TITUS
White Yajur-Veda: Vajasaneyi-Samhita (Madhyandina)
Part No. 14
Previous part

Paragraph: 14 

Verse: 1 
Sentence: a    ध्रु॒वक्षि॑तिर्ध्रु॒वयो॑निर्ध्रु॒वासि॑ ध्रु॒वं योनि॒मा सी॑द साधु॒या ।
Sentence: b    उख्य॑स्य के॒तुं प्र॑थ॒मं जु॑षा॒णा ।
Sentence: c    अ॒श्विना॑ध्व॒र्यू सा॑दयतामि॒ह त्वा॑ ।।

Verse: 2 
Sentence: a    कु॑ला॒यिनी॑ घृ॒तव॑ती॒ पुरं॑धिः स्यो॒ने सी॑द॒ सद॑ने पृथि॒व्याः ।
Sentence: b    अ॒भि त्वा॑ रु॒द्रा वस॑वो गृणन्त्वि॒मा ब्रह्म॑ पीपिहि सौभगाय ।
Sentence: c    अ॒श्विना॑ध्व॒र्यू सा॑दयतामि॒ह त्वा॑ ।।

Verse: 3 
Sentence: a    स्वै॒र्दक्षै॒र्दक्ष॑पिते॒ह सी॑द दे॒वानाँ॑ सु॒म्ने बृ॑ह॒ते रणा॑य ।
Sentence: b    पि॒तेवै॑धि सू॒नव॒ आ सु॒शेवा॑ स्वावे॒शा त॒न्वा॒ सं वि॑शस्व ।
Sentence: c    अ॒श्विना॑ध्व॒र्यू सा॑दयतामि॒ह त्वा॑ ।।

Verse: 4 
Sentence: a    पृ॑थि॒व्याः पुरी॑षम॒स्यप्सो॒ नाम॒ तां त्वा॒ विश्वे॑ अ॒भि गृ॑णन्तु दे॒वाः ।
Sentence: b    स्तोम॑पृष्ठा घृ॒तव॑ती॒ह सी॑द प्र॒जाव॑द॒स्मे द॑र्वि॒णा य॑जस्व ।
Sentence: c    अ॒श्विना॑ध्व॒र्यू सा॑दयतामि॒ह त्वा॑ ।।

Verse: 5 
Sentence: a    अदि॑त्यास्त्वा पृ॒ष्ठे सा॑दयाम्य॒न्तरि॑क्षस्य ध॒र्त्रीं वि॒ष्टम्भ॑नीं दि॒शामधि॑पत्नीं॒ भुव॑नानामू॒र्मिर्द्र॒प्सो अ॒पाम॑सि वि॒श्वक॑र्मा त॒ ऋषिः॑ ।
Sentence: b    अ॒श्विना॑ध्व॒र्यू सा॑दयतामि॒ह त्वा॑ ।।

Verse: 6 
Sentence: a    शु॒क्रश्च॒ शुचि॑श्च ग्रैष्मावृ॒तू अ॒ग्नेर॑न्तःश्ले॒षो॑ सि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धयः॒ कल्प॑न्ताम॒ग्नयः॒ पृथ॒ङ्नम ज्यैष्ठ्याय॒ सव्र॑ताः ।
Sentence: b    ये अ॒ग्नयः॒ सम॑नसो न्त॒रा द्यावा॑पृथि॒वी इ॒मे ग्रै॒ष्मावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒सं वि॑शन्तु॒ तया॑ दे॒वत॑याङ्गिर॒स्वद्ध्रु॒वे सी॑दतम् ।।

