TITUS
White Yajur-Veda: Vajasaneyi-Samhita (Madhyandina)
Part No. 3
Paragraph: 3
Verse: 1
Sentence: a
स॒मिधा॒ग्निं दु॑वस्यत घृतैर्बोधय॒ताति॑थिम् ।
Sentence: b
आस्मि॑न्ह॒व्या जु॑होतन ।।
Verse: 2
Sentence: a
सुस॑मिद्धाय शो॒चिषे॑ घृ॒तं ती॒व्रं जु॑होतन ।
Sentence: b
अ॒ग्नये॑ जा॒तवे॑दसे ।।
Verse: 3
Sentence: a
तं त्वा॑ स॒मिद्भि॑रङ्गिरो घृ॒तेन॑ वर्धयामसि ।
Sentence: b
बृ॒हच्छो॑चा यविष्ट्य ।।
Verse: 4
Sentence: a
उप॑ त्वाग्ने ह॒विष्म॑तीर्घृ॒ताची॑र्यन्तु हर्यत ।
Sentence: b
जु॒षस्व॑ स॒मिधो॒ मम॑ ।।
Verse: 5
Sentence: a
भूर्भुवः॒ स्वः॑ ।
Sentence: b
द्यौ॑रिव भू॒म्ना पृ॑थि॒वीव॑ वरि॒म्णा ।
Sentence: c
तस्या॑स्ते पृथिवि देवयजनि पृ॒ष्ठे॒ ग्निम॑न्ना॒दम॒न्नाद्या॒या द॑धे ।।
Verse: 6
Sentence: a
आयं गौः॒ पृश्नि॑रक्रमी॒दस॑दन्मा॒तरं॑ पु॒रः ।
Sentence: b
पि॒तरं॑ च प्र॒यन्त्स्वः॑ ।।
Verse: 7
Sentence: a
अ॒न्तश्च॑रति रोच॒नास्य प्रा॒णादपा॑न॒ती ।
Sentence: b
व्य॑ख्यन्महि॒षो दिव॑म् ।।
Verse: 8
Sentence: a
त्रिँ॒शद्धाम॒ वि रा॑जति॒ वाक्प॑त॒ङ्गाय॑ धीयते ।
Sentence: b
प्रति॒ वस्तो॒रह॒ द्युभिः॑ ।।
Verse: 9
Sentence: a
अ॒ग्निर्ज्योति॒र्ज्योति॑र॒ग्निः स्वाहा॑ ।
Sentence: b
सूर्यो॒ ज्योति॒र्ज्योतिः॒ सूर्यः॒ स्वाहा॑ ।
Sentence: c
अ॒ग्निर्वर्चो॒ ज्योति॒र्वर्चः॒ स्वाहा॑ ।
Sentence: d
सूर्यो॒ वर्चो॒ ज्योति॒र्वर्चः॒ स्वाहा॑ ।
Sentence: e
ज्योतिः॒ सूर्यः॒ सूर्यो॒ ज्योतिः॒ स्वाहा॑ ।।
Verse: 10
Sentence: a
स॒जूर्दे॒वेन॑ सवि॒त्रा स॒जू रात्र्येन्द्र॑वत्या ।
Sentence: b
जु॑षा॒णो अ॒ग्निर्वे॑तु॒ स्वाहा॑ ।
Sentence: c
स॒जूर्दे॒वेन॑ सवि॒त्रा स॒जू उ॒षसेन्द्र॑वत्या ।
Sentence: d
जु॑षा॒णः सूर्यो॑ वेतु॒ स्वाहा॑ ।।
Verse: 11
Sentence: a
उ॑पप्र॒यन्तो॑ अध्व॒रं मन्त्रं॑ वोचेमा॒ग्नये॑ ।
Sentence: b
आ॒रे अ॒स्मे च॑ शृण्व॒ते ।।
Verse: 12
Sentence: a
अ॒ग्निर्मू॒र्धा दि॒वः क॒कुत्पतिः॑ पृथि॒व्या अ॒यम् ।
Sentence: b
अ॒पाँ रेताँ॑सि जिन्वति ।।
Verse: 13
Sentence: a
उ॒भा वा॑मिन्द्राग्नी आहु॒वध्या॑ उ॒भा राध॑सः स॒ह मा॑द॒यध्यै॑ ।
Sentence: b
