TITUS
White Yajur-Veda: Vajasaneyi-Samhita (Madhyandina)
Part No. 15
Previous part

Paragraph: 15 

Verse: 1 
Sentence: a    अग्ने॑ जा॒तान्प्र णु॑द नः स॒पत्ना॒न्प्रत्यजा॑तान्नुद जातवेदः ।
Sentence: b    अधि॑ नो ब्रूहि सु॒मना॒ अहे॑डँ॒स्तव॑ स्याम॒ शर्मँ॑स्त्रि॒वरू॑थ उद्भौ ।।

Verse: 2 
Sentence: a    सह॑सा जा॒तान्प्र णु॑दा नः स॒पत्ना॒न्प्रत्यजा॑तान्जातवेदो नुदस्व ।
Sentence: b    अधि॑ नो ब्रूहि सुमन॒स्यमा॑नो व॒यँ स्या॑म॒ प्र णु॑दा नः स॒पत्ना॑न् ।।

Verse: 3 
Sentence: a    षो॑ड॒शी स्तोम॒ ओजो॒ द्रवि॑णम् ।
Sentence: b    च॑तुश्चत्वारिँ॒श स्तोमो॒ वर्चो॒ द्रवि॑णम् ।
Sentence: c    अ॒ग्नेः पुरी॑षमस्य॒ अप्सो॒ नाम॒ तां त्वा॒ विश्वे॑ अ॒भि गृ॑णन्तु दे॒वाः ।
Sentence: d    स्तोम॑पृष्ठा घृ॒तव॑ती॒ह सी॑द प्र॒जाव॑द॒स्मे द्र॑वि॒णा य॑जस्व ।।

Verse: 4 
Sentence: a    एव॒श्छन्दः॑ ।
Sentence: b    वरि॑व॒श्छन्दः॑ ।
Sentence: c    शं॒भूश्छन्दः॑ ।
Sentence: d    प॑रि॒भूश्छन्दः॑ ।
Sentence: e    आ॒च्छच्छन्दः॑ ।
Sentence: f    मन॒श्छन्दः॑ ।
Sentence: g    व्यच॒श्छन्दः॑ ।
Sentence: h    सिन्धु॒श्छन्दः॑ ।
Sentence: i    स॑मु॒द्रश्छन्दः॑ ।
Sentence: j    स॑रि॒रं छन्दः॑ ।
Sentence: k    क॒कुप्छन्दः॑ ।
Sentence: l    त्रि॑क॒कुप्छन्दः॑ ।
Sentence: m    का॒व्यं छन्दः॑ ।
Sentence: n    अ॑ङ्कु॒पं छन्दः॑ ।
Sentence: o    अ॒क्षर॑पङ्क्ति॒श्छन्दः॑ ।
Sentence: p    प॒दप॑ङ्क्ति॒श्छन्दः॑ ।
Sentence: q    वि॑ष्टा॒रप॑ङ्क्ति॒श्छन्दः॑ ।
Sentence: r    क्षु॒रो भ्राज॒श्छन्दः॑ ।।

Verse: 5 
Sentence: a    आ॒च्छच्छन्दः॑ ।
Sentence: b    प्र॒च्छच्छन्दः॑ ।
Sentence: c    सं॒यच्छन्दः॑ ।
Sentence: d    वि॒यच्छन्दः॑ ।
Sentence: e    बृ॒हच्छन्दः॑ ।
Sentence: f    र॑थन्त॒रं छन्दः॑ ।
Sentence: g    नि॑का॒यश्छन्दः॑ ।
Sentence: h    वि॑व॒धश्छन्दः॑ ।
Sentence: i    गिर॒श्छन्दः॑ ।
Sentence: j    भ्रज॒श्छन्दः॑ ।
Sentence: k    सँ॒स्तुप्छन्दः॑ ।
Sentence: l    अ॑नु॒ष्टुप्छन्दः॑ ।
Sentence: m    एव॒श्छन्दः॑ ।
Sentence: n    वरि॑व॒श्छन्दः॑ ।
Sentence: o    वय॒श्छन्दः॑ ।
Sentence: p    व॑य॒स्कृच्छन्दः॑ ।
Sentence: q    विच्५ष्प॑र्धा॒श्छन्दः॑ ।
Sentence: r    वि॑शा॒लं छन्दः॑ ।
Sentence: s    छ॒दिश्छन्दः॑ ।
Sentence: t    दू॑रोह॒णं छन्दः॑ ।
Sentence: u    त॒न्द्रं छन्दः॑ ।
Sentence: v    अ॑ङ्का॒ङ्कं छन्दः॑ ।।

