TITUS
White Yajur-Veda: Vajasaneyi-Samhita (Madhyandina)
Part No. 17
Previous part

Paragraph: 17 

Verse: 1 
Sentence: a    अश्म॒न्नूर्जं॒ पर्व॑ते शिश्रिया॒णाम॒द्भ्य ओष॑धीभ्यो॒ वन॒स्पति॒भ्यो धि॒ सम्भृ॑तं॒ पयः॑ ।
Sentence: b    तां न॒ इष॒मूर्जं॑ धत्त मरुतः सँररा॒णाः ।
Sentence: c    अश्मँ॑स्ते॒ क्षुत् ।
Sentence: d    मयि॑ त॒ ऊर्क् ।
Sentence: e    यं द्वि॒ष्मस्तं ते॒ शुगृ॑च्छतु ।।

Verse: 2 
Sentence: a    इ॒मा मे॑ अग्न॒ इष्ट॑का धे॒नवः॑ स॒न्त्वेका॑ च॒ दश॑ च॒ दश॑ च श॒तं च॑ श॒तं च॑ स॒हस्रं॑ च स॒हस्रं॑ चा॒युतं॑ चा॒युतं॑ च नि॒युतं॑ च नि॒युतं॑ च प्र॒युतं॒ चार्बु॑दं च॒ न्य॑र्बुदँ समु॒द्रश्च॒ मध्यं॒ चान्त॑श्च परा॒र्धश्चै॒ता मे॑ अग्न॒ इष्ट॑का धे॒नवः॑ सन्त्व॒मुत्रा॒मुष्मिं॑ल्लो॒के ।।

Verse: 3 
Sentence: a    ऋ॒तव॑ स्थ ऋता॒वृध॑ ऋतु॒ष्ठा स्थ॑ ऋता॒वृधः॑ ।
Sentence: b    घृ॑त॒श्च्युतो॑ मधु॒श्च्युतो॑ वि॒राजो॒ नाम॑ काम॒दुघा॒ अक्षी॑यमाणाः ।।

Verse: 4 
Sentence: a    स॑मु॒द्रस्य॒ त्वाव॑क॒याग्ने॒ परि॑ व्ययामसि ।
Sentence: b    पा॑व॒को अ॒स्मभ्यँ॑ शि॒वो भ॑व ।।

Verse: 5 
Sentence: a    हि॒मस्य॑ त्वा ज॒रायु॒णाग्ने॒ परि॑ व्ययामसि ।
Sentence: b    पा॑व॒को अ॒स्मभ्यँ॑ शि॒वो भ॑व ।।

Verse: 6 
Sentence: a    उप॒ ज्मन्नुप॑ वेत॒से व॑ तर न॒दीष्वा ।
Sentence: b    अग्ने॑ पि॒त्तम॒पाम॑सि ।
Sentence: c    मण्डू॑कि॒ ताभि॒रा ग॑हि॒ सेमं नो॑ य॒ज्ञं पा॑व॒कव॑र्णँ शिवं कृधि ।।

Verse: 7 
Sentence: a    अ॒पामि॒दं न्यय॑नँ समु॒द्रस्य॑ नि॒वेश॑नम् ।
Sentence: b    अ॒न्याँस्ते॑ अ॒स्मत्त॑पन्तु हे॒तयः॑ पाव॒को अ॒स्मभ्यँ॑ शि॒वो भ॑व ।।

Verse: 8 
Sentence: a    अग्ने॑ पावक रो॒चिषा॑ म॒न्द्रया॑ देव जि॒ह्वया॑ ।
Sentence: b    आ दे॒वान्व॑क्षि॒ यक्षि॑ च ।।

Verse: 9 
Sentence: a    स नः॑ पावक दीदि॒वो ग्ने॑ दे॒वाँ इ॒हा व॑ह ।
Sentence: b    उप॑ य॒ज्ञँ ह॒विश्च॑ नः ।।

Verse: 10 
Sentence: a    पा॑व॒कया॒ यश्चि॒तय॑न्त्या कृ॒पा क्षाम॑न्रुरु॒च उ॒षसो॒ न भा॒नुना॑ ।
Sentence: b    तूर्व॒न्न याम॒न्नेत॑शस्य॒ नू रण॒ आ यो घृ॒णे न त॑तृषा॒णो अ॒जरः॑ ।।

Verse: 11 
Sentence: a    नम॑स्ते॒ हर॑से शो॒चिषे॒ नम॑स्ते अस्त्व॒र्चिषे॑ ।
Sentence: b    अ॒न्याँस्ते॑ अ॒स्मत्त॑पन्तु हे॒तयः॑ पाव॒को अ॒स्मभ्यँ॑ शि॒वो भ॑व ।।

Verse: 12 
Sentence: a    नृ॒षदे॒ वेट् ।
Sentence: b    अ॑प्सु॒षदे॒ वेट् ।
Sentence: c    ब॑र्हि॒षदे॒ वेट् ।
Sentence: d    व॑न॒सदे॒ वेट् ।
Sentence: e    स्व॒र्विदे॒ वेट् ।।