Verse: 7 
Sentence: a    स॒जूरृ॒तुभिः॑ स॒जूर्वि॒धाभिः॑ स॒जूर्देवैः स॒जूर्देवैर्वयोनाधैर॒ग्नये॑ त्वा वैश्वान॒राया॒॒र्यू सा॑दयतामि॒ह त्वा॑ ।
Sentence: b    स॒जूरृ॒तुभिः॑ स॒जूर्वि॒धाभिः॑ स॒जूर्वसु॑भिः स॒जूर्देवैर्वयोनाधैर॒ग्नये॑ त्वा वैश्वान॒राय॒र्यू सा॑दयतामि॒ह त्वा॑ ।
Sentence: c    स॒जूरृ॒तुभिः॑ स॒जूर्वि॒धाभिः॑ स॒जू रुद्रैः स॒जूर्देवैर्वयोनाधैर॒ग्नये॑ त्वा वैश्वान॒राया॒॒र्यू सा॑दयतामि॒ह त्वा॑ ।
Sentence: d    स॒जूरृ॒तुभिः॑ स॒जूर्वि॒धाभिः॑ स॒जूरा॑दित्यैः स॒जूर्देवैर्वयोनाधैर॒ग्नये॑ त्वा वैश्वान॒रा॒र्यू सा॑दयतामि॒ह त्वा॑ ।
Sentence: e    स॒जूरृ॒तुभिः॑ स॒जूर्वि॒धाभिः॑ स॒जूर्विश्वै॑र्देवैः स॒जूर्देवैर्वयोनाधैर॒ग्नये॑ त्वा वैश्वान॒राया॒श्विना॑ध्व॒र्यू सा॑दयतामि॒ह त्वा॑ ।।

Verse: 8 
Sentence: a    प्रा॒णं मे॑ पाहि ।
Sentence: b    अ॑पा॒नं मे॑ पाहि ।
Sentence: c    व्या॒नं मे॑ पाहि ।
Sentence: d    चक्षु॑र्म उ॒र्व्या वि भा॑हि ।
Sentence: e    श्रोत्रं॑ मे श्लोकय ।
Sentence: f    अ॒पः पि॑न्व ।
Sentence: g    ओष॑धीर्जिन्व ।
Sentence: h    द्वि॒पाद॑व ।
Sentence: i    चतु॑ष्पात्पाहि ।
Sentence: j    दि॒वो वृष्टि॒मेर॑य ।।

Verse: 9 
Sentence: a    मू॒र्धा वयः॑ प्र॒जाप॑ति॒श्छन्दः॑ ।
Sentence: b    क्ष॒त्रं वयो॒ मयं॑दं॒ छन्दः॑ ।
Sentence: c    वि॑ष्ट॒म्भो वयो धि॑पति॒श्छन्दः॑ ।
Sentence: d    वि॒श्वक॑र्मा॒ वयः॑ परमे॒ष्ठी छन्दः॑ ।
Sentence: e    व॒स्तो वयो॑ विव॒लं छन्दः॑ ।
Sentence: f    वृष्णि॒र्वयो॑ विशा॒लं छन्दः॑ ।
Sentence: g    पुरु॑षो॒ वय॑स्त॒न्द्रं छन्दः॑ ।
Sentence: h    व्या॒घ्रो वयो ना॑धृष्टं॒ छन्दः॑ ।
Sentence: i    सिँ॒हो वय॑श्छ॒दिश्छन्दः॑ ।
Sentence: j    प॑ष्ठ॒वाड्वयो॑ बृह॒ती छन्दः॑ ।
Sentence: k    उ॒क्षा वयः॑ क॒कुप्छन्दः॑ ।
Sentence: l    ऋ॑ष॒भो वयः॑ स॒तोबृ॑हती॒ छन्दः॑ ।।

Verse: 10 
Sentence: a    अ॑न॒ड्वान्वयः॑ प॒ङ्क्तिश्छन्दः॑ ।
Sentence: b    धे॒नुर्वयो॒ जग॑ती॒ छन्दः॑ ।
Sentence: c    त्र्यवि॒र्वय॑स्त्रि॒ष्टुप्छन्दः॑ ।
Sentence: d    दि॑त्य॒वाड्वयो॑ वि॒राट्छन्दः॑ ।
Sentence: e    पञ्चा॑वि॒र्वयो॑ गाय॒त्री छन्दः॑ ।
Sentence: f    त्रि॑व॒त्सो वय॑ उ॒ष्णिक्छन्दः॑ ।
Sentence: g    तु॑र्य॒वाड्वयो॑ नु॒ष्टुप्छन्दः॑ ।
Sentence: h    लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् ।
Sentence: i    इ॑न्द्रा॒ग्नी त्वा॒ बृह॒स्पति॑र॒स्मिन्योना॑वसीषदन् ।
Sentence: j    ता अ॑स्य॒ सूद॑दोहसः॒ सोमँ॑ श्रीणन्ति॒ पृश्न॑यः ।
Sentence: k    जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः ।
Sentence: l    इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ ।
Sentence: m    र॒थीत॑मँ र॒थीनां॒ वाजा॑नाँ॒ सत्प॑तिं॒ पति॑म् ।।