उ॒भा दा॒तारा॑वि॒षाँ र॑यी॒णामु॒भा वाज॑स्य सा॒तये॑ हुवे वाम् ।।
Verse: 14
Sentence: a
अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः ।
Sentence: b
तं जा॒नन्न॑ग्न आरो॒हाथा॑ नो वर्धया र॒यिम् ।।
Verse: 15
Sentence: a
अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्यः॑ ।
Sentence: b
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॑ वि॒शेवि॑शे ।।
Verse: 16
Sentence: a
अ॒स्य प्र॒त्नामनु॒ द्युतँ॑ शु॒क्रं दु॑दुह्रे॒ अह्र॑यः ।
Sentence: b
पयः॑ सहस्र॒सामृषि॑म् ।।
Verse: 17
Sentence: a
त॑नू॒पा अ॑ग्ने सि त॒न्वं॑ मे पाहि ।
Sentence: b
आ॑यु॒र्दा अ॑ग्ने॒ स्यायु॑र्मे देहि ।
Sentence: c
व॑र्चो॒दा अ॑ग्ने सि॒ वर्चो॑ मे देहि ।
Sentence: d
अग्ने॒ यन्मे॑ त॒न्वा॑ ऊ॒नं तन्मे॒ आ पृ॑ण ।।
Verse: 18
Sentence: a
इन्धा॑नास्त्वा श॒तँ हिमा॑ द्यु॒मन्तँ॒ समि॑धीमहि ।
Sentence: b
वय॑स्वन्तो वय॒स्कृतँ॒ सह॑स्वन्तः सह॒स्कृत॑म् ।
Sentence: c
अग्ने॑ सपत्न॒दम्भ॑न॒मद॑ब्धासो॒ अदा॑भ्यम् ।
Sentence: d
चित्रा॑वसो स्व॒स्ति ते॑ पा॒रम॑शीय ।।
Verse: 19
Sentence: a
सं त्वम॑ग्ने॒ सूर्य॑स्य॒ वर्च॑सागथाः॒ समृषी॑णाँ स्तु॒तेन॑ ।
Sentence: b
सं प्रि॒येण॒ धाम्ना॒ सम॒हमायु॑षा॒ सं वर्च॑सा॒ सं प्र॒जया॒ सँ रा॒यस्पोषे॑ण ग्मिषीय ।।
Verse: 20
Sentence: a
अन्ध॒ स्थान्धो॑ वो भक्षीय॒ मह॑ स्थ॒ महो॑ वो भक्षी॒योर्ज॒ स्थोर्जं॑ वो भक्षीय रा॒यस्पोष॑ स्थ रा॒यस्पोषं॑ वो भक्षीय ।।
Verse: 21
Sentence: a
रेव॑ती॒ रम॑ध्वम॒स्मिन्योना॑व॒स्मिन्गो॒ष्ठे॒ स्मिंल्लो॒के॒ स्मिन्क्षये॑ ।
Sentence: b
इहै॒व स्त॒ माप॑गात ।।
Verse: 22
Sentence: a
सँ॑हि॒तासि॑ विश्वरू॒प्यू॒र्जा मावि॑श गौप॒त्येन॑ ।
Sentence: b
उप॑ त्वाग्ने दि॒वेदि॑वे॒ दोषा॑वस्तर्धि॒या व॒यम् ।
Sentence: c
नमो॒ भर॑न्त॒ एम॑सि ।।
Verse: 23
Sentence: a
राज॑न्तमध्व॒राणां॑ गो॒पामृ॒तस्य॒ दीदि॑विम् ।
Sentence: b
वर्ध॑माणँ॒ स्वे दमे॑ ।।
Verse: 24
Sentence: a
स नः॑ पि॒तेव॑ सू॒नवे ग्ने॑ सूपाय॒नो भ॑व ।
Sentence: b
सच॑स्वा नः स्व॒स्तये॑ ।।
Verse: 25
Sentence: a
अग्ने॒ त्वं नो॒ अन्त॑म उ॒त त्रा॒ता शि॒वो भ॑वा वरू॒थ्यः॑ ।
Sentence: b