Verse: 13 
Sentence: a    ये दे॒वा दे॒वानां॑ य॒ज्ञिया॑ य॒ज्ञिया॑नाँ संवत्स॒रीण॒मुप॑ भा॒गमास॑ते ।
Sentence: b    अ॑हु॒तादो॑ ह॒विषो॑ य॒ज्ञे अ॒स्मिन्त्स्व॒यं पि॑बन्तु॒ मधु॑नो घृ॒तस्य॑ ।।

Verse: 14 
Sentence: a    ये दे॒वा दे॒वेष्वधि॑ देव॒त्वमाय॒न्ये ब्रह्म॑णः पुरए॒तारो॑ अस्य ।
Sentence: b    येभ्यो॑ न ऋ॒ते पव॑ते॒ धाम॒ किं च॒न न ते दि॒वो न पृ॑थि॒व्या अधि॒ स्नुषु॑ ।।

Verse: 15 
Sentence: a    प्रा॑ण॒दा अ॑पान॒दा व्या॑न॒दा व॑र्चो॒दा व॑रिवो॒दाः ।
Sentence: b    अ॒न्याँस्ते॑ अ॒स्मत्त॑पन्तु हे॒तयः॑ पाव॒को अ॒स्मभ्यँ॑ शि॒वो भ॑व ।।

Verse: 16 
Sentence: a    अ॒ग्निस्ति॒ग्मेन॑ शो॒चिषा॒ यास॒द्विश्वं॒ न्य॒त्रिण॑म् ।
Sentence: b    अ॒ग्निर्नो॑ वनते र॒यिम् ।।

Verse: 17 
Sentence: a    य इ॒मा विश्वा॒ भुव॑नानि॒ जुह्व॒दृषि॒र्होता॒ न्यसी॑दत्पि॒ता नः॑ ।
Sentence: b    स आ॒शिषा॒ द्रवि॑णमि॒च्छमा॑नः प्रथम॒च्छदव॑राँ॒ आ वि॑वेश ।।

Verse: 18 
Sentence: a    किँ स्वि॑दासीदधि॒ष्ठान॑मा॒रम्भ॑णं कत॒मत्स्वि॑त्क॒थासी॑त् ।
Sentence: b    यतो॒ भूमिं॑ ज॒नय॑न्वि॒श्वक॑र्मा॒ वि द्याऔ॑र्णोन्महि॒ना वि॒श्वच॑क्षाः ।।

Verse: 19 
Sentence: a    वि॒श्वत॑श्चक्षुरु॒त वि॒श्वतो॑मुखो वि॒श्वतो॑बाहुरु॒त वि॒श्वत॑स्पात् ।
Sentence: b    सं बा॒हुभ्यां॒ धम॑ति॒ सं पत॑त्रै॒र्द्यावा॒भूमी॑ ज॒नय॑न्दे॒व एकः॑ ।।

Verse: 20 
Sentence: a    किँ स्वि॒द्वनं॒ क उ॒ स वृ॒क्ष आ॑स॒ यतो॒ द्यावा॑पृथि॒वी नि॑ष्टत॒क्षुः ।
Sentence: b    मनी॑षिणो॒ मन॑सा पृ॒च्छतेदु॒ तद्यद॒ध्यति॑ष्ठ॒द्भुव॑नानि धा॒रय॑न् ।।

Verse: 21 
Sentence: a    या ते॒ धामा॑नि पर॒माणि॒ याव॒मा या म॑ध्य॒मा वि॑श्वकर्मन्नु॒तेमा ।
Sentence: b    शिक्षा॒ सखि॑भ्यो ह॒विषि॑ स्वधावः स्व॒यं य॑जस्व त॒न्वं॑ वृधा॒नः ।।

Verse: 22 
Sentence: a    विश्व॑कर्मन्ह॒विषा॑ वावृधा॒नः स्व॒यं य॑जस्व पृथि॒वीमु॒त द्याम् ।
Sentence: b    मुह्य॑न्त्व॒न्ये अ॒भितो॑ स॒पत्ना॑ इ॒हास्माकं॑ म॒घवा॑ सू॒रिर॑स्तु ।।

Verse: 23 
Sentence: a    वा॒चस्पतिं॑ वि॒श्वक॑र्माणमू॒तये॑ मनो॒जुवं॒ वाजे॑ अ॒द्या हु॑वेम ।
Sentence: b    स नो॒ विश्वा॑नि॒ हव॑नानि जोषद्वि॒श्वश॑म्भू॒रव॑से सा॒धुक॑र्मा ।।

Verse: 24 
Sentence: a    विश्व॑कर्मन्ह॒विषा॒ वर्ध॑नेन त्रा॒तार॒मिन्द्र॑मकृणोरव॒ध्यम् ।
Sentence: b    तस्मै॒ विशः॒ सम॑नमन्त पू॒र्वीर॒यमु॒ग्रो वि॒हव्यो॒ यथास॑त् ।।

