TITUS
White Yajur-Veda: Vajasaneyi-Samhita (Madhyandina)
Part No. 20
Paragraph: 20
Verse: 1
Sentence: a
क्ष॒त्रस्य॒ योनि॑रसि क्ष॒त्रस्य॒ नाभि॑रसि ।
Sentence: b
मा त्वा॑ हिँसी॒न्मा मा॑ हिँसीः ।।
Verse: 2
Sentence: a
नि ष॑साद घृ॒तव्र॑तो॒ वरु॑णः प॒स्त्या॒स्वा ।
Sentence: b
साम्रा॑ज्याय सु॒क्रतुः॑ ।
Sentence: c
मृ॒त्योः पा॑हि ।
Sentence: d
वि॒द्योत्पा॑हि ।।
Verse: 3
Sentence: a
दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b
अ॒श्विनोर्भैषज्येन॒ तेज॑से ब्रह्मवर्च॒साया॒भि षि॑ञ्चामि ।
Sentence: c
सर॑स्वत्यै भैषज्येन वी॒र्या॑या॒न्नाद्या॑या॒भि षि॑ञ्चामि ।
Sentence: d
इन्द्र॑स्येन्द्रि॒येण॒ बला॑य श्रियै॒ यश॑से॒ भि षि॑ञ्चामि ।।
Verse: 4
Sentence: a
को॑ सि कत॒मो॑ सि॒ कस्मै॑ त्वा॒ काय॑ त्वा ।
Sentence: b
सुश्लो॑क॒ सुम॑ङ्गल॒ सत्य॑राजन् ।।
Verse: 5
Sentence: a
शिरो॑ मे॒ श्रीर्यशो॒ मुखं॒ त्विषिः॒ केशा॑श्च॒ श्मश्रू॑णि ।
Sentence: b
राजा॑ मे प्रा॒णो अ॒मृतँ॑ स॒म्राट्चक्षु॑र्वि॒राट्श्रोत्र॑म् ।।
Verse: 6
Sentence: a
जि॒ह्वा मे॑ भ॒द्रं वाङ्महो॒ मनो॑ म॒न्युः स्व॒राड्भामः॑ ।
Sentence: b
मोदाः॑ प्रमो॒दा अ॒ङ्गुली॒रङ्गा॑नि मि॒त्रं मे॒ सहः॑ ।।
Verse: 7
Sentence: a
बा॒हू मे॒ बल॑मिन्द्रि॒यँ हस्तौ॑ मे॒ कर्म॑ वी॒र्य॑म् ।
Sentence: b
आ॒त्मा क्ष॒त्रमुरो॒ मम॑ ।।
Verse: 8
Sentence: a
पृ॒ष्टीर्मे॑ रा॒ष्ट्रमु॒दर॒मँसौ॑ ग्री॒वाश्च॒ श्रोणी॑ ।
Sentence: b
ऊ॒रू अ॑र॒त्नी जानु॑नी॒ विशो॒ मे ङ्गा॑नि स॒र्वतः॑ ।।
Verse: 9
Sentence: a
नाभि॑र्मे चि॒त्तं वि॒ज्ञानं॑ पा॒युर्मे॑ पचितिर्भ॒सत् ।
Sentence: b
आ॑नन्दन॒न्दावाण्डौ मे॒ भगः सौभाग्यं॒ पसः॑ ।
Sentence: c
जङ्घा॑भ्यां पा॒द्भ्यां धर्मो॑ स्मि वि॒शि राजा॒ प्रति॑ष्ठितः ।।
Verse: 10
Sentence: a
प्रति॑ क्ष॒त्रे प्रति॑ तिष्ठामि रा॒ष्ट्रे प्रत्यश्वे॑षु॒ प्रति॑ तिष्ठामि॒ गोषु॑ ।
Sentence: b
प्रत्यङ्गे॑षु॒ प्रति॑ तिष्ठाम्या॒त्मन्प्रति॑ प्रा॒णेषु॑ क्ष॒त्रे प्रति॑ तिष्ठामि पु॒ष्टे प्रति॒ द्यावा॑पृथि॒व्योः प्रति॑ तिष्ठामि ।।