Verse: 6 
Sentence: a    र॒श्मिना॑ स॒त्याय॑ स॒त्यं जि॑न्व ।
Sentence: b    प्रेति॑ना॒ धर्म॑णा॒ धर्मं॑ जिन्व ।
Sentence: c    अन्वि॑त्या दि॒वा दिवं॑ जिन्व ।
Sentence: d    सं॒धिना॒न्तरि॑क्षेणा॒न्तरि॑क्षं जिन्व ।
Sentence: e    प्र॑ति॒धिन्पृ॑थि॒व्या पृ॑थि॒वीं जि॑न्व ।
Sentence: f    वि॑ष्ट॒म्भेन॒ वृष्ट्या॒ वृस्टिं॑ जिन्व ।
Sentence: g    प्र॒वयाह्नाह॑र्जिन्व ।
Sentence: h    अ॑नु॒या रत्र्या॒ रात्रीं॑ जिन्व ।
Sentence: i    उ॒शिजा॒ वसु॑भ्यो॒ वसू॑न्जिन्व ।
Sentence: j    प्र॑के॒तेना॑दि॒त्येभ्य॑ आदि॒त्यान्जि॑न्व ।।

Verse: 7 
Sentence: a    तन्तु॑ना रा॒यस्पोषे॑ण रा॒यस्पोषं॑ जिन्व ।
Sentence: b    सँ॒सर्पे॑ण श्रु॒ताय॑ श्रु॒तं जि॑न्व ।
Sentence: c    अै॒डेनौ॑षधीभि॒रोष॑धीर्जिन्व ।
Sentence: d    उ॑त्त॒मेन॑ त॒नूभि॑स्त॒नूर्जि॑न्व ।
Sentence: e    व॑यो॒धसाधी॑तेअ॒नाधी॑तं जिन्व ।
Sentence: f    अ॑भि॒जिता॒ तेज॑सा॒ तेजो॑ जिन्व ।।

Verse: 8 
Sentence: a    प्र॑ति॒पद॑सि प्रति॒पदे॑ त्वा ।
Sentence: b    अ॑नु॒पद॑स्यनु॒पदे॑ त्वा ।
Sentence: c    स॒म्पद॑सि स॒म्पदे॑ त्वा ।
Sentence: d    तेजो॑ सि॒ तेज॑से त्वा ।।

Verse: 9 
Sentence: a    त्रि॒वृद॑सि त्रि॒वृते॑ त्वा ।
Sentence: b    प्र॒वृद॑सि प्र॒वृते॑ त्वा ।
Sentence: c    वि॒वृद॑सि वि॒वृते॑ त्वा ।
Sentence: d    स॒वृद॑सि स॒वृते॑ त्वा ।
Sentence: e    आ॑क्र॒मो॑ स्याक्र॒माय॑ त्वा ।
Sentence: f    सं॑क्र॒मो॑ सि संक्र॒माय॑ त्वा ।
Sentence: g    उ॑त्क्र॒मो॑ स्युत्क्र॒माय॑ त्वा ।
Sentence: h    उत्क्रा॑न्तिर॒स्युत्क्रा॑न्त्यै त्वा ।
Sentence: i    अधि॑पतिनो॒र्जोर्जं॑ जिन्व ।।

Verse: 10 
Sentence: a    राज्ञ्य॑सि॒ प्राची॒ दिग्वस॑वस्ते दे॒वा अधि॑पतयो॒ ग्निर्हे॑ती॒नां प्र॑तिध॒र्ता त्रि॒वृत्त्वा॒ स्तोमः॑ पृथि॒व्याँ श्र॑य॒त्वाज्य॑मु॒क्थमव्य॑थायै स्तभ्नातु रथन्त॒रँ साम॒ प्रति॑ष्त्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ता नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।।

Verse: 11 
Sentence: a    वि॒राड॑सि॒ दक्षि॑णा॒ दिग्रु॒द्रास्ते॑ दे॒वा अधि॑पतय॒ इन्द्रो॑ हेती॒नां प्र॑तिध॒र्ता प॑ञ्चदस्त्वा॒ स्तोमः॑ पृथि॒व्याँ श्र॑यतु॒ प्रउग॑मु॒क्थमव्य॑थायै स्तभ्नातु बृ॒हत्साम॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ता नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।।

