TITUS
White Yajur-Veda: Vajasaneyi-Samhita (Madhyandina)
Part No. 2
Previous part

Paragraph: 2 

Verse: 1 
Sentence: a    कृष्णो॑ स्याखरे॒ष्ठो॒ ग्नये॑ त्वा॒ जुष्टं॒ प्रोक्षा॑मि ।
Sentence: b    
वेदि॑रसि ब॒र्हिषे॑ त्वा॒ जुष्टां॒ प्रोक्षा॑मि ।
Sentence: c    
ब॒र्हिर॑सि स्रु॒ग्भ्यस्त्वा॒ जुष्टं॒ प्रोक्षा॑मि ।।

Verse: 2 
Sentence: a    
अदि॑त्यै॒ व्युन्द॑नमसि ।
Sentence: b    
विष्णो॑ स्तु॒पो॑ सि ।
Sentence: c    
ऊर्ण॑म्रदसं त्वा स्तृणामि स्वास॒स्थां दे॒वेभ्यः॑ ।
Sentence: d    
भुव॑पतये॒ स्वाहा॑ ।
Sentence: e    
भुव॑नपतये॒ स्वाहा॑ ।
Sentence: f    
भू॒तानां॒ पत॑ये॒ स्वाहा॑ ।।

Verse: 3 
Sentence: a    
ग॑न्ध॒र्वस्त्वा॑ वि॒श्वाव॑सुः॒ परि॑ दधातु॒ विश्व॒स्यारि॑ष्ट्यै॒ यज॑मानस्य परि॒धिर॑स्य॒ग्न॒ड ई॑डि॒तः ।
Sentence: b    
इन्द्र॑स्य बा॒हुर॑सि॒ दक्षि॑णो वि॒श्वाव॑सुः॒ परि॑ दधातु॒ विश्व॒स्यारि॑ष्ट्यै॒ यज॑मानस्य परि॒धिर॑स्य॒ग्निरि॒ड ई॑डि॒तः ।
Sentence: c    
मि॒त्रावरु॑णौ त्वोत्तर॒तः परि॑ धत्तां ध्रु॒वेण॒ धर्म॑णा॒ विश्व॒स्यारि॑ष्ट्यै॒ यज॑मानस्य परि॒धिर॑स्य॒ग्निरि॒ड ई॑डि॒तः ।।

Verse: 4 
Sentence: a    
वी॒तिहो॑त्रं त्वा कवे द्यु॒मन्तँ॒ समि॑धीमहि ।
Sentence: b    
अग्ने॑ बृ॒हन्त॑मध्व॒रे ।।

Verse: 5 
Sentence: a    
स॒मिद॑सि ।
Sentence: b    
सूर्य॑स्त्वा पु॒रस्ता॑त्पातु॒ कस्या॑श्चिद॒भिश॑स्त्यै ।
Sentence: c    
स॑वि॒तुर्बा॒हू स्थः॑ ।
Sentence: d    
ऊर्ण॑म्रदसं त्वा स्तृणामि स्वास॒स्थं दे॒वेभ्यः॑ ।
Sentence: e    
आ त्वा॒ वस॑वो रु॒द्रा आ॑दि॒त्याः स॑दन्तु ।।

Verse: 6 
Sentence: a    
घृ॒ताच्य॑सि जु॒हूर्नाम्ना॒ सेदं प्रि॒येण॒ धाम्ना॑ प्रि॒यँ सद॒ आ सी॑द ।
Sentence: b    
घृ॒ताच्य॑स्युप॒भृन्नाम्ना॒ सेदं प्रि॒येण॒ धाम्ना॑ प्रि॒यँ सद॒ आ सी॑द ।
Sentence: c    
घृ॒ताच्य॑सि ध्रु॒वा नाम्ना॒ सेदं प्रि॒येण॒ धाम्ना॑ प्रि॒यँ सद॒ आ सी॑द ।
Sentence: d    
प्रि॒येण॒ धाम्ना॑ प्रि॒यँ सद॒ आ सी॑द ।
Sentence: e    
ध्रु॒वा अ॑सदन्नृ॒तस्य॒ योनौ॒ ता वि॑ष्णो पाहि ।
Sentence: f    
पा॒हि य॒ज्ञं ।
Sentence: g    
पा॒हि य॒ज्ञप॑तिम् ।
Sentence: h    
पा॒हि मां य॑ज्ञ॒न्य॑म् ।।

Verse: 7 
Sentence: a    
अग्ने॑ वाजजि॒द्वाजं॑ त्वा सरि॒ष्यन्तं॑ वाज॒जितँ॒ सं मा॑र्ज्मि ।
Sentence: b    
नमो॑ दे॒वेभ्यः॑ ।
Sentence: c    
स्व॒धा पि॒तृभ्यः॑ ।
Sentence: d    
सु॒यमे॑ मे भूयास्तम् ।।