Verse: 11
Sentence: a
त्र॒या दे॒वा एका॑दश त्रयस्त्रिँ॒शाः सु॒राध॑सः ।
Sentence: b
बृह॒स्पति॑पुरोहिता दे॒वस्य॑ सवि॒तुः स॒वे ।
Sentence: c
दे॒वा देवैरवन्तु मा ।।
Verse: 12
Sentence: a
प्र॑थ॒मा द्वि॒तीयै॑र्द्वि॒तीया॑स्तृ॒तीयै॑स्तृ॒तीयाः॑ स॒त्येन॑ स॒त्यं य॒ज्ञेन॑ य॒ज्ञो यजु॑र्भि॒र्यजूँ॑षि॒ साम॑भिः॒ सामा॑न्यृ॒ग्भिरृचः॑ पुरोनुवा॒क्या॑भिः पुरोनुवा॒क्या॑ या॒ज्या॑भिर्या॒ज्या॑ वषट्कारैर्वषट्का॒रा आहु॑तिभि॒रहु॑तयो मे॒ कामा॒न्त्सम॑र्धयन्तु॒ भूः स्वाहा॑ ।।
Verse: 13
Sentence: a
लोमा॑नि॒ प्रय॑ति॒र्मम॒ त्वङ्म॒ आन॑ति॒राग॑तिः ।
Sentence: b
माँ॒सं म॒ उप॑नति॒र्वस्वस्थि॑ म॒ज्जा म॒ आन॑तिः ।।
Verse: 14
Sentence: a
यद्दे॑वा देव॒हेड॑नं॒ देवा॑सश्चकृ॒मा व॒यम् ।
Sentence: b
अ॒ग्निर्मा॒ तस्मा॒देन॑सो॒ विश्वा॑न्मुञ्च॒त्वँह॑सः ।।
Verse: 15
Sentence: a
यदि॒ दिवा॒ यदि॒ नक्त॒मेनाँ॑सि चकृ॒मा व॒यम् ।
Sentence: b
वा॒युर्मा॒ तस्मा॒देन॑सो॒ विश्वा॑न्मुञ्च॒त्वँह॑सः ।।
Verse: 16
Sentence: a
यदि॒ जाग्र॒द्यदि॒ स्वप्न॒ एनाँ॑सि चकृ॒मा व॒यम् ।
Sentence: b
सूर्यो॑ मा॒ तस्मा॒देन॑सो॒ विश्वा॑न्मुञ्च॒त्वँह॑सः ।।
Verse: 17
Sentence: a
यद्ग्रामे॒ यदर॑ण्ये॒ यत्स॒भायां॒ यदि॑न्द्रि॒ये ।
Sentence: b
यच्छू॒द्रे यदर्ये॒ यदेन॑श्चकृ॒मा व॒यं यदेक॒स्याधि॒ धर्म॑णि॒ तस्या॑व॒यज॑नमसि ।।
Verse: 18
Sentence: a
यदापो॑ अ॒घ्न्या इति॒ वरु॒णेति॒ शपा॑महे॒ ततो॑ वरुण नो मुञ्च ।
Sentence: b
अव॑भृथ निचुम्पुण निचे॒रुर॑सि निचुम्पु॒णः ।
Sentence: c
अव॑ देवैर्दे॒वकृ॑त॒मेनो॑ य॒क्ष्यव॒ मर्त्यै॒र्मर्त्य॑कृतम् ।
Sentence: d
पु॑रु॒राव्णो॑ देव रि॒षस्पा॑हि ।।
Verse: 19
Sentence: a
स॑मु॒द्रे ते॒ हृद॑यम॒प्स्व॒न्तः सं त्वा॑ विश॒न्त्वोष॑धीरु॒तापः॑ ।
Sentence: b
सु॑मित्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ यो॒ स्मान्द्वेष्टि॒ यं च॑ व॒यं द्वि॒ष्मः ।।
Verse: 20
Sentence: a
द्रु॑प॒दादि॑व मुमुचा॒नः स्वि॒न्नः स्ना॒तो मला॑दिव ।
