TITUS
White Yajur-Veda: Vajasaneyi-Samhita (Madhyandina)
Part No. 6
Previous part

Paragraph: 6 

Verse: 1 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    आ द॑दे॒ नार्य॑सि ।
Sentence: c    इ॒दम॒हँ रक्ष॑सां ग्री॒ वाअपि॑ कृन्तामि ।
Sentence: d    यवो॑ सि य॒वया॒स्मद्द्वेषो॑ य॒वयारा॑तीः ।
Sentence: e    दि॒वे त्वा॒न्तरि॑क्षाय त्वा पृथिव्यै त्वा ।
Sentence: f    शुन्ध॑न्तां लो॒काः पि॑तृ॒षद॑नाः ।
Sentence: g    पि॑तृ॒षद॑नमसि ।।

Verse: 2 
Sentence: a    अ॑ग्रे॒णीर॑सि स्वावे॒श उ॑न्नेतॄ॒णामे॒तस्य॑ वित्ता॒दधि॑ त्वा स्थास्यति ।
Sentence: b    दे॒वस्त्वा॑ सवि॒ता मध्व॑नक्तु ।
Sentence: c    सु॑पिप्प॒लाभ्यस्त्वौषधीभ्यः ।
Sentence: d    द्यामग्रे॑णास्पृक्ष॒ आन्तरि॑क्षं॒ मध्ये॑नाप्राः पृथि॒वीमुप॑रेणादृँहीः ।।

Verse: 3 
Sentence: a    या ते॒ धामा॑न्यु॒श्मसि॒ गम॑ध्यै॒ यत्र॒ गावो॒ भूरि॑शृङ्गा अ॒यासः॑ ।
Sentence: b    अत्राह॒ तदु॑रुगा॒यस्य॒ विष्णोः॑ पर॒मं प॒दमव॑ भारि॒ भूरि॑ ।
Sentence: c    ब्र॑ह्म॒वनि॑ त्वा क्षत्र॒वनि॑ रायस्पोष॒वनि॒ पर्यू॑हामि ।
Sentence: d    ब्रह्म॑ दृँह क्ष॒त्रं दृँ॒हायु॑र्दृँह प्र॒जां दृँ॑ह ।।

Verse: 4 
Sentence: a    विष्णोः॒ कर्मा॑णि पश्यत॒ यतो॑ व्र॒तानि॑ पस्प॒शे ।
Sentence: b    इन्द्र॑स्य॒ युज्यः॒ सखा॑ ।।

Verse: 5 
Sentence: a    तद्विष्णोः॑ पर॒मं प॒दँ सदा॑ पश्यन्ति सू॒रयो॑ दि॒वी॑व॒ चक्षु॒रात॑तम् ।।

Verse: 6 
Sentence: a    प॑रि॒वीर॑सि॒ परि॑ त्वा दैवी॒र्विशो॑ व्ययन्तां॒ परी॒मं यज॑मानँ॒ रायो॑ मनु॒ष्या॑णाम् ।
Sentence: b    दि॒वः सू॒नुर॑सि ।
Sentence: c    ए॒ष ते॑ पृथि॒व्यां लो॒क आ॑र॒ण्यस्ते॑ प॒शुः ।।

Verse: 7 
Sentence: a    उ॑पा॒वीर॑सि ।
Sentence: b    उप॑ दे॒वान्दै॑वी॒र्विशः॒ प्रागु॑रु॒शिजो॒ वह्नि॑तमान् ।
Sentence: c    देव॑ त्वष्ट॒र्वसु॑ रम ह॒व्या ते॑ स्वदन्ताम् ।।

Verse: 8 
Sentence: a    रेव॑ती॒ रम॑ध्वं॒ बृह॑स्पते धा॒रया॒ वसू॑नि ।
Sentence: b    ऋ॒तस्य॑ त्वा देवहविः॒ पाशे॑न॒ प्रति॑ मुञ्चामि॒ धर्षा॒ मानु॑षः ।।