वसु॑र॒ग्निर्वसुश्र॑वा॒ अच्छा॑नक्षि द्यु॒मत्त॑मँ र॒यिं दाः॑ ।।
Verse: 26
Sentence: a
तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ।
Sentence: b
स नो॑ बोधि श्रु॒धी हव॑मुरु॒ष्या णो॑ अधाय॒तः सम॑स्मात् ।।
Verse: 27
Sentence: a
इड॒ एह्यदि॑त॒ एहि॑ ।
Sentence: b
काम्या॒ एत॑ ।
Sentence: c
मयि॑ वः काम॒धर॑णं भूयात् ।।
Verse: 28
Sentence: a
सो॒मानँ॒ स्वर॑णं कृणु॒हि ब्र॑ह्मणस्पते ।
Sentence: b
क॒क्षीव॑न्तं॒ य औ॑शि॒जः ।।
Verse: 29
Sentence: a
यो रे॒वान्यो अ॑मीव॒हा व॑सु॒वित्पु॑ष्टि॒वर्ध॑नः ।
Sentence: b
स नः॑ सिषक्तु॒ यस्तु॒रः ।।
Verse: 30
Sentence: a
मा नः॒ शँसो॒ अर॑रुषो धू॒र्तिः प्र ण॒ङ्नर्त्य॑स्य ।
Sentence: b
रक्षा॑ णो ब्रह्मणस्पते ।।
Verse: 31
Sentence: a
महि॑ त्री॒णामवो॑ स्तु द्यु॒क्षं मि॒त्रस्या॑र्य॒म्णः ।
Sentence: b
दु॑रा॒धर्षं॒ वरु॑णस्य ।।
Verse: 32
Sentence: a
न॒हि तेषा॑म॒मा च॒न नाध्व॑सु वार॒णेषु॑ ।
Sentence: b
ईशे॑ रि॒पुर॒घशँ॑सः ।।
Verse: 33
Sentence: a
ते हि पु॒त्रासो॒ अदि॑तेः॒ प्र जी॒वसे॒ मर्त्या॑य ।
Sentence: b
ज्योति॒र्यच्छ॒न्त्यज॑स्रम् ।।
Verse: 34
Sentence: a
क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ ।
Sentence: b
उ॒पोपेन्नु म॑घव॒न्भूय॒ इन्नु ते॒ दानं॑ दे॒वस्य॑ पृच्यते ।।
Verse: 35
Sentence: a
तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि ।
Sentence: b
धियो॒ यो नः॑ प्रचो॒दय॑त् ।।
Verse: 36
Sentence: a
परि॑ ते दू॒डभो॒ रथो॒ स्माँ अ॑श्नोतु वि॒श्वतः॑ ।
Sentence: b
येन॒ रक्ष॑सि दा॒शुषः॑ ।।
Verse: 37
Sentence: a
भूर्भुवः॒ स्वः॑ सुप्र॒जाः प्र॒जाभि॑ स्याँ सु॒वीरो॑ वीरैः सु॒पोषः॒ पोषैः॑ ।
Sentence: b
नर्य॑ प्र॒जां मे॑ पाहि ।
Sentence: c
शँस्य॑ प॒शून्मे॑ पाहि ।
Sentence: d
अथ॑र्य पि॒तुं मे॑ पाहि ।।
Verse: 38
Sentence: a
आग॑न्म वि॒श्ववे॑दसम॒स्मभ्यं॑ वसु॒वित्त॑मम् ।
Sentence: b
अग्ने॑ सम्राड॒भि द्यु॒म्नम॒भि सह॒ आ य॑च्छस्व ।।
Verse: 39
Sentence: a
अ॒यम॒ग्निर्गृ॒हप॑ति॒र्गार्ह॑पत्यः प्र॒जाया॑ वसु॒वित्त॑मः ।
Sentence: b
अग्ने॑ गृहपते॒ भि द्यु॒म्नम॒भि सह॒ आ य॑च्छस्व ।।
Verse: 40