Sentence: b
पू॒तं प॒वित्रे॑णे॒वाज्य॒मापः॑ शुन्धन्तु मैनसः ।।
Verse: 21
Sentence: a
उद्व॒यं तम॑स॒स्परि॒ स्वः॒ पश्य॑न्त॒ उत्त॑रम् ।
Sentence: b
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।।
Verse: 22
Sentence: a
अ॒पो अ॒द्यान्व॑चारिषँ॒ रसे॑न॒ सम॑सृक्ष्महि ।
Sentence: b
पय॑स्वानग्न॒ आग॑मं॒ तं मा॒ सँ सृ॑ज॒ वर्च॑सा प्र॒जया॑ च॒ धने॑न च ।।
Verse: 23
Sentence: a
एधो॑ स्येधिषी॒महि॑ ।
Sentence: b
स॒मिद॑सि॒ तेजो॑ सि॒ तेजो॒ मयि॑ धेहि ।
Sentence: c
स॒मा व॑वर्ति पृथि॒वी स॑मु॒षाः समु॒ सूर्यः॑ ।
Sentence: d
समु॒ विश्व॑मि॒दं जग॑त् ।
Sentence: e
वै॑श्वान॒रज्यो॑तिर्भूयासं वि॒भून्कामा॒न्व्य॑श्नवै॒ भूः स्वाहा॑ ।।
Verse: 24
Sentence: a
अ॒भ्या द॑धामि स॒मिध॒मग्ने॑ व्रतपते॒ त्वयि॑ ।
Sentence: b
व्र॒तं च॑ श्र॒द्धां चोपै॑मी॒न्धे त्वा॑ दीक्षि॒तो अ॒हम् ।।
Verse: 25
Sentence: a
यत्र॒ ब्रह्म॑ च क्ष॒त्रं च॑ स॒म्यञ्चो॒ चर॑तः स॒ह ।
Sentence: b
तं लो॒कं पुण्यं॒ प्र ज्ञे॑षं॒ यत्र॑ दे॒वाः स॒हाग्निना॑ ।।
Verse: 26
Sentence: a
यत्रेन्द्र॑श्च वा॒युश्च॑ स॒म्यञ्चो॒ चर॑तः स॒ह ।
Sentence: b
तं लो॒कं पुण्यं॒ प्र ज्ञे॑षं॒ यत्र॑ से॒दिर्न वि॒द्यते॑ ।।
Verse: 27
Sentence: a
अँ॒शुना॑ ते अँ॒शुः पृ॑च्यतां॒ परु॑षा॒ परुः॑ ।
Sentence: b
ग॒न्धस्ते॒ सोम॑मवतु॒ मदा॑य॒ रसो॒ अच्यु॑तः ।।
Verse: 28
Sentence: a
सि॒ञ्चन्ति॒ परि॑ षिञ्च॒न्त्युत्सि॑ञ्चन्ति पु॒नन्ति॑ च ।
Sentence: b
सुरा॑यै बभ्र्वै॒ मदे॑ किं॒त्वो व॑दति किं॒त्वः ।।
Verse: 29
Sentence: a
धा॒नाव॑न्तं कर॒म्भिण॑मपू॒पव॑न्तमु॒क्थिन॑म् ।
Sentence: b
इन्द्र॑ प्रा॒तर्जु॑षस्व नः ।।
Verse: 30
Sentence: a
बृ॒हदिन्द्रा॑य गायत॒ मरु॑तो वृत्र॒हन्त॑मम् ।
Sentence: b
येन॒ ज्योति॒रज॑नयन्नृता॒वृधो॑ दे॒वं दे॒वाय॒ जागृ॑वि ।।
Verse: 31
Sentence: a
अध्व॑र्यो॒ अद्रि॑भिः सु॒तँ सोमं॑ प॒वित्र॒ आ न॑य ।
Sentence: b
पु॑नी॒हीन्द्रा॑य॒ पात॑वे ।।
Verse: 32
Sentence: a
यो भू॒ताना॒मधि॑पति॒र्यस्मिं॑ लो॒का अधि॑ श्रि॒ताः ।