Verse: 11 
Sentence: a    इन्द्रा॑ग्नी॒ अव्य॑थमाना॒मिष्ट॑कां दृँहतं यु॒वम् ।
Sentence: b    पृ॒ष्ठेन॒ द्यावा॑पृथि॒वी अ॒न्तरि॑क्षं च॒ विबा॑धसे ।।

Verse: 12 
Sentence: a    वि॒श्वक॑र्मा त्वा सादयत्व॒न्तरि॑क्च्५अ॑स्य पृ॒ष्ठे व्यच॑स्वतीं॒ प्रथ॑स्वतीम॒न्तरि॑क्षं यच्छा॒न्तरि॑क्षं दृँहा॒न्तरि॑क्षं॒ मा हिँ॑सीः ।
Sentence: b    विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ च॒रित्रा॑य ।
Sentence: c    वा॒युष्ट्वा॒भि पा॑तु म॒ह्या स्व॒स्त्या छ॒र्दिषा॒ शंत॑मेन॒ तया॑ दे॒वत॑याङ्गिर॒स्वद्ध्रु॒वा सी॑द ।।

Verse: 13 
Sentence: a    राज्ञ्य॑सि॒ प्राची॒ दिक् ।
Sentence: b    वि॒राड॑सि॒ दक्षि॑णा॒ दिक् ।
Sentence: c    स॒म्राड॑सि प्र॒तिची॒ दिक् ।
Sentence: d    स्व॒राड॒स्युदी॑ची॒ दिक् ।
Sentence: e    अधि॑पत्न्यसि बृह॒ती दिक् ।।

Verse: 14 
Sentence: a    वि॒श्वक॑र्मा त्वा सादयत्व॒न्तरि॑क्च्५अ॑स्य पृ॒ष्ठे ज्योति॑ष्मतीम् ।
Sentence: b    विश्व॑स्मै प्रा॒णाया॑पा॒नाय॑ व्या॒नाय॒ विश्वं॒ ज्योति॑र्यच्छ ।
Sentence: c    वा॒युष्टे धि॑पति॒स्तया॑ दे॒वत॑याङ्गिर॒स्वद्ध्रु॒वा सी॑द ।।

Verse: 15 
Sentence: a    नभ॑श्च नभ॒स्य॑श्च॒ वार्षि॑कावृ॒तू अ॒ग्नेर॑न्तःश्ले॒षो॑ सि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धयः॒ कल्प॑न्ताम॒ग्नयः॒ पृथ॒ङ्नम ज्यैष्ठ्याय॒ सव्र॑ताः ।
Sentence: b    ये अ॒ग्नयः॒ सम॑नसो न्त॒रा द्यावा॑पृथि॒वी इ॒मे वार्षि॑कावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒सं वि॑शन्तु॒ तया॑ दे॒वत॑याङ्गिर॒स्वद्ध्रु॒वे सी॑दतम् ।।

Verse: 16 
Sentence: a    इ॒षश्चो॒र्जश्च॑ शार॒दावृ॒तू अ॒ग्नेर॑न्तःश्ले॒षो॑ सि॒ कल्पे॑तां॒ द्यावा॑पृथि॒वी कल्प॑न्ता॒प॒ ओष॑धयः॒ कल्प॑न्ताम॒ग्नयः॒ पृथ॒ङ्नम ज्यैष्ठ्याय॒ सव्र॑ताः ।
Sentence: b    ये अ॒ग्नयः॒ सम॑नसो न्त॒रा द्यावा॑पृथि॒वी इ॒मे शा॑र॒दावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒सं वि॑शन्तु॒ तया॑ दे॒वत॑याङ्गिर॒स्वद्ध्रु॒वे सी॑दतम् ।।

Verse: 17 
Sentence: a    आयु॑र्मे पाहि ।
Sentence: b    प्रा॒णं मे॑ पाहि ।
Sentence: c    अ॑पा॒नं मे॑ पाहि ।
Sentence: d    व्या॒नं मे॑ पाहि ।
Sentence: e    चक्षु॑र्मे पाहि ।
Sentence: f    श्रोत्रं॑ मे पाहि ।
Sentence: g    वाचं॑ मे पिन्व ।
Sentence: h    मनो॑ मे जिन्व ।
Sentence: i    आ॒त्मानं॑ मे पाहि ।
Sentence: j    ज्योति॑र्मे यच्छ ।।