Verse: 8 
Sentence: a    
अस्क॑न्नम॒द्य दे॒वेभ्य॒ आज्यँ॒ सं भ्रि॑यासम् ।
Sentence: b    
अङ्घ्रि॑णा विष्णो॒ मा त्वाव॑ क्रमिषम् ।
Sentence: c    
वसु॑मतीमग्ने ते छा॒यामुप॑ स्थेषं॒ विष्णो॒ स्थान॑मसि ।
Sentence: d    
इ॒त इन्द्रो॑ वी॒र्य॑मकृणोदू॒र्ध्वो॑ ध्व॒र आस्था॑त् ।।

Verse: 9 
Sentence: a    
अग्ने॒ वेर्हो॒त्रं वेर्दू॒त्य॑म् ।
Sentence: b    
अव॑तां॒ त्वां द्यावा॑पृथि॒वी ।
Sentence: c    
अव॒ त्वं द्यावा॑पृथि॒वी स्वि॑ष्ट॒कृद्दे॒वेभ्यो॒ इन्द्र॒ आज्ये॑न ह॒विषा॑ भू॒त्स्वाहा॑ ।
Sentence: d    
सं ज्योति॑षा॒ ज्योतिः॑ ।।

Verse: 10 
Sentence: a    
मयी॒दमिन्द्र॑ इन्द्रि॒यं द॑धात्व॒स्मान्रायो॑ म॒घवा॑नँ सचन्ताम् ।
Sentence: b    
अ॒स्माकँ॑ सन्त्वा॒शिषः॑ स॒त्या नः॑ सन्त्वा॒शिषः॑ ।
Sentence: c    
उप॑ह्नुता पृथि॒वी मा॒तोप॒ मां पृ॑थि॒वी मा॒ता ह्व॑यताम् ।
Sentence: d    
अ॒ग्निराग्नी॑ध्रा॒त्स्वाहा॑ ।।

Verse: 11 
Sentence: a    
उप॑हूतो द्यौष्पि॒तोप॒ मां द्यौ॑ष्पि॒ता ह्व॑यताम॒ग्निराग्नी॑ध्रा॒त्स्वाहा॑ ।
Sentence: b    
दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: c    
प्रति॑ गृह्णामि ।
Sentence: d    
अ॒ग्नेष्ट्वा॒स्ये॑न॒ प्राश्ना॑मि ।।

Verse: 12 
Sentence: a    
ए॒तं ते॑ देव सवितर्य॒ज्ञं प्राहु॒र्बृह॒स्पत॑ये ब्र॒ह्मणे॑ ।
Sentence: b    
तेन॑ य॒ज्ञम॑व॒ तेन॑ य॒ज्ञप॑तिं॒ तेन॒ माम॑व ।।

Verse: 13 
Sentence: a    
मनो॑ जू॒तिर्जु॑षता॒माज्य॑स्य॒ बृह॒स्पति॑र्य॒ज्ञमि॒मं त॑नोतु ।
Sentence: b    
अरि॑ष्टं य॒ज्ञँ समि॒मं द॑धातु॒ विश्वे॑ दे॒वास॑ इ॒ह मा॑दयन्ता॒मो३ं॒ प्र ति॑ष्ठ ।।

Verse: 14 
Sentence: a    
ए॒षा ते॑ अग्ने स॒मित्तया॒ वर्ध॑स्व॒ चा च॑ प्यायस्व ।
Sentence: b    
व॑र्धिषी॒महि॑ च व॒यमा च॑ प्यासिषीमहि ।
Sentence: c    
अग्ने॑ वाजजि॒द्वाजं॑ त्वा ससृ॒वाँसं॑ वाज॒जितँ॒ सं मा॑र्ज्मि ।।

Verse: 15 
Sentence: a    
अ॒ग्नीषोम॑यो॒रुज्जि॑ति॒मनूज्जे॑षं॒ वाज॑स्य मा प्रस॒वेन॒ प्रोहा॑मि ।
Sentence: b    
अ॒ग्नीषोमौ॒ तमप॑ नुदतां॒ यो॒ ऽस्मान्द्वेष्टि॒ यं च॑ व॒यं द्वि॒ष्मो वाज॑स्यैनं प्रस॒वेनापो॑हमि ।
Sentence: c    
इ॑न्द्रा॒ग्न्योरुज्जि॑ति॒मनूज्जे॑षं॒ वाज॑स्य मा प्रस॒वेन॒ प्रोहा॑मि ।
Sentence: d    
इ॑न्द्रा॒ग्नी तमप॑ नुदतां॒ यो॒ स्मान्द्वेष्टि॒ यं च॑ व॒यं द्वि॒ष्मो वाज॑स्यैनं प्रस॒वेनापो॑मि ।।