Verse: 12 
Sentence: a    स॒म्राड॑सि प्र॒तीची॒ दिगा॑दि॒त्यास्ते॑ दे॒वा अधि॑पतयो॒ वरु॑णो हेती॒नां प्र॑तिध॒र्ता स॑प्तदस्त्वा॒ स्तोमः॑ पृथि॒व्याँ श्र॑यतु मरुत्व॒तीय॑मु॒क्थमव्य॑थायै स्तभ्नातु वैरू॒पँ साम॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ता नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।।

Verse: 13 
Sentence: a    स्व॒राड॒स्युदी॒च्य्दिङ्म॒रुत॑स्ते दे॒वा अधि॑पतयः॒ सोमो॑ हेती॒नां प्र॑तिधर्तैकविँ॒शस्त्वा॒ स्तोमः॑ पृथि॒व्याँ श्र॑यतु॒ निष्के॑वल्यमु॒क्थमव्य॑थायै स्तभ्नातु वैरा॒जँ साम॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ता नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।।

Verse: 14 
Sentence: a    अधि॑पत्न्यसि बृह॒ती दिग्विश्वे॑ ते दे॒वा अधि॑पतयो॒ बृह॒स्पति॑र्हेती॒नां प्र॑तिध॒र्ता त्रि॑णवत्रयस्त्रिँशौ त्वा॒ स्तोमौ॑ पृथि॒व्याँ श्र॑यतां वैश्वदेवाग्निमारु॒ते उ॒क्थे अव्य॑थायै स्तभ्नीताँ शाक्वररैव॒ते साम॑नी॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ता नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।।

Verse: 15 
Sentence: a    अ॒यं पु॒रो हरि॑केशः॒ सूर्य॑रश्मि॒स्तस्य॑ रथगृ॒त्सश्च॒ रथौ॑जाश्च सेनानीग्राम॒ण्या॑ ।
Sentence: b    पु॑ञ्जिकस्थ॒ला च॑ क्रतुस्थ॒ला चा॑प्स॒रसौ॑ द॒ङ्क्ष्णवः॑ प॒शवो॑ हे॒तिः पौ॑रुषेयो व॒धः प्रहे॑ति॒स्तेभ्यो॒ नमो॑ अस्तु॒ ते नो॑ वन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।।

Verse: 16 
Sentence: a    अ॒यं द॑क्षि॒णा वि॒श्वक॑र्मा॒ तस्य॑ रथस्व॒नश्च॒ रथे॑चित्रश्च सेनानीग्राम॒ण्या॑ ।
Sentence: b    मे॑न॒का च॑ सहज॒न्या चा॑प्स॒रसौ॑ यातुधा॒ना हे॒ती रक्षाँ॑सि॒ प्रहे॑ति॒स्तेभ्यो॒ नमो॑ अस्तु॒ ते नो॑ वन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।।

Verse: 17 
Sentence: a    अ॒यं प॒श्चाद्वि॒श्वव्य॑चा॒स्तस्य॒ रथ॑प्रो॒तश्चास॑मरथश्च सेनानीग्राम॒ण्या॑ ।
Sentence: b    प्र॒म्लोच॑न्ती चानु॒म्लोच॑न्ती चाप्स॒रसौ॑ व्या॒घ्रा हे॒तिः स॒र्पा प्रहे॑ति॒स्तेभ्यो॒ न मोअ॑स्तु॒ ते नो॑ वन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।।

Verse: 18 
Sentence: a    अ॒यमु॑त्त॒रात्सं॒यद्व॑सु॒स्तस्य॒ तार्क्ष्य॒श्चारि॑ष्टनेमिश्च सेनानीग्राम॒ण्या॑ ।
Sentence: b    वि॒श्वाची॑ च घृ॒ताची॑ चाप्स॒रसा॒वापो॑ हे॒तिर्वातः॒ प्रहे॑ति॒स्तेभ्यो॒ नमो॑ अस्तु॒ ते नो॑ वन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।।

