स् मनु॒ष्येषु

Sentence: d          क्षत्रि॒येण क्षत्रि॒यो,
         क्षत्रि॒येण क्षत्रि॒यस्

Sentence: e          वै॒श्येन वै॒श्यः,
         वै॒श्येन वै॒श्यस्

Sentence: f          शूद्रे॒ण शूद्र॒स्.
         शूद्रे॒ण शूद्र॒स्

Sentence: g    त॒स्मादग्ना॒वेव॒ देवे॒षु लोक॒मिच्छन्ते,
   त॒स्माद् अग्नौ एव देवे॒षु लोक॒म् इच्छन्ते

Sentence: h          ब्राह्मणे॒ मनु॒ष्येष्व्;
         ब्राह्मणे मनु॒ष्येषु

Sentence: i       एता॒भ्याँ हि॒ रूपा॒भ्यां ब्रह्मा॒भवत्.
      एता॒भ्याम् हि रूपा॒भ्याम् ब्र॒ह्म अ॒भवत्

Verse: M28/K15
Sentence: a    अ॒थ यो॒ ह वा॒ अस्मा॒ल्लोकात्स्वं॒ लोकम॒दृष्ट्वा प्रै॒ति,
   अ॒थ य॒स् ह वै अस्मा॒द् लोका॒द् स्व॒म् लोक॒म् अ॒दृष्ट्वा प्रै॒ति

Sentence: b          स॒ एनम॒विदितो न॒ भुनक्ति;
         स एनम् अ॒विदितस् न भुनक्ति

Sentence: c       य॒था वे॒दो वा॒ननूक्तो ऽन्य॒द्वा कर्मा॒कृतं.
      य॒था वे॒दस् वा अ॒ननूक्तस् अन्य॒द् वा क॒र्म अ॒कृतम्

Sentence: d    य॒दि ह वा अप्य॒नेवंविन्महत्पु॒ण्यं क॒र्म करो॒ति,
   य॒दि ह वै अ॒पि अ॒नेवंविद् महत्पु॒ण्यम् क॒र्म करो॒ति

Sentence: e          त॒द्धास्यान्ततः क्षी॒यत ए॒वात्मा॒नमेव॒ लोकमु॒पासीत.
         त॒द् ह अस्य अन्तत॒स् क्षी॒यते एव आत्मा॒नमेव लोक॒म् उ॒पासीत

Sentence: f    स य॒ आत्मा॒नमेव॒ लोक॒मुपा॒स्ते,
   सय॒स् आत्मा॒नम् एव लोक॒म् उपा॒स्ते

Sentence: g          न॒ हास्य क॒र्म क्षीयते.
         न ह अस्य क॒र्म क्षीयते

Sentence: h    ऽस्मा॒द्ध्ये॒वात्म॒नो य॒द्यत्काम॒यते,
   अस्मा॒द् हि एव आत्म॒नस् य॒द्यद् काम॒यते

Sentence: i          त॒त्तत्सृजते.
         त॒त्तद् सृजते

Verse: M29/K16
Sentence: a    अ॒थो अयं वा॒ आत्मा स॒र्वेषां भूता॒नां लोकः;
   अ॒थ उ अय॒म् वै आत्मा स॒र्वेषाम् भूता॒नाम् लोक॒स्

Sentence: b       स य॒ज्जुहो॒ति,
      स य॒द् जुहो॒ति

Sentence: c          यद्य॒जते ते॒न देवा॒नां लोको;
         य॒द् य॒जते ते॒न देवा॒नाम् लोक॒स्

Sentence: d       ऽथ य॒दनुब्रूते,
      अ॒थ य॒द् अनुब्रूते

Sentence: e          तेन॒र्षीणाम्;
         ते॒न ऋ॒षीणाम्

Sentence: f       अ॒थ य॒त्प्रजा॒मिच्छ॒ते,
      अ॒थ य॒द् प्रजा॒म् इच्छ॒ते

Sentence: g          य॒त्पितृ॒भ्यो निपृणा॒ति,
         य॒द् पितृ॒भ्यस् निपृणा॒ति

Sentence: h          ते॒न पितॄणा॒म्;
         ते॒न पितॄणा॒म्

Sentence: i       अ॒थ य॒न्मनु॒ष्यान्वास॒यते,
      अ॒थ य॒द् मनु॒ष्यान् वास॒यते

Sentence: j          य॒देभ्यो॒ ऽशनं द॒दाति,
         य॒द् एभ्यस् अ॒शनम् द॒दाति

Sentence: k          ते॒न मनु॒ष्याणाम्;
         ते॒न मनु॒ष्याणाम्

Sentence: l       अ॒थ य॒त्पशु॒भ्यस्तृणोदकं॒ विन्द॒ति,
      अ॒थ य॒द् पशु॒भ्यस् तृणोदक॒म् विन्द॒ति

Sentence: m          ते॒न पशूनां;
         ते॒न पशूना॒म्

Sentence: n       य॒दस्य गृहे॒षु श्वा॒पदा व॒याँस्या॒ पिपी॒लिकाभ्य उपजी॒वन्ति,
      य॒द् अस्य गृहे॒षु श्वा॒पदास् व॒याँसि आ पिपी॒लिकाभ्यस् उपजी॒वन्ति