Verse: 16 
Sentence: a    
वसु॑भ्यस्त्वा ।
Sentence: b    
रु॒द्रेभ्य॑स्त्वा ।
Sentence: c    
आ॑दि॒त्येभ्य॑स्त्वा ।
Sentence: d    
सं जा॑नाथां द्यावापृथिवी ।
Sentence: e    
मि॒त्रावरु॑णौ त्वा॒ वृष्ट्या॑वताम् ।
Sentence: f    
व्यन्तु॒ वयो॒ क्तँ रिहा॑णाः ।
Sentence: g    
म॒रुतां॑ पृष॒तीर्ग॑च्छ व॒शा पृश्नि॑र्भू॒त्वा दिवं॑ गच्छ॒ ततो॑ नो॒ वृष्टि॒मा व॑ह ।
Sentence: h    
च॑क्षु॒ष्पा अ॑ग्ने सि॒ चक्षु॑र्मे पाहि ।।

Verse: 17 
Sentence: a    
यं प॑रि॒धिं प॒र्यध॑त्था॒ अग्ने॑ देव पा॒णिभि॑र्गु॒ह्यमा॑नः ।
Sentence: b    
तं त॑ ए॒तमनु॒ जोषं॑ भरा॒म्य्नेत्त्वद॑पचे॒तया॑तै ।
Sentence: c    
अ॒ग्नेः प्रि॒यं पाथो पी॑तम् ।।

Verse: 18 
Sentence: a    
सँ॑स्र॒वभा॑गा स्थे॒षा बृ॒हन्तः॑ प्रस्तरे॒ष्ठाः प॑रि॒धेया॑श्च दे॒वाः ।
Sentence: b    
इ॒मां वाच॑म॒भि विश्वे॑ गृ॒णन्त॑ आ॒सद्या॒स्मिन्ब॒र्हिषि॑ मादयध्वम् ।
Sentence: c    
स्वाहा॒ वाट् ।।

Verse: 19 
Sentence: a    
घृ॒ताची॑ स्थो॒ धुर्यौ॑ पातँ सु॒म्ने स्थः॑ सु॒म्ने मा॑ धत्तम् ।
Sentence: b    
यज्ञ॒ नम॑श्च त॒ उप॑ च य॒ज्ञस्य॑ शि॒वे सं ति॑ष्ठस्व॒ स्वि॑ष्टे मे॒ संति॑ष्ठस्व ।।

Verse: 20 
Sentence: a    
अग्ने॑ दब्धायो शीतम पा॒हि मा॑ दि॒द्योः ।
Sentence: b    
पा॒हि प्रसि॑त्यै ।
Sentence: c    
पा॒हि दुरि॑ष्ट्यै ।
Sentence: d    
पा॒हि दु॑रद्म॒न्या अ॑वि॒षं नः॑ पि॒तुं कृ॑णु ।
Sentence: e    
सु॒षदा॒ योनौ॒ स्वाहा॒ वाट् ।
Sentence: f    
अ॒ग्नये॑ संवे॒शप॑तये॒ स्वाहा॑ ।
Sentence: g    
सर॑स्वत्यै यशोभ॒गिन्यै॒ स्वाहा॑ ।।

Verse: 21 
Sentence: a    
वे॒दो॑ सि॒ येन॒ त्वं दे॑व वेद दे॒वेभ्यो॑ वे॒दो भ॑व॒स्तेन॒ मह्यं॑ वे॒दो भू॑याः ।
Sentence: b    
देवा॑ गातुविदो गा॒तुं वि॒त्त्वा गा॒तुमि॑त ।
Sentence: c    
मन॑सस्पत इ॒मं दे॑व य॒ज्ञँ स्वाहा॒ वाते॑ धाः ।।

Verse: 22 
Sentence: a    
सं ब॒र्हिर॑ङ्क्ताँ ह॒विषा॑ घृ॒तेन॒ समा॑दित्यै॒र्वसु॑भिः॒ सं म॒रुद्भिः॑ ।
Sentence: b    
समिन्द्रो॑ वि॒श्वदे॑वेभिरङ्क्तां दि॒व्यं नभो॑ गच्छतु॒ यत्स्वाहा॑ ।।

Verse: 23 
Sentence: a    
कस्त्वा॒ वि मु॑ञ्चति॒ स त्वा॒ वि मु॑ञ्चति॒ कस्मै॑ त्वा॒ वि मु॑ञ्चति॒ तस्मै॑ त्वा॒ वि मु॑ञ्चति ।
Sentence: b    
पोषा॑य ।
Sentence: c    
रक्ष॑सां भा॒गो॑ सि ।।