Verse: 9 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    अ॒ग्नीषोमा॑भ्यां॒ जुष्टं॒ नि यु॑नज्मि ।
Sentence: c    अ॒द्भ्यस्त्वौ॑षधी॒भ्यो नु॑ त्वा मा॒ता म॑न्यता॒मनु॑ पि॒तानु॒ भ्राता॑ सग॒र्भ्यो नु॒ सखा॒ सयू॑थ्यः ।
Sentence: d    अ॒ग्नीषोमा॑भ्यां त्वा॒ जुष्टं॒ प्रोक्षा॑मि ।।

Verse: 10 
Sentence: a    अ॒पां पे॒रुर॑सि ।
Sentence: b    आपो॑ दे॒वीः स्व॑दन्तु स्वा॒त्तं चि॒त्सद्दे॑वह॒विः ।
Sentence: c    सं ते॑ प्रा॒णो वाते॑न गच्छताँ॒ समङ्गा॑नि॒ यज॑त्रैः॒ सं य॒ज्ञप॑तिरा॒शिषा॑ ।।

Verse: 11 
Sentence: a    घृ॒तेनाक्तौ प॒शूँस्त्रा॑येथाम् ।
Sentence: b    रेव॑ति॒ यज॑माने प्रि॒यं धा आ वि॑श ।
Sentence: c    उ॒रोर॒न्तरि॑क्षात्स॒जूर्दे॒वेन॒ वाते॑नास्य ह॒विष॒स्त्मना॑ यज॒ सम॑स्य त॒न्वा॑ भव ।
Sentence: d    वर्षो॒ वर्षी॑यसि य॒ज्ञे य॒ज्ञप्तिं॑ धाः ।
Sentence: e    स्वाहा॑ दे॒वेभ्यः॑ ।
Sentence: f    दे॒वेभ्यः॒ स्वाहा॑ ।।

Verse: 12 
Sentence: a    माहि॑र्भू॒र्मा पृदा॑कुः ।
Sentence: b    नम॑स्त आतानान॒र्वा प्रेहि॑ ।
Sentence: c    घृ॒तस्य॑ कु॒ल्या उप॑ ऋ॒तस्य॒ पथ्या॒ अनु॑ ।।

Verse: 13 
Sentence: a    देवी॑रापः शु॒द्धा वो॑ढ्वँ॒ सुप॑रिविष्टा दे॒वेषु॑ ।
Sentence: b    सुप॑रिविष्टा व॒यं प॑रिवे॒ष्टारो॑ भूयास्म ।।

Verse: 14 
Sentence: a    वाचं॑ ते शुन्धामि ।
Sentence: b    प्रा॒णं ते॑ शुन्धामि ।
Sentence: c    चक्षु॑स्ते शुन्धामि ।
Sentence: d    श्रोत्रं॑ ते शुन्धामि ।
Sentence: e    नाभिं॑ ते शुन्धामि ।
Sentence: f    मेढ्रं॑ ते शुन्धामि ।
Sentence: g    पा॒युं ते॑ शुन्धामि ।
Sentence: h    च॒रित्राँ॑स्ते शुन्धामि ।।

Verse: 15 
Sentence: a    मन॑स्त॒ आ प्या॑यताम् ।
Sentence: b    वाक्त॒ आ प्या॑यताम् ।
Sentence: c    प्रा॒णस्त॒ आ प्या॑यताम् ।
Sentence: d    चक्षु॑स्त॒ आ प्या॑यताम् ।
Sentence: e    श्रोत्रं॑ त॒ आ प्या॑यताम् ।
Sentence: f    यत्ते॑ क्रू॒रं यदास्थि॑तं॒ तत्त॒ आ प्या॑यतां॒ निष्प्या॑यतां॒ तत्ते॑ शुध्यतु ।
Sentence: g    शमहो॑भ्यः ।
Sentence: h    ओष॑धे॒ त्राय॑स्व ।
Sentence: i    स्वधि॑ते मैनँ हिँसीः ।।