Verse: 18 
Sentence: a    मा छन्दः॑ ।
Sentence: b    प्र॒मा छन्दः॑ ।
Sentence: c    प्र॑ति॒मा छन्दः॑ ।
Sentence: d    अ॑म्री॒वय॒श्छन्दः॑ ।
Sentence: e    प॒ङ्क्तिश्छन्दः॑ ।
Sentence: f    उ॒ष्णिक्छन्दः॑ ।
Sentence: g    बृ॑ह॒ती छन्दः॑ ।
Sentence: h    अ॑नु॒ष्टुप्छन्दः॑ ।
Sentence: i    वि॒राट्छन्दः॑ ।
Sentence: j    गा॑य॒त्री छन्दः॑ ।
Sentence: k    त्रि॒ष्टुप्छन्दः॑ ।
Sentence: l    जग॑ती॒ छन्दः॑ ।।

Verse: 19 
Sentence: a    पृ॑थि॒वी छन्दः॑ ।
Sentence: b    अ॒न्तरि॑क्षं॒ छन्दः॑ ।
Sentence: c    द्यौ॒श्छन्दः॑ ।
Sentence: d    समा॒श्छन्दः॑ ।
Sentence: e    नक्ष॑त्राणि॒ छन्दः॑ ।
Sentence: f    वाक्छन्दः॑ ।
Sentence: g    मन॒श्छन्दः॑ ।
Sentence: h    कृ॒षिश्छन्दः॑ ।
Sentence: i    हिर॑ण्यं॒ छन्दः॑ ।
Sentence: j    गौ॒श्छन्दः॑ ।
Sentence: k    अ॒जा छन्दः॑ ।
Sentence: l    अश्व॒श्छन्दः॑ ।।

Verse: 20 
Sentence: a    अ॒ग्निर्दे॒वता॑ ।
Sentence: b    वातो॑ दे॒वता॑ ।
Sentence: c    सूर्यो॑ दे॒वता॑ ।
Sentence: d    च॒न्द्रमा॑ दे॒वता॑ ।
Sentence: e    वस॑वो दे॒वता॑ ।
Sentence: f    रु॒द्रा दे॒वता॑ ।
Sentence: g    आ॑दि॒त्या दे॒वता॑ ।
Sentence: h    म॒रुतो॑ दे॒वता॑ ।
Sentence: i    विश्वे॑ दे॒वा दे॒वता॑ ।
Sentence: j    बृह॒स्पति॑र्दे॒वता॑ ।
Sentence: k    इन्द्रो॑ दे॒वता॑ ।
Sentence: l    वरु॑णो दे॒वता॑ ।।

Verse: 21 
Sentence: a    मू॒र्धासि॒ राड्ध्रु॒वासि॑ ध॒रुणा॑ ध॒र्त्र्य॑सि॒ धर॑णी ।
Sentence: b    आयु॑षे त्वा॒ वर्च॑से त्वा कृष्यै त्वा॒ क्षेमा॑य त्वा ।।

Verse: 22 
Sentence: a    यन्त्री॒ राड्य॒न्त्र्य॑सि॒ यम॑नी ध्रु॒वासि॒ धरि॑त्री ।
Sentence: b    इ॒षे त्वो॒र्जे त्वा॑ रय्यै त्वा॒ पोषा॑य त्वा ।
Sentence: c    लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् ।
Sentence: d    इ॑न्द्रा॒ग्नी त्वा॒ बृह॒स्पति॑र॒स्मिन्योना॑वसीषदन् ।
Sentence: e    ता अ॑स्य॒ सूद॑दोहसः॒ सोमँ॑ श्रीणन्ति॒ पृश्न॑यः ।
Sentence: f    जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः ।
Sentence: g    इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ ।
Sentence: h    र॒थीत॑मँ र॒थीनां॒ वाजा॑नाँ॒ सत्प॑तिं॒ पति॑म् ।।