Verse: 19 
Sentence: a    अ॒यमु॒पर्य॒र्वाग्व॑सु॒स्तस्य॑ सेन॒जिच्च॑ सु॒षेण॑श्च सेनानीग्राम॒ण्या॑ ।
Sentence: b    उ॒र्वशी॑ च पू॒र्वचि॑त्तिश्चाप्स॒रसा॑वव॒स्पूर्ज॑न्हे॒तिर्वि॒द्युत्प्रहे॑ति॒स्तेभ्यो॒ नमो॑ अस्तु॒ ते नो॑ वन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।।

Verse: 20 
Sentence: a    अ॒ग्निर्मू॒र्धा दि॒वः क॒कुत्पतिः॑ पृथि॒व्या अ॒यम् ।
Sentence: b    अ॒पाँ रेताँ॑सि जिन्वति ।।

Verse: 21 
Sentence: a    अ॒यम॒ग्निः स॑ह॒स्रिणो॒ वाज॑स्य श॒तिन॒स्पतिः॑ ।
Sentence: b    मू॒र्धा क॒वी र॑यी॒णाम् ।।

Verse: 22 
Sentence: a    त्वाम॑ग्ने॒ पुष्क॑रा॒दध्यथ॑र्वा॒ निर॑मन्थत ।
Sentence: b    मू॒र्ध्नो विश्व॑स्य वा॒घतः॑ ।।

Verse: 23 
Sentence: a    भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भिः॒ सच॑से शि॒वाभिः॑ ।
Sentence: b    दि॒वि मू॒र्धानं॑ दधिषे स्व॒र्षां जि॒ह्वाम॑ग्ने चकृषे हव्य॒वाह॑म् ।।

Verse: 24 
Sentence: a    अबो॑ध्य॒ग्निः स॒मिधा॒ जना॑नां॒ प्रति॑ धे॒नुमि॑वाय॒तीमु॒षास॑म् ।
Sentence: b    य॒ह्वा इ॑व॒ प्र व॒यामु॒ज्जिहा॑नाः॒ प्र भा॒नवः॑ सिस्रते॒ नाक॒मच्छ॑ ।।

Verse: 25 
Sentence: a    अवो॑चाम क॒वये॒ मेध्या॑य॒ वचो॑ व॒न्दारु॑ वृष॒भाय॒ वृष्णे॑ ।
Sentence: b    गवि॑ष्ठिरो॒ नम॑सा॒ स्तोम॑मग्नौ दि॒वी॑व रु॒क्ममु॑रु॒व्यञ्च॑मश्रेत् ।।

Verse: 26 
Sentence: a    अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्यः॑ ।
Sentence: b    यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॑ वि॒शेवि॑शे ।।

Verse: 27 
Sentence: a    जन॑स्य गो॒पा अ॑जनिष्ट॒ जागृ॑विर॒ग्निः सु॒दक्षः॑ सुवि॒ताय॒ नव्य॑से ।
Sentence: b    घृ॒तप्र॑तीको बृह॒ता दि॑वि॒स्पृशा॑ द्यु॒मद्वि भा॑ति भर॒तेभ्यः॒ शुचिः॑ ।।

Verse: 28 
Sentence: a    त्वाम॑ग्ने॒ अङ्गि॑रसो॒ गुहा॑ हि॒तमन्व॑विन्दञ्छिश्रिया॒णं वने॑वने ।
Sentence: b    स जा॑यसे म॒थ्यमा॑नः॒ सहो॑ म॒हत्त्वामा॑हुः॒ सह॑सस्पु॒त्रम॑ङ्गिरः ।।

Verse: 29 
Sentence: a    सखा॑यः॒ सं वः॑ स॒म्यञ्च॒मिषँ॒ स्तोमं॑ चा॒ग्नये॑ ।
Sentence: b    वर्षि॑ष्ठाय क्षिती॒नामू॒र्जो नप्त्रे॒ सह॑स्वते ।।

Verse: 30 
Sentence: a    सँस॒मिद्यु॑वसे वृष॒न्नग्ने॒ विश्वा॑न्य॒र्य आ ।
Sentence: b    इ॒डस्प॒दे समि॑ध्यसे॒ स नो॒ वसू॒न्या भ॑र ।।

Verse: 31 
Sentence: a    त्वां चि॑त्रश्रवस्तम॒ हव॑न्ते वि॒क्षु ज॒न्तवः॑ ।
Sentence: b    शो॒चिष्के॑शं पुरुप्रि॒याग्ने॑ ह॒व्याय॒ वोढ॑वे ।।