Sentence: b
य ईशे॑ मह॒तो म॒हाँस्तेन॑ गृह्णामि॒ त्वाम॒हं मयि॑ गृह्णामि॒ त्वाम॒हम् ।।
Verse: 33
Sentence: a
उ॑पया॒मगृ॑हीतो स्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑ ।
Sentence: b
ए॒ष ते॒ योनि॑र॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑ ।।
Verse: 34
Sentence: a
प्रा॑ण॒पा मे॑ अपान॒पाश्च॑क्षु॒ष्पाः श्रो॑त्र॒पाश्च॑ मे ।
Sentence: b
वाचो॑ मे वि॒श्वभे॑षजो॒ मन॑सो सि वि॒लाय॑कः ।।
Verse: 35
Sentence: a
अ॒श्विन॑कृतस्य ते॒ सर॑स्वतिकृत॒स्येन्द्रे॑ण सु॒म्त्राम्णा॑ कृ॒तस्य॑ ।
Sentence: b
उप॑हूत॒ उप॑हूतस्य भक्षयामि ।।
Verse: 36
Sentence: a
समि॑द्ध॒ इन्द्र॑ उ॒षसा॒मनी॑के पुरो॒रुचा॑ पूर्व॒कृद्वा॑वृधा॒नः ।
Sentence: b
त्रि॒भिर्देवैस्त्रिँ॒शता॒ वज्र॑बाहुर्ज॒घान॑ वृ॒त्रं वि दुरो॑ ववार ।।
Verse: 37
Sentence: a
नरा॒शँसः॒ प्रति॒ शूरो॒ मिमा॑न॒स्तनू॒नपा॒त्प्रति॑ य॒ज्ञस्य॒ धाम॑ ।
Sentence: b
गोभि॑र्व॒पावा॒न्मधु॑ना सम॒ञ्जन्हिर॑ण्यैश्च॒न्द्री य॑जति॒ प्रचे॑ताः ।।
Verse: 38
Sentence: a
ई॑डि॒तो देवै॒र्हरि॑वाँ अभि॒ष्टिरा॒जुह्वा॑नो ह॒विषा॒ शर्ध॑मानः ।
Sentence: b
पु॑रंद॒रो गो॑त॒भिद्वज्र॑बाहु॒रा या॑तु य॒ज्ञमुप॑ नो जुषा॒णः ।।
Verse: 39
Sentence: a
जु॑षा॒णो ब॒र्हिर्हरि॑वान्न॒ इन्द्रः॑ प्रा॒चीनँ॑ सीदत्प्र॒दिशा॑ पृथि॒व्याः ।
Sentence: b
उ॑रु॒प्रथाः॒ प्रथ॑मानँ स्यो॒नमा॑दित्यैर॒क्तं वसु॑भिः स॒जोषाः॑ ।।
Verse: 40
Sentence: a
इन्द्रं॒ दुरः॑ कव॒ष्यो॒ धाव॑माना॒ वृषा॑णं यन्तु॒ जन॑यः सु॒पत्नीः॑ ।
Sentence: b
द्वारो॑ दे॒वीर॒भितो॒ वि श्र॑यन्ताँ सु॒वीरा॑ वी॒रं प्रथ॑माना॒ महो॑भिः ।।
Verse: 41
Sentence: a
उ॒षासा॒नक्ता॑ बृह॒ती बृ॒हन्तं॒ पय॑स्वती सु॒दुघे॒ शूर॒मिन्द्र॑म् ।
Sentence: b
तन्तुं॑ त॒तं पेश॑सा सं॒वय॑न्ती दे॒वानां॑ दे॒वं य॑जतः सुरु॒क्मे ।।
Verse: 42
Sentence: a
दै॑व्या॒ मिमा॑ना॒ मनु॑षः पुरु॒त्रा होता॑रा॒विन्द्रं॑ प्रथ॒मा सु॒वाचा॑ ।
Sentence: b
मू॒र्ह्दन्य॒ज्ञस्य॒ मधु॑ना॒ दधा॑ना प्रा॒चीनं॒ ज्योति॑र्ह॒विषा॑ वृधातः ।।