Verse: 16 
Sentence: a    रक्ष॑सां भा॒गो॑ सि ।
Sentence: b    निर॑स्तँ॒ रक्षः॑ ।
Sentence: c    इ॒दम॒हँ रक्षो॒ भि ति॑ष्ठामी॒दम॒हँ रक्षो व॑ बाध इ॒दम॒हँ रक्षो॑ ध॒मं तमो॑ नयामि ।
Sentence: d    घृ॒तेन॑ द्यावापृथिवी॒ प्रोर्णु॑वाथाम् ।
Sentence: e    वायो॒ वे स्तो॒काना॑म् ।
Sentence: f    अ॒ग्निराज्य॑स्य वेतु॒ स्वाहा॑ ।
Sentence: g    स्वाहा॑कृते ऊ॒र्ध्वन॑भसं मारु॒तं ग॑च्छतम् ।।

Verse: 17 
Sentence: a    इ॒दमा॑पः॒ प्रव॑हताव॒द्यं च॒ मलं॑ च॒ यत् ।
Sentence: b    यच्चा॑भिदु॒द्रोहानृ॑तं॒ यच्च॑ शे॒पे अ॑भी॒रुण॑म् ।
Sentence: c    आपो॑ मा॒ तस्मा॒देन॑सः॒ पव॑मानश्च मुञ्चतु ।।

Verse: 18 
Sentence: a    सं ते॒ मनो॒ मन॑सा॒ सं प्रा॒णः प्रा॒णेन॑ गच्छताम् ।
Sentence: b    रेड॑स्य॒ग्निष्ट्वा॑ श्रीणा॒त्वाप॑स्त्वा॒ सम॑रिण॒न्वात॑स्य त्वा॒ ध्राज्यै॑ पू॒ष्णो रँह्या॑ ऊ॒ष्मणो॑ व्यथिषत् ।
Sentence: c    प्रयु॑तं॒ द्वेषः॑ ।।

Verse: 19 
Sentence: a    घृ॒तं घृ॑तपावानः पिबत॒ वसां॑ वसापावानः पिबता॒न्तरि॑क्षस्य ह॒विर॑सि॒ स्वाहा॑ ।
Sentence: b    दिशः॑ ।
Sentence: c    प्र॒दिशः॑ ।
Sentence: d    आ॒दिशः॑ ।
Sentence: e    वि॒दिशः॑ ।
Sentence: f    उ॒द्दिशः॑ ।
Sentence: g    दि॒ग्भ्यः स्वाहा॑ ।।

Verse: 20 
Sentence: a    अै॒न्द्रः प्रा॒णो अङ्गे॑अङ्गे॒ नि दी॑ध्यऐ॒न्द्र उ॑दा॒नो अङ्गे॑अङ्गे॒ निधी॑तः ।
Sentence: b    देव॑ त्वष्ट॒र्भूरि॑ ते॒ सँस॑मेतु॒ सल॑क्ष्मा॒ यद्विषु॑रूपं॒ भवा॑ति ।
Sentence: c    दे॑व॒त्रा यन्त॒मव॑से॒ सखा॒यो नु॑ त्वा मा॒ता पि॒तरो॑ मदन्तु ।।

Verse: 21 
Sentence: a    स॑मु॒द्रं ग॑च्छ॒ स्वाहा॑ ।
Sentence: b    अ॒न्तरि॑क्षं गच्छ॒ स्वाहा॑ ।
Sentence: c    दे॒वँ स॑वि॒तारं॑ गच्छ॒ स्वाहा॑ ।
Sentence: d    मि॒त्रावरु॑णौ गच्छ॒ स्वाहा॑ ।
Sentence: e    अ॑होरा॒त्रे ग॑च्छ॒ स्वाहा॑ ।
Sentence: f    छन्दाँ॑सि गच्छ॒ स्वाहा॑ ।
Sentence: g    द्यावा॑पृथि॒वी ग॑च्छ॒ स्वाहा॑ ।
Sentence: h    य॒ज्ञं ग॑च्छ॒ स्वाहा॑ ।
Sentence: i    सोमं॑ गच्छ॒ स्वाहा॑ ।
Sentence: j    दि॒व्यं नभो॑ गच्छ॒ स्वाहा॑ ।
Sentence: k    अ॒ग्निं वै॑श्वान॒रं ग॑च्छ॒ स्वाहा॑ ।
Sentence: l    मनो॑ मे॒ हार्दि॑ यच्छ ।
Sentence: m    दिवं॑ ते धू॒मो ग॑च्छतु॒ स्व॒र्ज्योतिः॑ पृथि॒वीं भस्म॒ना पृ॑ण॒ स्वाहा॑ ।।