Verse: 32 
Sentence: a    ए॒ना वो॑ अ॒ग्निं नम॑सो॒र्जो नपा॑त॒मा हु॑वे ।
Sentence: b    प्रि॒यं चेति॑ष्ठमर॒तिँ स्व॑ध्व॒रं विश्व॑स्य दू॒तम॒मृत॑म् ।।

Verse: 33 
Sentence: a    विश्व॑स्य दू॒तम॒मृतं॒ विश्व॑स्य दू॒तम॒मृत॑म् ।
Sentence: b    स यो॑जते अरु॒षा वि॒श्वभो॑जसा॒ स दु॑द्रव॒त्स्वा॑हुतः ।।

Verse: 34 
Sentence: a    स दु॑द्रव॒त्स्वा॑हुतः॒ स दु॑द्रव॒त्स्वा॑हुतः ।
Sentence: b    सु॒ब्रह्मा॑ य॒ज्ञः सु॒शमी॒ वसू॑नां दे॒वँ राधो॒ जना॑नाम् ।।

Verse: 35 
Sentence: a    अग्ने॒ वाज॑स्य॒ गोम॑त॒ ईशा॑नः सहसो यहो ।
Sentence: b    अ॒स्मे धे॑हि जातवेदो॒ महि॒ श्रवः॑ ।।

Verse: 36 
Sentence: a    स इ॑धा॒नो वसु॑ष्क॒विर॒ग्निरी॒डेन्यो॑ गि॒रा ।
Sentence: b    रे॒वद॒स्मभ्यं॑ पुर्वणीक दीदिहि ।।

Verse: 37 
Sentence: a    क्ष॒पो रा॑जन्नु॒त त्मनाग्ने॒ वस्तो॑रु॒तोषसः॑ ।
Sentence: b    स ति॑ग्मजम्भ र॒क्षसो॑ दह॒ प्रति॑ ।।

Verse: 38 
Sentence: a    भ॒द्रो नो॑ अ॒ग्निराहु॑तो भ॒द्रा रा॒तिः सु॑भग भ॒द्रो अ॑ध्व॒रः ।
Sentence: b    भ॒द्रा उ॒त प्रश॑स्तयः ।।

Verse: 39 
Sentence: a    भ॒द्रा उ॒त प्रश॑स्तयो भ॒द्रं मनः॑ कृणुष्व वृत्र॒तूर्ये॑ ।
Sentence: b    येना॑ स॒मत्सु॑ सा॒सहः॑ ।।

Verse: 40 
Sentence: a    येना॑ स॒मत्सु॑ सा॒सहो व॑ स्थि॒रा त॑नुहि॒ भूरि॒ शर्ध॑ताम् ।
Sentence: b    व॒नेमा॑ ते अ॒भिष्टि॑भिः ।।

Verse: 41 
Sentence: a    अ॒ग्निं तं म॑न्ये॒ यो वसु॒रस्तं॒ यं यन्ति॑ धे॒नवः॑ ।
Sentence: b    अस्त॒मर्व॑न्त आ॒शवो स्तं॒ नित्या॑सो वा॒जिन॒ इषँ॑ स्तो॒तृभ्य॒ आ भ॑र ।।

Verse: 42 
Sentence: a    सो अ॒ग्निर्यो वसु॑र्गृ॒णे सं यमा॒यन्ति॑ धे॒नवः॑ ।
Sentence: b    समर्व॑न्तो रघु॒द्रुवः॒ सँ सु॑जा॒तासः॑ सू॒रय॒ इषँ॑ स्तो॒तृभ्य॒ आ भ॑र ।।

Verse: 43 
Sentence: a    उ॒भे सु॑श्चन्द्र स॒र्पिषो॒ दर्वी॑ श्रीणीष आ॒सनि॑ ।
Sentence: b    उ॒तो न॒ उत्पु॑पूर्या उ॒क्थेषु॑ शवसस्पत॒ इषँ॑ स्तो॒तृभ्य॒ आ भ॑र ।।

Verse: 44 
Sentence: a    अग्ने॒ तम॒द्याश्वं॒ न स्तोमैः॒ क्रतुं॒ न भ॒द्रँ हृ॑दि॒स्पृश॑म् ।
Sentence: b    ऋ॒ध्यामा॑ त॒ ओहैः॑ ।।

