TITUS
Text collection: YVW 
White Yajur-Veda
Text: VS 
Vājasaneyi-Saṃhitā

Mādhyandina-Recension


On the basis of the edition by
Albrecht Weber,
The Vajasaneyi-Saṃhitā
in the Mādhyandina and the Kānva-Śākhā
with the Commentary of Mahidhara,
Berlin 1849 / repr. Varanasi 1972
(Chowkhamba Sanskrit Series, 103)
entered by Martin Kümmel,
Freiburg, 1997;
TITUS version by Jost Gippert,
Frankfurt a.M., 14.10.1997 / 28.2.1998 / 21.6.1998 / 15.10.1999 / 1.6.2000 / 7.12.2008



Paragraph: 1 

Verse: 1 
Sentence: a    इ॒षे त्वा॑ ।
Sentence: b    ऊ॒र्जे त्वा॑ ।
Sentence: c    वा॒यव॑ स्थ ।
Sentence: d    दे॒वो वः॑ सवि॒ता प्रार्प॑यतु॒ श्रेष्ठ॑तमाय॒ कर्म॑ण॒ आ प्या॑यध्वमघ्न्या॒ इन्द्रा॑य भा॒गं प्र॒जाव॑तीरनमी॒वा अ॑य॒क्ष्मा मा व॑ स्ते॒न ई॑शत॒ माघ॑शँसो ध्रु॒वा अ॒स्मिन्गोप॑तौ स्यात ब॒ह्वीः ।
Sentence: e    यज॑मानस्य प॒शून्पा॑हि ।।

Verse: 2 
Sentence: a    वसोः॑ प॒वित्र॑मसि ।
Sentence: b    द्यौ॑रसि पृथि॒व्य॑सि ।
Sentence: c    मा॑त॒रिश्व॑नो घ॒र्मो॑ सि वि॒श्वधा॑ असि पर॒मेण॒ धाम्ना॒ दृँह॑स्व॒ मा ह्वा॒र्मा ते॑ य॒ज्ञप॑तिरत् ।।

Verse: 3 
Sentence: a    वसोः॑ प॒वित्र॑मसि श॒तधा॑रं॒ वसोः॑ प॒वित्र॑मसि स॒हस्र॑धारम् ।
Sentence: b    दे॒वस्त्वा॑ सवि॒ता पु॑नातु॒ वसोः॑ प॒वित्रे॑ण श॒तधा॑रेण सु॒प्वा॑ ।
Sentence: c    काम॑धुक्षः ।।

Verse: 4 
Sentence: a    सा वि॒श्वायुः॑ ।
Sentence: b    सा वि॒श्वक॑र्मा ।
Sentence: c    सा वि॒श्वधा॑याः ।
Sentence: d    इन्द्र॑स्य त्वा भा॒गँ सोमे॒ना त॑नच्मि ।
Sentence: e    विष्णो॑ ह॒व्यँ र॑क्ष ।।

Verse: 5 
Sentence: a    अग्ने॑ व्रतपते व्र॒तं च॑रिष्यामि॒ तच्छ॑केयं॒ तन्मे॑ राध्यताम् ।
Sentence: b    इ॒दम॒हमनृ॑तात्स॒त्यमुपै॑मि ।।

Verse: 6 
Sentence: a    कस्त्वा॑ युनक्ति॒ स त्वा॑ युनक्ति॒ कस्मै॑ त्वा युनक्ति॒ तस्मै॑ त्वा युनक्ति ।
Sentence: b    कर्म॑णे वां॒ वेषा॑य वाम् ।।

Verse: 7 
Sentence: a    प्रत्यु॑ष्टँ॒ रक्षः॒ प्रत्यु॑ष्टा॒ अरा॑तयः ।
Sentence: b    निष्ट॑प्तँ॒ रक्षो॒ निष्ट॑प्ता॒ अरा॑तयः ।
Sentence: c    उ॒र्व॒न्तरि॑क्ष॒मन्वे॑मि ।।