Verse: 23 
Sentence: a    आ॒शुर्त्रि॒वृत् ।
Sentence: b    भा॒न्तः प॑ञ्चद॒शः ।
Sentence: c    व्यो॑मा सप्तद॒शः ।
Sentence: d    धरु॑ण एकविँ॒शः ।
Sentence: e    प्रतू॑र्तिरष्टाद॒शः ।
Sentence: f    तपो॑ नवद॒शः ।
Sentence: g    अ॑भीव॒र्तः स॑विँ॒शः ।
Sentence: h    वर्चो॑ द्वाविँ॒शः ।
Sentence: i    सं॒भर॑णस्त्रयोविँ॒शः ।
Sentence: j    योनि॑श्चतुर्विँ॒शः ।
Sentence: k    गर्भाः॑ पञ्चविँ॒शः ।
Sentence: l    ओज॑स्त्रिण॒वः ।
Sentence: m    क्रतु॑रेकत्रिँ॒शः ।
Sentence: n    प्र॑ति॒ष्ठा त्र॑यस्त्रिँ॒शः ।
Sentence: o    ब्र॒ध्नस्य॑ वि॒ष्टपं॑ चतुस्त्रिँ॒शः ।
Sentence: p    नाकः॑ षट्त्रिँ॒शः ।
Sentence: q    वि॑व॒र्तो॑ ष्टाचत्वारिँशः ।
Sentence: r    ध॒र्त्रं च॑तुष्टो॒मः ।।

Verse: 24 
Sentence: a    अ॒ग्नेर्भा॒गो॑ सि दी॒क्षाया॒ आधि॑पत्यं॒ ब्रह्म॑ स्पृ॒तं त्रि॒वृत्स्तोमः॑ ।
Sentence: b    इन्द्र॑स्य भा॒गो॑ सि॒ विष्णो॒राधि॑पत्यं क्स॒त्रँ स्पृ॒तं प॑ञ्चद॒शः स्तोमः॑ ।
Sentence: c    नृ॒चक्ष॑सां भा॒गो॑ सि धा॒तुराधि॑पत्यं ज॒नित्रँ॑ स्पृ॒तँ स॑प्तद॒शः स्तोमः॑ ।
Sentence: d    मि॒त्रस्य॑ भा॒गो॑ सि॒ वरु॑ण॒स्याधि॑पत्यं दि॒वो वृष्टि॒र्वात॑ स्पृ॒त ए॑कविँ॒श स्तोमः॑ ।।

Verse: 25 
Sentence: a    वसू॑नां भा॒गो॑ सि रु॒द्राणा॒माधि॑पत्यं॒ चतु॑ष्पात्स्पृ॒तं च॑तुर्विँ॒श स्तोमः॑ ।
Sentence: b    आ॑दि॒त्यानां॑ भा॒गो॑ सि म॒रुता॒माधि॑पत्यं॒ गर्भा॑ स्पृ॒ताः प॑ञ्चविँश॒ स्तोमः॑ ।
Sentence: c    अदि॑त्यै भा॒गो॑ सि पू॒ष्ण आधि॑पत्य॒मोज॑ स्पृ॒तं त्रि॑ण॒व स्तोमः॑ ।
Sentence: d    दे॒वस्य॑ सवि॒तुर्भा॒गो॑ सि॒ बृह॒स्पते॒राधि॑पत्यँ स॒मीची॒र्दिश॑ स्पृ॒ताश्च॑तुष्टो॒म स्तोमः॑ ।।

Verse: 26 
Sentence: a    यवा॑नां भा॒गो॒ स्यय॑वाना॒माधि॑पत्यं प्र॒जा स्पृ॒ताश्च॑तुश्चत्वारिँ॒श स्तोमः॑ ।
Sentence: b    ऋ॑भू॒णां भा॒गो॑ सि॒ विश्वे॑षां दे॒वाना॒माधि॑पत्यं भू॒तँ स्पृ॒तं त्र॑यस्त्रिँ॒श स्तोमः॑ ।।

Verse: 27 
Sentence: a    सह॑श्च सह॒स्य॑श्च हैमन्तिकावृ॒तू अ॒ग्नेर॑न्तःश्ले॒षो॑ सि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धयः॒ कल्प॑न्ताम॒ग्नयः॒ पृथ॒ङ्नम ज्यैष्ठ्याय॒ सव्र॑ताः ।
Sentence: b    ये अ॒ग्नयः॒ सम॑नसो न्त॒रा द्यावा॑पृथि॒वी इ॒मे है॑मन्तिकावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒सं वि॑शन्तु॒ तया॑ दे॒वत॑याङ्गिर॒स्वद्ध्रु॒वे सी॑दतम् ।।