Verse: 25 
Sentence: a    चक्षु॑षः पि॒ता मन॑सा॒ हि धीरो॑ घृ॒तमे॑ने अजन॒न्नम्न॑माने ।
Sentence: b    य॒देदन्ता॒ अद॑दृहन्त॒ पूर्व॒ आदिद्द्यावा॑पृथि॒वी अ॑प्रथेताम् ।।

Verse: 26 
Sentence: a    वि॒श्वक॑र्मा॒ विम॑ना॒ आद्विहा॑या धा॒ता वि॑धा॒ता प॑र॒मोत सं॒दृक् ।
Sentence: b    तेषा॑मि॒ष्टानि॒ समि॒षा म॑दन्ति॒ यत्रा॑ सप्तऋ॒षीन्प॒र एक॑मा॒हुः ।।

Verse: 27 
Sentence: a    यो नः॑ पि॒ता ज॑नि॒ता यो वि॑धा॒ता धामा॑नि॒ वेद॒ भुव॑नानि॒ विश्वा॑ ।
Sentence: b    यो दे॒वानां॑ नाम॒धा एक॑ ए॒व तँ सं॑प्र॒श्नं भुव॑ना यन्त्य॒न्या ।।

Verse: 28 
Sentence: a    त आय॑जन्त॒ द्रवि॑णँ॒ सम॑स्मा॒ ऋष॑यः॒ पूर्वे॑ जरि॒तारो॒ न भू॒ना ।
Sentence: b    अ॒सूर्ते॒ सूर्ते॒ रज॑सि निष॒त्ते ये भू॒तानि॑ स॒मकृ॑ण्वन्नि॒मानि॑ ।।

Verse: 29 
Sentence: a    प॒रो दि॒वा प॒र ए॒ना पृ॑थि॒व्या प॒रो दे॒वेभि॒रसु॑रै॒र्यदस्ति॑ ।
Sentence: b    कँ स्वि॒द्गर्भं॑ प्रथ॒मं द॑ध्र॒ आपो॒ यत्र॑ दे॒वाः स॒मप॑श्यन्त॒ पूर्वे॑ ।।

Verse: 30 
Sentence: a    तमिद्गर्भं॑ प्रथ॒मं द॑ध्र॒ आपो॒ यत्र॑ दे॒वाः स॒मग॑च्छन्त॒ विश्वे॑ ।
Sentence: b    अ॒जस्य॒ नाभा॒वध्येक॒मर्पि॑तं॒ यस्मि॒न्विश्वा॑नि॒ भुव॑नानि त॒स्थुः ।।

Verse: 31 
Sentence: a    न तं वि॑दाथ॒ य इ॒मा ज॒जाना॒न्यद्यु॒ष्माक॒मन्त॑रं बभूव ।
Sentence: b    नी॑हा॒रेण॒ प्रावृ॑ता॒ जल्प्या॑ चासु॒तृप॑ उक्थ॒शास॑श्चरन्ति ।।

Verse: 32 
Sentence: a    वि॒श्वक॑र्मा॒ ह्यज॑निष्ट दे॒व आदिद्ग॑न्ध॒र्वो अ॑भवद्द्वि॒तीयः॑ ।
Sentence: b    तृ॒तीयः॑ पि॒ता ज॑नितौषधीनाम॒पां गर्भं॒ व्य॑दधात्पुरु॒त्रा ।।

Verse: 33 
Sentence: a    आ॒शुः शिशा॑नो वृष॒भो न भी॒मो घ॑नाघ॒नः क्षोभ॑णश्चर्षणी॒नाम् ।
Sentence: b    सं॒क्रन्द॑नो निमि॒ष ए॑कवी॒रः श॒तँ सेना॑ अजयत्सा॒कमिन्द्रः॑ ।।

Verse: 34 
Sentence: a    सं॒क्रन्द॑नेनानिमि॒षेण॑ जि॒ष्णुना॑ युत्का॒रेण॑ दुश्च्यव॒नेन॑ धृ॒ष्णुना॑ ।
Sentence: b    तदिन्द्रे॑ण जयत॒ तत्स॑हध्वं॒ युधो॑ नर॒ इषु॑हस्तेन॒ वृष्णा॑ ।।

Verse: 35 
Sentence: a    स इषु॑हस्तैः॒ स नि॑ष॒ङ्गिभि॑र्व॒शी सँस्र॑ष्टा॒ स युध॒ इन्द्रो॑ ग॒णेन॑ ।
Sentence: b    सँ॑सृष्ट॒जित्सो॑म॒पा बा॑हुश॒र्ध्यु॒ग्रध॑न्वा॒ प्रति॑हिताभि॒रस्ता॑ ।।