Verse: 8 
Sentence: a    धूर॑सि॒ धूर्व॒ धूर्व॑न्तं॒ धूर्व॒ तं यो॒ स्मान्धूर्व॑ति॒ तं धू॑र्व॒ यं व॒यं धूर्वा॑मः ।
Sentence: b    दे॒वाना॑मसि॒ वह्नि॑तमँ॒ सम्नि॑तमं॒ पप्रि॑तमं॒ जुष्ट॑तमं देव॒हूत॑मम् ।।

Verse: 9 
Sentence: a    अह्रु॑तमसि हवि॒र्धानं॒ दृँह॑स्व॒ मा ह्वा॒र्मा य॒ज्ञप॑तिर्ह्वार्षीत् ।
Sentence: b    विष्णु॑स्त्वा क्रमताम् ।
Sentence: c    उ॒रु वाता॑य ।
Sentence: d    अप॑हतँ॒ रक्षः॑ ।
Sentence: e    यच्छ॑न्तां॒ पञ्च॑ ।।

Verse: 10 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    अ॒ग्नये॒ जुष्टं॑ गृह्णामि ।
Sentence: c    अ॒ग्नीषोमा॑भ्यां॒ जुष्टं॑ गृह्णामि ।।

Verse: 11 
Sentence: a    भू॒ताय॑ त्वा॒ नारा॑तये ।
Sentence: b    स्व॑रभि॒वि ख्ये॑षम् ।
Sentence: c    दृँह॑न्तां॒ दुर्याः॑ पृथि॒व्याम् ।
Sentence: d    उ॒र्व॒न्तरि॑क्ष॒मन्वे॑मि ।
Sentence: e    पृ॑थि॒व्यास्त्वा॒ नाभौ॑ सादया॒म्यदि॑त्या उ॒पस्थे ग्ने॑ ह॒व्यँ र॑क्ष ।।

Verse: 12 
Sentence: a    प॒वित्रे॑ स्थो वैष्णव्यौ ।
Sentence: b    स॑वि॒तुर्वः॑ प्रस॒व उत्पु॑ना॒म्यच्छि॑द्रेन प॒वित्रे॑ण॒ सूर्य॑स्य र॒श्मिभिः॑ ।
Sentence: c    देवी॑रापो अग्रेगुवो अग्रेपु॒वो ग्र॑ इ॒मम॒द्य य॒ज्ञं न॑य॒ताग्रे॑ य॒ज्ञप॑तिँ सु॒धातुं॑ य॒ज्ञप॑तिं देव॒युव॑म् ।।

Verse: 13 
Sentence: a    यु॒ष्मा इन्द्रो॑ वृणीत वृत्र॒तूर्ये॑ यू॒यमिन्द्र॑मवृणीध्वं वृत्र॒तूर्ये॑ ।
Sentence: b    प्रोक्षि॑ता स्थ ।
Sentence: c    अ॒ग्नये॑ त्वा॒ जुष्टं॒ प्रोक्षा॑मि ।
Sentence: d    अ॒ग्नीषोमा॑भ्यां त्वा॒ जुष्टं॒ प्रोक्षा॑मि ।
Sentence: e    दै॑व्याय॒ कर्म॑णे शुन्धध्वं देवय॒ज्यायै॒ यद्वो शु॑द्धाः पराज॒घ्नुरि॒दं व॒स्तच्छु॑न्धामि ।।

Verse: 14 
Sentence: a    शर्मा॑सि ।
Sentence: b    अव॑धूतँ॒ रक्षो व॑धूता॒ अरा॑तयः ।
Sentence: c    अदि॑त्या॒स्त्वग॑सि॒ प्रति॒ त्वादि॑तिर्वेत्तु ।
Sentence: d    अद्रि॑रसि वानस्प॒त्यः ।
Sentence: e    ग्रावा॑सि पृ॒थुबु॑ध्नः॒ प्रति॒ त्वादि॑त्या॒स्त्वग्वे॑त्तु ।।