Verse: 22 
Sentence: a    मापो मौ॑षधीर्हिँसीः ।
Sentence: b    धाम्नो॑धाम्नो राजँ॒स्ततो॑ वरुण नो मुञ्च ।
Sentence: c    यदा॒हुर॒घ्न्या इति॒ वरु॒णेति॒ शपा॑महे॒ ततो॑ वरुण नो मुञ्च ।
Sentence: d    सु॑मित्रि॒या न॒ आप॒ ओष॑धयः सन्तु+ दुर्मित्रि॒यास्तस्मै॑ सन्तु॒ यो॒ स्मान्द्वेष्टि॒ यं च॑ व॒यं द्वि॒ष्मः ।।

Verse: 23 
Sentence: a    ह॒विषी॑मतीरि॒मा आपो॑ ह॒विष्माँ॒ आ वि॑वासति ।
Sentence: b    ह॒विष्मा॑न्दे॒वो अ॑ध्व॒रो ह॒विष्माँ॑ अस्तु॒ सूर्यः॑ ।।

Verse: 24 
Sentence: a    अ॒ग्नेर्वो प॑न्नगृहस्य॒ सद॑सि सादयामि ।
Sentence: b    इ॑न्द्रा॒ग्न्योर्भा॑ग॒धेयी॑ स्थ ।
Sentence: c    मि॒त्रावरु॑ण्योर्भाग॒धेयी॑ स्थ ।
Sentence: d    विश्वे॑षां दे॒वानां॑ भाग॒धेयी॑ स्थ ।
Sentence: e    अ॒मूर्या उप॒ सूर्ये॒ याभि॑र्वा॒ सूर्यः॑ स॒ह ।
Sentence: f    ता नो॑ हिन्वन्त्वध्व॒रम् ।।

Verse: 25 
Sentence: a    हृ॒दे त्वा॒ मन॑से त्वा दि॒वे त्वा॒ सूर्या॑य त्वा ।
Sentence: b    ऊ॒र्ध्वमि॒मम॑ध्व॒रं दि॒वि दे॒वेषु॒ होत्रा॑ यच्छ ।।

Verse: 26 
Sentence: a    सोम॑ राज॒न्विश्वा॒स्त्वं प्र॒जा उ॒पाव॑ रोह ।
Sentence: b    विश्वा॒स्त्वां प्र॒जा उ॒पाव॑ रोहन्तु ।
Sentence: c    शृ॒णोत्व॒ग्निः स॒मिधा॑ ह॒वं मे॑ शृण्व॒न्त्वापो॑ धि॒षणा॑श्च दे॒वीः ।
Sentence: d    श्रोता॑ ग्रावाणो वि॒दुषो॒ न य॒ज्ञँ शृ॒णोतु॑ दे॒वः स॑वि॒ता हवं॑ मे॒ स्वाहा॑ ।।

Verse: 27 
Sentence: a    देवी॑रापो अपां नपा॒द्यो व॑ ऊ॒र्मिर्वि॒ष्य॑ इन्द्रि॒यावा॑न्म॒दिन्त॑मः ।
Sentence: b    तं दे॒वेभ्यो॑ देव॒त्रा द॑त्त शुक्र॒पेभ्यो॒ येषां॑ भा॒ग स्थ॒ स्वाहा॑ ।।