Verse: 36 
Sentence: a    बृह॑स्पते॒ परि॑ दीया॒ रथे॑न रक्षो॒हामित्रा॑नप॒बाध॑मानः ।
Sentence: b    प्र॑भ॒ञ्जन्त्सेनाः॑ प्रमृ॒णो यु॒धा जय॑न्न॒स्माक॑मेध्यवि॒ता रथा॑नाम् ।।

Verse: 37 
Sentence: a    ब॑लविज्ञा॒य स्थवि॑रः॒ प्रवी॑रः॒ सह॑स्वान्वा॒जी सह॑मान उ॒ग्रः ।
Sentence: b    अ॒भिवी॑रो अ॒भिस॑त्वा सहो॒जा जै॑त्रमिन्द्र॒ रथ॒मा ति॑ष्ठ गो॒वित् ।।

Verse: 38 
Sentence: a    गो॑त्र॒भिदं॑ गो॒विदं॒ वज्र॑बाहुं॒ जय॑न्त॒मज्म॑ प्रमृ॒णन्त॒मोज॑सा ।
Sentence: b    इ॒मँ स॑जाता॒ अनु॑ वीरयध्व॒मिन्द्रँ॑ सखायो॒ अनु॒ सँ र॑भध्वम् ।।

Verse: 39 
Sentence: a    अ॒भि गो॒त्राणि॒ सह॑सा॒ गाह॑मानो द॒यो वी॒रः श॒तम॑न्यु॒रिन्द्रः॑ ।
Sentence: b    दु॑श्च्यव॒नः पृ॑तना॒षाड॑यु॒ध्यो॒ स्माकँ॒ सेना॑ अवतु॒ प्र यु॒त्सु ।।

Verse: 40 
Sentence: a    इन्द्र॑ आसां ने॒ता बृह॒स्पति॒र्दक्षि॑णा य॒ज्ञः पु॒र ए॑तु॒ सोमः॑ ।
Sentence: b    दे॑वसे॒नाना॑मभिभञ्जती॒नां जय॑न्तीनां म॒रुतो॑ य॒न्त्वग्र॑म् ।।

Verse: 41 
Sentence: a    इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्यानां॑ म॒रुताँ॒ शर्ध॑ उ॒ग्रम् ।
Sentence: b    म॒हाम॑नसां भुवनच्य॒वानां॒ घोषो॑ दे॒वानां॒ जय॑ता॒मुद॑स्थात् ।।

Verse: 42 
Sentence: a    उद्ध॑र्षय मघव॒न्नायु॑धा॒न्युत्सत्व॑नां माम॒कानां॒ मनाँ॑सि ।
Sentence: b    उद्वृ॑त्रहन्वा॒जिनां॒ वाजि॑ना॒न्युद्रथा॑नां॒ जय॑तां यन्तु॒ घोषाः॑ ।।

Verse: 43 
Sentence: a    अ॒स्माक॒मिन्द्रः॒ समृ॑तेषु ध्व॒जेष्व॒स्माकं॒ या इष॑व॒स्ता ज॑यन्तु ।
Sentence: b    अ॒स्माकं॑ वी॒रा उत्त॑रे भवन्त्व॒स्माँ उ॑ देवा अवता॒ हवे॑षु ।।

Verse: 44 
Sentence: a    अ॒मीषां॑ चि॒त्तं प्र॑तिलो॒भय॑न्ती गृहा॒णाङ्गा॑न्यप्वे॒ परे॑हि ।
Sentence: b    अ॒भि प्रेहि॒ निर्द॑ह हृ॒त्सु शोकै॑र॒न्धेना॒मित्रा॒स्तम॑सा सचन्ताम् ।।

Verse: 45 
Sentence: a    अव॑सृष्टा॒ परा॑ पत॒ शर॑व्ये॒ ब्रह्म॑सँशिते ।
Sentence: b    गच्छा॒मित्रा॒न्प्र प॑द्यस्व॒ मामीषां॒ कं च॒नोच्छि॑षः ।।

Verse: 46 
Sentence: a    प्रेता॒ जय॑ता नर॒ इन्द्रो॑ वः॒ शर्म॑ यच्छतु ।
Sentence: b    उ॒ग्रा वः॑ सन्तु बा॒हवो॑ नाधृ॒ष्या यथास॑थ ।।

Verse: 47 
Sentence: a    असौ॒ या सेना॑ मरुतः॒ परे॑षामभ्यैति न॒ ओज॑सा॒ स्पर्ध॑माना ।
Sentence: b    तां गू॑हत॒ तम॒साप॑व्रतेन॒ यथा॒मी अ॒न्यो अ॒न्यं न जा॒नन् ।।

Verse: 48 
Sentence: a    यत्र॑ वाणाः स॒म्पत॑न्ति कुमा॒रा वि॑शि॒खा इ॑व ।
Sentence: b    तत्र॒ इन्द्रो॒ बृह॒स्पति॒रदि॑तिः॒ शर्म॑ यच्छतु वि॒श्वाहा॒ शर्म॑ यच्छतु ।।