Verse: 43
Sentence: a
ति॒स्रो दे॒वीर्ह॒विषा॒ वर्ध॑माना॒ इन्द्रं॑ जुषा॒णा जन॑यो॒ न पत्नीः॑ ।
Sentence: b
अच्छि॑न्नं॒ तन्तुं॒ पय॑सा॒ सर॑स्व॒तीडा॑ दे॒वी भार॑ती वि॒श्वतू॑र्तिः ।।
Verse: 44
Sentence: a
त्वष्टा॒ दध॒च्छुष्म॒मिन्द्रा॑य॒ वृष्णे पा॑को चिष्टुर्य॒शसे॑ पु॒रूणि॑ ।
Sentence: b
वृषा॒ यज॒न्वृष॑णं॒ भूरि॑रेता मू॒र्धन्य॒ज्ञस्य॒ सम॑नक्तु दे॒वान् ।।
Verse: 45
Sentence: a
वन॒स्पति॒रव॑सृष्टो॒ न पाशै॒स्त्मन्या॑ सम॒ञ्जञ्छ॑मि॒ता न दे॒वः ।
Sentence: b
इन्द्र॑स्य हव्यैर्ज॒ठरं॑ पृणा॒नः स्वदा॑ति य॒ज्ञं मधु॑ना घृ॒तेन॑ ।।
Verse: 46
Sentence: a
स्तो॒काना,॒॑ इन्दुं॒ प्रति॒ शूर॒ इन्द्रो॑ वृषा॒यमा॑णो वृष॒भस्तु॑रा॒षाट् ।
Sentence: b
घृ॑त॒प्रुषा॒ मन॑सा॒ मोद॑मानाः॒ स्वाहा॑ दे॒वा अ॒मृता॑ मादयन्ताम् ।।
Verse: 47
Sentence: a
आ या॒त्विन्द्रो व॑स॒ उप॑ न इ॒ह स्तु॒तः स॑ध॒माद॑स्तु॒ शूरः॑ ।
Sentence: b
वा॑वृधा॒नस्तवि॑षी॒र्यस्य॑ पू॒र्वीर्द्यौ॒र्न क्ष॒त्रम॒भिभू॑ति॒ पुष्या॑त् ।।
Verse: 48
Sentence: a
आ न॒ इन्द्रो॑ दू॒रादा न॑ आ॒साद॑भिष्टि॒कृदव॑से यासदु॒ग्रः ।
Sentence: b
ओजि॑ष्ठेभिर्नृ॒पति॒र्वज्र॑बाहुः सं॒गे स॒मत्सु॑ तु॒र्वणिः॑ पृत॒न्यून् ।।
Verse: 49
Sentence: a
आ न॒ इन्द्रो॒ हरि॑भिर्या॒त्वच्छा॑र्वाची॒नो व॑से॒ राध॑से च ।
Sentence: b
तिष्ठा॑ति व॒ज्री म॒घवा॑ विर॒प्शीमं य॒ज्ञमनु॑ नो॒ वाज॑सातौ ।।
Verse: 50
Sentence: a
त्रा॒तार॒मिन्द्र॑मवि॒तार॒मिन्द्रँ॒ हवे॑हवे सु॒हवँ॒ शूर॒मिन्द्र॑म् ।
Sentence: b
ह्वया॑मि श॒क्रं पु॑रुहू॒तमिन्द्रँ॑ स्व॒स्ति नो॑ म॒घवा॑ धा॒त्विन्द्रः॑ ।।
Verse: 51
Sentence: a
इन्द्रः॑ सु॒त्रामा॒ स्ववाँ॒ अवो॑भिः सुमृडी॒को भ॑वतु वि॒श्ववे॑दाः ।
Sentence: b
बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम ।।
Verse: 52
Sentence: a
तस्य॑ व॒यँ सु॑मतौ य॒ज्ञिय॒स्यापि॑ भ॒द्रे सौ॑मन॒से स्या॑म ।
Sentence: b
स सु॒त्रामा॒ स्ववाँ॒ इन्द्रो॑ अ॒स्मे आ॒राच्चि॒द्द्वेषः॑ सनु॒तर्यु॑योतु ।।
Verse: 53