Verse: 45 
Sentence: a    अधा॒ ह्य॑ग्ने॒ क्रतो॑र्भ॒द्रस्य॒ दक्ष॑स्य सा॒धोः ।
Sentence: b    र॒थीरृ॒तस्य॑ बृह॒तो ब॒भूथ॑ ।।

Verse: 46 
Sentence: a    ए॒भिर्नो॑ अर्कै॒र्भवा॑ नो अ॒र्वाङ्स्व॒र्ण ज्योतिः॑ ।
Sentence: b    अग्ने॒ विश्वे॑भिः सु॒मना॒ अनी॑कैः ।।

Verse: 47 
Sentence: a    अ॒ग्निँ होता॑रं मन्ये॒ दास्व॑न्तं॒ वसुँ॑ सू॒नुँ सह॑सो जा॒तवे॑दसं॒ विप्रं॒ न जा॒तवे॑दसम् ।
Sentence: b    य ऊ॒र्ध्वया॑ स्वध्व॒रो दे॒वो दे॒वाच्या॑ कृ॒पा ।
Sentence: c    घृ॒तस्य॒ विभ्रा॑ष्टि॒मनु॑ वष्टि शो॒चिषा॒जुह्वा॑नस्य स॒र्पिषः॑ ।।

Verse: 48 
Sentence: a    अग्ने॒ त्वं नो॒ अन्त॑म उ॒त त्रा॒ता शि॒वो भ॑व वरू॒थ्यः॑ ।
Sentence: b    वसु॑र॒ग्निर्वसु॑श्रवा॒ अच्छा॑ नक्षि द्यु॒मत्त॑मँ र॒यिं दाः॑ ।
Sentence: c    तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ।।

Verse: 49 
Sentence: a    येन॒ ऋष॑य॒स्तप॑सा स॒त्रमाय॒न्निन्धा॑ना अ॒ग्निँ स्व॑रा॒भर॑न्तः ।
Sentence: b    तस्मि॑न्न॒हं नि द॑धे॒ नाके॑ अ॒स्ग्निं यमा॒हुर्मन॑व स्ती॒र्णब॑र्हिषम् ।।

Verse: 50 
Sentence: a    तं पत्नी॑भि॒रनु॑ गच्छेम देवाः पुत्रै॒र्भ्रातृ॑भिरु॒त वा॒ हिर॑ण्यैः ।
Sentence: b    नाकं॑ गृभ्णा॒नाः सु॑कृ॒तस्य॑ लो॒के तृ॒तीये॑ पृ॒ष्ठे अधि॑ रोच॒ने दि॒वः ।।

Verse: 51 
Sentence: a    आ वा॒चो मध्य॑मरुहद्गुर॒ण्युर॒यम॒ग्निः सत्प॑ति॒श्चेकि॑तानः ।
Sentence: b    पृ॒ष्ठे पृ॑थि॒व्या निहि॑तो॒ दवि॑द्युतद॒धस्प॒दं कृ॑णुतां॒ ये पृ॑त॒न्यवः॑ ।।

Verse: 52 
Sentence: a    अ॒यम॒ग्निर्वी॒रत॑मो वयो॒धाः स॑ह॒स्रियो॑ द्योतता॒मप्र॑युच्छन् ।
Sentence: b    वि॒भ्राज॑मानः सरि॒रस्य॒ मध्य॒ उप॒ प्र या॑हि दि॒व्यानि॒ धाम॑ ।।

Verse: 53 
Sentence: a    स॒म्प्र च्य॑वध्व॒मुप॑ स॒म्प्र या॑ताग्ने प॒थो दे॑व॒याना॑न्कृणुध्वम् ।
Sentence: b    पुनः॑ कृण्वा॒ना पि॒तरा॒ युवा॑ना॒न्वा ताँ॑सी॒त्त्वयि॒ तन्तु॑मे॒तम् ।।

Verse: 54 
Sentence: a    उद्बु॑ध्यस्वाग्ने॒ प्रति॑ जागृहि॒ त्वमि॑ष्टापू॒र्ते सँ सृ॑जेथाम॒यं च॑ ।
Sentence: b    अ॒स्मिन्त्स॒धस्थे॒ अध्युत्त॑रस्मि॒न्विस्वे॑ देवा॒ यज॑मानाश्च सीदत ।।