Verse: 49 
Sentence: a    मर्मा॑णि ते॒ वर्म॑णा छादयामि॒ सोम॑स्त्वा॒ राजा॒मृते॒नानु॑ वस्ताम् ।
Sentence: b    उ॒रोर्वरी॑यो॒ वरु॑णस्ते कृणोतु॒ जय॑न्तं॒ त्वानु॑ दे॒वा म॑दन्तु ।।

Verse: 50 
Sentence: a    उदे॑नमुत्त॒रां न॒याग्ने॑ घृतेनाहुत ।
Sentence: b    रा॒यस्पोषे॑ण॒ रँ सृ॑ज प्र॒जया॑ च ब॒हुं कृ॑धि ।।

Verse: 51 
Sentence: a    इन्द्रे॒मं प्र॑त॒रां न॑य सजा॒ताना॑मसद्व॒शी ।
Sentence: b    समे॑नं॒ वर्च॑सा सृज दे॒वानां॑ भाग॒दा अ॑सत् ।।

Verse: 52 
Sentence: a    यस॑य कु॒र्मो गृ॒हे ह॒विस्तम॑ग्ने वर्धया॒ त्वम् ।
Sentence: b    तस्मै॑ दे॒वा अधि॑ ब्रवन्न॒यं च॒ ब्रह्म॑ण॒स्पतिः॑ ।।

Verse: 53 
Sentence: a    उदु॑ त्वा॒ विश्वे॑ दे॒वा अग्ने॑ भरन्तु॒ चित्ति॑भिः ।
Sentence: b    स नो॑ बह्व शि॒वस्त्वँ सु॒प्रती॑को वि॒भाव॑सुः ।।

Verse: 54 
Sentence: a    पञ्च॒ दिशो दैवीर्य॒ज्ञम॑वन्तु दे॒वीरपाम॑तिं॒ दुर्म॑तिं॒ बाध॑मानाः ।
Sentence: b    रा॒यस्पोषे॑ य॒ज्ञप॑तिमा॒भज॑न्ती रा॒यस्पोषे॒ अधि॑ य॒ज्ञो अ॑स्थात् ।।

Verse: 55 
Sentence: a    समि॑द्धे अ॒ग्नावधि॑ मामहा॒न उ॒क्थप॑त्र॒ ईड्यो॑ गृभी॒तः ।
Sentence: b    त॒प्तं घ॒र्मं प॑रि॒गृह्या॑यजन्तो॒र्जा यद्य॒ज्ञमय॑जन्त दे॒वाः ।।

Verse: 56 
Sentence: a    दै॑व्याय ध॒र्त्रे जोष्ट्रे॑ देव॒श्रीः श्रीम॑नाः श॒तप॑याः ।
Sentence: b    प॑रि॒गृह्य॑ दे॒वा य॒ज्ञमा॑यन्दे॒वा दे॒वेभ्यो॑ अध्व॒र्यन्तो॑ अस्थुः ।।

Verse: 57 
Sentence: a    वी॒तँ ह॒विः श॑मि॒तँ श॑मि॒ता य॒जध्यै॑ तु॒रीयो॑ य॒ज्ञो यत्र॑ ह॒व्यमेति॑ ।
Sentence: b    ततो॑ वा॒का आ॒शिषो॑ नो जुषन्ताम् ।।

Verse: 58 
Sentence: a    सूर्य॑रश्मि॒र्हरि॑केशः पु॒रस्ता॑त्सवि॒ता ज्योति॒रुद॑याँ॒ अज॑स्रम् ।
Sentence: b    तस्य॑ पू॒षा प्र॑स॒वे या॑ति वि॒द्वान्त्स॒म्पश्य॒न्विश्वा॒ भुव॑नानि गो॒पाः ।।

Verse: 59 
Sentence: a    वि॒मान॑ ए॒ष दि॒वो मध्य॑ आस्त आपप्रि॒वान्रोद॑सी अ॒न्तरि॑क्षम् ।
Sentence: b    स वि॒श्वाची॑र॒भि च॑ष्टे घृ॒ताची॑रन्त॒रा पूर्व॒मप॑रं च के॒तुम् ।।

Verse: 60 
Sentence: a    उ॒क्षा स॑मु॒द्रो अ॑रु॒णः सु॑प॒र्णः पूर्व॑स्य॒ योनिं॑ पि॒तुरा वि॑वेश ।
Sentence: b    मध्ये॑ दि॒वो निहि॑तः॒ पृश्नि॒रश्मा॒ वि च॑क्रमे॒ रज॑सस्पा॒त्यन्तौ॑ ।।

Verse: 61 
Sentence: a    इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ ।
Sentence: b    र॒थीत॑मँ र॒थीनां॒ वाजा॑नाँ॒ सत्प॑तिं॒ पति॑म् ।।

Verse: 62 
Sentence: a    दे॑व॒हूर्य॒ज्ञ आ च॑ वक्षत्सुम्न॒हूर्य॒ज्ञ आ च॑ वक्षत् ।
Sentence: b    यक्ष॑द॒ग्निर्दे॒वो दे॒वाँ आ च॑ वक्षत् ।।