Verse: 28 
Sentence: a    कार्षि॑रसि ।
Sentence: b    स॑मु॒द्रस्य॒ त्वाक्षि॑त्या॒ उन्न॑यामि ।
Sentence: c    समापो॑ अ॒द्भिर॑ग्मत॒ समोष॑धीभि॒रोष॑धीः ।।

Verse: 29 
Sentence: a    यम॑ग्ने पृ॒त्सु मर्त्य॒मवा॒ वाजे॑षु॒ यं जु॒नाः ।
Sentence: b    स यन्ता॒ शश्व॑ती॒रिषः॒ स्वाहा॑ ।।

Verse: 30 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    आ द॑दे॒ रावा॑सि गभी॒रमि॒मम॑ध्व॒रं कृ॒धीन्द्रा॑य सु॒षूत॑मम् ।
Sentence: c    उ॑त्त॒मेन॑ प॒विनोर्ज॑स्वन्तं॒ मधु॑मन्तं॒ पय॑स्वन्तम् ।
Sentence: d    नि॑ग्रा॒भ्या॑ स्थ देव॒श्रुत॑स्त॒र्पय॑त मा ।।

Verse: 31 
Sentence: a    मनो॑ मे तर्पयत॒ वाचं॑ मे तर्पयत प्रा॒णं मे॑ तर्पयत॒ चक्षु॑र्मे तर्पयत॒ श्रोत्रं॑ मे तर्पयता॒तनं॑ मे तर्पयत प्र॒जां मे॑ तर्पयत प॒शून्मे॑ तर्पयत ग॒णान्मे॑ तर्पयत ग॒णा मे॒ मा वितृ॑षन् ।।

Verse: 32 
Sentence: a    इन्द्रा॑य त्वा॒ वसु॑मते रु॒द्रव॑ते ।
Sentence: b    इन्द्रा॑य त्वादि॒त्यव॑ते ।
Sentence: c    इन्द्रा॑य त्वाभिमाति॒घ्ने ।
Sentence: d    श्ये॒नाय॑ त्वा मोम॒भृते॑ ।
Sentence: e    अ॒ग्नये॑ त्वा रायस्पोष॒दे ।।

Verse: 33 
Sentence: a    यत्ते॑ सोम दि॒वि ज्यो॒तिर्यत्पृ॑थि॒व्यां यदु॒राव॒न्तरि॑क्षे ।
Sentence: b    तेनास्मै॒ यज॑मानायो॒रु रा॒ये कृ॒ध्यधि॑ दा॒त्रे वो॑चः ।।

Verse: 34 
Sentence: a    श्वा॒त्रा स्थ॑ वृत्र॒तुरो॒ राधो॑गूर्ता अ॒मृत॑स्य॒ पत्नीः॑ ।
Sentence: b    ता दे॑वीर्देव॒त्रेमं य॒ज्ञं न॑य॒तोप॑हूताः॒ सोम॑स्य पिबत ।।

Verse: 35 
Sentence: a    मा भे॒र्मा सं वि॑क्था॒ ऊर्जं॑ धत्स्व॒ धिष॑णे वी॒ड्वी स॒ती वी॑डयेथा॒मूर्जं॑ दधाथाम् ।
Sentence: b    पा॒प्मा ह॒तो न सोमः॑ ।।

Verse: 36 
Sentence: a    प्रागपा॒गुद॑गध॒राक्स॒र्वत॑स्त्वा॒ दिश॒ आ धा॑वन्तु ।
Sentence: b    अम्ब॒ नि ष्प॑र॒ सम॒रीर्वि॑दाम् ।।

Verse: 37 
Sentence: a    त्वम॒ङ्ग प्र शँ॑सिषो दे॒वः श॑विष्ठ॒ मर्त्य॑म् ।
Sentence: b    न त्वद॒न्यो म॑घवन्नस्ति मर्डि॒तेन्द्र॒ ब्रवी॑मि ते॒ वचः॑ ।।



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.