Sentence: a
आ मन्द्रैरिन्द्र॒ हरि॑भिर्या॒हि म॒यूर॑रोमभिः ।
Sentence: b
मा त्वा॒ के चि॒न्नि य॑म॒न्विं ना पा॒शिनो ति॒ धन्वे॑व॒ ताँ इ॑हि ।।
Verse: 54
Sentence: a
ए॒वेदिन्द्रं॒ वृष॑णं॒ वज्र॑बाहुं॒ वसि॑ष्ठासो अ॒भ्य॑र्चन्त्यर्कैः ।
Sentence: b
स न॑ स्तु॒तो वी॒रव॑द्धातु॒ गोम॑द्यू॒यं पा॑त स्व॒स्तिभिः॒ सदा॑ नः ।।
Verse: 55
Sentence: a
समि॑द्धो अ॒ग्निर॑श्विना त॒प्तो घ॒र्मो वि॒राट्सु॒तः ।
Sentence: b
दु॒हे धे॒नुः सर॑स्वती॒ सोमँ॑ शु॒क्रमि॒हेन्द्रि॒यम् ।।
Verse: 56
Sentence: a
त॑नू॒पा भि॒षजा॑ सु॒ते॒ स्विनो॒भा सर॑स्वती ।
Sentence: b
अध्वा॒ रजाँ॑सीन्द्रि॒यमिन्द्रा॑य प॒थिभि॑र्वहान् ।।
Verse: 57
Sentence: a
इन्द्रा॒येन्दुँ॒ सर॑स्वती॒ नरा॒शँसे॑न न॒ग्नहु॑म् ।
Sentence: b
अधा॑ताम॒श्विना॒ मधु॑ भेष॒जं भि॒षजा॑ सु॒ते ।।
Verse: 58
Sentence: a
आ॒जुह्वा॑ना॒ सर॑स्व॒तीन्द्रा॑येन्द्रि॒याणि॑ वी॒र्य॑म् ।
Sentence: b
इडा॑भिर॒श्विना॒विषँ॒ समूर्जँ॒ सँ र॒यिं द॑धुः ।।
Verse: 59
Sentence: a
अ॒श्विना॒ नमु॑चेः सु॒तँ सोमँ॑ शु॒क्रं प॑रि॒स्रुता॑ ।
Sentence: b
सर॑स्वती॒ तामाभ॑रद्ब॒र्हिषेन्द्रा॑य॒ पात॑वे ।।
Verse: 60
Sentence: a
क॑व॒ष्यो॑ न॒ व्यच॑स्वतीर॒श्विभ्यां॒ न दुरो॒ दिशः॑ ।
Sentence: b
इन्द्रो॒ न रोद॑सी उ॒भे दु॒हे का॒मान्त्सर॑स्वती ।।
Verse: 61
Sentence: a
उ॒षासा॒नक्ता॑श्विना॒ दिवेन्द्रँ॑ सा॒यमि॑न्द्रियैः ।
Sentence: b
सं॑जाना॒ने सु॒पेश॑सा॒ सम॑ञ्जाते॒ सर॑स्वत्या ।।
Verse: 62
Sentence: a
पा॒तं नो॑ अश्विना॒ दिवा॑ पा॒हि नक्तँ॑ सरस्वति ।
Sentence: b
दै॑व्या हो॒तारा॑ भि॒षजा॑ पा॒तामिन्द्रँ॒ सचा॑ सु॒ते ।।
Verse: 63
Sentence: a
ति॒स्रस्त्रे॒धा सर॑स्वत्य॒श्विना॒ भार॒तीडा॑ ।
Sentence: b
ती॒व्रं प॑रि॒स्रुता॒ सोम॒मिन्द्रा॑य सुषुवु॒र्मद॑म् ।।
Verse: 64
Sentence: a
अ॒श्विना॑ भेष॒जं मधु॑ भेष॒जं नः॒ सर॑स्वती ।
Sentence: b
इन्द्रे॒ त्वष्टा॒ यशः॒ श्रियँ॑ रू॒पँरू॑पमधुः सु॒ते ।।
Verse: 65
Sentence: a
ऋ॑तु॒थेन्द्रो॒ वन॒स्पतिः॑ शशमा॒नः प॑रि॒स्रुता॑ ।