Verse: 63 
Sentence: a    वज॑स्य मा प्रस॒वे उ॑द्ग्रा॒भेणोद॑ग्रभीत् ।
Sentence: b    अध॑ स॒पत्ना॒निन्द्रो॑ मे निग्रा॒भेणाध॑राँ अकः ।।

Verse: 64 
Sentence: a    उ॑द्ग्रा॒भं च॑ निग्रा॒भं च॒ ब्रह्म॑ दे॒वा अ॑वीवृधन् ।
Sentence: b    अधा॑ स॒पत्ना॑निन्द्रा॒ग्नी मे॑ विषू॒चीना॒न्व्य॑स्यताम् ।।

Verse: 65 
Sentence: a    क्रम॑ध्वम॒ग्निना॒ नाक॒मुख्यँ॒ हस्ते॑षु॒ बिभ्र॑तः ।
Sentence: b    दि॒वस्पृ॒ष्ठँ स्व॑र्ग॒त्वा मि॒श्रा दे॒वेभि॑राध्वम् ।।

Verse: 66 
Sentence: a    प्राची॒मनु॑ प्र॒दिशं॒ प्रेहि॑ वि॒द्वान॒ग्नेर॑ग्ने पुरोअग्निर्भवे॒ह ।
Sentence: b    विश्वा॒ आशा॒ दीद्या॑नो॒ वि भा॒ह्यूर्जं॑ नो धेहि द्वि॒पदे॒ चतु॑ष्पदे ।।

Verse: 67 
Sentence: a    पृ॑थि॒व्या अ॒हमुद॒न्तरि॑क्ष॒मारु॑हम॒न्तरि॑क्षा॒द्दिव॒मारु॑हम् ।
Sentence: b    दि॒वो नाक॑स्य पृ॒ष्ठात्स्व॒र्ज्योति॑रगाम॒हम् ।।

Verse: 68 
Sentence: a    स्व॒र्यन्तो॒ नापे॑क्षन्त॒ आ द्याँ रो॑हन्ति॒ रोद॑सी ।
Sentence: b    य॒ज्ञं ये वि॒श्वतो॑धारँ॒ सुवि॑द्वाँसो वितेनि॒रे ।।

Verse: 69 
Sentence: a    अग्ने॒ प्रेहि॑ प्रथ॒मो दे॑वय॒तां चक्षु॑र्दे॒वाना॑मु॒त मर्त्या॑नाम् ।
Sentence: b    इय॑क्षमाणा॒ भृगु॑भिः स॒जोषाः॒ स्व॑र्यन्तु॒ यज॑मानाः स्व॒स्ति ।।

Verse: 70 
Sentence: a    नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेकँ॑ समी॒ची ।
Sentence: b    द्यावा॒क्षामा॑ रु॒क्मो अ॒न्तर्वि भा॑ति दे॒वा अ॒ग्निं धा॑रयन्द्रविणो॒दाः ।।

Verse: 71 
Sentence: a    अग्ने॑ सहस्राक्ष शतमूर्धञ्छ॒तं ते॑ प्रा॒णाः स॒हस्रं॑ व्या॒नाः ।
Sentence: b    त्वँ सा॑ह॒स्रस्य॑ रा॒य ई॑शिषे॒ तस्मै॑ ते विधेम॒ वाजा॑य॒ स्वाहा॑ ।।

Verse: 72 
Sentence: a    सु॑प॒र्णो॑ सि ग॒रुन्मा॑न्पृ॒ष्ठे पृ॑थि॒व्याः सी॑द ।
Sentence: b    भा॒सान्तरि॑क्ष॒मा पृ॑ण॒ ज्योति॑षा॒ दिव॒मुत्त॑भान॒ तेज॑सा॒ दिश॒ उद्दृँ॑ह ।।

Verse: 73 
Sentence: a    आ॒जुह्वा॑नः सु॒प्रती॑कः पु॒रस्ता॒दग्ने॒ योनि॒मा सी॑द साधु॒या ।
Sentence: b    अ॒स्मिन्त्स॒स्हस्थे॒ अध्युत्त॑रस्मि॒न्विश्वे॑ देवा॒ यज॑मानश्च सीदत ।।

Verse: 74 
Sentence: a    तँ स॑वि॒तुर्वरे॑ण्यस्य चि॒त्रामाहं वृ॑णे सुम॒तिं वि॒श्वज॑न्याम् ।
Sentence: b    याम॑स्य॒ कण्वो॒ अदु॑ह॒त्प्रपी॑नाँ स॒हस्र॑धारां॒ पय॑सा म॒हीं गाम् ।।

Verse: 75 
Sentence: a    वि॒धेम॑ ते पर॒मे जन्म॑न्नग्ने वि॒धेम॒ स्तोमै॒रव॑रे स॒धस्थे॑ ।
Sentence: b    यस्मा॒द्योने॑रु॒दारि॑था॒ यजे॒ तं प्र त्वे ह॒वीँषि॑ जुहुरे॒ समि॑द्धे ।।