Verse: 15 
Sentence: a    अ॒ग्नेस्त॒नूर॑सि वा॒चो वि॒सर्ज॑नं दे॒ववी॑तये त्वा गृह्णामि ।
Sentence: b    बृ॒हद्ग्रा॑वासि वानस्प॒त्यः ।
Sentence: c    स इ॒दं दे॒वेभ्यो॑ ह॒विः श॑मीष्व सु॒शमि॑ शमीष्व ।
Sentence: d    हवि॑ष्कृ॒देहि॒ हवि॑ष्कृ॒देहि॒ हवि॑ष्कृ॒देहि॑ ।।

Verse: 16 
Sentence: a    कु॑क्कु॒टो॑ सि॒ मधु॑जिह्व॒ इष॒मूर्ज॒मा व॑द॒ त्वया॑ व॒यँ सं॑धा॒तँसं॑धातं जेष्म ।
Sentence: b    व॒र्षवृ॑द्धमसि ।
Sentence: c    प्रति॑ त्वा व॒र्षवृ॑द्धं वेत्तु ।
Sentence: d    परा॑पूतँ॒ रक्षः॒ परा॑पूता॒ अरा॑तयः ।
Sentence: e    अप॑हतँ॒ रक्षः॑ ।
Sentence: f    वा॒युर्वो॒ वि वि॑नक्तु ।
Sentence: g    दे॒वो वः॑ सवि॒ता हिर॑ण्यपाणिः॒ प्रति॑ गृभ्णा॒त्वच्छि॑द्रेण पा॒णिना॑ ।।

Verse: 17 
Sentence: a    धृष्टि॑रसि ।
Sentence: b    अपा॑ग्ने अ॒ग्निमा॒मादं॑ जहि॒ निष्क्र॒व्यादँ॑ सेध ।
Sentence: c    आ दे॑व॒यजं॑ वह ।
Sentence: d    ध्रु॒वम॑सि पृथि॒वीं दृँ॑ह ब्रह्म॒वनि॑ त्वा क्षत्र॒वनि॑ सजात॒वन्युप॑ दधामि॒ भ्रातृ॑व्यस्य ब॒धाय॑ ।।

Verse: 18 
Sentence: a    अग्ने॒ ब्रह्म॑ गृभ्णीष्व ।
Sentence: b    ध॒रुण॑मस्य॒न्तरि॑क्षं दृँह ब्रह्म॒वनि॑ त्वा क्षत्र॒वनि॑ सजात॒वन्युप॑ दधामि॒ भ्रातृ॑व्यस्य ब॒धाय॑ ।
Sentence: c    ध॒र्त्रम॑सि॒ दिवं॑ दृँह ब्रह्म॒वनि॑ त्वा क्षत्र॒वनि॑ सजात॒वन्युप॑ दधामि॒ भ्रातृ॑व्यस्य ब॒धाय॑ ।
Sentence: d    विश्वा॑भ्य॒स्त्वाशा॑भ्य॒ उप॑ दधामि ।
Sentence: e    चित॑ स्थोर्ध्व॒चितः॑ ।
Sentence: f    भृगू॑णा॒मङ्गि॑रसां॒ तप॑सा तप्यध्वम् ।।

Verse: 19 
Sentence: a    शर्मा॑सि ।
Sentence: b    अव॑धूतँ॒ रक्षो व॑धूता॒ अरा॑तयः ।
Sentence: c    अदि॑त्या॒स्त्वग॑सि॒ प्रति॒ त्वादि॑तिर्वेत्तु ।
Sentence: d    धि॒षणा॑सि पर्व॒ती प्रति॒ त्वादि॑त्या॒स्त्वग्वे॑त्तु ।
Sentence: e    दि॒व स्क॑म्भ॒नीर॑सि ।
Sentence: f    धि॒षणा॑सि पार्वते॒यी प्रति॑ त्वा॒ पर्व॑ती वेत्तु ।।