Sentence: b
की॒लाल॑म॒श्विभ्यां॒ मधु॑ दु॒हे धे॒नुः सर॑स्वती ।।
Verse: 66
Sentence: a
गोभि॒र्न सोम॑मश्विना॒ मास॑रेण परि॒स्रुता॑ ।
Sentence: b
सम॑धातँ॒ सर॑स्वत्या॒ स्वाहेन्द्रे॑ सु॒तं मधु॑ ।।
Verse: 67
Sentence: a
अ॒श्विना॑ ह॒विरि॑न्द्रि॒यं नमु॑चेर्धि॒या सर॑स्वती ।
Sentence: b
आ शु॒क्रमा॑सु॒राद्वसु॑ म॒घमिन्द्रा॑य जभ्रिरे ।।
Verse: 68
Sentence: a
यम॒श्विना॒ सर॑स्वती ह॒विषेन्द्र॒मव॑र्धयन् ।
Sentence: b
स बि॑धेद व॒लं म॒घं नमु॑चावासु॒रे सचा॑ ।।
Verse: 69
Sentence: a
तमिन्द्रँ॒ सचा॒श्विनो॒भा सर॑स्वती ।
Sentence: b
दधा॑ना अ॒भ्य॑नूषत ह॒विषा॑ य॒ज्ञ इ॑न्द्रियैः ।।
Verse: 70
Sentence: a
य इन्द्र॑ इन्द्रि॒यं द॒धुः स॑वि॒ता वरु॑णो॒ भगः॑ ।
Sentence: b
स सु॒त्रामा॑ ह॒विष्प॑ति॒र्यज॑मानाय सश्चत ।।
Verse: 71
Sentence: a
स॑वि॒ता वरु॑णो दध॒द्यज॑मानाय दा॒शुषे॑ ।
Sentence: b
आद॑त्त॒ नमु॑चे॒र्वसु॑ सु॒त्रामा॒ बल॑मिन्द्रि॒यम् ।।
Verse: 72
Sentence: a
वरु॑णः क्ष॒त्रमि॑न्द्रि॒यं भगे॑न सवि॒ता श्रिय॑म् ।
Sentence: b
सु॒त्रामा॒ यश॑सा॒ बलं॒ दधा॑ना य॒ज्ञमा॑शत ।।
Verse: 73
Sentence: a
अ॒श्विना॒ गोभि॑रिन्द्रि॒यमश्वे॑भिर्वी॒र्यं॒ बल॑म् ।
Sentence: b
ह॒विषेन्द्रँ॒ सर॑स्वती॒ यज॑मानमवर्दयन् ।।
Verse: 74
Sentence: a
ता नास॑त्या सु॒पेश॑सा॒ हिर॑ण्यवर्तनी॒ नरा॑ ।
Sentence: b
सर॑स्वती ह॒विष्म॒तीन्द्र॒ कर्म॑सु नो वत ।।
Verse: 75
Sentence: a
ता भि॒षजा॑ सु॒कर्म॑णा॒ सा सु॒दुघा॒ सर॑स्वती ।
Sentence: b
स वृ॑त्र॒हा श॒तक्र॑तु॒रिन्द्रा॑य दधुरिन्द्रि॒यम् ।।
Verse: 76
Sentence: a
यु॒वँ सु॒राम॑मश्विना॒ नमु॑चावासु॒रे सचा॑ ।
Sentence: b
वि॑पिपा॒नाः सर॑स्व॒तीन्द्रं॒ कर्म॑स्वावत ।।
Verse: 77
Sentence: a
पु॒त्रमि॑व पि॒तरा॑व॒श्विनो॒भेन्द्रा॒वथुः॒ काव्यै॑र्दँ॒सना॑भिः ।
Sentence: b
यत्सु॒रामं॒ व्यपि॑बः॒ शची॑भिः॒ सर॑स्वती त्वा मघवन्नभिष्णक् ।।
Verse: 78
Sentence: a
यस्मि॒न्नश्वा॑स ऋष॒भास॑ उ॒क्षणो॑ व॒शा मे॒षा अ॑वसृ॒ष्टास॒ आहु॑ताः ।
Sentence: b