Sentence: o          ते॒न ते॒षां लोको.
         ते॒न ते॒षाम् लोक॒स्

Sentence: p    य॒था ह वै स्वा॒य लोकाया॒रिष्टिमिच्छे॒द्,
   य॒था ह वै स्वा॒य लोका॒य अ॒रिष्टिम् इच्छे॒त्

Sentence: q          एवँ॒ हैवंवि॒दे सर्वदा स॒र्वाणि भूतान्य॒रिष्टिमिच्छन्ति.
         एव॒म् ह एवंवि॒दे सर्वदा स॒र्वाणि भूता॒नि अ॒रिष्टिम् इच्छन्ति

Sentence: r    तद्वा॒ एत॒द्विदितं॒ मीमाँसित॒म्.
   त॒द् वै एत॒द् विदित॒म् मीमाँसित॒म्

Verse: M30/K17
Sentence: a    आ॒त्मै॒वेदम॒ग्र आसीद्,
   आत्मा एव इद॒म् अ॒ग्रे आसीत्

Sentence: b          ए॒क एव.
         ए॒कस् एव

Sentence: c    सो ऽकामयत:
   स॒स् अकामयत

Sentence: d       जाया॒ मे स्याद्,
      जाया मे स्यात्

Sentence: e          अ॒थ प्र॒जायेया॒थ वित्तं॒ मे स्याद्,
         अ॒थ प्र॒जायेय अ॒थ वित्त॒म् मे स्यात्

Sentence: f          अ॒थ क॒र्म कुर्वीये॒त्य्.
         अ॒थ क॒र्म कुर्वीय इ॒ति

Sentence: g    एता॒वान्वै का॒मो॒ नेच्छँ॒श्चना॒तो भू॒यो विन्देत्.
   एता॒वान् वै का॒मस् न इच्छ॒न् चन अ॒तस् भू॒यस् विन्देत्

Sentence: h    त॒स्माद॒प्येत॒र्ह्येकाकी॒ कामयते:
   त॒स्माद् अ॒पि एत॒र्हि एकाकी कामयते

Sentence: i       जाया॒ मे स्याद्,
      जाया मे स्यात्

Sentence: j          अ॒थ प्र॒जायेया॒थ वित्तं॒ मे स्याद्,
         अ॒थ प्र॒जायेय अ॒थ वित्त॒म् मे स्यात्

Sentence: k          अ॒थ क॒र्म कुर्वीये॒ति.
         अ॒थ क॒र्म कुर्वीय इ॒ति

Sentence: l    स या॒वद॒प्येतेषामे॒कैकं न॒ प्राप्नो॒त्य्,
   स या॒वत् अ॒पि एतेषाम् ए॒कैकम् न प्राप्नो॒ति

Sentence: m          अ॒कृत्स्न एव ता॒वन्मन्यते.
         अ॒कृत्स्नस् एव ता॒वन् मन्यते

Sentence: n    त॒स्यो कृत्स्न॒ता.
   त॒स्य उ कृत्स्न॒ता

Verse: M31/K17
Sentence: a    म॒न ए॒वास्यात्मा;
   म॒नस् एव अस्य आत्मा

Sentence: b       वा॒ग्जाया;
      वा॒क् जाया

Sentence: c       प्राणः॒ प्रजा;
      प्राण॒स् प्रजा

Sentence: d       च॒क्षुर्मानुषं॒ वित्तं,
      च॒क्षुस् मानुष॒म् वित्त॒म्

Sentence: e          च॒क्षुषा हि त॒द्विन्द॒ति;
         च॒क्षुषा हि त॒द् विन्द॒ति

Sentence: f       श्रो॒त्रं दै॒वं,
      श्रो॒त्रम् दै॒वम्

Sentence: g          श्रो॒त्रेण हि त॒च्छृणो॒त्य्;
         श्रो॒त्रेण हि त॒द् शृणो॒ति

Sentence: h       आ॒त्मै॒वास्य क॒र्मात्म॒ना हि क॒र्म करो॒ति.
      आत्मा एव अस्य क॒र्म आत्म॒ना हि क॒र्म करो॒ति

Sentence: i    स॒ एष पा॒ङ्क्तो यज्ञः,
   स॒स् एष पा॒ङ्क्तस् यज्ञ॒स्

Sentence: j          पा॒ङ्क्तः पशुः,
         पा॒ङ्क्तस् पशु॒स्

Sentence: k          पा॒ङ्क्तः पु॒रुषः,
         पा॒ङ्क्तस् पु॒रुषस्

Sentence: l          पा॒ङ्क्तमिदँ स॒र्वं य॒दिदं कि॒ञ्च.
         पा॒ङ्क्तम् इद॒म् स॒र्वम् य॒द् इद॒म् कि॒ञ्च

Sentence: m    त॒दिदँ स॒र्वमाप्नोति,
   त॒द् इद॒म् स॒र्वम् आप्नोति

Sentence: n          य॒ एवं वे॒द.
         य॒स् एव॒म् वे॒द

This text is part of the TITUS edition of White Yajur-Veda: Brhad-Aranyaka-Upanisad.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.