Verse: 20 
Sentence: a    धा॒न्य॑मसि धिनु॒हि दे॒वान् ।
Sentence: b    प्रा॒णाय॑ त्वा ।
Sentence: c    उ॑दा॒नाय॑ त्वा ।
Sentence: d    व्या॒नाय॑ त्वा ।
Sentence: e    दी॒र्घामनु॒ प्रसि॑ति॒मायु॑षे धां दे॒वो वः॑ सवि॒ता हिर॑ण्यपाणिः॒ प्रति॑ गृभ्णा॒त्वच्छि॑द्रेण पा॒णिना॑ ।
Sentence: f    चक्षु॑षे त्वा ।
Sentence: g    म॒हीनां॒ पयो॑ सि ।।

Verse: 21 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    सं व॑पामि ।
Sentence: c    समाप॒ ओष॑धीभिः॒ समोष॑धयो॒ रसे॑न ।
Sentence: d    सँ रे॒वती॒र्जग॑तीभिः पृच्यन्ताँ॒ सं मधु॑मती॒र्मधु॑मतीभिः पृच्यन्ताम् ।।

Verse: 22 
Sentence: a    जन॑यत्यै त्वा॒ सं यौ॑मि ।
Sentence: b    इ॒दम॒ग्नेः ।
Sentence: c    इ॒दम॒ग्नीषोम॑योः ।
Sentence: d    इ॒षे त्वा॑ ।
Sentence: e    घ॒र्मो॑ सि वि॒श्वायुः॑ ।
Sentence: f    उ॒रुप्र॑था उ॒रु प्र॑थस्वो॒रु ते॑ य॒ज्ञप॑तिः प्रथताम् ।
Sentence: g    अ॒ग्निष्टे॒ त्वचं॒ मा हिँ॑सीत् ।
Sentence: h    दे॒वस्त्वा॑ सवि॒ता श्र॑पयतु॒ वर्षि॒ष्ठे धि॒ नाके॑ ।।

Verse: 23 
Sentence: a    मा भे॒र्मा सं वि॑क्थाः ।
Sentence: b    अत॑मेरुर्य॒ज्ञो त॑मेरु॒र्यज॑मानस्य प्र॒जा भू॑यात् ।
Sentence: c    त्रि॒ताय॑ त्वा ।
Sentence: d    द्वि॒ताय॑ त्वा ।
Sentence: e    ए॑क॒ताय॑ त्वा ।।

Verse: 24 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    आ द॑दे ध्वर॒कृतं॑ दे॒वेभ्यः॑ ।
Sentence: c    इन्द्र॑स्य बा॒हुर॑सि॒ दक्षि॑णः स॒हस्र॑भृष्टिः श॒तते॑जा वा॒युर॑सि ति॒ग्मते॑जा द्विष॒तो ब॒धः ।।

Verse: 25 
Sentence: a    पृथि॑वि देवयज॒न्योष॑ध्यास्ते॒ मूलं॒ मा हिँ॑सिषम् ।
Sentence: b    व्र॒जं ग॑च्छ गो॒ष्ठान॑म् ।
Sentence: c    वर्ष॑तु ते द्यौः ।
Sentence: d    ब॑धा॒न दे॑व सवितः पर॒मस्यां॑ पृथि॒व्याँ श॒तेन॒ पाशै॒र्यो॒ स्मान्द्वेष्टि॒ यं च॑ व॒यं द्वि॒ष्मस्तमतो॒ मा मौ॑क् ।।