Verse: 76 
Sentence: a    प्रेद्धो॑ अग्ने दीदिहि पु॒रो नो ज॑स्रया सू॒र्म्या॑ यविष्ठ ।
Sentence: b    त्वाँ शश्व॑न्त॒ उप॑ यन्ति॒ वाजाः॑ ।।

Verse: 77 
Sentence: a    अग्ने॒ तम॒द्याश्वं॒ न स्तोमैः॒ क्रतुं॒ न भ॒द्रँ हृ॑दि॒स्पृश॑म् ।
Sentence: b    ऋ॒ध्यामा॑ त॒ ओहैः॑ ।।

Verse: 78 
Sentence: a    चित्तिं॑ जुहोमि॒ मन॑सा घृ॒तेन॒ यथा॑ दे॒वा इ॒हागम॑न्वी॒तिहो॑त्रा ऋता॒वृधः॑ ।
Sentence: b    पत्ये॒ विश्व॑स्य॒ भूम॑नो जु॒होमि॑ वि॒श्वक॑र्मणे वि॒श्वाहादा॑भ्यँ ह॒वि ।।

Verse: 79 
Sentence: a    स॒प्त ते॑ अग्ने स॒मिधः॑ स॒प्त जि॒ह्वाः स॒प्त ऋष॑यः स॒प्त धाम॑ प्रि॒याणि॑ ।
Sentence: b    स॒प्त होत्राः॑ सप्त॒धा त्वा॑ यजन्ति स॒प्त योनी॒रा पृ॑णस्व घृ॒तेन॒ स्वाहा॑ ।।

Verse: 80 
Sentence: a    शु॒क्रज्यो॑तिश्च चि॒त्रज्यो॑तिश्च स॒त्यज्यो॑तिश्च॒ ज्योति॑ष्माँश्च ।
Sentence: b    शु॒क्रश्च॑ ऋत॒पाश्चात्यँ॑हाः ।।

Verse: 81 
Sentence: a    ई॒दृङ्चा॑न्य॒दृङ्च॑ स॒दृङ्च॒ प्रति॑सदृङ्च ।
Sentence: b    मि॒तश्च॒ संमि॑तश्च॒ सभ॑राः ।।

Verse: 82 
Sentence: a    ऋ॒तश्च॑ स॒त्यश्च॑ ध्रु॒वश्च॑ ध॒रुण॑श्च ।
Sentence: b    ध॒र्ता च॑ विध॒र्ता च॑ विधार॒यः ।।

Verse: 83 
Sentence: a    ऋ॑त॒जिच्च॑ सत्य॒जिच्च॑ सेन॒जिच्च॑ सु॒षेण॑श्च ।
Sentence: b    अन्ति॑मित्रश्च दूरेअमित्रश्च ग॒णः ।।

Verse: 84 
Sentence: a    ई॒दृक्षा॑स एता॒दृक्षा॑स ऊ॒ षु णः॑ स॒दृक्षा॑सः॒ प्रति॑सदृक्षास॒ एत॑न ।
Sentence: b    मि॒तास॑श्च॒ संमि॑तासो नो अ॒द्य सभ॑रसो मरुतो य॒ज्ञे अ॒स्मिन् ।।

Verse: 85 
Sentence: a    स्वत॑वाँश्च प्रघा॒सी च॑ सांतप॒नश्च॑ गृहमे॒धी च॑ ।
Sentence: b    क्री॒डी च॑ शा॒की चो॑ज्जे॒षी ।।

Verse: 86 
Sentence: a    उ॒ग्रश्च॑ भी॒मश्च॒ ध्वा॑न्तश्च॒ धुनि॑श्च ।
Sentence: b    सा॑स॒ह्वाँश्चा॑भियु॒ग्वा च॑ वि॒क्षिपः॒ स्वाहा॑ ।
Sentence: c    इन्द्रं दैवी॒र्विशो॑ म॒रुतो नु॑वर्त्मानो भव॒न्यथेन्द्रं दैवी॒र्विशो॑ म॒रुतो नु॑वर्त्मा॒नो भ॑वन् ।
Sentence: d    ए॒वमि॒मं यज॑मानं दैवीश्च॒ विशो॑ मानु॒षीश्चानु॑वर्त्मानो भवन्तु ।।

Verse: 87 
Sentence: a    इ॒मँ स्तन॒मूर्ज॑स्वन्तं धया॒पां प्रपी॑नमग्ने सरि॒रस्य॒ मध्ये॑ ।
Sentence: b    उत्सं॑ जुषस्व॒ मधु॑मन्तमर्वन्त्समु॒द्रियँ॒ सद॑न॒मा वि॑शस्व ।।