Sentence: a
अ॒यम॒ग्निः पु॑री॒ष्यो॑ रयि॒मान्पु॑ष्टि॒वर्ध॑नः ।
Sentence: b
अग्ने॑ पुरीष्या॒भि द्यु॒म्नम॒भि सह॒ आ य॑च्छस्व ।।
Verse: 41
Sentence: a
गृहा॒ मा बि॑भीत॒ मा वे॑पध्व॒मूर्जं॑ बिभ्रत॒ एम॑सि ।
Sentence: b
ऊर्जं॒ बिभ्र॑द्वः सु॒मनाः॑ सुमे॒धा गृ॒हाऐ॑मि॒ मन॑सा॒ मोद॑मानः ।।
Verse: 42
Sentence: a
येषा॑म॒ध्येति॑ प्र॒वस॒न्येषु॑ सौमन॒सो ब॒हुः ।
Sentence: b
गृ॒हानुप॑ ह्वयामहे॒ ते नो॑ जानन्तु जान॒तः ।।
Verse: 43
Sentence: a
उप॑हूता इ॒ह गाव॒ उप॑हूता अजा॒वयः॑ ।
Sentence: b
अथो॒ अन्न॑स्य की॒लाल॒ उप॑हूतो गृ॒हेषु॑ नः ।
Sentence: c
क्षेमा॑य वः॒ शान्त्यै॒ प्र प॑द्ये शि॒वँ श॒ग्मँ श॒म्योः श॒म्योः ।।
Verse: 44
Sentence: a
प्र॑घा॒सिनो॑ हवामहे म॒रुत॑श्च रि॒शाद॑सः ।
Sentence: b
क॑र॒म्भेण॑ स॒जोष॑सः ।।
Verse: 45
Sentence: a
यद्ग्रामे॒ यदर॑ण्ये॒ यत्स॒भायां॒ यदिन्द्रि॑ये ।
Sentence: b
यदेन॑श्चकृ॒मा व॒यमि॒दं तदव॑ यजामहे॒ स्वाहा॑ ।।
Verse: 46
Sentence: a
मो षू ण॑ इ॒न्द्रात्र॑ पृ॒त्सु देवै॒रस्ति॒ हि ष्मा॑ ते शुष्मिन्नव॒याः ।
Sentence: b
म॒हश्चि॒द्यस्य॑ मी॒ढुषो॑ य॒व्या ह॒विष्म॑तो म॒रुतो॒ वन्द॑ते॒ गीः ।।
Verse: 47
Sentence: a
अक्र॒न्कर्म॑ कर्म॒कृतः॑ स॒ह वा॒चा म॑यो॒भुवा॑ ।
Sentence: b
दे॒वेभ्यः॒ कर्म॑ कृ॒त्वास्तं॒ प्रेत॑ सचाभुवः ।।
Verse: 48
Sentence: a
अव॑भृथ निचुम्पुण निचे॒रुर॑सि निचुम्पु॒णः ।
Sentence: b
अव॑ देवैर्दे॒वकृ॑त॒मेनो॑ यासिष॒मव॒ मर्त्यै॒र्मर्त्य॑कृतम् ।
Sentence: c
पु॑रु॒राव्णो॑ देव रि॒षस्पा॑हि ।।
Verse: 49
Sentence: a
पू॒र्णा द॑र्वि॒ परा॑ पत॒ सुपू॑र्णा॒ पुन॒रा प॑त ।
Sentence: b
व॒स्नेव॒ वि क्री॑णावहा॒ इष॒मूर्जँ॑ शतक्रतो ।।
Verse: 50
Sentence: a
दे॒हि मे॒ ददा॑मि ते॒ नि मे॑ धेहि॒ नि ते॑ दधे ।
Sentence: b
नि॒हारं॑ च॒ हरा॑सि मे नि॒हारं॒ निह॑राणि ते॒ स्वाहा॑ ।।
Verse: 51
Sentence: a
अक्ष॒न्नमी॑मदन्त॒ ह्यव॑ प्रि॒या अ॑भूषत ।
Sentence: b
अस्तो॑षत॒ स्वभा॑नवो॒ विप्रा॒ निवि॑ष्ठया म॒ती योजा॒ न्वि॑न्द्र ते॒ हरी॑ ।।
Verse: 52
Sentence: a
सु॑सं॒दृशं॑ त्वा व॒यं मघ॑वन्वन्दिषी॒महि॑ ।
Sentence: b