Verse: 26 
Sentence: a    अपा॒ररुं॑ पृथिव्यै देव॒यज॑नाद्बध्यासम् ।
Sentence: b    व्र॒जं ग॑च्छ गो॒ष्ठान॑म् ।
Sentence: c    वर्ष॑तु ते द्यौः ।
Sentence: d    ब॑धा॒न दे॑व सवितः पर॒मस्यां॑ पृथि॒व्याँ श॒तेन॒ पाशै॒र्यो॒ स्मान्द्वेष्टि॒ यं च॑ व॒यं द्वि॒ष्मस्तमतो॒ मा मौ॑क् ।
Sentence: e    अर॑रो॒ दिवं॒ मा प॑प्तः ।
Sentence: f    द्र॒प्सस्ते॒ द्यां मा स्क॑न् ।
Sentence: g    व्र॒जं ग॑च्छ गो॒ष्ठान॑म् ।
Sentence: h    वर्ष॑तु ते द्यौः ।
Sentence: i    ब॑धा॒न दे॑व सवितः पर॒मस्यां॑ पृथि॒व्याँ श॒तेन॒ पाशै॒र्यो॒ स्मान्द्वेष्टि॒ यं च॑ व॒यं द्वि॒ष्मस्तमतो॒ मा मौ॑क् ।।

Verse: 27 
Sentence: a    गा॑य॒त्रेण॑ त्वा॒ छन्द॑सा॒ परि॑ गृह्णामि ।
Sentence: b    त्रै॑ष्टुभेन त्वा॒ छन्द॑सा॒ परि॑ गृह्णामि ।
Sentence: c    जग॑तेन त्वा॒ छन्द॑सा॒ परि॑ गृह्णामि ।
Sentence: d    सु॒क्ष्मा चासि॑ शि॒वा चा॑सि ।
Sentence: e    स्यो॒ना चासि॑ सु॒षदा॑ चासि ।
Sentence: f    ऊर्ज॑स्वती॒ चासि॒ पय॑स्वती च ।।

Verse: 28 
Sentence: a    पु॒रा क्रू॒रस्य॑ वि॒सृपो॑ विरप्शिन्नुदा॒दाय॑ पृथि॒वीं जी॒वदा॑नुम् ।
Sentence: b    याऐ॑रयँश्च॒न्द्रम॑सि स्व॒धाभि॒स्तामु॒ धीरा॑सो अनु॒दिश्य॑ यजन्ते ।
Sentence: c    प्रोक्ष॑णी॒रा सा॑दय ।
Sentence: d    द्वि॑ष॒तो ब॒धो॑ सि ।।

Verse: 29 
Sentence: a    प्रत्यु॑ष्टँ॒ रक्षः॒ प्रत्यु॑ष्टा॒ अरा॑तयः ।
Sentence: b    निष्ट॑प्तँ॒ रक्षो॒ निष्ट॑प्ता॒ अरा॑तयः ।
Sentence: c    अनि॑शितो सि सपत्न॒क्षिद्वा॒जिनं॑ त्वा वाजे॒ध्यायै॒ सं मा॑र्ज्मि ।
Sentence: d    प्रत्यु॑ष्टँ॒ रक्षः॒ प्रत्यु॑ष्टा॒ अरा॑तयः ।
Sentence: e    निष्ट॑प्तँ॒ रक्षो॒ निष्ट॑प्ता॒ अरा॑तयः ।
Sentence: f    अनि॑शितासि सपत्न॒क्षिद्वा॒जिनीं॑ त्वा वाजे॒ध्यायै॒ सं मा॑र्ज्मि ।।

Verse: 30 
Sentence: a    अदि॑त्यै॒ रास्ना॑सि ।
Sentence: b    विष्णो॑र्वे॒ष्यो॑ सि ।
Sentence: c    ऊर्जे॑ त्वा ।
Sentence: d    अद॑ब्धेन त्वा॒ चक्षु॒षाव॑ पश्यामि ।
Sentence: e    अ॒ग्नेर्जि॒ह्वासि॑ सु॒हूर्दे॒वेभ्यो॒ धाम्ने॑धाम्ने मे भव॒ यजु॑षेयजुषे ।।

Verse: 31 
Sentence: a    स॑वि॒तुस्त्वा॑ प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभिः॑ ।
Sentence: b    स॑वि॒तुर्वः॑ प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभिः॑ ।
Sentence: c    तेजो॑ सि शु॒क्रम॑स्य॒मृत॑मसि ।
Sentence: d    धाम॒ नामा॑सि प्रि॒यं दे॒वाना॒मना॑धृष्टं देव॒यज॑नमसि ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.