Verse: 28 
Sentence: a    एक॑यास्तुवत प्र॒जा अ॑धीयन्त प्र॒जाप॑ति॒रधि॑पतिरासीत् ।
Sentence: b    ति॒सृभि॑रस्तुवत॒ ब्रह्मा॑सृज्यत॒ ब्रह्म॑ण॒स्पति॒रधि॑पतिरासीत् ।
Sentence: c    प॒ञ्चभि॑रस्तुवत भू॒तान्य॑सृज्यन्त भू॒तानां॒ पति॒रधि॑पतिरासीत् ।
Sentence: d    स॒प्तभि॑रस्तुवत सप्त ऋ॒षयो॑ सृज्यन्त धा॒ताधि॑पतिरासीत् ।।

Verse: 29 
Sentence: a    न॒वभि॑रस्तुवत पि॒तरो॑ सृज्य॒न्तादि॑ति॒रध्नि॑पत्न्यासीत् ।
Sentence: b    ए॑काद॒शभि॑रस्तुवत ऋ॒तवो॑ सृज्यन्तार्त॒वा अधि॑पतय आसन् ।
Sentence: c    त्र॑योद॒शभि॑रस्तुवत॒ मासा॑ असृज्यन्त संवत्स॒रो धि॑पतिरासीत् ।
Sentence: d    प॑ञ्चद॒शभि॑रस्तुवत क्ष॒त्रम॑सृज्य॒तेन्द्रो॑ धिपतिरासीत् ।
Sentence: e    स॑प्तद॒शभि॑रस्तुवत ग्रा॒म्याः प॒शवो॑ सृज्यन्त॒ बृह॒स्पति॒रधि॑पतिरासीत् ।।

Verse: 30 
Sentence: a    न॑वद॒शभि॑रस्तुवत शूद्रा॒र्याव॑सृज्येतामहोरा॒त्रे अधि॑पत्नी आस्ताम् ।
Sentence: b    एक॑विँशत्यास्तुवतैकशपाः प॒शवो॑ सृज्यन्त॒ वरु॑णो धिपतिरासीत् ।
Sentence: c    त्रयो॑विँशत्यास्तुवत क्षु॒द्रां प॒शवो॑ सृज्यन्त पू॒षाधि॑पतिरासीत् ।
Sentence: d    पञ्च॑विँशत्यास्तुवतार॒ण्याः प॒शवो॑ सृज्यन्त वा॒युरधि॑पतिरासीत् ।
Sentence: e    स॒प्तविँ॑शत्यास्तुवत॒ द्यावा॑पृथि॒वी व्यै॑तां॒ वस॑वो रु॒द्रा आ॑दि॒त्या अ॑नु॒व्या॑यँ॒स्त ए॒वाधि॑पतय आसन् ।।

Verse: 31 
Sentence: a    नव॑सिँशत्यास्तुवत॒ वन॒स्पत॑यो सृज्यन्त॒ सोमो धि॑पतिरासीत् ।
Sentence: b    एक॑त्रिँशतास्तुवत प्र॒जा अ॑सृज्यन्त॒ यवा॒श्चाय॑वा॒श्चाधि॑पतय आसन् ।
Sentence: c    त्रय॑स्त्रिँशतास्तुवत भू॒तान्य॑शाम्यन्प्र॒जाप॑तिः परमे॒ष्ठ्यधि॑पतिरासीत् ।
Sentence: d    लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् ।
Sentence: e    इ॑न्द्रा॒ग्नी त्वा॒ बृह॒स्पति॑र॒स्मिन्योना॑वसीषदन् ।
Sentence: f    ता अ॑स्य॒ सूद॑दोहसः॒ सोमँ॑ श्रीणन्ति॒ पृश्न॑यः ।
Sentence: g    जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः ।
Sentence: h    इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ ।
Sentence: i    र॒थीत॑मँ र॒थीनां॒ वाजा॑नाँ॒ सत्प॑तिं॒ पति॑म् ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.