Verse: 88 
Sentence: a    घृ॒तं मि॑मिक्षे घृ॒तम॑स्य॒ योनि॑र्घृ॒ते श्रि॒तो घृ॒तम्व॑स्य॒ धाम॑ ।
Sentence: b    अ॑नुष्व॒धमा व॑ह मा॒दय॑स्व॒ स्वाहा॑कृतं वृषभ वक्षि ह॒व्यम् ।।

Verse: 89 
Sentence: a    स॑मु॒द्रादू॒र्मिर्मधु॑माँ॒ उदा॑र॒दुपाँ॒शुना॒ सम॑मृत॒त्वमा॑नट् ।
Sentence: b    घृ॒तस्य॒ नाम॒ गुह्यं॒ यदस्ति॑ जि॒ह्वा दे॒वाना॑म॒मृत॑स्य॒ नाभिः॑ ।।

Verse: 90 
Sentence: a    व॒यं नाम॒ प्र ब्र॑वामा घृ॒तस्या॒स्मिन्य॒ज्ञे धा॑रयामा॒ नमो॑भिः ।
Sentence: b    उप॑ ब्र॒ह्मा शृ॑णवच्छ॒स्यमा॑नं॒ चतुः॑शृङ्गो वमीद्गौ॒र ए॒तत् ।।

Verse: 91 
Sentence: a    च॒त्वारि॒ शृङ्गा॒ त्रयो॑ अस्य॒ पादा॒ द्वे शी॒र्षे स॒प्त हस्ता॑सो अस्य ।
Sentence: b    त्रिधा॑ ब॒द्धो वृ॑ष॒भो रो॑रवीति म॒हो दे॒वो मर्त्याँ॒ आ वि॑वेश ।।

Verse: 92 
Sentence: a    त्रिधा॑ हि॒तं प॒णिभि॑र्गु॒ह्यमा॑नं॒ गवि॑ दे॒वासो॑ घृ॒तमन्व॑विन्दन् ।
Sentence: b    इन्द्र॒ एकँ॒ सूर्य॒ एकं॑ जजान वे॒नादेकँ॑ स्व॒धया॒ निष्ट॑तक्षुः ।।

Verse: 93 
Sentence: a    ए॒ता अ॑र्षन्ति॒ हृद्या॑त्समु॒द्राच्छ॒तव्र॑जा रि॒पुणा॒ नाव॒चक्षे॑ ।
Sentence: b    घृ॒तस्य॒ धारा॑ अ॒भि चा॑कशीमि हिर॒ण्ययो॑ वेत॒सो मध्य॑ आसाम् ।।

Verse: 94 
Sentence: a    स॒म्यक्स्र॑वन्ति स॒रितो॒ न धेना॑ अ॒न्तर्हृ॒दा मन॑सा पू॒यमा॑नाः ।
Sentence: b    ए॒ते अ॑र्षन्त्यू॒र्मयो॑ घृ॒तस्य॑ मृ॒गा इ॑व क्षिप॒णोरीष॑माणाः ।।

Verse: 95 
Sentence: a    सिन्धो॑रिव प्राध्व॒ने शू॑घ॒नासो॒ वात॑प्रमियः पतयन्ति य॒ह्वाः ।
Sentence: b    घृ॒तस्य॒ धारा॑ अरु॒षो न वा॒जी काष्ठा॑ भि॒न्दन्नू॒र्मिभिः॒ पिन्व॑मानः ।।

Verse: 96 
Sentence: a    अ॒भि प्र॑वन्त॒ सम॑नेव॒ योषाः॑ कल्या॒ण्यः॒ स्मय॑मानासो अ॒ग्निम् ।
Sentence: b    घृ॒तस्य॒ धाराः॑ स॒मिधो॑ नसन्त॒ ता जु॑षा॒णो ह॑र्यति जा॒तवे॑दाः ।।

Verse: 97 
Sentence: a    क॒न्या॑ इव वह॒तुमेत॒वा उ॑ अ॒ञ्ज्य॑ञ्जा॒ना अ॒भि चा॑कशीमि ।
Sentence: b    यत्र॒ सोमः॑ सू॒यते॒ यत्र॑ य॒ज्ञो घृ॒तस्य॒ धारा॑ अ॒भि तत्प॑वन्ते ।।

Verse: 98 
Sentence: a    अ॒भ्य॑र्षत सुष्टु॒तिं गव्य॑मा॒जिम॒स्मासु॑ भ॒द्रा द्रवि॑णानि धत्त ।
Sentence: b    इ॒मं य॒ज्ञं न॑यत दे॒वता॑ नो घृ॒तस्य॒ धारा॒ मधु॑मत्पवन्ते ।।

Verse: 99 
Sentence: a    धाम॑न्ते॒ विश्वं॒ भुव॑न॒मधि॑ श्रि॒तम॒न्तः स॑मु॒द्रे हृ॒द्य॒न्तरायु॑षि ।
Sentence: b    अ॒पामनी॑के समि॒थे य आभृ॑त॒स्तम॑श्याम॒ मधु॑मन्तं त ऊ॒र्मिम् ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.