Verse: 24 
Sentence: a    
सं वर्च॑सा॒ पय॑सा॒ सं त॒नूभि॒रग॑न्महि॒ मन॑सा॒ सँ शि॒वेन॑ ।
Sentence: b    
त्वष्टा॑ सु॒दत्रो॒ वि द॑धातु॒ रायो नु॑मार्ष्टि त॒न्वो॒ यद्विलि॑ष्टम् ।।

Verse: 25 
Sentence: a    
दि॒वि विष्णु॒र्व्य॑क्रँस्त॒ जाग॑तेन॒ छन्द॑सा॒ ततो॒ निर्भ॑क्तो॒ यो॒ स्मान्द्वेष्टि॒ यं च॑ व॒यं द्वि॒ष्मः ।
Sentence: b    
अ॒न्तरि॑क्षे॒ विष्णु॒र्व्य॑क्रँस्त॒ जाग॑तेन॒ छन्द॑सा॒ ततो॒ निर्भ॑क्तो॒ यो॒ स्मान्द्वेष्टि॒ यं च॑ व॒यं द्वि॒ष्मः ।
Sentence: c    
पृ॑थि॒व्यां विष्णु॒र्व्य॑क्रँस्त॒ जाग॑तेन॒ छन्द॑सा॒ ततो॒ निर्भ॑क्तो॒ यो॒ स्मान्द्वेष्टि॒ यं च॑ व॒यं द्वि॒ष्मः ।
Sentence: d    
अ॒स्मादन्ना॑त् ।
Sentence: e    
अस्यै प्रति॒ष्ठायै॑ ।
Sentence: f    
अग॑न्म॒ स्वः॑ ।
Sentence: g    
सं ज्योति॑षाभूम ।।

Verse: 26 
Sentence: a    
स्व॑य॒म्भूर॑सि॒ श्रेष्ठो॑ र॒श्मिर्व॑र्चो॒दा अ॑सि॒ वर्चो॑ मे देहि ।
Sentence: b    
सूर्य॑स्या॒वृत॒मन्वाव॑र्ते ।।

Verse: 27 
Sentence: a    
अग्ने॑ गृहपते सुगृहप॒तिस्त्वया॑ग्ने॒ हं गृ॒हप॑तिना भूयासँ सुगृहप॒तिस्त्वं मया॑ग्ने गृ॒हप॑तना भूयाः ।
Sentence: b    
अ॑स्थू॒रि णौ॒ गार्ह॑पत्यानि सन्तु श॒तँ हिमाः॑ ।
Sentence: c    
सूर्य॑स्या॒वृत॒मन्वाव॑र्ते ।।

Verse: 28 
Sentence: a    
अग्ने॑ व्रतपते व्र॒तम॑चारिषं॒ तद॑शकं॒ तन्मे॑ राधि ।
Sentence: b    
इ॒दम॒हं य ए॒वास्मि॒ सो॑ स्मि ।।

Verse: 29 
Sentence: a    
अ॒ग्नये॑ कव्य॒वाह॑नाय॒ स्वाहा॑ ।
Sentence: b    
सोमा॑य पितृ॒मते॒ स्वाहा॑ ।
Sentence: c    
अप॑हता॒ असु॑रा॒ रक्षाँ॑सि वेदि॒षदः॑ ।।

Verse: 30 
Sentence: a    
ये रू॒पाणि॑ प्रतिमु॒ञ्चमा॑ना॒ असु॑राः॒ सन्तः॑ स्व॒धया॒ चर॑न्ति ।
Sentence: b    
प॑रा॒पुरो॑ नि॒पुरो॒ ये भर॑न्त्य॒ग्निष्टान्लो॒कात्प्र णु॑दात्य॒स्मात् ।।

Verse: 31 
Sentence: a    
अत्र॑ पितरो मादयध्वं यथाभा॒गमा वृ॑षायध्वम् ।
Sentence: b    
अमी॑मदन्त पि॒तरो॑ यथाभा॒गमा वृ॑षायिषत ।।

Verse: 33 
Sentence: a    
आ ध॑त्त पितरो॒ गर्भं॑ कुमा॒रं पुष्क॑रस्रजम् ।
Sentence: b    
यथे॒ह पुरु॒षो स॑त् ।।

Verse: 34 
Sentence: a    
ऊर्जं॑ वहन्तीर॒मृतं॑ घृ॒तं पयः॑ कि॒लालं॑ परि॒स्रुत॑म् ।
Sentence: b    
स्व॒धा स्थ॑ त॒र्पय॑त मे पि॒तॄन् ।।


Next part



This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.