की॑लाल॒पे सोम॑पृष्ठाय वे॒धसे॑ हृ॒दा म॒तिं ज॑नये॒ चारु॑म॒ग्नये॑ ।।
Verse: 79
Sentence: a
अहा॑व्यग्ने ह॒विरा॒स्ये॑ ते स्रु॒ची॑व घृ॒तं च॒म्वी॑व॒ सोमः॑ ।
Sentence: b
वा॑ज॒सनिँ॑ र॒यिम॒स्मे सु॒वीरं॑ प्रश॒स्तं धे॑हि य॒शसं॑ बृ॒हन्त॑म् ।।
Verse: 80
Sentence: a
अ॒श्विना॒ तेज॑सा॒ चक्षुः॑ प्रा॒णेन॒ सर॑स्वती वी॒र्य॑म् ।
Sentence: b
वा॒चेन्द्रो॒ बले॒नेन्द्रा॑य दधुरिन्द्रि॒यम् ।।
Verse: 81
Sentence: a
गोम॑दू॒ षु णा॑सत्या॒ अश्वा॑वद्यातमश्विना ।
Sentence: b
व॒र्ती रु॑द्रा नृ॒पाय्य॑म् ।।
Verse: 82
Sentence: a
न यत्परो॒ नान्त॑र आद॒धर्ष॑द्वृषण्वसू ।
Sentence: b
दुः॒शँसो॒ मर्त्यो॑ रि॒पुः ।।
Verse: 83
Sentence: a
ता न॒ आ वो॑ढमश्विना र॒यिं पि॒शङ्ग॑संदृशम् ।
Sentence: b
धिष्ण्या॑ वरिवो॒विद॑म् ।।
Verse: 84
Sentence: a
पा॑व॒का नः॒ सर॑स्वती॒ वाजे॑भिर्वा॒जिनी॑वती ।
Sentence: b
य॒ज्ञं व॑ष्टु धि॒याव॑सुः ।।
Verse: 85
Sentence: a
चो॑दयि॒त्री सू॒नृता॑नां॒ चेत॑न्ती सुमती॒नाम् ।
Sentence: b
य॒ज्ञं द॑धे॒ सर॑स्वती ।।
Verse: 86
Sentence: a
म॒हो अर्णः॒ सर॑स्वती॒ प्र चे॑तयति के॒तुना॑ ।
Sentence: b
धियो॒ विश्वा॒ वि रा॑जति ।।
Verse: 87
Sentence: a
इन्द्रा या॑हि चित्रभानो सु॒ता इ॒मे त्वा॒यवः॑ ।
Sentence: b
अण्वी॑भि॒स्तना॑ पू॒तासः॑ ।।
Verse: 88
Sentence: a
इन्द्रा या॑हि धि॒येषि॒तो विप्र॑जूतः सु॒ताव॑तः ।
Sentence: b
उप॒ ब्रह्मा॑णि वा॒घतः॑ ।।
Verse: 89
Sentence: a
इन्द्रा या॑हि॒ तूतु॑जान॒ उप॒ ब्रह्मा॑णि हरिवः ।
Sentence: b
सु॒ते द॑धिष्व न॒श्चनः॑ ।।
Verse: 90
Sentence: a
अ॒श्विना॑ पिबतां॒ मधु॒ सर॑स्वत्या स॒जोष॑सा ।
Sentence: b
इन्द्रः॑ सु॒त्रामा॑ वृत्र॒हा जु॒षन्ताँ॑ सो॒म्यं मधु॑ ।।
This text is part of the
TITUS
edition of
White Yajur-Veda: Vajasaneyi-Samhita (Madhyandina)
.
Copyright
TITUS Project
, Frankfurt a/M, 10.12.2008. No parts of this document may be republished in any form without prior permission by the copyright holder.