Verse: 55 
Sentence: a    येन॒ वह॑सि स॒हस्रं॒ येना॑ग्ने सर्ववेद॒सम् ।
Sentence: b    तेने॒मं य॒ज्ञं नो॑ नय॒ स्व॑र्दे॒वेषु॒ गन्त॑वे ।।

Verse: 56 
Sentence: a    अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः ।
Sentence: b    तं जा॒नन्न॑ग्न आरो॒हाथा॑ नो वर्धया र॒यिम् ।।

Verse: 57 
Sentence: a    तप॑श्च तप॒स्य॑श्च शैशि॒रावृ॒तू अ॒ग्नेर॑न्तःश्ले॒षो॑ सि॒ कल्पे॑तां॒ द्यावा॑पृथि॒वी कल्प॑न्प॒ ओष॑धयः॒ कल्प॑न्ताम॒ग्नयः॒ पृथ॒ङ्नम ज्यैष्ठ्याय॒ सव्र॑ताः ।
Sentence: b    ये अ॒ग्नयः॒ सम॑नसो न्त॒रा द्यावा॑पृथि॒वी इ॒मे शै॑शि॒रावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒सं वि॑शन्तु॒ तया॑ दे॒वत॑याङ्गिर॒स्वद्ध्रु॒वे सी॑दतम् ।।

Verse: 58 
Sentence: a    प॑रमे॒ष्ठी त्वा॑ सादयतु दि॒वस्पृ॒ष्ठे ज्योति॑ष्मतीम् ।
Sentence: b    विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ च॒रित्रा॑य ।
Sentence: c    सूर्य॒स्ते धि॑पति॒स्तया॑ दे॒वत॑याङ्गिर॒स्वद्ध्रु॒वा सी॑द ।।

Verse: 59 
Sentence: a    लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् ।
Sentence: b    इ॑न्द्रा॒ग्नी त्वा॒ बृह॒स्पति॑र॒स्मिन्योना॑वसीषदन् ।।

Verse: 60 
Sentence: a    ता अ॑स्य॒ सूद॑दोहसः॒ सोमँ॑ श्रीणन्ति॒ पृश्न॑यः ।
Sentence: b    जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः ।।

Verse: 61 
Sentence: a    इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ ।
Sentence: b    र॒थीत॑मँ र॒थीनां॒ वाजा॑नाँ॒ सत्प॑तिं॒ पति॑म् ।।

Verse: 62 
Sentence: a    प्रोथ॒दश्वो॒ न यव॑से वि॒ष्यन्य॒दा म॒हः सं॒वर॑णा॒द्व्यस्था॑त् ।
Sentence: b    आद॑स्य॒ वातो॒ अनु॑ वाति शो॒चिरध॑ स्म ते॒ व्रज॑नं कृ॒ष्णम॑स्ति ।।

Verse: 63 
Sentence: a    आ॒योष्ट्वा॒ सद॑ने सादया॒म्यव॑तश्छा॒यायाँ॑ समु॒द्रस्य॒ हृद॑ये ।
Sentence: b    र॑श्मी॒वतीं॒ भास्व॑ती॒मा या द्यां भास्या पृ॑थि॒वीमोर्व॒न्तरि॑क्षम् ।।

Verse: 64 
Sentence: a    प॑रमे॒ष्ठी त्वा॑ सादयतु दि॒वस्पृ॒ष्ठे व्यच॑स्वतीं॒ प्रथ॑स्वती॒म्दिवं॑ यच्छ॒ दिवं॑ दृँह॒ दिवं॒ मा हिँ॑सीः ।
Sentence: b    विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ च॒रित्रा॑य ।
Sentence: c    सूर्य॑स्त्वा॒भि पा॑तु म॒ह्या स्व॒स्त्या छ॒र्दिषा॒ शंत॑मेन॒ तया॑ दे॒वत॑याङ्गिर॒स्वद्ध्रु॒वे सी॑दतम् ।।

Verse: 65 
Sentence: a    स॒हस्र॑स्य प्र॒मासि॑ ।
Sentence: b    स॒हस्र॑स्य प्रति॒मासि॑ ।
Sentence: c    स॒हस्र॑स्यो॒न्मासि॑ ।
Sentence: d    सा॑ह॒स्रो॑ सि ।
Sentence: e    स॒हस्रा॑य त्वा ।।



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.