प्र नू॒नं पू॒र्णब॑न्धुर स्तु॒तो या॑सि॒ वशाँ॒ अनु॒ योजा॒ न्वि॑न्द्र ते॒ हरी॑ ।।
Verse: 53
Sentence: a
मनो॒ न्वाह्व॑महे नारा॒शँसे॑न॒ स्तोमे॑न ।
Sentence: b
पि॑तॄ॒णां च॒ मन्म॑भिः ।।
Verse: 54
Sentence: a
आ न॑ एतु॒ मनः॒ पुनः॒ क्रत्वे॒ दक्षा॑य ह॒विषे॑ ।
Sentence: b
ज्योक्च॒ सूर्यं॑ दृ॒शे ।।
Verse: 55
Sentence: a
पुन॑र्नः पितरो॒ मनो॒ ददा॑तु दैव्यो॒ जनः॑ ।
Sentence: b
जी॒वं व्रातँ॑ सचेमहि ।।
Verse: 56
Sentence: a
व॒यँ सो॑म व्र॒ते तव॒ मन॑स्त॒नूषु॒ बिभ्र॑तः ।
Sentence: b
प्र॒जाव॑न्तः सचेमहि ।।
Verse: 57
Sentence: a
ए॒ष ते॑ रुद्र भा॒गः स॒ह स्वस्राम्बि॑कया॒ तं जु॑षस्व॒ स्वाहा॑ ।
Sentence: b
ए॒ष ते॑ रुद्र भा॒ग आ॒खुस्ते॑ प॒शुः ।।
Verse: 58
Sentence: a
अव॑ रु॒द्रम॑दीम॒ह्यव॑ दे॒वं त्र्य॑म्बकम् ।
Sentence: b
यथा॑ नो॒ वस्य॑स॒स्कर॒द्यद्यथा॑ नः॒ श्रेय॑स॒स्कर॒द्यद्यथा॑ नो व्यवसा॒यया॑त् ।।
Verse: 59
Sentence: a
भे॑ष॒जम॑सि भेष॒जं गवे श्वा॑य॒ पुरु॑षाय भेष॒जम् ।
Sentence: b
सु॒खं मे॒षाय॑ मेष्यै ।।
Verse: 60
Sentence: a
त्र्य॑म्बकं यजामहे सुग॒न्धिं पु॑ष्टि॒वर्ध॑नम् ।
Sentence: b
उ॑र्वारु॒कमि॑व॒ बन्ध॑नान्मृ॒त्योर्मु॑क्षीय॒ मामृता॑त् ।
Sentence: c
त्र्य॑म्बकं यजामहे सुग॒न्धिं प॑ति॒वेद॑नम् ।
Sentence: d
उ॑र्वारु॒कमि॑व॒ बन्ध॑नादि॒तो मु॑क्षीय॒ मामुतः॑ ।।
Verse: 61
Sentence: a
ए॒तत्ते॑ रुद्राव॒सं तेन॑ प॒रो मूज॑व॒तो ती॑हि ।
Sentence: b
अव॑ततधन्वा॒ पिना॑कावसः॒ कत्ति॑वासा॒ अहिँ॑सन्नः शि॒वो ती॑हि ।।
Verse: 62
Sentence: a
त्र्या॑यु॒षं ज॒मद॑ग्नेः क॒श्यप॑स्य त्र्यायु॒षम् ।
Sentence: b
यद्दे॒वेषु॑ त्र्यायु॒षं तन्नो॑ अस्तु त्र्यायु॒षम् ।।
Verse: 63
Sentence: a
शि॒वो नामा॑सि॒ स्वधि॑तिस्ते पि॒ता नम॑स्ते अस्तु॒ मा मा॑ हिँसीः ।
Sentence: b
नि व॑र्तयाम्युषे॒ न्नाद्या॑य॒ प्रजन॑नाय रा॒यस्पोषा॑य सुप्रजा॒स्त्वाय॑ सु॒वीर्या॑य ।।
This text is part of the
TITUS
edition of
White Yajur-Veda: Vajasaneyi-Samhita (Madhyandina)
.
Copyright
TITUS Project
, Frankfurt a/M, 10.12.2008. No parts of this document may be republished in any form without prior permission by the copyright holder.